ʻOkú Ke Fakahaaʻi Koe Tonu ʻOkú Ke Houngaʻia?

ʻI ha ʻapi misinale ʻi ʻafilika hihifo, naʻe nofo ai ʻi ha taimi ha kulī naʻe ui ko teddy. ʻI he taimi naʻe lī atu ai ʻe ha taha ha kiʻi konga kanomate kia teddy, naʻá ne folofua leva ia, ʻo ʻikai toe fakananamu, ʻikai toe lamu. ʻi he hōhō ʻi he lalo laʻā fakatalopikí, naʻá ne tatali ai ki he foʻi maʻanga hono hokó ke lī ange ki ai. ʻI he ʻosi ʻa e kanomaté, naʻá ne tafoki leva ʻo ʻalu.

Naʻe ʻikai ʻaupito fakahāhā ʻe teddy ha kiʻi meʻi houngaʻia ki he meʻa naʻá ne maʻú. naʻe ʻikai ʻamanekina ʻe ha taha ia ke ne fai pehē. Hili iá, ko iá, ko ha kulī pē.

KI HE houngaʻiá, ʻoku tau faʻa ʻamanekina ʻa e meʻa lahi ange mei he kaungā faʻahinga ʻo e tangatá ʻi heʻetau fai ki he fanga manú. ʻOku tau faʻa loto-mamahi. ʻOku faʻa hamusi ʻe he kakai tokolahi ʻa e meʻa ʻoku nau lavá mei he moʻuí pea kumi ki ha meʻa lahi ange. ʻOku ʻikai fakaʻohovale ʻa e meʻá ni foki. Naʻe tomuʻa tala ʻe he Tohitapú ʻi he ngaahi ʻaho fakaʻosí ʻe taʻehoungaʻia ʻa e tangatá.​—2 Timote 3:​1, 2.

Kae kehe, ʻoku ʻi ai ʻa e laumālie kehe ia ʻi he kau sevāniti ʻa e ʻOtuá. ʻOku nau tokanga ki he akonaki ʻa e ʻapositolo ko Paulá, ʻa ia naʻá ne ekinaki ki he kaungātuí: “Mou hoko ko e kau fai fakafetaʻi [“houngaʻia,” NW].”​—Kolose 3:15.

ʻOku Fakahā ʻe Sihova ʻa Ia Tonu ʻOkú Ne Houngaʻia

ʻOku fokotuʻu ʻe Sihova ko e ʻOtuá ʻa e faʻifaʻitakiʻanga haohaoa ʻi hono fakahāhā ʻa e houngaʻiá. Fakakaukau atu ki he anga ʻo ʻene vakai ki heʻene kau sevāniti anga-tonú. Ko Paula, ʻi he malumalu ʻo hono fakamānavaʻí, naʻá ne tohi ki he kau Kalisitiane Hepeluú: “Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu ʻi hoʻomou tokoni ki he kakai lotu, ʻa ia foki ʻoku mou kei fai.”​—Hepelu 6:10.

ʻOku lahi ʻa e ngaahi faʻifaʻitakiʻanga ʻo e houngaʻia ʻa Sihova ki heʻene kau sevāniti anga-tonú. Naʻá ne tāpuakiʻi ʻa ʻĒpalahame ʻaki hono fakatokolahi ʻa ʻene fānau totonú, koeʻuhi ke nau hoko ʻo “tatau mo e ngaahi fetuʻu ʻo e langi, pe ko e ʻoneʻone ʻi he matātahi.” (Senesi 22:17) ʻI he houngaʻia ki he anga-tonu ʻa Siope ʻi he malumalu ʻo e ʻahiʻahí, naʻe ʻikai ngata pē ʻi hono fakafoki ʻe Sihova ʻa e koloa lahi ʻa Siopé ka naʻá ne toe ʻoange “ʻo liunga ua.” (Siope 42:10) Ko e ngaahi feangainga ʻa Sihova mo e tangatá ʻi he laui afeʻi taʻú kotoa kuo fakamoʻoniʻi ai ʻa e moʻoni ʻo e fakamatala: “Ko e ongo foʻi fofonga ʻo e ʻEiki ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.”​—2 Kalonikali 16:9.

Ko e houngaʻia mo e hehema ʻa e ʻOtuá ke fakapaleʻi ʻa e faʻahinga ʻoku nau kumi ke fai hono finangaló ko e ngaahi tafaʻaki tefito ia ʻo hono ʻulungāngá. Ko hono ʻiloʻi ení ʻoku fiemaʻu ia ki he tui faka-Kalisitiané. Naʻe tohi ʻe Paula: “ʻO ka taʻekau ʻa e tui, ʻoku ʻikai momoʻi lava haʻate fakahōifua ia: he ko ia ʻoku ʻunuʻunu ki he ʻOtua, kuo pau ʻoku ne tui . . . te ne hanga ʻo totongi kiate kinautolu ʻoku kumi hākili kiate ia.”​—Hepelu 11:6.

Ka ʻo kapau naʻe fakahāhā ʻe Sihova ha laumālie fefeka mo fakaanga, ʻe fakahalaiaʻi kotoa kitautolu. Naʻe leaʻaki ʻe he tokotaha-tohi-sāmé ʻa e poini ko ení fuoloa he kuohilí: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai?” (Sāme 130:3) ʻOku ʻikai ke taʻehoungaʻia ʻa Sihova pe fakaanga. ʻOkú ne tukulotoa ʻa e faʻahinga ʻoku nau tauhi kiate iá. ʻOkú ne fakahaaʻi ʻa ia tonu ʻokú ne houngaʻia.

Sīsū​—Ko ha Tokotaha Houngaʻia Loloto

ʻI hono tapua haohaoa atu ʻa e ngaahi ʻulungaanga ʻo ʻene Tamai fakahēvaní, naʻe fakahāhaaʻi ʻe Sīsū Kalaisi ʻa ʻene houngaʻia ʻi he ngaahi meʻa naʻe fai ʻe he niʻihi kehé ʻi he tuí. Fakakaukau atu ki he meʻa naʻe hoko ʻi ha taimi ʻi he temipale ʻi Selusalemá: “Pea ʻi heʻene hanga hake [ʻa Sīsuú] naʻa ne sio kiate kinautolu naʻe li ʻenau ngaahi meʻaʻofa ki he seifi, ko e kau koloaʻia. Pea ne sio ki ha fefine uitou masiva ʻoku ne li ai ha ongo kiʻi paʻanga kapa. Pea pehē ʻe ia, ʻOku ou tala moʻoni atu, ko e uitou ni, ʻa siʻi masiva ni, ne hulu atu ʻene li ʻiate kinautolu kotoa pe: he ko kinautolu fulipe naʻa nau li mei he paʻanga hulu ʻo ʻenau koloa ki he fokotuʻunga meʻaʻofa na: ka ka fusimoʻomo ʻa siʻi fefine ni, ka ne li hono kotoa ʻo e meʻa naʻa ne maʻu ke tauhi ʻaki siʻene moʻui.”​—Luke 21:​1-4.

ʻI he vakai mei he tafaʻaki fakapaʻangá, naʻe siʻisiʻi ʻa e meʻaʻofá, tautefito ʻi hono fakahoa ki he meʻaʻofa ʻa e kakai koloaʻiá. Ko e tokolahi taha ʻo e faʻahinga naʻe ʻi aí naʻe ʻikai meimei lava ke nau fakatokangaʻi ia. Ka, naʻe sio ʻa Sīsū ki he uitou ko iá. Naʻá ne ʻiloʻilo ki hono ngaahi tuʻungá. Naʻe sio ʻa Sīsū kiate ia ʻo houngaʻia ʻiate ia.

Ko e toe meʻa ʻe taha naʻe kau ki ai ha fefine koloaʻia, ʻa Mele. ʻI he tokoto atu ʻa Sīsū ʻi ha kai, naʻá ne lingi ha lolo namukakala mātuʻaki totongi mamafa ʻi he vaʻe pea mo e ʻulu ʻo Sīsuú. Naʻe fakaangaʻi ʻe he niʻihi ʻene ngāué, ʻo fakaʻuhinga naʻe mei lava ke fakatau atu ʻa e loló pea ngāueʻaki ʻa e paʻangá ke tokoniʻi ʻa e masivá. Naʻe anga-fēfē ʻa e tali ʻa Sīsuú? Naʻá ne pehē: “Tuku ai pē ʻa e fefine: ko e ha ʻoku mou fakamamahi ai kiate ia? he ko e ngāue lelei ia kuo ne fai kiate au. Pea ko au ē, ʻoku ou tala atu, ʻIlonga ha potu ʻi māmani kātoa ʻe malangaʻaki ki ai ʻa e Kōsipeli, ʻe leaʻaki ai foki ʻa e meʻa ne fai ʻe siʻi fefine ni, ko e fakamanatu kiate ia.”​—Maake 14:​3-6, 9; Sione 12:3.

Naʻe ʻikai fakahāhā ʻe Sīsū ʻa e mamahi ʻo fakaangaʻi ʻa e ʻikai ngāueʻaki ki ha meʻa ʻe taha ʻa e lolo mahuʻingá. Naʻá ne houngaʻia ʻi he fakahāhā nima-homo ʻo e ʻofa mo e tui ʻa Melé. ʻOku lēkooti ʻa e meʻa ko ení ʻi he Tohitapú ko ha fakamanatu ia ʻo ʻene ngāue leleí. Ko e ngaahi fakamatalá ni mo e fakamatala kehe ʻoku fakahaaʻi ai ko Sīsuú ko ha tangata houngaʻia loloto.

Kapau ko ha sevāniti koe ʻa e ʻOtuá, ʻe lava ke ke fakapapauʻi ko Sihova ko e ʻOtuá mo Sīsū Kalaisi fakatouʻosi ʻokú na houngaʻia loloto ʻi hoʻo ngaahi feinga ke poupouʻi ʻa e lotu maʻá. Ko e ʻilo peheé ʻokú ne tohoaki kitautolu kiate kinaua pea ueʻi kitautolu ke faʻifaʻitaki kiate kinaua ʻaki hono fakamoʻoniʻi ʻoku tau houngaʻia.

Laumālie Fakaanga ʻo Sētané

Sai tau vakai angé ki ha faʻifaʻitakiʻanga ʻo e tokotaha ʻoku ʻikai te ne fakahaaʻi ia ʻokú ne houngaʻia​—ʻa Sētane ko e Tēvoló. Ko e ʻikai ha houngaʻia ʻa Sētané ʻoku tokoni ia ki heʻene takimuʻa ʻi ha angatuʻu fakatuʻutāmaki ki he ʻOtuá.

ʻI hono ohi ha laumālie fakaanga ʻo e taʻefiemālie ʻiate iá tonu, naʻe kamata ke tūtuuʻi ia ʻe Sētane ʻi he niʻihi kehé. Fakakaukau atu ki he ngaahi meʻa naʻe hoko ʻi he ngoue ʻo ʻĪtení. Naʻe fakatupu ʻe Sihova ʻa e ʻuluaki tangatá mo e fefiné, ʻo tuku kinaua ʻi ha ngoue fakaepalataisi, peá ne tala ange kiate kinaua: “ʻE lelei ʻaupito hoʻo kai mei he ngahi ʻakau kehekehe ʻo e ngoue.” Ka naʻe ʻi ai pē ha fakangatangata ʻe taha. Naʻe pehē ʻe he ʻOtuá: “Ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.”​—Senesi 2:​16, 17.

Kae kehe, naʻe vave hono poleʻi ʻe Sētane ʻa e falalaʻanga ʻa Sihová. ʻI ha tuʻunga, naʻá ne loto ke ʻai ʻa ʻIvi ke mātuʻaki taʻehoungaʻia ʻia Sihova ke ueʻi ia ke angatuʻu kiate ia, ʻo hangē ko e angatuʻu ʻa Sētané tonu. “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” ko e ʻeke ia ʻa Sētané. (Senesi 3:1) Ko e fakahuʻunga mahinó naʻe taʻofi ʻe he ʻOtuá ʻa e meʻa mahuʻinga meia ʻIvi, ko ha meʻa te ne fakaʻā hono matá pea ʻai ia ke tatau mo e ʻOtuá tonu. ʻI he ʻikai fakahaaʻi ia ʻokú ne houngaʻia ʻi he ngaahi tāpuaki lahi kuo tuku mai ʻe Sihova kiate iá, naʻe kamata ke hoholi ʻa ʻIvi ki he meʻa naʻe tapuí.​—Senesi 3:5, 6.

Ko e ngaahi nunuʻa fakatuʻutāmakí ʻoku ʻilolahia. Neongo naʻe ʻoange kiate ia ʻa e hingoa ko e ʻIví “koeʻuhi ko e faʻe ia ʻa e kakai kotoa pe,” ʻi he ʻuhinga ʻe tahá naʻá ne hoko ai ko e faʻē ʻa e kau mate kotoa pē. Kuo maʻu tukufakaholo meia ʻĀtama ʻe he tangata kotoa pē ʻa e angahala naʻá ne ʻomai ʻa e maté.​—Senesi 3:​20; Loma 5:​12.

Faʻifaʻitaki ki he ʻOtuá mo Kalaisi

Fakakaukau angé ki he faikehekehe ʻi he vahaʻa ʻo Sētane mo Sīsuú. ʻOku fakamatalaʻi ʻa Sētane ko e “tukuaki ʻo hotau kainga, . . . ʻa ia ʻoku ne tukuakiʻi kinautolu ʻi he ʻao ʻo hotau ʻOtua, ʻi he ʻaho mo e po.” (Fakahā 12:10) Ko Sīsuú ʻokú ne “mafai ke fakamoʻui opeope ʻa kinautolu ʻoku haʻu ki he ʻOtua ʻiate ia, ko ʻene moʻui maʻu ai pe ke hufekina kinautolu.”​—Hepelu 7:25.

ʻOku tukuakiʻi ʻe Sētane ʻa e kau sevāniti ʻa e ʻOtuá. ʻOku houngaʻia ʻa Sīsū ʻiate kinautolu pea hūfekina kinautolu. ʻI he tuʻunga ko e kau faʻifaʻitaki kia Kalaisí, ʻoku totonu ke feinga mālohi ʻa e kau Kalisitiané ke sio ki he lelei ʻiate kinautolú, ʻo fehoungaʻiaʻaki mo e femahuʻingaʻiaʻaki. ʻI he fai peheé, ʻoku nau fakahā ai kinautolu ʻoku nau houngaʻia ʻi he tokotaha ʻokú ne fokotuʻu ʻa e faʻifaʻitakiʻanga taupotu ʻi he houngaʻiá, ʻa Sihova ko e ʻOtuá.​—1 Kolinito 11:1.

[Fakatātā ʻi he peesi 17]

Naʻe fakahāhā ʻe Sīsū ʻa e houngaʻia ʻi he ngāue lelei ʻa Melé