Taau mo ha Puleʻanga

“ʻA ia ko e fakamoʻoni ʻoku ʻi ai ha fakamāu totonu ʻa e ʻOtua, ke faifai pea fakaha ai hoʻomou tāu mo e Puleʻanga ʻo e ʻOtua.”—2 TES. 1:5.

1, 2. Ko e hā e taumuʻa ʻa e ʻOtuá fekauʻaki mo e fakamāú, pea ko hai te ne fakahoko ʻa e fakamaau ko iá?

ʻI HE 50 taʻu nai hotau kuongá, naʻe ʻi ʻAtenisi ai ʻa e ʻapositolo ko Paulá. Naʻe fakahohaʻasi ia ʻi heʻene vakai ki he mafolalahia ʻa e tauhi tamapuá pea naʻe ueʻi ai ia ke ne ʻoatu ha fakamoʻoni mātuʻaki feʻungamālie. Naʻe fakamulituku ʻaki ʻene malangá ha talaki fakahāhā, pau pē naʻe tohoaki ai e tokanga ʻa ʻene kau fanongó ʻa ia ko e kau pangani. Naʻá ne pehē ai: “Ka oku ne fekau eni ki he kakai kotoabe, i he botu kotoabe, ke nau fakatomala: Koeuhi kuo ne kotofa ae aho, te ne fakamāu maonioni ai a mamani, i he tagata kuo ne fakanofo; bea kuo ne fakababau ia ki he kakai kotoabe, i he ene fokotuu ia mei he bekia.”—Ng. 17:30, 31, PM.

² He meʻa fakatupu-fakakaukau fakamātoato moʻoni kuo ʻosi kotofa ʻe he ʻOtuá ha ʻaho fakamaau maʻá e faʻahinga ʻo e tangatá ki he kahaʻú! ʻE fakahoko ʻa e fakamaau ko iá ʻe he tokotaha ʻa ia naʻe ʻikai lave ʻa Paula ki hono hingoá ʻi heʻene malanga ko ia ʻi ʻAtenisí ka ʻoku tau ʻilo foki ko Sīsū ko ia naʻe toetuʻú. Ko e fakamaau ʻa Sīsuú ʻe ʻuhingá ia ki he moʻui pe ko e mate.

 3. Ko e hā e ʻuhinga naʻe fai ai ʻe Sihova ha fuakava mo ʻĒpalahamé, pea ko hai ʻokú ne fakahoko ha ngafa makehe ʻi hono fakahoko ʻo e fuakava ko iá?

³ Ko e ʻAho Fakamaau ko iá ʻe feʻunga mo e taʻu ʻe taha afe hono lōloá. ʻI he malumalu ʻo e huafa ʻo Sihová, ʻe puleʻi ai ʻe Sīsū ʻa e Puleʻanga ko iá ʻaki ʻene hoko ko e Tuʻi, ka ʻoku ʻikai ko ia tokotaha pē. ʻOku fili ʻe Sihova ha niʻihi mei he faʻahinga ʻo e tangatá ke nau kaungāpule fakataha mo Sīsū pea mo fakahoko ʻa e fakamāú lolotonga e taʻu ko ia ʻe taha afé. (Fakafehoanaki mo e Luke 22:29, 30.) ʻI he meimei taʻu ʻe 4,000 kuo maliu atú, naʻe fakatoka ai ʻe Sihova ʻa e makatuʻunga ki he ʻAho Fakamāú ʻi he taimi naʻá ne fai ai ʻa e fuakava mo ʻene sevāniti anga-tonu ko ia ko ʻĒpalahame. (Lau ʻa e Senesi 22:17, 18.) Naʻe hā mahino ʻa e fakahoko ʻo e fuakava ko iá ʻi he 1943 K.M. Ko hono moʻoní, naʻe ʻikai malava ʻe ʻĒpalahame ke ne mahinoʻi kakato e ʻuhinga ʻo e fuakavá ki he faʻahinga ʻo e tangatá. Ka neongo ia, ko kitautolu ʻi he ʻaho ní, ʻoku lava ke tau vakai atu ʻi he malumalu ʻo e fuakavá ni, ʻoku fakahoko ai ʻe he hako ʻo ʻĒpalahamé ha ngafa makehe ʻi hono fakahoko ko ia e taumuʻa ʻa e ʻOtuá ki hono fakamāuʻi e faʻahinga ʻo e tangatá.

4, 5. (a) Ko hai ʻa e konga tefito ʻo e hako ʻo ʻĒpalahamé, pea ko e hā naʻá ne leaʻaki ʻo kau ki he Puleʻangá? (e) Naʻe fakaʻatā ʻanefē ʻa e ʻamanaki ko ia ke hoko ko e konga ʻo e Puleʻangá?

⁴ Ko e konga tefito ʻo e hako ko ia ʻo ʻĒpalahamé naʻe fakamoʻoniʻi ko Sīsū, ʻa ia naʻe paniʻaki ia ʻa e laumālie māʻoniʻoní ʻi he taʻu 29 T.S. peá ne hoko ai ko e Mīsaia naʻe talaʻofá, pe Kalaisí. (Kal. 3:16) Naʻe fakamoleki ai ʻe Sīsū ʻa e taʻu ko ia ʻe tolu mo e konga hoko atu aí ki hono malangaʻi e ongoongolelei ʻo e Puleʻangá ki he kakai Siú. Hili hono taki pōpula ko ia ʻo Sione Papitaisó, naʻe fakahaaʻi ai ʻe Sīsū ʻe lava ʻe he niʻihi ke nau maʻu mo e ʻamanaki ke kau atu ʻi he Puleʻangá ʻa ia naʻá ne pehē: “Talu mei he ngaahi ʻaho ʻo Sione Papitaisó ʻo aʻu ki he taimí ni, ne hoko ʻa e puleʻanga ʻo hēvaní ko ha taumuʻa ia ke fai ki ai ha feinga ʻa e tangatá, pea ko kinautolu ʻoku feinga mālohí ʻoku nau maʻu ia.”—Mt. 11:12, NW.

⁵ Ko e meʻa ʻoku fakatupu tokangá, ʻi he ki muʻa ke ne lave ki he faʻahinga ko ia te nau ‘maʻu’ ʻa e Puleʻanga ʻo hēvaní, naʻe pehē ai ʻe Sīsū: “Ko e moʻoni ʻoku ou tala atú, ʻoku tuʻunga māʻolunga ange ʻa Sione Papitaiso ʻi ha toe tangata kuo fanauʻi ʻi māmani. Ka ko ia ʻoku tuʻunga māʻulalo taha ʻi he Puleʻanga ʻo Hēvaní, ʻoku tuʻunga māʻolunga ange ia ʻia Sione.” (Mt. 11:11, Ko e Taulua) Ko e hā hono ʻuhingá? Koeʻuhí ko e ʻamanaki ko ia ke hoko ko e konga ʻo e Puleʻanga ʻo e ʻOtuá naʻe toki fakaʻatā pē ia ki he faʻahinga loto-tōnungá lolotonga hono huaʻi hifo e laumālie ʻo e ʻOtuá ʻi he Penitekosi ʻo e 33 T.S. ʻI he taimi ko iá, kuo ʻosi mālōlō ʻa Sione Papitaiso ia.—Ng. 2:1-4.

Hako Māʻoniʻoni ʻo ʻĒpalahamé

6, 7. (a) ʻI he founga fē naʻe hoko ai ʻa e hako ʻo ʻĒpalahamé ʻo “tatau mo e ngaahi fetuʻu ʻo e langi”? (e) Ko e hā ʻa e tāpuaki naʻe maʻu ʻe ʻĒpalahamé, pea ko e hā ʻa e tāpuaki meimei tatau ʻoku maʻu ʻe hono hakó?

⁶ Naʻe tala kia ʻĒpalahame ʻe fakatokolahi hono hakó ke “tatau mo e ngaahi fetuʻu ʻo e langi” pea mo e ʻoneʻone ʻo e matātahí. (Sen. 13:16; 22:17) ʻA ia te tau pehē nai, naʻe ʻikai malava ʻe he faʻahinga ʻo e tangatá ʻi he taimi ʻo ʻĒpalahamé ke ʻiloʻi ʻa e tokolahi ʻo e hakó ni. Ka neongo ia, naʻe faifai atu pē ʻo ʻiloʻi leva e tokolahi totonu ʻo hono hako fakalaumālié. Tānaki atu leva kia Sīsū, ko e toko 144,000.—Fkh. 7:4; 14:1.

⁷ Fekauʻaki mo e tui ʻa ʻĒpalahamé, ʻoku pehē ai ʻe he Folofola ʻa e ʻOtuá: “Bea nae tui [ʻa ʻĒpalahame] kia Jihova; bea nae lau ia kiate ia, koe maonioni.” (Sen. 15:5, 6, PM) Ko e moʻoni, ʻoku ʻikai ha tangata ʻe māʻoniʻoni. (Sem. 3:2) Ka ʻi hono kehé, koeʻuhi ko e tuʻu-ki-muʻa ʻa e tui ʻa ʻĒpalahamé, naʻe fakafeangai ai ʻa Sihova kiate ia ʻo hangē ʻoku māʻoniʻoní pea aʻu pē ʻone ui ia ko hono kaumeʻa. (Ai. 41:8) Ko kinautolu ko ia ʻoku faʻuʻaki ʻa e hako fakalaumālie ʻo ʻĒpalahamé fakataha pea mo Sīsū kuo ʻosi fakahaaʻi ʻenau māʻoniʻoní, pea ʻoku ʻomai ʻe he meʻá ni kiate kinautolu ha ngaahi tāpuaki ʻo lahi ange ia ʻi he ngaahi tāpuaki naʻe maʻu ʻe ʻĒpalahamé.

 8. Ko e hā ʻa e ngaahi tāpuaki ʻoku fakaava mai ki he kau mēmipa ʻo e hako ʻo ʻĒpalahamé?

⁸ ʻOku lau ʻa e kau Kalisitiane paní kuo nau māʻoniʻoni koeʻuhí he ʻoku ngāueʻi ʻenau tuí makatuʻunga ʻi he feilaulau huhuʻi naʻe fai ʻe Sīsuú. (Loma 3:24, 28) ʻI he vakai ʻa Sihová, ʻoku nau ʻatā ai mei he angahalá pea ʻe lava leva ke pani kinautolu ʻaki ʻa e laumālie māʻoniʻoní ke nau hoko ko e ngaahi foha fakalaumālie ʻo e ʻOtuá, ʻa ia ko e fanga tokoua ʻo Sīsū. (Sione 1:12, 13) ʻOku nau hoko ai ki ha fuakava foʻou ke faʻu ha puleʻanga foʻou, ʻa ia “ko e ʻIsileli ʻo e ʻOtuá.” (Kal. 6:16; Luke 22:20) Ko ha tāpuaki fisifisimuʻa ia ʻoku nau fakafofongaʻi! Ko e ola leva ʻo e ngaahi ngāue ko eni ʻoku fai ʻe he ʻOtuá maʻa kinautolú, ko e kau Kalisitiane paní ʻoku ʻikai ke nau maʻu ʻa e ʻamanaki ko ia ke moʻui taʻengata ʻi he māmaní. ʻOku nau feilaulauʻi ʻa e ʻamanaki ko iá koeʻuhi ko e fiefia taʻealafakamatalaʻi ko ia ʻo ʻenau hoko ʻo feohi fakataha mo Sīsū lolotonga ʻa e ʻAho Fakamāú pea mo pule mo ia ʻi hēvani.—Lau ʻa e Loma 8:17.

9, 10. (a) Naʻe ʻuluaki pani ʻanefē ʻa e kau Kalisitiané ʻaki ʻa e laumālie māʻoniʻoní, pea ko e hā ʻoku hanga mai mei muʻa kia kinautolú? (e) Ko e hā ʻa e tokoni naʻe maʻu ʻe he kau Kalisitiane paní?

⁹ ʻI he Penitekosi ʻo e 33 T.S., naʻe ʻoange ai ʻa e faingamālie ki ha kulupu ʻo e kau tangata faitōnunga ke nau kau ʻi he faʻahinga ko ia te nau pule pea mo Sīsū lolotonga ʻo e ʻAho Fakamāú. Naʻe papitaiso ai ha toko 120 ʻo e kau ākonga ʻa Sīsuú ʻaki ʻa e laumālie māʻoniʻoní ʻo nau hoko ai ko e ʻuluaki kau Kalisitiane paní. Ko ia ai, kia kinautolu, ko e ʻuluaki sitepú eni ki hono maʻu ko ia ʻo e moʻui taʻengatá. Pea mei ai ʻo faai atu, kuo pau ke nau fakahāhā ʻenau mateaki kia Sihová neongo e ngaahi ʻahiʻahi kotoa ʻe fai ʻe Sētane kia kinautolú. Kuo pau ke tauhi ai pē ʻenau anga-tonú ʻo aʻu ki he mate kae lava ke nau maʻu ʻa e kalauni ko ia ʻo e moʻui fakahēvaní.—Fkh. 2:10.

¹⁰ Pea ki he taumuʻa ko ení, kuo tokonaki ai ʻe Sihova fakafou ʻi heʻene Folofolá pea pehē ki he Fakatahaʻanga Kalisitiané ʻa e fakalototoʻa fakataha mo e enginaki ko ia ʻoku fiemaʻu ʻe he kau paní. Ko e fakatātaá, naʻe tohi ʻa e ʻapositolo ko Paulá ki he kau Kalisitiane pani ko ia ʻi Tesalonaiká: “Hange ko e fai ʻa ha tamai ki heʻene fanau aʻana, naʻe pehe ʻemau enginaki kimoutolu tāutaha, mo lotaki, mo tapou, ke mou laka ʻo tāu mo e ʻOtua, ʻa ia ʻoku ne ui kimoutolu ke hu ki hono puleʻanga mo hono langilangi.”—1 Tes. 2:11, 12.

11. Ko e hā ʻa e lēkooti kuo hiki ʻe Sihova maʻá e ngaahi mēmipa ʻo e “ʻIsileli ʻo e ʻOtua”?

¹¹ Laka hake ʻi he taʻu ʻe 60 nai hili hono fili ko ia e ʻuluaki kau mēmipa ʻo e fakatahaʻanga ʻo e kau Kalisitiane paní, naʻe vakai ai ʻa Sihova kuo taau ke hiki ha lēkooti pau ʻo e ngāue fakafaifekau ʻa Sīsū ʻi he māmaní pehē ki Heʻene fakafeangai ki he kau Kalisitiane pani ʻi he ʻuluaki senitulí pea mo ʻene ngaahi akonaki kiate kinautolú. Ko ia ai, naʻe tānaki atu ʻe Sihova ʻa e Ngaahi Konga Tohi Tapu Faka-Kalisi Kalisitiane kuo ʻosi fakamānavaʻí ki he Ngaahi Konga Tohi Tapu Faka-Hepelū kuo ʻosi fakamānavaʻí. Naʻe tomuʻa hiki ʻa e ngaahi konga Tohi Tapu Faka-Hepeluú ia maʻá e puleʻanga ʻo ʻIsileli fakakakanó lolotonga e taimi ko ia naʻe makehe ai honau vahaʻangatae mo e ʻOtuá. Ko e ngaahi Konga Tohi Tapu Faka-Kalisi Kalisitiané leva naʻe hiki ia ʻo fakahangataha maʻá e “ʻIsileli ʻo e ʻOtua,” ʻa kinautolu ko ia kuo pani ko e ngaahi tokoua ʻo Kalaisi pea mo e ngaahi foha fakalaumālie ʻo e ʻOtuá. Ka neongo ia, ʻoku ʻikai ke pehē ai ʻe taʻemalava ʻe ha tokotaha ʻikai ko ha ʻIsileli ke maʻu ʻaonga mei hono ako ʻo e Ngaahi Konga Tohi Tapu Faka-Hepeluú. Fakatatau ki aí, ʻoku maʻu ʻe he kau Kalisitiane ʻoku ʻikai paniʻaki ʻa e laumālie māʻoniʻoní ʻa e ngaahi ʻaonga taʻealafakatataua mei hono ako pea mo moʻui ʻo fakatatau ki he ngaahi akonaki ʻoku ʻi he Ngaahi Konga Tohi Tapu Faka-Kalisi Kalisitiané.—Lau ʻa e 2 Timote 3:15-17.

12. Ko e hā ʻa e fakamanatu naʻe fai ʻe Paula ki he kau Kalisitiane paní?

¹² Naʻe lau ʻa e kau Kalisitiane ʻo e ʻuluaki-senitulí ʻoku nau māʻoniʻoni pea naʻe pani kinautolu ʻaki ʻa e laumālie māʻoniʻoní ki he taumuʻa ke nau malava ʻo maʻu honau tofiʻa fakahēvaní. ʻI hono pani kinautolú ʻoku ʻikai ke nau hangē ai ha tuʻí ki honau kaungā Kalisitiane pani ʻoku kei ʻi he māmaní. Hangē ko ia ʻoku tau lāuʻilo ki aí, naʻe ngalo ai ʻi he niʻihi ʻo e muʻaki kau Kalisitiané ʻa ʻenau hoko ki he tuʻunga peheé pea naʻa nau kamata ke kumi ke nau ʻi ha tuʻunga ʻoku māʻolunga makehe atu mei honau fanga tokoua ko ia ʻi he fakatahaʻangá. Ko hono olá, naʻe ʻeke ai ʻe Paula: “Ta kuo mou makona leva! ta kuo mou koloaʻia leva! ta kuo mou hoko ʻo tuʻi, ʻo laka ʻiate kimaua! Seuke, taumaiā kuo moʻoni hoʻomou tuʻi na, heiʻilo te ma kaungā tuʻi foki fakataha mo kimoutolu!” (1 Kol. 4:8) Ko ia ai, naʻe fakamanatu ai ʻe Paula ki he faʻahinga kuo pani ʻi hono taimí: “ʻOku ʻikai ke pehē ko e kau pule kimautolu ki hoʻomou tuí, ka ko e kaungāngāue kimautolu ki hoʻomou fiefiá.”—2 Kol. 1:24, NW.

Fakakakato ʻa e Fika Naʻe Kikiteʻi

13. Hili ʻa e 33 T.S., naʻe anga-fēfē ʻa e tupulaki hono fili ʻo e kau paní?

¹³ Naʻe ʻikai ke fili kotoa e kau Kalisitiane pani ʻe toko 144,000 ʻi he ʻuluaki senitulí. Ko hono fili kinautolú naʻe kei hokohoko atu pē ʻi he kotoa e taimi ʻo e kau ʻapositoló pea hangē naʻe kiʻi holo hifo māmālie. Ka neongo ia, naʻe kei hokohoko mai pē ʻi he kotoa e ngaahi senituli kuo maliu atú ʻo aʻu mai ki hotau ʻahó ni. (Mt. 28:20) Faifai atu pē, hili e kamata pule ʻa Sīsū ʻi he 1914, ne toe makape vave hake.

14, 15. Ko e hā ʻa e ngaahi meʻa kuo hoko ʻi hotau taimí fekauʻaki mo hono fili ko ia ʻo e kau paní?

¹⁴ ʻUluakí, naʻe fakamaʻa ʻe Sīsū ʻa hēvani mei he toenga ʻo e kau fakafepaki ki he tuʻunga pule ʻa e ʻOtuá. (Lau ʻa e Fakahā 12:10, 12.) Hili ia, naʻá ne fakahanga leva ʻene tokangá ki hono fakatahatahaʻi e toenga mēmipa ko ia hono puleʻangá ʻa ia ʻoku ʻamanekina ke fakakakato ʻaki ʻa e toko 144,000. ʻI he vaeua taʻu nai ʻo e 1930, naʻe hā mahino ai ʻa e mei kakato ʻa e ngāue ko iá pea ko e tokolahi leva ʻo e faʻahinga naʻa nau tali ʻa e ngāue fakamalangá naʻe ʻikai ke nau maʻu ʻa e holi ko ia ke moʻui ʻi hēvaní. Naʻe ʻikai ke ʻi ai ha kaungā fakamoʻoni ʻa e Laumālie ʻo e ʻOtuá mo honau laumālié ko kinautolú ʻoku nau kau ʻi he ngaahi foha ʻo e ʻOtuá. (Fakafehoanaki mo e Loma 8:16.) ʻI hono kehé, ʻoku nau fakapapauʻi ko kinautolu ia ʻa e “fanga sipi kehe,” ʻa ia ʻoku nau maʻu ʻa e ʻamanaki ʻo e moʻui taʻengata ʻi he māmani palataisí. (Sione 10:16) Hili ʻa e 1935 naʻe kamata mei heni ʻa e maliu e ngāue fakamalangá ʻo tokanga tefito ki hono fakatahatahaʻi e “fuʻu kakai lahi,” ʻa e faʻahinga ko ia naʻe mamata ki ai ʻa Sione ʻi heʻene vīsoné ʻa ia te nau hao moʻui atu ʻi he “mamahi lahi.”—Fkh. 7:9, 10, 14.

¹⁵ Kae kehe, ʻi he ngaahi taʻu ko ia talu mei he 1930 tupú, naʻe kei fili pē ha niʻihi taautaha ki he ʻamanaki fakahēvani. Ko e hā hono ʻuhinga? ʻI he ngaahi tuʻunga ʻe niʻihi, mahalo pē ko hano fetongi ʻo ha faʻahinga ne ʻosi fili ka kuo nau hoko ʻo mole ʻenau anga-tonú. (Fakafehoanaki mo e Fakahā 3:16.) Naʻe lave heni ʻa Paula ki ha faʻahinga taautaha naʻá ne ʻiloʻi naʻa nau liʻaki ʻa e moʻoní. (Fili. 3:17-19) Ko hai nai ʻe fili ʻe Sihova ke kau ʻi ha fetongi peheé? Ko hono moʻoní, ko Ia pē te ne fai ʻa e fili ko iá. Ko ia ai, ʻe hā ngali ʻuhinga lelei ange ke ne fili, ʻo ʻikai ngata pē mei he faʻahinga foʻou toki ului maí, ka mei he faʻahinga taautaha—hangē ko e kau ākonga ko ia naʻe lave ki ai ʻa Sīsū he taimi naʻá ne kamata ai e Fakamanatu ʻo e ʻohomohé—ʻa ia ne aʻu ki ha tuʻunga kuo ʻosi fakamoʻoniʻi ʻenau mateakí.a—Luke 22:28

16. Fekauʻaki mo e kau paní, ko e hā e meʻa ʻoku tau fakamālōʻiá, pea ko e hā ʻe malava ke tau tuipau ki aí?

¹⁶ Kae kehe, ʻoku hā ngali ʻoku ʻikai ko kinautolu kotoa naʻe fili ki he ʻamanaki fakahēvaní talu mei he 1930 tupú ko haʻanau fetongiʻi ha faʻahinga kuo nau hinga. Naʻe fakamahino pau mai ʻe Sihova ʻe kei ʻi ai pē ʻa e kau Kalisitiane paní ʻi hotau haʻohaʻongá ʻi he lolotonga ʻo e ngaahi ʻaho fakaʻosi ʻo e fokotuʻutuʻu ko ení kae ʻoua ke fakaʻauha “ʻa Pāpilone ko e Lahi.”b (Fkh. 17:5) Pea ʻoku lava ke tau falala ʻe toki fakakakato ʻe Sihova e kau mēmipa ʻo e toko 144,000 ʻi he taimi kuó ne kotofa ʻo hoko atu ai pē ki heʻenau kaungāpule ʻi he Puleʻangá. ʻOku lava foki ke tau tui ko e Lea fakaekikite ko ia ki he fuʻu kakai lahi ʻoku nau tupu ʻo tokolahi angé te nau hoko ko ha kulupu ʻoku hokohoko atu ʻenau tauhi anga-tonú. ʻOku vavé ni ke nau “hao atu mei he mamahi lahi” ʻa ia ʻe fakahoko ki he māmani ʻo Sētané pea te nau hoko atu ai pē ʻi he loto-fiefia ki he māmani foʻou ʻa e ʻOtuá.

Mei Kakato ʻa e Puleʻanga Fakahēvani ʻo e ʻOtuá!

17. Fakatatau kia 1 Tesalonaika 4:15-17 pea mo Fakahā 6:9-11, ko e hā e meʻa naʻe hoko ki he kau Kalisitiane pani ko ia naʻa nau mate anga-tonú?

¹⁷ Talu mei he 33 T.S., laui afe e kau Kalisitiane pani ne nau fakahāhā ʻa e tui mālohi mo tauhi maʻu ʻenau anga-tonú ki he mate. Ko kinautolu ia kuo lau ʻoku nau ʻosi taau ke maʻu ʻa e Puleʻangá pea—hā mahino ʻene kamatá ʻi he kamataʻanga ʻo e ngaahi ʻaho ʻo e ʻi ai ʻa Kalaisí—kuo fakapaleʻi kinautolu ki he moʻui fakahēvaní.—Lau ʻa e 1 Tesalonaika 4:15-17; Fakahā 6:9-11.

18. (a) Ko e hā ʻa e falala pau ʻoku maʻu ʻe he faʻahinga ko ia ʻo e kau pani ʻoku nau kei toe ʻi he māmaní? (e) ʻOku anga-fēfē ʻa e vakai atu ʻa e fanga sipi kehé ki honau ngaahi tokoua pani Kalisitiané?

¹⁸ ʻOku falala kakato ʻa e toenga ʻo e kau pani ʻi he māmaní kapau te nau kei tauhi ai pē ʻenau anga-tonú, ʻe vavé ni ke nau maʻu ʻa e pale ki he moʻui fakahēvaní. Ko e laui miliona leva ʻo e fanga sipi kehé, ʻi he taimi ʻoku nau fakalaulauloto ai ki he tui ʻa honau ngaahi tokoua paní, ʻoku nau loto-tatau ai mo e ngaahi lea ʻa e ʻapositolo ko Paulá, ʻa ia naʻá ne lave ai ki he ngaahi tokoua pani ʻi Tesalonaiká: “Oku totonu e mau fakafetai mau ai be ki he Otua koeuhi ko kimoutolu, e kaiga, o hage koia oku tāu, koeuhi oku tubu o lahi aubito aubito hoo mou tui, bea oku tubulekina a hoo mou feofaaki kiate kimoutolu kotoabe; Koia oku mau vikiviki koeuhi ko kimoutolu ki he gaahi jiaji oe Otua, i hoo mou faa kataki moe tui, i ho mou gaahi fakataga kotoabe, moe gaahi mamahi, oku mou faa katakiʻi: Aia koe fakailoga oe fakamāu totonu oe Otua, koeuhi ke lau akimoutolu oku mou tāu moe buleaga oe Otua, aia oku mou mamahi ai foki.” (2 Tes. 1:3-5) ʻI he mate ko ia ʻa e mēmipa fakamuimui taha ʻo e kau paní mei he māmaní, pe ʻe hoko nai ʻafē, ko e kakato ia ʻa e puleʻanga fakahēvani ʻo e ʻOtuá. He meʻa fakatupu fiefia moʻoni ka hokó—fakatouʻosi ʻi hēvani pea mo māmani foki!

[Fakamatala ʻi lalo]

ʻE Lava Ke Ke Fakamatalaʻi?

• Ko e hā naʻe fakahā ʻe he ʻOtuá kia ʻĒpalahamé ʻa ia ʻoku ʻi ai ʻene fekauʻaki mo e ʻAho Fakamaau?

• Ko e hā e ʻuhinga naʻe lau ai ʻa ʻĒpalahame ʻoku māʻoniʻoni?

• Ko e hā e meʻa ʻe tataki atu ki ai ʻa e hako ko ia ʻo ʻĒpalahame ʻoku taau ke lau ʻoku nau māʻoniʻoní?

• Ko e hā ʻa e falala pau ʻoku maʻu ʻe he kau Kalisitiané hono kotoa?

[Fakatātā ʻi he peesi 20]

Naʻe fakalototoʻaʻi ʻe Sīsū hono kau muimuí ke nau kakapa atu ki he Puleʻangá

[Fakatātā ʻi he peesi 21]

ʻI he Penitekosi ʻo e 33 T.S., naʻe kamata ai hono fili ʻe Sihova ʻa e konga hono ua ʻo e mēmipa e hako ʻo ʻĒpalahamé

[Fakatātā ʻi he peesi 23]

ʻOku fakamālōʻia ʻa e fanga sipi kehé ko ʻenau kei feʻao ko ia mo e kau Kalisitiane paní ʻi he ngaahi ʻaho fakaʻosí