Ngaahi Fehuʻi mei he Kau Lautohí

Naʻe fai ʻe Sihova ʻa ʻene fuakava mo ʻĒpalahamé ʻi ʻUa pe ʻi Hālani?

Ko e muʻaki fakamatala fekauʻaki mo e fuakava ʻa Sihova mo ʻĒpalahamé ʻoku maʻu ia ʻi he Senesi 12:​1-3, ʻa ia ʻoku pehē ai: “Pea folofola ʻa Sihova kia Epalame, ʻo pehe, Hiki ko e mei ho fonua, pea mei ho tupuʻanga, pea mei he fale ʻo hoʻo tamai, ki he fonua te u fakaha kiate koe. Pea te u ngaohi koe ko e puleʻanga lahi . . . pea ʻe monuʻia ʻiate koe ʻa e faʻahinga kotoa pe ʻo e kelekele.”a Naʻe fai moʻoni nai ʻe Sihova ʻa e fuakava ko eni mo ʻĒpalahamé lolotonga ʻa ʻene ʻi ʻUá pea toe fakapapauʻi ia ki mui ʻi he taimi naʻe ʻi Hālani ai ʻa ʻĒpalahamé.

ʻI he ʻuluaki senitulí, naʻe lave ai ʻa Sitīveni ki he fekau ʻa Sihova ke hiki ʻa ʻĒpalahame ki Kēnaní. ʻI heʻene lea ki he Sanetalimí, naʻá ne pehē: “Ko e ʻOtua ʻo e lāngilangí naʻe hā ia ki hotau tupuʻanga ko ʻĒpalahamé lolotonga ʻa ʻene ʻi Mesopotēmiá, ki muʻa ke ne hoko ʻo nofo ʻi Hālaní, pea naʻá ne folofola kiate ia, ‘Hiki mei ho fonuá pea mei ho kāingá pea ʻalu ki he fonua te u fakahā kiate koé.’” (Ngāue 7:​2, 3, NW) Ko ʻĒpalahamé naʻá ne muʻaki ʻi ʻUa, pea hangē ko ia naʻe fakahaaʻi ʻe Sitīvení, ko e feituʻu ia naʻá ne ʻuluaki fanongo ai ki he fekau ke ʻalu ki Kēnaní. (Senesi 15:7; Nehemaia 9:7) Naʻe ʻikai lave ʻa Sitīveni ki he fuakava ʻa e ʻOtuá mo ʻĒpalahamé, ka ʻi he Senesi 12:​1-3, ko e fuakava ko iá ʻoku fakafehokotaki ia ki he fekau ke ʻalu ki Kēnaní. Ko ia ai, ʻoku ʻuhinga lelei ke tui naʻe fai ʻe Sihova ʻa e fuakava mo ʻĒpalahamé ʻi ʻUa.

Kae kehe, ko ha lau fakalelei ʻo e fakamatala ʻi he Senesí ʻoku ʻomai ai ʻa e fakakaukau naʻe toe fakamatalaʻi ʻe Sihova ʻa ʻene fuakavá kia ʻĒpalahame ʻi Hālani, hangē tofu pē ko ʻene toutou fai pea fakaikiiki ʻa e ngaahi tafaʻaki ko iá ʻi ha ngaahi taimi ʻi Kēnani. (Senesi 15:5; 17:​1-5; 18:18; 22:​16-​18) Fakatatau ki he Senesi 11:​31, 32, ko e tamai ʻa ʻĒpalahamé, ʻa Tela, naʻá ne mavahe mei ʻUa ki Kēnani, ʻo ō fakataha mo ʻĒpalahame, Sela, pea mo Lote. Naʻa nau ʻalu ki Hālani ʻo nofo ai ʻo aʻu ki he mate ʻa Telá. Naʻe ʻi Hālani ʻa ʻĒpalahame ʻo lōloa feʻunga ke maʻu ai ha koloa lahi. (Senesi 12:5) Pea ʻi ha tuʻunga, ko Nēhoa, ʻa e tokoua ʻo ʻĒpalahamé, naʻá ne toe hiki mo ia ki ai.

Hili ʻa hono lēkooti ʻa e mate ʻa Telá, ʻoku fakamatala ʻa e Tohitapú ki he folofola ʻa Sihova kia ʻĒpalahamé pea hoko atu ai: “Pea hiki ʻa Epalame, ʻo hange ko e folofola ʻa Sihova kiate ia.” (Senesi 12:4) Ko ia ai, ʻoku ʻomai ʻe he Senesi 11:31–​12:4 ʻa e tākiekina mālohi naʻe folofolaʻaki ʻe Sihova ʻa e ngaahi lea ʻoku hiki ʻi he Senesi 12:​1-3 ʻi he hili ʻa e mate ʻa Telá. Kapau ko ia, naʻe mavahe ʻa ʻĒpalahame mei Hālani pea hiki ki he fonua naʻe fakahaaʻi ange ʻe Sihova ʻi he tali ki ha fekau naʻá ne toki fanongoa, pea pehē foki ki he meʻa ko ia naʻá ne fanongoa ʻi he ngaahi taʻu ki muʻá ʻi ʻUá.

Fakatatau ki he Senesi 12:​1, naʻe fekau ʻe Sihova kia ʻĒpalahame: “Hiki [koe] mei ho fonua, pea mei ho tupuʻanga, pea mei he fale ʻo hoʻo tamai.” ʻI he taimi ʻe taha ko e “fonua” ʻo ʻĒpalahamé ko ʻUa, pea ko e “fale” ʻo ʻene tamaí naʻe ʻi ai. Kae kehe, ko e tamai ʻa ʻĒpalahamé naʻá ne hiki ʻa hono fāmilí ki Hālani, pea naʻe hoko ʻo ui ai ʻe ʻĒpalahame ʻa e feituʻu ko iá ko hono fonua. ʻI he hili ʻa e ngaahi taʻu lahi ʻi Kēnani, ʻi he taimi naʻá ne fekauʻi ai ʻene tokotaha ngāué ki ‘hono fonuá pea ki hono kaingá’ ke kumi ha uaifi moʻo ʻAisaké, naʻe ʻalu ʻa e tokotaha ngāué ki “he kolo ʻo Nehoa” (ʻi Hālani pe ʻi ha feituʻu ofi ai). (Senesi 24:​4, 10) Naʻe maʻu ai ʻe he tokotaha ngāué ʻa Lepeka ʻi he lotolotonga ʻo e ngaahi kāinga ʻo ʻĒpalahamé, ʻa e fuʻu fāmili ʻo Nēhoá.​—Senesi 22:​20-​24; 24:​15, 24, 29; 27:​42, 43.

ʻI heʻene lea ki he Sanetalimí, naʻe pehē ʻe Sitīveni fekauʻaki mo ʻĒpalahame: “Hili ʻa e pekia ʻa ʻene ʻeiki, naʻe hiki ia mei ai ʻe he ʻOtua ki he fonua ko eni, ʻa ia kuo hiki ki ai ʻe kimoutolu foki, ʻo mou nofo ki ai ni.” (Ngāue 7:4) ʻOku fakahaaʻi ʻe he meʻá ni naʻe fetuʻutaki ʻa Sihova mo ʻĒpalahame ʻi Hālani. ʻOku ʻuhinga lelei ke tui ʻi he taimi ko iá naʻe toe folofolaʻaki ai ʻe Sihova ʻa ʻene fuakava mo ʻĒpalahamé hangē ko ia ʻoku līpooti ʻi he Senesi 12:​1-3, koeʻuhi naʻe fakahoko ʻa e fuakavá ʻi he taimi naʻe hiki ai ʻa ʻĒpalahame ki Kēnaní. Ko ia ai, ko ha fakakaukau atu ki he kotoa ʻo e ngaahi moʻoniʻi meʻá ʻoku taki atu ai ki he fakamulitukú naʻe fai moʻoni nai ʻe Sihova ʻa ʻene fuakava mo ʻĒpalahamé ʻi ʻUa pea toe fakapapauʻi ia ʻi Hālani.

[Fakamatala ʻi lalo]