“Fai ʻa e Fakafetaʻi ʻi he Meʻa Kotoa Pē”

ʻOKÚ KE vakai kiate koe ko ha tokotaha houngaʻia? Ko ha fehuʻi ia kiate kitautolu kotoa ke fakakaukau ki ai. Naʻe tomuʻa tala ʻe he Tohi Tapú, ko e kakai tokolahi ʻi hotau taimí te nau “taʻehoungaʻia.” (2 Tīm. 3:2) Mahalo pē kuó ke fetaulaki mo ha niʻihi ʻoku nau ongoʻi ʻoku ʻi ai ʻenau totonu ki he meʻa kotoa ʻoku nau maʻú, ʻo hangē ia naʻe totonu ke ʻoange kiate kinautolu ʻa e lahi taha ʻo e ngaahi meʻá. ʻOku hā ngali ʻoku nau ongoʻi ʻoku ʻikai fiemaʻu ke nau houngaʻia ʻi he meʻa ʻoku ʻoange kiate kinautolú. ʻIkai ʻokú ke ongoʻi taʻefiemālie ke ʻi he lotolotonga ʻo e kakai peheé?

ʻI hono kehé, ko e kau sevāniti ʻa Sihová, ʻoku tala kiate kinautolu: “Mou fai maʻu pē ʻa e fakamālō.” ʻOku fiemaʻu ke tau “fai ʻa e fakafetaʻi ʻi he meʻa kotoa pē.” (Kol. 3:15; 1 Tes. 5:18) Ko e moʻoni, ko hono fakatupulekina ha laumālie houngaʻia ʻoku lelei pē kiate kitautolu. ʻOku ʻi ai ʻa e ngaahi ʻuhinga ki heni.

Ko e ʻuhinga mālohi ʻe taha kiate kitautolu ke fakatupulekina ha laumālie houngaʻiá he ʻoku lava ke poupou ia ki heʻetau maʻu ha vakai lelei kiate kitautolu. Ko ha tokotaha ʻokú ne fai ha fakamālō ʻokú ne hehema nai ke ongoʻi lelei fekauʻaki mo ia, pea ko e tokotaha ʻoku fai ki ai ʻa e fakamāloó ʻokú ne ongoʻi lelei foki mo ia. Ko e hā ʻoku hoko ai ʻa e houngaʻiá ʻo lelei kiate kitautolu mo e niʻihi ʻoku fai ki aí? Fakakaukau angé ki he fakatātā ko ení: ʻI hoʻo ʻiloʻi naʻe loto-lelei ʻa e niʻihi kehé ke fai ha meʻa maʻau, ʻikai ʻoku fakahuʻunga ai ʻokú ke tuha mo e meʻa ko iá? ʻOku nau tokanga atu kiate koe. ʻI hoʻo ongoʻi ʻa e tokanga ko iá, ʻoku totonu ke ke ongoʻi lelei fekauʻaki mo koe. ʻOku lava ke tau sioloto atu ko e tuʻunga ia naʻe hoko kia Luté. Naʻe fakahāhā ʻe Pōasi ʻa e nima-homo kia Lute. ʻOku ʻikai ha veiveiua naʻe ʻai heni ʻa Lute ke fiefia lahi ʻi heʻene ʻiloʻi naʻe tokanga ange ha taha kiate ia.—Lute 2:10-13.

ʻOku tautefito ʻene totonu ke tau houngaʻia ki he ʻOtuá. ʻOku ʻikai ha veiveiua, kuó ke fakakaukau ʻi ha taimi ki he ngaahi meʻaʻofa lahi fakalaumālie mo fakamatelie kuó ne tokonakí pea hokohoko atu ʻene tokonaki maí. (Teu. 8:17, 18; Ngā. 14:17) Ka ʻi he ʻikai kiʻi fakakaukau pē ki he ngaahi lelei ʻa e ʻOtuá, vaheʻi ha taimi ke fakalaulauloto ki he ngaahi tāpuaki lahi kuo ʻoatu ʻe he ʻOtuá kiate koe pea mo e faʻahinga ʻokú ke ʻofa aí. Ko e fakalaulauloto ki he nima-homo ʻa hoʻo Tokotaha-Fakatupú te ne fakalahi hoʻo houngaʻia kiate iá mo fakaivimālohiʻi hoʻo ongoʻi ki he lahi ʻo ʻene ʻofa mo e houngaʻia ʻiate koé.—1 Sio. 4:9.

Feinga ke fakalaka atu ʻi he fakakaukau pē fekauʻaki mo ʻene nima-homó mo e fakalaulauloto ki heʻene ngaahi tāpuakí; ʻoatu ʻa e fakamālō kia Sihova ki heʻene leleí. (Saame 100:4, 5) Kuo leaʻaki ʻe he niʻihi ʻo pehē “ko hono fakahāhā ʻo e houngaʻiá ʻoku tokoni ia ʻi ha founga mahuʻinga ki he fiefia ʻa e faʻahinga ʻo e tangatá.”

Ko e toe ʻuhinga ʻe taha ʻoku lelei ai ʻa e houngaʻiá kiate koé he ʻoku fakaivimālohiʻi ai ʻa e kaungāmeʻá. Ko kitautolu kotoa ʻoku tau fiemaʻu ke ongoʻi ʻoku fakahoungaʻi kitautolu. ʻI hoʻo fakamālō loto-moʻoni ki ha tokotaha ki haʻane ngāue lelei, te mo hoko ai ʻo kaumeʻa lelei ange. (Loma 16:3, 4) Pehē foki, ko e kakai houngaʻiá ʻoku nau hehema lahi ange ke tokoni ki he kakai kehé. ʻOku nau fakatokangaʻi hono fakahāhā ange kiate kinautolu ʻa e anga-leleí pea ueʻi ai kinautolu ke fai ʻa e meʻa tatau. ʻIo, ko e tokoni ki he niʻihi kehé ʻoku taki atu ia ki he fiefia. Hangē pē ko ia naʻe leaʻaki ʻe Sīsū: “ʻOku ʻi ai ʻa e fiefia lahi ange ʻi he foaki atú ʻi he maʻu maí.”—Ngā. 20:35.

Ko Robert Emmons, ko ha talēkita ʻi ha poloseki ako ʻi he ʻUnivēsiti Kalefōniá fekauʻaki mo e houngaʻiá, naʻá ne pehē: “Ke houngaʻiá, ʻoku fiemaʻu ke tau mahinoʻi ʻoku tau fefalalaʻaki. ʻI he taimi ʻe niʻihi ʻoku tau foaki pea ʻi he taimi ʻe niʻihi ʻoku tau maʻu mai.” Ko hono moʻoní ko ʻetau moʻuí ʻoku tokoniʻi mo poupouʻi ia ʻe he niʻihi kehé ʻi he ngaahi founga lahi. Ko e fakatātaá, ʻoku nau tokonaki mai nai ʻetau meʻakai pe tokangaʻi fakafaitoʻo kitautolu. (1 Kol. 12:21) Ko e tokotaha houngaʻiá ʻokú ne fakahoungaʻi moʻoni ʻa e meʻa ʻoku fai ʻe he niʻihi kehé maʻaná. Ko ia ai, kuó ke tōʻongaʻaki ʻa hono fakahaaʻi ʻa e houngaʻia ʻi he meʻa ʻoku fai ʻe he niʻihi kehé maʻaú?

Ko e ʻuhinga ʻe taha ke fakatupulekina ai ʻa e houngaʻiá he ko e fakamālō ʻoku tokoni ia kiate koe ke tokangataha ai ki he leleí kae ʻikai ki he meʻa ʻoku ʻikai leleí. ʻI ha ʻuhinga, ko ho ʻatamaí ʻoku ngāue ʻo hangē ha meʻa siví. ʻOkú ne fakaʻatā koe ke ke tokangataha ki he ngaahi tafaʻaki pau ʻi ho ʻātakaí lolotonga ia ʻokú ne taʻofi ʻa e ngaahi tafaʻaki kehe. ʻOkú ke hehema ke vakai ki he ngaahi meʻa leleí pea ʻikai loko tokanga ki he ngaahi palopalemá. Ko e lahi ange hoʻo houngaʻiá, ko e lahi ange ia ʻa e meʻa lelei ʻoku lava ke ke sio ki aí, ʻa ia ko hono olá ʻokú ne ʻai koe ke ke toe houngaʻia lahi ange. Ko hono maʻu ha vakai houngaʻia ki he moʻuí ʻe tokoniʻi ai koe ke fai ʻa e meʻa naʻe enginaki mai ʻe he ʻapositolo ko Paulá: “Fiefia maʻu ai pē ʻi he ʻEikí.”—Fil. 4:4.

Te ke ʻiloʻi ko e houngaʻiá ʻokú ne taʻofi ʻa e ngaahi fakakaukau ʻikai leleí. ʻIkai ʻoku faingataʻa ke tau ongoʻi houngaʻia pea ʻi he taimi tatau ʻoku tau meheka, loto-mamahi pe ʻita? Ko e kakai houngaʻiá ʻoku ʻikai ke nau fuʻu fakamatelie. ʻOku nau houngaʻia ʻi he meʻa ʻoku nau maʻú pea ʻikai tokangataha ke maʻu ha meʻa lahi ange.—Fil. 4:12.

ʻI he tuʻunga ko ha Kalisitiané, ʻokú ke ʻiloʻi ʻe saiʻia ʻa Sētane ke ke loto-siʻi pea lōmekina koe ʻe he faingataʻa ʻokú ke fekuki mo ia ʻi he ngaahi ʻaho fakaʻosi ko ení. Te ne saiʻia kapau naʻá ke ohi ha fakakaukau ʻikai lelei mo lāunga. Ko ha fakakaukau pehē ʻe lava ke ne ʻai koe ke ʻikai loko lavameʻa ʻi hono fataki ʻa e ongoongo leleí. Ko hono moʻoní, ko e houngaʻiá ʻoku fekauʻaki vāofi ia mo e fua ʻo e laumālie ʻo e ʻOtuá, kau ai ʻa e fiefia ʻi he lelei kuo foaki atu ʻe he ʻOtuá mo e tui ki heʻene ngaahi talaʻofá kotoa.—Kal. 5:22, 23.

ʻI he hoko ko e taha ʻo e kakai ʻa Sihová, mahalo ʻokú ke loto-tatau mo e meʻa kuo leaʻaki ʻi he kupu ko ení fekauʻaki mo e houngaʻiá. Ka, ʻokú ke ʻiloʻi ko ha vakai houngaʻia mo pau ʻoku ʻikai ke hoko fakanatula mai ia. Neongo ia, ʻoua ʻe ʻai ia ke ne fakalotosiʻiʻi koe. ʻE lava ke ke fakatupulekina mo tauhi maʻu ha vakai houngaʻia. Anga-fēfē? Vaheʻi ʻa e taimi ʻi he ʻaho taki taha ke fakakaukau fekauʻaki mo e ngaahi tafaʻaki ʻe niʻihi ʻi hoʻo moʻuí ʻa ia ʻoku lava ke ke houngaʻia ai. Ko e lahi ange hoʻo fai iá, ʻe fakanatula ange ai hoʻo hehema ke houngaʻiá. ʻE ʻai ai ke ke fiefia lahi ange ʻi he faʻahinga ʻoku nau tokangataha ki he ngaahi faingataʻa ʻi he moʻuí. Nōfoʻi ʻi he ngaahi meʻa lelei ʻoku fai ʻe he ʻOtuá mo e niʻihi kehé ʻa ia ʻoku fakalototoʻa kiate koé, peá ke fiefia ai. ʻE aʻu nai ʻo ke hiki ia ʻi ha tohi. ʻI aí, ʻe lava ke ke hiki ha meʻa ʻe ua pe tolu ʻokú ke houngaʻia ai ʻi he ʻaho ko iá.

Ko e niʻihi kuo nau ako fekauʻaki mo ení ʻoku nau pehē ko e “fakahāhā maʻu pē ʻa e houngaʻiá ʻoku lava ke ne liliu ʻa e founga ʻoku ngāue ai hotau ʻutó ke fakakaukau maʻu pē ki ha meʻa lelei.” Ko ha tokotaha houngaʻia ko ha tokotaha fiefia ange ia. Ko ia fakalau ho ngaahi tāpuakí, fiefia ʻi hoʻo ngaahi hokosia lelei ʻi he moʻuí, tōʻongaʻaki ʻa e houngaʻiá! ʻI he ʻikai fakamaʻamaʻaʻi ʻa e ngaahi meʻa leleí, “fakamālō kia Sihova, he ʻokú ne lelei.” ʻIo, “fai ʻa e fakafetaʻi ʻi he meʻa kotoa pē.”—1 Kal. 16:34; 1 Tes. 5:18.