Ke Faʻifaʻitaki kia Sīsuú, Hoko ʻo . . .

ʻI he tuʻunga ko ha tangata haohaoa, naʻe ʻikai ke hokosia ʻe Sīsū ʻa e ngaahi faingataʻaʻia mo e hohaʻa lahi naʻe hokosia ʻe he niʻihi kehé. Neongo ia naʻá ne fakahāhā ʻa e ongoʻi loloto ki he kakaí. Naʻá ne loto-lelei ke tuku atu ʻa ia tonu maʻa kinautolu, ke fai ʻa e ngaahi meʻa ʻoku fakalaka atu ia ʻi he meʻa naʻe hā ngali fiemaʻú. ʻIo, naʻe ueʻi ia ʻe he manavaʻofá ke tokoniʻi ʻa e niʻihi kehé.

Naʻe ongoʻi ʻe he kakai taʻumotuʻa kehekehe​—kei siʻi mo taʻumotuʻa—​ʻe lava ke nau fakaofiofi kia Sīsū koeʻuhi naʻe ʻikai ke ne anga-taʻefakakaumeʻa pe fiemahuʻinga. ʻI hono ʻiloʻi ʻe he kakaí naʻe mahuʻingaʻia fakafoʻituitui ʻa Sīsū ʻiate kinautolú, naʻe ʻai ai ke nau ongoʻi fiemālie ʻi heʻene ʻi aí.

Naʻe hanga maʻu pē ʻa Sīsū ki heʻene Tamaí ʻi he lotu tōtōivi, ʻi he taimi naʻá ne tokotaha aí pea mo e taimi naʻá ne kau fakataha ai mo e kau lotu moʻoní. Naʻá ne lotu ʻi he ngaahi taimi lahi, kae ʻikai ko e taimi kaí pē. Naʻá ne lotu ke fakamālō ki heʻene Tamaí, ke fakahīkihikiʻi ia, pea ke kumi ki Heʻene tatakí ki muʻa ke ne fai ha ngaahi fili mafatukituki.

ʻI he taimi naʻá ne mei lava ai ʻo maʻu ha taimi mālōloó, naʻe kei fakamuʻomuʻa pē ʻe Sīsū ʻa e fiemaʻu ʻa e niʻihi kehé. Naʻe ʻikai ke ne maʻu ha fakakaukau siokita. ʻI he meʻá ni, ʻokú ne ʻomai ai ha faʻifaʻitakiʻanga ʻe lava ke tau muimui ofi ki ai.

Naʻe fai ʻe Sīsū ʻa e meʻa lahi ange ʻi hono akoʻi pē ʻa e fiemaʻu ke faʻa fakamolemolé​—naʻá ne fakahāhā ʻa e fakamolemolé ʻi heʻene feangainga mo ʻene kau ākongá mo e niʻihi kehé.

Naʻe tomuʻa tala ko e tokolahi taha ʻo e kau Siú te nau fakafisi ke tali ʻa e Mīsaiá pea ʻe tāmateʻi ia ʻe hono ngaahi filí. Ko ia naʻe mei lava ke fai pē ʻe Sīsū ha meʻa siʻisiʻi pē maʻá e kakaí. ʻI hono kehé, naʻá ne pouaki faivelenga ʻa e lotu moʻoní. Naʻá ne fokotuʻu ha faʻifaʻitakiʻanga ʻo e faivelengá ki he kotoa hono kau muimui ʻoku nau fehangahangai mo e kakai taʻemahuʻingaʻiá pe naʻa mo e fakafepakí.

Naʻe māʻolunga ange ʻa Sīsū ʻi he faʻahinga taʻehaohaoa ʻo e tangatá ʻi he ngaahi founga taʻefaʻalaua, hangē ko e ʻiló mo e potó. ʻOku ʻikai ha veiveiua ko hono tuʻunga haohaoá naʻá ne ʻoange kiate ia ʻa e ngaahi malava fakaesino mo fakaʻatamai naʻe fakalaka atu ia ʻi ha toe taha. Neongo ia naʻá ne fakafeangai anga-fakatōkilalo ki he niʻihi kehé.

Naʻe fakahāhā maʻu pē ʻe Sīsū ʻa e anga-kātakí ki heʻene kau ʻapositoló mo e niʻihi kehé ʻi he taimi naʻe ʻikai ke nau faʻifaʻitaki ai kiate iá pē ngāueʻaki ʻa e meʻa naʻá ne leaʻakí. Naʻá ne toutou fakamatalaʻi anga-kātaki ʻa e ngaahi lēsoni naʻa nau fiemaʻú koeʻuhi ke nau lava ʻo ʻunuʻunu ofi ange ai kia Sihova.