Tui​—Ko ha ʻUlungaanga Fakatupu Ivi Mālohi

KO E tuí ʻoku ʻi ai hono mālohi lahi. Ko e fakatātaá, neongo ʻoku loto ʻa Sētane ke ne tāmateʻi fakalaumālie kitautolu, ko e tuí ʻe malava ke tau “tāmateʻiʻaki ʻa e ngaahi ngahau vela kotoa ʻa e tokotaha fulikivanú.” (ʻEf. 6:16) Fakataha mo e tuí, ʻe lava ke tau fehangahangai ai mo e ngaahi palopalema hangē ha moʻungá. Naʻe tala ange ʻe Sīsū ki heʻene kau ākongá: “Kapau ʻoku mou maʻu ʻa e tui ʻoku hangē ko e lahi ʻo ha tengaʻi mūsitá, te mou pehē ki he moʻungá ni, ‘Hiki mei heni ki hē,’ pea ʻe hiki ia.” (Māt. 17:20) Koeʻuhi ʻoku malava ʻe he tuí ke fakaivimālohiʻi fakalaumālie kitautolu, ʻoku lelei ke tau fakakaukau ki he ngaahi fehuʻi ko ení: Ko e hā ʻa e tui? ʻOku anga-fēfē hono tākiekina ʻe he tuʻunga hotau lotó ʻetau tuí? ʻE lava fēfē ke tau fakaivimālohiʻi ʻetau tuí? Pea ko hai ʻoku totonu ke tau tui ki aí?​—Loma 4:3.

Ko e tuí ʻoku kau ki ai ʻa e meʻa lahi ange ʻi he tui pē pe ko e lāuʻilo ki he moʻoní, he naʻa mo e “fanga tēmenioó ʻoku nau tui [ʻoku ʻi ai ʻa e ʻOtua] . . . pea nau teteki.” (Sēm. 2:19) Ko e hā leva ʻa e tui?

ʻOku fakamatalaʻi ʻe he Tohi Tapú ʻa e tuí ʻoku ʻi ai hono tafaʻaki ʻe ua. ʻUluakí, “ko e tuí ʻokú ne ʻoatu kiate koe ʻa e tuipau ko e meʻa ʻokú ke ʻamanaki ki aí ʻe hoko moʻoni.” (Hep. 11:1a) Kapau ʻokú ke maʻu ʻa e tuí, ʻokú ke tuipau ko e meʻa kotoa ʻoku leaʻaki ʻe Sihová ʻoku moʻoni pea ʻe fakahoko. Ko e fakatātaá, naʻe tala ʻe Sihova ki he kau ʻIsilelí: “Kapau ʻe lava ke mou maumauʻi ʻeku fuakava ʻo fekauʻaki mo e ʻahó pea mo ʻeku fuakava ʻo fekauʻaki mo e poʻulí, ke taʻofi ʻa e ʻahó mo e poʻulí mei heʻena hoko mai ʻi hona taimi totonú, ko e toki taimi pē ia ʻe lava ke maumauʻi ai ʻa ʻeku fuakava mo ʻeku sevāniti ko Tēvitá.” (Sel. 33:20, 21) ʻOku faifai ange peá ke manavasiʻi naʻa ʻikai ke hopo mo tō ʻa e laʻaá, ʻo ʻai ai ke ʻikai ha ʻaho pe poʻuli? Kapau ʻoku ʻikai ke ke veiveiua ʻi he ngaahi lao ʻo natulá ʻa ia ʻokú ne tauhi ʻa e māmaní ke vilo takai ʻi hono halangá pea vilo takai he laʻaá, ʻoku totonu ke ke veiveiua ʻi he malava ke fakahoko ʻe he Tokotaha-Fakatupu ʻo e ngaahi lao ko ení ʻene ngaahi talaʻofá? Ko hono moʻoní ʻikai!​—ʻAi. 55:10, 11; Māt. 5:18.

Uá, ko e tuí “ko e fakamoʻoni ia ko e meʻa ʻokú ke tui ki aí ʻoku moʻoni neongo ʻoku teʻeki ke ke mātā.” Ko e tuí ʻoku lava ke pehē “ko e fakamoʻoni” pe “fakamoʻoni tuipau” ia ʻo e ngaahi meʻa ʻoku taʻehāmaí ka ʻoku moʻoni. (Hep. 11:1e) ʻI he founga fē? Tau pehē ʻoku ʻeke atu ʻe ha kiʻi tama, ‘ʻOku anga-fēfē hoʻo ʻiloʻi ʻoku ʻi ai ha ʻeá?’ Neongo ʻoku teʻeki ʻaupito ke ke sio ki he ʻeá, ʻoku ngalingali ʻe lava ke ke tokoni ki he kiʻi tamá ke fakaʻuhinga ʻi he fakamoʻoni ʻoku ʻi aí​—ko e mānavá, ko e havilí mo e hā fua. ʻI he tuipau pē ʻa e kiʻi tamá ki he fakamoʻoní, ʻokú ne tali ʻa e ʻi ai ʻa e meʻa ʻoku taʻehāmai kiate iá. ʻI he tuʻunga meimei tatau, ko e tuí ʻoku makatuʻunga ʻi he fakamoʻoni fefeka.​—Loma 1:20.

Koeʻuhi ʻoku makatuʻunga ʻa e tuí ʻi he fakamoʻoni, ke maʻu ʻa e tuí kuo pau ke ʻuluaki maʻu ʻe ha taha “ha ʻilo totonu ki he moʻoní.” (1 Tīm. 2:4) Ka ʻoku ʻikai feʻunga pē ia. Naʻe tohi ʻe he ʻapositolo ko Paulá: “Ke māʻoniʻoni ha tangata, kuo pau ke ne ngāueʻi ʻa e tuí ʻi hono lotó.” (Loma 10:10) Ko ha tokotaha kuo pau ke ʻikai ngata pē ʻene tui ki he moʻoní kae fakamahuʻingaʻi foki ia. Ko e toki taimi pē ia ʻe ueʻi ai ia ke ne ngāueʻi ʻene tuí, ʻa ia, ke ngāue ʻo fehoanaki mo e moʻoní. (Sēm. 2:20) Ko ha tokotaha ʻoku ʻikai ke ne houngaʻia loto-moʻoni ʻi he moʻoní te ne talitekeʻi nai naʻa mo e fakamoʻoni fakatupu tuipaú kapau ʻokú ne pipiki ki he ngaahi fakakaukau fakamahaló pe kumi kalofanga koeʻuhi ko ʻene ngaahi holi fakakakanó. (2 Pita 3:3, 4; Sute 18) ʻI he taimi ʻo e Tohi Tapú, ko e ʻuhinga eni naʻe ʻikai ke fakatupulekina ai ʻe he tokotaha kotoa naʻe sio ki he ngaahi maná ʻa e tuí. (Nōm. 14:11; Sione 12:37) ʻOku fakatupulekina ʻe he laumālie māʻoniʻoni ʻo e ʻOtuá ʻa e tuí ʻi he kakai pē ʻoku nau leleiʻia ange ʻi he moʻoní kae ʻikai ko e loí.​—Kal. 5:22; 2 Tes. 2:10, 11.

ʻI he lotolotonga ʻo e faʻahinga naʻa nau fakahāhā ʻa e tui tuʻu-ki-muʻá ko Tuʻi Tēvita. (Hep. 11:32, 33) Kae kehe, naʻe ʻikai ke maʻu ʻe he tokotaha kotoa ʻi he fāmili ʻo Tēvitá ʻa e tui pehē. Ko e fakatātaá, ʻi he taimi ʻe taha, ko ʻEliapi, ʻa e tokoua lahi taha ʻo Tēvitá, naʻá ne valokiʻi ʻa Tēvita ʻi heʻene hohaʻa fekauʻaki mo e pole ʻa Kolaiaté. (1 Sām. 17:26-28) ʻOku ʻikai ha taha ʻoku fanauʻi mai mo e tuí; pe maʻu tukufakaholo ʻe ha taha ʻa e tuí mei heʻene ongo mātuʻá, ko ia ko e tui ʻa Tēvitá ko e ola ia ʻo hono vahaʻangatae tonu mo e ʻOtuá.

ʻI he Saame 27, ʻoku fakahaaʻi ai ʻe Tēvita ʻa e founga naʻá ne maʻu ai ʻa e tui mālohi peheé. (Veesi 1) Naʻe fakalaulauloto ʻa Tēvita ki heʻene ngaahi hokosia ʻi he kuohilí pea mo e anga ʻo e fakafeangai ʻa Sihova ki hono ngaahi filí. (Veesi 2, 3) Naʻá ne houngaʻia loloto ʻi he fokotuʻutuʻu ʻa Sihova ki he lotú. (Veesi 4) Naʻe lotu ʻa Tēvita ki he ʻOtuá fakataha mo hono kaungātuí ʻi he tāpanekalé. (Veesi 6) Naʻá ne kumi fakamātoato kia Sihova ʻi he lotu. (Veesi 7, 8) Naʻe loto foki ʻa Tēvita ke fakahinohinoʻi ia ʻi he founga ʻa e ʻOtuá. (Veesi 11) Naʻe mātuʻaki mahuʻinga ʻa e ʻulungaanga ko ení kia Tēvita ʻo ne ʻeke ai ʻa e fehuʻi: “Ko fē naʻá ku mei ʻi aí kapau naʻe ʻikai te u tui?”​—Veesi 13.

ʻE lava ke ke maʻu ʻa e tui hangē ko Tēvitá kapau te ke faʻifaʻitaki ki he fakakaukau fakaeʻatamai mo e tōʻonga ʻoku fakahaaʻi ʻi he Saame 27. Koeʻuhi ko e tuí ʻoku makatuʻunga ʻi he ʻilo totonú, ko e lahi ange hoʻo ako ʻa e Folofola ʻa e ʻOtuá mo e ʻū tohi Fakatohitapú, ko e faingofua ange ia ke fakatupulekina ʻa e tafaʻaki ko eni ʻo e fua ʻo e laumālie ʻo e ʻOtuá. (Saame 1:2, 3) Vaheʻi ʻa e taimi ke fakalaulauloto ʻi he taimi ʻokú ke ako aí. Ko e fakalaulaulotó ʻe fakatupulekina ai hoʻo houngaʻiá. ʻI he lahi ange hoʻo houngaʻia kia Sihová, ko e lahi ange ia hoʻo holi ke ngāueʻi hoʻo tuí ʻaki ʻa e lotu kiate ia ʻi he fakataha ʻa e fakatahaʻangá pea talaki hoʻo ʻamanakí ki he niʻihi kehé. (Hep. 10:23-25) Pehē foki, ʻoku tau fakahaaʻi ʻetau tuí ʻi heʻetau hokohoko atu ke “lotu maʻu pē ʻo ʻoua ʻe fiu.” (Luke 18:1-8) Ko ia ai, “lotu maʻu pē” kia Sihova, ʻo falala “ʻokú ne tokanga mai” kiate koe. (1 Tes. 5:17; 1 Pita 5:7) ʻOku ueʻi kitautolu ʻe he tuí ke ngāue, pea ko ʻetau ngāué leva te ne fakaivimālohiʻi ʻetau tuí.​—Sēm. 2:22.

ʻI he efiafi ki muʻa ʻi heʻene pekiá, naʻe tala ʻe Sīsū ki heʻene kau ākongá: “Ngāueʻi ʻa e tui ki he ʻOtuá; ngāueʻi foki ʻa e tui kiate aú.” (Sione 14:1) Ko ia ʻoku fiemaʻu ke tau ngāueʻi ʻa e tuí ʻo ʻikai kia Sihova pē kae pehē foki kia Sīsū. ʻE lava fēfē ke ke ngāueʻi ʻa e tui kia Sīsuú? Tau lāulea angé ki he founga ʻe tolu.

ʻUluakí, vakai ki he huhuʻí ko ha meʻaʻofa fakafoʻituitui ʻa e ʻOtuá kiate koe. Naʻe pehē ʻe he ʻapositolo ko Paulá: “ʻOku ou moʻui ʻo fakatatau ki he tui ki he ʻAlo ʻo e ʻOtuá, ʻa ia naʻá ne ʻofeina au peá ne tuku atu ia koeʻuhi ko aú.” (Kal. 2:20) ʻI hoʻo ngāueʻi ʻa e tui kia Sīsuú, ʻokú ke tui fakapapau ai ʻoku kaunga ʻa e huhuʻí kiate koe, ko e makatuʻunga ia ki hono fakamolemoleʻi hoʻo angahalá, ʻoatu kiate koe ʻa e ʻamanaki ki he moʻui taʻengatá mo e fakapapauʻi lahi taha ia ʻa e ʻofa ʻa e ʻOtuá kiate koé. (Loma 8:32, 38, 39; ʻEf. 1:7) ʻE fakaivimālohiʻi heni koe ke tuku ki he tafaʻakí ʻa e ngaahi ongoʻi ʻikai lelei fekauʻaki mo koé.​—2 Tes. 2:16, 17.

Uá, ʻunuʻunu ofi kia Sihova ʻi he lotu ʻo makatuʻunga ʻi he feilaulau ʻa Sīsuú. Koeʻuhi ko e feilaulau huhuʻí, ʻe lava ai ke tau lotu kia Sihova “ʻaki ʻa e tauʻatāina ʻo e leá, koeʻuhi ke tau aʻusia ʻa e mēsí pea maʻu ʻa e ʻofa maʻataʻataá ke ne tokoniʻi kitautolu ʻi he taimi totonú.” (Hep. 4:15, 16; 10:19-22) Ko e lotú ʻokú ne fakaivimālohiʻi ʻetau fakapapau ke talitekeʻi ʻa e fakatauele ke faiangahalá.​—Luke 22:40.

Tolú, talangofua kia Sīsū. Naʻe tohi ʻe he ʻapositolo ko Paulá: “Ko e tokotaha ʻokú ne ngāueʻi ʻa e tui ki he ʻAló ʻokú ne maʻu ʻa e moʻui taʻengatá; ko e tokotaha ʻokú ne talangataʻa ki he ʻAló heʻikai te ne maʻu ʻa e moʻuí, ka ʻoku nofo maʻu ʻiate ia ʻa e houhau ʻa e ʻOtuá.” (Sione 3:36) Fakatokangaʻi naʻe fakahoa ʻe Sione ʻa e ngāueʻi ʻa e tuí ki he hoko ʻo talangataʻá. Ko ia ai, ʻokú ke ngāueʻi ʻa e tui kia Sīsuú ʻi he taimi ʻokú ke talangofua ai kiate iá. ʻOkú ke talangofua kia Sīsū ʻaki ʻa e muimui ki he “lao ʻa e Kalaisí,” ʻa ia, ko e kotoa ʻene akonakí mo e fekaú. (Kal. 6:2) ʻOkú ke talangofua foki kia Sīsū ʻaki ʻa e muimui ki he tataki ʻokú ne tokonaki mai fakafou ʻi he “tamaioʻeiki anga-tonu mo potó.” (Māt. 24:45) ʻI he talangofua kia Sīsuú, te ke maʻu ai ʻa e mālohi ke kātekina ʻa e ngaahi faingataʻa hangē ha afā.​—Luke 6:47, 48.

ʻI he taimi ʻe taha, naʻe kalanga ha tangata kia Sīsū: “ʻOku ou maʻu ʻa e tuí! Tokoniʻi muʻa au ʻi he tafaʻaki ʻoku vaivai ai ʻeku tuí!” (Mk. 9:24) Naʻá ne maʻu ha tui, ka naʻe anga-fakanānā ʻa e tangata ko ení ʻo ne ʻiloʻi naʻe fiemaʻu kiate ia ʻa e tui lahi ange. Hangē ko e tangata ko ení, ko kitautolu kotoa ʻi ha taimi te tau fiemaʻu ʻa e tui lahi ange. Pea ko kitautolu kotoa ʻe lava ke tau fakaivimālohiʻi ʻetau tuí he taimí ni. Hangē ko ia kuo tau sio ki aí, ʻoku tau fakaivimālohiʻi ʻetau tuí ʻi heʻetau ako ʻa e Folofola ʻa e ʻOtuá pea fakalaulauloto ki ai, ʻa ia ʻe fakalahi ai ʻetau houngaʻia kia Sihová. ʻE toe tupu foki ʻetau tuí ʻo mālohi ange ʻi he taimi ʻoku tau kau fakataha ai mo hotau kaungātuí ʻi he lotu kia Sihová, talaki fakahāhā ʻetau ʻamanakí pea kītaki ʻi he lotu. ʻIkai ko ia pē, ʻi heʻetau fakaivimālohiʻi ʻetau tuí, ʻoku tau maʻu ai ʻa e pale lahi tahá. ʻOku enginaki mai ʻe he Folofola ʻa e ʻOtuá: “Siʻi faʻahinga ʻofeina, mou langa hake hoʻomou tui māʻoniʻoní . . . koeʻuhi ke mou tauhi kimoutolu ʻi he ʻofa ʻa e ʻOtuá.”​—Sute 20, 21.