ʻOkú Ke ʻIloʻi ʻa e Ngaahi ʻUlungaanga Taʻehāmai ʻo e ʻOtuá?

ʻI hoʻo sio ki ha matalaʻi ʻakau lanu kehekehe, ko ha langi fetuʻuʻia, ko e ʻuʻulu ha vaitafe, ʻokú ke sio ai ki he ngaahi ngāue ʻa e toʻukupu ʻo e Tokotaha-Fakatupú? Ko e ngaahi meʻa fakatupu takatakai ʻiate kitautolú ʻoku fakahaaʻi mahino ai ʻa e ngaahi ʻulungaanga taʻehāmai ʻo Sihová. (Loma 1:20) ʻI he kiʻi tuʻu pea fakakaukau ki he meʻa ʻoku tau vakai ki aí, ʻoku malava ai ke tau ʻiloʻi ʻa e mālohi, ʻofa, poto mo e fakamaau totonu ʻa e ʻOtuá pea pehē ki heʻene nima-homó.—Saame 104:24.

Ko e hā ha niʻihi ʻo e ngaahi ngāue fakaefakatupu ʻa Sihová ʻokú ke fakatokangaʻi ʻi he ʻaho taki taha? Neongo ʻokú ke nofo ʻi ha kolo lahi, te ke sio nai ai ki he ngaahi manupuná pe ʻuluʻakaú. Ko hono vakaiʻi fakalelei ʻa e fakatupu ʻa Sihová ʻoku lava ke tokoni ia ki hono fakasiʻisiʻi ʻetau puputuʻú, ʻai ʻetau palopalemá ki hono tuʻunga totonú, pea fakalahi atu ʻetau tui ki he malava ʻa Sihova ke ne tokangaʻi kitautolu ʻo aʻu ki he kotoa ʻo ʻitānití. (Māt. 6:25-32) Kapau ʻoku ʻi ai haʻo fānau, tokoniʻi kinautolu ke nau ʻiloʻi ʻa e ngaahi ʻulungaanga taʻehanotatau ʻo Sihová. ʻI he tupulekina ʻetau houngaʻia ki he fakatupu takatakai ʻiate kitautolú, te tau toe ʻunuʻunu ofi ange ai ki he Tokotaha-Fakatupú.—Saame 8:3, 4.

SIO ʻI HE VITIŌ FAKAOFO ʻO NATULÁ ʻOKÚ NE FAKAEʻA ʻA E LĀNGILANGI ʻO E ʻOTUÁ—MĀMÁ MO HONO LANÚ, PEA TALI LEVA ʻA E NGAAHI FEHUʻI KO ENÍ:

• ʻOku anga-fēfē ʻa e ʻai ʻe hotau matá ke tau malava ʻo tala ʻa e ngaahi lanú?

• Ko e hā ʻokú ne fakatupunga ʻa e lanu kehekehé?

• Ko e hā ʻoku tau sio ai ki he ngaahi lanu kehekehe ʻi he langí?

• Ko e hā ʻa e ngaahi lanu ʻoku fakamānako ʻi he meʻa fakatupú ʻokú ke sio ki ai ʻi ho ʻapí?

• Ko e hā ʻoku totonu ai ke tau siofi fakalelei ʻa e fakatupú?