ʻOku Fakatokangaʻi ʻe Sihova ʻa e Meʻa ʻOkú Ke Faí?

ʻE FĒFĒ haʻo tali ʻa e fehuʻi ko iá? ʻE pehē ʻe he tokolahi: ‘ʻOku ou tui ʻoku fakatokangaʻi ʻe he ʻOtuá ʻa e ngaahi lavameʻa ʻa e kau tangata hangē ko Mōsese, Kitione, mo Tēvitá, ka ʻoku ou veiveiua pe ʻokú ne mahuʻingaʻia ʻi ha meʻa ʻoku lava ke u fai. ʻOku ʻikai moʻoni ko ha Mōsese, Kitione, pe Tēvita au.’

Ko e moʻoni, ko e kau tangata faitōnunga ʻe niʻihi ʻi he taimi ʻo e Tohitapú naʻa nau fakahoko ʻa e ngaahi ngāue anga-kehe ʻo e tuí. Naʻa nau ‘ikuna ʻa e ngaahi puleʻanga, tapuni ʻa e ngutu ʻo e fanga laioné, tamateʻi ʻa e malohi ʻo e afí, pea hao mei he mata ʻo e heletaá.’ (Hepelu 11:​33, 34) Neongo ia, naʻe fakahāhā ʻe he niʻihi ʻenau tuí ʻi he ngaahi founga ʻoku ʻikai loko mataʻāʻā, pea ʻoku fakapapauʻi mai ʻe he Tohitapú kia kitautolu ʻoku toe fakatokangaʻi ʻe he ʻOtuá mo ʻenau ngaahi ngāue ʻo e tuí. Ke fakatātaaʻi, fakakaukau atu ki he ngaahi fakatātā Fakatohitapu ʻo ha tauhi-sipi, ko ha palōfita mo ha uitou.

Fai ʻe ha Tauhi-Sipi ha Feilaulau

Ko e hā ʻokú ke manatuʻi fekauʻaki mo ʻĒpelí, ʻa e foha hono ua ʻo ʻĀtama mo ʻIví? ʻOkú ke manatuʻi nai naʻá ne mate fakamaʻata, ko ha meʻa ʻa ia ʻoku tokosiʻi ʻa e faʻahinga ʻo kitautolu ʻe ngalingali te tau hokosia. Ka naʻe ʻuluaki fakatokangaʻi ʻe he ʻOtuá ʻa ʻĒpeli ʻi ha ʻuhinga ia ʻe taha.

ʻI he ʻaho ʻe taha, naʻe ʻave ai ʻe ʻĒpeli ʻa e niʻihi ʻo ʻene fanga manu filifili lelei taha ʻi heʻene tākangá ʻo faiʻaki ha feilaulau ki he ʻOtuá. Ko ʻene meʻaʻofá ʻe vakai nai ki ai ʻoku ʻi ha tuʻunga feʻunga pē ʻi he ʻahó ni, ka naʻe fakatokangaʻi ia ʻe Sihova pea fakahāhā ʻa ʻene hōifua ki ai. Kae kehe, naʻe ʻikai ko ia pē. ʻI he meimei taʻu ʻe fā afe ki mui aí, naʻe fakamānavaʻi ai ʻe Sihova ʻa e ʻapositolo ko Paulá ke ne tohi fekauʻaki mo ia ʻi he tohi Hepeluú. Hili ʻa e ngaahi taʻu lahi ʻaupito, naʻe ʻikai ngalo ʻi he ʻOtuá ʻa e kiʻi feilaulau ko iá!​—Hepelu 6:​10; 11:4.

Naʻe anga-fēfē ʻa e fili ʻe ʻĒpeli ʻa e faʻahinga feilaulau ke faí? ʻOku ʻikai ke tala mai ia ʻe he Tohitapú, ka kuo pau pē naʻá ne fakakaukau fakamātoato ki he meʻá. Ko ha tauhi-sipi ia, ko ia ai, ʻoku ʻikai ke taʻeʻamanekina te ne foaki ʻa e niʻihi ʻo ʻene tākangá. Neongo ia, fakatokangaʻi, naʻá ne foaki ʻa ʻene lelei tahá—ʻa e “ngako.” (Senesi 4:4) ʻOku toe malava ke pehē naʻá ne fakalaulauloto ki he ngaahi lea ʻa Sihova ki he ngatá ʻi he ngoue ko ʻĪtení: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15; Fakahā 12:9) Neongo ʻa e ʻikai mahinoʻi ʻa e ʻiloʻanga ʻo e “fefine” mo hono “hako,” ʻoku pau pē naʻe ʻiloʻi ʻe ʻĒpeli ko hono ‘laiki ʻa e muivaʻe’ ʻo e hako ʻo e fefiné ʻe kau ki ai ʻa e lingitoto. ʻOku pau naʻá ne ʻiloʻi moʻoni ʻe ʻikai ha meʻa ʻe toe mahuʻinga ange ka ko ha meʻamoʻui ʻoku mānava. Ko e meʻa mahuʻinga tahá, ko e feilaulau naʻá ne foakí naʻe feʻungamālie moʻoni.

ʻI he hangē ko ʻĒpelí, ko e kau Kalisitiane he ʻaho ní ʻoku nau fai ʻa e ngaahi feilaulau ki he ʻOtuá. ʻOku nau foaki, ʻo ʻikai ko e ʻuluaki ʻo e tākangá, ka ko “ha feilaulau fakafetaʻi ki he ʻOtua, ʻa é ko e fua ʻo e loungutu ʻoku takua [“fakahāhā,” NW] hono huafa [ʻo e ʻOtuá].” (Hepelu 13:15) ʻOku fai ʻe hotau ngutú ʻa e takua fakahāhaá ʻi heʻetau vahevahe atu ʻetau tuí ki he niʻihi kehé.

Te ke saiʻia ke fakaleleiʻi ʻa e tuʻunga ʻo hoʻo feilaulaú? Fai leva ha fakakaukau tokanga ki he ngaahi fiemaʻu ʻa e kakai ʻi ho feituʻú. Ko e hā ʻa e ngaahi meʻa ʻoku nau tokanga ki aí? Ngaahi meʻa ʻoku nau mahuʻingaʻia aí? Ko e hā ʻa e ngaahi tafaʻaki ʻo e pōpoaki ʻi he Tohitapú ʻe fakamānako kia kinautolú? Lolotonga ʻa e taimi faifakamoʻoni taki taha, ʻanalaiso ʻa e ngaahi ʻaʻahi kuó ke faí fakataha mo e vakai atu ke fakaleleiʻi ʻa hoʻo lavameʻá. Pea ʻi he taimi ʻokú ke lea ai fekauʻaki mo Sihová, fai ia fakataha mo e tuipau, mei he lotó. ʻAi hoʻo feilaulaú ko ha “feilaulau fakafetaʻi” moʻoni.

Malanga ha Palōfita ki he Ngaahi Kaungāʻapi Ongongataʻa

Fakakaukau atu he taimí ni ki he palōfita ko ʻĪnoké. Naʻá ne tokotaha fakaʻaufuli nai ʻi he tuʻunga ko ha fakamoʻoni ʻa Sihova ko e ʻOtuá. ʻOkú ke hangē ko ʻĪnoké, ko e mēmipa pē ʻe taha ʻi ho fāmilí ʻa ia ʻoku tauhi faitōnunga kia Sihová? Ko e tokotaha ako pē koe ʻe tokotaha ʻi hoʻo kalasí pe tokotaha ngāue pē ʻe tokotaha ʻi ho feituʻu ngāueʻangá ʻoku pipiki ki he ngaahi tefitoʻi moʻoni faka-Tohitapú? Kapau ko ia, te ke fehangahangai nai mo e ngaahi pole. ʻE fakaʻaiʻai nai koe ʻe ho ngaahi kaumeʻá, kāingá, kaungākalasí, pe kaungāngāué ke ke talangataʻa ki he ngaahi lao ʻa e ʻOtuá. “ʻE ʻikai teitei ʻilo ʻe ha taha ia ʻa e meʻa kuó ke faí,” ko ʻenau leá nai ia. “Heʻikai te mau tala ʻe mautolu.” Te nau vilitaki mai nai ʻoku fakavalevale ke hohaʻa fekauʻaki mo e ngaahi tuʻunga fakaeʻulungaanga ʻa e Tohitapú koeʻuhi ʻoku ʻikai ke tokanga mai ʻa e ʻOtuá ia ki he meʻa ʻokú ke faí. ʻI he ʻita ʻi he ʻikai te ke fakakaukau mo ngāue ʻo hangē ko kinautolú, te nau fai nai ʻa e meʻa kotoa pē ʻi honau mālohí ke fakavaivaiʻi ʻa hoʻo talitekeʻí.

ʻOku hā mahino, ʻoku ʻikai faingofua ke fehangahangai mo e tenge peheé, ka ʻoku ʻikai ke taʻemalava ia. Fakakaukau fekauʻaki mo ʻĪnoke, ko e tangata hono fitu mei he laine ʻo ʻĀtamá. (Siutasi 14) ʻI he taimi naʻe fāʻeleʻi ai ʻa ʻĪnoké, ko e tokolahi taha ʻo e kakaí naʻa nau liʻaki ʻa e tuʻunga fakaeʻulungaanga lelei kotoa pē. Ko ʻenau leá naʻe fakamā; ko honau ʻulungāngá naʻe “fakamamahi.” (Siutasi 15, PM) Naʻa nau ngāue ʻi he founga tatau tofu pē mo ia ʻoku fai ʻe he kakai tokolahi ʻi he ʻaho ní.

Naʻe anga-fēfē ʻa e fekuki mo ia ʻa ʻĪnoké? Ko e tali ki he fehuʻi ko iá ʻoku mahuʻinga ia kia kitautolu he ʻaho ní. Neongo ko ʻĪnoke nai ʻa e tangata pē taha ʻi he māmaní naʻe lotu kia Sihová, naʻe ʻikai moʻoni te ne tokotaha. Naʻe ʻaʻeva ʻa ʻĪnoke mo e ʻOtuá.​—Senesi 5:​22.

Ko hono fakahōifuaʻi ʻa e ʻOtuá ʻa e meʻa tefito ʻi he moʻui ʻa ʻĪnoké. Naʻá ne ʻiloʻi ko e ʻaʻeva mo e ʻOtuá naʻe ʻuhinga ia ki he meʻa lahi ange ʻi he moʻuiʻaki pē ha moʻui maʻa mo ʻulungaanga tāú. Naʻe ʻamanekina ia ʻe Sihova ke ne malanga. (Siutasi 14, 15) Naʻe fiemaʻu ke fakatokanga ki he kakaí ko ʻenau ngaahi ngāue fakaʻotuamaté kuo ʻikai ke taʻefakatokangaʻi. Naʻe hokohoko atu ʻa ʻĪnoke ke ʻaʻeva mo e ʻOtuá ʻo laka hake ʻi he taʻu ʻe 300—ʻo lōloa mamaʻo ange ʻi ha meʻa pē kuo kātekina ʻe ha taha ʻo kitautolu. ʻI he aʻu ki heʻene maté, naʻá ne hokohoko ʻaʻeva ai pē mo e ʻOtuá.​—Senesi 5:​23, 24.

ʻI he hangē ko ʻĪnoké, ko kitautolu foki kuo fekauʻi ke malanga. (Mātiu 24:14) Tānaki atu ki he faifakamoʻoni mei he fale-ki-he-falé, ʻoku tau feinga ke aʻu mo e ongoongo leleí ki he ngaahi kāingá, ngaahi maheni fakapisinisí, mo e kaungākalasí. Neongo ia, ʻi he taimi ʻe niʻihi, ʻoku tau toumoua nai ai ke lea loto-toʻa. Ko e tuʻunga ia ʻokú ke ʻi aí? ʻOua ʻe siva ʻa e ʻamanakí. Faʻifaʻitaki ki he muʻaki kau Kalisitiané, pea lotu ki he ʻOtuá ki ha loto-toʻa. (Ngāue 4:​29) ʻOua ʻaupito ʻe ngalo ʻi hoʻo kei ʻaʻeva mo e ʻOtuá, ʻoku ʻikai ʻaupito moʻoni te ke tokotaha.

Teuteu ʻe ha Uitou ha Meʻakai

Fakaʻuta atu, ki hono maʻu ʻe ha uitou ʻoku ʻikai tala mai hono hingoá ʻa e ongo tāpuaki koeʻuhi ko ʻene teuteu ha kiʻi meʻakai! Naʻe ʻikai ko ha ʻIsileli ia, ka ko ha muli ʻa ia naʻe moʻui ʻi he senituli hono hongofulu K.M. ʻi he kolo ko Salepitá. ʻI he ofi ki he ngataʻanga ʻo ha vahaʻa taimi fuoloa ʻo e laʻalaʻā mo e honge, naʻe mei ʻosi ai ʻa e tokonaki meʻakai ʻa e uitoú. Ko ʻene meʻa pē naʻe toé ko ha falukunga mahoaʻa mo e meʻi lolo feʻunga ke ngaohiʻaki ha kai fakaʻosi ʻe taha maʻana mo ʻene tamá.

ʻI he tuʻunga ko ení, naʻe fakaofiofi atu ai ha tokotaha ʻaʻahi. Ko e palōfita ia ʻa e ʻOtuá ko ʻIlaisiaá, ʻa ia naʻá ne kole ke ʻinasi ʻi ha konga ʻo e kiʻi meʻakai ʻa e uitoú. Naʻe ʻikai meimei feʻunga ia kiate ia mo ʻene tamá, pea ko e moʻoni naʻe ʻikai haʻane meʻa ke ʻave maʻá e tokotaha ʻaʻahí. Ka naʻe fakapapauʻi ange kiate ia ʻe ʻIlaisiā, ʻi he folofola ʻa Sihová, kapau te ne vahevahe ange ʻene meʻakaí kiate ia, ko ia mo ʻene tamá ʻe ʻikai te na fiekaia. Naʻe fiemaʻu ʻa e tui ke tui ai ʻe fakatokangaʻi ia ʻe he ʻOtua ʻo ʻIsilelí, ko ha uitou muli. Neongo ia, naʻá ne tui kia ʻIlaisiā, pea naʻe fakapaleʻi ia ʻe Sihova. “Naʻe ʻikai mamoli ʻa e puha mahoaʻa, pea naʻe ʻikai matuku ʻa e hina lolo, ʻo hange ko e folofola ʻa Sihova naʻa ne fakafai ʻia Ilaisia.” Naʻe maʻu ʻe he fefiné mo ʻene tamá ha tokonaki meʻakai tuʻumaʻu ʻo aʻu ki he ʻosi ʻa e hongé.—1 Tuʻi 17:​8-16.

Kae kehe, naʻe tatali mai ha toe tāpuaki ʻe taha ki he uitoú. ʻI ha taimi hili ʻa e mana ko iá, naʻe hoko ai ʻo puke lahi ʻa ʻene tama ʻofeiná peá ne mate. ʻI hono ueʻi ia ʻe he fakaʻofaʻiá, naʻe kōlenga ai ʻa ʻIlaisiā kia Sihova ke fakafoki mai ʻa e moʻui ʻa e tamasiʻí. (1 Tuʻi 17:​17-​24) Naʻe fiemaʻu ʻi he meʻa ko iá ha mana ne teʻeki ai hoko ki muʻa. ʻOku ʻikai ha lēkooti ʻo ha taha ne fokotuʻu mei he maté ki muʻa ai! ʻE toe fakahaaʻi ʻe Sihova ʻa e meesi ki he uitou muli ko ení? Naʻá ne fai ia. Naʻe fakaivia ʻe Sihova ʻa ʻIlaisiā ke ne fakafoki ke moʻui ʻa e tamasiʻí. Naʻe fakamatala ʻa Sīsū ki mui ʻo fekauʻaki mo e fefine monūʻia ko ení: “Naʻe tokolahi ʻa e kau fefine Isileli naʻe uitou . . . ka . . . naʻe kouna ʻa Ilaisia . . . ki ha fefine uitou pe ʻi Salepita, ʻi he fonua ʻo Saitoni.”—Luke 4:​25, 26.

Ko e tuʻunga fakaʻekonōmika he ʻaho ní ʻoku ʻikai ʻaupito tuʻumaʻu, naʻa mo e ʻi he ngaahi fonua fakalakalaká. Kuo fakanofo ʻe he ngaahi kautaha lalahi ʻa e kau ngāue kuo nau hoko ko e kau ngāue mateaki ʻi he laui hongofuluʻi taʻu. ʻI he fehangahangai mo e ʻamanaki ki he taʻemaʻu ngāué, ʻe fakataueleʻi nai ai ha Kalisitiane ke ne fakamoleki ʻa e taimi tōtuʻa ʻi he ngāué, ʻi he ʻamanaki ʻe kei ngāueʻaki ia ʻe heʻene kautahá. Ko hono fai iá ʻe tuku nai ai kiate ia ʻa e taimi siʻisiʻi ke maʻu ʻa e ngaahi fakataha faka-Kalisitiané, ke kau ʻi he malaʻe fakafaifekaú, pe ke tokangaʻi ʻa e ngaahi fiemaʻu fakaeongo mo fakalaumālie ʻa hono fāmilí. Kae kehe, ʻokú ne ongoʻi kuo pau ke ne tauhi ʻa e ngāue ko iá ʻo tatau ai pē pe ko e hā ʻa e meʻa ʻe hokó.

Ko ha Kalisitiane ʻi ha tuʻunga faingataʻa fakaʻekonōmika pehē ʻoku ʻi ai ʻene totonu ke hohaʻa. ʻOku faingataʻa ke maʻu ha ngāue ʻi he ngaahi ʻahó ni. Ko e tokolahi taha ʻo kitautolú ʻoku ʻikai te tau feinga ke hoko ʻo koloaʻia, ka ʻi he hangē ko e uitou ʻo Salepitá, ʻoku tau loto ke maʻu ʻa e meʻa ʻoku fiemaʻu ki he moʻuí. Kae kehe, ʻoku fakamanatu mai ʻe he ʻapositolo ko Paulá kia kitautolu ʻoku folofola mai ʻa e ʻOtuá: “ʻE ʻikai siʻi te u mahuʻi meiate koe.” ʻOku lava ke tau lea ʻi he tuipau: “Ko e ʻEiki ko hoku tokoni; ʻe ʻikai te u manavahe: ko e ha tū ha meʻa ʻe fai kiate au ʻe ha tangata?” (Hepelu 13:​5, 6) Naʻe falala tonu ʻa Paula ki he talaʻofa ko iá, pea naʻe tokangaʻi maʻu pē ia ʻe Sihova. ʻE fai ʻe he ʻOtuá ʻa e meʻa tatau maʻatautolu kapau ʻe ʻikai te tau liʻaki ia.

Te tau ongoʻi nai ʻe ʻikai lava ke tau tatau mo e ngaahi ngāue ʻa e faʻahinga tāutaha fakalaumālie hangē ko Mōsese, Kitione, mo Tēvitá, ka ʻe lava ke tau faʻifaʻitaki ki heʻenau tuí. Pea ʻe lava ke tau manatuʻi ʻa e ngaahi ngāue faingofua ʻo e tuí naʻe fakahoko ʻe ʻĒpeli, ʻĪnoke, pea mo e uitou ʻo Salepitá. ʻOku mahuʻingaʻia ʻa Sihova ʻi he ngaahi ngāue kotoa ʻo e tuí—naʻa mo e fanga kiʻi ngāue īkí. ʻI he taimi ʻoku fakafisi ai ha tokotaha ako manavahē-ʻOtua ke tali ha faitoʻo kona tapu mei ha toʻumeʻa, ʻi he taimi ʻoku talitekeʻi ai ʻe ha tokotaha ngāue Kalisitiane ʻa e ngaahi tuʻuaki ʻulungaanga taʻetaau ʻi he ngāueʻangá, pe ʻi he taimi ʻoku maʻu faitōnunga ai ʻe ha tokotaha Fakamoʻoni taʻumotuʻa ʻa e ngaahi fakataha ʻa e fakatahaʻangá neongo ʻa e ongosiá mo e mahamahakí, ʻoku ʻafioʻi ia ʻe Sihova. Pea ʻokú ne fiefia!​—Palovepi 27:11.

ʻOkú Ke Fakatokangaʻi ʻa e Meʻa ʻOku Fai ʻe he Niʻihi Kehé?

ʻIo, ʻoku fakatokangaʻi ʻe Sihova ʻa e meʻa ʻoku tau faí. Ko ia ai, ʻi he tuʻunga ko e kau faʻifaʻitaki ki he ʻOtuá, ʻoku totonu ke tau tokanga ke ʻiloʻi ʻa e ngaahi feinga ʻa e niʻihi kehé. (Efeso 4:32e [Efeso 5:1, PM]) Ko e hā ʻoku ʻikai te ke sio ofi ange ai ki he ngaahi pole ʻoku fehangahangai mo ho kaungā Kalisitiané koeʻuhi ke nau maʻu ʻa e ngaahi fakataha ʻa e fakatahaʻangá, ke kau ʻi he malaʻe fakafaifekaú, naʻa mo ʻenau fakahoko ʻenau ngaahi ngāue fakaʻahó?

Tuku leva ke ʻiloʻi ʻe ho kaungālotu kia Sihová ʻokú ke houngaʻia ʻi heʻenau ngaahi feingá. Te nau fiefia ʻi hoʻo fakatokangaʻí, pea ko hoʻo tokangá ʻe hoko nai ʻo toe fakapapauʻi ai kia kinautolu ʻoku toe fakatokangaʻi foki mo ia ʻe Sihova.