ʻUnuʻunu Ofi ki he ʻOtuá

Ko ha Fakamaau ʻOkú Ne Fai Maʻu Pē ʻa e Meʻa ʻOku Totonú

Senesi 18:22-32

FAKAMAAU TOTONU. Faitotonu. Taʻefilifilimānako. ʻIkai ʻoku tohoakiʻi koe ki he ngaahi ʻulungāanga tuʻu-ki-muʻa ko iá? Ko kitautolu faʻahinga ʻo e tangatá naʻe fanauʻi kitautolu mo ha holi ke totonu ʻa e tōʻonga ʻoku fai maí. Ko e meʻa fakamamahí, ʻoku faʻa fakamoʻoniʻi ʻa hono maʻungataʻa ʻa e fakamaau totonú ʻi he māmani ʻo e ʻaho ní. Kae kehe, ʻoku ʻi ai ha Fakamaau ʻoku tuha mo ʻetau falalá—ko e ʻOtua ko Sihová. ʻOkú ne fai maʻu pē ʻa e meʻa ʻoku totonú. Naʻe ʻai ʻo hā mahino eni ʻi ha fetalanoaʻaki naʻe hoko ʻi he vahaʻa ʻo Sihova mo ʻĒpalahamé, hangē ko ia ʻoku lēkooti ʻi he Senesi 18:22-32.a

ʻI hono tala ʻe Sihova kia ʻĒpalahame ʻa ʻEne fili ke vakaiʻi ʻa e ngaahi tuʻunga ʻi Sōtoma mo Komolá, naʻe manavahē ʻa ʻĒpalahame telia ʻa e malu ʻa ha kakai māʻoniʻoni pē naʻe nofo ai, ʻo kau ai ʻa Lote ʻa ia naʻá ne fohaʻakí. Naʻe kōlenga ʻa ʻĒpalahame kia Sihova: “Te ke fakaʻauha ʻa e maʻoniʻoni fakataha mo e angahala? Naʻa ʻoku ʻi ai ha toko nimangofulu maʻoniʻoni ʻi he kolo ko ia: pea te ke fakaʻauha pe, ʻo ʻikai te ke fakamolemole ʻa e feituʻu koeʻuhi ko e toko nimangofuluʻi maʻoniʻoni ʻoku ʻi ai?” (Veesi 23, 24) Naʻe folofola ʻa e ʻOtuá te ne fakahaofi ʻa e ongo koló kapau ko e kau tangata māʻoniʻoni pē ʻe toko 50 naʻe ʻi aí. Naʻe kole tuʻo nima ʻa ʻĒpalahame kia Sihova, ʻo holoki māmālie hifo ai ʻa e tokolahí ki he toko hongofulu. ʻI he taimi taki taha, naʻe folofola ai pē ʻa e ʻOtuá heʻikai te ne maumauʻi ʻa e ongo koló kapau naʻe ʻi ai ʻa e kau tangata māʻoniʻoni ʻi he tokolahi ko iá.

Naʻe fakakikihi ʻa ʻĒpalahame mo e ʻOtuá? Mole ke mamaʻo! Ne mei fakahaaʻi ai ha leʻo fefeka ia. Ko e tō ʻo e leʻo ʻo ʻĒpalahamé naʻe hā mei ai ʻa e ʻapasia mo e anga-fakatōkilalo totonu. Naʻá ne lave kiate ia tonu ko e “efu mo efuefu” pē. Naʻe tuʻo fā ʻene lea fakaʻapaʻapa “kātaki.” (Veesi 27, 30-32, NW) ʻIkai ko ia pē, naʻe fakahaaʻi ʻi he ngaahi lea ʻa ʻĒpalahamé ʻa ʻene tuipau ki he faitotonu ʻa Sihová. Ko e foʻi fakakaukau ko ia ʻe fakaʻauha ʻe he ʻOtuá ʻa e māʻoniʻoní fakataha mo e angahalá ʻe “mole ke mamaʻo,” ko e lea ia ʻa ʻĒpalahamé—ʻo ʻikai tuʻo taha pē kae tuʻo ua. Ko e pēteliake faitōnungá naʻá ne leaʻaki ʻa ʻene tuipau ko e “Fakamāu ʻo mamani katoa” te ne “fai totonu.”—Veesi 25.

Naʻe tonu ʻa ʻĒpalahame ʻi he ngaahi meʻa naʻá ne leaʻakí? ʻIo mo ʻikai. Naʻá ne fehālaaki ʻi heʻene fakakaukau naʻe ʻi ai ʻo ʻikai siʻi hifo ʻi he kakai māʻoniʻoni ʻe toko hongofulu ʻi Sōtoma mo Komola. Ka naʻá ne moʻoni ʻaupito ʻi heʻene pehē ko e ʻOtuá heʻikai ʻaupito te ne “fakaʻauha ʻa e maʻoniʻoni fakataha mo e angahala.” ʻI hono fakaʻauha ki mui ʻe he ʻOtuá ʻa e ongo kolo fulikivanu ko iá, naʻe hao ai ʻa e māʻoniʻoni ko Loté mo hono ongo ʻofefiné ʻi ha tokoni fakaeʻāngelo.—2 Pita 2:7-9.

Ko e hā ʻoku akoʻi mai ʻe he fakamatala ko ení kia kitautolu fekauʻaki mo Sihová? ʻI he fakahaaʻi kia ʻĒpalahame ʻa ʻEne taumuʻa ke vakaiʻi ʻa e ongo koló, ko hono moʻoní, naʻe fakaafeʻi ai ia ʻe Sihova ke na talanoa. Pea naʻá ne fanongo anga-kātaki leva ʻi hono fakahaaʻi ʻe hono kaumeʻa ko ʻĒpalahamé ʻa e hohaʻa naʻe ʻi hono lotó. (Aisea 41:8) He fakalata moʻoni ko hono akoʻi mai ʻe he meʻá ni kia kitautolu ko Sihová ko ha ʻOtua anga-fakatōkilalo, ʻa ia ʻokú ne fakangeingeiaʻi mo fakalāngilangiʻi ʻa ʻene kau sevāniti ʻi he māmaní! ʻOku hā mahino, ʻoku tau maʻu ʻa e ʻuhinga ke tuku ai ʻetau falala kakató ʻia Sihova, ko e Fakamaau ʻokú ne fai maʻu pē ʻa e meʻa ʻoku totonú.

[Fakamatala ʻi lalo]

[Fakatātā ʻi he peesi 10]

Naʻe kōlenga ʻa ʻĒpalahame kia Sihova ʻo fekauʻaki mo Sōtoma pea mo Komola