Naʻá Ke ʻIloʻi?

ʻI HE laui taʻu lahi, naʻe taukaveʻi ʻe he kau fakaanga Tohi Tapú ko Tuʻi Pelisasa, ʻa ia ʻoku lave ki ai ʻi he tohi Tanielá, naʻe ʻikai ʻaupito ha taha pehē. (Tan. 5:1) Naʻa nau vakai pehē koeʻuhí naʻe ʻikai ke maʻu ʻe he kau keli fakatotoló ha fakamoʻoni naʻá ne moʻui. Neongo ia, naʻe liliu ia ʻi he 1854. Ko e hā hono ʻuhingá?

ʻI he taʻu ko iá, ko ha konisela Pilitānia ko J. G. Taylor naʻá ne maʻu ha ngaahi toetoenga maumau ʻi he kolo motuʻa ko ʻUá, ʻa ia ko e fakatonga ia he taimí ni ʻo ʻIulakí. Naʻe ʻi ai ha fuʻu taua lahi ai, naʻe maʻu ai ʻe he kau fakatotoló ʻa e ngaahi hina ʻumea. Ko e hina taki taha naʻe feʻunga mo e ʻinisi ʻe fā (senitimita ʻe 10) hono lōloá, naʻe tohi tongi ai ha fakamatala. Ko e fakamatala ʻi he taha ʻo e ngaahi hiná ʻoku kau ai ha lotu ke moʻui fuoloa ʻa Tuʻi Nāponitusi ʻo Pāpiloné pea mo hono foha lahi tahá, ʻa Pelisasa. Naʻa mo e kau fakaangá naʻe pau ke nau tali: Naʻe fakamoʻoniʻi ʻe he meʻa ko eni naʻe ʻiló naʻe moʻui ʻa Pelisasa.

Kae kehe, ʻoku pehē ʻi he Tohi Tapú naʻe ʻikai ngata pē ʻa e moʻui ʻa Pelisasá ka naʻá ne toe hoko ko ha tuʻi. Ko e kau fakaangá naʻa nau toe veiveiua. Ko e fakatātaá, ko e faisaienisi Pilitānia ʻi he senituli 19 ko William Talbot naʻá ne tohi ʻoku pehē ʻe he niʻihi ko “Pelisausa [Pelisasa] naʻá ne pule fakataha mo Nāponitusi ko ʻene tamaí. Ka ko e meʻá ni ʻoku halaʻatā ha fakamoʻoni ki ai.”

Neongo ia, naʻe fakaleleiʻi ʻa e fekīhiaki ko iá, ʻi he taimi naʻe maʻu ai ʻa e fakamatala ne hiki ʻi he ngaahi hina ʻumea kehe ʻo fakaeʻa ai ko e tamai ʻa Pelisasá, ʻa Tuʻi Nāponitusi, naʻá ne mavahe mei he kolomuʻá ʻi he ngaahi taʻu ʻi ha taimi. Ko e hā naʻe hoko ʻi heʻene mavahé? “ʻI he ʻave fakamālohi ʻo Nāponitusí,” ko e lau ia ʻa e Encyclopaedia Britannica, “naʻá ne tuku ʻa e taloní kia Pelisasa pea mo e konga lahi ʻene kau taú.” Ko ia naʻe kaungāpule mo ia ʻa Pelisasa ʻi Pāpilone ʻi he taimi ko iá. Ko ia, naʻe pehē ʻe he tokotaha keli fakatotolo mo e mataotao ʻi he leá ko Alan Millard naʻe feʻungamālie “ʻa hono ui ʻi he Tohi ʻa Tanielá ʻa Pelisasa ko e ‘tuʻí.’”

Ko e moʻoni, ki he kau sevāniti ʻa e ʻOtuá, ko e fakamoʻoni tefito ko e tohi ʻa Tanielá ʻoku falalaʻanga pea naʻe fakamānavaʻi ʻe he ʻOtuá ʻoku maʻu ʻi he Tohi Tapú tonu.—2 Tīm. 3:16.