“Poto ʻi he Lotó”​—Kae Kei Anga-Fakatōkilalo

1-3. Ko e hā ʻoku tau ʻilo pau ai ʻoku anga-fakatōkilalo ʻa Sihová?

ʻOKU loto ha tamai ke ʻoatu ha lēsoni mātuʻaki mahuʻinga ki heʻene kiʻi tamá. ʻOkú ne vēkeveke ke aʻu ki he lotó. Ko e hā ʻa e fakaofiofi ʻoku totonu ke ne faí? ʻOku totonu ke ne tuʻu fakamanamana ʻi he tafaʻaki ʻo e kiʻi tamá pea ngāueʻaki ʻa e lea fefeka? Pe ʻoku totonu ke ne tulolo hifo ke māʻolunga tatau mo e kiʻi tamá pea lea ʻi ha founga anga-malū mo fakamānako? Ko hono moʻoní, ko ha tamai poto mo anga-fakatōkilalo te ne fili ʻa e fakaofiofi anga-maluú.

² Ko e faʻahinga Tamai fēfē ʻa Sihova​—anga-hiki pe anga-fakatōkilalo, anga-fefeka pe anga-malū? Ko Sihová ʻoku ʻilo-fakaʻaufuli mo poto-fakaʻaufuli. Neongo ia, kuó ke fakatokangaʻi ʻoku ʻikai pau ke hanga ʻe he ʻiló mo e ʻatamai potó ʻo ʻai ʻa e kakaí ke nau anga-fakatōkilalo? Hangē ko ia ʻoku pehē ʻe he Tohitapú, “ko e ʻilo ko e meʻa fakafuofuolahi ia.” (1 Kolinitō 3:19; 8:1) Ka ko Sihova, ʻa ia ʻoku “boto ia i loto,” ʻoku toe anga-fakatōkilalo ia. (Siope 9:4, PM) ʻOku ʻikai ke pehē ia ʻokú ne ʻi ha tuʻunga māʻulalo pe ʻikai molumalu, ka ʻoku ʻikai ha anga-hiki ʻiate ia. Ko e hā ʻoku pehē aí?

³ Ko Sihová ʻoku māʻoniʻoni. Ko ia ai, ko e anga-hikí, ko ha anga ia ʻoku ʻuli, ʻoku ʻikai ke ʻiate ia. (Maʻake 7:20-22) ʻIkai ngata aí, fakatokangaʻi ʻa e meʻa naʻe leaʻaki ʻe he palōfita ko Selemaiá kia Sihová: “Ko e moʻoni te ke manatuʻi au peá ke punou hifo koeʻuhi ko au.”a (Tangilāulau 3:20, NW) Sioloto atu! Ko Sihova, ʻa e ʻEiki Hau ʻo e ʻunivēsí, naʻá ne loto-lelei ke “punou hifo,” pe ʻalu hifo ki he tuʻunga ʻo Selemaiá, koeʻuhi ke ne tokanga lelei ki he tangata taʻehaohaoa ko iá. (Sāme 113:7) ʻIo, ʻoku anga-fakatōkilalo ʻa Sihova. Ka ko e hā ʻoku kau ki he anga-fakatōkilalo fakaʻotuá? ʻOku fēfē ʻene felāveʻi mo e potó? Pea ko e hā ʻoku mahuʻinga ai ia kiate kitautolú?

4, 5. (a) Ko e hā ʻa e anga-fakatōkilaló, ʻoku anga-fēfē hono fakahāhāʻí, pea ko e hā ʻoku totonu ai ke ʻoua ʻaupito naʻa maʻuhala ia ko e vaivai pe loto-siʻí? (e) Naʻe anga-fēfē hono fakahāhā ʻe Sihova ʻa e anga-fakatōkilaló ʻi heʻene ngaahi ngāue maʻa Tēvitá, pea ʻoku mahuʻinga fēfē kiate kitautolu ʻa e anga-fakatōkilalo ʻa Sihová?

⁴ Ko e anga-fakatōkilaló ko e fakakaukau fakatōkilalo, ʻoku ʻikai ʻi ai ʻa e loto-fieʻeikí mo e loto-pōlepolé. Ko ha anga ʻi loto ʻo e lotó, ʻa e anga-fakatōkilaló ʻoku fakahāhaaʻi ia ʻi he ngaahi anga hangē ko e anga-maluú, anga-kātakí, mo e anga-fakaʻatuʻí. (Kalētia 5:22, 23) Neongo ia, ʻoua ʻaupito naʻa maʻuhala ʻa e ngaahi ʻulungaanga fakaʻotua ko ʻení ko e vaivai pe loto-siʻi. ʻOku ʻikai te nau fepaki mo e houhau māʻoniʻoni ʻa Sihová pe ko ʻene ngāueʻaki ʻa e mālohi fakaefakaʻauhá. ʻI hono kehé, ʻi heʻene anga-fakatōkilaló mo anga-maluú, ʻoku fakahāhā ai ʻe Sihova hono fuʻu ivi lahí, ʻa hono mālohi ke puleʻi haohaoa ʻa ia tonú. (Aisea 42:14) ʻOku anga-fēfē ʻa e felāveʻi ʻa e anga-fakatōkilaló mo e potó? ʻOku pehē ʻe ha maʻuʻanga fakamatala ʻe taha ki he Tohitapú: “ʻOku fakamatalaʻi aofangatuku ʻa e anga-fakatōkilaló . . . ʻi he tuʻunga ʻo e taʻesiokitá pea ko ha makatuʻunga mātuʻaki mahuʻinga ia ʻo e poto kotoa pē.” Ko ia, ko e poto moʻoní ʻoku ʻikai malava ke ʻi ai ia ʻo mavahe mei he anga-fakatōkilaló. ʻOku anga-fēfē ʻa e ʻaonga kiate kitautolu ʻa e anga-fakatōkilalo ʻa Sihová?

⁵ Naʻe hiva ʻa Tuʻi Tēvita kia Sihova: “Kuo ke ʻomi kiate au ho pā fakamoʻui: pea ko ho nima toʻomataʻu kuo ne poupou mai, pea ko hoʻo fakaalaala [“anga-fakatōkilaló,” NW] kuo u hoko ai ʻo fuʻu lahi.” (Sāme 18:35) Ko hono moʻoní, naʻe punou hifo ʻa Sihova koeʻuhi ke ngāue maʻá e tangata taʻehaohaoa ko ʻení, ʻo maluʻi mo tokoniʻi ia ʻi he ʻaho ki he ʻaho. Naʻe ʻilo ʻe Tēvita ko haʻane maʻu ʻa e fakamoʻuí​—pea naʻa mo ha faai atu pē, ʻo maʻu ha tuʻunga lahi ʻi he hoko ko ha tuʻí​—ʻe hoko pē iá koeʻuhi ko e loto-lelei ʻa Sihova ke ne anga-fakatōkilalo ʻa Ia tonu ʻi he foungá ni. Ko hono moʻoní, ko hai ʻiate kitautolu te ne maʻu ha ʻamanaki ʻo e fakamoʻuí kapau naʻe ʻikai ke anga-fakatōkilalo ʻa Sihova, ʻo loto-lelei ke ne fakamāʻulaloʻi ia koeʻuhi ke feangai mo kitautolu ʻi he tuʻunga ko ha Tamai anga-malū mo ʻofa?

6, 7. (a) Ko e hā ʻoku ʻikai ʻaupito ai ke lave ʻa e Tohitapú kia Sihova ʻokú ne anga-fakanānaá? (e) Ko e hā ʻa e fekauʻaki ʻa e anga-maluú mo e potó, pea ko hai ʻokú ne fokotuʻu ʻa e faʻifaʻitakiʻanga taupotú ʻi he meʻá ni?

⁶ ʻOku taau ke fakatokangaʻi ʻoku ʻi ai ha faikehekehe ʻi he vahaʻa ʻo e anga-fakatōkilaló mo e anga-fakanānaá. Ko e anga-fakanānaá ko ha ʻulungaanga fakaʻofoʻofa ia ki he faʻahinga faitōnunga ʻo e tangatá ke nau fakatupulekina. Hangē pē ko e anga-fakatōkilaló, ʻoku fekauʻaki ia mo e potó. Ko e fakatātaá, ʻoku pehē ʻe he Palōveepi 11:2 (NW): “Ko e potó ʻoku ʻi he faʻahinga ia ʻoku anga-fakanānaá.” Kae kehe, ʻoku ʻikai ʻaupito ke lea ʻa e Tohitapú fekauʻaki mo Sihova ʻokú ne anga-fakanānā. Ko e hā ʻoku ʻikai aí? Ko e anga-fakanānaá, hangē ko hono ngāueʻaki ʻi he ngaahi Konga Tohitapú, ʻokú ne fakahaaʻi ha lāuʻilo totonu ki hoto ngaahi ngataʻanga ʻoʻotá. Ko e Māfimafi-Aoniú ʻoku ʻikai hano ngaahi ngataʻanga tuku kehe ʻa e ngaahi ngataʻanga ʻokú ne fokotuʻu kiate ia koeʻuhi ko ʻene ngaahi tuʻunga māʻoniʻoní tonu. (Maʻake 10:27; Taitusi 1:2) ʻIkai ngata aí, ʻi he tuʻunga ko e Fungani Māʻolungá, ʻoku ʻikai te ne moʻulaloa ki ha taha. Ko ia ai, ko e ʻulungaanga ko ia ko e anga-fakanānaá ʻoku ʻikai pē ke ngāueʻaki ia kia Sihova.

⁷ Kae kehe, ʻoku anga-fakatōkilalo mo anga-malū ʻa Sihova. ʻOkú ne akoʻi ki heʻene kau sevānití ko e anga-maluú ʻoku mātuʻaki fiemaʻu ia ki he poto moʻoní. ʻOku lea ʻene Folofolá fekauʻaki mo e “anga-malū ʻa ia ʻoku tupu mei he potó.”b (Sēmisi 3:13, NW) Fakakaukau ange ki he faʻifaʻitakiʻanga ʻa Sihová ʻi he meʻá ni.

8-10. (a) Ko e hā ʻoku taau ai ke fakatokangaʻi ʻoku fakahāhā ʻe Sihova ha loto-lelei ke vaheʻi ha meʻa pea ke fanongó? (e) Kuo anga-fēfē ʻa e feangai anga-fakatōkilalo ʻa e Māfimafi-Aoniú mo ʻene kau ʻāngeló?

⁸ ʻOku ʻi ai ha fakamoʻoni fakalotomāfana ʻo e anga-fakatōkilalo ʻa Sihová ʻi heʻene loto-lelei ke vaheʻi atu ʻa e fatongiá pea ke fanongó. Ko ʻene fai peheé ʻoku fakaofo ia; ʻoku ʻikai fiemaʻu kia Sihova ia ha tokoni pe faleʻi. (Aisea 40:13, 14; Loma 11:34, 35) Ka neongo ia, ʻoku toutou fakahā mai ʻe he Tohitapú kiate kitautolu ko Sihová ʻokú ne afeitaulalo ʻi he ongo foungá ni.

⁹ Ko e fakatātaá, fakakaukau angé ki ha meʻa tuʻu-ki-muʻa naʻe hoko ʻi he moʻui ʻa ʻĒpalahamé. Naʻe ʻi ai ʻa e kau ʻaʻahi ʻe toko tolu kia ʻĒpalahame, ko e taha ai naʻá ne lea ki ai ʻo pehē ko “Sihova.” Ko hono moʻoní, ko e kau ʻaʻahí ko e kau ʻāngelo, ka ko e taha ʻo kinautolu naʻe haʻu ia ʻi he huafa ʻo Sihová pea naʻe ngāue ʻi Hono huafá. ʻI he taimi naʻe lea mo ngāue ai ʻa e ʻāngelo ko iá, naʻe hangē ia ko Sihova ne lea mo ngāué. ʻI he foungá ni, naʻe tala ai ʻe Sihova kia ʻĒpalahame naʻá Ne fanongo ki he leʻo-lahi ʻa e “tangi ʻa Sotoma mo Komola.” Naʻe fakahā ʻe Sihova: “Kau ʻalu hifo muʻa, ʻo vakaiā, pe kuo pehe fau ʻenau fai, ʻo hange ko e tangi kuo ongo mai; pea ka ʻikai, pea u ʻilo.” (Sēnesi 18:3, NW; 18:20, 21) Ko ia ai, ko e lea ʻa Sihová naʻe ʻikai ke ʻuhinga iá ko e Māfimafi-Aoniú te ne “ʻalu hifo” tonu. ʻI hono kehé, naʻá ne toe fekau hifo ʻene ongo ʻāngelo ke fakafofongaʻi ia. (Sēnesi 19:1) Ko e hā hono ʻuhingá? ʻIkai naʻe malava ʻe Sihova ʻoku tokaimaʻananga-fakaʻaufuli maí ke ne “hoko ʻo ʻilo” ʻiate ia pē ʻa e tuʻunga moʻoni ʻo e feituʻu ko iá? Ko e moʻoni ia. Ka ʻi hono kehé, naʻe ʻoange anga-fakatōkilalo ʻe Sihova ki he ongo ʻāngelo ko iá ʻa e ngafa ke fakatotoloʻi ʻa e tuʻungá pea ke ʻaʻahi kia Lote mo hono fāmilí ʻi Sōtoma.

¹⁰ ʻIkai ngata aí, ʻoku fanongo ʻa Sihova. ʻI he taimi ʻe taha naʻá ne kole ai ki heʻene kau ʻāngeló ke nau fokotuʻu mai ha ngaahi founga kehekehe ke hoko ai ha tō ʻa Tuʻi ʻĒhapi fulikivanu. Naʻe ʻikai ke fiemaʻu ʻe Sihova ia ha tokoni pehē. Ka, naʻá ne tali ʻa e fokotuʻu mei he ʻāngelo ʻe taha peá ne fekau ia ke ʻalu ʻo fai pehē. (1 Tuʻi 22:19-22) ʻIkai ko e anga-fakatōkilaló ia?

11, 12. Naʻe anga-fēfē ʻa e hoko ʻa ʻĒpalahame ʻo ʻiloʻi ʻa e anga-fakatōkilalo ʻa Sihová?

¹¹ ʻOku aʻu ʻo loto-lelei ʻa Sihova ke fanongo ki he faʻahinga taʻehaohaoa ʻo e tangatá ʻa ia ʻoku nau holi ke fakahaaʻi atu ʻenau ngaahi loto-hohaʻá. Hangē ko ení, ʻi hono ʻuluaki tala ʻe Sihova kia ʻĒpalahame ʻa ʻEne taumuʻa ke fakaʻauha ʻa Sōtoma mo Komolá, naʻe puputuʻu ʻa e tangata faitōnunga ko iá. “Mole ke mamaʻo ʻa e fai ʻe he ʻAfiona ha meʻa pehe,” ko e lea ia ʻa ʻĒpalahamé, pea tānaki atu: “ʻO ʻikai fai totonu koā ʻa e Tuʻi Fakamāu ʻo mamani katoa?” Naʻá ne ʻeke pe ʻe fakahaofi ʻe Sihova ʻa e ongo koló kapau ʻe lava ke maʻu ha kau tangata māʻoniʻoni ʻe toko 50 ai. Naʻe fakapapauʻi ange ʻe Sihova kiate ia te Ne fai pehē. Ka naʻe toe ʻeke ʻe ʻĒpalahame, ʻo tuku hifo ʻa e fiká ki he 45, pea ki he 40, ʻo fai pehē hifo ai pē. Neongo ʻa e toutou fakapapauʻi ange ʻe Sihová, naʻe vilitaki pē ʻa ʻĒpalahame ʻo aʻu ki he ʻalu hifo ʻa e fiká ki he hongofulú. Mahalo pē naʻe teʻeki ai ke mahinoʻi kakato ʻe ʻĒpalahame ʻa e faimeesi ʻa Sihová. Pe ko e hā pē ʻa e ʻuhingá, naʻe fakaʻatā anga-kātaki mo anga-fakatōkilalo ʻe Sihova hono kaumeʻa mo ʻene sevāniti ko ʻĒpalahamé ke ne fakahaaʻi ange ʻene ngaahi loto-hohaʻá ʻi he foungá ni.​—Senesi 18:23-33.

¹² Ko e kau ako lelei, mo poto lahi ʻe toko fiha ʻi he faʻahinga ʻo e tangatá te nau fanongo mātuʻaki anga-kātaki ki ha tokotaha ʻoku mātuʻaki māʻulalo ange ʻi he poto fakaeʻatamaí?c ʻOku pehē ʻa e anga-fakatōkilalo ʻa hotau ʻOtuá. ʻI he lolotonga ʻa e fetalanoaʻaki tatau pē, naʻe toe ʻilo ai ʻe ʻĒpalahame ko Sihová ʻoku “tuai ki he houhau.” (Ekisoto 34:6) ʻI heʻene fakatokangaʻi nai naʻe ʻikai haʻane totonu ke fehuʻia ʻa e ngaahi ngāue ʻa e Fungani Māʻolungá, naʻe tuʻo ua ʻa e kole ʻa ʻĒpalahame: “Ofa ke oua naa houhau a Jihova.” (Sēnesi 18:30, 32, PM) Ko hono moʻoní, naʻe ʻikai ke houhau ʻa Sihova. ʻOkú ne maʻu moʻoni ʻa e “anga-malū ʻa poto.”

13. Ko e hā ʻa e ʻuhinga ʻo e foʻi lea ko e “fakaʻatuʻi” ʻo hangē ko ia ko hono ngāueʻaki ʻi he Tohitapú, pea ko e hā ʻoku fakamatalaʻi feʻungamālie ai ʻe he foʻi leá ni ʻa Sihová?

¹³ ʻOku hā ʻa e anga-fakatōkilalo ʻa Sihová ʻi ha toe ʻulungaanga fakaʻofoʻofa ʻe taha​—ko e anga-fakaʻatuʻí. Ko e ʻulungāngá ni ʻoku fakamamahi ʻa e siʻi ʻene ʻi he lotolotonga ʻo e faʻahinga taʻehaohaoa ʻo e tangatá. ʻOku ʻikai ngata pē ʻi he loto-lelei ʻa Sihova ke fanongo ki heʻene ngaahi meʻamoʻui ʻatamai potó ka ʻokú ne toe loto-lelei ke ʻulutukua ʻi he taimi ʻoku ʻikai fepaki ai mo e ngaahi tefitoʻi moʻoni māʻoniʻoní. Hangē ko ia ko hono ngāueʻaki ʻi he Tohitapú, ko e foʻi lea ko e “fakaʻatuʻi” ʻoku ʻuhinga fakafoʻilea ia ko e “ʻulutukua.” Ko e ʻulungāngá ni foki ko ha fakaʻilonga ia ʻo e poto ʻo e ʻOtuá. ʻOku pehē ʻe he Sēmisi 3:17 (NW): “Ko e poto ʻoku mei ʻolungá [ʻoku] . . . fakaʻatuʻi.” ʻI he ʻuhinga fē ʻoku fakaʻatuʻi ai ʻa e poto-fakaʻaufuli ko Sihová? Ko e meʻa ʻe taha, ʻokú ne ngaofengofua. Manatuʻi, ʻoku akoʻi mai kiate kitautolu ʻe hono huafá tonu ko Sihová ʻokú ne fakatupunga ʻa ia tonu ke ne hoko ki ha meʻa pē ʻoku fiemaʻu ki ai koeʻuhi ke fakahoko ʻene ngaahi taumuʻá. (Ekisoto 3:14) ʻIkai ʻoku fakahaaʻi ʻe he meʻa ko iá ha laumālie ʻo e ngaofengofuá mo e anga-fakaʻatuʻí?

14, 15. Ko e hā ʻa e meʻa ʻoku hanga ʻe he vīsone ʻa ʻIsikeli fekauʻaki mo e saliote fakalangi ʻa Sihová ʻo akoʻi mai kiate kitautolu fekauʻaki mo e konga fakahēvani ʻo e kautaha ʻa Sihová, pea ʻoku anga-fēfē ʻene kehekehe mei he ngaahi kautaha fakamāmaní?

¹⁴ ʻOku ʻi ai ha konga fisifisimuʻa ʻi he Tohitapú ʻokú ne tokoniʻi kitautolu ke tau mahinoʻi ai ʻa e ngaofengofua ʻa Sihová. Naʻe ʻoange ki he palōfita ko ʻIsikelí ha vīsone fekauʻaki mo e konga fakahēvani ʻo e kautaha ʻa Sihová, ʻoku faʻuʻaki ʻa e ngaahi meʻamoʻui laumālié. Naʻá ne sio ai ki ha saliote ʻoku feongoongoi fakaofo, ko e “meʻalele” ʻa Sihova tonu ʻoku ʻi ai maʻu pē ʻi he malumalu ʻo ʻEne puleʻí. Ko e meʻa ʻoku fakatupu tokanga lahi tahá ko e founga ʻo ʻene ngaʻunú. Naʻe tafaʻaki-fā ʻa e ngaahi fuʻu foʻi vaʻé pea fonu ʻi he ngaahi foʻi mata koeʻuhi ke nau lava ai ʻo sio ki he feituʻu kotoa pē pea malava ke fetongi vave ʻa e feituʻu ʻoku ʻalu ki aí, ʻo ʻikai ke tuʻu pe tafoki. Ko e fuʻu saliote kāfakafá ni naʻe ʻikai ke totoho ia ʻo hangē ha meʻalele ʻalungataʻa ko e ngaohi ʻe he tangatá. ʻOku malava ke ngaʻunu ia ʻi he vave ʻo e māmá, naʻa mo ʻene fai ha ngaahi afe māsila! (Isikeli 1:1, 14-28) ʻIo, ko e kautaha ʻa Sihová, hangē pē ko ia ko hono puleʻi ia ʻe he Hau māfimafi-aoniú, ʻoku mātuʻaki ngaofengofua, ʻo fai ʻa e tali ki ha ngaahi tuʻunga feliliuaki pē mo e ngaahi fiemaʻu kuo pau ke ne ngāue ki aí.

¹⁵ ʻOku lava ke feinga pē ʻa e faʻahinga ʻo e tangatá ke faʻifaʻitaki ki ha ngaofengofua haohaoa pehē. Neongo, ko e meʻa ʻoku faʻa hokó ia, ʻoku lahi ange ʻa e anga-fefeka ia ʻa e faʻahinga ʻo e tangatá mo ʻenau ngaahi kautahá ʻi heʻenau ngaofengofuá, lahi ange ʻa e taʻefakaʻatuʻí ʻi he ʻulutukuá. Ke fakatātaaʻi: Ko ha fuʻu vaka uta lolo pe ko ha fuʻu lēlue uta koloa ʻe fakaofo nai hona lalahí mo e mālohí. Ka ʻe lava ha taha ʻo kinaua ʻo fai ha tali ki ha ngaahi liliu fakafokifā ʻi he tuʻungá? Kapau ʻe hoko ha faingataʻa ʻi he ngaahi halanga ʻi muʻa ʻi ha fuʻu lēlue uta koloa, heʻikai malava ha afe ia. ʻOku faingataʻa ʻaupito ha ngaahi tuʻu fakafokifā ia. ʻE toki tuʻu nai ha fuʻu lēlue uta koloa ia ʻi ha kilomita ʻe taha hili hono malaki ʻa e taʻofí! ʻI he tuʻunga meimei tatau, ʻe kei ngaʻunu pē nai ki muʻa ha fuʻu vaka uta lolo ia ʻi ha kilomita ʻe 8 hili hono tāmateʻi ʻa e mīsiní. Naʻa mo hano ʻai ke holomui ʻa e mīsiní, ʻe kei ngaʻunu atu pē ki muʻa ʻa e fuʻu vaka uta loló ia ʻi he kilomita ʻe tolu! ʻOku meimei tatau pē ia mo e ngaahi kautaha fakaetangata ʻa ia ʻoku nau hehema ke anga-fefeka mo anga-taʻefakaʻatuʻí. Koeʻuhi ko e loto-mahikihikí, ʻoku faʻa fakafisi ai ʻa e tangatá ke ngaofe ki he feliliuaki ʻa e ngaahi fiemaʻú mo e ngaahi tuʻungá. Ko e anga-fefeka peheé kuo mate ai ʻa e ngaahi kautaha pea aʻu ʻo tō ai ha ngaahi puleʻanga. (Palōveepi 16:18) He fiefia ē ko kitautolu ʻi he ʻikai ke pehē ʻa Sihova pe ko ʻene kautahá!

16. Naʻe anga-fēfē hono fakahāhā ʻe Sihova ʻa e anga-fakaʻatuʻí ʻi heʻene feangai mo Loté ki muʻa ke fakaʻauha ʻa Sōtoma mo Komolá?

¹⁶ Toe fakakaukau angé ki he fakaʻauha ʻo Sōtoma mo Komolá. Naʻe maʻu ʻe Lote mo hono fāmilí ʻa e ngaahi fakahinohino māʻalaʻala mei he ʻāngelo ʻa Sihová: “Hola pe ki he moʻunga.” Kae kehe, naʻe ʻikai ke hā lelei ʻeni kia Lote. “ʻEī, ʻoua muʻa ʻe pehe”! ko ʻene kolé ia. ʻI he tuipau te ne mate kapau ʻe hola ki he moʻungá, naʻe kōlenga ʻa Lote ke fakaʻatā ia mo hono fāmilí ke nau hola ki ha kolo ofi mai naʻe ui ko Soa. Manatuʻi, naʻe fakataumuʻa ʻa Sihova ia ke fakaʻauha ʻa e kolo ko iá. ʻIkai ngata aí, naʻe ʻikai ha makatuʻunga moʻoni ia ki he ilifia ʻa Loté. Ko hono moʻoní, naʻe malava kia Sihova ia ke ne haofaki moʻui ʻa Lote ki he moʻungá! Ka neongo ia, naʻe ʻulutukua ʻa Sihova ki he kole ʻa Loté pea fakahaofi ai ʻa Soa. “Ko eni, kuo u tokaʻi koe ʻi he meʻa ni foki,” ko e tala ange ia ʻe he ʻāngeló kia Loté. (Sēnesi 19:17-22) ʻIkai ko ha fakaʻatuʻi ia ʻi he tafaʻaki ʻa Sihová?

17, 18. ʻI he feangainga mo e kau Ninivé, naʻe anga-fēfē hono fakahāhā ʻe Sihova ʻokú ne fakaʻatuʻí?

¹⁷ ʻOku toe fai foki ʻe Sihova ʻa e tali ki he fakatomala fakamātoató, ʻo fai maʻu pē ʻa e meʻa ʻoku mohu meesi mo totonú. Fakakaukau ki he meʻa naʻe hoko ʻi he taimi naʻe fekauʻi ai ʻa e palōfita ko Sioná ki he kolo fulikivanu mo fakamālohi ko Ninivé. ʻI he laka atu ʻa Siona ʻi he hala ʻo Ninivé, ko e pōpoaki fakamānavaʻi naʻá ne fanongonongó naʻe mātuʻaki faingofua: Toe ʻa e ʻaho ʻe 40 pea ʻe fakaʻauha ʻa e fuʻu koló. Kae kehe, naʻe liliu lahi ʻa e ngaahi tuʻungá. Naʻe fakatomala ʻa e kau Ninivé!​—Siona, vahe 3.

¹⁸ ʻOku fakatupu ʻilo ke fakahoa ʻa e anga ʻo e tali ʻa Sihová pea mo e anga ʻo e tali ʻa Siona ki he mafuli ko ʻeni ʻa e ngaahi tuʻungá. ʻI he tuʻunga ko ʻení, naʻe ngaofengofua ʻa Sihova, ʻo fakatupunga ia ke ne hoko ko ha Tokotaha-Fakamolemole ʻo e ngaahi angahalá kae ʻikai ko ha “pateʻitau.”d (Ekisoto 15:3) ʻI he tafaʻaki ʻe tahá, naʻe ʻikai ke ngaofengofua ʻa Siona pea ʻikai ʻaupito ke mohu meesi. ʻI he ʻikai ke tapua atu ʻa e anga-fakaʻatuʻi ʻa Sihová, naʻá ne fai ʻe ia ʻa e tali ʻo mei hangē tofu pē ko e fuʻu lēlue uta koloa pe ko e fuʻu vaka uta lolo naʻe lave ki ai ki muʻá. Naʻá ne fanongonongo ʻa e fakaʻauhá, ko ia ko e fakaʻauhá kuo pau ke hoko! Neongo ia, naʻe akoʻi anga-kātaki ʻe Sihova ki heʻene palōfita taʻeangakātakí ha lēsoni ʻoku taau ke manatuʻi ʻi he anga-fakaʻatuʻí mo e mēsí.​—Siona, vahe 4.

19. (a) Ko e hā ʻoku malava ai ke tau fakapapauʻi ʻoku fakaʻatuʻi ʻa Sihova ʻi he meʻa ʻokú ne ʻamanekina meiate kitautolú? (e) ʻOku anga-fēfē hono fakahaaʻi ʻe he Palōveepi 19:17 ko Sihová ko ha Pule “lelei mo fai fakaʻatuʻi” pea toe anga-fakatōkilalo loloto?

¹⁹ Fakaʻosí, ʻoku fakaʻatuʻi ʻa Sihova ʻi he meʻa ʻokú ne ʻamanekina meiate kitautolú. Naʻe pehē ʻe Tuʻi Tēvita: “ʻOku ne ʻilo ʻe ia hota anga; ʻoku ne manatu ai pe ko e efu pe kitaua.” (Sāme 103:14) ʻOku mahinoʻi lelei ange ʻe Sihova ia ʻiate kitautolu hotau ngaahi ngataʻangá mo ʻetau ngaahi taʻehaohaoá. ʻOku ʻikai ʻaupito te ne ʻamanekina meiate kitautolu ha meʻa lahi ange ia ʻi he meʻa ʻoku malava ke tau faí. ʻOku fakafaikehekeheʻi ʻe he Tohitapú ʻa e kau pule fakaetangata ko ia ʻoku nau “lelei mo fai fakaʻatuʻi” pea mo e faʻahinga ko ia ʻoku “angakehe.” (1 Pita 2:18) Ko e faʻahinga Pule fēfē ʻa Sihova? Fakatokangaʻi ʻa e lea ʻa e Palōveepi 19:17: “Ko e tali ʻa e no ʻa Sihova ʻa ʻete fai ʻofa ki he masiva.” ʻOku hā mahino, ko ha pule pē ʻoku anga-lelei mo fakaʻatuʻi te ne fakatokangaʻi ʻa e ngāue kotoa pē ʻo e anga-ʻofá ʻoku fakahoko maʻá e kau masivá. Mahulu hake aí, ʻoku fokotuʻu mai ʻe he konga Tohitapu ko ʻení ko e Tokotaha-Fakatupu ʻo e ʻunivēsí, ko hono moʻoní, ʻokú ne vakai kiate ia tonu ʻo hangē ʻokú ne moʻuaʻaki ki he faʻahinga tonu ko ia ʻo e tangatá ʻoku nau fakahoko ʻa e ngaahi ngāue pehē ʻo e mēsí! Ko e faʻahinga loloto taha ʻeni ʻo e anga-fakatōkilaló.

20. Ko e hā ʻa e fakapapau ʻoku ʻi ai ʻoku fanongo mai ʻa Sihova ki heʻetau ngaahi lotú pea fai ha tali kiate kinautolú?

²⁰ ʻOku pehē tofu pē ʻa e anga-malū mo e fakaʻatuʻi ʻa Sihova ʻi heʻene ngaahi feangainga mo ʻene kau sevāniti ʻi he ʻaho ní. ʻI he taimi ʻoku tau lotu ai ʻi he tuí, ʻokú ne fanongo. Pea neongo ʻoku ʻikai te ne ʻomai ha kau talafekau fakaeʻāngelo ke nau lea mai kiate kitautolu, ʻoku ʻikai totonu ke tau fakaʻosiʻaki ʻo pehē ʻoku ʻikai te ne tali ʻetau ngaahi lotú. Manatuʻi ʻi he taimi naʻe kole ai ʻa e ʻapositolo ko Paulá ki he kaungātuí ke nau “hufia” ke tukuange ia mei he pilīsoné, naʻá ne tānaki atu: “Ke vave hoku fakafoki atu kiate kimoutolu.” (Hepelū 13:18, 19) Ko ia, ʻe ueʻi moʻoni nai ʻe heʻetau ngaahi lotú ʻa Sihova ke ne fai ʻa e meʻa naʻe ʻikai te ne mei fai ʻe ia!​—Semisi 5:16.

21. Ko e hā ʻa e fakamulituku ʻoku totonu ke ʻoua ʻaupito naʻa tau maʻu mei he anga-fakatōkilalo ʻa Sihová, ka ʻi hono kehé, ko e hā ʻoku totonu ke tau fakatokangaʻi fekauʻaki mo iá?

²¹ Ko hono moʻoní, ʻoku ʻikai ha taha ʻo e ngaahi fakahāhā ko ʻeni ʻo e anga-fakatōkilalo ʻa Sihová​—ʻene anga-maluú, ʻene loto-lelei ke fanongó, ʻene anga-kātakí, ʻene anga-fakaʻatuʻí​—ʻe ʻuhinga ai ʻo pehē ʻoku fakangaloku ʻe Sihova ʻene ngaahi tefitoʻi moʻoni māʻoniʻoní. ʻOku fakakaukau nai ʻa e haʻa faifekau ʻo e Puleʻanga-Haʻa-Kalisitiané ʻoku nau hoko ʻo fakaʻatuʻi ʻi he taimi ʻoku nau fakaveli ai ʻa e telinga ʻo ʻenau ngaahi tākangá ʻaki hono fakavaivaiʻi ʻa e ngaahi tuʻunga fakaeʻulungaanga ʻa Sihová. (2 Tīmote 4:3) Ka ko e hehema fakaetangata ke fakangaloku koeʻuhi ke maʻu ha ʻaongá ʻoku ʻikai haʻane fekauʻaki ʻaʻana mo e anga-fakaʻatuʻi ʻa e ʻOtuá. ʻOku māʻoniʻoni ʻa Sihova; ʻe ʻikai ʻaupito te ne ʻuliʻi ʻene ngaahi tuʻunga māʻoniʻoní. (Livitiko 11:44) Ko ia, tau ʻofa ʻi he anga-fakaʻatuʻi ʻa Sihová he ko hono moʻoní​—ko ha fakamoʻoni ia ʻo ʻene anga-fakatōkilaló. ʻIkai ʻokú ke fiefia ke fakakaukau atu ko Sihova ko e ʻOtuá, ʻa e Tokotaha poto taha ʻi he ʻunivēsí, ʻoku toe anga-fakatōkilalo tuʻu-ki-muʻa? Ko ha meʻa fakafiefia lahi ē ke ʻunuʻunu ofi ki he ʻOtua fakaofo kae anga-malū, anga-kātaki mo fakaʻatuʻi ko ʻení!