ʻE Fakahoko ʻa e Taumuʻa ʻa Sihová!

1, 2. (a) Ko e hā kuo fakahaaʻi mai ʻe Sihova kiate kitautolú? (e) Ko e hā ʻa e talaʻofa ʻoku tau maʻu ʻi he ʻAisea 46:10, 11 mo e 55:11?

KO E ʻuluaki ngaahi foʻi lea ʻi he Tohi Tapú ʻoku ʻomai ai ʻa e fakamatala faingofua kae loloto ko ení: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” (Sēn. 1:1) Kuo tau mamata ki ha meʻa siʻi pē ʻi he ngaahi meʻa lahi naʻe fakatupu ʻe he ʻOtuá ʻi he ʻunivēsí, pea ʻoku siʻi ʻaupito ʻa e mahino ʻoku tau maʻu fekauʻaki mo e ngaahi meʻa hangē ko e vavaá, māmá, pea mo e kalāvité. (Koh. 3:11) Ka kuo fakahaaʻi mai ʻe Sihova kiate kitautolu ʻene taumuʻa ki he māmaní pea ki he faʻahinga ʻo e tangatá. Naʻá ne fakatupu ʻa e faʻahinga ʻo e tangatá ʻi hono ʻīmisí peá ne loto ke nau moʻui fiefia ʻi he māmaní. (Sēn. 1:26) Te nau hoko ko ʻene fānau, pea te ne hoko ko ʻenau Tamai.

² ʻI he vahe hono tolu ʻo e tohi Sēnesí, ʻoku tau ʻilo ai naʻe poleʻi ʻa e taumuʻa ʻa Sihová. (Sēn. 3:1-7) Kae kehe, ʻoku ʻikai ha palopalema ia ʻe taʻemalava ke fakaleleiʻi ʻe Sihova. ʻOku ʻikai ha taha ʻe lava ke ne taʻofi ʻa ʻene foungá. (ʻAi. 46:10, 11; 55:11) ʻOku lava ke tau fakapapauʻi ʻe fakahoko tofu pē ʻa e muʻaki taumuʻa ʻa Sihová ʻi hono taimi totonu!

 3. (a) Ko e hā ʻa e ngaahi akonaki mahuʻinga ʻokú ne tokoniʻi kitautolu ke tau mahinoʻi ʻa e pōpoaki ʻi he Tohi Tapú? (e) Ko e hā te tau lāulea ai ʻi he taimí ni ki he ngaahi akonaki ko ení? (f) Ko e hā ʻa e ngaahi fehuʻi te tau lāulea ki aí?

³ ʻOku ʻikai ha veiveiua, ʻoku tau ʻiloʻi ʻa e taumuʻa ʻa e ʻOtuá ki he māmaní pea ki he faʻahinga ʻo e tangatá, pea pehē ki he ngafa ʻo Sīsuú ʻi he taumuʻa ko iá. Ko e ngaahi moʻoni Fakatohitapu mātuʻaki mahuʻinga eni pea ʻoku ngalingali ko e muʻaki ngaahi moʻoni ia naʻa tau ʻilo ʻi he taimi naʻa tau kamata ako ai ʻa e Folofola ʻa e ʻOtuá. ʻOku tau loto he taimí ni ke tokoniʻi ʻa e niʻihi kehé ke nau ʻilo ʻa e ngaahi akonaki mātuʻaki mahuʻinga ko ení. ʻOku tau maʻu ha faingamālie makehe ke fai pehē lolotonga ʻa e taimi ko eni ʻo e taʻú, ʻi heʻetau fakaafeʻi ʻa e kakaí ke nau maʻu ʻa e Fakamanatu ʻo e pekia ʻa Kalaisí. (Luke 22:19, 20) Kapau te nau haʻu ki he kātoanga mahuʻinga ko ení, te nau ako lahi ange ai ʻo fekauʻaki mo e taumuʻa fisifisimuʻa ʻa e ʻOtuá. Ko ia ko ha taimi lelei eni ke fakakaukau ai fekauʻaki mo e ngaahi fehuʻi makehe ʻe lava ke tau ngāueʻaki ke fakalototoʻaʻi ʻaki ʻa e kakaí ke nau maʻu ia. ʻI he kupu ko ení, te tau lāulea ai ki he fehuʻi ʻe tolu: Ko e hā ʻa e taumuʻa ʻa e ʻOtuá ki he māmaní pea ki he faʻahinga ʻo e tangatá? Ko e hā ʻa e meʻa naʻe fehālākí? Pea ko e hā ʻoku hoko ai ʻa e feilaulau huhuʻi ʻa Sīsuú ko e kī ia te ne fakaava ʻa e matapā ki hono fakahoko ʻa e taumuʻa ʻa e ʻOtuá?

 4. ʻOku anga-fēfē hono hanga ʻe he fakatupú ʻo “tala ʻa e nāunauʻia ʻo e ʻOtua”?

⁴ Ko Sihová ko ha Tokotaha-Fakatupu fakaofo ia. Ko e meʻa kotoa pē naʻá ne fakatupú ʻoku ʻi he tuʻunga māʻolunga tahá. (Sēn. 1:31; Sel. 10:12) Ko e hā ʻe lava ke tau ako mei he fakaʻofoʻofa mo e maau ʻi he meʻa ʻoku tau sio ki ai ʻi he fakatupú? ʻOku tau ʻilo ko e meʻa kotoa pē naʻe fakatupu ʻe Sihová, mei he valevale tahá ki he lahi tahá, ʻoku ʻaonga. Tānaki atu ki ai, ʻi hoʻo fakakaukau atu ki he fakaofo ʻa e sela ʻo e tangatá, pe sio ki ha pēpē toki fāʻeleʻi, pe siofi ʻa e fakaʻofoʻofa ʻa e tāitō ʻa e laʻaá, ʻoku fēfē hoʻo ongoʻí? ʻOku tau matamataleleiʻia ʻi he ngaahi meʻá ni koeʻuhí he naʻe fakatupu kitautolu ʻe Sihova fakataha mo e malava ke tau ʻiloʻi ʻa e meʻa ʻoku fakaʻofoʻofa moʻoní.—Lau ʻa e Saame 19:1; 104:24.

 5. Ko e hā kuo fai ʻe Sihova koeʻuhi ke ngāue lelei fakataha ai ʻene meʻa fakatupú?

⁵ Naʻe fokotuʻu fakalelei ʻe Sihova ʻa e ngaahi fakangatangata ki he kotoa ʻo ʻene meʻa fakatupú. Naʻá ne ʻai ʻa e ngaahi lao ki natula, pea naʻá ne ʻai ʻa e ngaahi lao fakaeʻulungaanga. Naʻá ne ʻai ʻa e ngaahi lao ko ení koeʻuhí ke ngāue lelei fakataha ʻa e meʻa kotoa pē ʻi he ʻunivēsí. (Saame 19:7-9) Ko e meʻa kotoa pē ʻi he ʻunivēsí ʻoku ʻi ai e feituʻu kuo vaheʻi kinautolu ki ai mo e ngāue ke nau fai. Ko e fakatātaá, ko e lao ʻo e kalāvité ʻokú ne pukepuke ʻa e ʻatimosifiá ke ofi ki he māmaní, pea ʻokú ne puleʻi ʻa e ʻōsení ʻi heʻene mamaha mo e huʻa ʻa e tahí. ʻI he ʻikai ha kalāvité, ʻe ʻikai malava ke ʻi ai ha moʻui ʻi he māmaní. Ko e ngaahi fakangatangata naʻe fokotuʻu ʻe Sihova ʻi natulá ʻoku iku ai ki he tuʻunga maau fakaʻaufuli ʻi he ʻunivēsí. ʻOku fakahaaʻi ʻe he meʻá ni ʻoku ʻi ai ʻene taumuʻa ki he māmaní pea ki he faʻahinga ʻo e tangatá. ʻI heʻetau ngāue fakafaifekaú, ʻe lava ke tau tokoniʻi ai ʻa e niʻihi kehé ke nau ʻilo ʻa e Tokotaha-Fakatupu ʻo e ʻuniveesi fakaofo ko ení.—Fkh. 4:11.

6, 7. Ko e hā ʻa e meʻaʻofa ʻe niʻihi naʻe ʻoange ʻe Sihova kia ʻĀtama mo ʻIví?

⁶ Ko e taumuʻa ʻa Sihová ke moʻui taʻengata ʻa e faʻahinga ʻo e tangatá ʻi he māmaní. (Sēn. 1:28; Saame 37:29) ʻOkú ne nima-homo, pea naʻá ne ʻoange kia ʻĀtama mo ʻIvi ʻa e ngaahi meʻaʻofa mahuʻinga kehekehe. (Lau ʻa e Sēmisi 1:17.) Naʻe ʻoange ʻe Sihova kiate kinaua ʻa e tauʻatāina ke fili mo e malava ke fakaʻuhinga, ke ʻofa, pea ke na maʻu ha ngaahi kaumeʻa. Naʻe folofola ʻa e Tokotaha-Fakatupú kia ʻĀtama ʻo fakahinohinoʻi ia ki he founga ke fai ai ʻa e meʻa ʻoku leleí. Naʻe toe ako foki ʻa ʻĀtama ki he founga ke ne tokangaʻi ai iá, ko e fanga manú, pea mo e fonuá. (Sēn. 2:15-17, 19, 20) Naʻe ʻoange ʻe Sihova kia ʻĀtama mo ʻIvi ʻa e malava ke na ʻahiʻahiʻi, ala, sio, fanongo pea nāmuʻi ʻa e ngaahi meʻa lelei naʻá ne fakatupu maʻanauá. ʻI he foungá ni, naʻe lava ai ke na fiefia ʻi he moʻuí ʻi hona ʻapi fakaʻofoʻofá. Naʻe maʻu ʻe ʻĀtama mo ʻIvi ʻa e ngāue fakamānako lahi ke na fai. Pea naʻe lava ke hokohoko atu ʻena ako mo ʻilo ʻa e ngaahi meʻa foʻou ʻo taʻengata.

⁷ Ko e hā ha toe meʻa ko e konga ia ʻo e taumuʻa ʻa e ʻOtuá? Naʻe ʻoange ʻe Sihova kia ʻĀtama mo ʻIvi ʻa e malava ke na maʻu ʻa e fānau haohaoa. Pea ʻe maʻu fānau foki mo ʻena fānaú, kae ʻoua kuo fakafonu ʻe he faʻahinga ʻo e tangatá ʻa e māmaní kotoa. Naʻe fiemaʻu ʻe Sihova ke ʻofa ʻa e ngaahi mātuʻá ʻi heʻenau fānaú, ʻo hangē pē ko ʻene ʻofa ʻi heʻene ʻuluaki fānau haohaoa fakaetangatá, ʻa ʻĀtama mo ʻIvi. Naʻá ne ʻoange ki he fāmili ʻo e tangatá ʻa e māmaní mo e ngaahi meʻa mahuʻinga mo fakaʻofoʻofa ʻi aí. ʻE hoko eni ko honau ʻapi, pea ʻe ʻikai ʻaupito ke toʻo ia meiate kinautolu.—Saame 115:16.

 8. Ko e hā naʻe ʻoange ai ʻe he ʻOtuá kia ʻĀtama mo ʻIvi ʻa e lao ʻi he Sēnesi 2:16, 17?

⁸ Naʻe ʻikai ke hoko leva ʻa e ngaahi meʻá ʻo hangē ko ia naʻe fiemaʻu ʻe Sihová. Ko e hā e meʻa naʻe hokó? Naʻe ʻoange ʻe Sihova kia ʻĀtama mo ʻIvi ha lao faingofua koeʻuhí ke na ʻiloʻi ʻa e meʻa ke ngata ai ʻena tauʻatāiná. Naʻá ne pehē: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: He ko e ʻaho te ke kai mei ai kuo pau te ke mate.” (Sēn. 2:16, 17) Ko e lao ko iá naʻe ʻikai faingataʻa ke na mahinoʻi. Pea ʻe ʻikai faingataʻa ke na talangofua ki ai, koeʻuhí he naʻe lahi ʻa e ngaahi meʻakai ifo kehe ʻi he ngoué.

9, 10. (a) Ko e hā naʻe tukuakiʻi ʻe Sētane fekauʻaki mo Sihová? (e) Ko e hā naʻe fili ʻe ʻĀtama mo ʻIvi ke na faí? (Sio ki he ʻuluaki fakatātā ʻi he kupú ni.)

⁹ Naʻe ngāueʻaki ʻe Sētane ko e Tēvoló ha ngata ke ne kākaaʻi ʻa ʻIvi ke talangataʻa ki heʻene Tamaí, ʻa Sihova. (Lau ʻa e Sēnesi 3:1-5; Fkh. 12:9) Naʻe langaʻi ʻe Sētane ha tālanga ʻi he moʻoniʻi meʻa ko ia ʻo e ʻikai ke fakaʻatā ʻa e fānau fakaetangata ʻa e ʻOtuá ke na kai “mei he ngahi ʻakau kehekehe ʻo e ngoue.” Ne hangē ia naʻá ne pehē: ‘Ko hoʻo ʻuhingá heʻikai lava ke ke fai ʻa e meʻa ʻokú ke loto ki aí?’ Naʻá ne hoko atu, ʻo tala ange kiate ia: “ʻE ʻikai ʻaupito te mo mate.” Ko ha foʻi loi ia. Pea naʻá ne feinga leva ke fakatuipauʻi ʻa ʻIvi naʻe ʻikai fiemaʻu ia ke ne fanongo ki he ʻOtuá. Naʻe pehē ʻe Sētane: “ʻOku meaʻi ʻe he ʻOtua ko e ʻaho te mo kai ai ʻe ʻa ai homo mata.” Naʻe pehē ʻe Sētane naʻe ʻikai ke loto ʻa Sihova ke na kai ʻa e fuaʻiʻakaú koeʻuhí ʻe ʻoange heni kiate kinaua ha ʻilo makehe. Fakaʻosí, naʻá ne fai ʻa e talaʻofa loi ko ení: “Te mo hoko ke hange ko e ʻOtua, hoʻomo ʻilo ʻa e lelei mo e kovi.”

¹⁰ Naʻe pau ke fili ʻe ʻĀtama mo ʻIvi ʻa e meʻa te na faí. Te na talangofua ki he ʻOtuá, pe te na fanongo kinaua ki he ngatá? Ko e meʻa fakamamahí, naʻá na fili ke talangataʻa ki he ʻOtuá. Naʻá na siʻaki ʻa Sihova ko ʻena Tamaí peá na kau mo Sētane. ʻI he taimi ko ení naʻe ʻikai kei maluʻi kinaua ʻe Sihova.—Sēn. 3:6-13.

11. Ko e hā naʻe ʻikai lava ai ke tukunoaʻi ʻe Sihova ʻa e angahala ʻa ʻĀtama mo ʻIví?

¹¹ ʻI hono maumauʻi ʻe ʻĀtama mo ʻIvi ʻa e lao ʻa e ʻOtuá, naʻe ʻikai ai te na kei haohaoa. ʻIkai ngata aí, naʻá na hoko ai ko e fili ʻo e ʻOtuá koeʻuhí ʻokú ne fehiʻa ʻi he fulikivanú. Ko hono fofongá ʻoku ‘maonioni fau, bea ikai ai te ne faa afio ki he koví.’ (Hap. 1:13, PM) Kapau naʻe ʻikai ke fai ʻe Sihova ha meʻa fekauʻaki mo e angahala ʻa ʻĀtama mo ʻIví, naʻe mei fakatuʻutāmaki ia ki he lelei ʻa ʻene meʻa fakatupú kotoa. Naʻe mei fifili fakatouʻosi ʻa e kau ʻāngeló mo e faʻahinga ʻo e tangatá pe ʻe kei lava koā ke nau falala ki heʻene leá. Ka ʻoku faitōnunga ʻa Sihova ki heʻene ngaahi tuʻungá tonu; heʻikai ʻaupito te ne maumauʻi ia. (Saame 119:142) Neongo naʻe maʻu ʻe ʻĀtama mo ʻIvi ʻa e tauʻatāina ke filí, naʻe ʻikai lava ke na kalofi ʻa e ngaahi nunuʻa ʻo e angatuʻu kia Sihová. Naʻe faifai atu pē ʻo na mate peá na foki ki he efú ʻa ia naʻe ngaohi kinaua mei aí.—Sēn. 3:19.

12. Ko e hā naʻe hoko ki he fānau ʻa ʻĀtamá?

¹² ʻI hono kai ʻe ʻĀtama mo ʻIvi ʻa e fuaʻiʻakaú, naʻe ʻikai kei tali kinaua ʻe Sihova ke na hoko ko ha konga ʻo hono fāmilí. Naʻá ne tuli kinaua mei he ngoue ʻo ʻĪtení, pea naʻe ʻikai ʻaupito ke na lava ʻo toe foki ki ai. (Sēn. 3:23, 24) Naʻe ʻai ʻe Sihova ke na fehangahangai mo e ngaahi nunuʻa ʻo e fili naʻá na faí. (Lau ʻa e Teutalōnome 32:4, 5.) Ko hono olá, naʻe ʻikai ai kei lava ke na faʻifaʻitaki haohaoa ki he ngaahi ʻulungaanga ʻo Sihová. Naʻe mole meia ʻĀtama ha kahaʻu fakaofo ʻo ʻikai ngata pē ʻiate ia kae toe pehē foki ki heʻene fānaú. Naʻe lava ke ne ʻoange pē ki heʻene fānaú ʻa e taʻehaohaoá, angahalá, pea mo e maté. (Loma 5:12) Naʻe toʻo ʻe ʻĀtama meiate kinautolu ʻa e faingamālie ke moʻui taʻengatá. Naʻe ʻikai lava ke maʻu ʻe ʻĀtama mo ʻIvi ha tama haohaoa, pea naʻe ʻikai lava ke maʻu ʻe heʻena fānaú ha fānau haohaoa. Talu mei hono fakatafokiʻi ʻe Sētane ʻa ʻĀtama mo ʻIvi mei he ʻOtuá mo e feinga ʻa e Tēvoló ke ne tākiekina ʻa e faʻahinga kotoa ʻo e tangatá ke nau fai ʻa e meʻa tatau.—Sione 8:44.

13. Ko e hā ʻoku fiemaʻu ʻe Sihova maʻá e faʻahinga ʻo e tangatá?

¹³ ʻOku kei ʻofa pē ʻa Sihova ʻi he faʻahinga ʻo e tangatá. Neongo hono liʻaki ia ʻe ʻĀtama mo ʻIví, naʻá ne kei finangalo pē ki he faʻahinga ʻo e tangatá ke nau maʻu ha vahaʻangatae lelei mo ia. Pea naʻe ʻikai te ne loto ke mate ha taha ʻo kinautolu. (2 Pita 3:9) Ko ia ai, naʻe fai leva ʻe he ʻOtuá ha ngaahi fokotuʻutuʻu koeʻuhí ke lava ʻo toe kaumeʻa mo ia ʻa e faʻahinga ʻo e tangatá. Naʻe lava fēfē ke ne fai eni ʻo ʻikai ke fepaki mo ʻene ngaahi tuʻungá? Tau sio angé ki aí.

14. (a) Fakatatau ki he Sione 3:16, ko e hā naʻe fai ʻe he ʻOtuá ke fakahaofi ʻa e faʻahinga ʻo e tangatá mei he angahalá mo e maté? (e) Ko e hā ʻa e fehuʻi ʻe lava ke tau talanoa ki ai mo e kakaí?

¹⁴ Lau ʻa e Sione 3:16. Ko e tokolahi ʻo e kakai ʻoku tau fakaafeʻi ki he Fakamanatú ʻoku nau maʻuloto ʻa e veesi ko ení. Ka ʻoku anga-fēfē hono ʻai ʻe he feilaulau ʻa Sīsuú ke malava ʻo maʻu ʻa e moʻui taʻengatá? ʻOku tau maʻu ʻa e faingamālie ke tokoniʻi ʻa e kakaí ke nau mahinoʻi ʻa e tali ki he fehuʻi ko ení ʻi he taimi ʻoku tau fakaafeʻi ai kinautolu ki he Fakamanatú, taimi ʻoku tau ʻi he Fakamanatú ai mo kinautolú, pea mo e taimi te tau ʻaʻahi ai ʻamui kiate kinautolú. Ko e lahi ange ʻenau mahinoʻi ʻa e huhuʻí, ko e lahi ange ia ʻenau ʻiloʻi ʻa e lahi ʻo e ʻofa ʻa Sihova ki he faʻahinga ʻo e tangatá pea mo hono potó. Ko e hā ʻa e ngaahi poini fekauʻaki mo e huhuʻí ʻe lava ke tau vahevahe kiate kinautolú?

15. Naʻe anga-fēfē ʻa e kehe ʻa Sīsū ia meia ʻĀtamá?

¹⁵ Naʻe tokonaki mai ʻe Sihova ha tangata haohaoa ʻa ia naʻe lava ke ne foaki ʻa ʻene moʻuí ko ha huhuʻi. Ko e tangata haohaoa ko iá naʻe pau ke ne mateaki kia Sihova. Naʻe pau ke ne loto-lelei ke foaki ʻa ʻene moʻuí koeʻuhí ko e faʻahinga ʻo e tangatá. (Loma 5:17-19) Naʻe hiki hifo ʻe Sihova ʻa e moʻui ʻa Sīsuú, ʻa ʻene ʻuluaki fakatupú, mei hēvani ki he māmaní. (Sione 1:14) Ko ia naʻe hoko ʻa Sīsū ko ha tangata haohaoa, ʻo hangē pē ko ia naʻe ʻi ai ʻa ʻĀtamá. Ka ʻi he ʻikai hangē ko ʻĀtamá, naʻe muimui ʻa Sīsū ia ki he ngaahi tuʻunga naʻe ʻamanekina ʻe Sihova mei ha tangata haohaoa. Naʻa mo e ʻi he malumalu ʻo e ngaahi ʻahiʻahi kakaha tahá, naʻe ʻikai ʻaupito te ne maumauʻi ʻa e ngaahi lao ʻa e ʻOtuá.

16. Ko e hā ko ha meʻaʻofa mātuʻaki mahuʻinga ai ʻa e huhuʻí?

¹⁶ ʻI he pekia ʻa Sīsū ko ha tangata haohaoá, ʻoku lava ai ke ne fakahaofi ʻa e faʻahinga ʻo e tangatá mei he angahalá mo e maté. Naʻá ne fai kotoa ʻa e meʻa tofu pē ko ia naʻe totonu ke fai ʻe ʻĀtamá. Naʻe hoko ʻa Sīsū ko ha tangata haohaoa, ʻo ne mateaki mo talangofua kakato ki he ʻOtuá. (1 Tīm. 2:6) Naʻá ne pekia maʻatautolu, pea ko ʻene feilaulaú ʻoku ʻoange ai ki he kakai tangata, kakai fefine mo e fānaú kotoa ʻa e faingamālie ke moʻui taʻengata. (Māt. 20:28) Ko e huhuʻí ʻa e kī ʻokú ne fakaava ʻa e matapā ki hono fakahoko ʻa e taumuʻa ʻa e ʻOtuá.—2 Kol. 1:19, 20.

17. Ko e hā ʻoku ʻai ke malava ʻe he huhuʻí?

¹⁷ Naʻe tokonaki mai ʻe Sihova ʻa e huhuʻí ʻi ha mole lahi kiate ia. (1 Pita 1:19) ʻOkú ne fakamahuʻingaʻi lahi kitautolu ʻo ne loto-lelei ai ke tuku mai ʻa hono ʻAlo ʻofaʻangá ke ne pekia maʻatautolu. (1 Sio. 4:9, 10) ʻI ha ʻuhinga, naʻe hoko ai ʻa Sīsū ko ʻetau tamai kae ʻikai ko ʻĀtama. (1 Kol. 15:45) Naʻe ʻai ʻe Sīsū ke tau malava ʻo ʻikai ke moʻui taʻengata pē kae toe hoko ko e fāmili ʻo e ʻOtuá ʻi ha ʻaho. Fakafou ʻi he huhuʻí, ʻe hoko ai ʻa e faʻahinga ʻo e tangatá ʻo haohaoa pea ʻe lava ai ke toe tali kinautolu ʻe Sihova ki hono fāmilí ʻo ʻikai ai te ne maumauʻi ʻa ʻene ngaahi laó tonu. Sioloto atu ki he tuʻunga fakaofo ʻe hokó ʻi he taimi ʻe haohaoa ai ʻa e faʻahinga kotoa ʻoku nau mateaki kia Sihová! Fakaʻosí, ʻe fāʻūtaha ʻa e faʻahinga kotoa ʻi hēvani mo māmaní ko e fāmili pē ʻe taha. Te tau hoko kotoa ai ko e fānau ʻa e ʻOtuá.—Loma 8:21.

18. Ko fē ʻa e taimi ʻe hoko ai ʻa Sihova ko e “ngaahi meʻa kotoa pē ki he tokotaha kotoa pē”?

¹⁸ Neongo naʻe siʻaki ʻe heʻetau ʻuluaki ongo mātuʻá ʻa Sihova, naʻe ʻikai ke tuku ai ʻene ʻofa ki he kakaí, pea naʻá ne tokonaki mai ʻa e huhuʻí. Pea neongo ʻoku tau taʻehaohaoa, heʻikai lava ʻe Sētane ʻo taʻofi kitautolu mei heʻetau mateaki kia Sihová. Fakafou ʻi he huhuʻí, ʻe tokoniʻi ai kitautolu ʻe Sihova ke tau hoko ʻo māʻoniʻoni kakato. Sioloto atu ki he meʻa ʻe hoko ki he moʻuí ʻi he taimi ʻe maʻu ai ʻa e moʻui taʻengatá ʻe he tokotaha kotoa “ʻokú ne ʻiloʻi ʻa e ʻAló pea ngāueʻi ʻa e tui kiate iá”! (Sione 6:40) Ko ʻetau Tamai ʻofa mo potó te ne fakahoko ʻa ʻene taumuʻá pea tokoniʻi ʻa e faʻahinga ʻo e tangatá ke nau hoko ʻo haohaoa. ʻE hoko leva ai ʻa Sihova ko e “ngaahi meʻa kotoa pē ki he tokotaha kotoa pē.”—1 Kol. 15:28.

19. (a) Ko e hā ʻa e meʻa ʻoku totonu ke tau fai ʻi heʻetau houngaʻia ʻi he huhuʻí? (Sio ki he puha “Tau Hanganaki Kumi ki he Faʻahinga Tāú.”) (e) Ko e hā te tau lāulea ki ai ʻi he kupu hono hokó?

¹⁹ Ko ʻetau houngaʻia ki he huhuʻí ʻoku totonu ke ne ueʻi kitautolu ke tau talanoa ki he niʻihi kehé ʻo fekauʻaki mo e meʻaʻofa mahuʻinga taʻehanotatau ko ení. ʻOku fiemaʻu ke ʻiloʻi ʻe he kakaí fakafou ʻi he huhuʻí, ʻoku ʻomai ai ʻe Sihova ʻi he anga-ʻofa ki he faʻahinga kotoa ʻo e tangatá ʻa e faingamālie ke nau moʻui taʻengata. Ka ʻoku fai ʻe he huhuʻí ʻa e meʻa lahi mamaʻo ange ia ai. ʻOkú ne fakaleleiʻi ʻa e ngaahi meʻa naʻe ʻohake ʻe Sētane ʻo tālangaʻi ʻi he ngoue ʻo ʻĪtení. Te tau lāulea ki he founga ʻo ʻene fai ení ʻi he kupu hono hokó.