“ʻOsiki ʻa e Lová”

 1. Ko e hā kuo pau ke tau faí?

TE KE loto ke lele ʻi ha lova ʻokú ke ʻilo ʻoku faingataʻa, tautefito kapau ʻokú ke ongoʻi puke pe helaʻia? Mahalo pē ʻikai. Neongo ia, naʻe pehē ʻe he ʻapositolo ko Paulá ko e kotoa ʻo e kau Kalisitiane moʻoní ʻoku nau kau ki ha lova. (Hep. 12:1) Pea ko kitautolu kotoa, kei siʻi pe taʻumotuʻa, mālohi pe helaʻia, kuo pau ke tau kātaki ʻo aʻu ki he ngataʻangá ʻo kapau ʻoku tau loto ke maʻu ʻa e pale ʻoku talaʻofa mai ʻe Sihová.—Māt. 24:13.

 2. Hangē ko ia ʻoku hiki ʻi he 2 Tīmote 4:7, 8, ko e hā naʻe maʻu ai ʻe Paula ʻa e tauʻatāina ke leá?

² Naʻe maʻu ʻe Paula ʻa e tauʻatāina ke lea koeʻuhí naʻá ne lavameʻa ʻi hono “ʻosiki ʻa e lová.” (Lau ʻa e 2 Tīmote 4:7, 8.) Ka ko e hā koā ʻa e lova naʻe lave ki ai ʻa Paulá?

 3. Ko e hā ʻa e lova naʻe lave ki ai ʻa Paulá?

³ Naʻe faʻa ngāueʻaki ʻe Paula ʻa e ngaahi sipoti naʻe fai ʻi Kalisi ʻi he kuonga muʻá ke akoʻiʻaki ʻa e ngaahi lēsoni mahuʻinga. (1 Kol. 9:25-27; 2 Tīm. 2:5) Naʻe tuʻo lahi ʻene ngāueʻaki ʻa e lele ʻi ha lova ke fakatātaaʻiʻaki ʻa e ʻalunga moʻui ʻa e Kalisitiané. (1 Kol. 9:24; Kal. 2:2; Fil. 2:16) ʻOku kau ha tokotaha ki he “lova” ko ení ʻi he taimi ʻokú ne fakatapui ai ʻene moʻuí kia Sihova pea papitaisó. (1 Pita 3:21) ʻOkú ne aʻu ki he tepí ʻi he taimi ʻoku ʻoange ai ʻe Sihova kiate ia ʻa e pale ʻo e moʻui taʻengatá.—Māt. 25:31-34, 46; 2 Tīm. 4:8.

 4. Ko e hā te tau lāulea ki ai ʻi he kupu ko ení?

⁴ Ko e hā ʻa e ngaahi faitatau ʻe niʻihi ʻi he lele malafoní mo e moʻui ʻa ha Kalisitiane? ʻOku lahi ʻa e ngaahi faitataú. Tau lāulea angé ki ha faitatau ʻe tolu. ʻUluakí, ʻoku fiemaʻu ke tau muimui ki he ʻalunga totonú; uá, kuo pau ke tau tokangataha ki he tepí, pea ko e tolú, kuo pau ke tau ikuʻi ʻa e ngaahi pole te tau fekuki mo iá.

 5. Ko e hā ʻa e ʻalunga kuo pau ke tau muimui aí, pea ko e hā hono ʻuhingá?

⁵ Ke maʻu ʻa e pale ʻo ha lova, ko e kau lelé kuo pau ke nau muimui ki he ʻalunga kuo ʻomai ʻe he faʻahinga ʻoku nau fokotuʻutuʻu ʻa e lová. ʻI he tuʻunga meimei tatau, kapau ʻoku tau loto ke maʻu ʻa e pale ʻo e moʻui taʻengatá, kuo pau ke tau muimui ki he ʻalunga pe founga moʻui faka-Kalisitiané. (Ngā. 20:24; 1 Pita 2:21) Kae kehe, ko Sētane mo e faʻahinga ʻoku muimui ki heʻene faʻifaʻitakiʻangá ʻoku nau loto ke tau fai ha fili kehe; ʻoku nau loto ke tau “hokohoko atu ʻi he lele fakataha mo kinautolu.” (1 Pita 4:4) ʻOku nau manukiʻi ʻa e ʻalunga moʻui ʻoku tau muimui aí pea taukaveʻi ko e hala ʻoku nau ʻi aí ʻoku lelei ange, ʻoku taki atu ia ki he tauʻatāiná. Ka ʻoku loi ʻa e meʻa ʻoku nau taukaveʻí.—2 Pita 2:19.

 6. Ko e hā ʻokú ke ako mei he faʻifaʻitakiʻanga ʻa Brian?

⁶ Ko e faʻahinga ʻoku nau lele fakataha mo e niʻihi ʻoku tākiekina ʻe he māmani ʻo Sētané kuo vavé ni ke nau ʻiloʻi ko e hala kuo nau filí ʻoku ʻikai taki atu ia ki he tauʻatāina; ʻoku taki atu ia ki he pōpula. (Loma 6:16) Fakakaukau angé ki he faʻifaʻitakiʻanga ʻa Brian. Naʻe fakalototoʻaʻi ia ʻe heʻene ongo mātuʻá ke muimui ʻi he ʻalunga moʻui faka-Kalisitiané. Ka ʻi heʻene taʻu hongofulu tupú, naʻá ne fehuʻia pe te ne fiefia ʻi he hala ko iá. Naʻe fili ʻa Brian ke lele fakataha mo e faʻahinga naʻa nau moʻuiʻaki ʻa e ngaahi tuʻunga ʻa Sētané. “Naʻe halaʻatā ke u ʻilo ko e tauʻatāina ko ia ʻoku ou holi ki aí te ne taki atu au ki he ngaahi tōʻonga fakatupu ʻauhá,” ko ʻene leá ia. “Naʻe faai atu pē, naʻá ku ngāuekoviʻaki ʻa e faitoʻo kona tapú mo e ʻolokaholó pea moʻui taʻetaau. ʻI he ngaahi taʻu hokohoko mai aí, naʻe fakalaka atu ʻeku ngāueʻaki ʻa e faitoʻo kona tapú ki he ngaahi kalasi ʻoku mālohi mo toe kovi ange pea hoko ʻo maʻunimā au ʻe he lahi ʻo kinautolu. . . . Naʻá ku kamata ke fakatau atu ʻa e faitoʻo kona tapú ke poupouʻiʻaki ʻeku founga moʻuí.” Faai atu pē, naʻe fili ʻa Brian ke moʻuiʻaki ʻa e ngaahi tuʻunga ʻa Sihová. Naʻá ne liliu hono ngaahi ʻalungá pea papitaiso ʻi he 2001. ʻOkú ne fiefia moʻoni he taimí ni ʻi heʻene muimui ʻi he ʻalunga moʻui faka-Kalisitiané.b

 7. Fakatatau ki he Mātiu 7:13, 14, ko e hā ʻa e hala ʻe ua ʻoku ʻi muʻa ʻiate kitautolú?

⁷ He mahuʻinga ē ke tau fili ʻa e hala totonu ke muimui aí! ʻOku loto ʻa Sētane ke taʻofi kitautolu kotoa mei he lele ʻi he hala ʻefiʻefi “ʻoku taki atu ki he moʻuí” pea afe ki he hala ʻoku ʻatā ʻa ia ko e tokolahi taha ʻo e kakai ʻi he māmaní ʻoku nau ʻi ai. Ko e hala ko iá ʻoku manakoa pea faingofua ange ʻa e fononga aí. Ka “ʻoku taki atu ki he ʻauhá.” (Lau ʻa e Mātiu 7:13, 14.) Ke nofo maʻu ʻi he hala totonú pea ʻikai fakaleluʻí, kuo pau ke tau falala kia Sihova pea fanongo kiate ia.

 8. Kapau ʻoku humu ha tokotaha lele, ko e hā te ne faí?

⁸ Ko e kau lele malafoní ʻoku nau tokangataha ki he hala ʻi muʻa ʻiate kinautolú koeʻuhi ke ʻoua te nau humu. Kae kehe, ʻe kei lava pē nai ke nau tau ʻi ha kaungā-lele pe humu ʻi ha luo. Kapau te nau tō, ʻoku nau tuʻu hake ʻo hoko atu ʻa e lelé. ʻOku nau tokangataha tefito, ʻo ʻikai ki he meʻa naʻá ne ʻai ke nau humú, ka ki he tepí mo e pale ʻoku nau ʻamanaki ke ikuná.

 9. Kapau ʻoku tau humu, ko e hā ʻoku totonu ke tau faí?

⁹ ʻI heʻetau lová, ʻoku tau humu nai ʻo tā-tuʻo-lahi, ʻo fai ʻa e ngaahi fehālaaki ʻi he meʻa ʻoku tau leaʻakí pe faí. Pe ʻe fai nai ʻe hotau kaungā-lelé ʻa e ngaahi fehālaaki ʻo fakalotomamahi kiate kitautolu. Ko e meʻa pē ia ʻoku tau ʻamanekina ʻe hoko. Ko kitautolu kotoa ʻoku tau taʻehaohaoa, pea ʻoku tau lele kotoa ʻi he hala ʻefiʻefi ki he moʻuí. Ko ia kuo pau ke tau fepaki mo e niʻihi kehé ʻi he taimi ʻe niʻihi. Naʻe ʻiloʻi ʻe Paula ʻe ʻi ai ha taimi te tau ʻoatu ai ki he niʻihi kehé “ha ʻuhinga ke lāunga.” (Kol. 3:13) Ka ʻi he ʻikai tokangataha ki he meʻa naʻá ne ʻai ke tau humú, tuku ke tau tokangataha ki he palé. Kapau te tau humu, tau tuʻu hake pea hoko atu ʻa e lelé. Kapau ʻoku tau ʻita mo loto-mamahi pea ʻikai loto ke tuʻu hake, heʻikai ke tau aʻu ki he tepí pea maʻu ʻa e palé. ʻIkai ko ia pē, ʻoku ngalingali te tau fakafaingataʻaʻiaʻi ai ʻa e niʻihi kehe ʻoku nau feinga ke lele ʻi he hala ʻefiʻefi ki he moʻuí.

10. ʻE lava fēfē ke tau fakaʻehiʻehi mei he hoko “ko ha tūkiaʻanga” ki he niʻihi kehé?

¹⁰ Ko ha founga ʻe taha ʻoku lava ke tau fakaʻehiʻehi ai mei he hoko “ko ha tūkiaʻanga” ki hotau kaungā-lelé ko ʻetau ʻulutukua ki heʻenau ngaahi saiʻiá ʻo ka malava kae ʻikai tuʻukāivi ʻi heʻetau totonú. (Loma 14:13, 19-21; 1 Kol. 8:9, 13) ʻI he founga mahuʻinga ko ení, ʻoku ʻikai ke tau hangē ai ko e kau lele malafoní. Ko e kau lelé ʻoku nau feʻauʻauhi pea ko e tokotaha lele taki taha ʻokú ne feinga mālohi ke ne maʻu pē ʻe ia ʻa e palé. Ko e kau lele ko iá ʻoku nau fakakaukau pē ki he lelei ʻanautolú. Ko ia te nau feteketekeʻi nai ke nau muʻomuʻa. ʻI hono kehé, ʻoku ʻikai ke tau feʻauʻauhi. (Kal. 5:26; 6:4) Ko ʻetau taumuʻá ke tokoniʻi ʻa e tokolahi taha ʻe ala lavá ke tau aʻu fakataha ki he tepí pea maʻu ʻa e pale ʻo e moʻuí. Ko ia ʻoku tau feinga ke ngāueʻaki ʻa e faleʻi fakamānavaʻi ʻa Paulá ke “ʻoua ʻe kumi pē ki he lelei ʻa [kitautolú], kae kumi foki ki he lelei ʻa e niʻihi kehé.—Fil. 2:4.

11. Ko e hā ʻoku tokangataha ki ai ha tokotaha lele, pea ko e hā hono ʻuhingá?

¹¹ Ko e kau lele malafoní ʻoku ʻikai ngata pē ʻenau tokanga ki he hala ʻi muʻa ʻiate kinautolú ka ʻoku nau toe tokangataha ki he tepí. Neongo kapau ʻoku ʻikai lava ke nau sio tonu ki he tepí, ʻoku lava ke nau sioloto atu ki heʻenau aʻu ki ai pea maʻu ʻa e palé. ʻOku nau nofoʻaki vēkeveke ʻi heʻenau hanganaki fakakaukau ki he palé.

12. Ko e hā kuo foaki anga-lelei mai ʻe Sihová?

¹² ʻI he lova ʻoku tau kau ki aí, kuo foaki anga-lelei mai ʻe Sihova ki heʻene kakaí ha pale papau ki hono ʻosiki ʻa e lová—ko e moʻui taʻengata ʻi hēvani pe ʻi ha māmani palataisi. ʻOku fakamatalaʻi mai ʻi he Folofolá ʻa e pale ko ení, koeʻuhi ke lava ʻo tau sioloto atu ki he fakaofo ʻetau moʻuí ʻi he aʻu ki aí. Ko e lahi ange ʻetau hanganaki fakakaukau ki heʻetau ʻamanakí, ko e siʻisiʻi ange nai ia ʻetau fakaʻatā ha meʻa ke ne fakatūkiaʻi tuʻuloa kitautolu.

13. Ko e hā ʻa e ʻaonga ʻoku tau maʻu ʻo laka ange ia ʻi he kau lele malafoní?

¹³ Ko e kau lele ʻi he ngaahi sipoti ʻi Kalisí naʻe pau ke nau ikuʻi ʻa e ngaahi pole, hangē ko e helaʻiá mo e langá. Ka ko e meʻa naʻe pau ke nau falala ki aí ko honau akoʻí mo honau mālohí tonu. ʻI he hangē ko e kau lele ko iá, ʻoku akoʻi foki mo kitautolu ki he founga ke lele ai ʻi he lova ʻoku tau kau ki aí. Ka ʻoku tau maʻu ʻa e ʻaonga ʻoku laka ange ia ʻi he kau lele malafoní. ʻOku lava ke tau falala ki he matavai taʻefakangatangata ʻo e mālohí. Kapau ʻoku tau falala kia Sihova, ʻokú ne talaʻofa mai heʻikai ngata pē ʻene akoʻi kitautolú ka te ne ʻai foki ke tau mālohi!—1 Pita 5:10.

14. ʻOku anga-fēfē hono tokoniʻi kitautolu ʻe he 2 Kolinitō 12:9, 10 ke fekuki mo e ngaahi polé?

¹⁴ Naʻe pau ke fekuki ʻa Paula mo e ngaahi pole lahi. Tānaki atu ki hono leakovia mo fakatangaʻi ia ʻe he niʻihi kehé, naʻá ne ongoʻi vaivai ʻi he taimi ʻe niʻihi pea pau ke ne fekuki mo e meʻa naʻá ne ui ko e “tolounua ʻi he kakanó.” (2 Kol. 12:7) Ka ʻi he ʻikai vakai ki he ngaahi pole ko iá ko ha ʻuhinga ke foʻi ai, naʻá ne vakai ki ai ko ha faingamālie ia ke falala kia Sihova. (Lau ʻa e 2 Kolinitō 12:9, 10.) Koeʻuhi naʻe ohi ʻe Paula ʻa e fakakaukau ko ení, naʻe tokoniʻi ia ʻe Sihova ʻi he kotoa hono ngaahi ʻahiʻahí.

15. Kapau ʻoku tau faʻifaʻitaki kia Paula, ko e hā te tau hokosiá?

¹⁵ Ko kitautolu foki ʻe leakovia pe fakatangaʻi nai koeʻuhi ko ʻetau tuí. ʻE pau nai ke tau fekuki mo e mahamahaki pe helaʻia. Kapau ʻoku tau faʻifaʻitaki kia Paula, ko e ngaahi pole taki taha ko iá ʻe lava ke hoko ko ha faingamālie ke hokosia ai ʻa e ʻofa mo e poupou ʻa Sihová.

16. Neongo kapau ʻokú ke mahamahaki, ko e hā ʻoku lava ke ke faí?

¹⁶ ʻOkú ke toka mohenga pe heka saliote? ʻOku vaivai ho tuí pe kovi hoʻo sió? Kapau ko ia, ʻe lava ke ke lele fakataha mo e faʻahinga kei siʻi mo moʻui leleí? ʻIo te ke lava! ʻOku tokolahi ʻa e kau taʻumotuʻa mo e faʻahinga mahamahaki ʻoku nau lele ʻi he hala ki he moʻuí. Heʻikai lava ke nau fai ʻa e ngāue ko ení ʻi honau mālohí tonu. Ka, ʻoku nau maʻu ʻa e mālohi ʻo Sihová ʻaki ʻa e fanongo ki he ngaahi fakataha faka-Kalisitiané fakafou ʻi he telefoní pe sio ʻi he ngaahi fakatahá fakafou ʻi he vitiō. Pea ʻoku nau kau ʻi he ngāue ngaohi ākongá ʻaki ʻa e faifakamoʻoni ki he kau toketaá, kau nēsí mo e kāingá.

17. ʻOku anga-fēfē ʻa e ongoʻi ʻa Sihova fekauʻaki mo e faʻahinga ʻoku fakangatangata fakaesinó?

¹⁷ ʻOua ʻaupito ʻe fakaʻatā ʻa e loto-siʻi koeʻuhi ko e fakangatangata fakaesinó ke ne ʻai koe ke ongoʻi fuʻu vaivai ke lele ʻi he hala ki he moʻuí. ʻOku ʻofa ʻa Sihova ʻiate koe koeʻuhi ko hoʻo tui kiate iá mo hoʻo lēkooti ʻo e kātakí. ʻOkú ke fiemaʻu ʻene tokoní he taimí ni ʻo laka ange ia ʻi ha toe taimi, pea heʻikai te ne liʻaki koe. (Saame 9:10) ʻI hono kehé, te ne ʻunuʻunu ke toe ofi ange kiate koe. Fakatokangaʻi ʻa e fakamatala ʻa ha tuofefine ʻokú ne fekuki mo ha mahamahaki: “ʻI he fakaʻaʻau ke toe kovi ange ʻa e ngaahi tuʻungá, naʻá ku ʻiloʻi ko e faingamālie ke vahevahe ʻa e moʻoní ki he niʻihi kehé naʻe toe siʻisiʻi ange. Ka naʻá ku ʻiloʻi naʻa mo ʻeku fai ʻa e fanga kiʻi feinga īkí ʻoku ʻai ai ke fiefia ʻa e loto ʻo Sihová peá u fiefia foki mo au.” ʻI he taimi ʻokú ke ongoʻi loto-siʻi aí, manatuʻi ʻoku ʻikai te ke toko taha. Fakakaukau ki he faʻifaʻitakiʻanga ʻa Paulá pea manatuʻi ʻene ngaahi lea fakalototoʻá: “ʻOku ou fiefia ʻi hoku ngaahi vaivaiʻangá, . . . he ʻi heʻeku vaivaí, ʻoku ou toki mālohi leva.”—2 Kol. 12:10.

18. Ko e hā ʻa e pole mātuʻaki faingataʻa ʻoku fehangahangai mo e niʻihi?

¹⁸ Ko e niʻihi ʻoku nau lele ʻi he hala ki he moʻuí ʻoku nau fehangahangai mo ha pole ʻe taha. ʻOku nau fekuki mo e ngaahi tuʻunga fakafoʻituitui ʻoku ʻikai lava nai ke sio ki ai ʻa e niʻihi kehé mo mahinoʻi. Ko e fakatātaá, ʻoku nau fekuki mo e loto-mafasia pe lōmekina ʻe he ngaahi ongoʻi loto-moʻuá. Ko e hā ʻoku fehangahangai ai ʻa e kau sevāniti ʻofeina ko eni ʻa Sihová mo e pole mātuʻaki faingataʻá? Koeʻuhi ʻi he fasi ha uma ʻo ha tokotaha pe heka saliote, ʻoku lava ke sio ki ai ʻa e tokotaha kotoa pea ueʻi kinautolu ke fai ha tokoni. Neongo ia, ko e faʻahinga kuo pau ke nau fekuki mo e palopalema fakaeongo mo fakaʻatamaí ʻoku ʻikai nai ke hā mai ki tuʻa ʻenau faingataʻaʻiá. Ko honau mamahí ʻoku tatau tofu pē mo e mamahi ʻa ha taha ʻoku fasi hono umá, ka heʻikai nai ke nau maʻu ʻa e manavaʻofa tatau mei he niʻihi kehé.

19. Ko e hā ʻoku tau ako mei he faʻifaʻitakiʻanga ʻa Mefipōsetí?

¹⁹ Kapau ʻokú ke maʻu ha ngaahi fakangatangata pea ongoʻi ʻoku ʻikai ke mahinoʻi koe ʻe ha taha, ʻe lava ke ke maʻu ʻa e mālohi mei he faʻifaʻitakiʻanga ʻa Mefipōsetí. (2 Sām. 4:4) Naʻe pau ke ne fekuki mo e mahamahakí, pea naʻe fakafeangai taʻetotonu ʻa Tuʻi Tēvita kiate ia. Naʻe ʻikai ke fai ʻe Mefipōseti ha meʻa hala ke ne tuha ai mo e ngaahi ʻahiʻahi ko ení. Ka, naʻe ʻikai ke ne hoko ai ʻo ʻita; naʻá ne houngaʻia ʻi he ngaahi meʻa lelei ʻi heʻene moʻuí. Naʻá ne houngaʻia ʻi he anga-lelei naʻe fakahaaʻi ange ʻe Tēvita ʻi he kuohilí. (2 Sām. 9:6-10) Ko ia ʻi he taimi naʻe fakafeangai taʻetotonu ange ai ʻa Tēvitá, naʻe ʻikai ke nōfoʻi ʻa Mefipōseti ʻi he fehālaaki ko iá. Naʻe ʻikai ke ne ʻita ai, pea naʻe ʻikai ke ne tukuakiʻi ʻa Sihova ki he meʻa naʻe fai ʻe Tēvitá. Naʻe tokangataha ʻa Mefipōseti ki he meʻa naʻe lava ke ne fai ke poupouʻi ʻa e tuʻi fakanofo ʻa Sihová. (2 Sām. 16:1-4; 19:24-30) Naʻe ʻai ʻe Sihova ke hiki ʻa e faʻifaʻitakiʻanga lelei ʻaupito ʻa Mefipōsetí ʻi heʻene Folofolá ke tau maʻu ʻaonga mei ai.—Loma 15:4.

20. ʻOku anga-fēfē hono uesia ʻe he loto-moʻuá ʻa e niʻihi? Ko e hā ʻoku lava ke nau tuipau fekauʻaki mo iá?

²⁰ Koeʻuhi ko e loto-moʻua tōtuʻá, ko e fanga tokoua mo e fanga tuofāfine ʻe niʻihi ʻoku nau fuʻu tailiili mo mā ʻi he feohi mo e kakaí. ʻOku ʻikai nai ke nau ongoʻi fiemālie ke ʻi ha fuʻu kakai tokolahi, ka ʻoku nau hokohoko atu ke maʻu ʻa e ngaahi fakataha ʻa e fakatahaʻangá, ʻasemipilií mo e fakataha-lahí. ʻE faingataʻa ke nau lea ki ha sola, neongo ia ʻoku nau talanoa ki he faʻahinga ʻi he ngāue fakafaifekaú. Kapau ʻokú ke ongoʻi pehē, ʻoua naʻa ngalo ʻoku ʻikai ko koe pē. Ko e tokolahi ʻoku nau fāinga mo e meʻa meimei tatau. Manatuʻi ʻoku fakahōifua kia Sihova ʻa hoʻo ngaahi feinga ʻaufuatoó. Ko e ʻikai ko ia ke ke foʻí ko e fakamoʻoni ia ʻokú ne tāpuakiʻi koe pea ʻoatu ʻa e mālohi ʻokú ke fiemaʻú.c (Fil. 4:6, 7; 1 Pita 5:7) Kapau ʻokú ke tauhi kia Sihova neongo ʻa e ngaahi fakangatangata fakaesino pe fakaeongó, ʻoku lava ke ke tuipau ʻokú ke fakahōifuaʻi ʻa Sihova.

21. ʻI he tokoni ʻa Sihová, ko e hā te tau malava kotoa ke faí?

²¹ Ko e meʻa fakafiefiá, ʻoku ʻi ai ʻa e kehekehe ʻi he lele malafoní pea mo e lova naʻe lave ki ai ʻa Paulá. ʻI ha lele malafoni ʻi he taimi ʻo e Tohi Tapú, ko e toko taha pē naʻá ne ikuna ʻa e palé. ʻI hono kehé, ko e tokotaha kotoa ʻoku kītaki faitōnunga ʻi he ʻalunga moʻui faka-Kalisitiané te ne maʻu ʻa e pale ʻo e moʻui taʻengatá. (Sione 3:16) Pea ʻi he lele malafoní, ko e kau lelé kotoa kuo pau ke nau mālohi fakaesino; he ka ʻikai, heʻikai lava ke nau ikuna. ʻI he tafaʻaki ʻe tahá, ko e tokolahi ʻo kitautolu ʻoku ʻi ai hotau fakangatangata fakaesino, ka ʻoku tau kītaki pē. (2 Kol. 4:16) ʻI he tokoni ʻa Sihová, ko kitautolu kotoa te tau ʻosiki ʻa e lová!