“Naʻá Ne Fakahōifuaʻi Lelei ʻa e ʻOtuá”

NAʻE moʻui ʻa ʻĪnoke ʻi ha vahaʻa taimi fuoloa. ʻE faingataʻa nai ke tau fakakaukau atu ki ai, ka ko e moʻui ʻa e tangata ko ení naʻe lōloa ʻo feʻunga mo ha taʻu ʻe 365 nai—ʻo lōloa ange ia ʻi he liunga fā ʻo e moʻui ʻi he lolotonga ní! Ka naʻe anga-maheni pē ia ʻi he vakai ʻa e kakai ʻi hono taimí. ʻI he taimi ko iá, laka hake ʻi he senituli ʻe 50 kuohilí, naʻe moʻui fuoloa ange ʻa e kakaí ʻi he kakai ʻo e ʻaho ní. Ko ʻĀtama ʻa e ʻuluaki tangatá, naʻe moʻui ʻo laka hake ʻi he taʻu ʻe ono ngeau ʻi he taimi naʻe fāʻeleʻi ai ʻa ʻĪnoké, pea toe moʻui atu ʻa ʻĀtama ʻi ha toe senituli ʻe tolu! Ko e niʻihi ʻi he hako ʻo ʻĀtamá naʻa nau toe moʻui ʻo fuoloa ange ʻi ai. Ko ia ʻi he taʻu 365 ʻa ʻĪnoké naʻá ne kei longomoʻui pē ʻo hangē ko ha tangata ʻoku kei toe lahi ange hono taʻu ke moʻui aí. Neongo ia, naʻe ʻikai ke hoko eni.

Ngalingali ko ʻĪnoké naʻá ne ʻi he tuʻunga fakatuʻutāmaki. Sioloto atu kiate ia ʻokú ne hola, ʻo ʻikai malava ke toʻo mei heʻene fakakaukaú ʻa e fakafeangai ʻa e kakai naʻá ne toki vahevahe ki ai ʻa e pōpoaki mei he ʻOtuá. Naʻe hā mei honau matá ʻenau fehiʻa kiate iá. Naʻa nau taʻetokaʻi ʻene pōpoakí, pea nau fehiʻa ki he ʻOtua naʻá ne fekauʻi iá. Naʻe ʻikai malava ke nau ʻohofi ʻa e ʻOtua ʻo ʻĪnoké ʻa Sihova, ka naʻe malava ke nau ʻohofi ʻa e tangata ko ení! Naʻe fifili nai ʻa ʻĪnoke pe ʻe toe fetaulaki koā mo hono fāmilí. Naʻá ne fakakaukau ki hono uaifí mo hono ngaahi ʻofefiné pe ko hono fohá ʻa Mētuisela pe ko hono mokopuna ko Lēmekí? (Sēnesi 5:21-23, 25) Ko e ngataʻangá nai eni?

Kae kehe ko ʻĪnoke ʻoku ʻikai ke lahi ha fakamatala kiate ia ʻa e Tohi Tapú. Ko e ngaahi konga Tohi Tapu nounou pē ʻe tolu ʻoku talanoa ʻo fekauʻaki mo ia. (Sēnesi 5:21-24; Hepelū 11:5; Sute 14, 15) Neongo ia ʻoku ʻomai ʻi he ngaahi veesi ko ení ʻa e fakamatala feʻunga ki ha tangata naʻe lahi ʻene tuí. ʻOkú ke tokonaki maʻa ho fāmilí? Kuó ke fehangahangai mo ha faingataʻa ke tuʻu ki he meʻa ʻokú ke ʻiloʻi ʻoku moʻoní? Kapau ko ia, te ke ako nai ha meʻa lahi mei he tui ʻa ʻĪnoké.

Ko e faʻahinga ʻo e tangatá naʻa nau ʻi ha ʻalunga kovi ʻi he taimi naʻe moʻui ai ʻa ʻĪnoké. Ko e toʻutangata ia hono fitu ʻi he laine ʻo ʻĀtamá. Ko e faʻahinga ko eni ʻo e tangatá naʻa nau kiʻi ofi ange kinautolu ki he haohaoa fakaesino naʻe maʻu ʻe ʻĀtama mo ʻIví ʻa ē naʻe molé. Ko e ʻuhinga ia naʻe kei moʻui fuoloa ai ʻa e kakaí. Neongo ia, naʻa nau kei ʻi ha tuʻunga kovi fakaeʻulungaanga mo fakalaumālie. Naʻe kei mafolalahia pē ʻa e fakamālohí. Ko e hehema ko ení naʻe kamata ia ʻi he toʻutangata hono ua hili hono tāmateʻi ʻe Keini hono tokoua ko ʻĒpelí. Ko ha taha ʻi he hako ʻo Keiní naʻe hā ngali naʻá ne laukauʻaki ʻene fakamālohi mo faisāuni ange ʻia Keiní! ʻI he toʻutangata hono tolú, naʻe toe hoko ha founga kovi kehe. Naʻe kamata ke ui ʻa e kakaí ki he huafa ʻo Sihová, kae ʻikai ke fai ia ʻi he founga fakaʻapaʻapa ʻo e lotú. Naʻe kamata ke nau takuanoa ʻa e huafa toputapu ʻo e ʻOtuá ʻi ha founga taʻefakaʻapaʻapa.—Sēnesi 4:8, 23-26.

Ko e founga lotu fakameleʻi ko ení naʻe anga-maheni ia ʻi he taimi ʻo ʻĪnoké. ʻI he tupu hake ʻa ʻĪnoké naʻá ne fehangahangai mo ha fili ke fai. ʻE kau mo e faʻahinga tokolahi ʻi hono ʻahó? Pe ʻe kumi ki he ʻOtua moʻoní ʻa Sihova, naʻá ne ngaohi ʻa e langí mo e māmaní? Kuo pau pē naʻe ueʻi loloto ia ʻi heʻene ako fekauʻaki mo ʻĒpeli ʻa ia naʻá ne mate fakamāʻata koeʻuhi ko ʻene lotu ʻi he founga naʻe fakahōifua kia Sihová. Naʻe fakakaukau ʻa ʻĪnoke ke ne fai ʻa e meʻa tatau. ʻOku tala mai ʻe he Sēnesi 5:22: “Pea takaua ʻa Inoke mo e ʻOtua.” Ko e fakamatala ko ení ʻokú ne fakahaaʻi ai ʻa ʻĪnoke ko ha tangata anga-fakaʻotua ʻi ha māmani anga-taʻefakaʻotua. Ko e ʻuluaki tangata ia ʻoku fakamatalaʻi ʻe he Tohi Tapú ʻi he foungá ni.

Ko e veesi Tohi Tapu tatau pē eni naʻe pehē ai ko ʻĪnoké naʻá ne hokohoko atu ʻene takua mo Sihová hili e fanauʻi hono foha ko Mētuiselá. ʻOku tau sio heni naʻe maʻu fāmili ʻa ʻĪnoke ʻi hono taʻu 65 nai. Naʻe ʻi ai hono uaifi mo hono “ngaahi foha mo ha ngaahi ʻofefine” ʻoku ʻikai hā honau hingoá pe tokolahí ʻi he Tohi Tapú. Kapau ʻoku ʻi ai ha tamai ke takaua mo e ʻOtuá lolotonga ʻa e tauhi mo e tokonaki maʻa hono fāmilí, kuo pau ke feinga ke tokangaʻi hono fāmilí ʻi he founga ʻa e ʻOtuá. Naʻe mahinoʻi ʻe ʻĪnoke ʻoku ʻamanekina ʻe Sihova meiate ia ke tauhi faitōnunga ki hono uaifí. (Sēnesi 2:24) Pea naʻá ne fakapapauʻi ke fai hono lelei tahá ʻi hono fakahinohinoʻi ʻene fānaú fekauʻaki mo Sihova ko e ʻOtuá. Ko e hā ʻa e olá?

Ko e lēkooti kuo fakamānavaʻí ʻoku ʻikai ke ne ʻomai ha fakaikiiki lahi ʻi he tuʻungá ni. ʻOku ʻikai ke ne leaʻaki ha meʻa ʻo fekauʻaki mo e tui ʻa e foha ʻo ʻĪnoke ko Mētuiselá, ko e tokotaha moʻui fuoloa taha ia kuo lēkooti ʻi he Tohi Tapú, ʻo ngata ʻi he taʻu naʻe tō mai ai ʻa e fuʻu Lōmakí. Kae kehe, naʻe maʻu ʻe Mētuisela ha foha ko hono hingoá ko Lēmeki. Naʻe moʻui ʻa Lēmeki ʻoku kei moʻui pē ʻene kui tangata ko ʻĪnoké ʻo laka hake ʻi ha senituli. Pea naʻe tupu hake ʻa Lēmeki ʻo fakahāhā ʻa e tui. Naʻe fakamānavaʻi ʻe Sihova ia ke ne tala ʻa e kikite fekauʻaki mo Noa, ko e foha ʻo Lēmekí, pea naʻe hoko moʻoni ʻa e kikite ko iá ʻi he hili ʻa e Lōmakí. Naʻe hangē ʻa Noa ko ʻene kui-ua ko ʻĪnoké, naʻe ʻiloa ko e tangata naʻe takaua mo e ʻOtuá. Naʻe teʻeki ai ke fetaulaki ʻa Noa mo ʻĪnoke. Ka naʻe tuku ʻe ʻĪnoke ha tofiʻa mahuʻinga. Naʻe lava ke ʻilo ʻe Noa ko e tofiʻa eni mei heʻene tamaí tonu, ʻa Lēmeki, pe mei heʻene kui tangata ko Mētuiselá pe ko Sēleti nai, tamai ʻa ʻĪnoké ʻa ia naʻe mate ʻi he taʻu 366 ʻa Noá.—Sēnesi 5:25-29; 6:9; 9:1.

Fakakaukau ki he faikehekehe ʻo ʻĪnoke mo ʻĀtamá. Neongo naʻe haohaoa ʻa ʻĀtama, ka naʻá ne faiangahala kia Sihova peá ne tuku atu ʻa e tofiʻa ki hono hakó ko e angatuʻu mo e faingataʻaʻia. Ko ʻĪnoke naʻe taʻehaohaoa, ka naʻá ne takaua mo e ʻOtuá peá ne tuku atu ha tofiʻa ki hono hakó ko e tui. Naʻe mate ʻa ʻĀtama ʻi he taʻu 308 ʻa ʻĪnoké. Naʻe mamahi ʻa e fāmili ʻo ʻĀtamá ʻi heʻenau kui siokitá? ʻOku ʻikai ke tau ʻiloʻi. ʻI ha tuʻunga pē, naʻe “takaua ʻa Inoke mo e ʻOtua.”—Sēnesi 5:24.

Kapau ʻokú ke tokonaki ki he fāmilí, fakakaukau ki he meʻa ʻoku lava ke ke ako mei he tui ʻa ʻĪnoké. Neongo ʻoku mahuʻinga ke tokonaki fakamatelie maʻa ho fāmilí, ka ʻoku ʻikai mahuʻinga ange ia ʻi he tokonaki fakalaumālié. (1 Tīmote 5:8) ʻOkú ke fakalato ʻa e fiemaʻu ko iá ʻo ʻikai ngata pē ʻi he meʻa ʻokú ke leaʻakí ka ko e meʻa ʻokú ke faí. Kapau te ke fili ke takaua mo e ʻOtuá ʻo hangē ko ia naʻe fai ʻe ʻĪnoké, tuku ki he tataki fakamānavaʻi ʻa e ʻOtuá ke tataki koe ʻi hoʻo moʻuí, te ke lava mo koe foki ʻo tuku ha tofiʻa mahuʻinga maʻa ho fāmilí—​ko ha faʻifaʻitakiʻanga ʻoku taʻefakatataua ke nau faʻifaʻitaki ki ai.

Naʻe ongoʻi taʻelata nai ʻa ʻĪnoke koeʻuhi ko e tangata ia ʻo e tuí ʻi ha māmani taʻetui. Ka naʻe fakatokangaʻi ia ʻe hono ʻOtua ko Sihová? ʻIo. Naʻe hoko mai ʻa e taimi naʻe fetuʻutaki ai ʻa Sihova mo ʻene sevāniti faitōnunga ko ení. Naʻe ʻoange ʻe Sihova kia ʻĪnoke ha pōpoaki ke tala ki he kakai ʻi hono ʻahó. Naʻá ne ʻai ʻa ʻĪnoke ko ha palōfita, ko e ʻuluaki tokotaha ia ke ne fakahā ʻa e pōpoaki ʻoku ʻi he Tohi Tapú. ʻOku tau ʻiloʻi eni koeʻuhi ko Sute, naʻe faʻē taha mo Sīsū, naʻe fakamānavaʻi ia ke ne hiki ʻa e ngaahi lea fakaekikite ʻa ʻĪnoké ʻi he hili ha ngaahi senituli mei ai.a

Ko e hā ʻa e kikite ʻa ʻĪnoké? ʻOku pehē: “Vakai! Kuo haʻu ʻa Sihova mo ʻene kau ʻāngelo māʻoniʻoni ʻe laui manó, ke fakahoko ʻa e fakamaau ki he tokotaha kotoa, pea ke fakahalaiaʻi ʻa e kau anga-taʻefakaʻotuá kotoa ko e meʻa ʻi he kotoa ʻo ʻenau ngaahi ngāue taʻefakaʻotua naʻa nau fai ʻi ha founga taʻefakaʻotuá, pea pehē ki he kotoa ʻo e ngaahi meʻa fakalilifu naʻe leaʻaki ʻe he kau angahala anga-taʻefakaʻotuá kiate iá.” (Sute 14, 15) ʻI he taimi ko ení te ke fakatokangaʻi nai ko e lea eni ʻa ʻĪnoke ʻi he taimi kuo ʻosi ʻo hangē kuo ʻosi fakahoko ʻe he ʻOtuá ia ʻa e kikite ko ení. Ko e sīpinga eni naʻe muimui ki ai ʻa e ngaahi kikite lahi. Ko e fakakaukaú eni: ʻOku lea ʻa e palōfitá ki ha meʻa ʻoku fakapapauʻi ke hoko ka ʻoku fakamatalaʻi nai ia kuo ʻosi hoko!—ʻAisea 46:10.

Naʻe ongoʻi fēfē ʻa ʻĪnoke ʻi he teu ke ne talaki ʻa e pōpoakí ʻa ia ko e malanga nai ki he faʻahinga kotoa te nau fanongó? Fakatokangaʻi ʻa e mālohi ʻo e fakatokangá—​naʻe tuʻo fā hono ngāueʻaki ʻa e lea “taʻefakaʻotua” ke talatalaakiʻi ʻa e kakaí koeʻuhi ko ʻenau ngaahi ngāué pea mo e founga naʻa nau fakahokoʻaki ʻa e ngaahi ngāue ko iá. Naʻe toe fakatokanga ʻa e kikité ko e kotoa ʻo e faʻahinga ʻo e tangatá kuo fakameleʻi lahi talu mei he kapusi mei ʻĪtení. Ko e māmani ko ení te nau fehangahangai mo ha ngataʻanga taʻengata ʻi he taimi ʻe hoko mai ai ʻa Sihova mo ʻene “kau ʻāngelo māʻoniʻoni ʻe laui manó”—​ko ha kau tau ʻāngelo mālohi​—ʻoku teu ke nau fai ʻa e fakaʻauhá. Naʻe fanongonongo taʻemanavahē ʻe ʻĪnoke ʻa e fakatokanga fakaʻotua ko ení pea naʻá ne fai tokotaha pē ia! Ngalingali naʻe vakai ʻa e kiʻi talavou ko Lēmekí ki he loto-toʻa taʻemanavahē ʻene kui tangatá. Kapau ko ia, ʻoku lava ke tau mahinoʻi lelei ʻa e ʻuhingá.

ʻE ueʻi nai kitautolu ʻe he tui ʻa ʻĪnoké ke tau ʻeke hifo pe ʻoku tau vakai ki he māmani ʻoku tau moʻui aí ʻo tatau mo e vakai ki ai ʻa e ʻOtuá. Ko e fakamaau naʻe talaki loto-toʻa ʻe ʻĪnoké ʻoku kei tuʻu pē; ʻoku kaunga ia ki he māmani hotau ʻaho ní ʻo hangē pē ko ia ʻi he māmani ʻi he ʻaho ʻo ʻĪnoké. ʻI he fehoanaki mo e fakatokanga ʻa ʻĪnoké, naʻe ʻomai ʻe Sihova ʻa e fuʻu Lōmaki ki he māmani taʻefakaʻotua ʻi he ʻaho ʻo Noá. Ka ko e fakaʻauha ko iá ʻokú ne fokotuʻu mai ha sīpinga ʻo ha fakaʻauha lahi ange ʻoku teu ke hoko mai. (Mātiu 24:38, 39; 2 Pita 2:4-6) Ko ia ai, ʻi he ʻahó ni ʻoku tuʻu mateuteu ʻa e ʻOtuá mo ʻene kau ʻāngelo māʻoniʻoni ʻe laui manó ke ʻomai ha fakamaau māʻoniʻoni ki he māmani anga-taʻefakaʻotua ko ení. Ko kitautolu taki taha ʻoku fiemaʻu ke tau tukulotoʻi ʻa e fakatokanga ʻa ʻĪnoké pea vahevahe ia mo e niʻihi kehé. Ko hotau fāmilí mo hotau kaungāmeʻá te nau mavahe nai meiate kitautolu. Te tau ongoʻi liʻekina nai ʻi ha ngaahi taimi. Ka naʻe ʻikai ʻaupito ke liʻekina ʻe Sihova ʻa ʻĪnoke, pea taumaiā te ne liʻaki ʻene kau sevāniti faitōnunga ʻi he ʻaho ní!

Naʻe fēfē ʻa e ngataʻanga ʻo ʻĪnoké? ʻI ha founga, naʻe siʻi ange ʻa e fakamatala ʻo fekauʻaki mo ʻene maté ʻi heʻene moʻuí. ʻOku pehē pē hono fakamatalaʻi ʻia Sēnesí: “Pea takaua ʻa Inoke mo e ʻOtua; pea ʻiloange kuo ʻikai; he naʻe ʻave ia ʻe he ʻOtua.” (Sēnesi 5:24) ʻI he founga fē naʻe ʻave ai ʻe he ʻOtuá ʻa ʻĪnoké? Naʻe fakamatala ki mui ai ʻe he ʻapositolo ko Paulá: “ʻI he tuí naʻe ʻave ai ʻa ʻĪnoke koeʻuhi ke ʻoua te ne sio ʻi he maté, pea naʻe ʻikai ke ne toe ʻiloʻiloa koeʻuhí naʻe ʻave ia ʻe he ʻOtuá; ka ki muʻa ke ʻave iá naʻá ne maʻu ʻa e fakamoʻoni fekauʻaki mo ia naʻá ne fakahōifuaʻi lelei ʻa e ʻOtuá.” (Hepelū 11:5) Ko e hā ʻa e ʻuhinga ʻa Paula ʻi heʻene pehē “ʻave . . . koeʻuhi ke ʻoua te ne sio ʻi he maté”? ʻOku pehē ʻe he ngaahi liliu Tohi Tapu ʻe niʻihi naʻe ʻave ʻe he ʻOtuá ʻa ʻĪnoke ki hēvani. Ka naʻe ʻikai ke pehē. ʻOku fakahaaʻi ʻe he Tohi Tapú ko Sīsū Kalaisi ʻa e ʻuluaki tokotaha naʻe fokotuʻu hake ki hēvaní.—Sione 3:13.

Pea ʻi he founga fē naʻe “ʻave” ai ʻa ʻĪnoke koeʻuhi ke ʻoua te ne toe “sio ʻi he maté”? Ngalingali naʻe ʻave ʻe Sihova ʻa ʻĪnoke ʻi ha founga mei he moʻuí ki he maté, ʻo ʻikai ke ne hokosia ʻa e haʻahaʻa ʻo e maté. Kae ʻuluakí, naʻe maʻu ʻe ʻĪnoke “ʻa e fakamoʻoni fekauʻaki mo ia naʻá ne fakahōifuaʻi lelei ʻa e ʻOtuá.” ʻI he founga fē? Ki muʻa siʻi pē peá ne pekiá, naʻe maʻu nai ʻe ʻĪnoke ha vīsone mei he ʻOtuá, ʻo fakahaaʻi ange nai kiate ia ʻa e māmaní ko ha palataisi. ʻI ha fakamoʻoni māʻalaʻala ʻo e hōifua ʻa Sihová, naʻe mohe ai ʻa ʻĪnoke ʻi he maté. ʻI he tohi fekauʻaki mo ʻĪnoke mo e kau tangata mo e kau fefine faitōnunga kehé, naʻe pehē ʻe he ʻapositolo ko Paulá: “ʻI he tuí ko e faʻahingá ni kotoa naʻa nau mate.” (Hepelū 11:13) Hili iá, naʻe kumi nai ʻe hono ngaahi filí ki hono sinó, ka “naʻe ʻikai ke ne toe ʻiloʻiloa” koeʻuhí naʻe fakapuliki ia ʻe Sihova, ke ʻoua te nau maumauʻi pe ngāueʻaki ia ki he lotu loí.b

ʻI he fakakaukau atu ki he fakaʻuhinga Fakatohitapu ko iá, tau feinga angé ke sioloto atu ki he founga naʻe mate ai ʻa ʻĪnoké. Sioloto atu ki he meʻa ko eni naʻe hokó pea manatuʻi ʻoku ʻikai ko e foungá tofu pē eni. ʻOku hola ʻa ʻĪnoke, pea ʻokú ne helaʻia ʻaupito. ʻOku tulimui atu hono kau fakafepakí ʻi he ʻita lahi koeʻuhi ko e pōpoaki fakaefakamaau naʻá ne talá. Naʻe maʻu ʻe ʻĪnoke ha feituʻu ke toi ai pea mālōlō ʻi ha kiʻi taimi, ka ʻokú ne ʻiloʻi ʻe ʻikai ke ne hao ai pē. ʻOku mātuʻaki ofi mai ʻa e maté. ʻI heʻene mālōloó, naʻá ne lotu ki hono ʻOtuá. Naʻá ne toki maʻu leva ha nonga lahi. ʻOku hā mahino, naʻe hoko moʻoni ʻa e vīsoné ʻo hangē ko e ʻi ai ʻa ʻĪnoké, naʻe ʻave mamaʻo ia.

Fakakaukau atu ki he meʻa naʻá ne mamata ki aí, ʻoku fakahaaʻi ai ha māmani naʻe kehe ʻaupito mei he māmani naʻá ne ʻiloʻí. Naʻe hangē nai kiate ia ko e ngoue fakaʻofoʻofa ʻo ʻĪtení, ka naʻe ʻikai ke ʻi ai ʻa e ongo selupimí ke hanganaki leʻohi ia mei he faʻahinga ʻo e tangatá. Ko e kakai tangatá mo e kakai fefiné—naʻa nau moʻui lelei mo longomoʻui—naʻa nau tokolahi. Naʻe fonu ʻi he melino ʻi honau haʻohaʻongá. Naʻe ʻikai ke toe ʻi ai ha fakaʻilonga ʻo e fehiʻa mo e fakafepaki fakalotu ʻa ē naʻe ʻiloʻi lelei ʻe ʻĪnoké. Ko ʻĪnoke tonu, naʻá ne ongoʻi ʻa e nonga, ʻofa mo e hōifua ʻa Sihová. Naʻá ne tuipau ko e feituʻu eni naʻá ne tuha mo iá; ko hono ʻapí tonu eni. ʻI heʻene ongoʻi nonga angé, naʻe kuikui ai ʻa ʻĪnoke peá ne māʻumohe.

Pea ʻokú ne kei mohe pē ʻo aʻu mai ki hotau ʻahó ni—​mohe ʻi he maté, pea kei ʻi he manatu taʻefakangatangata ʻa Sihova ko e ʻOtuá! Hangē pē ko e talaʻofa ki mui ai ʻa Sīsuú, ʻe ʻi ai ha taimi ko e faʻahinga ʻoku nau ʻi he manatu ʻa e ʻOtuá te nau fanongo ki he leʻo ʻo Kalaisí pea te nau hū mai mei he fonualotó, ʻoku ʻā hake honau matá ʻi ha māmani fakaʻofoʻofa mo melino.—Sione 5:28, 29.

Te ke saiʻia ke ke ʻi ai? Sioloto atu ki he vēkeveke ke fetaulaki mo ʻĪnoké. Fakakaukau ki he ngaahi meʻa lelei ʻoku lava ke tau ako meiate iá! Te ne tala mai nai kiate kitautolu pe naʻe moʻoni ʻa ʻetau sioloto naʻe fai kiate iá. Ka ʻoku ʻi ai ha meʻa ʻoku fuʻu fiemaʻu ke tau ako meiate ia ʻi he taimi ní. Hili ʻa e lāulea kia ʻĪnoké, naʻe hoko atu ʻa Paula: “ʻI he ʻikai kau ʻa e tuí ʻoku ʻikai malava ke fakahōifuaʻi lelei ʻa e ʻOtuá.” (Hepelū 11:6) He ʻuhinga mālohi ē ke tau faʻifaʻitaki ai ki he tui loto-toʻa ʻa ʻĪnoké!