Hokohoko Atu ke Kātaki

 1. Ko e hā ʻokú ke houngaʻia ai ʻi he kakai ʻoku kātakí?

ʻOKU tau houngaʻia kotoa ʻi he kakai ʻoku kātakí. Ko e hā hono ʻuhingá? ʻOku tau fakaʻapaʻapaʻi ʻa e faʻahinga ʻoku lava ke nau tatali ki ha meʻa ʻo ʻikai ongoʻi feifeitamaki. ʻOku tau houngaʻia ʻi he anga-kātaki mai ʻa e niʻihi kehé ʻi heʻetau fai ha fehālaaki. Pea ʻoku tau houngaʻia ʻi he anga-kātaki ʻetau faiako Tohi Tapú ʻi heʻetau fāinga ke ako, tali pe ngāueʻaki ha akonaki Fakatohitapu. Mahulu hake aí, he fakamālō ē ko kitautolu ʻi he anga-kātaki mai ʻa Sihova ko e ʻOtuá kiate kitautolú!​—Loma 2:4.

 2. ʻI he ngaahi tuʻunga fē ʻe faingataʻa nai ai ke tau kātakí?

² Neongo ʻoku tau fakamahuʻingaʻi ʻa e anga-kātaki ʻa e niʻihi kehé, ko kitautolu tonu heʻikai nai ke faingofua maʻu pē ke tau kātaki. Ko e fakatātaá, te tau fāinga nai ke hanganaki nonga ʻi heʻetau kiu ʻi ha hala moʻumoʻua, tautefito kapau kuo tau tōmui. ʻE mole nai ʻetau kātakí ʻi he taimi ʻoku fakatupuʻitaʻi ai kitautolu ʻe he niʻihi kehé. Pea ʻi he taimi ʻe niʻihi, ʻe faingataʻa ke tau hanganaki tatali ki he talaʻofa ʻa Sihova ki ha māmani foʻoú. Te ke saiʻia ke hoko ʻo kātaki lahi ange? ʻI he kupu ko ení, te tau lāulea ai ki he meʻa ʻoku ʻuhinga ki ai ʻa e hoko ʻo kātakí pea mo e ʻuhinga ʻoku mātuʻaki mahuʻinga aí. Te tau toe sivisiviʻi mo e meʻa ʻe lava ke ne tokoniʻi kitautolu ke fakatupulekina ha kātaki lahi angé.

 3. ʻOku anga-fēfē ʻa e fakafeangai ha tokotaha anga-kātaki ʻi hono fakaʻitaʻí?

³ Fakakaukau ki ha founga ʻe fā ʻe lava ke tau fakahāhā ai ʻa e kātakí. ʻUluakí, ko ha tokotaha anga-kātaki ʻokú ne fakatuotuai ki he ʻita. ʻOkú ne feinga ke hanganaki nonga pea fakaʻehiʻehi mei he faisāuní ʻi he taimi ʻoku fakaʻitaʻi ai iá pe loto-mafasiá. Ko e kupuʻi lea “fakatuotuai ki he ʻitá” ʻoku fuofua hā ia ʻi he Tohi Tapú ʻi hono fakamatalaʻi ʻa Sihova ko ha “ʻOtua mohu meesi mo manavaʻofa, tuai ki he houhau pea fonu ʻi he ʻofa mateaki mo e moʻoni.”​—ʻEki. 34:6.

 4. ʻOku anga-fēfē ʻa e fakafeangai ha tokotaha anga-kātaki ʻi he taimi kuo pau ke ne tatali aí?

⁴ Uá, ko ha tokotaha anga-kātaki ʻe lava ke ne tatali anga-mokomoko. Kapau ʻoku fuoloa ange ʻa e ʻamanaki ʻa ha tokotaha ki ha meʻa kae tuai ʻa ʻene hokó, ʻokú ne feinga ke fakaʻehiʻehi mei he hoko ʻo taʻemanonga pe ʻitangofua. (Māt. 18:26, 27) ʻOku lahi ʻa e ngaahi tuʻunga ʻi he māmaní ʻa ia ʻoku fiemaʻu ai ke tau tatali anga-mokomoko. Ko e fakatātaá, ʻoku fiemaʻu ke tau fanongo anga-kātaki lolotonga ʻa e lea ʻa ha tokotaha, ʻo ʻikai fakahohaʻasi. (Siope 36:2) ʻE toe fiemaʻu foki ke tau anga-kātaki ʻi hono tokoniʻi ha tokotaha ako ke mahinoʻi ha akonaki Fakatohitapu pe ke ikuʻi ha tōʻonga kovi.

 5. Ko e hā ha toe founga ke fakahāhā ai ʻa e kātakí?

⁵ Tolú, ko ha tokotaha anga-kātaki ʻoku ʻikai ke ne loto-ʻoho. Ko e moʻoni, ko e ngaahi tuʻunga ʻe niʻihi ʻe fiemaʻu ki ai ʻa e ngāue vave. Neongo ia, ʻi hono maʻu ʻe ha tokotaha anga-kātaki ha ngāue mahuʻinga ke fakahoko, ʻoku ʻikai ke ne feinga ke fakavaveʻi ia ke fai mo ʻosi. ʻI hono kehé, ʻokú ne vaheʻi ha taimi feʻunga ke fokotuʻutuʻu ʻa e meʻa te ne faí. Pea ʻokú ne vaheʻi leva ʻa e taimi ke fakahoko lelei ai ʻa e ngāué.

 6. ʻOku anga-fēfē fakafeangai ha tokotaha anga-kātaki ʻi he fehangahangai mo e ngaahi ʻahiʻahí pe faingataʻá?

⁶ Ko e faá, ko ha tokotaha anga-kātaki ʻokú ne feinga ke kātekina ʻa e ngaahi ʻahiʻahí ʻo ʻikai ha lāunga. Ko e moʻoni, ʻoku ʻikai hala ia ke talanoa ki ha kaumeʻa ofi pea fakahaaʻi kiate ia ʻa e anga ʻetau ongoʻi fekauʻaki mo ha ʻahiʻahi. Kae kehe, ko ha tokotaha anga-kātaki te ne fai hono lelei tahá ke hokohoko atu ʻene kātekiná lolotonga iá ʻokú ne tauhi maʻu ha fakakaukau pau. (Kol. 1:11) ʻI he tuʻunga ko e kau Kalisitiane, ʻoku fiemaʻu ke tau fakahāhā ʻa e ngaahi tafaʻaki kotoa ko eni ʻo e kātakí. Ko e hā hono ʻuhingá? Tau lāulea angé ki ha ngaahi ʻuhinga ʻe niʻihi.

 7. Fakatatau ki he Sēmisi 5:7, 8, ko e hā ʻoku mātuʻaki mahuʻinga ai ʻa e kātakí? (Sio foki ki he fakatātaá.)

⁷ Ko e kātakí ko ha fiemaʻu tefito ia ki hotau fakamoʻuí. Hangē ko e kau sevāniti faitōnunga ʻi he kuohilí, ʻoku fiemaʻu ke tau tatali anga-kātaki ki he ʻOtuá ke ne fakahoko ʻene ngaahi talaʻofá. (Hep. 6:11, 12) ʻOku fakahoa ʻe he Tohi Tapú hotau tuʻungá ki ha tokotaha ngoue. (Lau ʻa e Sēmisi 5:7, 8.) Ko ha tokotaha ngoue ʻokú ne ngāue mālohi ke tō mo fuʻifuʻi ʻene ngoué, ka ʻoku ʻikai ke ne ʻiloʻi ʻa e taimi tofu pē ʻe tupu aí. Ko ia ko e tokotaha ngoué ʻokú ne tatali anga-kātaki, ʻo falala te ne utu ha ngoue. ʻI he tuʻunga meimei tatau, ʻoku tau nofoʻaki femoʻuekina ʻi he ngaahi ngāue fakalaumālié neongo “ʻoku ʻikai te [tau] ʻiloʻi pe ko fē ʻa e ʻaho ʻe haʻu ai ʻa [hotau] ʻEikí.” (Māt. 24:42) ʻOku tau tatali anga-kātaki, ʻo falala pau ʻi he taimi kotofa ʻa Sihová, te ne fakahoko ʻa e kotoa ʻene ngaahi talaʻofá. Kapau te tau hoko ʻo taʻekātaki, te tau hoko nai ai ʻo helaʻia ʻi he tatalí pea kamata ke ʻauhia mei he moʻoní. ʻE kamata foki ke tau tuli ki he ngaahi meʻa te ne ʻomai nai ʻa e fiefia fakataimi pē. Ka ʻo kapau ʻoku tau anga-kātaki, ʻe lava ke tau kātaki ʻo aʻu ki he ngataʻangá pea ʻe fakahaofi kitautolu.​—Mai. 7:7; Māt. 24:13.

 8. ʻOku anga-fēfē hono tokoniʻi kitautolu ʻe he kātakí ʻi heʻetau fakafeangai ki he niʻihi kehé? (Kolose 3:12, 13)

⁸ ʻOku tokoniʻi kitautolu ʻe he kātakí ʻi heʻetau fakafeangai ki he niʻihi kehé. ʻOkú ne tokoniʻi kitautolu ke fanongo tokanga ʻi he taimi ʻoku lea ai ʻa e niʻihi kehé. (Sēm. 1:19) ʻOku toe pouaki foki ʻe he kātakí ʻa e melinó. ʻOkú ne maluʻi kitautolu mei he fakafeangai vave pea leaʻaki ha meʻa taʻeʻofa ʻi he taimi ʻoku tau loto-mafasia aí. Pea kapau ʻoku tau kātaki, te tau fakatuotuai ki he ʻita ʻi hono fakalotomamahiʻi kitautolu ʻe ha taha. ʻI he ʻikai ke faisāuní, te tau “hokohoko atu ʻa e fekātakiʻaki mo e fefakamolemoleʻaki loto-lelei.”​—Lau ʻa e Kolose 3:12, 13.

 9. ʻOku anga-fēfē hono tokoniʻi kitautolu ʻe he kātakí ʻi he fiemaʻu ke tau fai ha fili? (Palōveepi 21:5)

⁹ ʻOku lava foki ke tokoniʻi kitautolu ʻe he kātakí ke fai ʻa e ngaahi fili lelei ange. ʻI he ʻikai ke fakavave pe loto-ʻohó, te tau vaheʻi ʻa e taimi ke fekumi pea sivisiviʻi ʻa e ngaahi fili ʻe lava ke tau faí. (Lau ʻa e Palōveepi 21:5.) Ko e fakatātaá, kapau ʻoku tau kumi ki ha ngāue, te tau hehema nai ke tali ʻa e fuofua ngāue ʻoku tuʻuaki maí, neongo kapau ko e ngāue ko iá te ne fakaleluʻi ʻetau lotu kia Sihová. Kae kehe, kapau ʻoku tau anga-kātaki, te tau vaheʻi ʻa e taimi ke fakakaukau ki he ngaahi tafaʻaki hangē ko e mamaʻo ʻo e feituʻú, ko e houa ngāué pea mo e kaunga ʻo e ngāué ki hotau fāmilí mo ʻetau moʻui fakalaumālié. ʻI he hoko ʻo anga-kātakí, te tau fakaʻehiʻehi nai ai mei hono fai ha fili fakavalevale.

10. ʻE lava fēfē ke fakatupulekina mo tauhi maʻu ʻe ha Kalisitiane ʻa e kātakí?

¹⁰ Lotu ki ha kātaki lahi ange. Ko e kātakí ko e tafaʻaki ia ʻo e fua ʻo e laumālié. (Kal. 5:22, 23) Ko ia ʻe lava ke tau lotu ʻo kole ʻa e tataki ʻa e laumālie māʻoniʻoní pea kole kia Sihova ke ne tokoniʻi kitautolu ke fakatupulekina ʻa hono fuá. Kapau ʻoku tau fehangahangai mo ha tuʻunga ʻoku ʻahiʻahiʻi ai ʻetau kātakí, ʻoku tau “hanganaki kole” ʻa e laumālie māʻoniʻoní ke ne tokoniʻi kitautolu ke tau kātaki. (Luke 11:9, 13) ʻE lava foki ke tau kole kia Sihova ke ne tokoniʻi kitautolu ke vakai ki he ngaahi meʻá mei heʻene vakaí. Pea hili ʻa e lotú, ʻoku fiemaʻu ke tau fai hotau lelei tahá ke hoko ʻo kātaki ʻi he ʻaho taki taha. Ko e lahi ange ʻetau lotu ki ha kātakí pea feinga ke hoko ʻo anga-kātakí, ko e lahi ange ia ʻa e hoko ʻa e ʻulungaanga ko ení ʻo faiaka ʻi hotau lotó pea hoko ko ha konga hotau angaʻitangatá.

11-12. Kuo anga-fēfē hono fakahāhā ʻe Sihova ʻa e kātakí?

¹¹ Fakalaulauloto ki he ngaahi faʻifaʻitakiʻanga Fakatohitapú. ʻOku maʻu ʻi he Tohi Tapú ʻa e ngaahi faʻifaʻitakiʻanga lahi ʻo e kakai naʻa nau kātaki. ʻI he fakalaulauloto ki he ngaahi fakamatala ko ení, ʻe lava ke tau ako ai ʻa e ngaahi founga ke fakahāhā ʻa e kātakí. Ki muʻa ke tau lāulea ki he niʻihi ʻo e ngaahi faʻifaʻitakiʻanga ko ení, tau vakai angé ki he faʻifaʻitakiʻanga tuʻu-ki-muʻa taha ʻo e kātakí​—ko Sihova.

¹² ʻI he ngoue ʻo ʻĪtení, naʻe lauʻikovi loi ʻe Sētane ʻa e huafa ʻo Sihová pea ʻohofi ʻa Hono ongoongo ko ha Tokotaha Pule fakamaau totonu mo anga-ʻofá. ʻI he ʻikai ke fakaʻauha ʻe Sihova ʻi he taimi pē ko iá ʻa e tokotaha laukovi loí, naʻá ne fakahāhā ʻa e kātaki mo e mapuleʻi-kita, ʻo ʻiloʻi ʻe fiemaʻu ʻa e taimi ke fakamoʻoniʻi ai ko ʻEne tuʻunga-pulé ʻa e lelei tahá. Pea lolotonga ʻa e tatalí, kuó ne kātakiʻi ʻa e luma kuo fai ki hono huafá. ʻIkai ko ia pē, kuo tatali anga-kātaki ʻa Sihova koeʻuhí ke maʻu ʻe he kakai tokolahi ange ʻa e faingamālie ke maʻu ʻa e moʻui taʻengatá. (2 Pita 3:9, 15) Ko hono olá, kuo hoko ʻa e kakai ʻe laui miliona ʻo ʻiloʻi ia. Kapau ʻoku tau tokangataha ki he ngaahi ʻaonga ʻo e kātaki ʻa Sihová, ʻoku ngalingali ʻe faingofua ange ke tau tatali ki he taimi kuó ne kotofa ke ʻomi ai ʻa e ngataʻangá.

13. Kuo anga-fēfē faʻifaʻitaki haohaoa ʻa Sīsū ki he kātaki ʻene Tamaí? (Sio foki ki he fakatātaá.)

¹³ Ko Sīsū ʻokú ne faʻifaʻitaki haohaoa ki he kātaki ʻene Tamaí, pea naʻá ne fakahāhā ʻa e ʻulungaanga ko ení lolotonga ʻene ʻi māmaní. Kuo pau pē naʻe ʻikai ke faʻa faingofua ke ne fakahāhā ʻa e kātakí, tautefito ki he kau sikalaipe mo e kau Fālesi mālualoí. (Sione 8:25-27) Neongo ia, hangē pē ko ʻene Tamaí, naʻe fakatuotuai ʻa Sīsū ki he ʻita. Naʻe ʻikai te ne faisāuni ʻi he taimi naʻe leakovia pe fakaʻitaʻi ai iá. (1 Pita 2:23) Naʻe kātekina anga-kātaki ʻe Sīsū ʻa e ngaahi ʻahiʻahí ʻo ʻikai ha lāunga. Tāneʻineʻi ke tala mai ʻi he Tohi Tapú ke tau “fakakaukau fakalelei atu ki he tokotaha ko ia kuó ne kātakiʻi ha lea fakafili pehē mei he kau angahalá”! (Hep. 12:2, 3) ʻI he tokoni ʻa Sihová, te tau lava foki mo kitautolu ʻo kātekina anga-kātaki ha faʻahinga ʻahiʻahi pē ʻoku hoko mai.

14. Ko e hā ʻe lava ke tau ako mei he kātaki ʻa ʻĒpalahamé? (Hepelū 6:15) (Sio foki ki he fakatātaá.)

¹⁴ Fēfē kapau ko ʻetau ngaahi ʻamanekina fekauʻaki mo e ngataʻangá kuo teʻeki ai ke fakahoko? Mahalo naʻa tau ʻamanekina ke hoko fuoloa mai ʻa e ngataʻangá. ʻOku tau manavahē naʻa ʻikai ke tau moʻui fuoloa ke sio ki heʻene hoko maí. Ko e hā ʻe lava ke ne tokoniʻi kitautolu ke hokohoko atu ʻa e tatali anga-kātakí? Fakakaukau ki he faʻifaʻitakiʻanga ʻa ʻĒpalahamé. ʻI he taʻu 75 ʻa ʻĒpalahame ʻo ʻikai haʻane fānaú, naʻe talaʻofa ʻa Sihova kiate ia: “Te u ngaohi koe ko ha puleʻanga lahi.” (Sēn. 12:1-4) Naʻe sio ʻa ʻĒpalahame ki hono fakahoko ʻa e talaʻofa ko iá? ʻIo, ka ko ha konga pē. Hili ʻa e kolosi ʻi he Vaitafe ʻIufaletesí pea tatali ʻi ha taʻu ʻe 25, naʻe sio ʻa ʻĒpalahame ki hono fanauʻi fakaemana hono foha ko ʻAisaké, pea hili ha toe taʻu ʻe 60 mei ai, naʻe fanauʻi mai ʻa hono ongo makapuna ko ʻĪsoa mo Sēkopé. (Lau ʻa e Hepelū 6:15.) Ka naʻe ʻikai ʻaupito ke sio ʻa ʻĒpalahame ki he hoko ʻa hono hakó ko ha puleʻanga lahi pea maʻu ʻa e Fonua ʻo e Talaʻofá. Neongo ia, naʻe maʻu ʻe he tangata faitōnunga ko iá ha kaumeʻa vāofi mo hono Tokotaha-Fakatupú. (Sēm. 2:23) Pea ʻi he taimi ʻe toetuʻu mai ai ʻa ʻĒpalahamé, he fiefia lahi ē ko ia ke ʻiloʻi ko ʻene tuí mo e kātakí naʻe taki atu ai ki he ngaahi tāpuaki ki he kotoa ʻo e ngaahi puleʻangá! (Sēn. 22:18) Ko e hā ʻa e lēsoní? Heʻikai nai ke tau sio tonu ki hono fakahoko ʻa e ngaahi talaʻofa kotoa ʻa Sihová ʻi he taimí ni. Kae kehe, kapau ʻoku tau anga-kātaki ʻo hangē ko ʻĒpalahamé, ʻe lava ke tau fakapapauʻi ʻe fakapaleʻi kitautolu ʻe Sihova ʻi he taimí ni pea toe mahulu ange ʻi Heʻene māmani foʻou kuo talaʻofá.​—Mk. 10:29, 30.

15. Ko e hā ʻe lava ke tau fakakaukau ki ai lolotonga ʻetau ako fakafoʻituituí?

¹⁵ ʻOku maʻu ʻi he Tohi Tapú ʻa e ngaahi faʻifaʻitakiʻanga kehe ʻo e kakai naʻa nau kātaki. (Sēm. 5:10) Fēfē ke ʻai ko ha poloseki ako ʻa hono sivisiviʻi ʻa e ngaahi faʻifaʻitakiʻanga ko iá?b Ko e fakatātaá, ko Tēvita neongo naʻá ne kei siʻi ʻi hono pani ia ke hoko ko e tuʻi ʻo ʻIsileli ʻi he kahaʻú, naʻe pau ke ne tatali ʻi he laui taʻu lahi ki muʻa ke ne maʻu ʻa e tuʻunga-tuʻí. Ko Simione mo ʻAna naʻá na lotu faitōnunga kia Sihova lolotonga ʻena tatali ki he Mīsaia naʻe talaʻofá. (Luke 2:25, 36-38) ʻI hoʻo ako ʻa e ngaahi fakamatala ko iá, kumi ʻa e tali ki he ngaahi fehuʻi ko ení: Ko e hā nai naʻá ne tokoniʻi ʻa e tokotaha ko ení ke fakahāhā ʻa e kātakí? Naʻe anga-fēfē ʻene maʻu ʻaonga mei he hoko ʻo kātakí? ʻE lava fēfē ke u faʻifaʻitaki kiate ia? Te ke maʻu ʻaonga foki mei he ako fekauʻaki mo e faʻahinga naʻe ʻikai ke nau fakahāhā ʻa e kātakí. (1 Sām. 13:8-14) Te ke ʻeke hifo nai: ‘Ko e hā nai ʻa e meʻa naʻá ne ʻai ke nau taʻekātakí? Ko e hā ʻa e ngaahi nunuʻa naʻa nau fehangahangai mo iá?’

16. Ko e hā ʻa e ngaahi ʻaonga ʻe niʻihi ʻo e hoko ʻo kātakí?

¹⁶ Fakakaukau ki he ngaahi ʻaonga ʻo e hoko ʻo kātakí. ʻI heʻetau hoko ʻo kātakí, ʻoku tau fiefia ange mo nonga ange. Ko ia ʻe lava ke tokoni ʻa e kātakí ki heʻetau moʻui lelei fakaʻatamaí mo e fakaesinó. ʻI heʻetau anga-kātaki ki he niʻihi kehé, ʻoku tau maʻu ai ʻa e ngaahi vahaʻangatae lelei ange mo kinautolu. Ko ʻetau fakatahaʻangá ʻe fāʻūtaha ange. Kapau ʻe fakaʻitaʻi kitautolu ʻe ha taha, ko ʻetau fakatuotuai ki he ʻitá ʻe lava ke ne taʻofi ʻa e tuʻungá mei he hoko ʻo toe kovi angé. (Saame 37:8, fkm. ʻi lalo.; Pal. 14:29) Kae mahulu hake aí, ʻi heʻetau anga-kātakí, ʻoku tau faʻifaʻitaki ai ki heʻetau Tamai fakahēvaní pea ʻunuʻunu ke toe ofi ange kiate ia.

17. Ko e hā ʻoku totonu ke tau fakapapauʻi ke faí?

¹⁷ He ʻulungaanga fakamānako mo ʻaonga ē ko e kātakí! Neongo heʻikai faingofua maʻu pē ke tau anga-kātaki, ʻi he tokoni ʻa Sihová, ʻe lava ke hokohoko atu ʻetau fakatupulekina ʻa e ʻulungaanga ko ení. Pea ʻi heʻetau tatali anga-kātaki ki he māmani foʻoú, ʻe lava ke tau falala pau “ko e fofonga ʻo Sihová ʻokú ne siofi ʻa e faʻahinga ʻoku manavahē kiate iá, ʻa e faʻahinga ʻoku nau tatali ki heʻene ʻofa mateakí.” (Saame 33:18) ʻOfa ke tau fakapapauʻi kotoa ke hokohoko atu ʻetau kofuʻaki ʻa e kātakí.