Naʻe ʻIkai Ke U ʻAlu ki ha Feituʻu ʻo Taʻetoʻo ʻEku Meʻafaná

Naʻe fanauʻi au pea ʻohake ʻi he ngaahi kolo ʻuta ʻo Lomá, ʻi ha feituʻu naʻe nofo ai ʻa e kakai masivá. Ko e moʻuí naʻe faingataʻa. Naʻe ʻikai ʻaupito ke u ʻiloʻi ʻeku faʻē moʻoní, pea naʻe ʻikai ke u maʻu ha vahaʻangatae lelei mo ʻeku tamaí. Naʻá ku ako ki he founga ke moʻui ai ʻi ha ʻātakai faingataʻa ʻi heʻeku tupu haké.

ʻI heʻeku taʻu hongofulú pē, naʻe ʻosi kamata ia ke u kaihaʻa. Pea ʻi heʻeku taʻu 12, naʻá ku hola mei ʻapi ko e fuofua taimí ia. ʻI he taimi lahi, naʻe pau ke haʻu ʻeku tamaí ki he ʻapi polisí ʻo ʻave au ki ʻapi. Naʻá ku fakafekiki maʻu pē mo e kakaí​—naʻá ku anga-fakamālohi pea ʻita ʻi he meʻa kotoa pē. ʻI he taimi naʻá ku taʻu 14 aí, naʻá ku mavahe ʻosi mei ʻapi. Naʻe kamata leva ke u ngāueʻaki ʻa e faitoʻo kona tapú pea nofo ʻi he veʻehalá. Koeʻuhi naʻe ʻikai ke ʻi ai ha feituʻu ke u mohe ai, naʻá ku faʻa fahi ha meʻalele pea mohe ʻi loto ʻo aʻu ki he pongipongi ʻe tahá. Pea te u toki fakasio leva ha paipa vai ke u tafitafi ai.

Naʻá ku hoko ʻo pāteʻi ʻi he kaihaʻá​—mei he lele kató ki he kaihaʻa ʻi he ngaahi ʻapaatimení mo e ngaahi ʻapi masani ʻo e kau koloaʻiá ʻi he poʻulí. Naʻe kamata ke kovi hoku ongoongó pea taimi siʻi pē mei ai naʻe fakaafeʻi au ke u kau ki ha kau kengi ʻiloa, ʻo u maʻu ai ʻa e “faingamālie” ke kamata kaihaʻa ʻi he ngaahi pangikeé. Koeʻuhi ko ʻeku anga-fakamamahí, naʻe vave ai ʻeku hoko ko ha mēmipa naʻe fakaʻapaʻapaʻi ʻe he kau kengí. Naʻe ʻikai ke u ʻalu ki ha feituʻu ʻo taʻetoʻo ʻeku meʻafaná; ko hono moʻoní, naʻá ku mohe pē mo ia ʻi heʻeku lalo piló. Naʻe hoko ʻa e fakamālohí, faitoʻo kona tapú, kaihaʻá, leakoví, mo e fehokotaki fakasino taʻetāú ko ʻeku founga moʻuí. Naʻe faʻa kumi maʻu pē au ʻe he kau polisí. Naʻe tuʻo lahi hono puke au ʻo fakahuú, pea naʻá ku faʻa nofo pilīsone ʻi ha ngaahi taʻu lahi.

ʻI ha taimi ʻe taha ʻi hono tuku ange au mei pilīsoné, naʻá ku fakakaukau ke u ʻalu ʻo ʻaʻahi ki he tehina ʻo ʻeku faʻeé. Naʻe ʻikai ke u ʻiloʻi kuó ne hoko ko e taha ʻo e Kau Fakamoʻoni ʻa Sihová fakataha mo ʻeku ongo kāsini ʻe ua. Naʻa nau fakaafeʻi au ke maʻu ha fakataha ʻo e Kau Fakamoʻoní. Pea koeʻuhi ko ʻeku fieʻiló, naʻá ku fakakaukau ai ke u ʻalu mo kinautolu. ʻI heʻemau aʻu atu ki he Fale Fakatahaʻangá, naʻá ku fili ke tangutu pē ʻi he veʻe matapaá koeʻuhi ke u siofi ʻa e faʻahinga ʻoku haʻu mo ʻalú. Pea ko hono moʻoní, naʻe ʻiate au foki mo ʻeku meʻafaná.

Naʻe liliu ʻe he fakataha ko iá ʻeku moʻuí. Ko u manatuʻi naʻá ku fakakaukau ʻoku pau pē ko u ʻi ha palanite kehe. Ko e kakai ʻi aí naʻa nau fakafeʻiloaki loto-māfana mai pea malimali anga-fakakaumeʻa mai kiate au. ʻOku ou kei manatuʻi lelei pē ʻa e fakafōtunga anga-lelei mo faitotonu mai ʻa e Kau Fakamoʻoní. Naʻe kehe ʻaupito eni ia mei he foʻi māmani naʻá ku ʻi aí!

Naʻe kamata ke u ako ʻa e Tohi Tapú mo e Kau Fakamoʻoní. Ko e lahi ange ʻeku akó, ko e māʻalaʻala ange ia ʻa e fiemaʻu ke u liliu fakaʻaufuli ʻeku founga moʻuí. Naʻá ku ʻai moʻoni ki hoku lotó ʻa e ngaahi lea naʻe hiki ʻi he Palōveepi 13:20: “Ko e tokotaha ʻoku ʻaʻeva mo e potó ʻe hoko ai ʻo poto, ka ko e tokotaha ʻokú ne feohi mo e valé ʻe hoko ai ʻa e kovi kiate ia.” Naʻá ku ʻiloʻi naʻe fiemaʻu ke u fakamavaheʻi au mei he kau kengí. Naʻe ʻikai ke faingofua hono fai iá, ka ʻi he tokoni ʻa Sihová, naʻá ku lavameʻa.

Naʻá ku toe fai foki mo ha ngaahi liliu kehe. ʻI he feinga lahi, naʻá ku taʻofi ai ʻeku ifi sikaletí mo hono ngāueʻaki ʻa e faitoʻo kona tapú. Naʻá ku kosi hoku ʻulu loloá, toʻo atu mo hoku ngaahi haú, pea taʻofi mo hono ngāueʻaki ʻa e leakoví. Ko e fuofua taimi eni ʻi heʻeku moʻuí ke u kamata mapuleʻi ai ʻeku ngaahi tōʻongá.

Naʻe ʻikai ʻaupito ke u faʻa saiʻia ʻi he lautohí mo e akó, ko ia ko ha pole moʻoni ia ke u tokangataha ki heʻeku ako Tohi Tapú. Kae kehe, ʻi heʻeku fai ʻa e feingá, naʻe faai atu pē ʻo u hoko ʻo ʻofa kia Sihova, pea kamata ke liliu ha meʻa ʻiate au​—naʻe kamata ke fakahohaʻasi au ʻe hoku konisēnisí. Naʻá ku faʻa maʻu ʻa e ngaahi fakakaukau ʻikai lelei fekauʻaki mo au tonu, ʻa ia ko ʻeku veiveiua pe ʻe lava ke fakamolemoleʻi au ʻe Sihova ki he ngaahi kovi kotoa naʻá ku faí. ʻI he ngaahi mōmeniti ko iá naʻá ku maʻu ʻa e fakafiemālie lahi ʻaupito ʻi hono lau fekauʻaki mo hono fakamolemoleʻi ʻe Sihova ʻa Tuʻi Tēvita hili ʻene fakahoko ha ngaahi angahala mamafa.​—2 Sāmiuela 11:​1–12:​13.

Ko ha toe pole ʻe taha ko hono vahevahe atu ʻeku tuí ki he niʻihi kehé ʻi he ngāue fakafaifekau fale ki he falé. (Mātiu 28:19, 20) Ne u manavahē naʻa faifai angé peá u fetaulaki mo ha taha naʻá ku fakamamahiʻi pe fai ki ai ha kovi ʻi he kuohilí! Ka ʻi he faai atu pē ʻa e taimí naʻe malava ke u ikuʻi ʻeku manavaheé. Naʻe kamata ke u maʻu ʻa e fiemālie moʻoni ʻi hono tokoniʻi ʻa e niʻihi kehé ke ako fekauʻaki mo ʻetau Tamai fakahēvani fakaofó, ʻa ia ʻoku lahi fau ʻene fakamolemolé.

Ko e ako fekauʻaki mo Sihová naʻá ne fakahaofi ʻeku moʻuí! Ko e tokolahi taha ʻo ʻeku ngaahi kaumeʻa ki muʻá kuo nau ʻosi mate pe ʻoku nau ʻi pilīsone, ka ʻoku ou maʻu ʻe au ha moʻui fiemālie moʻoni pea mo ha kahaʻu ke fakatuʻotuʻa atu ki ai. Kuó u ako ke anga-fakatōkilalo mo talangofua pea ke mapuleʻi ʻeku ʻita tōlilí. Ko e olá, ʻoku ou maʻu ai ha ngaahi vahaʻangatae lelei ange mo e kakai takatakai ʻiate aú. ʻOku ou nofo mali fiefia mo hoku uaifi fakaʻofoʻofa ko Carmen. Pea ʻokú ma fiefia lahi ʻi he ngāue fakataha ke tokoniʻi ʻa e niʻihi kehé ke nau ako fekauʻaki mo e Tohi Tapú.

ʻIo, pea ʻi he taimi ní ʻoku ou fai ʻa e ngāue faitotonu​—ko e taimi ʻe niʻihi ʻi he pangikeé, ka ʻi he ʻikai kaihaʻa aí, ʻoku ou fakamaʻa ia!