Ko e Hā ʻOkú Ne Taʻofi Au mei he Papitaisó?

 1. Ko e hā naʻe fakamoleki ʻe ʻĀtama mo ʻIví, pea ko e hā hono olá?

KO HAI ʻokú ke fakakaukau ʻoku totonu ke ne fokotuʻu ʻa e ngaahi tuʻunga ki he leleí mo e koví? ʻI he taimi naʻe kai ai ʻe ʻĀtama mo ʻIvi ʻa e fuaʻiʻakau mei he ʻakau ʻo e ʻilo ʻo e leleí mo e koví, naʻá na ʻomi ai ha pōpoaki māʻalaʻala: Naʻe ʻikai te na falala kia Sihova mo ʻene ngaahi tuʻungá. Naʻá na fokotuʻu pē ʻena ngaahi tuʻunga ki he leleí mo e koví. (Sēn. 3:22) Kae fakakaukau angé ki he meʻa naʻá na fakamolekí. Naʻe mole meiate kinaua ʻena kaumeʻa mo Sihová. Naʻe toe mole meiate kinaua ʻa e faingamālie ke moʻui taʻengatá, peá na toe tuku atu ʻa e angahalá mo e maté ki heʻena fānaú. (Loma 5:12) Ko e fili ʻa ʻĀtama mo ʻIví naʻe taki atu ai ki he faingataʻa.

2-3. (a) Naʻe anga-fēfē fakafeangai ʻa e ʻiunoke ʻItiopeá ʻi he malanga ange ʻa Filipe kiate iá? (e) Ko e hā ʻa e ngaahi tāpuaki ʻoku tau maʻu ʻi heʻetau papitaisó, pea ko e hā ʻa e fehuʻi te tau lāulea ki aí?

² Fakahoa ʻa e anga ʻo e fakafeangai ʻa ʻĀtama mo ʻIví ki he anga ʻo e fakafeangai ʻa e ʻiunoke ʻItiopeá ʻi he malanga ange ʻa Filipe kiate iá. Naʻe houngaʻia lahi ʻa e ʻiunoké ʻi he meʻa naʻe fai ʻe Sihova mo Sīsū maʻaná ʻo ne papitaiso ai pē ʻi he taimi ko iá. (Ngā. 8:34-38) ʻI he taimi ʻoku tau fakatapui ai ki he ʻOtuá pea hangē ko e ʻiunoke ko iá, ʻo papitaisó, ʻoku tau ʻoatu ai ha pōpoaki māʻalaʻala. ʻOku tau fakahaaʻi ai ʻoku tau houngaʻia ʻi he meʻa kuo fai ʻe Sihova mo Sīsū maʻa kitautolú. ʻOku tau toe fakahaaʻi foki ʻoku tau falala kia Sihova pea ʻiloʻi ko ia ʻa e tokotaha ʻoku totonu ke ne fokotuʻu ʻa e tuʻunga ki he leleí mo e koví.

³ Fakakaukau ki he ngaahi tāpuaki ʻoku tau maʻu ʻi heʻetau tauhi kia Sihová! Ko e tāpuaki ʻe taha, ʻe fakafoki mai ʻe Sihova ʻa e ngaahi meʻa kotoa naʻe fakamoleki ʻe ʻĀtama mo ʻIví, ʻo kau ai ʻa e faingamālie ke moʻui taʻengatá. Koeʻuhi ko ʻetau tui kia Sīsū Kalaisí, ʻoku fakamolemoleʻi ai ʻe Sihova ʻetau ngaahi fehālaakí pea ʻomai ha konisēnisi maʻa. (Māt. 20:28; Ngā. 10:43) ʻOku tau toe kau ki he fāmili ʻo e kau sevāniti ʻoku hōifua ki ai ʻa Sihová fakataha mo ha kahaʻu fisifisimuʻa ʻoku toka mei muʻa. (Sione 10:14-16; Loma 8:20, 21) Kae kehe, neongo ʻa e hā mahino ʻa e ngaahi ʻaonga ko ení, ʻoku ʻi ai ʻa e niʻihi kuo nau ʻiloʻi ʻa Sihova ʻoku nau toumoua ke muimui ʻi he faʻifaʻitakiʻanga ʻa e ʻiunoke ʻItiopeá. Ko e hā ʻokú ne taʻofi nai kinautolu mei he hoko ʻo papitaisó? Pea ʻe lava fēfē ke nau ikuʻi ʻa e ngaahi pole ko iá?

4-5. Ko e hā ʻa e pole naʻe fehangahangai mo e kiʻi talavou ko Avery mo e kiʻi finemui ko Hannah?

⁴ ʻIkai ha loto-maʻu. Ko e ongo mātuʻa ʻa Avery ko e ongo Fakamoʻoni ʻa Sihova. Ko ʻene tamaí naʻá ne maʻu ha ongoongo lelei ʻaupito ʻo ha tamai anga-ʻofa mo ha tokotaha mātuʻa lavameʻa. Neongo ia, naʻe toumoua ʻa Avery ke papitaiso. Ko e hā hono ʻuhingá? “Naʻe ʻikai te u fakakaukau te u lava ʻo aʻu ki he tuʻunga lelei ʻoku ʻi ai ʻeku tamaí,” ko ʻene leá ia. Naʻe ʻikai foki ke loto-maʻu ʻa Avery te ne malava ke fakahoko ʻa e ngaahi fatongia te ne maʻu nai ʻi he kahaʻú. “Naʻá ku hohaʻa naʻa kole mai ke u lotu ʻi he ʻao ʻo e kakaí, fai ha malanga pe taki ha kulupu ʻi he ngāue fakamalangá.”

⁵ Ko Hannah, ʻoku taʻu 18, naʻe ʻikai ʻaupito ke ne maʻu ha loto-maʻu. Naʻe ʻohake ia ʻe ha ongo mātuʻa ʻokú na tauhi kia Sihova. Neongo ia, naʻá ne veiveiua pe te ne lava ke moʻuiʻaki ʻa e ngaahi tuʻunga ʻa Sihová. Ko e hā hono ʻuhingá? Naʻá ne fakatupulekina ha fakakaukau taʻepau fekauʻaki mo ia tonu. ʻI he taimi ʻe niʻihi, naʻá ne ongoʻi kovi ʻaupito ʻo ne fakalaveaʻi ʻa ia tonu, ʻa ia naʻe ʻai ai ke toe kovi ange ʻa e tuʻungá. “Naʻe ʻikai ʻaupito ke u tala ki ha taha ʻa e meʻa ne u faí, naʻa mo ʻeku ongo mātuʻá,” ko ʻene leá ia, “peá u sioloto atu heʻikai ʻaupito fiemaʻu au ʻe Sihova koeʻuhi ko e meʻa ne u fai kiate aú.”

 6. Ko e hā naʻá ne taʻofi ʻa Vanessa mei he papitaisó?

⁶ Tākiekina ʻa e kaungāmeʻá. ʻOku pehē ʻe Vanessa, ʻoku taʻu 22, “Naʻe ʻi ai hoku kaumeʻa lelei ʻa ia kuó u ʻiloʻi ʻi he meimei taʻu ʻe hongofulu.” Kae kehe, naʻe ʻikai ke poupouʻi ʻe he kaumeʻa ʻo Vanessa ʻa ʻene taumuʻa ke papitaisó. Naʻe loto-mamahi ʻa Vanessa, peá ne pehē, “Naʻe faingataʻa ke u maʻu ha kaungāmeʻa, pea naʻá ku hohaʻa kapau te u fakangata ʻa e vahaʻangatae ko iá, heʻikai ʻaupito te u toe maʻu haku kaumeʻa ofi.”

 7. Ko e hā naʻe ilifia ki ai ha kiʻi finemui ko Makayla, pea ko e hā hono ʻuhingá?

⁷ Manavahē ki hano fai ha fehālaaki. Ko Makayla naʻá ne taʻu nima ʻi hono tuʻusi hono tuongaʻané. ʻI heʻene tupu haké, naʻá ne sio ki hono uesia ʻe he tōʻonga hono tuongaʻané ʻa ʻene ongo mātuʻá. “Naʻá ku manavahē kapau te u papitaiso,” ko ʻene leá ia, “Te u fai ha fehālaaki, ʻo tuʻusi au, pea toe fakalotomamahiʻi lahi ange ai ʻeku ongo mātuʻá.”

 8. Ko e hā naʻe manavahē ki ai ha kiʻi talavou ko Miles?

⁸ Manavahē ʻi he fakafepakí. Ko e tamai mo e faʻē-ua ʻa Miles naʻá na tauhi kia Sihova, ka naʻe ʻikai ko ha Fakamoʻoni ʻa ʻene faʻeé. ʻOku pehē ʻe Miles, “Naʻá ku nofo mo ʻeku faʻeé ʻi he taʻu ʻe 18, pea naʻá ku manavahē ke tala ange ʻoku ou loto ke papitaiso. Naʻá ku sio ʻi he anga ʻene fakafeangaí ʻi he hoko ʻeku tamaí ko ha Fakamoʻoní. Naʻá ku ilifia naʻá ne fakatupunga ha palopalema kiate au.”

 9. Ko e hā ʻa e meʻa ʻoku ngalingali ʻe hoko ʻi hoʻo ako ki he lahi ʻo e ʻofa mo e kātaki ʻa Sihová?

⁹ Naʻe fili ʻa ʻĀtama mo ʻIvi ke ʻoua te na tauhi kia Sihova koeʻuhí naʻe ʻikai te na fakatupulekina ha ʻofa mālohi kiate ia. Neongo ia, naʻe fakaʻatā ʻe Sihova ke na moʻui fuoloa feʻunga ke maʻu ha fānau pea fokotuʻu ʻena ngaahi tuʻunga pē ʻa kinaua ki hono ʻohake ʻa e fānau ko iá. Ko e ola ʻo e fili ʻa ʻĀtama mo ʻIvi ke tauʻatāina meia Sihová naʻe vave hono ʻai ai ke hā mahino naʻá na fakavalevalé. Naʻe tāmateʻi ʻe hona foha lahi tahá ʻa hono tokoua tonuhiá, pea ʻi he faai atu ʻa e taimí naʻe puleʻi ʻe he anga-fakamālohí mo e siokitá ʻa e fāmili ʻo e tangatá. (Sēn. 4:8; 6:11-13) Kae kehe, naʻe ʻi ai ʻa e founga ʻa Sihova ke fakahaofi ai ʻa e kotoa ʻo e fānau ʻa ʻĀtama mo ʻIvi ʻoku nau loto ke tauhi kiate iá. (Sione 6:38-40, 57, 58) ʻI hoʻo ako lahi ange fekauʻaki mo e lahi ʻo e kātaki mo e ʻofa ʻa Sihová, ko hoʻo ʻofa kiate iá ngalingali ʻe tupulaki. Te ke loto ai ke talitekeʻi ʻa e ʻalunga naʻe fili ʻe ʻĀtama mo ʻIví pea fakatapui kia Sihova.

10. Ko e hā ʻe lava ke tokoni ai ʻa e fakalaulauloto ki he Saame 19:7 ki hoʻo tauhi kia Sihová?

¹⁰ Hokohoko atu ke ako fekauʻaki mo Sihova. Ko e lahi ange hoʻo ako fekauʻaki mo Sihová, ko e lahi ange ia hoʻo loto-maʻu ʻe lava ke ke lavameʻa ʻi hoʻo tauhi kiate iá. Ko Avery, naʻe lave ki ai ki muʻá, ʻokú ne pehē: “Naʻá ku maʻu ʻa e loto-maʻu ʻi he lau mo fakalaulauloto fekauʻaki mo e talaʻofa ʻoku maʻu ʻi he Saame 19:7.” (Lau.) ʻI he sio ʻa Avery ki hono fakahoko ʻe Sihova ʻa e talaʻofa ko iá, naʻe tupu ʻo toe mālohi ange ʻene ʻofa ki he ʻOtuá. Ko e ʻofá ʻoku ʻikai ngata pē ʻene langa hake ʻa e loto-maʻú ka ʻokú ne toe tokoniʻi kitautolu ke tau tokangataha kia Sihova mo e meʻa ʻokú ne fiemaʻú. Ko Hannah, naʻe lave ki ai ki muʻá, ʻokú ne pehē: “Fakafou ʻi heʻeku lau Tohi Tapu mo e ako fakafoʻituituí, naʻá ku ʻiloʻi ai ʻi he taimi ʻoku ou fakamamahiʻi ai aú, ʻoku ou fakamamahiʻi foki ai mo Sihova.” (1 Pita 5:7) Naʻe hoko ʻa Hannah ko ha ‘tokotaha fai ki he folofola ʻa e ʻOtua.’ (Sēm. 1:22) Ko e hā hono olá? ʻOkú ne pehē: “ʻI heʻeku sio ki he ʻaonga kiate au ʻo e talangofua kia Sihová, naʻá ku fakatupulekina ai ha ʻofa mālohi kiate ia. ʻI he taimi ní ʻoku ou fakapapauʻi ʻe tataki maʻu pē au ʻe Sihova ʻi he taimi ʻoku ou fiemaʻu ai ʻene tokoní.” Naʻe malava ke ikuʻi ʻe Hannah ʻene holi mālohi ke fakamamahiʻi ʻa ia tonú. Naʻá ne fakatapui kia Sihova pea papitaiso.

11. Ko e hā naʻe fai ʻe Vanessa ke maʻu ai ha ngaahi kaungāmeʻa leleí, pea ko e hā ʻe lava ke tau ako mei hení?

¹¹ Fili fakapotopoto ho ngaahi kaungāmeʻá. Ko Vanessa, naʻe lave ki ai ki muʻá, naʻe faai atu pē ʻo ne ʻiloʻi ko hono kaumeʻá naʻá ne taʻofi ia mei he tauhi kia Sihová. Ko ia naʻá ne fakangata ʻa e kaungāmeʻa ko iá. Ka naʻe fai ʻe Vanessa ʻa e meʻa lahi ange. Naʻá ne ngāue mālohi ke maʻu ha ngaahi kaungāmeʻa foʻou, ʻi loto ʻi he fakatahaʻangá. ʻOkú ne pehē naʻe tokoniʻi ia ʻe he faʻifaʻitakiʻanga ʻa Noa mo hono fāmilí. “Naʻe takatakaiʻi kinautolu ʻe he kakai naʻe ʻikai te nau ʻofa kia Sihova,” ko ʻene leá ia, “ka naʻa nau feohi lelei pē ʻiate kinautolu.” Hili ʻene papitaisó, naʻá ne hoko ko ha tāimuʻa. ʻOkú ne pehē ʻi he taimí ni, “Kuo tokoni eni kiate au ke maʻu ai ha ngaahi kaungāmeʻa lelei ʻo ʻikai ngata pē ʻi heʻeku fakatahaʻangá kae pehē foki ki he ngaahi fakatahaʻanga kehé.” Te ke lava foki mo koe ʻo maʻu ha ngaahi kaungāmeʻa lelei ʻi hoʻo kau ʻi he lahi taha te ke ala lavá ki he ngāue kuo vaheʻi mai ʻe Sihova ke tau faí.​—Māt. 24:14.

12. Ko e hā ʻa e faʻahinga manavahē naʻe ʻikai maʻu ʻe ʻĀtama mo ʻIví, pea ko e hā hono olá?

¹² Maʻu ha vakai mafamafatatau ki he manavaheé. ʻOku ʻi ai ʻa e faʻahinga manavahē ʻe niʻihi ʻoku lelei kiate kitautolu. Ko e fakatātaá, ʻoku fiemaʻu ke tau maʻu ʻa e manavahē totonu ki hano taʻefakahōifuaʻi ʻa Sihova. (Saame 111:10) Kapau naʻe fakatupulekina ʻe ʻĀtama mo ʻIvi ʻa e faʻahinga manavahē ko iá, naʻe ʻikai nai ke na angatuʻu kia Sihova. Ka naʻá na angatuʻu. Hili ʻena fai peheé, naʻe ʻā hona matá ʻo na lāuʻilo kakato ki heʻena faiangahalá. Ko e meʻa pē naʻe lava ke na tuku atu ki heʻena fānaú ko e angahala mo e mate. Koeʻuhi naʻe lava ke na sio, pe mahinoʻi hona tuʻungá, naʻá na hoko ʻo mā ʻi heʻena telefuá peá na ʻai hona vala.​—Sēn. 3:7, 21.

13-14. (a) ʻI he fehoanaki mo e 1 Pita 3:21, ko e hā ʻoku fiemaʻu ai ke ʻoua te tau mate manavahē ʻi he maté? (e) Ko e hā ʻa e ngaahi ʻuhinga ʻoku tau maʻu ke ʻofa ai kia Sihová?

¹³ Lolotonga ʻoku fiemaʻu ke tau maʻu ʻa e manavahē totonu kia Sihova, ʻoku ʻikai fiemaʻu ia ke tau mate manavahē ʻi he maté. Naʻe ʻai ʻe Sihova ha founga ke tau maʻu ai ʻa e moʻui taʻengatá. Kapau ʻoku tau fai ha angahala kae fakatomala loto-moʻoni, ʻe fakamolemoleʻi ʻe Sihova ʻetau ngaahi fehālaakí. Te ne fakamolemoleʻi kitautolu koeʻuhi ko ʻetau tui ki he feilaulau huhuʻi ʻa hono ʻAló. Ko e founga tefito ʻoku tau fakahāhā ai ʻetau tuí ko ʻetau fakatapui ʻetau moʻuí ki he ʻOtuá pea papitaiso.​—Lau ʻa e 1 Pita 3:21.

¹⁴ ʻOku tau maʻu ʻa e ngaahi ʻuhinga lahi ke ʻofa ai kia Sihova. ʻOku ʻikai ngata pē ʻi heʻene tokonaki mai ʻa e ngaahi meʻa lelei ʻoku tau fiefia ai ʻi he ʻaho taki taha ka ʻokú ne toe akoʻi mai ʻa e moʻoni fekauʻaki mo ia tonu mo ʻene ngaahi taumuʻá. (Sione 8:31, 32) Kuó ne ʻomai mo e fakatahaʻanga Kalisitiané ke ne tataki mo poupouʻi kitautolu. ʻOkú ne tokoni ke fua ʻetau kavengá he taimí ni, pea ʻokú ne ʻomai kiate kitautolu ʻa e ʻamanaki ʻo e moʻui taʻengata ʻi he ngaahi tuʻunga haohaoa ʻi he kahaʻú. (Saame 68:19; Fkh. 21:3, 4) ʻI heʻetau fakalaulauloto ki he lahi ʻo e meʻa kuo ʻosi fai ʻe Sihova ke fakahaaʻi mai ʻaki ʻene ʻofa ʻiate kitautolú, ʻoku tohoakiʻi ai kitautolu ke ʻofa kiate ia. Pea ʻi heʻetau ʻofa kia Sihová, ʻoku tau maʻu ai ha vakai mafamafatatau ki he manavaheé. ʻOku tau manavahē ʻi hono fakalotomamahiʻi ʻa e Tokotaha kuo tau hoko ʻo ʻofa lahi taha aí.

15. Naʻe anga-fēfē hono ikuʻi ʻe Makayla ʻene manavahē ki hano fai ha fehālaakí?

¹⁵ Ko Makayla, naʻe lave ki ai ki muʻá, naʻá ne ikuʻi ʻene manavahē ki hano fai ha fehālaakí ʻi he taimi naʻá ne mahinoʻi ai ʻa e lahi ʻo e fakamolemole ʻa Sihová. “Naʻá ku ʻiloʻi ʻoku tau taʻehaohaoa kotoa pea te tau fai ʻa e ngaahi fehālaaki. Ka naʻá ku toe mahinoʻi ʻoku ʻofa ʻa Sihova ʻiate kitautolu pea te ne fakamolemoleʻi kitautolu ʻo makatuʻunga ʻi he huhuʻí.” Ko ʻene ʻofa kia Sihová naʻá ne ueʻi ia ke ne fakatapui kiate ia pea papitaiso.

16. Naʻe anga-fēfē hono tokoniʻi ʻa Miles ke ikuʻi ʻene manavahē ki he fakafepakí?

¹⁶ Ko Miles, naʻá ne ilifia naʻa fakafepakiʻi ʻe heʻene faʻeé ʻene fili ke papitaisó, naʻá ne kumi tokoni ki ha ʻovasia sēketi. “Naʻá ne tupu hake foki mo ia ʻi ha ʻapi māvahevahe fakalotu,” ko e lau ia ʻa Miles. “Naʻá ne tokoniʻi au ke u fakakaukau ki he meʻa ʻe lava ke u leaʻaki ke fakatuipauʻi ʻeku faʻeé ko ʻeku fili pē ʻaʻaku ke papitaisó pea naʻe ʻikai fakamālohiʻi au ʻe heʻeku tamaí ke fai pehē.” Naʻe ʻikai fiefia ʻa e faʻē ʻa Miles ʻi heʻene filí. Faifai atu pē, naʻá ne hiki mei hono ʻapí, ka naʻá ne pipiki ki heʻene filí. “Ko e ako fekauʻaki mo e ngaahi meʻa lelei kuo fai ʻe Sihova maʻakú naʻe maongo ia ki hoku lotó,” ko ʻene leá ia. “ʻI heʻeku fakakaukau loloto fekauʻaki mo e feilaulau huhuʻi ʻa Sīsuú, naʻá ku ʻiloʻi ai ʻa e lahi ʻo e ʻofa ʻa Sihova ʻiate aú. Ko e fakakaukau ko iá naʻá ne ueʻi au ke u fakatapui kia Sihova pea papitaisó.”

17. Ko e hā ʻa e faingamālie ʻoku tau maʻú?

¹⁷ ʻI he kai ʻe ʻIvi ʻa e fuaʻiʻakau mei he fuʻu ʻakau ʻi ʻĪtení, naʻá ne talitekeʻi ai ʻene Tamaí. ʻI he kau fakataha ʻa ʻĀtama mo iá, naʻá ne fakahaaʻi ai ʻa e ʻikai haʻane houngaʻia ʻi he lelei kotoa naʻe fai ʻe Sihova maʻaná. ʻOku tau maʻu kotoa ʻa e faingamālie ke fakahāhā ʻa e lahi ʻo ʻetau fehiʻa ʻi he fili naʻe fai ʻe ʻĀtama mo ʻIví. ʻI he hoko ʻo papitaisó, ʻoku tau fakahāhā ai kia Sihova ʻoku tau tui ʻokú ne maʻu ʻa e mafai ke fokotuʻu mai ʻa e tuʻunga ki he meʻa ʻoku tonú mo e meʻa ʻoku halá. ʻOku tau fakamoʻoniʻi ai ʻoku tau ʻofa ki heʻetau Tamaí pea falala kiate ia.

18. ʻE lava fēfē ke ke lavameʻa ʻi hoʻo tauhi kia Sihová?

¹⁸ Ko e pole ʻoku tau fehangahangai mo ia ʻi he hili ʻetau papitaisó ko e moʻui ʻi he ʻaho taki taha ʻo fehoanaki mo e ngaahi tuʻunga ʻa Sihová, ʻo ʻikai ko haʻatautolú. Ko e kakai ʻe laui miliona ʻoku nau moʻuiʻaki ʻa e founga ko iá ʻi he taʻu taki taha. ʻE lava ke ke hangē ko kinautolú kapau te ke hokohoko atu ke fakalolotoʻi ʻa hoʻo mahinoʻi ʻa e Folofola ʻa e ʻOtuá, ʻa e Tohi Tapú; feohi tuʻumaʻu mo ho fanga tokouá mo e fanga tuofāfiné; pea vahevahe faivelenga atu ʻa e meʻa kuó ke ako fekauʻaki mo hoʻo Tamai ʻofá. (Hep. 10:24, 25) ʻI hoʻo fai ʻa e ngaahi filí, fanongo ki he faleʻi ʻoku ʻoatu ʻe Sihova kiate koe fakafou ʻi heʻene Folofolá mo ʻene kautahá. (ʻAi. 30:21) Pea ko e meʻa kotoa ʻokú ke faí ʻe lavameʻa.​—Pal. 16:3, 20.

19. Ko e hā ʻoku totonu ke ke hokohoko atu ke fakakaukau ki aí, pea ko e hā hono ʻuhingá?

¹⁹ ʻI hoʻo hokohoko atu ke fakakaukau ki he lahi ʻa hoʻo maʻu ʻaonga mei he tataki ʻa Sihová, ko hoʻo ʻofa kiate iá mo ʻene ngaahi tuʻungá ʻe tupulaki. Pea heʻikai ha meʻa ʻe tuʻuaki atu ʻe Sētane ʻe lava ke ne tohoakiʻi mamaʻo koe mei he tauhi kia Sihová. Sioloto atu kiate koe ʻi he hili ha taʻu ʻe laui afe mei heni. Te ke toe sio mai ai ki hoʻo fili ko eni ke papitaisó ko e fili lelei taha ia naʻe faifai ange peá ke faí!