“Ke Fakamāʻoniʻoniʻi Ho Huafá”

1-2. Ko e hā ʻa e ongo kaveinga ʻoku mahuʻinga ki he Kau Fakamoʻoni ʻa Sihová?

KO E ongo ʻīsiu mātuʻaki mahuʻinga ʻoku tau fehangahangai mo ia he ʻaho ní—ko e tuʻunga-haú mo hono fakamāʻoniʻoniʻi hono huafá. ʻI he tuʻunga ko e Kau Fakamoʻoni ʻa Sihová, ʻoku tau saiʻia ke lāulea ki he ongo kaveinga mahuʻinga ko iá. Kae kehe, ʻoku ʻikai ʻuhinga ia te tau fakafaikehekeheʻi ʻa e tuʻunga-hau ʻo e ʻOtuá mo hono fakamāʻoniʻoniʻi hono huafá—ʻo hangē ko ha ongo kaveinga kehekehe.

² ʻOku tau ʻiloʻi ko e huafa ʻo e ʻOtuá kuo pau ke fakamāʻoniʻoniʻi. ʻOku tau toe ʻiloʻi ko e tuʻunga-hau ʻo Sihová pe ko ʻene founga-pulé kuo pau ke fakamoʻoniʻi ko e lelei tahá ia. Ko e ongo ʻīsiú ʻoku tuha mo ʻetau fakaʻapaʻapá mo e tokangá.

 3. Ko e hā ʻoku kau ki he huafa Sihová?

³ Ko hono moʻoní, ko e huafa Sihová ʻoku kau ki ai ʻa e meʻa kotoa fekauʻaki mo hotau ʻOtuá, kau ai ʻene founga-pulé. Ko ia kapau ʻoku tau pehē ko hono fakamāʻoniʻoniʻi ʻa e huafa ʻo Sihová ʻa e ʻīsiu mahuʻinga tahá, ʻoku tau toe pehē ai ko e founga-pule ʻa Sihová kuo pau ke fakamoʻoniʻi ko e lelei tahá ia. Ko e huafa ʻo Sihová ʻoku fehoanaki vāofi ia mo ʻene Pule māfimafi-aoniú.—Sio ki he puha “Ngaahi Tafaʻaki ʻo e ʻĪsiu Lahí.”

 4. ʻOku anga-fēfē hono fakamatalaʻi ʻi he Saame 135:13 ʻa e huafa ʻo e ʻOtuá, pea ko e hā ʻa e ngaahi fehuʻi te tau tali ʻi he kupu ko ení?

⁴ Ko e huafa Sihová ʻoku laulōtaha. (Lau ʻa e Saame 135:13.) Ko e hā ʻokú ne ʻai ʻa e huafa ʻo e ʻOtuá ke mātuʻaki mahuʻingá? Naʻe anga-fēfē hono fuofua lauʻikovi loi iá? ʻOku anga-fēfē hono fakamāʻoniʻoniʻi ia ʻe he ʻOtuá? Pea ʻe lava fēfē ke tau tokoni ki hono taukapoʻi hono huafá? Tau lāulea angé ki he ngaahi fehuʻi ko iá.

 5. Ko e hā te tau fifili nai ki ai ʻi he fekauʻaki mo hono fakamāʻoniʻoniʻi ʻa e huafa ʻo e ʻOtuá?

⁵ “Ke fakamāʻoniʻoniʻi ho huafá.” (Māt. 6:9) Ko e meʻa ia naʻe fokotuʻu mai ʻe Sīsū ke fakamuʻomuʻa ʻi he lotú. Ka ʻoku ʻuhinga eni ki he hā? Ke fakamāʻoniʻoniʻi ha meʻa ʻoku ʻuhingá ke ʻai ke toputapu pe maʻa. Ka ʻe fifili nai ʻa e niʻihi, ‘ʻIkai ʻoku ʻosi māʻoniʻoni pē mo maʻa ʻa e huafa ʻo Sihová?’ Ke tali iá, ʻoku fiemaʻu ke tau fakakaukau fekauʻaki mo e meʻa ʻoku kaunga ki ha hingoa.

 6. Ko e hā ʻokú ne ʻai ha hingoa ke mahuʻinga lahí?

⁶ Ko ha hingoa ʻoku ʻikai ko ha ngaahi mataʻitohi pē ʻoku hiki ʻi ha pepa pe leaʻaki. Fakatokangaʻi ʻa e lau ʻa e Tohi Tapú: “ʻOku lelei ange ke fili ki ha hingoa lelei ʻi he fili ki ha koloa lahi.” (Pal. 22:1; Tml. 7:1) Ko e hā ʻoku mahuʻinga lahi ai ha hingoa? Koeʻuhi ʻoku kaunga ki ai ʻa e ongoongo ʻo ha taha, ʻa e anga ʻo e fakakaukau ʻa e niʻihi kehé fekauʻaki mo e tokotaha ʻoku uiʻaki ʻa e hingoa ko iá. Ko ia ko e anga hono hiki ha hingoa—pe ko hono puʻakí—ʻoku ʻikai ko e meʻa mahuʻinga tahá ia; ko e mahuʻinga tahá ʻa e meʻa ʻoku fakakaukau ki ai ʻa e kakaí ʻi heʻenau sio pe fanongo ki he hingoa ko iá.

 7. Kuo anga-fēfē hono lauʻikovi loi ʻe he kakaí ʻa e huafa ʻo e ʻOtuá?

⁷ ʻI hono tala ʻe he kakaí ʻa e ngaahi loi fekauʻaki mo Sihová, ʻoku nau maumauʻi ai hono ongoongó. ʻOku nau feinga ai ke lauʻikovi loi hono huafá. Naʻe fuofua lauʻikovi loi ʻa e huafa mo e ongoongo ʻo e ʻOtuá ʻi he kamataʻanga ʻo e hisitōlia ʻo e tangatá. Fakakaukau angé ki he meʻa te tau ako mei hení.

 8. Ko e hā naʻe ʻiloʻi ʻe ʻĀtama mo ʻIví, pea ko e hā ʻa e ongo fehuʻi ʻe lava ke tau ʻeké?

⁸ Naʻe ʻiloʻi ʻe ʻĀtama mo ʻIvi ʻa e huafa ʻo Sihová, pehē foki ki he ngaahi moʻoni mahuʻinga fekauʻaki mo e Tokotaha ʻoku uiʻaki ʻa e huafa ko iá. Naʻá na ʻiloʻi ia ko e Tokotaha-Fakatupú, ʻa ia naʻá ne ʻoange kiate kinaua ʻa e moʻuí, ko hona ʻapi Palataisi fakaʻofoʻofá pea mo ha nofo mali haohaoa. (Sēn. 1:26-28; 2:18) Ka, te na hokohoko atu ke ngāueʻaki hona ʻatamai haohaoá ke fakalaulauloto ki he meʻa kotoa naʻe fai ʻe Sihova maʻanauá? Te na hokohoko atu ke fakaivimālohiʻi ʻena ʻofa mo e houngaʻia ʻi he Tokotaha naʻá ne fakafofongaʻi ʻa e huafa ko iá? Naʻe hā mahino ʻa e talí ʻi hono ʻahiʻahiʻi kinaua ʻe he fili ʻo e ʻOtuá.

 9. Fakatatau ki he Sēnesi 2:16, 17 mo e 3:1-5, ko e hā naʻe tala ʻe Sihova ki he ʻuluaki ongo mātuʻá, pea naʻe anga-fēfē hono mioʻi ʻe Sētane ʻa e moʻoní?

⁹ Lau ʻa e Sēnesi 2:16, 17 mo e 3:1-5. ʻI he ngāueʻaki ʻe Sētane ha ngata ke lea maʻaná, naʻá ne ʻeke kia ʻIvi: “Ko e moʻoni koā naʻe folofola ʻa e ʻOtuá ʻo pehē kuo pau ke ʻoua te mo kai mei he ʻakau kotoa pē ʻo e ngoué?” Ko e fehuʻi ko iá ko ha foʻi loi olopoto naʻe hangē ha meʻa ʻoku koná. Ko hono moʻoní naʻe tala ange ʻe he ʻOtuá ke na kai mei he ʻuluʻakau kotoa tuku kehe pē ʻa e fuʻu ʻakau ʻe taha. Kuo pau pē naʻe lahi ʻa e ʻuluʻakau kehekehe ke kai mei ai ʻa ʻĀtama mo ʻIvi. (Sēn. 2:9) ʻIo, ʻoku nima-homo moʻoni ʻa Sihova. Kae kehe, naʻe tapui ʻe he ʻOtuá ʻa ʻĀtama mo ʻIvi mei hono kai ʻa e fuaʻiʻakau mei he fuʻu ʻakau naʻá ne fakamavaheʻí. Naʻe mioʻi ʻe Sētane ʻa e moʻoní peá ne ʻai ke hangē naʻe ʻikai ke nima-homo ʻa e ʻOtuá. Mahalo naʻe fifili ʻa ʻIvi, ‘ʻOku taʻofi ʻe he ʻOtuá ha meʻa lelei meiate au?’

10. Naʻe anga-fēfē hono lauʻikovi loi fakahangatonu ʻe Sētane ʻa e huafa ʻo e ʻOtuá, pea ko e hā hono ikuʻangá?

¹⁰ ʻI he taimi ko iá, naʻe kei vakai pē ʻa ʻIvi kia Sihova ko hono Pule. Naʻá ne tala ange kia Sētane ʻa e fakahinohino tofu pē naʻe ʻoange ʻe he ʻOtuá. Naʻá ne tala ange foki naʻe ʻikai totonu ke na ala ki he fuʻu ʻakaú. Naʻá ne ʻiloʻi mei he fakatokanga ʻa e ʻOtuá ko e talangataʻá ʻe iku ki he mate. Ka naʻe tali ange ʻe Sētane: “ʻE ʻikai moʻoni te mo mate.” (Sēn. 3:2-4) Naʻe tala ange hangatonu ia ʻe Sētane. Naʻá ne lauʻikovi loi fakahangatonu heni ʻa e huafa ʻo e ʻOtuá ʻo ne tala ange kia ʻIvi ko Sihová ko ha tokotaha loi. Naʻe hoko ai ʻa Sētane ko e tēvoló pe ko e tokotaha lauʻikovi loí. Naʻe kākaaʻi fakaʻaufuli ʻa ʻIvi; naʻá ne tui kia Sētane. (1 Tīm. 2:14) Naʻá ne falala ange kia Sētane ʻia Sihova. Naʻe faingofua ange ai kia ʻIvi ke ne fai ʻa e fili kovi taha ʻe ala fai ʻe ha tokotaha. Naʻá ne talangataʻa kia Sihova. Naʻá ne kai ʻa e fuaʻiʻakau naʻe tapui ʻe Sihova meiate iá. Hili iá, naʻá ne ʻoange ha konga kia ʻĀtama.—Sēn. 3:6.

11. Ko e hā naʻe mei lava ke fai ʻe heʻetau ʻuluaki ongo mātuʻá, ka ko e hā naʻe ʻikai lava ke na faí?

¹¹ Fakakaukau angé fekauʻaki mo e meʻa naʻe totonu ke tala ange ʻe ʻIvi kia Sētané. Sioloto atu naʻá ne pehē: “ʻOku ʻikai te u ʻiloʻi koe, ka ʻoku ou ʻiloʻi ʻeku Tamaí, ʻa Sihova, pea ʻoku ou ʻofa mo falala kiate ia. Kuó ne ʻomai kiate au mo ʻĀtama ʻa e meʻa kotoa. Ko hai koe ke ke lea kovi fekauʻaki mo ia? ʻAlu ki mamaʻo!” He mei fiefia ē ko Sihova ke fanongo ki ha ngaahi lea mateaki pehē mei ha ʻofefine ʻofeina! (Pal. 27:11) Ka naʻe ʻikai ke maʻu ʻe ʻIvi ha ʻofa mateaki kia Sihova; pea naʻe ʻikai foki ke maʻu ʻe ʻĀtama ʻa e ʻulungaanga ko iá. Ko ia naʻe ʻikai lava ai ke na taukapoʻi ʻa hono lauʻikovi loi ʻa e huafa ʻena Tamaí.

12. Naʻe anga-fēfē hono ʻai ʻe Sētane ke veiveiua ʻa ʻIví, pea ko e hā naʻe ʻikai malava ke fai ʻe ʻĀtama mo ʻIví?

¹² Hangē naʻa tau lāulea ki aí, naʻe ʻuluaki ʻai ʻe Sētane ke veiveiua ʻa ʻIvi. Naʻá ne ʻai ʻa ʻIvi ke ne fehuʻia pe ko e Tokotaha fēfē ʻokú ne fakafofongaʻi ʻa e huafa Sihová. Pea naʻe ʻikai lava ke taukapoʻi ʻe ʻĀtama mo ʻIvi ʻa e huafa mo e ongoongo ʻo Sihová. Naʻe faingofua heni ke na fanongo kia Sētane peá na angatuʻu ai ki heʻena Tamaí. ʻI he ʻahó ni ʻoku ngāueʻaki ʻe Sētane ʻa e founga meimei tatau. ʻOkú ne lauʻikovi loi ʻa e huafa ʻo Sihová. Ko e kakai ʻoku tui ki he ngaahi loi ʻa Sētané ʻoku faingofua hono tākiekina kinautolu ke siʻaki ʻa e pule māʻoniʻoni ʻa Sihová.

13. ʻOku anga-fēfē hono fakamamafaʻi ʻi he ʻIsikeli 36:23 ʻa e pōpoaki tefito ʻo e Tohi Tapú?

¹³ ʻOku tali pē ʻe Sihova ʻa e lauʻikovi loi ko iá kae ʻikai taukapoʻi ʻa ia tonu? ʻIkai ʻaupito! Ko e Tohi Tapú kotoa ʻoku fakahangataha ai ki he founga kuo fakahoko ʻe Sihova ke fakaʻataʻatā hono huafá mei hono lumaʻi ʻi ʻĪtení. (Sēn. 3:15) Ko hono moʻoní, ʻe lava ke tau fakamatalaʻi ʻa e pōpoaki tefito ʻo e Tohi Tapú ʻo peheni: ʻOku fakamāʻoniʻoniʻi ʻe Sihova hono huafá fakafou ʻi he Puleʻanga ʻoku pule ai ʻa hono ʻAló pea fakafoki ʻa e māʻoniʻoní mo e melinó ki he māmaní. ʻOku tokoniʻi kitautolu ʻe he Tohi Tapú ke mahinoʻi ʻa e founga ʻoku fakamāʻoniʻoniʻi ai ʻe Sihova hono huafá.—Lau ʻa e ʻIsikeli 36:23.

14. Kuo anga-fēfē hono fakamāʻoniʻoniʻi ʻa e huafa ʻo Sihová ʻi heʻene tali ki he angatuʻu ʻi ʻĪtení?

¹⁴ Kuo fai ʻe Sētane ʻa e meʻa kotoa ʻokú ne malavá ke taʻofi ʻa Sihova mei hono fakahoko ʻEne taumuʻá. Ka kuo ʻikai pē ke ne lavameʻa. ʻOku fakahaaʻi ʻi he Tohi Tapú ʻa e meʻa kuo fai ʻe Sihová, pea ʻoku fakamoʻoniʻi ai ʻoku ʻikai ha toe taha ʻe tatau mo Sihova ko e ʻOtuá. Ko e moʻoni, ko e angatuʻu ʻa Sētane mo e kotoa ʻi heʻene faʻahí kuo ʻai ai ʻa Sihova ke mamahi lahi. (Saame 78:40) Ka kuó ne fakaleleiʻi ʻa e pole ko ení ʻaki ʻa e poto, kātaki mo e fakamaau totonu. Kuó ne fakahaaʻi foki hono mālohi aoniú ʻi he ngaahi founga lahi. Hiliō he meʻa kotoa, ko ʻene ʻofá ʻoku tapua mai ia ʻi he meʻa kotoa ʻokú ne faí. (1 Sio. 4:8) Kuo ngāue hokohoko ʻa Sihova ke fakamāʻoniʻoniʻi hono huafá.

15. ʻOku anga-fēfē hono lauʻikovi loi ʻe Sētane ʻa e huafa ʻo e ʻOtuá he ʻaho ní, pea ko e hā hono olá?

¹⁵ ʻI he ʻahó ni ʻoku kei lauʻikovi loi pē ʻe Sētane ʻa e huafa ʻo e ʻOtuá. ʻOkú ne kākaaʻi ʻa e kakaí ke nau veiveiua fekauʻaki mo e mālohi, fakamaau totonu, poto mo e ʻofa ʻa e ʻOtuá. Ko e fakatātaá, ʻoku feinga ʻa Sētane ke fakalotoʻi ʻa e kakaí ke nau tui ko Sihova ʻoku ʻikai ko e Tokotaha-Fakatupú. Pea kapau ʻoku tui ʻa e kakaí ʻoku ʻi ai ha ʻOtua, ʻoku feinga ʻa Sētane ke ʻai ke nau tui ko e ʻOtuá mo ʻEne ngaahi tuʻungá ʻoku fakataputapui mo ʻikai totonu. ʻOku aʻu ʻo ne akoʻi ʻa e kakaí ke nau tui ko Sihová ko ha ʻOtua taʻeʻofa mo anga-fakamamahi ʻokú ne tutu ʻa e kakaí ʻi ha afi ʻo heli. ʻI heʻenau tui ki he lauʻikovi loi ko iá, ʻoku ngalingali te nau talitekeʻi ai ʻa e pule māʻoniʻoni ʻa Sihová. ʻE hokohoko atu pē hono fai ʻe Sētane ʻa e lauʻikovi loí pea te ne tāketiʻi foki mo koe, kae ʻoua ke toki fakaʻauha fakaʻaufuli ia. Te ne lavameʻa?

16. Ko e hā e meʻa ʻe lava ke ke fakahoko ʻa ia naʻe ʻikai malava ia ʻe ʻĀtama mo ʻIvi?

¹⁶ ʻOku fakaʻatā ʻe Sihova ʻa e faʻahinga taʻehaohaoá ke nau kau ʻi hono fakamāʻoniʻoniʻi hono huafá. Ko ia, ʻe lava ke ke fakahoko ʻa e meʻa naʻe ʻikai malava ʻe ʻĀtama mo ʻIvi ke faí. Neongo ʻa e nofo ʻi ha māmani ʻoku fonu ʻi he kakai ʻoku nau lauʻikovi loi mo laukovi ki he huafa ʻo Sihová, ʻokú ke maʻu ha faingamālie ke taukapoʻi ʻa e moʻoní—ʻa ia ko Sihova ʻoku māʻoniʻoni, lelei mo anga-ʻofa. (ʻAi. 29:23) ʻE lava ke ke poupouʻi ʻene pulé. ʻE lava ke ke tokoniʻi ʻa e kakaí ke nau mahinoʻi ko e founga-pule pē ia ʻe taha ʻoku māʻoniʻoni moʻoní pea te ne ʻomai ʻa e melino mo e fiefia ki he meʻa fakatupu kotoa.—Saame 37:9, 37; 146:5, 6, 10.

17. Naʻe anga-fēfē hono ʻai ʻe Sīsū ke ʻiloa ʻa e huafa ʻo ʻene Tamaí?

¹⁷ ʻI heʻetau taukapoʻi ʻa e huafa ʻo Sihová, ʻoku tau muimui ai ki he faʻifaʻitakiʻanga ʻa Sīsū Kalaisí. (Sione 17:26) Naʻe ʻai ʻe Sīsū ke ʻiloa ʻa e huafa ʻo ʻene Tamaí ʻaki ʻene ngāueʻaki ia pehē foki ki heʻene taukapoʻi ʻa e ongoongo ʻo Sihová. Ko e fakatātaá, naʻá ne fakahaaʻi ʻoku hala ʻa e kau Fālesí ʻa ia naʻa nau ʻai ʻa Sihova ke hā ngali ko ha tokotaha anga-kakaha, anga-fefeka, ʻikai anga-fakakaumeʻa mo taʻefaimeesi. Naʻe tokoniʻi ʻe Sīsū ʻa e kakaí ke vakai ki heʻene Tamaí ko ha tokotaha ʻoku fakaʻatuʻi, anga-kātaki, anga-ʻofa mo faʻa fakamolemole. Naʻá ne toe tokoniʻi ʻa e kakaí ke nau ʻiloʻi ʻa Sihova ʻaki ʻene tapua haohaoa mai ʻa e ngaahi ʻulungaanga ʻene Tamaí ʻi heʻene moʻui fakaʻahó.—Sione 14:9.

18. ʻE lava fēfē ke tau fulihi ʻa e ngaahi loi mo e lauʻikovi loi fekauʻaki mo Sihová?

¹⁸ Hangē ko Sīsuú, ʻe lava ke tau vahevahe atu ʻa e meʻa ʻoku tau ʻilo fekauʻaki mo Sihová, ʻo akoʻi ʻa e kakaí ke nau ʻilo ko ha ʻOtua anga-ʻofa mo anga-lelei ia. ʻI heʻetau fai peheé, ʻoku tau fulihi ai ʻa e ngaahi loi mo e lauʻikovi loi fekauʻaki mo Sihová. ʻOku tau fakamāʻoniʻoniʻi ʻa e huafa ʻo Sihová, ʻo ʻai ia ke toputapu ʻi he ʻatamai mo e loto ʻo e kakaí. ʻE lava foki ke tau faʻifaʻitaki kia Sihova. ʻOku malava ia neongo ʻetau taʻehaohaoá. (ʻEf. 5:1, 2) ʻI heʻetau fakahaaʻi ki he kakaí ʻa e tuʻunga moʻoni ʻo Sihová fakafou ʻi heʻetau leá mo e ngāué, ʻoku tau tokoni ai ke fakamāʻoniʻoniʻi hono huafá. ʻOku tau fakatonuhiaʻi ʻa e huafa ko iá ʻaki hono tokoniʻi ʻa e kakaí ke nau tauʻatāina mei he ngaahi maʻuhala nai fekauʻaki mo e ʻOtuá.b ʻOku tau toe fakamoʻoniʻi ʻoku malava ʻa e faʻahinga taʻehaohaoa ʻo e tangatá ke tauhi anga-tonu ki he ʻOtuá.—Siope 27:5.

19. ʻOku anga-fēfē hono tokoniʻi kitautolu ʻe he ʻAisea 63:7 ke ʻiloʻi ʻa e taumuʻa tefito ʻetau faiakó?

¹⁹ Fakakaukau ki ha toe lēsoni mahuʻinga ʻe lava ke tau ngāueʻaki. ʻI heʻetau akoʻi ʻa e moʻoni mei he Tohi Tapú ki he niʻihi kehé, ʻoku tau faʻa fakamamafaʻi ʻa e tuʻunga-hau ʻo e ʻOtuá, ʻa e totonu ʻa Sihova ke pule ki he ʻunivēsí, pea ʻoku moʻoni ʻaupito eni. Neongo ʻoku mahuʻinga ke tokangataha ki he ngaahi lao ʻa e ʻOtuá, ko ʻetau taumuʻa tefitó ke tokoniʻi ʻa e niʻihi kehé ke nau ʻofa kia Sihova, ko ʻetau Tamaí, pea mateaki kiate ia. Ko ia ʻoku fiemaʻu ke tau akoʻi ʻa e ngaahi ʻulungaanga fakamānako ʻo Sihová, ʻo fakamamafaʻi ai pe ko e Tokotaha fēfē ʻokú ne fakafofongaʻi ʻa e huafa Sihová. (Lau ʻa e ʻAisea 63:7.) ʻI heʻetau fai iá, ʻoku tau tokoniʻi ai ʻa e niʻihi kehé ke ʻofa pea talangofua kia Sihova koeʻuhi ʻoku nau loto ke mateaki kiate ia.

20. Ko e hā te tau lāulea ki ai ʻi he kupu hokó?

²⁰ ʻE lava fēfē ke tau fakapapauʻi ko ʻetau tōʻongá mo ʻetau faiakó ʻoku tapua lelei atu ai ʻa e huafa ʻo Sihová pea tohoakiʻi ai ʻa e niʻihi kehé kiate ia? ʻE tali eni ʻi he kupu hokó.