Ko e ‘Faʻahinga ʻOku Fanongo Atu Kiate Koé’ ʻE Fakahaofi

 1. Ko e hā ʻoku tau holi kotoa ke fai ʻe hotau kāingá?

“TALU mei heʻeku ako ʻa e moʻoní mo ʻeku loto ke hoko ʻa e tokotaha kotoa ʻi hoku fāmilí ʻo hao fakataha mo au ki Palataisi,” ko e lau ia ha tuofefine ko Pauline.b “Naʻá ku fiemaʻu tautefito ki hoku husepānití, ʻa Wayne pea mo ʻema kiʻi tamasiʻí ke mau kau fakataha ʻi he tauhi kia Sihová.” ʻOku ʻi ai hao kāinga kuo teʻeki ai ke nau hoko ʻo ʻiloʻi mo ʻofa kia Sihova? Mahalo ʻokú ke maʻu ʻa e ongoʻi tatau mo ia naʻe maʻu ʻe Pauline fekauʻaki mo hono fāmilí.

 2. Ko e hā ʻa e ngaahi fehuʻi te tau lāulea ki ai ʻi he kupu ko ení?

² Heʻikai lava ke tau fakamālohiʻi hotau kāingá ke tali ʻa e ongoongo leleí, ka ʻe lava ke tau fakalototoʻaʻi kinautolu ke fakaava honau ʻatamaí mo e lotó ki he pōpoaki ʻo e Tohi Tapú. (2 Tīm. 3:14, 15) Ko e hā ʻoku totonu ai ke tau faifakamoʻoni ki hotau kāingá? Ko e hā ʻoku fiemaʻu ai ke tau fakahāhā ʻa e kaungāongoʻí? Ko e hā ʻe lava ke tau fai ke tokoni ai ki hotau kāingá ke nau hoko ʻo ʻofa kia Sihova ʻo hangē ko kitautolú? Pea ʻe lava fēfē ke tokoniʻi kitautolu ʻe he faʻahinga kotoa ʻi heʻetau fakatahaʻanga fakalotofonuá?

 3. Fakatatau ki he 2 Pita 3:9, ko e hā ʻoku totonu ai ke tau faifakamoʻoni ki hotau kāingá?

³ ʻOku vavé ni ke fakangata ʻe Sihova ʻa e fokotuʻutuʻu ko ení. Ko e faʻahinga pē ʻoku “hehema totonu ki he moʻui taʻengatá” te nau haó. (Ngā. 13:48) ʻOku tau fakamoleki ʻa e taimi lahi mo e ivi ʻi he malanga ki he kau sola ʻi hotau feituʻú, ko ia ʻoku fakanatula pē ke tau loto foki ke kau fakataha mo kitautolu hotau kāingá ʻi he tauhi kia Sihová. Ko ʻetau Tamai ʻofá, ʻa Sihova, ʻoku “ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa ʻa e fakatomalá.”​—Lau ʻa e 2 Pita 3:9.

 4. Ko e hā ʻa e fehālaaki te tau fai nai ʻi he faifakamoʻoni ki hotau kāingá?

⁴ ʻOku fiemaʻu ke tau manatuʻi ʻoku ʻi ai ʻa e founga totonu mo e founga hala ke vahevahe atu ai ʻa e pōpoaki ʻo e fakamoʻuí. Neongo te tau fakapotopoto nai ʻi he taimi ʻoku tau faifakamoʻoni ai ki ha sola, ka ʻe fuʻu fefeka nai ʻetau faifakamoʻoni ki hotau kāingá.

 5. Ko e hā ʻoku totonu ke tau manatuʻi ki muʻa ʻi heʻetau feinga ke vahevahe atu ʻa e moʻoní ki hotau kāingá?

⁵ Ko e tokolahi ʻo kitautolu ʻoku tau manatu atu mo e fakaʻiseʻisa ki he fuofua taimi naʻa tau feinga ai ke faifakamoʻoni ki hotau kāingá pea fakaʻamu naʻe kehe ʻetau fakafeangai kiate kinautolú. Naʻe fai ʻe Paula ʻa e faleʻi ki he kau Kalisitiané: “Tuku ke hoko maʻu pē hoʻomou leá ʻo anga-ʻofa, ʻo fakaifoifo ʻaki ha māsima, koeʻuhi ke mou ʻilo ai ʻa e founga ʻoku totonu ke mou taliʻaki ki he tokotaha taki taha.” (Kol. 4:5, 6) ʻOku lelei ke manatuʻi ʻa e akonaki ko ení ʻi heʻetau fakaofiofi ki hotau kāingá. He ka ʻikai, te tau iku nai ai ʻo fakamavaheʻi kinautolu kae ʻikai fakalotoʻi kinautolu.

6-7. ʻOmai ha fakatātā ʻoku fakahaaʻi ai ʻa e fiemaʻu ke fakahāhā ʻa e kaungāongoʻí ki ha hoa taʻetui.

⁶ Fakahāhā ʻa e kaungāongoʻi. Ko Pauline, naʻe lave ki ai ki muʻá, ʻokú ne pehē: “ʻI he kamatá, naʻá ku loto ke talanoa ki hoku husepānití ʻo fekauʻaki pē mo e ngaahi meʻa fakalaumālie. Naʻe ʻikai haʻama toe talanoa kehe.” Kae kehe, ko e husepāniti ʻo Pauline, ʻa Wayne, naʻe siʻisiʻi ʻene ʻilo Fakatohitapú pea naʻe ʻikai ke ne mahinoʻi ʻa e meʻa naʻe talanoa ki ai ʻa Pauline. Kia Wayne, naʻe hā ngali ko e meʻa pē naʻe fakakaukau ki ai ʻa Pauline ko ʻene lotú. Naʻá ne hohaʻa naʻa ʻoku kau ʻa Pauline ʻi ha kulupu lotu mavahe fakatuʻutāmaki pea kuo takiheeʻi ia.

⁷ ʻOku pehē ʻe Pauline ʻi ha taimi naʻá ne fakamoleki ʻa e ngaahi efiafi mo e fakaʻosinga uike lahi mo hono fanga tokoua mo e fanga tuofāfine fakalaumālié​—ʻi he fakatahá, ʻi he malangá mo e ngaahi fakatahataha fakasōsialé. “ʻI he taimi ʻe niʻihi ʻoku foki mai pē ʻa Wayne ki he ngeʻesi falé peá ne ongoʻi taʻelata,” ko e lau ia ʻa Pauline. Ko hono moʻoní, naʻe ongoʻi taʻelata ʻa Wayne ʻi he ʻikai ke ʻi ai ʻa hono uaifí mo hono fohá. Naʻe ʻikai ke ne ʻilo ʻa e kakai naʻá na feohi mo iá, pea hā ngali ko e ngaahi kaumeʻa foʻou hono uaifí naʻa nau mahuʻinga ange kia Pauline ʻiate ia. ʻI he tali ki ai ʻa Wayne naʻá ne fakamanamana ke veteʻi ʻa Pauline. ʻE lava ke ke sio ki ha founga naʻe mei lava ke kaungāongoʻi ange ai ʻa Pauline?

 8. Fakatatau ki he 1 Pita 3:1, 2, ko e hā ʻa e meʻa ʻoku ngalingali ʻe maongo lahi taha ki hotau kāingá?

⁸ Tuku ke lea ho ʻulungāngá. ʻOku faʻa maongo lahi ange ki hotau kāingá ʻa e meʻa ʻoku tau faí ʻi he meʻa ʻoku tau leaʻakí. (Lau ʻa e 1 Pita 3:1, 2.) Naʻe faai atu pē ʻo ʻiloʻi ʻe Pauline ʻa e moʻoniʻi meʻa ko iá. “Naʻá ku ʻiloʻi naʻe ʻofa ʻa Wayne ʻiate kimaua pea ʻikai ke ne fiemaʻu moʻoni ha vete,” ko ʻene leá ia. “Ka ko ʻene fakamanamaná naʻe ʻai ai ke u ʻiloʻi naʻe pau ke u kamata fai ʻa e ngaahi meʻá ʻi he founga ʻa Sihová. ʻI he ʻikai ke lahi fakamatalá, naʻe fiemaʻu ke u fokotuʻu ha faʻifaʻitakiʻanga lelei fakafou ʻi hoku ʻulungāngá.” Naʻe taʻofi ʻe Pauline ʻene tenge ʻa Wayne ke talanoa fekauʻaki mo e Tohi Tapú, pea naʻe kamata ke ne talanoa mo ia ki he ngaahi meʻa fakaʻahó. Naʻe sio ʻa Wayne naʻá ne hoko ʻo fakamelino ange, pea naʻá ne sio ki heʻena tamasiʻí naʻe talangofua ange. (Pal. 31:18, 27, 28) ʻI he taimi naʻe fakatokangaʻi ai ʻe Wayne ʻa e ola lelei ʻo e pōpoaki Fakatohitapú ki hono fāmilí, naʻá ne fakaava ai hono ʻatamaí mo e lotó ki he pōpoaki mei he Folofola ʻa e ʻOtuá.​—1 Kol. 7:12-14, 16.

 9. Ko e hā kuo pau ai ke tau kītakí?

⁹ Kītaki ʻi he feinga ke tokoniʻi ho kāingá. ʻOku fokotuʻu mai ʻe Sihova ʻa e faʻifaʻitakiʻangá kiate kitautolu. ʻOkú ne “toutou” ʻoange ki he kakaí ʻa e faingamālie ke nau tali ʻa e ongoongo leleí pea maʻu e moʻuí. (Sel. 44:4) Pea naʻe tala ange ʻe he ʻapositolo ko Paulá kia Tīmote ke kītaki ʻi hono tokoniʻi ʻa e niʻihi kehé. Ko e hā hono ʻuhingá? Koeʻuhi ʻi heʻene fai peheé, te ne fakatou fakahaofi ai ia mo e faʻahinga ko ia ʻoku nau fanongo kiate iá. (1 Tīm. 4:16) ʻOku tau ʻofa ʻi hotau kāingá, ko ia ʻoku tau loto ke nau ʻiloʻi ʻa e moʻoni ʻoku maʻu ʻi he Folofola ʻa e ʻOtuá. Ko e ngaahi lea mo e ʻulungaanga ʻo Pauline naʻe faai atu pē ʻo ne tākiekina lelei hono fāmilí. ʻOkú ne fiefia ʻi he taimí ni ʻi he tauhi kia Sihova fakataha mo hono husepānití. ʻOkú na fakatou tāimuʻa, pea ʻoku ngāue ʻa Wayne ko ha mātuʻa.

10. Ko e hā ʻoku fiemaʻu ai ke tau kātakí?

¹⁰ Hoko ʻo kātaki. ʻI he taimi ʻoku tau muimui ai ki he ngaahi tuʻunga ʻa e ʻOtuá, ʻe faingataʻa nai ki hotau kāingá ke tali ʻetau ngaahi tui mo e founga moʻui foʻoú. Ko e ʻuluaki meʻa ʻoku nau faʻa fakatokangaʻí ʻoku ʻikai ke tau toe kau mo kinautolu ʻi hono kātoangaʻi ʻa e ngaahi kātoanga fakalotú pea ʻikai ke toe kau ʻi he ngaahi ngāue fakapolitikalé. ʻI he kamatá, ʻoku ʻita nai ʻa e kāinga ʻe niʻihi ʻiate kitautolu. (Māt. 10:35, 36) Ka ʻoku ʻikai totonu ke tau foʻi ʻiate kinautolu. Kapau ʻe tuku ʻetau feinga ke tokoni kiate kinautolu ke mahinoʻi ʻetau tuí, ʻoku tau hoko ai ʻo fakamāuʻi kinautolu ʻoku ʻikai ke nau tuha mo hono maʻu ʻa e moʻui taʻengatá. Kuo ʻikai ke ʻomai ʻe Sihova kiate kitautolu ʻa e faifakamāú​—kuó ne vaheʻi ʻa e ngafa ko iá kia Sīsū. (Sione 5:22) Kapau ʻoku tau kātaki, ʻe faai atu pē nai ʻo loto-lelei hotau kāingá ke fanongo ki heʻetau pōpoakí.​—Sio ki he puha “Ngāueʻaki ʻEtau Uepisaití ke Faiako.”

11-13. Ko e hā ʻokú ke ako mei he anga ʻo e fakafeangai ʻa Alice ki heʻene ongo mātuʻá?

¹¹ Hoko ʻo tuʻumaʻu kae fakapotopoto. (Pal. 15:2) Fakakaukau ki he faʻifaʻitakiʻanga ʻa Alice. Naʻá ne ako fekauʻaki mo Sihova ʻi he taimi naʻá ne nofo ai ʻo mamaʻo mei heʻene ongo mātuʻá, ʻa ia naʻá na poupou lahi ki he meʻa fakapolitikalé pea fakaʻikaiʻi-ʻOtua. Naʻá ne ʻiloʻi, naʻe fiemaʻu ke ne tala kiate kinaua ʻi he vave taha ʻe ala lavá ʻa e ngaahi meʻa lelei naʻá ne akó. “Kapau te ke tatali ki ha taimi ʻamui ange ke toki fakahaaʻi ʻa e liliu hoʻo tuí mo e tōʻongá,” ko e lau ia ʻa Alice, “ʻe ʻohovale lahi ange ai ho fāmilí.” Naʻá ne fai ʻa e ngaahi tohi ki heʻene ongo mātuʻá, ʻo ʻeke ange pe ko e hā ʻena fakakaukau ki he akonaki ʻa e Tohi Tapú fekauʻaki mo e ngaahi kaveinga naʻá ne ʻamanaki ʻe fakamānako kiate kinaua, hangē ko e ʻofá. (1 Kol. 13:1-13) Naʻá ne fakamālō ki heʻene ongo mātuʻá ki hono ʻohake iá pea tokangaʻi iá, pea naʻá ne ʻave mo e ngaahi meʻaʻofa. ʻI heʻene ʻaʻahi ki he ʻapi ʻene ongo mātuʻá, naʻá ne fai ʻa e meʻa kotoa naʻá ne malavá ke tokoni ki heʻene faʻeé ʻi he ngāue fakaʻapí. ʻI he kamatá, naʻe ʻikai tali lelei ʻe heʻene ongo mātuʻá ʻa e taimi naʻe tala ange ai ʻe Alice ʻene tui foʻoú.

¹² ʻI he ʻi ʻapi ʻa Alice mo ʻene ongo mātuʻá, naʻá ne pipiki ki heʻene taimi-tēpile lau Tohi Tapú. “Naʻe tokoni heni ki heʻeku faʻeé ke ne mahinoʻi ʻa e mahuʻinga kiate au ʻa e Tohi Tapú,” ko e lau ia ʻa Alice. Lolotonga iá, naʻe fili ʻa e tamai ʻa Alice ke ako ha meʻa mei he Tohi Tapú koeʻuhi ke ne mahinoʻi ʻa e ʻuhinga ʻo e liliu ʻa e fakakaukau hono ʻofefiné, pea naʻá ne loto ke maʻu ha hala ʻi he Tohi Tapú. “Naʻá ku ʻoange kiate ia ha Tohi Tapu,” ko e lau ia ʻa Alice, “pea naʻá ku hiki ai ha nouti fakafoʻituitui kiate ia.” Ko e hā ʻa e olá? ʻI he ʻikai ke maʻu ai ha halá, naʻe maongo moʻoni ki he tamai ʻa Alice ʻa e meʻa naʻá ne lau ʻi he Folofola ʻa e ʻOtuá.

¹³ ʻOku fiemaʻu ke tau tuʻumaʻu kae fakapotopoto, neongo kapau kuo pau ke tau kātekina ha ʻahiʻahi. (1 Kol. 4:12e) Ko e fakatātaá, ko Alice, naʻá ne kātekina ʻa e fakafepaki mei heʻene faʻeé. “ʻI heʻeku papitaisó, naʻe ui au ʻe heʻeku faʻeé ko ha ‘taʻahine kovi.’” Naʻe fēfē ʻa e fakafeangai ʻa Alice? “ʻI he ʻikai tukunoaʻi ʻa e ʻīsiu ko iá, naʻá ku fakamatalaʻi anga-fakaʻapaʻapa ange kuó u fakapapauʻi ke hoko ko e taha ʻo e Kau Fakamoʻoni ʻa Sihová pea te u pipiki ki he fili ko iá. Naʻá ku feinga ke fakapapauʻi ki heʻeku faʻeé ʻoku ou ʻofa moʻoni ʻiate ia. Naʻá ma fakatou tangi, pea naʻá ku kuki ha houa kai ifo maʻana. Mei ai ʻo faai mai, naʻe kamata ke fakamoʻoniʻi ʻe heʻeku faʻeé ʻoku ʻai ʻe he Tohi Tapú au ko ha tokotaha lelei ange.”

14. Ko e hā kuo pau ai ke ʻoua te tau foʻi ʻi he tenge ke fakangalokú?

¹⁴ ʻE ʻosi atu nai ʻa e taimi ki muʻa ke mahinoʻi kakato ʻe hotau kāingá ʻa e mahuʻinga kiate kitautolu ʻa e tauhi kia Sihová. Ko e fakatātaá, ʻi he fili ʻa Alice ke tāimuʻa kae ʻikai ke tuli ki he taumuʻa naʻe fili ʻe heʻene ongo mātuʻá, naʻe toe tangi ʻene faʻeé. Ka naʻe hanganaki tuʻumaʻu ʻa Alice. “Kapau te ke foʻi ʻi he tenge ʻi ha tafaʻaki ʻe taha,” ko e lau ia ʻa Alice, “ko ho fāmilí ʻoku ngalingali te nau tenge koe ʻi he ngaahi meʻa kehé. Ka ʻo kapau ʻokú ke anga-lelei kae tuʻumaʻu ʻi ho fāmilí, ʻe fanongo atu nai ʻa e niʻihi ʻo kinautolu kiate koe.” Ko e meʻa ia naʻe hoko ʻi he tuʻunga ʻo Alice. ʻOku fakatou tāimuʻa ʻi he taimí ni ʻene ongo mātuʻá, pea ko ʻene tamaí ko ha mātuʻa.

15. Fakatatau ki he Mātiu 5:14-16 mo e 1 Pita 2:12, ʻe anga-fēfē nai ʻa e tokoni ʻa e ‘ngaahi ngāue lelei’ ʻa e niʻihi kehé ki hotau kāingá?

¹⁵ ʻOku tohoakiʻi mai ʻe Sihova ʻa e kakaí kiate ia fakafou ʻi he ‘ngaahi ngāue lelei’ ʻa e fakatahaʻanga Kalisitiané. (Lau ʻa e Mātiu 5:14-16; 1 Pita 2:12.) Kapau ko ho hoá ʻoku ʻikai ko ha taha ʻo e Kau Fakamoʻoni ʻa Sihová, kuó ne fetaulaki mo e ngaahi mēmipa ʻi ho fakatahaʻangá? Ko Pauline, naʻe lave ki ai ki muʻá, naʻá ne fakaafeʻi ʻa e fanga tokouá mo e fanga tuofāfiné ki hono ʻapí koeʻuhi ke lava ʻa hono husepānití, ʻa Wayne, ʻo ʻiloʻi kinautolu. ʻOku manatuʻi ʻe Wayne ʻa e founga naʻe tokoniʻi ai ia ʻe ha tokoua ke holoki ʻa e ngaahi ʻā vahevahe ʻo e taʻefemahinoʻakí: “Naʻá ne mālōlō ʻi he ngāué ʻi he ʻaho ʻe taha koeʻuhi pē ke ne haʻu ʻo sio vaʻinga he televīsoné mo au. Pea naʻá ku pehē, ‘Ko ha tangata anga-maheni pē ia!’”

16. Ko e hā ʻoku totonu ai ke tau fakaafeʻi hotau kāingá ki he ngaahi fakatahá?

¹⁶ Ko e founga lelei ʻe taha ke tokoni ai ki hotau kāingá ko hono fakaafeʻi kinautolu ke maʻu ʻa e fakataha ʻa e fakatahaʻangá mo kitautolu. (1 Kol. 14:24, 25) Ko e fuofua fakataha naʻe maʻu ʻe Wayne ko e Fakamanatú​—koeʻuhí naʻe fai ʻi he tuku ʻa e ngāué pea ko e polokalamá naʻe nounou feʻunga. “Naʻe ʻikai ke u mahinoʻi ʻa e meʻa naʻe fai ki ai ʻa e malangá,” ko ʻene leá ia, “naʻá ku manatuʻi ʻa e kakaí. Naʻa nau haʻu kiate au pea talitali lelei au pea lulululu fiefia mai. Naʻe lava ke u tala naʻa nau loto-moʻoni.” Ko ha ongo meʻa ʻe taha naʻá na ʻosi anga-lelei kia Pauline, ʻo tokoni kiate ia mo ʻene kiʻi tamasiʻí ʻi he fakatahá mo e ngāue fakafaifekaú. Ko ia ʻi he faai atu ʻo loto ʻa Wayne ke ne mahinoʻi lahi ange ʻa e tui foʻou ʻa Pauline, naʻá ne kole ki he husepānití ke ako ʻa e Tohi Tapú mo ia.

17. Ko e hā ʻoku totonu ke ʻoua te tau tukuakiʻi kitautolu fekauʻaki mo iá, ka ko e hā kuo pau ai ke ʻoua ʻaupito te tau foʻi ʻi hotau kāingá?

¹⁷ ʻOku tau ʻamanaki ʻe kau fakataha hotau kāingá kotoa mo kitautolu ʻi he tauhi kia Sihová. Kae kehe, neongo ʻa e kotoa ʻetau ngaahi feinga ke tokoniʻi hotau kāingá ke hoko ko e kau sevāniti ʻa e ʻOtuá, heʻikai nai ke nau haʻu ki he moʻoní. Kapau ko e tuʻungá ia, ʻoku totonu ke ʻoua te tau tukuakiʻi kitautolu koeʻuhi ko ʻenau filí. He ko ē, ʻoku ʻikai lava ke tau fakamālohiʻi ha taha ke tali ʻetau ngaahi tuí. Neongo ia, ʻoua ʻe fakamaʻamaʻaʻi ʻa e tākiekina ʻe lava ke hoko ki ho kāingá ʻi heʻenau sio ki hoʻo fiefia ʻi he tauhi kia Sihová. Lotu maʻanautolu. Lea kiate kinautolu ʻi ha founga fakapotopoto. ʻOua ʻe tauholomui! (Ngā. 20:20) Hoko ʻo tuipau ʻe tāpuakiʻi ʻe Sihova hoʻo ngaahi feingá. Pea kapau ʻe fili ʻe ho kāingá ke fanongo kiate koe, ʻe fakahaofi kinautolu!