ʻI he Sio ha Hoa Mali ʻi he ʻAta Fakalieliá

• “Naʻá ku ongoʻi ʻo hangē naʻe toutou fakahoko ʻe hoku husepānití ha tonó.”

• “Naʻá ku ongoʻi fakamāʻia, liʻekina mo ʻikai haku mahuʻinga.”

• “Naʻe ʻikai ke u lava ʻo lea ki ha taha fekauʻaki mo ia. Naʻá ku faingataʻaʻia fakalongolongo pē.”

• “Naʻá ku ongoʻi ʻo hangē naʻe ʻikai tokanga mai ʻa Sihova kiate aú.”

Ko e ngaahi fakamatala ʻi ʻolungá ʻoku fakahaaʻi ai ʻa e lahi ʻo e mamahi ʻa ha uaifi ʻi he sio ʻa hono husepānití ʻi he ʻata fakalieliá. Pea kapau kuo fai fakapulipuli ia ʻe he husepānití, mahalo ʻi ha ngaahi māhina pe ngaahi taʻu, ʻoku ongoʻi nai ʻe he uaifí heʻikai lava ke ne toe falala kiate ia. Hangē ko e lea ʻa ha uaifi ʻe taha, “Naʻá ku fifili: ‘Ko hai ʻa e tangata ko eni ʻi hoku tafaʻakí? ʻOku toe ʻi ai nai ha meʻa kehe ʻokú ne fūfuuʻi meiate au?’”

Ko e kupú ni kuo teuteuʻi ia ki ha uaifi ʻa ia ko hono husepānití kuó ne tō ʻi he sio ʻi he ʻata fakalieliá.a ʻE lāulea heni ki ha ngaahi tefitoʻi moʻoni Fakatohitapu ʻoku tokonaki mai ai ʻa e fakafiemālie, fakapapauʻi ki he uaifí ʻa e poupou ʻa Sihová, pea tokoniʻi ia ke ne fakaakeake fakaeongo mo fakalaumālie.b

Neongo heʻikai lava ke ke puleʻi ʻa e meʻa kotoa ʻoku fai ʻe ho husepānití, ʻe lava ke ke fou ʻi he ngaahi sitepu ke fakasiʻisiʻi ai hoʻo mamahí pea hokosia ʻa e nonga lahi ange ʻo e ʻatamaí. Fakakaukau ki he ngaahi meʻa hoko haké.

Fakaʻehiʻehi mei he tukuakiʻi-kitá. ʻOku ongoʻi nai ʻe ha uaifi ko e sio ʻa hono husepānití ʻi he ʻata fakalieliá ko ha foʻui ia ʻoʻona. Ko Alicec naʻá ne ongoʻi kuo pau pē naʻá ne taʻefeʻunga ʻi he tuʻunga ko ha fefine. Naʻá ne fifili, ‘Ko e hā ʻoku saiʻia ange ai hoku husepānití ke sio ki he kakai fefine kehé ʻiate aú?’ Ko e ngaahi uaifi ʻe niʻihi ʻoku nau tukuakiʻi pē ʻa e anga ʻenau fakafeangaí, ʻo pehē ko kinautolu ʻoku nau ʻai ke kovi ange ʻa e tuʻungá. ʻOku pehē ʻe Danielle, “Naʻá ku vakai kiate au ko ha fefine loto-kona ʻa ia naʻá ku maumauʻi ʻema nofo malí ʻaki ʻeku ʻitá.”

Kapau ʻokú ke ongoʻi pehē, ʻiloʻi ʻoku ʻikai ke tukuakiʻi koe ʻe Sihova ki he tōʻonga ʻa ho husepānití. ʻI he Sēmisi 1:14 ʻoku pehē ai: “ʻOku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi ʻe heʻene holi pē ʻaʻaná.” (Loma 14:12; Fil. 2:12) ʻI he ʻikai tukuakiʻi koé, ʻoku fakamahuʻingaʻi ʻe Sihova ʻa hoʻo mateaki kiate iá.​—2 Kal. 16:9.

ʻE toe ʻaonga foki ke mahinoʻi ko e sio ʻa ha husepāniti ʻi he ʻata fakalieliá ʻoku ʻikai ʻuhinga ia ko hono uaifí ʻokú ne taʻefeʻunga ʻi he tuʻunga ko ha fefine. Ko e kau mataotao ʻi he kaveingá ni ʻoku nau pehē ko e sio ʻi he ʻata fakalieliá ʻokú ne langaʻi ʻa e havala taʻetopono fakaefehokotaki fakasino heʻikai lava ʻe ha fefine ke fakalato.

Fakaʻehiʻehi mei he hohaʻa tōtuʻá. Ko Catherine naʻá ne pehē ʻi he kotoa ʻene moʻuí ko e meʻa pē naʻe nōfoʻi ai ʻene fakakaukaú ko e sio ʻa hono husepānití ʻi he ʻata fakalieliá. Naʻe pehē ʻe Frances: “Naʻá ku loto-moʻua ʻi ha taimi pē naʻe ʻikai te u ʻiloʻi ai ʻa e feituʻu ʻoku ʻi ai hoku husepānití. Naʻá ku hohaʻa tōtuʻa ʻi he ʻahó kakato.” Kuo fakahaaʻi ʻe he ngaahi uaifi ʻe niʻihi ʻenau fakamāʻia ʻi heʻenau ʻi he haʻohaʻonga ʻo e kaungā-Kalisitiane ʻoku nau lāuʻilo nai ki he palopalema ʻa honau ngaahi husepānití. Ka kuo fakahaaʻi ʻe he niʻihi kehe ʻenau ongoʻi liʻekina koeʻuhí ʻoku nau fakakaukau ʻoku ʻikai ke mahinoʻi ʻe ha taha honau tuʻungá.

ʻOku fakanatula pē ʻa e ngaahi ongoʻi ko ení. Neongo ia, ko e nōfoʻi ʻi he ngaahi ongoʻi peheé ʻe fakalahi pē ai hoʻo hohaʻá. ʻI hono kehé, feinga ke tokangataha ki ho vahaʻangatae mo Sihová. Ko hono fai iá te ke langa hake ai ho mālohi ʻi lotó.​—Saame 62:2; ʻEf. 6:10.

ʻE ʻaonga nai ke ke lau mo fakalaulauloto ki he ngaahi talanoa Fakatohitapu fekauʻaki mo e kau fefine hohaʻatuʻu naʻa nau maʻu ha fakafiemālie ʻi heʻenau hanga kia Sihova ʻi he lotú. Naʻe ʻikai ke ne hanga ʻo liliu maʻu pē honau ngaahi tuʻungá, ka naʻá ne ʻoange kiate kinautolu ʻa e nonga. Ko e fakatātaá, ko ʻAna, naʻá ne “mātuʻaki loto-mamahi” ʻi hono tuʻungá. Ka ʻi he hili ʻene “lotu lōloa ʻi he ʻao ʻo Sihová,” naʻá ne hokosia ʻa e nonga, neongo naʻe teʻeki ai ke ne ʻilo pe ko e hā ʻe hoko ki he tuʻunga ʻokú ne ʻi aí.​—1 Sām. 1:10, 12, 18; 2 Kol. 1:3, 4.

Kumi ki he poupou ʻa e kau mātuʻa ʻi he fakatahaʻangá. ʻE lava ke nau hoko “ko ha fakaū mei he matangí, ko ha hūfangaʻanga mei he ʻuha lōvaí.” (ʻAi. 32:2, fkm. ʻi lalo) ʻE aʻu nai ʻo nau fokotuʻu atu ha tuofefine ʻe lava ke ke talanoa ki ai pea maʻu ha fakafiemālie.​—Pal. 17:17.

ʻE malava nai ke ke tokoniʻi ho husepānití ke ikuʻi ʻene tōʻongaʻaki ʻa e sio ʻi he ʻata fakalieliá? Mahalo pē. ʻOku pehē ʻi he Tohi Tapú ko hono solova ha palopalema pe ikunaʻi ha fili ikuʻingataʻa, “ko e toko uá ʻoku lelei ange ia ʻi he toko tahá.” (Tml. 4:9-12) ʻOku fakahaaʻi ʻi he ngaahi akó ko e olá ʻoku faʻa lelei ʻi he ngāue fakataha ha ongo meʻa mali ke ikuʻi ha maʻunimā ʻe he ʻata fakalieliá pea toe fakafoki mai ʻa e falala ʻi heʻena nofo malí.

Ko e moʻoni, ko e meʻa lahi ʻe fakatuʻunga ia ʻi he holi fakamātoato mo e fakapapau ʻa ho hoá ke ikuʻi ʻene hehema ke sio ʻi he ʻata fakalieliá. Kuó ne hū tōtōaki kia Sihova ki ha mālohi pea kumi tokoni mei he kau mātuʻá? (2 Kol. 4:7; Sēm. 5:14, 15) Kuó ne fokotuʻu ha ngaahi founga ke ne fakaʻehiʻehi ai mei he ʻahiʻahí​—ko e fakatātaá, fakangatangata ʻene ngāueʻaki ʻa e ngaahi meʻangāue fakaʻilekitulōniká pea fakaʻehiʻehi mei he ngaahi feituʻu ʻe ala fakataueleʻi ai iá? (Pal. 27:12) ʻOkú ne loto-lelei ke tali hoʻo tokoní pea ke faitotonu kakato kiate koe? Kapau ko ia, ʻe malava nai ai ke ke tokoniʻi ia.

Anga-fēfē? Fakakaukau ki ha fakatātā. Naʻe mali ʻa Felicia mo Ethan, ʻa ia naʻe maʻunimā ia ʻe he sio ʻi he ʻata fakalieliá ʻi heʻene kei siʻí. ʻOku ʻai ʻe Felicia ke faingofua kiate ia ke talanoa ange ʻi he taimi ʻoku malanga hake ai ʻa e holi ke ne toe sio ʻi he ʻata fakalieliá. ʻOku pehē ʻe Ethan: “ʻOku ou talanoa faitotonu mo tauʻatāina ki hoku uaifí. ʻOkú ne tokoniʻi anga-ʻofa au ke fokotuʻu ha ngaahi fakangatangata pea toutou vakaiʻi maʻu pē pe ʻoku ou fēfē. Pea ʻokú ne tokoniʻi au ke fakasiʻisiʻi ʻa e hū ki he ʻInitanetí.” ʻI he anga-mahení, ʻoku loto-mamahi ʻa Felicia ʻi he manako ʻa Ethan ke sio ʻi he ʻata fakalieliá. “Ka,” ko ʻene leá ia, “ko ʻeku ongoʻi ʻitá mo e mamahí ʻoku ʻikai tokoni ia kiate ia ke ne hanganaki mavahe ai mei he tōʻonga fakalilifu ko ení. Hili ʻema sivisiviʻi ʻene ngaahi palopalemá, ʻokú ne mateuteu ke ngāue fakataha mo au ke ikuʻi hoku mamahí.”

Ko e ngaahi lāulea peheé ʻoku ʻikai ngata pē ʻene tokoniʻi ha husepāniti ke hanganaki ʻatā mei he sio ʻi he ʻata fakalieliá ka ʻoku toe tokoniʻi ai hono uaifí ke toe falala kiate ia. He ko ē, ʻi he loto-lelei ha husepāniti ke talanoa tauʻatāina fekauʻaki mo ʻene ngaahi hehemá, ngāue fakaʻahó mo e feituʻu ʻokú ne ʻi aí, ʻoku ʻikai leva ke toe fakapulipuli ha meʻa.

ʻOkú ke tui ʻe lava ke ke tokoniʻi ho husepānití ʻi ha founga meimei tatau? Kapau ko ia, fēfē ke mo lau mo lāulea fakataha ki he kupu ko ení? Ko ʻene ngaahi taumuʻá ke taʻofi ʻa e sio ʻi he ʻata fakalieliá pea ʻoatu ha makatuʻunga kiate koe ke falala kiate ia. ʻI he ʻikai ke ʻita ʻi hoʻo ngaahi hohaʻá, ʻoku totonu ke ne feinga mālohi ke mahinoʻi ʻa e anga hono uesia koe ʻe he palopalemá. Ko hoʻo taumuʻá ke poupouʻi ʻene ngaahi feingá pea ʻoange ʻa e faingamālie ke ne fakahaaʻi te ke lava ʻo toe falala kiate ia. ʻE fiemaʻu ke mo fakatou ako ki he meʻa ʻokú ne fakatupunga ʻa e kakaí ke tō ʻi he sio ʻi he ʻata fakalieliá pea mo e founga ke ikuʻi ai ʻa e palopalemá.d

Kapau ʻokú ke manavasiʻi naʻa hoko hoʻomo fetalanoaʻakí ʻo fai ai ha kē, fakakaukau ke kole ki ha mātuʻa ʻokú mo ongoʻi fiemālie ke kau ki ai pea tataki hoʻomo fetalanoaʻakí. Hoko ʻo ʻiloʻi naʻa mo e hili hono ikuʻi ʻe ha hoa mali hono maʻunimā ia ʻe he sio ʻi he ʻata fakalieliá, ʻe fiemaʻu ʻa e taimi lahi ke toe fakafoki mai ai ʻa e falalá. ʻOua ʻe foʻi. Sio ki ha fanga kiʻi fakalakalaka iiki ʻi homo vahaʻangataé. ʻAmanekina ʻi he faai atu ʻa e taimí fakataha mo e kātakí, ko hoʻo nofo malí ʻe faai atu pē ʻo toe mālohi.​—Tml. 7:8; 1 Kol. 13:4.

Kapau ʻoku toe tō ho husepānití, ʻoku ʻuhinga ení ʻoku ʻikai ke ne fakatomala pe kuo tōnoa ʻa e ʻamanakí? ʻOku ʻikai ke pehē ia. Tautefito kapau ʻoku maʻunimā ia, ʻe lava ke ne fāinga mo e pole ko iá ʻi he kotoa ʻene moʻuí. ʻE lava ke hoko ʻa e tō ko ení naʻa mo e hili ha laui taʻu ʻo e fakaʻehiʻehi mei aí. Ke fakaʻehiʻehi mei ha toe holomui ʻi he kahaʻú, ʻe fiemaʻu ke toe mālohi ange ʻene faitaú, mahalo ke muimui ofi ki he ngaahi founga naʻá ne ʻosi fokotuʻú neongo kuo hā ngali ikuʻi ʻa e palopalemá. (Pal. 28:14; Māt. 5:29; 1 Kol. 10:12) ʻE fiemaʻu ke ne hokohoko atu hono fakafoʻou ʻa e “tūkunga fakaefakakaukau ʻa ia ʻokú ne tākiekina” iá pea ako ke “fehiʻa ʻi he meʻa ʻoku koví”​—ʻa e ʻata fakalieliá pehē foki ki ha faʻahinga tōʻonga taʻemaʻa pē hangē ko e fakalielia-toko-tahá. (ʻEf. 4:23; Saame 97:10; Loma 12:9) ʻOkú ne loto-lelei ke fai ʻa e ngaahi feinga ko ení? Kapau ko ia, tā ʻoku ʻikai tōnoa ʻa e ʻamanaki ki hono tuʻungá.e

Kae fēfē kapau ʻoku ʻikai pē ke fakahāhā ʻe ho hoá ha feinga ke tauʻi ʻene palopalemá? Ko e moʻoni, ʻe toutou malanga hake nai ʻa e ngaahi ongoʻi loto-mamahi, ʻita mo e lavaki. Kumi ki he nonga ʻo e ʻatamaí ʻaki hono tuku ʻa e meʻá ki he toʻukupu ʻo Sihová. (1 Pita 5:7) Hokohoko atu ʻa e ʻunuʻunu ofi kia Sihova fakafou ʻi he ako, lotu mo e fakalaulauloto. ʻI hoʻo fai iá, fakapapauʻi ʻokú ne ʻunuʻunu ofi mai foki kiate koe. Hangē ko ia ʻoku fakahaaʻi ʻi he ʻAisea 57:15, ʻokú ne ʻi he faʻahinga ʻoku ongoʻi “lōmekina mo anga-fakatōkilaló,” ke fakamoʻui hake honau laumālié. Feinga mālohi ke hoko ko e Kalisitiane lelei taha ʻe lava ke ke hoko ki aí. Kumi ki he poupou mei he kau mātuʻá. Pea nofoʻaki ʻamanaki ʻe ʻi ai ha taimi ʻi he kahaʻú, ko ho husepānití te ne fai nai ha liliu loto-moʻoni.​—Loma 2:4; 2 Pita 3:9.