Ko e Hā Ke Ke Fakatapui Ai kia Sihová?

“Naʻe tuʻu ofi mai ʻanepo ha angelo ʻa e ʻOtua, ʻa ʻEne ʻAfio ʻoku oʻona au.”—NG. 27:23.

 1. Ko e hā ʻa e ongo sitepu kuo ʻosi fou ai ʻa e faʻahinga ʻoku teu papitaisó, pea ko e hā ʻa e ngaahi fehuʻi ʻoku langaʻi hake hení?

“MAKATUʻUNGA ʻi he feilaulau ʻa Sīsū Kalaisí, kuó ke fakatomala mei hoʻo ngaahi angahalá pea fakatapui koe kia Sihova ke fai hono finangaló?” Ko e taha eni ʻo e ongo fehuʻi ʻoku tali ʻe he kau teu papitaisó ʻi he fakamulituku ʻo ha malanga papitaiso. Ko e hā ʻoku fiemaʻu ai ke fakatapui ʻa e kau Kalisitiané kia Sihová? ʻOku anga-fēfē ʻetau maʻu ʻaonga mei he fakatapui ki he ʻOtuá? Ko e hā heʻikai lava ai ke fakahōifua ʻa e lotu ʻa ha taha ki he ʻOtuá ʻi he ʻikai te ne fakatapui kiate iá? Ke mahinoʻi ʻa e talí, ʻoku ʻuluaki fiemaʻu ke tau lāulea pe ko e hā koā ʻa e fakatapui.

 2. ʻOku ʻuhinga ki he hā ʻa ʻete fakatapui kia Sihová?

² Ko e hā ʻa e ʻuhinga ʻo ʻete fakatapui ki he ʻOtuá? Fakatokangaʻi angé ʻa e anga hono fakamatalaʻi ʻe he ʻapositolo ko Paulá ʻa hono vahaʻangatae mo e ʻOtuá. ʻI heʻene ʻi he ʻao ʻo e tokolahi kehe naʻa nau heka ʻi ha vaka naʻe ʻi he tuʻunga fakatuʻutāmaki, naʻá ne ui ʻa Sihova ko e ‘ʻOtua, ʻoku oʻona au.’ (Lau ʻa e Ngāue 27:22-24.) Ko e kau Kalisitiane moʻoní kotoa ʻoku ʻa Sihova kinautolu. ʻI hono kehé, ko e māmaní fakalūkufua ʻoku “ʻi he nima ʻo e Fili.” (1 Sione 5:19) ʻOku ʻa Sihova ʻa e kau Kalisitiané ʻi he taimi ʻoku nau fai ai ha fakatapui fakahōifua kiate ia ʻi he lotú. Ko ha fakatapui pehē ko ha fuakava fakafoʻituitui ia. ʻOku hoko atu ai ʻa e papitaiso ʻi he vaí.

 3. Ko e hā naʻe fakatātaaʻi ʻi he papitaiso ʻa Sīsuú, pea ʻoku lava fēfē ke faʻifaʻitaki ʻa hono kau muimuí ki heʻene faʻifaʻitakiʻangá?

³ Naʻe tokonaki mai ʻe Sīsū ha faʻifaʻitakiʻanga kia kitautolu ʻi heʻene fai ha fili fakafoʻituitui ke fai ʻa e finangalo ʻo e ʻOtuá. Koeʻuhi naʻe fanauʻi ia ki he puleʻanga fakatapui ʻo ʻIsilelí, naʻe ʻosi fakatapui ia ki he ʻOtuá. Neongo ia, ʻi heʻene papitaisó naʻá ne fai ai ʻa e meʻa lahi ange ʻi he meʻa naʻe fiemaʻu ʻi he malumalu ʻo e Laó. ʻOku fakahaaʻi ʻi he Folofola ʻa e ʻOtuá naʻá ne pehē: “E Otua, vakai, oku ou haʻu ke fai ho finagalo.” (Hep. 10:7, PM; Luke 3:21) Ko ia ko e papitaiso ʻa Sīsuú naʻe fakatātaaʻi ai ʻa ʻene foaki atu ia ki he ʻOtuá ki hono fai ʻa e finangalo ʻo ʻene Tamaí. Naʻe faʻifaʻitaki ʻa hono kau muimuí ki heʻene faʻifaʻitakiʻangá ʻi heʻenau papitaisó. Kae kehe, ʻi honau tuʻungá, ko e papitaiso ʻi he vaí ko ha fakahāhā ia ki he kakaí kuo nau fai ha fakatapui fakafoʻituitui ki he ʻOtuá ʻi he lotu.

Founga ʻo ʻEtau Maʻu ʻAonga mei he Fakatapuí

 4. Ko e hā ʻoku tala mai ʻe he kaumeʻa ʻi he vahaʻa ʻo Tēvita mo Sionatané fekauʻaki mo e tukupaá?

⁴ Ko e fakatapui faka-Kalisitiané ko ha meʻa mātuʻaki mahuʻinga ia. ʻOku mahulu atu ia ʻi ha tukupā pē. Neongo ia, ʻoku anga-fēfē ʻetau maʻu ʻaonga mei hono fai ha fakatapuí? Fakafou ʻi ha fakafehoanaki, tau lāulea angé ki he anga hono ʻomai ʻo e ngaahi ʻaonga ʻi hono fai ha tukupā ʻi he vahaʻangatae fakaetangatá. Ko e fakatātā ʻe taha ko e kaumeʻá. Ke fiefia ʻi he monū ʻo hono maʻu ha kaumeʻá, kuo pau ke ke tali ʻa e fatongia ʻo e hoko ko ha kaumeʻa. ʻOku kau ki ai ha tukupā—ʻokú ke ongoʻi ha fatongia ke tokanga fekauʻaki mo ho kaumeʻá. Ko e taha ʻo e kaumeʻa tuʻu-ki-muʻa taha naʻe fakamatala ki ai ʻi he Tohi Tapú ko e kaumeʻa ko ia ʻa Tēvita mo Sionatané. Naʻe aʻu ʻo na fai ha fuakava fekauʻaki mo ʻena kaumeʻá. (Lau ʻa e 1 Samiuela 17:57; 18:1, 3.) Neongo ko e kaumeʻa ʻi he tuʻunga ʻo e tukupā ko iá ʻoku tātātaha, ko e lahi taha ʻo e ngaahi kaumeʻá ʻoku lakalakaimonū ʻi he taimi ʻoku tukupā ai ʻa e kakaí, pe ongoʻi ʻoku ʻi ai honau fatongia fakaekinautolú.—Pal. 17:17; 18:24.

 5. Naʻe lava fēfē ke maʻu ʻaonga tuʻuloa ha tamaioʻeiki mei heʻene hoko ko e meʻa ʻa ha pule lelei?

⁵ Ko e Lao naʻe ʻoange ʻe he ʻOtuá ki ʻIsilelí ʻoku fakamatala ai ki ha vahaʻangatae ʻe taha ʻa ia naʻe maʻu ʻaonga ai ʻa e kakaí ʻi hono fai ha tukupaá. Kapau naʻe loto ha tamaioʻeiki ke ne ʻi ha tuʻunga malu ʻo ʻene hoko tuʻuloa ko e meʻa ʻa ha pule lelei, naʻe lava ke ne kau ki ha felotoi tuʻuloa mo papau mo ia. ʻOku fakamatala ʻi he Laó: “Kapau ʻe matuʻaki lea ʻe he tamaioʻeiki, ʻo pehe, ʻOku ou ʻofa ki hoku ʻeiki, ki hoku uaifi mo ʻeku fanau; ʻe ʻikai te u ʻalu tauʻataina: pea ʻe toki fakahopo ia ʻe hono ʻeiki ʻi he ʻao ʻo Elohimi, ʻo ne fakaofi ia ki he matapa, pe ki he pou matapa; pea ʻe vili hono telinga ʻe hono ʻeiki ʻaki ha vili; pea te ne nofo ko ʻene tamaioʻeiki ʻo taʻengata.”—Eki. 21:5, 6.

6, 7. ʻOku anga-fēfē maʻu ʻaonga ʻa e kakaí mei he tukupaá? (e) Ko e hā ʻoku fakahaaʻi ʻi he meʻa ko iá fekauʻaki mo hotau vahaʻangatae mo Sihová?

⁶ Ko e nofo malí ko ha vahaʻangatae ia ʻoku fiemaʻu ki ai ha tuʻunga māʻolunga ʻo e tukupaá. Ko ha tukupā ia, ʻo ʻikai ki ha aleapau, ka ki ha tokotaha. Ko e ongo meʻa ʻe toko ua ʻokú na nonofo pē ʻo ʻikai malí heʻikai lava ke na maʻu ha ongoʻi malu moʻoni; pea heʻikai lava ke maʻu ia ʻe heʻena fānaú. Ka ko e ngaahi hoa ʻoku nau tukupā fakaekinautolu ʻi he nofo mali ʻi he tuʻunga maʻá ʻoku nau maʻu ha ʻuhinga Fakatohitapu mālohi ki he feinga ke fakaleleiʻi ʻenau ngaahi faingataʻaʻiá ʻaki ʻa e ʻofa ʻi he taimi ʻoku malanga hake ai ʻa e palopalemá.—Mt. 19:5, 6; 1 Kol. 13:7, 8; Hep. 13:4.

⁷ ʻI he taimi ʻo e Tohi Tapú, naʻe maʻu ʻaonga ai ʻa e kakaí mei hono maʻu ʻa e ngaahi aleapau papau ʻi he pisinisí mo e ngāué. (Mt. 20:1, 2, 8) ʻOku tatau pē ʻi he ʻahó ni. Ko e fakatātaá, ʻoku tau maʻu ʻaonga mei hono maʻu ha felotoi fakapepa, pe aleapau fakapepa papau, ki muʻa ke tau kamata ha ngāue fakapisinisi pe kamata ngāue ʻi ha kautaha. Ko ia ai, kapau ko e tukupaá ʻokú ne ʻai ke mālohi ange ʻa e ngaahi vahaʻangatae hangē ko e kaumeʻá, nofo malí, mo e ngāué, huanoa ai haʻane ʻaonga ʻi hono fai ha fakatapui taʻetoeveiveiua ʻi ho vahaʻangatae mo Sihová! Tau lāulea angé he taimí ni ki he founga kuo maʻu ʻaonga ai ʻa e kakai ʻi he kuohilí mei he fakatapui ki he ʻOtua ko Sihová mo e founga kuo mahulu atu ai eni ʻi ha tukupā pē.

Founga ʻo e Maʻu ʻAonga ʻa ʻIsileli mei he Fakatapui ki he ʻOtuá

 8. Naʻe ʻuhinga ki he hā ki ʻIsileli ʻa e fakatapui ki he ʻOtuá?

⁸ Ko e puleʻanga ʻIsilelí fakakātoa naʻa nau fakatapui kia Sihova ʻi he taimi naʻa nau fai ai ha fuakava ki he ʻOtuá. Naʻe ʻai ʻe Sihova ke nau fakatahataha ʻi he veʻe Moʻunga Sainaí, pea naʻá ne folofola kia kinautolu: “Kapau te mou matuʻaki tokanga ki hoku leʻo, mo tauhi ʻeku fuakava, te mou toki hoko ko ʻeku koloa kanokato ʻi he kakai kotoa.” Naʻe tali fakataha ʻa e kakaí: “Ko e meʻa kotoa kuo folofolaʻaki ʻe Sihova te mau fai.” (Eki. 19:4-8) Ko e fakatapuí naʻe ʻuhinga ia ki he meʻa lahi ange ki ʻIsileli ʻi he tukupā pē ke fai ha meʻa. Naʻe ʻuhinga iá naʻe ʻa Sihova kinautolu, pea naʻe tōʻongafai ʻa Sihova kia kinautolu ko ʻene “koloa kanokato.”

 9. Naʻe anga-fēfē ʻa e maʻu ʻaonga ʻa ʻIsileli mei he fakatapui ki he ʻOtuá?

⁹ Naʻe maʻu ʻaonga ʻa e kau ʻIsilelí mei heʻenau hoko ko e meʻa ʻa Sihová. Naʻá ne mateaki mo tokanga kia kinautolu ʻo tatau pē mo e tokanga ʻa ha mātuʻa tauhi fānau ki ha kiʻi tama. Naʻe folofola ʻa e ʻOtuá ki ʻIsileli: “ʻE mangalo koā ʻi ha finemotuʻa ʻene tamasiʻi kei huhu, ke ʻoua te ne fakaʻatuʻi ʻa e tama ʻa hono manava? Talaatu, ka ne mangalo ʻa e faʻahinga ko ia, kae ʻikai mangalo koe ʻiate au.” (Ai. 49:15) Naʻe ʻoange ʻe Sihova kia kinautolu ʻa e tataki ʻo e Laó, ko e fakalototoʻa ʻa e kau palōfitá, mo e maluʻi ʻa e kau ʻāngeló. Naʻe tohi ʻe ha tokotaha-tohi-saame: “ʻOku ne fakaha ʻene folofola ki haʻa Sekope, ʻoku ne fakaha ki Isileli ʻene ngaahi fekau mo konisitutone. Talaʻehai kuo ne fai pehe ki ha kakai ʻe taha.” (Sāme 147:19, 20; lau ʻa e Sāme 34:7, 19; 48:14.) Hangē ko e tokanga ʻa Sihova ki he puleʻanga naʻe ʻoʻona ʻi he kuohilí, ʻe pehē pē ʻene tokanga ki he faʻahinga ʻoku nau fakatapui kiate ia he ʻaho ní.

ʻUhinga ʻOku Totonu Ai Ke Tau Fakatapui ki he ʻOtuá

10, 11. ʻOku fanauʻi kitautolu ki he fāmili fakaeʻuniveesi ʻo e ʻOtuá? Fakamatalaʻi.

¹⁰ Lolotonga ʻa e fakakaukauloto ki he fakatapui mo e papitaiso faka-Kalisitiané, ʻe fifili nai ʻa e niʻihi, ‘Ko e hā heʻikai lava ai ke u lotu ki he ʻOtuá ʻo ʻikai fakatapui kiate iá?’ ʻOku hā mahino ʻa e ʻuhingá ʻi he taimi ʻoku tau fakakaukau ai ki he tuʻunga moʻoni ʻo ʻetau tuʻu ʻi he ʻao ʻo e ʻOtuá. Manatuʻi, koeʻuhi ko e angahala ʻa ʻĀtamá, ʻoku fanauʻi ai kitautolu kotoa ʻi tuʻa ʻi he fāmili ʻo e ʻOtuá. (Loma 3:23; 5:12) Ko ʻetau fakatapui ki he ʻOtuá ko ha fiemaʻu mātuʻaki mahuʻinga ia ki he tali ki hono fāmili fakaeʻunivēsí. Tau sio angé ki he ʻuhingá.

¹¹ ʻOku ʻikai ha taha ʻo kitautolu ʻe ʻi ai haʻane tamai moʻoni ʻa ia ʻoku lava ke ne tuku mai kia kitautolu ʻa e moʻuí ʻo hangē ko ia naʻe totonu ke ʻi aí—ko e moʻui haohaoa. (1 Tim. 6:19) Naʻe ʻikai fanauʻi kitautolu ko e ngaahi foha ʻo e ʻOtuá koeʻuhi ʻi he taimi naʻe faiangahala ai ʻa e ʻuluaki ongo meʻa fakaetangatá, naʻe mavahe ai ʻa e matakali ʻo e faʻahinga ʻo e tangatá mei heʻenau Tamai mo e Tokotaha-Fakatupu ʻofá. (Fakafehoanaki mo e Teutalonome 32:5.) Mei he taimi ko iá ʻo faai mai ai, kuo moʻui ai ʻa e māmani ʻo e faʻahinga ʻo e tangatá ʻi tuʻa mei he fāmili fakaeʻuniveesi ʻo Sihová, ʻo mavahe mei he ʻOtuá.

12. (a) ʻE lava fēfē ke hoko ʻa e faʻahinga taʻehaohaoa ʻo e tangatá ko e ngaahi mēmipa ʻo e fāmili ʻo e ʻOtuá? (e) Ko e hā e ngaahi sitepu kuo pau ke tau fou ai ki muʻa ʻi he papitaisó?

¹² Kae kehe, ʻi he tuʻunga ko e faʻahinga tāutahá ʻe lava ke tau kole ke tali kitautolu ʻe he ʻOtuá ki hono fāmili ʻo e kau sevāniti fakahōifuá.a ʻOku anga-fēfē ʻa e malava ia ki he kau angahala hangē ko kitautolú? Naʻe tohi ʻe he ʻapositolo ko Paulá: “Naʻe fakalelei ʻa e ʻOtua kiate kitautolu ʻi he pekia ʻa hono ʻAlo, lolotonga ʻene filiʻaki kitautolu.” (Loma 5:10) ʻI he papitaisó ʻoku tau fai ai ha kole ki he ʻOtuá ki ha konisēnisi lelei koeʻuhi ke fakahōifua ai kiate ia. (1 Pita 3:21) Kae kehe, ki muʻa ʻi he papitaisó, ʻoku ʻi ai e ngaahi sitepu kuo pau ke tau fou ai. Kuo pau ke tau hoko ʻo ʻiloʻi ʻa e ʻOtuá, ako ke falala kiate ia, fakatomala, pea liliu ʻetau ngaahi foungá. (Sione 17:3; Ng. 3:19; Hep. 11:6) Pea ʻoku kei toe ʻa e meʻa kehe ke fai ki muʻa ke lava ʻo tali ai kitautolu ki he fāmili ʻo e ʻOtuá. Ko e hā ia?

13. Ko e hā ʻoku feʻungamālie ai ki ha tokotaha ke ne fai ha fuakava ʻo e fakatapui ki he ʻOtuá koeʻuhi ke hoko ai ko e konga ʻo Hono fāmili ʻo e kau lotu fakahōifuá?

¹³ Ki muʻa ke hoko ha taha naʻe mavahe mei he ʻOtuá ko ha mēmipa ʻo e fāmili ʻo e kau sevāniti fakahōifua ʻa e ʻOtuá, ʻoku ʻuluaki fiemaʻu ke ne fai ha palōmesi fakamātoato kia Sihova. Ke mahinoʻi ʻa e ʻuhingá, fakaʻuta atu ki ha tamai ʻoku fakaʻapaʻapaʻi ʻokú ne fakahāhā ha mahuʻingaʻia anga-ʻofa ʻi ha talavou tamai-mate pea fakaʻamu ke pusiakiʻi ia ke hoko ko ha mēmipa ʻo hono fāmili ʻoʻoná. ʻOku ʻiloa ʻa e tamaí ko ha tangata lelei. Ka neongo ia, ki muʻa ʻi hono tali ke hoko ʻa e talavoú ko hono fohá, ʻoku loto ʻa e tangatá ke fai ʻe he tamasiʻí ha palōmesi. Ko ia ʻoku pehē ai ʻe he tangatá, “Ki muʻa ke u tali koe ko haku fohá, ʻoku ou fiemaʻu ke ʻiloʻi te ke ʻofaʻi mo fakaʻapaʻapaʻi au ko hoʻo tamai.” Ko e toki taimi pē ʻe loto-lelei ai ʻa e talavoú ke fai ha palōmesi fakamātoató ʻe tali ai ia ʻe he tangatá ki hono fāmilí. ʻIkai ʻoku ʻuhinga lelei ia? ʻI he founga meimei tatau, ʻoku tali ʻe Sihova ki hono fāmilí ʻa e faʻahinga pē ʻoku loto-lelei ke fai ha fuakava ʻo e fakatapui kiate iá. ʻOku pehē ʻe he Tohi Tapú: “Ke mou ʻatu ʻa e ngaahi sino ʻomoutolu ko e feilaulau, ke moʻui, ke tapu [pe fakatapui] ki he ʻOtua, ke fakahōifua kiate ia.”—Loma 12:1.

Ngāue ʻo e ʻOfa mo e Tui

14. ʻI he founga fē ko ha fakahāhā ai ʻo e ʻofa ʻa e fakatapuí?

¹⁴ Ko hono fai ʻo ha fuakava ʻo e fakatapui ki he ʻOtuá ko ha fakahāhā ia ʻo ʻetau ʻofa moʻoni kia Sihova. ʻI he ngaahi founga ʻe niʻihi ʻoku meimei tatau ia mo ha fuakava mali. Ko ha tangata mali Kalisitiane ʻokú ne fakahāhā ʻa ʻene ʻofá ʻaki ʻene fuakava ke mateaki ki heʻene taʻahine malí, ʻo tatau ai pē pe ko e hā. Ko ha fuakava ia ki ha tokotaha kae ʻikai ko ha palōmesi pē ke fai ha meʻa. ʻOku mahinoʻi ʻe ha tangata mali Kalisitiane heʻikai lava ke ne maʻu ʻa e monū ʻo e nofo mo e taʻahine malí kapau heʻikai te ne fai ha fuakava mali. ʻI ha founga meimei tatau, heʻikai lava ke tau maʻu kakato ʻa e ngaahi ʻaonga ʻo e hoko ko ha mēmipa ʻo e fāmili ʻo Sihová taʻekau ai hono fai ha fuakava ʻo e fakatapui. Ko ia ʻoku tau fakatapui ki he ʻOtuá koeʻuhí neongo ʻa ʻetau taʻehaohaoá, ʻoku tau holi ke ʻaʻana kitautolu pea ʻoku tau fakapapauʻi ke mateaki kiate ia, ʻo tatau ai pē pe ko e hā.—Mt. 22:37.

15. ʻOku anga-fēfē ʻa e hoko ʻa e fakatapuí ko ha ngāue ʻo e tuí?

¹⁵ ʻI he taimi ʻoku tau fakatapui ai ki he ʻOtuá, ʻoku tau fakahoko ai ha ngāue ʻo e tui. Ko e hā ʻoku pehē aí? Ko ʻetau tui kia Sihová ʻoku ʻai ai ke tau tuipau ko e ʻunuʻunu ofi kiate Iá ʻoku lelei kia kitautolu. (Sāme 73:28) ʻOku tau ʻiloʻi heʻikai faingofua maʻu pē ke ʻaʻeva mo e ʻOtuá lolotonga ia ʻetau nofo ʻi he lotolotonga ʻo e “toʻutangata angapikopiko mo heke,” ka ʻoku tau falala ki heʻene palōmesí ke poupouʻi kitautolu ʻi heʻetau ngaahi feingá. (Fili. 2:15; 4:13) ʻOku tau ʻiloʻi ʻoku tau taʻehaohaoa, ka ʻoku tau tuipau ʻe feangainga mohu meesi ʻa Sihova kia kitautolu naʻa mo e taimi ʻoku tau fai ai ʻa e fehālākí. (Lau ʻa e Sāme 103:13, 14; Loma 7:21-25.) ʻOku tau maʻu ʻa e tui ʻe faitāpuekina ʻe Sihova ʻetau fakapapau ke tauhi maʻu ʻetau anga-tonú.—Siope 27:5.

Fakatapui ki he ʻOtuá ʻOku Iku Ia ki he Fiefia

16, 17. Ko e hā ʻoku iku ai ki he fiefia ʻa hono fai ʻo ha fakatapui kia Sihová?

¹⁶ Ko e fakatapui kia Sihová ʻoku iku ia ki he fiefia koeʻuhi ʻoku kau ai ʻa hono foaki atu kitautolu. Naʻe fakahaaʻi ʻe Sīsū ha moʻoni tefito ʻi heʻene pehē: “ʻOku te monuʻia [pe fiefia] lahi ʻi he fai ha foaki atu, ʻi heʻete maʻu ha foaki mai.” (Ng. 20:35) Naʻe hokosia kakato ʻe Sīsū ʻa e fiefia ʻo e foakí lolotonga ʻa ʻene ngāue fakafaifekau ʻi he māmaní. ʻI hono fiemaʻú, naʻá ne hokohoko atu taʻemālōlō, taʻekai, mo ʻikai ha fiemālie koeʻuhi ke lava ʻo ne tokoniʻi ʻa e niʻihi kehé ke nau maʻu ʻa e hala ki he moʻuí. (Sione 4:34) Naʻe maʻu ʻe Sīsū ʻa e fiefiá ʻi hono ʻai ke fiefia ʻa e loto ʻo ʻene Tamaí. Naʻe pehē ʻe Sīsū: “ʻOku ou fai maʻuaipē ʻa e ngaahi meʻa ʻoku ne hōhōʻia ai.”—Sione 8:29; Pal. 27:11.

¹⁷ Ko ia ai, naʻe fakahinohinoʻi ʻe Sīsū ʻa hono kau muimuí ki ha founga moʻui fiemālie ʻi heʻene pehē: “Kapau ʻoku fie muimui ha taha ʻiate au, tuku ke ne siʻaki ʻe ia ia.” (Mt. 16:24, NW) Ko e fai peheé ʻoku tohoakiʻi ai kitautolu ke ofi ange kia Sihova. ʻE lava ke tau tuku ke tokangaʻi kitautolu ʻe ha taha ʻa ia ʻe lava ke ne tokanga ʻofa lahi ange kia kitautolu?

18. Ko e hā ʻoku ʻomai ai ʻa e fiefia lahi ange ʻi he moʻui ʻo fehoanaki mo ʻetau fakatapui kia Sihová ʻi ha fakatapui ki ha meʻa pē pe ko ha tokotaha?

¹⁸ Ko e fakatapui kia Sihova pea moʻui ʻi he hili iá ʻo fehoanaki mo e fakatapui ko iá ʻaki hono fai ʻa hono finangaló ʻe ʻomai ai ʻa e fiefia lahi ange ʻi he fakatapui ki ha meʻa pē pe ko ha tokotaha. Ko e fakatātaá, ko e kakai tokolahi ʻoku nau līʻoa ʻenau moʻuí ki he tuli ki he koloa fakamatelié ʻo ʻikai maʻu ha fiefia mo e fiemālie moʻoni. Kae kehe, ko e faʻahinga ʻoku nau fakatapui kia Sihová ʻoku nau maʻu ʻa e fiefia tuʻuloa. (Mt. 6:24) Ko e lāngilangi ʻo e hoko ko e ‘kaungāngaue mo e ʻOtuá’ ʻoku ʻai ai kinautolu ke nau fiefia, neongo ia ko ʻenau fakatapuí ʻoku ʻikai ko e fai ia ki ha ngāue ka ki hotau ʻOtua houngaʻiá. (1 Kol. 3:9) ʻOku ʻikai ha taha ʻe toe houngaʻia ange ʻi heʻetau feilaulauʻi-kitá ʻo laka ʻiate ia. ʻE aʻu ʻo ne fakafoki ʻa ʻene faʻahinga mateakí ki he taimi ʻo ʻenau talavoú koeʻuhi ke lava ʻo nau maʻu ʻaonga mei heʻene tokangá ʻo taʻengata.—Siope 33:25; lau ʻa e Hepelu 6:10.

19. Ko e hā ʻa e monū ʻoku maʻu ʻe he faʻahinga ʻoku nau fakatapui kia Sihová?

¹⁹ Ko hono fakatapui ʻa hoʻo moʻuí kia Sihová ʻoku ʻomai ai koe ki ha vahaʻangatae vāofi mo Ia. ʻOku pehē ʻe he Tohi Tapú: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.” (Sem. 4:8; Sāme 25:14) ʻI he kupu hoko maí, te tau lāulea ai ki he ʻuhinga ʻe lava ke tau loto-maʻu ai fekauʻaki mo hono fai ʻa e fili ke hoko ko e meʻa ʻa Sihova.

[Fakamatala ʻi lalo]

ʻE Fēfē Haʻo Tali?

• Ko e hā hono ʻuhinga ʻo ʻete fakatapui ki he ʻOtuá?

• ʻOku anga-fēfē ʻetau maʻu ʻaonga mei he fakatapui ki he ʻOtuá?

• Ko e hā ʻoku fiemaʻu ai ke fakatapui ʻa e kau Kalisitiané kia Sihová?

[Fakatātā ʻi he peesi 6]

Ko e moʻui ʻo fehoanaki mo ʻetau fakatapuí ʻoku iku ia ki heʻetau fiefia taʻengata