Fakaʻapaʻapa mo e Ngeia ʻi he Tokangaekina ʻa e ʻOtuá

ʻI HE taimi naʻe ʻi he māmaní ai ʻa Sīsuú, naʻá ne tapua haohaoa ʻa e ʻulungaanga ʻo ʻene Tamai fakahēvaní mo ʻene tōʻongafaí. Naʻá ne pehē: “ʻOku ʻikai ha meʻa te u fai ʻiate au pē; ka ko e meʻa kuo akoʻi kiate au ʻe he Tamaí ko e meʻa ia ʻoku ou leaʻakí . . . ʻoku ou fai maʻu pē ʻa e ngaahi meʻa ʻoku fakahōifua kiate iá.” (Sione 8:28, 29; Kolose 1:15) Ko ia ai, ʻi hono vakaiʻi ʻa e anga ʻo e fakafeangai ʻa Sīsū ki he kakai fefiné mo ʻene vakai kiate kinautolú, ʻoku malava ai ke tau mahinoʻi ʻa e vakai ʻa e ʻOtuá ki he kakai fefiné mo e ngaahi meʻa ʻokú ne ʻamanekina meiate kinautolú.

Makatuʻunga ʻi he meʻa kuo lēkooti ʻi he ngaahi fakamatala Kōsipelí, kuo fakahaaʻi ai ʻe he kau mataotaó ko e vakai ʻa Sīsū ki he kakai fefiné ʻoku makehe ʻaupito ia. ʻO anga-fēfē? Pea ko e mahuʻinga angé, ʻoku kei lava ʻe heʻene ngaahi akonakí ʻo ʻomai ʻa e tauʻatāina lahi ange ki he kakai fefiné he ʻahó ni?

Naʻe ʻikai vakai ʻa Sīsū kiate kinautolu ko ha meʻa pē ke fakatōliʻaʻaki ʻa e holi fakaefehokotaki fakasinó. ʻI he vakai ʻa e niʻihi ʻo e kau taki-lotu Siú, ko e feohi mo e kakai fefiné ʻe taki atu pē ia ki he holi pangó. Koeʻuhí ko hono ilifiaʻi ʻa e kakai fefiné ʻi he tuʻunga ko ha fakatauelé, naʻe ʻikai ai ke ngofua ke nau talanoa ki he kakai tangatá ʻi he feituʻu kakaí pe ko haʻanau ʻalu ki tuʻa ʻo ʻikai tui honau pūloú. ʻI he tafaʻaki ʻe tahá, naʻe faleʻi ʻe Sīsū ki he kakai tangatá ke mapuleʻi ʻenau ngaahi holi fakaekakanó pea fakafeangai ki he kakai fefiné ʻaki ʻa e fakangeingeia kae ʻikai ko hono tuʻusi kinautolu mei he ngaahi fetalanoaʻaki ʻi he feituʻu kakaiʻiá.​—Mātiu 5:28.

Naʻe toe pehē ʻe Sīsū: “ʻIlonga ʻa ia te ne veteʻi hono uaifí peá ne mali mo ha taha kehe, ʻokú ne tono ʻo faihala ai ki hono uaifí.” (Maʻake 10:11, 12) Ko ia naʻá ne talitekeʻi ai ʻa e akonaki anga-maheni fakalāpai naʻá ne fakaʻatā ʻa e kakai tangatá ke nau veteʻi honau ngaahi uaifí “ʻi ha faʻahinga ʻuhinga pē.” (Mātiu 19:3, 9) Ko e fakakaukau ko ia ʻo e tono ʻo faihala ki hono uaifí naʻe foʻou ia ki he tokolahi taha ʻo e kau Siú. Naʻe akoʻi ʻe heʻenau kau lāpaí ʻe ʻikai ʻaupito ke lava ʻo tono ha husepāniti ʻo faihala ki hono uaifí​—ko e fefiné pē ʻe lava ke taʻefaitōnungá! Hangē ko e lau ʻa ha fakamatala ki he Tohi Tapú, “ʻI hono ʻai ʻe Sīsū ke tatau pē ʻa e vakai ki he husepānití mo e uaifí, naʻá ne hikiʻi hake ai ʻa e tuʻunga mo e ngeia ʻo e kakai fefiné.”

Ko e ola ʻo ʻene akonakí ʻi he ʻahó ni: ʻI he fakatahaʻanga Kalisitiane ʻa e Kau Fakamoʻoni ʻa Sihová, ʻoku feohi tauʻatāina ai ʻa e kakai fefiné mo e kakai tangatá ʻi he ngaahi fakatahá. Kae kehe, ʻoku ʻikai fiemaʻu ia ke nau ongoʻi hohaʻa fekauʻaki mo ha faʻahinga sio ʻoku taʻetaau pe maheni tōtuʻá, koeʻuhí ko e kakai tangata Kalisitiané ʻoku nau tokanga ke nau fakafeangai “ki he kau fefine taʻumotuʻa angé ʻo hangē ko ha ngaahi faʻē, ki he kau fefine taʻu iiki angé ʻo hangē ko [ha] fanga tuofāfiné, ʻaki ʻa e anga-maʻa fakaʻaufuli.”​—1 Tīmote 5:2.

Naʻe vaheʻi ʻe Sīsū ʻa e taimi ke akoʻi ʻa e kakai fefiné. Naʻe fai ʻe Sīsū ha meʻa naʻe kehe ia mei he vakai fakalāpai mafolalahia ʻa ia naʻe taʻofi ai ʻa e kakai fefiné ke ʻoua te nau ʻilo ha meʻá, naʻá ne akoʻi ʻa e kakai fefiné pea fakalototoʻaʻi kinautolu ke nau fakahaaʻi ʻenau ngaahi ongoʻí. Ko e ʻikai ko ia ke toʻo ʻe Sīsū meia Mele ʻa e fiefia ʻi hono akoʻi iá, naʻe fakahaaʻi ai ʻe Sīsū ʻoku ʻikai ko e peitó pē ʻa e feituʻu ke ʻi ai ʻa e kakai fefiné. (Luke 10:38-42) Naʻe toe maʻu ʻaonga foki mo e tokoua ʻo Melé, ʻa Māʻata, mei heʻene akonakí, ʻo hangē ko ia ʻoku hā ʻi heʻene ngaahi tali pōtoʻi kia Sīsū ʻi he hili ʻa e mate ʻa Lāsalosí.​—Sione 11:21-27.

Ko e ngaahi fakakaukau ʻa e kakai fefiné naʻe mahuʻinga ia kia Sīsū. ʻI he taimi ko iá, naʻe tui ʻa e tokolahi taha ʻo e kakai fefine Siú ko e kī ki he fiefiá ko hono maʻu ha foha lavameʻa, ko ha foha ʻa ia ko ha palōfita kapau ʻe malava. ʻI he taimi naʻe kalanga ai ha fefine ʻe taha: “Fiefia ē ko e manava naʻá ne fata koé!” Naʻe puke ʻe Sīsū ʻa e faingamālie ko iá ke ne tala ange kiate ia fekauʻaki mo ha meʻa ʻoku lelei ange. (Luke 11:27, 28) ʻI hono fakahaaʻi ange ʻe Sīsū ʻoku mahuʻinga ange ʻa e tuʻunga fakalaumālié, naʻá ne fakahanga ai ʻa e tokanga ʻa e fefiné ki ha meʻa naʻe mahuʻinga ange ia ʻi he ngafa talatukufakaholo naʻe hilifaki ki he kakai fefiné.​—Sione 8:32.

Ko e ola ʻo ʻene akonakí ʻi he ʻahó ni: Ko e kau faiako ʻi he fakatahaʻanga Kalisitiané ʻoku nau talitali lelei ʻa e ngaahi tali ʻoku fai ʻe he kakai fefiné ʻi he ngaahi fakataha ʻa e fakatahaʻangá. ʻOku nau tokaʻi ʻa e kakai fefine matuʻotuʻá ʻi heʻenau hoko ko e “kau faiako ʻo e meʻa ʻoku leleí,” fakatouʻosi ʻi honau tuʻunga fakafoʻituituí mo ʻenau faʻifaʻitakiʻangá. (Taitusi 2:3) ʻOku nau toe falala foki ki he kakai fefine ko ení ke nau talaki fakahāhā ʻa e ongoongo lelei ʻo e Puleʻanga ʻo e ʻOtuá.​—Saame 68:11; sio ki he puha “Naʻe Tapui ʻe he ʻApositolo ko Paulá ʻa e Kakai Fefiné ke ʻOua Te Nau Lea?”

Naʻe tokangaekina ʻe Sīsū ʻa e kakai fefiné. ʻI he taimi ʻo e Tohi Tapú, naʻe ʻikai ke fakamahuʻingaʻi tatau ʻa e fānau fefiné ʻo hangē ko e fānau tangatá. ʻOku tapua mai ʻe he Talamatá ʻa e vakai ko ení, ʻi heʻene pehē: “Fiefia ē ka ko kinautolu ʻoku nau maʻu ha fānau tangatá, pea ʻoiauē ʻa ia ʻokú ne maʻu ha fānau fefiné.” Naʻe vakai ʻa e ngaahi mātuʻa ʻe niʻihi ki ha kiʻi taʻahine ko ha kavenga lahi ange ia​—kuo pau ke nau kumi hano mali pea tokonaki mo ha totongi mali, pea ʻe ʻikai malava ke nau fakafalala kiate ia ki ha tokoni ʻi heʻenau aʻu ko ia ʻo taʻumotuʻá.

Naʻe fakahaaʻi ʻe Sīsū ko e moʻui ʻa ha kiʻi taʻahine ʻoku mahuʻinga tatau pē ia mo ha kiʻi tamasiʻi​—naʻá ne fokotuʻu hake ʻa e ʻofefine ʻo Siailosí mei he maté, ʻo hangē pē ko ʻene fokotuʻu hake ʻa e foha ʻo e uitou ʻi Neiní. (Maʻake 5:35, 41, 42; Luke 7:11-15) ʻI he hili hono fakamoʻui ʻe Sīsū ha fefine naʻe fakahohaʻasi ʻe ha “laumālie naʻá ne ʻai ia ke puke ʻi he taʻu ʻe 18” naʻá ne ui ia “ko ha ʻofefine ʻo ʻĒpalahame,” ʻa ia ko ha kupuʻi lea eni ʻoku tātātaha ʻene ʻasi ʻi he ngaahi tohi faka-Siú. (Luke 13:10-16) ʻI hono ngāueʻaki ʻa e kupuʻi lea anga-fakaʻapaʻapa mo anga-lelei ko ení, naʻe ʻikai ngata pē ʻi heʻene vakai ki he fefiné ko ha mēmipa taʻealafehuʻia ia ʻo e sōsaietí ka naʻá ne toe fakahaaʻi ai ʻokú ne lāuʻilo ki he tui lahi ʻa e fefiné.​—Luke 19:9; Kalētia 3:7.

Ko e ola ʻo ʻene akonakí ʻi he ʻahó ni: ʻOku ʻi ai ʻa e lea ʻoku taka ʻi ʻĒsia ʻo pehē: “Ko hono tauhi hake ha ʻofefine ʻoku hangē ia hano fuʻifuʻi ʻa e ngoue ʻa e kaungāʻapí.” ʻI he ʻikai ʻaupito ke tākiekina ʻe he tūkunga fakaefakakaukau ko iá ʻa e ngaahi tamai Kalisitiané, ʻoku nau tokangaʻi anga-ʻofa ʻenau fānaú kotoa, honau ngaahi fohá mo honau ngaahi ʻofefiné. ʻOku fakapapauʻi ʻe he ngaahi mātuʻa Kalisitiané ʻoku maʻu ʻe heʻenau fānaú ʻa e ako mo e tokangaekina fakaemoʻui lelei feʻunga.

Naʻe falala ʻa Sīsū ki he kakai fefiné. ʻI he ngaahi fakamaauʻanga faka-Siú, ko ha fakamoʻoni ʻa ha fefine naʻe fai e vakai ki ai ʻoku tatau pē ia mo ha fakamoʻoni ʻa ha sevāniti. Ko Siosifasi, ko ha faihisitōlia ʻi he ʻuluaki senitulí, naʻá ne faleʻi ʻo pehē: “ʻOua ʻe tali ha fakamoʻoni mei he kakai fefiné, koeʻuhí ko honau natulá ʻoku ʻikai ke nau toʻo fakamātoato ha meʻa pea ʻoku nau faʻa lea taʻefakaʻapaʻapa.”

ʻI ha tuʻunga mātuʻaki fehangahangai, naʻe fili ʻe Sīsū ke faifakamoʻoni ha kau fefine ki heʻene toetuʻú. (Mātiu 28:1, 8-10) Neongo naʻe sio mata tonu ʻa e kakai fefine faitōnunga ko ení ʻi hono tāmateʻi mo tanu ʻa honau ʻEikí, naʻe faingataʻa ki he kau ʻapositoló ke nau tui ki he ngaahi fakamatala ʻa e kau fefiné ni. (Mātiu 27:55, 56, 61; Luke 24:10, 11) Kae kehe, ʻi he ʻuluaki hā ko ia ʻa e Kalaisi kuo toetuʻú ki he kakai fefiné, naʻá ne vakai ai kiate kinautolu ʻoku nau taau ke faifakamoʻoni ʻo hangē pē ko e kau ākonga kehé.​—Ngāue 1:8, 14.

Ko e ola ʻo ʻene akonakí ʻi he ʻahó ni: ʻI he ngaahi fakatahaʻanga ʻa e Kau Fakamoʻoni ʻa Sihová, ko e kakai tangata fua fatongiá ʻoku nau fakahāhā ʻa e fakaʻatuʻi ki he kakai fefiné ʻi hono tokaʻi ʻenau ngaahi vakaí. ʻI honau tuʻungá, ko e ngaahi husepāniti Kalisitiané ʻoku nau ‘ʻoange ʻa e ngeia’ ki honau ngaahi uaifí ʻaki ʻa e fanongo tokanga kiate kinautolu.​—1 Pita 3:7; Sēnesi 21:12.

ʻI he taimi ʻoku faʻifaʻitaki ai ʻa e kakai tangatá kia Kalaisí, ʻoku ʻoange ai ki he kakai fefiné ʻa e fakaʻapaʻapa mo e tauʻatāina naʻe muʻaki fakataumuʻa ʻe he ʻOtuá maʻanautolú. (Sēnesi 1:27, 28) ʻI he ʻikai ke pouaki ʻe he ngaahi husepāniti Kalisitiané ʻa e vakai tuku hifo anga-maheni ki he kakai fefiné, ʻoku nau tuku ke tataki kinautolu ʻe he ngaahi tefitoʻi moʻoni Fakatohitapú, ʻa ia ʻoku tokoni ki he fiefia ʻa honau ngaahi hoa malí.​—ʻEfesō 5:28, 29.

ʻI he kamata ako Tohi Tapu ʻa Yelena, naʻá ne faingataʻaʻia fakalongolongo mei hono ngaohikoviʻi ia ʻe hono husepānití. Naʻe ʻohake ia ʻi ha ʻātakai anga-fakamālohi, ʻa ia naʻe anga-maheni ai ʻa hono puke fakamālohiʻi mo hono ngaohikoviʻi fakaesino ʻa e ngaahi hoa mali fefiné. “Ko e meʻa naʻá ku ako mei he Tohi Tapú naʻá ne ʻomi kiate au ʻa e mālohi,” ko e fakamatala ia ʻa Yelena. “Naʻá ku mahinoʻi ʻoku ʻi ai ʻa e tokotaha ʻokú ne ʻofa lahi ʻaupito ʻiate au pea ʻokú ne fakamahuʻingaʻi au mo tokanga mai kiate au. Naʻá ku toe mahinoʻi foki kapau ʻe ako Tohi Tapu ʻa hoku husepānití, ʻe lava ke liliu ai ʻene tōʻongafai mai kiate aú.” Naʻe hoko moʻoni ʻene misí ʻi he faifai pea tali ʻe hono husepānití ke ne ako ʻa e Tohi Tapú peá ne papitaiso ko e taha ʻo e Kau Fakamoʻoni ʻa Sihová. “Naʻá ne hoko ko ha faʻifaʻitakiʻanga ʻo e mapuleʻi-kitá mo e anga-fakamaʻumaʻú,” ko e fakamatala ia ʻa Yelena. “Naʻá ma ako ke ma fefakamolemoleʻaki loto-lelei.” Ko e hā ʻene fakamulitukú? “Kuo tokoniʻi moʻoni au ʻe he ngaahi tefitoʻi moʻoni Fakatohitapú ke u ongoʻi ʻoku fiemaʻu au peá u ongoʻi malu ʻi heʻeku nofo-malí.”​—Kolose 3:13, 18, 19.

Ko e hokosia ʻa Yelena ʻoku ʻikai ko ia pē. ʻOku laui miliona ʻa e kakai fefine Kalisitiane ʻoku nau fiefia koeʻuhí ʻoku nau feinga fakataha mo honau ngaahi husepānití ke ngāueʻaki ʻa e ngaahi tefitoʻi moʻoni Fakatohitapú ʻi heʻenau nofo malí. ʻOku nau ongoʻi ai ʻa e fakaʻapaʻapa, fiemālie, mo e tauʻatāina ʻi he feohi mo honau ngaahi kaungā Kalisitiané.​—Sione 13:34, 35.

ʻOku lāuʻilo fakatouʻosi ʻa e kakai fefine mo e kakai tangata Kalisitiané koeʻuhi ko honau tuʻunga ko e faʻahinga ʻo e tangata angahalaʻia mo taʻehaohaoá, ʻoku nau hoko ai ko e konga ʻo e fakatupu ʻa e ʻOtuá ʻa ia kuo “fakamoʻulaloaʻi . . . ki he muna.” Kae kehe, ʻi heʻenau ʻunuʻunu ofi ko ia ki honau ʻOtua ʻofá mo e Tamaí, ʻa Sihova, ʻoku nau maʻu ai ʻa e ʻamanaki ʻo e hoko ʻo “fakatauʻatāinaʻi . . . mei he pōpula ki he ʻauhá” pea nau maʻu ai ʻa e “tauʻatāina lāngilangiʻia ʻa e fānau ʻa e ʻOtuá.” He kahaʻu maʻongoʻonga moʻoni ē ki he kakai tangatá mo e kakai fefiné fakatouʻosi ʻi he malumalu ʻo e tokangaekina ʻa e ʻOtuá!​—Loma 8:20, 21.