Mālohi Fakaefakaʻauha​—“Ko Sihová ko ha Pāteʻi Tau Mālohi Ia”

1-3. (a) Ko e hā ʻa e fakamanamana naʻe fehangahangai mo e kau ʻIsilelí ʻi he nima ʻo e kau ʻIsipité? (e) Naʻe anga-fēfē ʻa e faitau ʻa Sihova maʻa hono kakaí?

KO E kau ʻIsilelí ne nau ʻefihia​—ʻo fihia ʻi he vahaʻa ʻo e ngaahi lilifa faingataʻa ke foua ʻo e moʻungá pea mo ha tahi ʻe ʻikai ala ʻalu ai. Ko e kau tau ʻIsipité, ʻi he hangē ha mīsini tāmate taʻefaimēsí, naʻe tulimui atu ki ai ʻi he mātuʻaki fakapapauʻi ke fakaʻauha ʻosiʻosingamālie kinautolu.a Ka, naʻe kei naʻinaʻi pē ʻa Mōsese ki he kakai ʻa e ʻOtuá ke ʻoua ʻe mole ʻa e ʻamanakí. “Ko Sihova te ne tau maʻamoutolu,” ko ʻene fakapapauʻi ange ia kiate kinautolú.​—Ekisoto 14:14.

² ʻI he tuʻunga ko iá, ʻoku ngalingali naʻe ui ʻa Mōsese kia Sihova, pea naʻe tali ʻe he ʻOtuá: “Ko e ha ʻoku ke tangi ai kiate au? . . . te ke ofaʻaki ho tokotoko, ʻo mafao ho nima ki tahi, ʻo vaeua ia.” (Ekisoto 14:15, 16) Sioloto atu angé ki he ngaahi meʻa naʻe kamata ke hokó. ʻOku fekau leva ʻa Sihova ki heʻene ʻāngeló, pea ʻoku ngaʻunu atu ha pou ʻao ki he tuʻa ʻo ʻIsilelí, ʻo mafola atu nai ai hangē ha fuʻu ʻaá ʻo tāpuniʻi ai ʻa e feituʻu naʻe teu ke ʻohofi ʻe ʻIsipité. (Ekisoto 14:19, 20; Sāme 105:39) ʻOku mafao atu ʻe Mōsese hono nimá. ʻI hono ueʻi ʻe ha matangi mālohí, ʻoku mavaeua ai ʻa e tahí ki he ongo tafaʻakí. ʻOku tuʻumaʻu ʻa e tahí ʻi ha tuʻunga pea tuʻu hangē ha ongo fuʻu holisí, ʻo fakaʻatā ai ha hala fālahi feʻunga ke hao ai ʻa e puleʻangá fakakātoa!​—Ekisoto 14:21; 15:8.

³ ʻI he fehangahangai mo e fakahāhā ko eni ʻo e māfimafí, ʻoku totonu kia Felo ke ne tuʻutuʻuni ki heʻene kau taú ke nau holomui. ʻI hono kehé, ʻoku tuʻutuʻuni atu ʻe Felo loto-pōlepole ia ha ʻohofi. (Ekisoto 14:23) ʻOku fakavave atu leva ʻa e kau ʻIsipité ʻi he kilisi tahi mōmoá ʻi heʻenau tulimui atú, ka ʻoku vave ʻa e hoko ʻo taʻemaau ʻenau ʻoho ʻoku faí ʻi he kamata ke homo ʻa e vaʻe ʻo ʻenau ngaahi salioté. ʻI he hao pē ʻa e kau ʻIsilelí ki he tafaʻaki ʻe tahá, ʻoku fekau atu ʻa Sihova kia Mōsese: “Mafao atu ho nima ki tahi, koeʻuhi ke foki ʻa e tahi ʻo lomakiʻi ʻa e kakai Isipite, ʻa e tau saliote mo e tau heka-hoosi.” ʻOku holofa hifo ʻa e ongo fuʻu holisi vaí, ʻo lōmekina ai ʻa Felo mo ʻene ngaahi konga kaú!​—Ekisoto 14:24-28; Sāme 136:15.

 4. (a) Naʻe fakamoʻoniʻi ʻe Sihova ko e hā ia ʻi he Tahi Kulokulá? (e) ʻE anga-fēfē nai ʻa e tali ʻa e niʻihi ki he ngāue ko ʻeni ʻa Sihová?

⁴ Ko e fakahaofi ʻo e puleʻanga ʻIsilelí ʻi he Tahi Kulokulá ko ha meʻa fakaofo ia ʻi he hisitōlia ʻo e ngaahi feangainga ʻa e ʻOtuá mo e faʻahinga ʻo e tangatá. Naʻe fakamoʻoniʻi ai ʻe Sihova ʻa ia tonu “ko e pateʻitau.” (Ekisoto 15:3) Neongo ia, ʻe anga-fēfē hoʻo tali ki he ngāue ko ʻeni ʻa Sihová? Ke lea totonu, kuo ʻomai ʻe he taú ʻa e langa mo e mamahi lahi ki he faʻahinga ʻo e tangatá. ʻE hoko ʻa e ngāueʻaki ko ia ʻo e mālohi fakaefakaʻauha ʻo e ʻOtuá ko ha meʻa ia ke ne taʻotaʻofi koe kae ʻikai te ne ueʻi koe ke ke ʻunuʻunu ofi kiate ia?

5, 6. (a) Ko e hā ʻoku feʻungamālie ai hono ui ʻa e ʻOtuá ko “Sihova ʻo e ngaahi kau tau”? (e) ʻOku anga-fēfē ʻa e kehekehe ʻa e faitau fakaʻotuá mei he faitau fakaetangatá?

⁵ ʻOku tuʻo uangeau-mā-onongofulu nai ʻi he Ngaahi Konga Tohitapu Faka-Hepeluú pea tuʻo ua ʻi he Ngaahi Konga Tohitapu Faka-Kalisi Kalisitiané, ʻa hono ʻai ai ki he ʻOtuá ʻa e hingoa fakalakanga ko e “Sihova ʻo e ngaahi kau tau.” (1 Sāmiuela 1:11, NW) ʻI he tuʻunga ko e Pule Aoniú, ʻoku tuʻutuʻuni ai ʻa Sihova ki ha fuʻu kau tau kāfakafa ʻo e ngaahi konga kau fakaeʻāngelo. (Siosiua 5:13-15; 1 Tuʻi 22:19) ʻOku fakamanavahē ʻa e malava fakaefakaʻauha ʻa e kau tau ko ʻení. (Aisea 37:36) ʻOku ʻikai ko ha meʻa fakafiefia ke fakakaukauloto atu ki he fakaʻauha ʻo e faʻahinga ʻo e tangatá. Kae kehe, kuo pau ke tau manatuʻi ko e ngaahi tau ʻa e ʻOtuá ʻoku ʻikai ke hangē ia ko e fanga kiʻi fepaki fakaetangatá. ʻOku feinga nai ʻa e kau taki fakakautaú mo fakapolitikalé ke taku ko e tupu ʻa e ngaahi taumuʻa leleí ʻi heʻenau ngaahi ʻoho ʻoku faí. Ka ko e faitau fakaetangatá ʻoku kau tuʻumaʻu ai ʻa e mānumanú mo e sio-kitá.

⁶ ʻI hono kehé, ko Sihová ʻoku ʻikai ke tākiekina ia ʻe ha ongoʻi taʻefiefakamaau. ʻOku tala mai ʻe he Teutalōnome 32:4 (NW): “Ko e Makatuʻu, ʻoku haohaoa ʻa ʻene ngāué, he ko e fakamaau totonu ʻa ʻene founga fulipē. Ko ha ʻOtua faitōnunga ʻoku ʻikai ʻaupito taʻefaitotonu; ko iá ʻoku māʻoniʻoni mo anga-tonu.” ʻOku fakahalaiaʻi ʻe he Folofola ʻa e ʻOtuá ʻa e tōlili taʻemapuleʻí, anga-fakamamahí, mo e fakamālohí. (Sēnesi 49:7; Sāme 11:5) Ko ia, ʻoku ʻikai ʻaupito ke fai taʻeʻuhinga ʻe Sihova ha meʻa. ʻOkú ne taʻotaʻofi hono ngāueʻaki ʻa hono mālohi fakaefakaʻauhá pea ko e meʻa ia ʻe toki hanga fakaʻosi ki aí. ʻOku hangē pē ko ia naʻá ne fakahaaʻi fakafou ʻi heʻene palōfita ko ʻIsikelí: “He ʻoku ou momoʻi manako ki he pekia ʻa e angahala?​—ko Atonai Sihova ia mei he Taʻehamai​—kaekehe ke ne tafoki mei hono ngaahi ʻalunga, ʻo moʻui.”​—Isikeli 18:23.

7, 8. (a) Ko e hā naʻe fakamulituku hala ʻaki ʻe Siope ʻo fekauʻaki mo ʻene ngaahi faingataʻaʻiá? (e) Naʻe anga-fēfē hono fakatonutonu ʻe ʻIlaiū ʻa e fakakaukau ʻa Siopé ʻi he fekauʻaki mo e meʻá ni? (f) Ko e hā ʻa e lēsoni ʻoku malava ke tau ako mei he meʻa naʻe hokosia ʻe Siopé?

⁷ Ko ia, ko e hā ʻoku ngāueʻaki ai ʻe Sihova ʻa e mālohi fakaefakaʻauhá? Ki muʻa ke talí, ʻoku tau manatuʻi nai ʻa e tangata māʻoniʻoni ko Siopé. Naʻe poleʻi ʻe Sētane pe ʻe lava ʻe Siope​—ko hono moʻoní, ʻe ha tangata pē​—ʻo tauhi ʻene anga-tonú ʻi he ʻahiʻahí. Naʻe fai ʻe Sihova ʻa e tali ki he pole ko iá ʻaki hono fakaʻatā ʻa Sētane ke ne ʻahiʻahiʻi ʻa e anga-tonu ʻa Siopé. Ko hono olá, naʻe faingataʻaʻia ʻa Siope ʻi ha mahaki, mole ʻa e koloá, pea mole mo ʻene fānaú. (Siope 1:1–2:8) ʻI he ʻikai ʻilo ki he ngaahi ʻīsiu naʻe kau ki he meʻá ni, naʻe fakamulituku hala ai ʻa Siope ko ʻene faingataʻaʻiá ko ha tautea taʻetotonu mei he ʻOtuá. Naʻá ne ʻeke ki he ʻOtuá pe ko e hā naʻá Ne ʻai ai ia ko ha “pākiaʻanga,” ko ha “fili.”​—Siope 7:20; 13:24.

⁸ Ko ha kiʻi tangata ko ʻIlaiū naʻá ne fakaeʻa ʻa e fehālaaki ʻi he fakaʻuhinga ʻa Siopé, ʻo pehē: “Oku ke mahalo oku totonu eni, a hoo lea o behe, Ko eku maonioni oku lahi [ʻi] he Otua?” (Siope 35:2, PM) ʻIo, ʻoku taʻefakapotopoto ke fakakaukau ʻoku lelei ange ʻetau ʻiló ʻi he ʻOtuá pe ke fakamahalo kuó ne taʻefaitotonu mai. “Koe kovi, ke mamao ia mei he Otua, bea moe agahala mei he Mafimafi,” ko e lea ia ʻa ʻIlaiuú. Ki mui ai, naʻá ne pehē: “Koe Mafimafi, oku ikai te tau faa iloʻi ia: oku lahi ia i he malohi, moe fakamau, bea mohu agatonu: e ikai te ne tautea.” (Siope 34:10, PM; 36:22, 23; 37:23, PM) ʻOku malava ke tau fakapapauʻi ko e taimi ko ia ʻoku faitau ai ʻa e ʻOtuá, ʻoku ʻi ai ʻene taumuʻa lelei ki hono fai iá. ʻI he fakakaukau atu ki he meʻa ko iá, tau kumi ki he niʻihi ʻo e ngaahi ʻuhinga ʻoku taku ai ʻi he taimi ʻe niʻihi ki he ʻOtua ʻo e melinó ʻa e ngāue ʻa ha tangata tau.​—1 Kolinito 14:33.

 9. Ko e hā ʻoku faitau ai ʻa e ʻOtua ʻo e māʻoniʻoní?

⁹ ʻI he hili hono fakahīkihikiʻi ʻa e ʻOtuá ‘ko e pateʻitaú,’ naʻe tala ʻe Mōsese: “Ko hai ʻi he ngaahi ʻOtua ʻoku tatau mo koe, ʻe Sihova? Ko hai ʻoku tatau mo koe, ko e langilangiʻia ʻi he maʻoniʻoni.” (Ekisoto 15:11) Naʻe tohi ʻe he palōfita ko Hapakuké ʻa e meʻa meimei tatau: “ʻOku maʻoniʻoni fau ho fofonga ke hanga ki ha meʻa hala, pea ko e fakasio ki he taʻetotonu ʻoku ʻikai te ke lava.” (Hapakuke 1:13) Neongo ko Sihová ko ha ʻOtua ʻo e ʻofa, ko ha toe ʻOtua ia ʻo e māʻoniʻoni, faitotonu, mo e fakamaau totonu. ʻI he taimi lahi, ʻoku ueʻi ia ʻe he ngaahi ʻulungaanga ko iá ke ne ngāueʻaki hono mālohi fakaefakaʻauhá. (Aisea 59:15-19; Luke 18:7) Ko ia, ʻoku ʻikai ke fakameleʻi ʻe he ʻOtuá ʻene māʻoniʻoní ʻi he taimi ʻokú ne faitau aí. Ka, ʻokú ne faitau koeʻuhí ʻokú ne māʻoniʻoni.​—Ekisoto 39:30.

10. Ko fē pē founga ʻe toki malava ai ke fakaleleiʻi ʻa e fetāufehiʻaʻaki naʻe tomuʻa tala ʻi he Sēnesi 3:15, pea ko e hā hono ngaahi ʻaonga ki he faʻahinga māʻoniʻoni ʻo e tangatá?

¹⁰ Fakakaukau angé ki he tuʻunga naʻe malanga hake ʻi he hili ʻa e angatuʻu ʻa e ʻuluaki ongo mātuʻa fakaetangatá, ʻa ʻĀtama mo ʻIvi ki he ʻOtuá. (Sēnesi 3:1-6) Kapau naʻá ne kātakiʻi pē ʻena taʻemāʻoniʻoní, ne mei fakavaivaiʻi ai ʻe Sihova ʻa hono tuʻunga tonu ko e Hau Fakalevelevá. ʻI he tuʻunga ko ha ʻOtua māʻoniʻoní, naʻá ne moʻuaʻaki ai ke tautea mate kinaua. (Loma 6:23) ʻI he ʻuluaki kikite ʻa e Tohitapú, naʻá ne tomuʻa tala ai ʻe ʻi ai ʻa e fetāufehiʻaʻaki ʻi he vahaʻa ʻo ʻene kau sevāniti ʻaʻaná pea mo e kau muimui ʻo e “ngata,” ko Sētané. (Fakahā 12:9; Sēnesi 3:15) ʻE toki malava pē ke fakaleleiʻi ʻa e fetāufehiʻaʻaki ko ʻení ʻaki hono laiki ʻo Sētane. (Loma 16:20) Ka ko e ngāue fakaefakamaau ko iá ʻe iku ai ki he ngaahi tāpuaki lahi ki he faʻahinga māʻoniʻoni ʻo e tangatá, ko hono toʻo mei he māmaní ʻa e tākiekina ʻa Sētané pea fakaava ai ʻa e hala ki ha palataisi fakalūkufua. (Mātiu 19:28) ʻI he teʻeki ai ke aʻu ki he taimi ko iá, ko e faʻahinga ko ia ʻoku nau kau mo Sētané te nau fakatupu ha fakamanamana hokohoko ki he moʻui lelei fakaesino mo fakalaumālie ʻa e kakai ʻa e ʻOtuá. ʻI he taimi ki he taimi, ʻe pau ke kau ʻo tuʻu vahaʻa mai ai ʻa Sihova.

11. Ko e hā naʻe ongoʻi ai ʻe he ʻOtuá ʻokú ne moʻuaʻaki ke ʻomai ha lōmaki ki he māmaní kātoa?

¹¹ Ko e Lōvai ʻo e ʻaho ʻo Noá ko ha tuʻunga ia naʻe ʻi ai ʻa e kau mai ʻo tuʻu vahaʻa pehē. ʻOku pehē ʻe he Sēnesi 6:11, 12: “Kuo kaʻanga ʻa mamani ʻi he fofonga ki ai ʻa e ʻOtua, pea kuo opeope ʻi he fonua ʻa e fakamalohi. Pea naʻe ʻafio ʻa e ʻOtua ki mamani, pea ta kuo kaʻanga; he kuo fakakaʻanga ʻe he kakano kotoa pe hono ʻalunga ʻi mamani.” ʻE fakaʻatā ʻe he ʻOtuá ʻa e fulikivanú ke ne toʻo atu ʻa e kiʻi toenga fakaʻosi ʻo e ʻulungaanga tāú naʻe toe ʻi he māmaní? ʻIkai. Naʻe ongoʻi ʻe Sihova ʻokú ne moʻuaʻaki ke ʻomai ha lōvai ki māmani kotoa ke toʻo atu mei he māmaní ʻa e faʻahinga ko ia naʻa nau mātuʻaki hehema ki he fakamālohí mo e ʻulungaanga taʻetāú.

12. (a) Ko e hā naʻe tomuʻa tala ʻe Sihova ʻo fekauʻaki mo e “hako” ʻo ʻĒpalahamé? (e) Ko e hā naʻe pau ai ke fakaʻauhamālie ʻa e kau ʻĀmolí?

¹² Naʻe meimei tatau pē mo e fakamaau ʻa e ʻOtuá ki he kau Kēnaní. Naʻe fakahaaʻi ʻe Sihova ʻe haʻu meia ʻĒpalahame ha hako ʻa ia ʻe fakafou mai ai ʻa hono tāpuakiʻi ʻa e kotoa ʻo e ngaahi fāmili ʻo e māmaní. ʻI he fehoanaki mo e taumuʻa ko iá, naʻe tuʻutuʻuni ʻe he ʻOtuá ʻo pehē ko e hako ʻo ʻĒpalahamé ʻe foaki ki ai ʻa e fonua ko Kēnaní, ko ha fonua naʻe nofoʻi ʻe ha kakai naʻe ui ko e kau ʻĀmoli. Naʻe malava fēfē ke fakatonuhiaʻi ʻa e ʻOtuá ʻi hono kapusi fakamālohi ʻa e kakaí ni mei honau fonuá? Naʻe tomuʻa tala ʻe Sihova ko e kapusi ko ʻení ʻe ʻikai ke hoko mai ia ʻi he taʻu ʻe 400 nai hono hokó​—kae ʻoua “ke lato ʻa e kovi ʻa e haʻa Amoli.”b (Sēnesi 12:1-3; 13:14, 15; 15:13, 16; 22:18) ʻI he lolotonga ʻa e vahaʻa taimi ko iá, naʻe faai hifo ai ʻa e kau ʻĀmolí ʻo toe loloto ange ʻi he ʻulungaanga fakameleʻí. Naʻe hoko ʻa Kēnani ko ha fonua ʻo e tauhi ʻaitoli, lingitoto, mo e ngaahi tōʻonga fehokotaki fakasino ololalo. (Ekisoto 23:24; 34:12, 13; Nōmipa 33:52) Ko e kau nofo ʻi he fonuá naʻe aʻu ʻo nau tāmateʻi ʻenau fānaú ʻi he ngaahi afi fakaefeilaulaú. ʻE hanga ʻe ha ʻOtua māʻoniʻoni ʻo tuku atu hono kakaí ki ha tuʻunga fulikivanu pehē? ʻIkai! Naʻá ne talaki: “Kuo ʻuliʻi ai ʻa e fonua: ko ia ʻoku ou ʻeke ki ai hono kovi, pea ʻoku puʻaki ʻe he fonua hono kau nofoʻanga.” (Livitiko 18:21-25) Kae kehe, naʻe ʻikai ke tāmateʻi tavale ʻe Sihova ʻa e kakaí. Ko e kau Kēnani naʻe hehema totonú, hangē ko Lēhapi mo e kau Kipioné, naʻe fakahaofi.​—Siosiua 6:25; 9:3-27.

13, 14. (a) Ko e hā naʻe moʻuaʻaki ai ʻe Sihova ke fakamāʻoniʻoniʻi hono huafá? (e) Naʻe anga-fēfē hono fakaʻatā ʻe Sihova hono huafá mei hano lumaʻí?

¹³ Koeʻuhi ʻoku māʻoniʻoni ʻa Sihova, ʻoku māʻoniʻoni hono huafá. (Livitiko 22:32) Naʻe akoʻi ʻe Sīsū ʻene kau ākongá ke nau lotu: “Ke tapuhā ho Huafa.” (Mātiu 6:9) Naʻe fakalieliaʻi ʻe he angatuʻu ʻi ʻĪtení ʻa e huafa ʻo e ʻOtuá, ʻo langaʻi ai ʻa e veiveiua fekauʻaki mo e ongoongo ʻo e ʻOtuá pea mo ʻene founga pulé. Heʻikai ʻaupito ke fakamolemoleʻi ʻe Sihova ha lauʻikovi loi mo ha angatuʻu pehē. Naʻá ne moʻuaʻaki ke fakaʻatā hono huafá mei hano lumaʻi.​—Aisea 48:11.

¹⁴ Toe fakakaukau ange ki he kau ʻIsilelí. Koeʻuhi naʻa nau hoko ko e kau pōpula ʻi ʻIsipite, naʻe hā ngali tuēnoa ai ʻa e talaʻofa ʻa e ʻOtuá kia ʻĒpalahame ʻo pehē ʻe tāpuakiʻi ʻa e kotoa ʻo e ngaahi fāmili ʻo e māmaní fakafou ʻi hono hakó. Ka ʻi hono fakahaofi kinautolu mo fokotuʻu kinautolu ko ha puleʻangá, naʻe fakaʻatā ai ʻe Sihova hono huafá mei hano lumaʻi. ʻOku fakamanatu mai ai ʻe he palōfita ko Tanielá ʻi heʻene lotú: “ʻA e ʻAfiona naʻa ke ʻomi ho kakai mei Isipite ʻaki ha nima malohi, ʻo ke maʻu ai ha ongoongo.”​—Taniela 9:15.

15. Ko e hā naʻe fakahaofi ai ʻe Sihova ʻa e kau Siú mei he nofo pōpula ʻi Pāpiloné?

¹⁵ Ko e meʻa ʻoku mahuʻingá, naʻe lotu peheni ʻa Taniela ʻi ha taimi ʻa ia naʻe fiemaʻu ai ʻe he kau Siú ke toe ngāue mai ʻa Sihova koeʻuhi ko Hono huafá. Naʻe nofo pōpula ʻa e kau Siu talangataʻá ʻi he taimi ko ʻení ʻi Pāpilone. Ko honau kolomuʻa totonú, ʻa Selusalema, naʻe tuʻu maomaonganoa. Naʻe ʻilo ʻe Taniela ko hano toe fakafoki ʻo e kau Siú ki honau fonua totonú ʻe fakahīkihikiʻi ai ʻa e huafa ʻo Sihová. Naʻe lotu ai ʻa Taniela: “Atonai e, fakamolemole: Atonai e, finangalo mai mo fai; ʻe hoku ʻOtua, ʻoua te ke fakatotoka, telia ʻa e ʻAfiona, he ko ho huafa ʻoku uiʻaki ho kolo mo ho kakai.”​—Fakaʻītali ʻamautolu; Taniela 9:18, 19.

16. Fakamatalaʻi ʻa e ʻuhinga ko e mahuʻingaʻia ʻa Sihova ʻi hono maluʻi hono huafá ʻoku ʻikai ʻuhinga ia ai ʻokú ne taʻeongoʻi mo siokita.

¹⁶ Ko e mahuʻingaʻia ko ia ʻa Sihova ʻi hono maluʻi hono huafá ʻoku ʻuhinga iá ʻokú ne taʻeongoʻi mo siokita? ʻIkai, ʻi he ngāue ʻo fehoanaki mo ʻene māʻoniʻoní mo e ʻofa ki he fakamaau totonú, ʻokú ne maluʻi ai hono kakaí. Fakakaukau angé ki he Senesi vahe 14. ʻI aí ʻoku tau lau ʻo fekauʻaki mo e ngaahi tuʻi fakatūʻuta ʻe toko fā naʻa nau puke fakamālohi ʻa e ʻilamutu ʻo ʻĒpalahame ko Loté, fakataha mo e fāmili ʻo Loté. ʻI he tokoni ʻa e ʻOtuá, naʻe fakahoko ai ʻe ʻĒpalahame ha ikuʻi fakaofo ʻo e ngaahi konga kau tokolahi kāfakafa angé! Ko e fakamatala ʻo e ikuna ko ʻení naʻe hangehangē ko e ʻuluaki meʻa ia ne fakahū ʻi he “Tohi ʻo e ngaahi Tau ʻa Sihova,” ngalingali ko ha tohi ʻoku toe hiki ai ha ngaahi fepaki fakakautau ʻe niʻihi ʻa ia ʻoku ʻikai lēkooti ʻi he Tohitapú. (Nōmipa 21:14) Naʻe ʻi ai mo e ngaahi ikuna lahi ange naʻe teu ke hoko mai.

17. Ko e hā ʻokú ne fakahaaʻi naʻe faitau ʻa Sihova maʻá e kau ʻIsilelí ʻi he hili ʻenau hū ki he fonua ko Kēnaní? ʻOmai ha ngaahi fakatātā.

¹⁷ Taimi siʻi pē ki muʻa pea hū ʻa e kau ʻIsilelí ki he fonua ko Kēnaní, naʻe fakapapauʻi ange ʻe Mōsese kiate kinautolu: “Ko Sihova ko homou ʻOtua ʻoku haʻele muʻomuʻa kiate kimoutolu; ko ia ia te ne tau maʻamoutolu, ʻo hange ko ʻene fuʻu fai ko ia maʻamoutolu ʻi Isipite.” (Teutalōnome 1:30; 20:1) Kamata mei he tokotaha fetongi ʻo Mōsesé, ʻa Siosiua, pea hokohoko mai ai ʻi he kotoa ʻo e vahaʻa taimi ʻo e kau Fakamāú, pea mo e ngaahi pule ʻa e ngaahi tuʻi loto-tōnunga ʻo Siutá, naʻe faitau moʻoni ai ʻa Sihova maʻa hono kakaí, ʻo ʻoange ai kiate kinautolu ʻa e ikunaʻi fakaholomamata lahi ʻo honau ngaahi filí.​—Siosiua 10:1-14; Fakamaau 4:12-17; 2 Sāmiuela 5:17-21.

18. (a) Ko e hā ʻoku malava ai ke tau fakamālōʻia ʻi he ʻikai ke liliu ʻa Sihová? (e) Ko e hā ʻe hoko ʻi he taimi ʻe aʻu ai ʻa e fetāufehiʻaʻaki ʻoku fakamatalaʻi ʻi he Sēnesi 3:15 ki hono tumutumú?

¹⁸ Kuo ʻikai ke liliu ʻa Sihova; pea kuo ʻikai ke liliu ʻene taumuʻa ke ʻai ʻa e palanite ko ʻení ko ha palataisi melinó. (Sēnesi 1:27, 28) ʻOku kei fehiʻa pē ʻa e ʻOtuá ʻi he fulikivanú. ʻI he taimi tatau pē, ʻokú ne ʻofeina ʻene kakaí pea ʻe vavé ni ke ngāue mai maʻanautolu. (Sāme 11:7) Ko hono moʻoní, ko e fetāufehiʻaʻaki naʻe fakamatalaʻi ʻi he Sēnesi 3:15 ʻoku ʻamanaki ke aʻu atu ia ki ha liliu fakaofo mo fakamālohi ʻi he kahaʻu vavé ni maí. Ke fakamāʻoniʻoniʻi hono huafá mo maluʻi hono kakaí, ʻe toe hoko ʻa Sihova ko ha “pateʻitau”!​—Sakalaia 14:3; Fakahā 16:14, 16.

19. (a) Fakatātaaʻi ʻa e ʻuhinga ʻoku malava ai ʻe he ngāueʻaki ʻe he ʻOtuá ʻa e mālohi fakaefakaʻauhá ʻo tohoaki kitautolu ke ofi kiate iá. (e) Ko e hā ʻa e ola ʻoku totonu ke ʻai ʻiate kitautolu ʻe he loto-lelei ʻa e ʻOtuá ke faitaú?

¹⁹ Fakakaukau angé ki ha talanoa fakatātā: Pehē pē naʻe ʻohofi ha fāmili ʻo ha tangata ʻe ha fuʻu manu fekai pea ʻoho atu ʻa e tangatá ʻo faitau ʻo ne tāmateʻi ʻa e fuʻu manu mālohí ni. Te ke ʻamanekina ko hono uaifí mo e fānaú te nau fakaliliʻa ʻi he foʻi ngāue ko ʻení? ʻI hono kehé, te ke ʻamanekina ʻe maongo kia kinautolu ʻa ʻene ʻofa taʻesiokita kiate kinautolú. ʻI ha founga meimei tatau, ʻoku ʻikai totonu ke tau fakaliliʻa ʻi hono ngāueʻaki ʻe he ʻOtuá ʻa e mālohi fakaefakaʻauhá. Ko ʻene loto-lelei ke faitau ke maluʻi kitautolú ʻoku totonu ke tupulekina ai ʻetau ʻofa kiate iá. Ko ʻetau tokaʻi hono mālohi taʻefakangatangatá ʻoku totonu ke toe loloto mo ia foki. Ko ia, ʻoku malava ai ke tau “fai ki he ʻOtuá ʻa e ngāue toputapú fakataha mo e manavahē-ʻOtuá mo e ʻapasiá.”​—Hepelu 12:28, NW.

20. ʻI heʻetau lau ʻa e ngaahi fakamatala ʻa e Tohitapú ʻo fekauʻaki mo e faitau fakaʻotua ʻoku ʻikai nai ke tau mahinoʻi kakató, ʻoku totonu ke fēfē ʻetau talí, pea ko e hā hono ʻuhingá?

²⁰ Ko hono moʻoní, ʻoku ʻikai ke fakamatalaʻi ʻe he Tohitapú ʻi he tuʻunga taki taha ʻa e kotoa ʻo e fakaikiiki ʻo e ngaahi fili ʻa Sihova ʻoku fai fekauʻaki mo e faitau fakaʻotuá. Ka ʻi he meʻá ni ʻoku malava ke tau fakapapauʻi maʻu pē: Heʻikai ʻaupito ke ngāueʻaki ʻe Sihova ʻa e mālohi fakaefakaʻauhá ʻi ha founga taʻetotonu, taʻehamakatuʻunga lelei, pe anga-fakamamahi. Ko e meʻa ʻoku faʻa hokó, ʻi he fakakaukau atu ki he potutohi ʻo ha fakamatala faka-Tohitapu pe ko ha fakamatala fakaepuipuituʻa ʻe niʻihi ʻoku malava ke tokoniʻi ai kitautolu ke tau ʻai ʻa e ngaahi meʻá ki hono tuʻunga totonú. (Palōveepi 18:13) Naʻa mo e taimi ʻoku ʻikai ai te tau maʻu ʻa e kotoa ʻo e ngaahi fakaikiikí, ko e ako lahi ange pē fekauʻaki mo Sihová pea fakalaulauloto ki hono ngaahi ʻulungaanga mātuʻaki mahuʻingá ʻe malava ke ne tokoniʻi kitautolu ke tau fakaleleiʻi ha faʻahinga veiveiua pē ʻe malanga hake nai. ʻI heʻetau fai ʻení, te tau hoko ai ʻo ʻiloʻi ʻoku tau maʻu ʻa e ʻuhinga feʻunga ke falala ai ki hotau ʻOtuá, kia Sihova.​—Siope 34:12.

21. Lolotonga ʻokú ne “pateʻitau” ʻi he taimi lahi, ko e tokotaha fēfē moʻoni ʻa Sihova?

²¹ Neongo ko Sihová ko ha “pateʻitau” ʻi he taimi ʻoku fiemaʻu ai ia ʻi ha tuʻungá, ʻoku ʻikai ʻuhinga ai ia ʻokú ne loto fie tau. ʻI he vīsone ʻa ʻIsikeli fekauʻaki mo e saliote fakalangí, ʻoku fakatātaaʻi ai ʻa Sihova ʻokú ne mateuteu ke faitau ki hono ngaahi filí. Neongo ia, naʻe sio ʻa ʻIsikeli ia ki he ʻOtuá naʻe takatakaiʻi ʻe ha ʻumata​—ko ha fakaʻilonga ʻo e melino. (Sēnesi 9:13; ʻIsikeli 1:28; Fakahā 4:3) ʻOku hā mahino, ʻoku anga-mokomoko mo fakatupu melino ʻa Sihova. “Ko e ʻOtua ko e ʻOfa,” ko e tohi ia ʻa e ʻapositolo ko Sioné. (1 Sione 4:8) Ko e kotoa ʻo e ngaahi ʻulungaanga ʻo Sihová ʻoku ʻi ai ia ʻi he tuʻunga mafamafatatau haohaoa. Ko ia ai, he monūʻia ē ka ko kitautolu, heʻetau malava ke ʻunuʻunu ofi ki ha ʻOtua mālohi pehē fau ka neongo iá ʻoku ʻofa!