Faingataʻa ʻOku Iku ki he ʻAmanaki

“Ka hokosia ʻa e kuonga fakamui, ʻe ai ha ngaahi taimi faingataʻa.”—2 TIMOTE 3:1.

KUÓ KE fanongo—pe sio tonu—ʻi ha taha ʻo e ngaahi meʻa fakamamahi ko ení?

● Ko ha mahaki fakatupu mate ʻokú ne toʻo ʻa e moʻui ʻa e tokolahi.

● Ko ha honge ʻokú ne ʻave ki faʻitoka ʻa e lauingeau.

● Ko ha mofuike ʻokú ne tāmateʻi ʻa e laui afe pea mole ai ʻa e ʻapi ʻo e tokolahi.

ʻI he ngaahi peesi hokó, te ke vakai ai ki ha ngaahi moʻoniʻi meʻa te ke fakakaukau fakamātoato ai fekauʻaki mo e ngaahi meʻa ʻoku hoko hangē ko ení. Te ke toe ʻiloʻi ai naʻe tomuʻa tala ʻe he Tohi Tapú ʻe hoko ʻa e ngaahi tuʻunga peheé ʻi he vahaʻa taimi ʻoku ui ko e “kuonga fakamui.”

Kae kehe, ko e taumuʻa ʻo e ngaahi kupu ko ení, ʻoku ʻikai ko e ʻaí ke fakatuipauʻi koe ʻoku tau moʻui ʻi ha māmani faingataʻa. Ngalingali kuó ke sio tonu ʻi he faingataʻa ko ení. ʻI hono kehé, ʻoku faʻufaʻu iá ke ʻoatu ai kiate koe ʻa e ʻamanaki. ʻE fakahaaʻi atu ai ko e fakahoko ʻo e kikite ko eni ʻe onó ʻoku ʻuhinga iá kuo vavé ni ke ngata ʻa e “kuonga fakamui.” ʻE toe lāulea ʻi he kupu hokohoko ko ení ki ha ngaahi fakafepaki anga-maheni ki he fakamoʻoni ko ení pea ʻe ʻomai ai ʻa e ʻuhinga lelei ke tui ʻoku toka mai pē mei muʻa ha meʻa ʻoku lelei ange.

Kikite 1. Ngaahi Mofuike

“ʻE ai ʻa e ngaahi fuʻu mofuike.”—LUKE 21:11.

● Ko e māhina 16 ko Winnie, ʻoku fusi hake ia mei he mapakipakiʻi piliki ʻi Haiti. Ko ha kau ngāue TV naʻa nau līpooti e fakatamakí ne nau fanongo atu ki heʻene kiʻi toʻetoʻé. ʻOkú ne hao ʻi he mofuiké, ka ʻoku ʻikai pehē ʻa ʻene ongo mātuʻá.

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? ʻI he taimi naʻe taaʻi ai ʻe ha mofuike 7.0 ʻa hono mālohí ʻa Haiti ʻi Sanuali 2010, ko ha kakai laka hake he toko 300,000 naʻe mate aí. Tānaki atu ki ai ko ha toko 1.3 miliona naʻe mole leva honau ngaahi ʻapí. Neongo ʻa ʻene mālohí, ko e mofuike ʻi Haití naʻe ʻikai ko ha meʻa makehe ia. ʻIkai siʻi hifo he mofuike lalahi ʻe 18 naʻe hoko ʻi māmani lahi ʻi he vahaʻa ʻo ʻEpeleli 2009 mo ʻEpeleli 2010.

KO E HĀ HA FAKAFEPAKI ANGA-MAHENI? ʻOku ʻikai ke tau hokosia ha mofuike lahi ange; koeʻuhi ko e tekinolosia fakaeonopōní, ʻoku tau lāuʻilo lahi ange ai pē ki ai ʻo laka ange ia he kakai ʻi he kuohilí.

ʻOKU ʻUHINGA LELEI ʻA E FAKAFEPAKI KO IÁ? Fakakaukau ki he moʻoniʻi meʻa ko ení: ʻOku ʻikai fakamamafaʻi ʻe he Tohi Tapú ia ʻa e lahi ʻo e ngaahi mofuiké lolotonga ʻa e kuonga fakamuí. Kae kehe, ʻoku pehē ai “ʻe ai ʻa e ngaahi fuʻu mofuike” ʻe hoko “ʻi he ngaahi potu kehekehe,” ʻo ʻai ai ia ko e taha ʻo e ngaahi tafaʻaki ʻiloa ʻo e vahaʻa taimi mahuʻinga ko eni ʻo e hisitōliá.—Maake 13:8; Luke 21:11.

KO E HĀ HOʻO FAKAKAUKAÚ? ʻOku tau sio ki ha ngaahi fuʻu mofuike, ʻo hangē tofu pē ko ia naʻe tomuʻa tala ʻe he Tohi Tapú?

ʻOku ʻikai nai hā ngali ko e ngaahi mofuiké pē ʻa e fakamoʻoni aofangatuku ʻoku tau moʻui ʻi he kuonga fakamuí. Neongo ia, ko e kikite pē ia ʻe taha ʻa ia ʻoku fakahokó. Vakai angé ki hano ua.

[Fakamatala ʻi he peesi 4]

“Ko kimautolu [kau ako sioloki fakafīsikí] ʻoku mau ui ia ko e ngaahi fuʻu mofuike. Ko e faʻahinga kehé kotoa ʻoku nau ui ia ko e meʻa fakalilifu.”—KEN HUDNUT, SAVEA FAKASIOLOKI U.S.

[Credit Line ki he Fakatātā ʻi he peesi 4]

© William Daniels/Panos Pictures

Kikite 2. Honge

“ʻE ai ha ngaahi honge.”—MAAKE 13:8.

● ʻOku kumi hūfanga ha tangata ʻi he kolo ko Quaratadji, ʻi Naisa. Ko e kāinga ʻo e tangatá, mo hono fanga tokoua mo e tuofāfine īkí, ne nau toe haʻu mei he ngaahi feituʻu kehe ʻo e fonuá ʻi ha feinga ke hao mei he fiekaiá. Neongo ia, ʻoku tokoto toko taha ʻa e tangatá ʻi ha fala ʻi he kelekelé. Ko e hā ʻokú ne toko taha aí? “ʻOku ʻikai lava ke ne fafanga [hono fāmilí] pea ʻoku ʻikai lava ke ne sio hangatonu atu kia kinautolu,” ko e fakamatala ia ʻa Sidi, ko e ʻeiki ʻo e koló.

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? ʻI māmani lahi, ko e meimei toko 1 ʻi he toko 7 ʻoku ʻikai te ne maʻu ha meʻakai feʻunga ke kai ʻi he ʻaho taki taha. ʻOku toe kovi ange ʻa e fiká ʻi he faka-Tonga ʻo Sahala ʻi ʻAfiliká, ʻa ia ʻoku vakai ai ki he toko 1 ʻi he toko 3 ʻoku fiekaia ʻi ha vahaʻa taimi lōloa. Ke mahino ange ʻa e fika ko iá, sioloto atu ki ha fāmili ʻoku kau ki ai ha tamai, ko ha faʻē, mo ha pēpē. Kapau ʻoku ʻi ai ha meʻakai feʻunga pē ki he toko ua ʻo kinautolu, ko hai ʻe tuku ke fiekaiá? Ko e tamaí? ko e faʻeé? ko e pēpeé? Ko e fili eni kuo pau ke fai ʻe he ngaahi fāmili peheé ʻi ha tuʻunga fakaʻaho.

KO E HĀ HA FAKAFEPAKI ANGA-MAHENI? ʻOku ʻomai ʻe he māmaní ʻa e meʻakai lahi ange ki he tokotaha kotoa pē. Ko e ngaahi koloa ʻoku ʻomai ʻe he māmaní ʻoku fiemaʻú pē ke levaʻi lelei ange.

ʻOKU ʻUHINGA LELEI ʻA E FAKAFEPAKI KO IÁ? Ko e moʻoni, ko e kau fāmá ʻoku lava ke nau ʻomai mo ʻave holo ʻa e meʻakai lahi ange ʻi ha toe taimi ki muʻa ʻi he hisitōliá. ʻOku totonu ke malava ʻa e ngaahi puleʻanga fakaetangatá, ʻi ha tuʻunga lelei, ʻo levaʻi ʻa e maʻuʻanga meʻakai ʻa e māmaní ke solova ai ʻa e palopalema ʻi he fiekaiá. Kae kehe, naʻa mo e hili ʻa e feinga ʻi ha ngaahi hongofuluʻi taʻu, kuo ʻikai malava ke nau fai pehē.

KO E HĀ HOʻO FAKAKAUKAÚ? Kuo fakahoko ʻa e Maake 13:8? Neongo ʻa e ngaahi fakalakalaka ʻi he tekinolosiá, ʻoku uesia ʻe he hongé ʻa e faʻahinga ʻo e tangatá ʻi ha tuʻunga fakamāmanilahi?

Ko e ngaahi mofuiké mo e hongé ʻoku faʻa muʻomuʻa ia ʻi he ngaahi palopalema ʻoku malanga hake mei ha toe tafaʻaki ʻe taha ʻo e fakaʻilonga ʻo e kuonga fakamuí.

[Fakamatala ʻi he peesi 5]

“Laka hake he vahe tolu ʻe taha ʻo e fānau ʻoku nau mate ʻi he niumōniá, fakalelé mo e ngaahi mahaki kehé naʻe mei lava ke nau hao kapau naʻe ʻikai te nau fasimanava.”—ANN M. VENEMAN, TALĒKITA PULE KI MUʻA ʻO E PAʻANGA TOKONI ʻA E UN KI HE FĀNAÚ.

[Credit Line ki he Fakatātā ʻi he peesi 5]

© Paul Lowe/Panos Pictures

Kikite 3. Mahaki

“Ko e kakaí te nau . . . puke ʻi he ngaahi mahaki fakalilifu.”—LUKE 21:11, Contemporary English Version.

● Ko Bonzali, ko ha ʻōfisa moʻui fakapuleʻanga ia ʻi ha fonua ʻAfilika naʻe haveki ʻe he tau fakalotofonuá, ʻokú ne fai ha meʻa pē ʻokú ne malavá ke faitoʻo ai ʻa e kau ngāue ʻi ha keliʻanga malala ʻi hono koló ʻa ia ʻoku nau teitei mate ʻi he vailasi Marburg.a Ko ʻene ngaahi kole tokoni ki he kau ʻōfisa ʻi ha kolo lahi angé kuo ʻikai maʻu mei ai ha tali. ʻI ha māhina ʻe fā ki mui ai, naʻe faifai pē ʻo aʻu mai ai ʻa e tokoní, ka kuo mate ʻa Bonzali ia. Naʻá ne pihia ʻi he Marburg mei he kau keli malala naʻá ne feinga ke fakahaofí.

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? Ko e ngaahi mahaki ʻi he halanga mānavá (hangē ko e niumōniá), ngaahi mahaki fakalelé, ʻeitisí, tīpií, mo e malēliá ʻoku kau ia ʻi he ngaahi mahaki fakatupu mate taha ʻokú ne uesia ʻa e faʻahinga ʻo e tangatá. ʻI ha taʻu ki muí ni, ko e faʻahinga ʻe nima ko eni ʻo e mahakí kuó ne tāmateʻi ʻo fakafuofua ki he faʻahinga ʻe toko 10.7 miliona. ʻI hono fakalea ʻe tahá, kuo tāmateʻi ʻe he ngaahi mahakí fakafuofua ki he toko taha ʻi he sekoni ʻe tolu kotoa pē, ʻi he taʻú kotoa.

KO E HĀ HA FAKAFEPAKI ANGA-MAHENI? ʻOku hokohoko atu ʻa e tupu ʻa e tokolahi ʻo e māmaní, ko ia ai, ʻoku ʻi ai ʻa e ngaahi keisi lahi ange ʻo e mahakí. ʻOku tokolahi ange ʻa e kakai ʻa ia ʻe lava ke nau puké.

ʻOKU ʻUHINGA LELEI ʻA E FAKAFEPAKI KO IÁ? Ko e tokolahi ʻo e māmaní kuo tupulaki fakaʻulia. Ka ʻoku pehē pē mo e malava ʻa e tangatá ke ʻiloʻi, taʻotaʻofi, mo faitoʻo ʻa e mahakí. ʻI he ʻuhinga lelei leva, ʻikai ʻoku totonu ke hōloa ai ʻa e hoko ʻa e mahakí ki he fāmili ʻo e faʻahinga ʻo e tangatá? Neongo ia, ko e tuʻunga fehangahangai pē ʻoku hokó.

KO E HĀ HOʻO FAKAKAUKAÚ? ʻOku puke ʻa e kakaí ʻi he ngaahi mahaki fakalilifu hangē ko ia ne tomuʻa tala ʻe he Tohi Tapú?

Ko e ngaahi mofuiké, hongé, mo e ngaahi mahakí ʻa e ngaahi mālohi ʻikai mei he tangatá ʻokú ne fakatupunga e ʻauha ʻa e laui miliona ʻo e kakaí. ʻOku faingataʻaʻia ʻa e toe laui miliona ʻi he nima ʻo e kaungā faʻahinga ʻo e tangatá—ko e tokolahi ai kuo ngaohikoviʻi ʻe he faʻahinga ko ē ʻoku totonu ke nau maluʻi kinautolú. Fakatokangaʻi ange ʻa e meʻa ʻoku tala ʻe he kikite ʻi he Tohi Tapú ʻe hokó.

[Fakamatala ʻi lalo]

[Fakamatala ʻi he peesi 6]

“ʻOku fakalilifu ke kai mei tuʻa ʻe ha laione pe ko ha meʻa, ka ʻoku fakalilifu tatau ke kai mei loto ki tuʻa ʻe ha mahaki fakalilifu pea ke sio ki he hoko ʻa e meʻa ko iá kiate koé.”—TOKETĀ KILI KO MICHAEL OSTERHOLM.

[Credit Line ki he Fakatātā ʻi he peesi 6]

© William Daniels/Panos Pictures

Kikite 4. ʻIkai ha ʻOfa Fakanatula

“Ko e kakaí ʻe . . . ʻikai haʻanau ʻofa fakanatula ki honau ngaahi fāmilí.”—2 TIMOTE 3:1-3, God’s Word Bible

● Ko Chris ʻoku ngāue ia maʻá e tokoni ki he fakamālohi ʻi he fāmilí ʻi Uēlesi Tokelau. “ʻOku ou manatuʻi ʻa e haʻu ʻa ha fefine ʻe taha ʻa ia naʻe tā lahi fakaʻulia, ʻo ʻikai lava ai ke u ʻiloʻi ia mei he taimi fakamuimui naʻá ku sio ai kiate iá,” ko e lau ia ʻa Chris. “Ko e kakai fefine kehé ʻoku uesia lahi fakaeongo kinautolu ʻo aʻu ʻo ʻikai lava ke toe mavahe honau matá mei he falikí.”

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? ʻI ha fonua ʻAfilika ʻe taha, ʻoku fakafuofua ko e fefine ʻe toko 1 ʻi he kakai fefine ʻe toko 3 kotoa pē kuo pāʻusiʻi fakaefehokotaki fakasino ia ʻi heʻene kei siʻí. Ko ha savea naʻe fai ʻi he fonua tatau naʻe ʻiloʻi ai ko e kakai tangata laka hake he vahe tolu ʻe taha naʻa nau ongoʻi ʻoku ala tali pē ke tā honau uaifí. Kae kehe, ko e kakai fefiné ʻoku ʻikai ko kinautolu pē ʻoku maʻukovia he fakamālohi ʻi he fāmilí. Ko e fakatātaá, ʻi Kānata, ko e meimei toko 3 ʻi he kakai tangata ʻe toko 10 kuo tā kinautolu pe ʻi he tafaʻaki ʻe tahá, ʻoku ngaohikoviʻi kinautolu ʻe honau ngaahi hoá.

KO E HĀ HA FAKAFEPAKI ANGA-MAHENI? Kuo ʻi ai maʻu pē ʻa e fakamālohi ʻi he fāmilí. Ko e meʻá pē he ʻoku fai ʻa e tokanga lahi ange ki ai he ʻahó ni ʻi he ngaahi taimi he kuohilí.

ʻOKU ʻUHINGA LELEI ʻA E FAKAFEPAKI KO IÁ? Ko e lāuʻilo ki he fakamālohi ʻi he fāmilí kuo fakalalahi ia ʻi he ngaahi hongofuluʻi taʻu ki mui ní. Ka kuo fakasiʻisiʻi ʻe he lāuʻilo lahi ange ki he palopalemá ʻa e lahi ʻo e hoko ʻa e fakamālohi ʻi he fāmilí? ʻIkai, ʻoku ʻikai ko e tuʻungá ia. Ko e ʻikai ha ʻofa fakanatulá ʻoku toe mafolalahia ange ai pē ia.

KO E HĀ HOʻO FAKAKAUKAÚ? ʻOku fakahoko ʻa e 2 Timote 3:1-3? ʻOku ʻikai ʻofa ʻa e tokolahi ki honau fāmilí ʻa ia ʻoku totonu ke hoko fakanatulá?

Ko e kikite hono nima ʻokú ke sio ʻi hono fakahokó ʻoku kau ki ai hotau ʻapi, ko e māmaní. Fakakaukau angé ki he meʻa ʻoku fakahaaʻi ʻe he Tohi Tapú ʻi he kaveinga ko ení.

[Fakamatala ʻi he peesi 7]

“Ko e fakamālohi he fāmilí ʻoku fakahaaʻi ko e taha ia ʻo e ngaahi faihia hokohoko lahi taha ʻoku ʻikai līpooti ʻi he sōsaietí. ʻI hono fakaʻavalisí ʻe ngaohikoviʻi tuʻo 35 ha fefine ki muʻa ke fetuʻutaki ki he kau polisí.”—KO HA FEFINE-LEA TOKONI HE TELEFONÍ MAʻÁ E NGAOHIKOVIA ʻI HE FĀMILÍ ʻI UĒLESI.

Kikite 5. Fakaʻauha ʻa e Māmaní

‘[Ko e ʻOtuá te ne] fakaʻauha ʻakinautolu ʻoku fakaʻauha ʻa e māmaní.’—FAKAHĀ 11:18.

● Ko Mr. Pirri ʻoku ngāue ia ʻi hono ngaohi ʻo e uaine mei he niú ʻi Kpor, Naisīlia. Ko ʻene ngāué naʻe maumauʻi lahi ia ʻi ha mahua lahi ʻa e loló ʻi Niger Delta. “ʻOkú ne tāmateʻi ʻemau fanga iká, maumauʻi ʻa homau kilí, ʻuliʻi homau ngaahi vaitafé,” ko ʻene leá ia. “Kuo ʻikai toe ʻi ai haʻaku maʻuʻanga moʻui.”

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? Fakatatau ki he kau mataotao ʻe niʻihi, ko e toni veve ʻe 6.5 miliona ʻoku hū ki he ʻōseni ʻo e māmaní ʻi he taʻu taki taha. ʻOku fakafuofua ko ha peseti ʻe 50 ʻo e veve ko iá ko e pelesitiki ʻa ia ʻe tētē ia ʻi he taʻu ʻe lauingeau ki muʻa ke ʻaungá. Tuku kehe hono ʻuliʻi ʻo e māmaní, ʻoku holoki ʻe he tangatá ʻa hono koloa fakanatulá ʻi ha tuʻunga lahi fakaʻulia. ʻOku fakahaaʻi ʻi he ngaahi fakatotoló ʻoku fiemaʻu ki he māmaní ha taʻu ʻe taha mo e māhina ʻe nima ke fakakake ai ʻa e meʻa ʻoku ngāuekoviʻaki ʻe he tangatá ʻi he taʻú. “Kapau ʻe hokohoko atu ʻa e tokolahi ʻo e kakaí mo e hehema ki hono ngāuekoviʻakí, te tau fiemaʻu ʻa e tatau ʻo e foʻi Māmani ʻe ua ʻi he taʻu 2035,” ko e līpooti ia ʻa e nusipepa ʻAositelēlia ko e Sydney Morning Herald.

KO E HĀ HA FAKAFEPAKI ANGA-MAHENI? ʻOku mohu fakakaukau ʻa e tangatá. ʻE lava ke tau fakaleleiʻi ʻa e ngaahi palopalema ko ení pea fakahaofi ʻa e māmaní.

ʻOKU ʻUHINGA LELEI ʻA E FAKAFEPAKI KO IÁ? Kuo langaʻi ʻe he faʻahinga ngāue mālohi tokolahi mo e ngaahi kulupu ʻa e ʻilo ki he ngaahi ʻīsiu fakaeʻātakaí. Neongo ia, ʻoku hokohoko atu pē hono ʻuliʻí ʻi ha tuʻunga lahi fau.

KO E HĀ HOʻO FAKAKAUKAÚ? ʻOku ʻi ai ha fiemaʻu ke kau mai ʻa e ʻOtuá ʻo fakahaofi hotau palanité mei hono fakaʻauhá—ʻo hangē tofu pē ko ia kuó ne palōmesi te ne faí?

Tānaki ki he kikite ʻe nima naʻe toki ʻosi lāulea ki aí, naʻe toe tomuʻa tala ʻe he Tohi Tapú ʻa e ngaahi meʻa lelei ʻe hoko ʻi he kuonga fakamuí. Fakakaukau angé ki ha fakatātā ʻe taha ʻi he kikite hono onó.

[Fakamatala ʻi he peesi 8]

“ʻOku ou ongoʻi hangē kuó u ʻalu mei hono maʻu ha konga ʻo ha palataisí ki hono maʻu ʻo ha lingiʻanga veve kona.”​—ERIN TAMBER, KO HA TOKOTAHA ʻOKU NOFO ʻI HE MATĀFANGA ʻO E KŪLIFÁ, ʻAMELIKA, ʻI HE HOHAʻA FEKAUʻAKI MO E NGAAHI NUNUʻA ʻO E MAHUA ʻA E LOLÓ ʻI HE 2010 ʻI HE KŪLIFA ʻO MEKISIKOÚ

[Puha ʻi he peesi 8]

Ko e ʻOtuá ʻOku Tupu mei Aí?

Koeʻuhi ne tomuʻa tala ʻe he Tohi Tapú ʻa e tuʻunga kovi ʻoku tau sio ai he ʻaho ní, ʻoku ʻai ʻe he meʻa ko iá ke pehē ko e ʻOtuá ʻoku tupu mei aí? ʻOkú ne fakatupunga ʻetau faingataʻaʻiá? ʻE lava ke ke maʻu e tali fakafiemālie ki he ongo fehuʻi ko iá he vahe 11 ʻo e tohi Ko e Hā ʻOku Akoʻi Moʻoni ʻe he Tohi Tapú? ko e pulusi ʻe he Kau Fakamoʻoni ʻa Sihová.

[Credit Line ki he Fakatātā ʻi he peesi 8]

U.S. Coast Guard photo

Kikite 6. Ngāue Fakamalanga ʻi he Foʻi Kolopé

“Koe ogoogolelei ni oe buleaga e malaga aki i mamani kotoabe.”—MĀTIU 24:14, PM.

● Ko Vaiatea ʻoku nofo ia ʻi ha motu mamaʻo he Pasifikí ʻi he Pupunga Motu Tuamotu. Neongo ko Tuamotu ʻoku kau ki ai ʻa e meimei motu feo ʻe 80 ʻoku mafola ʻi ha ʻēlia laka hake he sikuea maile ʻe 310,000 (sikuea kilomita ʻe 802,900), ko e tokolahi ʻo hono kakaí ʻoku toko 16,000 pē nai. Neongo ia, ko Vaiatea mo hono ngaahi kaungāʻapí kuo aʻu ki ai ʻa e Kau Fakamoʻoni ʻa Sihová. Ko e hā hono ʻuhingá? Koeʻuhí ʻoku fakaʻamu ʻa e Kau Fakamoʻoní ke vahevahe atu ʻa e ongoongo lelei fekauʻaki mo e Puleʻanga ʻo e ʻOtuá ki he kakai kotoa pē—ʻo tatau ai pē pe ko fē ʻoku nau nofo aí.

KO E HĀ ʻOKU FAKAHAAʻI ʻI HE NGAAHI MOʻONIʻI MEʻÁ? Ko e pōpoaki ʻo e Puleʻangá ʻoku aʻu ia ki he tuliki kotoa pē ʻo e foʻi kolopé. ʻI he taʻu 2010 pē, naʻe fakamoleki ai ʻe he Kau Fakamoʻoni ʻa Sihová ʻa e houa laka hake he 1.6 piliona ʻi hono fanongonongo ʻa e ongoongo lelei ko ení ʻi he fonua ʻe 236. Ko ha fakaʻavalisi ia ʻo e miniti ʻe 30 ʻi he ngāue fakamalangá naʻe fai ʻe he tokotaha Fakamoʻoni kotoa pē ʻi he ʻaho taki taha. ʻI he hongofuluʻi taʻu kuohilí, kuo nau faʻu ai mo tufaki ʻa e ʻū tohi ako Tohi Tapu ʻe 20 piliona tupu.

KO E HĀ HA FAKAFEPAKI ANGA-MAHENI? Ko e pōpoaki ʻo e Tohi Tapú kuo malangaʻi ia ʻi he taʻu ʻe laui afe.

ʻOKU ʻUHINGA LELEI ʻA E FAKAFEPAKI KO IÁ? Ko e moʻoni, kuo malangaʻi ʻe he tokolahi ha meʻa fekauʻaki mo e pōpoaki ʻa e Tohi Tapú. Kae kehe, kuo fai ia ʻe he tokolahi tahá ʻi ha taimi nounou pē pea ʻi ha feituʻu fakangatangata. ʻI hono kehé, ko e Kau Fakamoʻoni ʻa Sihová ʻoku nau lavaʻi ha feingangāue fakamalanga fokotuʻutuʻu maau ʻi he foʻi kolopé ʻa ia ʻoku aʻu ki he kakai ʻe laui teau miliona. Kuo kītaki ʻa e Kau Fakamoʻoní ʻi heʻenau ngāue fakamalangá neongo ʻa e fakafepaki kakaha mei he niʻihi ʻo e ngaahi kautaha mālohi mo anga-fakamamahi taha ʻi he hisitōlia ʻo e tangatá.a (Maake 13:13) ʻIkai ngata aí, ʻoku ʻikai totongiʻi ʻa e Kau Fakamoʻoni ʻa Sihová ke nau malanga. ʻI hono kehé, ʻoku nau foaki loto-lelei honau taimí, pea ʻoku nau tuʻuaki taʻetotongi ʻenau ʻū tohí. Ko ʻenau ngāué ʻoku poupouʻi kotoa ia ʻe he ngaahi tokoni loto-fiefoaki.

KO E HĀ HOʻO FAKAKAUKAÚ? ʻOku malangaʻi ʻi māmani lahi ʻa e ‘ogoogolelei oe buleagá’? Ko e fakahoko ʻo e kikite ko ení ʻe lava ke ʻuhinga iá ʻoku toka mei muʻa pē ha meʻa lelei ange?

[Fakamatala ʻi lalo]

[Fakamatala ʻi he peesi 9]

“Lolotonga hono fakaʻatā ʻe Sihová, te tau hokohoko atu hono malangaʻi ʻa e ongoongo lelei ʻo e Puleʻangá ʻaki ʻa e faivelenga, ʻo ngāueʻaki ʻa e founga kotoa pē ʻoku ala lavá ke aʻu ai ki he kakaí.”​—2010 YEARBOOK OF JEHOVAH’S WITNESSES.

Taimi Lelei Ange ʻi Muʻa Pē!

“ʻOku toe siʻi pea mole ʻa ia ʻoku fai kovi . . . Ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.”—SĀME 37:10, 11.

TE KE saiʻia ke sio ki he hoko ʻa e kikite ʻoku hiki ʻi ʻolungá? ʻOku ʻikai ha veiveiua, te ke pehē. ʻOku ʻi ai e ngaahi ʻuhinga mālohi ke tui ai kuo vavé ni ke hoko.

Ko e ngaahi kupu ki muʻá naʻe lāulea ai ki he niʻihi pē ʻo e ngaahi kikite Fakatohitapu ʻa ia ʻoku fakahaaʻi mahino ai ʻoku tau moʻui ʻi he “kuonga fakamui.” (2 Timote 3:1-5) Naʻe fakamānavaʻi ʻe he ʻOtuá ʻa e kau hiki Tohi Tapú ke nau tomuʻa tala ʻa e ngaahi meʻa ko iá koeʻuhi ke lava ai ʻo tau maʻu ʻa e ʻamanaki. (Loma 15:4) Ko e fakahoko ʻo e ngaahi kikite ko iá ʻoku ʻuhinga iá ko e ngaahi faingataʻa ʻoku tau fehangahangai mo ia he taimi ní kuo vavé ni ke ngata.

Ko e hā ʻe hoko hili ʻa e kuonga fakamuí? Ko e Puleʻanga ʻo e ʻOtuá ʻe pule mai ki he faʻahinga kotoa ʻo e tangatá. (Mātiu 6:9) Fakakaukau angé ki he fakamatala ʻa e Tohi Tapú ki he ngaahi tuʻunga he māmaní ʻi he taimi ko iá:

● ʻE fakangata ʻa e fiekaiá. “E i ai ae falukuga oe uite i he fonua i he tumutumu oe gaahi mouga, e gauʻeuʻe hono fua.”—Sāme 72:16, PM.

● ʻE fakangata ʻa e mahakí. “ʻOku ʻikai ha nofo ai te ne pehe, ʻOku ou mahaki.”—Aisea 33:24.

● ʻE fakafoʻou ʻa e foʻi māmaní. “E fiefia ae toafa moe botu lala koeuhi ko kinautolu, bea e fiefia ae botu liaki, bea fiji o hage koe lose.”—Aisea 35:1, PM.

Ko e niʻihi pē eni ʻo ha ngaahi kikite siʻi Fakatohitapu fakalototoʻa ʻa ia kuo vavé ni ke fakahoko. Ko e hā ʻoku ʻikai te ke kole ai ki he Kau Fakamoʻoni ʻa Sihová ke nau fakahaaʻi atu ʻa e ʻuhinga ʻoku nau tuipau ai ʻoku ʻi ai ʻa e taimi lelei ange ʻi muʻa pē?