Tuku ke Fakanonga Koe ʻe Sihova

 1. Ko e hā ʻokú ne fakatupunga nai ʻa e loto-moʻuá, pea ʻoku lava fēfē ke uesia ai kitautolu?

KUO faifai ange pea lōmekina koe ʻe he loto-moʻuá?b Mahalo ʻokú ke ongoʻi loto-moʻua koeʻuhi kuo fakalotomamahiʻi koe ʻe ha meʻa naʻe leaʻaki pe fai ʻe he niʻihi kehé. Pe ʻokú ke loto-moʻua nai fekauʻaki mo ha meʻa naʻá ke leaʻaki pe fai. Ko e fakatātaá, kuó ke fai nai ha fehālaaki pea hohaʻa naʻa ʻikai ʻaupito ke fakamolemoleʻi koe ʻe Sihova. Ko e toe kovi ange ʻa e tuʻungá, ʻokú ke tui nai koeʻuhi ko hono lōmekina koe ʻe he loto-moʻuá, kuo pau pē ʻoku siʻi hoʻo tuí—kuo pau pē ko ha tokotaha kovi koe. Ka ʻoku moʻoni ia?

 2. Ko e hā ʻa e ngaahi faʻifaʻitakiʻanga mei he Tohi Tapú ʻoku fakahaaʻi ai ʻoku ʻikai ke ʻuhinga ʻa e hoko ʻo loto-moʻuá ʻoku siʻi ʻetau tuí?

² Fakakaukau ki ha niʻihi ʻo e ngaahi faʻifaʻitakiʻanga mei he Tohi Tapú. Ko ʻAna, ʻa e faʻē ʻa e palōfita ko Sāmiuelá, ko ha fefine naʻá ne maʻu ʻa e tui lahi. Neongo ia, naʻe lōmekina ia ʻe he loto-moʻuá ʻi he taimi naʻe ngaohikoviʻi ai ia ʻe ha mēmipa ʻi hono falé. (1 Sām. 1:7) Naʻe maʻu ʻe he ʻapositolo ko Paulá ha tui mālohi, ka naʻe lōmekina ia ʻe he “loto-moʻua fekauʻaki mo e kotoa ʻo e ngaahi fakatahaʻangá.” (2 Kol. 11:28) Naʻe maʻu ʻe Tuʻi Tēvita ʻa e tui mālohi pehē pea naʻe fakatupulekina ʻe Sihova ha vahaʻangatae fekoekoeʻi mo ia. (Ngā. 13:22) Neongo ia, naʻe fai ʻe Tēvita ʻa e ngaahi fehālaaki ʻo fakatupunga ai ke ne faingataʻaʻia ʻi he loto-moʻua mafatukituki. (Saame 38:4) Naʻe fakafiemālieʻi mo fakanonga ʻe Sihova ʻa kinautolu taki taha. Tau sivisiviʻi angé ʻa e meʻa ʻe lava ke tau ako mei heʻenau faʻifaʻitakiʻangá.

 3. ʻE lava fēfē ke ʻai kitautolu ʻe he lea ʻa e niʻihi kehé ke tau ongoʻi loto-moʻuá?

³ ʻI he lea anga-fefeka pe fakafeangai taʻeʻofa mai ʻa e niʻihi kehé, ʻoku tau ongoʻi loto-moʻua nai. ʻOku tautefito ʻene moʻoni ení kapau ko e tokotaha ʻokú ne fakalotomamahiʻi kitautolú ko ha kaumeʻa ofi pe kāinga. Te tau hohaʻa nai naʻa maumau hotau vahaʻangatae mo e tokotaha ko iá. ʻI ha taimi, ko e tokotaha ʻokú ne fakalotomamahiʻi kitautolú ʻokú ne lea taʻefakakaukauʻi nai, pea ʻoku tau ongoʻi nai ʻo hangē kuo hokohokaʻi ʻaki kitautolu ha heletaá! (Pal. 12:18) Pe ko ha tokotaha ʻokú ne fili ʻosi fakakaukauʻi ha ngaahi lea ke fakalotomamahiʻi kitautolu. Naʻe pau ke fekuki ha kiʻi finemui mo e pole ko ení. “ʻI he ngaahi taʻu siʻi kuo maliu atú,” ko ʻene leá ia, “ko ha tokotaha naʻá ku fakakaukau ko ha kaumeʻa lelei naʻe kamata ke ne fakamafola ha lau fekauʻaki mo au ʻi he ʻinitanetí. Naʻá ku loto-mamahi mo loto-moʻua. Naʻe ʻikai pē lava ke u mahinoʻi ʻa e ʻuhinga ʻene lavakiʻi peheʻi aú.” Kapau kuo fakalotomamahiʻi koe ʻe ha kaumeʻa ofi pe ko ha kāinga, ʻe lava ke ke ako ʻa e meʻa lahi meia ʻAna.

 4. Ko e hā ʻa e ngaahi palopalema faingataʻa naʻe pau ke fekuki mo ʻAná?

⁴ Naʻe pau ke fekuki ʻa ʻAna mo e ngaahi palopalema faingataʻa. ʻI he laui taʻu naʻe ʻikai lava ke ne maʻu ha fānau. (1 Sām. 1:2) ʻI he anga fakafonua ʻa e kau ʻIsilelí, ko ha fefine naʻe paʻa naʻe vakai ki ai ko ha mala. Naʻe ʻai heni ke ne ongoʻi ngalivale. (Sēn. 30:1, 2) ʻI hono ʻai ke toe kovi ange ʻa e tuʻungá kia ʻAná, naʻe ʻi ai ha toe uaifi ʻa hono husepānití, ko Pēnina, ʻa ia naʻá ne fanau. Naʻe vakai ʻa Pēnina kia ʻAna ko hano fili pea “lumaʻi taʻetuku ia ke ʻai ke ne loto-mamahi.” (1 Sām. 1:6) ʻI he kamatá, naʻe ʻikai ke fekuki ola lelei ʻa ʻAna mo e ngaahi pole faingataʻa ko ení. Naʻá ne loto-mamahi lahi “ʻo aʻu ki heʻene tangi pea ʻikai te ne kai.” Naʻá ne “mātuʻaki loto-mamahi.” (1 Sām. 1:7, 10) Naʻe anga-fēfē hono maʻu ʻe ʻAna ʻa e fakafiemālié?

 5. Naʻe anga-fēfē tokoni ʻa e lotú kia ʻAná?

⁵ Naʻe lilingi atu ʻe ʻAna ʻene ngaahi ongoʻí kia Sihova ʻi he lotu. Hili ʻene lotú, naʻá ne fakamatalaʻi hono tuʻungá ki he Taulaʻeiki Lahi ko ʻĪlaí. Naʻe tala ange leva ʻe ʻĪlai kiate ia: “ʻAlu ʻi he fiemālie, pea ʻofa ke tali ʻe he ʻOtua ʻo ʻIsilelí ʻa e fakatangi.” Ko e hā ʻa e olá? Naʻe ʻalu ʻa ʻAna “ʻo ne kai, pea naʻe ʻikai te ne kei mata mamahi.” (1 Sām. 1:17, 18) Naʻe tokoni ʻa e lotú kia ʻAna ke ne toe maʻu ʻa e nonga.

 6. Ko e hā ʻa e ngaahi lēsoni fekauʻaki mo e lotú ʻe lava ke tau ako meia ʻAna pea mo e Filipai 4:6, 7?

⁶ ʻE lava ke tau toe maʻu ʻa e nongá kapau ʻoku tau kītaki ʻi he lotú. Naʻe fakamoleki ʻe ʻAna ha taimi lōloa ke talanoa ki heʻene Tamai fakahēvaní. (1 Sām. 1:12) ʻE lava foki ke tau talanoa kia Sihova ʻi ha faʻahinga lōloa pē ʻo fekauʻaki mo ʻetau loto-moʻuá, manavaheé mo ʻetau ngaahi tōnounoú. Ko ʻetau lotú ʻoku ʻikai fiemaʻu ia ke lau taʻanga pe fokotuʻutuʻu fakangeingeia. ʻI he taimi ʻe niʻihi ʻe aʻu nai ʻo tau tangi ʻi heʻetau tala kia Sihova ʻetau mamahí. Naʻa mo ia, heʻikai ʻaupito ke helaʻia ʻa Sihova ʻi he fanongo mai kiate kitautolú. Tānaki atu ki he lotu fekauʻaki mo ʻetau ngaahi palopalemá, ʻoku fiemaʻu ke tau manatuʻi ʻa e faleʻi ʻoku hiki ʻi he Filipai 4:6, 7. (Lau.) Naʻe lave fakahangatonu ʻa Paula ʻo pehē ʻoku totonu ke tau fai ʻa e ngaahi lotu ʻo e fakafetaʻi pe houngaʻia. ʻOku tau maʻu ʻa e ngaahi ʻuhinga lahi ke fakamālō ai kia Sihova. Ko e fakatātaá, ʻe lava ke tau fakamālō kiate ia ʻi he meʻaʻofa ʻo e moʻuí, ko ʻene ngāue fakaefakatupú, ko ʻene ʻofa mateakí, pea mo e ʻamanaki fakaofo kuó ne ʻomai kiate kitautolú. Ko e hā mo ha toe meʻa ʻe lava ke tau ako meia ʻAna?

 7. Ko e hā naʻe fai maʻu pē ʻe ʻAna mo hono husepānití?

⁷ Neongo ʻa e fekuki ʻa ʻAna mo e ngaahi palopalemá, naʻá ne ʻalu maʻu pē mo hono husepānití ki he feituʻu faiʻanga lotu ʻo Sihová ʻi Sailo. (1 Sām. 1:1-5) Naʻe ʻi he tāpanekalé ʻa ʻAna ʻi he taimi naʻe fakalototoʻaʻi ai ia ʻe he Taulaʻeiki Lahi ko ʻĪlaí ʻaki ʻene tala ange ʻokú ne ʻamanaki ʻe tali ʻe Sihova ʻene lotú.—1 Sām. 1:9, 17.

 8. Ko e hā ʻe lava ke fai ʻe he ngaahi fakatahá maʻa kitautolú? Fakamatalaʻi.

⁸ ʻE lava ke tau toe maʻu ʻa e nongá kapau ʻoku hokohoko atu ʻetau maʻu ʻa e ngaahi fakataha ʻa e fakatahaʻangá. Ko e lotu kamata ʻi heʻetau ngaahi fakatahá ʻoku faʻa kau ai ʻa e kole ʻa e laumālie ʻo e ʻOtuá ke ʻiate kitautolu. Ko e melinó pe nongá ko e konga ia ʻo e fua ʻo e laumālie ko iá. (Kal. 5:22) ʻI heʻetau maʻu ʻetau ngaahi fakatahá naʻa mo e taimi ʻoku tau loto-mafasia aí, ʻoku tau ʻoatu ai kia Sihova mo hotau fanga tokouá mo e fanga tuofāfiné ʻa e faingamālie ke fakalototoʻaʻi kitautolu pea tokoniʻi kitautolu ke toe maʻu ʻa e nonga ʻo e ʻatamaí mo e lotó. Ko e lotú mo e ngaahi fakatahá ko e ongo founga tefito ia ʻoku ngāueʻaki ʻe Sihova ke fakanongaʻaki kitautolu. (Hep. 10:24, 25) Fakatokangaʻi ʻa e lēsoni ʻe taha ʻe lava ke tau ako mei he hokosia ʻa ʻAná.

 9. Ko e hā naʻe ʻikai liliu ʻi he tuʻunga ʻo ʻAná, ka ko e hā naʻe liliú?

⁹ Naʻe ʻikai ke mole leva ʻa e meʻa naʻá ne fakatupunga ʻa ʻAna ke ne loto-moʻuá. ʻI he foki ʻa ʻAna ki hono ʻapí mei he lotu ʻi he tāpanekalé, naʻe pau ke ne kei nofo pē mo Pēnina ʻi he fale tatau. Pea ʻoku ʻikai fakahaaʻi mai ʻi he Tohi Tapú naʻe liliu ʻa e tōʻonga ʻa Pēniná. Ko ia ʻoku ngalingali naʻe hokohoko atu hono kātekina ʻe ʻAna ʻa e ngaahi lea oʻo ʻa hono filí. Ka naʻe malava ke toe maʻu mo tauhi maʻu ʻe ʻAna ʻene nonga ʻi lotó. Manatuʻi ʻi he hili hono tuku ange ʻa e ngaahi meʻá ki he toʻukupu ʻo Sihová, naʻe ʻikai ke toe lōmekina ʻe he hohaʻá ʻa ʻAna. Naʻá ne fakaʻatā ʻa Sihova ke fakafiemālieʻi mo fakanonga ia. ʻI ha taimi ki mui ange, naʻe faitāpuekina ʻa ʻAna ʻo ne maʻu haʻane fānau tonu!—1 Sām. 1:19, 20; 2:21.

10. Ko e hā ʻoku tau ako mei he faʻifaʻitakiʻanga ʻa ʻAná?

¹⁰ ʻE lava ke tau toe maʻu ʻa e nongá neongo kapau ʻe kei ʻi ai pē ʻa e meʻa ʻokú ne fakatupunga ʻetau loto-moʻuá. Neongo ʻetau lotu fakamākukanga pea maʻu maʻu pē ʻa e ngaahi fakatahá, ko e ngaahi palopalema nai ʻe niʻihi ʻe kei ʻi ai pē. Ka mei he faʻifaʻitakiʻanga ʻa ʻAná, ʻoku tau ako mei ai heʻikai ʻaupito lava ʻe ha meʻa ke taʻofi ʻa Sihova mei hono fakanonga hotau loto-hohaʻá. Heʻikai ʻaupito fakangaloʻi kitautolu ʻe Sihova, pea ʻoku vavé ni ke ne fakapaleʻi ʻetau faitōnungá.—Hep. 11:6.

11. Ko e hā ʻa e ngaahi ʻuhinga naʻe maʻu ʻe Paula ke ongoʻi loto-moʻua aí?

¹¹ Ko Paula naʻe lahi ʻa e ngaahi ʻuhinga ki heʻene ongoʻi loto-moʻuá. Ko e fakatātaá, koeʻuhi naʻá ne ʻofa ʻi hono fanga tokouá mo e fanga tuofāfiné, ko e palopalema naʻa nau fehangahangai mo iá naʻe taulōfuʻu ia ki heʻene fakakaukaú. (2 Kol. 2:4; 11:28) ʻI he vāhenga-ngāue ʻo Paula ko ha ʻapositoló, naʻe pau ke ne fekuki mo e kau fakafepaki ʻa ia naʻa nau haha ia pea lī ki pilīsone. Naʻe pau ke ne toe kātekina mo e ngaahi faingataʻa naʻe fakatupu loto-moʻua, hangē ko e “moʻui . . . ʻi he feʻamokaki.” (Fil. 4:12) Pea fakakaukau atu ki heʻene hokosia ha vaka tūkia tuʻo tolu ʻi tahi, ʻoku lava ke tau sioloto atu pē ki he loto-moʻua naʻá ne hokosia ʻi heʻene fefolauʻaki vaká. (2 Kol. 11:23-27) Naʻe anga-fēfē ʻa e fekuki ʻa Paula mo e loto-moʻuá?

12. Ko e hā naʻe tokoni ki hono fakasiʻisiʻi ʻa e loto-moʻua ʻa Paulá?

¹² Naʻe ongoʻi loto-moʻua ʻa Paula ʻi he fehangahangai ʻa hono fanga tokouá mo e fanga tuofāfiné mo e ngaahi polé, ka naʻe ʻikai ke ne feinga toko taha pē ke fakaleleiʻi ʻa e kotoa ʻenau ngaahi palopalemá. Naʻe anga-fakanānā ʻa Paula. Naʻá ne fokotuʻutuʻu ki ha niʻihi kehe ke tokoni ʻi hono tokangaʻi ʻa e fakatahaʻangá. Ko e fakatātaá, naʻá ne vaheʻi ʻa e mafai ki he kau tangata alafalalaʻanga hangē ko Tīmote mo Taitusi. Ko e ngāue naʻe fai ʻe he fanga tokoua ko iá ʻoku ʻikai ha veiveiua naʻe tokoni ki hono fakasiʻisiʻi ʻa e loto-moʻua ʻa Paulá.—Fil. 2:19, 20; Tai. 1:1, 4, 5.

13. ʻE lava fēfē ke faʻifaʻitaki ʻa e kau mātuʻá kia Paula?

¹³ Kole tokoni ki he niʻihi kehé. Hangē ko Paulá, ko e kau mātuʻa kaungāongoʻi tokolahi ʻi he ʻahó ni ʻoku nau ongoʻi loto-moʻua fekauʻaki mo e faʻahinga ʻi he fakatahaʻangá ʻoku nau fehangahangai mo e ngaahi ʻahiʻahi. Ka ko ha mātuʻa ʻoku fakangatangata pē ʻa e meʻa ʻoku malava ke ne faí. Ko e anga-fakanānaá te ne ueʻi ia ke vahevahe ʻa e fatongiá mo ha kau tangata taau kehe pea akoʻi ʻa e kau talavoú ke tokoni kiate ia ʻi hono tokangaʻi ʻa e tākanga ʻa e ʻOtuá.—2 Tīm. 2:2.

14. Ko e hā naʻe ʻikai ke hohaʻa ʻa Paula fekauʻaki mo iá, pea ko e hā ʻe lava ke tau ako mei heʻene faʻifaʻitakiʻangá?

¹⁴ Fakahaaʻi hoʻo fiemaʻu ke fakafiemālieʻi koé. Naʻe anga-fakatōkilalo ʻa Paula, ko ia naʻá ne kumi pea maʻu ʻa e fakalototoʻa mei hono ngaahi kaumeʻá. ʻOku hā mahino naʻe ʻikai ke ne hohaʻa fekauʻaki mo e vakai ange ko ha tokotaha vaivai ia kapau naʻá ne fakahaaʻi naʻe fakafiemālieʻi ia ʻe he niʻihi kehé. ʻI he tohi kia Filimoné, naʻe pehē ʻe Paula: “ʻOku ou fiefia mo fiemālie lahi ʻi heʻeku fanongo ʻi hoʻo ʻofá.” (Flm. 7) Naʻe lave ʻa Paula ki he kaungāngāue kehe ʻa ia naʻa nau fakalototoʻaʻi lahi ia lolotonga ʻa e taimi fakalotomafasiá. (Kol. 4:7-11) ʻI heʻetau fakahaaʻi anga-fakatōkilalo ʻoku tau fiemaʻu ʻa e fakalototoʻá, ko hotau fanga tokouá mo e fanga tuofāfiné te nau fiefia ke poupouʻi kitautolu.

15. Naʻe anga-fēfē hono maʻu ʻe Paula ʻa e fakafiemālié ʻi heʻene fehangahangai mo e ngaahi tuʻunga fakalotomafasiá?

¹⁵ Falala ki he Folofola ʻa e ʻOtuá. Naʻe ʻiloʻi ʻe Paula ʻe fakafiemālieʻi ia ʻe he Folofolá. (Loma 15:4) Te ne toe maʻu mei ai ʻa e poto ke fekuki mo ha ʻahiʻahi pē. (2 Tīm. 3:15, 16) ʻI hono tuku pilīsone hono ua ʻo Paula ʻi Lomá, naʻá ne ongoʻi naʻe ofi ʻene maté. ʻI he fehangahangai mo e tuʻunga fakalotomafasia ko iá, ko e hā naʻe fai ʻe Paulá? Naʻá ne kole kia Tīmote ke haʻu vave pea ʻomai ʻa e “ngaahi takainga tohí.” (2 Tīm. 4:6, 7, 9, 13) Ko e hā hono ʻuhingá? Koeʻuhí ʻoku ngalingali ko e ngaahi takainga tohi ko iá ko e konga ia ʻo e Ngaahi Konga Tohi Tapu Faka-Hepelū ʻa ia naʻe lava ke ngāueʻaki ʻe Paula ʻi heʻene ako Tohi Tapu fakafoʻituituí. ʻI heʻetau faʻifaʻitaki kia Paula ʻaki hono ako maʻu pē ʻa e Folofola ʻa e ʻOtuá, ʻe ngāueʻaki ʻe Sihova ʻa e Folofolá ke fakanonga kitautolu—tatau ai pē pe ko e hā ha ʻahiʻahi ʻoku tau fehangahangai mo ia.

16. Ko e hā ʻa e loto-moʻua naʻe fakatupunga ʻe Tēvita kiate ia tonú?

¹⁶ Naʻe maʻu ʻe Tēvita ʻa e ʻuhinga ke fakahohaʻasi ia ʻe ha konisēnisi halaia. Naʻá ne fai ha tono mo Pati-sepa, fokotuʻutuʻu ke tāmateʻi hono husepānití, pea feinga ke fūfuuʻi ʻene faihalá. (2 Sām. 12:9) ʻI he kamatá, naʻe tukunoaʻi ʻe Tēvita hono konisēnisí. Ko hono olá, naʻá ne faingataʻaʻia fakalaumālie, fakaʻatamai mo fakaesino. (Saame 32:3, 4) Ko e hā naʻá ne tokoniʻi ʻa Tēvita ke fekuki mo e loto-moʻua naʻá ne fakatupungá, pea ko e hā ʻe lava ke ne tokoniʻi kitautolu kapau ʻoku tau fai ha fehālaaki mafatukituki?

17. Naʻe anga-fēfē hono fakahaaʻi ʻa e fakatomala loto-moʻoni ʻa Tēvitá ʻi he ngaahi lea ʻi he Saame 51:1-4?

¹⁷ Lotu ki ha fakamolemole. Naʻe faifai pē ʻo hanga ʻa Tēvita kia Sihova ʻi he lotu. ʻI he fakatomala loto-moʻoni, naʻá ne vete ʻene ngaahi angahalá. (Lau ʻa e Saame 51:1-4.) Pea he fiemālie ē naʻe faai atu ʻo ne maʻú! (Saame 32:1, 2, 4, 5) Kapau ʻokú ke fakahoko ha angahala mamafa, ʻoua ʻe feinga ke fūfuuʻi ʻa e faihalá. ʻI hono kehé, vete tauʻatāina hoʻo angahalá kia Sihova ʻi he lotu. ʻE kamata leva ke ke maʻu ha fiemālie mei he loto-moʻua naʻe fakatupunga ʻe ha konisēnisi halaia. Ka ʻo kapau ʻokú ke loto ke fakaleleiʻi hoʻo kaumeʻa mo Sihová, ʻoku fiemaʻu ke ke fai ʻa e meʻa lahi ange ʻi he lotú.

18. Naʻe anga-fēfē ʻa e fakafeangai ʻa Tēvita ki he akonakí?

¹⁸ Tali ʻa e akonakí. ʻI hono fekauʻi atu ʻe Sihova ʻa e palōfita ko Nētané ke fakaeʻa ʻa e angahala ʻa Tēvitá, naʻe ʻikai fakatonuhiaʻi ʻe Tēvita ʻa ia tonu pe feinga ke fakasiʻia ʻene angahalá. Naʻá ne fakahaaʻi leva naʻá ne faiangahala ʻo ʻikai ki he husepāniti pē ʻo Pati-sepá kae hiliō aí, kia Sihova. Naʻe tali ʻe Tēvita ʻa e akonaki meia Sihová, pea naʻe fakamolemoleʻi ia ʻe Sihova. (2 Sām. 12:10-14) Kapau kuo tau fakahoko ha angahala mamafa, ʻoku fiemaʻu ke tau talanoa ki he faʻahinga kuo fakanofo ʻe Sihova ke tokangaʻi kitautolú. (Sēm. 5:14, 15) Pea kuo pau ke tau fakaʻehiʻehi mei he hehema ke fakatonuhiaʻi kitautolú. Ko e vave ange ʻetau tali mo ngāueʻaki ha akonaki pē ʻoku tau maʻu, ko e vave ange ia ʻetau toe maʻu ʻa e nongá mo e fiefiá.

19. Ko e hā ʻoku totonu ke tau fakapapauʻi ke faí?

¹⁹ Fakapapauʻi ke fakaʻehiʻehi mei hono fai ʻa e fehālaaki tatau. Naʻe ʻiloʻi ʻe Tuʻi Tēvita kapau ʻe fiemaʻu ke ne fakaʻehiʻehi mei hono fai ʻa e angahala tatau, naʻe fiemaʻu kiate ia ʻa e tokoni ʻa Sihová. (Saame 51:7, 10, 12) Hili hono maʻu ʻa e fakamolemole ʻa Sihová, naʻe fakapapauʻi ʻe Tēvita ke fakaʻehiʻehi mei he fakakaukau fakatupu maumaú. Ko hono olá, naʻá ne toe maʻu ʻa e nonga ʻi lotó.

20. ʻE lava fēfē ke tau fakahaaʻi ʻoku tau houngaʻia ʻi he fakamolemole ʻa Sihová?

²⁰ ʻOku tau fakahaaʻi ʻoku tau houngaʻia ʻi he fakamolemole ʻa Sihová ʻi he taimi ʻoku tau lotu ai fekauʻaki mo iá, tali ʻa e akonakí, pea tau ngāue mālohi ke fakaʻehiʻehi mei hono fai ʻa e fehālaaki tatau. ʻI heʻetau fou ʻi he ngaahi sitepu ko ení, te tau toe maʻu ai ʻa e nonga ʻi lotó. Naʻe fakamoʻoniʻi eni ʻe James, ko ha tokoua naʻá ne fai ha angahala mamafa. ʻOkú ne pehē: “ʻI heʻeku vete ʻeku angahalá ki he kau mātuʻá, naʻá ku ongoʻi ʻo hangē kuo toʻo atu ha fuʻu kavenga mamafa mei hoku umá. Naʻe kamata ke u toe maʻu ʻa e nonga ʻo e ʻatamaí.” He fakalototoʻa ē ke ʻiloʻi “ʻoku ofi ʻa Sihova ki he loto-laveá; ʻokú ne fakahaofi ʻa e faʻahinga ʻoku laumālie mafesí”!—Saame 34:18.

21. ʻE lava fēfē ke tau tuku ke fakanonga kitautolu ʻe Sihova?

²¹ ʻI he fakaʻaʻau ke ngata ʻa e ngaahi ʻaho fakaʻosi ko ení, ʻoku ngalingali ʻe toe tupulaki ange ʻa e meʻa ʻokú ne fakatupunga ʻa e loto-moʻuá. ʻI hoʻo maʻu ha fakakaukau loto-moʻuá, ʻoua ʻe toe tautoloi ʻi he hanga ki he tokoni ʻa Sihová. Ako fakamākukanga ʻa e Tohi Tapú. Ako mei he faʻifaʻitakiʻanga naʻe fokotuʻu mai ʻe ʻAna, Paula mo Tēvitá. Kole ki hoʻo Tamai fakahēvaní ke tokoniʻi koe ke ʻiloʻi ʻa e tupuʻanga hoʻo loto-moʻuá. (Saame 139:23) Tuku ke ne fua hoʻo ngaahi kavengá, tautefito ki he ngaahi meʻa ʻoku ʻikai lava ke ke mapuleʻí. Kapau te ke fai pehē, ʻe lava ke ke hangē ko e tokotaha-tohi-sāmé ʻa ia naʻá ne hiva kia Sihova: “ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.”—Saame 94:19.