Tuʻunga-Hau ʻo Sihová mo e Puleʻanga ʻo e ʻOtuá

“Oku oou, E Jihova, ae maoluga, moe malohi, moe nāunāu, moe ikuna, bea moe mafimafi . . . oku oou ae buleaga, E Jihova.”​—1 KALONIKALI 29:​11, PM.

 1. Ko e hā ʻoku hoko ai ʻa Sihova ko e Hau totonu ʻo e ʻunivēsí?

“KUO fokotuʻu ʻe Sihova hono taloni ʻi he ngaahi langi na; pea ʻoku pule ʻe hono puleʻanga ki he meʻa kotoa.” (Sāme 103:19) ʻOku fakahaaʻi ʻaki ʻa e ngaahi lea ko iá ʻe he tokotaha-tohi-sāmé ʻa e moʻoni tefito fekauʻaki mo e tuʻunga-pulé. Ko Sihova ko e ʻOtuá, ʻi heʻene hoko ko e Tokotaha-Fakatupú, ko e Pule Fakaleveleva totonu ia ʻo e ʻunivēsí.

 2. Naʻe anga-fēfē hono fakamatalaʻi ʻe Taniela ʻa e nofoʻanga laumālie ʻo Sihová?

² Ko e moʻoni, ke ngāueʻaki ʻe ha pule ʻa hono tuʻunga-haú, ʻoku fiemaʻu ke ʻi ai ha faʻahinga ke pule ki ai. Ke kamataʻakí, naʻe ngāueʻaki ʻe Sihova ʻene pulé ki he ngaahi meʻamoʻui laumālie ʻa ia naʻá ne fakatupú—ʻuluakí ko hono ʻAlo tofu-pē-taha-ne-fakatupú pea hoko atu ai ki he fuʻu kau ʻāngeló. (Kolose 1:​15-​17) Ki muʻa ʻi he tukuʻau mai ʻa e taimí, naʻe fakalika ai ki he palōfita ko Tanielá ʻa e pule ʻa Sihova ʻi hēvaní. Naʻá ne fakahaaʻi: “Naʻa ku moʻu sioa pe, kaeʻoua ke fokotuʻu ʻani ngaahi taloni, pea ʻafio mai ʻa Talumeimuʻa: . . . ko e tokoʻi afe laui afe naʻe fakafeʻao kiate ia, pea ko e tokoʻi mano laui mano naʻe tuʻu ʻi hono ʻao.” (Taniela 7:​9, 10) ʻI ha taimi taʻefaʻalaua naʻe pule ai ʻa Sihova, ʻa “Talumeimuʻa,” ko e Hau ki hono fuʻu fāmili tokolahi fau mo maau ʻo e ngaahi foha laumālié, ʻa ia kuo nau ngāue ko e “kau faifekau” ʻi hono fai hono finangaló.—Sāme 103:​20, 21, PM.

 3. Naʻe anga-fēfē ʻa e fakalahi atu ʻa e tuʻunga-hau ʻo Sihová ki he ʻuniveesi matelié?

³ Naʻe faifai pē ʻo fakalahi ʻe Sihova ʻa ʻene tuʻunga-pulé ʻaki hono fakatupu ʻa e ʻuniveesi fakamatelie kāfakafa mo fihí, ʻo kau ai ʻa e foʻi māmaní. (Siope 38:​4, 7) ʻI he vakai ha tokotaha mei he foʻi māmaní, ko e ngaahi nāunau fakalangí ʻoku nau ngāue ʻi he tuʻunga maau mo tonu matematē ʻo hā ai ʻoku ʻikai te nau fiemaʻu ha taha ke ne tataki pe puleʻi kinautolu. Neongo ia, naʻe fakahaaʻi ʻe he tokotaha-tohi-sāmé: “Nae fekau [ʻe Sihova], bea nae fakatubu akinautolu. Bea kuo ne fokotuu mau akinautolu o lauikuoga bea taegata: kuo ne tuutuuni bea e ikai mole ia.” (Sāme 148:​5, 6, PM) Kuo ngāueʻaki maʻu pē ʻe Sihova ʻa hono tuʻunga-haú ʻi hono tataki, fakahinohino mo puleʻi ʻa e ngaahi ngāue ʻa e nofoʻanga laumālié mo e ʻuniveesi matelié.​—Nehemaia 9:6.

 4. ʻOku anga-fēfē hono ngāueʻaki ʻe Sihova ʻa hono tuʻunga-haú ki he faʻahinga ʻo e tangatá?

⁴ ʻI hono fakatupu ʻa e ʻuluaki ongo meʻa fakaetangatá, naʻe ngāueʻaki ai ʻe he ʻOtuá ʻa hono tuʻunga-haú ʻi ha toe founga ʻe taha. Tuku kehe ʻa e tokonaki ki he faʻahinga ʻo e tangatá ʻa e meʻa kotoa pē naʻa nau fiemaʻú ke nau moʻui ai ʻi ha moʻui mohu taumuʻa mo fakafiemālié, naʻe ʻoange ʻe Sihova ke nau pule ki he ngaahi meʻamoʻui māʻulalo ange ʻo e māmaní—ko ha fakanofo ia ʻo e tuʻunga mafai. (Senesi 1:​26-​28; 2:​8, 9) Ko ia ʻoku hā mahino ai ʻoku ʻikai ngata pē ko e tuʻunga-pule ʻa e ʻOtuá ʻoku lelei mo anga-ʻofa ka ʻokú ne toe ʻoange ki he faʻahinga ʻoku pule ki aí ʻa e lāngilangi mo e ngeia. ʻI he kei fakamoʻulaloa ʻa ʻĀtama mo ʻIvi ki he tuʻunga-hau ʻo Sihová, naʻá na maʻu ai ʻa e ʻamanaki ko e moʻui taʻengata ʻi ha ʻapi palataisi ʻi he māmaní.​—Senesi 2:​15-​17.

 5. Ko e hā ʻoku lava ke tau leaʻaki fekauʻaki mo hono ngāueʻaki ʻe Sihova ʻa e tuʻunga-haú?

⁵ Ko e hā ʻoku lava ke tau fakaʻosiʻaki mei he meʻa kotoa ko ení? ʻUluakí, kuo ngāueʻaki maʻu pē ʻe Sihova ʻa hono tuʻunga-haú ki he kotoa ʻo ʻene meʻa fakatupú. Uá, ko e tuʻunga-pule ʻo Sihová ʻoku lelei mo fakangeingeia. Fakaʻosí, ko ʻetau talangofua mo poupouʻi ʻa e tuʻunga-pule ʻo e ʻOtuá ʻe iku ia ki he ngaahi tāpuaki taʻengata. ʻOku ʻikai ha ofo ʻi hono ueʻi ʻo Tuʻi Tēvita ʻo ʻIsileli ʻo e kuonga muʻá ke ne pehē: “Oku oou, E Jihova, ae maoluga, moe malohi, moe nāunāu, moe ikuna, bea moe mafimafi: he oku oou ae mea kotoabe oku i he lagi bea moe mamani: oku oou ae buleaga, E Jihova, bea oku hiki hake koe koe ulu ki he mea kotoabe.”—1 Kalonikali 29:​11, PM.

ʻOku Fiemaʻu ʻa e Puleʻanga ʻo e ʻOtuá?

 6. Ko e hā ʻa e fekauʻaki ʻi he vahaʻa ʻo e tuʻunga-hau ʻo e ʻOtuá mo hono Puleʻangá?

⁶ Koeʻuhi ko Sihova, ʻa e Hau Fakalevelevá, kuó ne ngāueʻaki maʻu pē ʻa hono mālohí mo e māfimafí, ko e hā ʻoku fiemaʻu ai ʻa e Puleʻanga ʻo e ʻOtuá? ʻOku ngāueʻaki lahi ʻe ha hau ʻa hono tuʻunga mafaí fakafou ʻi ha fakafofonga ʻoku fakanofo ke ne tokangaʻi ʻa e faʻahinga ʻoku pule ki aí. Ko ia ai, ko e Puleʻanga ʻo e ʻOtuá, ko ha fakahāhā pe ko hono ngāueʻaki ia ʻo e tuʻunga-hau fakaleveleva ʻo e ʻOtuá ki heʻene ngaahi meʻa fakatupú, ko ha founga pe ko ha fakafofonga kuó ne ngāueʻaki ke fakahoko ʻaki ʻene pulé.

 7. Ko e hā naʻe fokotuʻu ai ʻe Sihova ha fakahāhā foʻou ʻo hono tuʻunga-haú?

⁷ Kuo fakahāhā ʻe Sihova ʻa hono tuʻunga-haú ʻi he ngaahi founga kehekehe ʻi he ngaahi taimi kehekehe. Naʻá ne fokotuʻu ha fakahāhā foʻou ʻo hono tuʻunga-haú ʻi he tali ki ha meʻa foʻou naʻe hoko. Naʻe hoko eni ʻi he taimi naʻe lavameʻa ai ha foha laumālie angatuʻu ʻo e ʻOtuá, ko Sētane, ʻi hono tākiekina ʻa ʻĀtama mo ʻIvi ke na angatuʻu ki he tuʻunga-pule ʻa Sihová. Ko e angatuʻu ko iá naʻe hoko ia ko ha pole ki he tuʻunga-hau ʻo e ʻOtuá. ʻI he founga fē? ʻI hono tala kia ʻIvi te ne “mate” kapau te ne kai ʻa e ʻakau naʻe tapuí, naʻe fakahuʻuhuʻu ʻa Sētane ʻo pehē ko Sihová naʻe taʻemoʻoni, pea ko ia ai ʻokú ne taʻefalalaʻanga. Naʻe toe tala ʻe Sētane kia ʻIvi: “ʻOku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” Naʻe pehē ai ʻe Sētane ʻe lava ke lelei ange ʻa ʻĀtama ia mo ʻIvi ʻi heʻena tukunoaʻi ʻa e fekau ʻa e ʻOtuá peá na faʻiteliha. (Senesi 3:​1-6) Ko ha pole fakahangatonu ia ki he totonu ʻa e ʻOtuá ke pulé. Ko e hā ʻe fai ʻe Sihová?

8, 9. (a) ʻE anga-fēfē ʻa e feangainga ʻa ha hau fakaetangata mo e angatuʻu ʻi hono puleʻangá? (e) Ko e hā naʻe fai ʻe Sihova ʻi he tali ki he angatuʻu ʻi ʻĪtení?

⁸ Ko e hā ʻoku tau ʻamanekina ʻe fai ʻe ha pule ʻi he taimi naʻe ʻi ai ai ha angatuʻu fakahangatonu ʻi hono puleʻangá? Ko e faʻahinga ʻoku nau maheni mo e hisitōliá ʻoku lava ke nau manatuʻi ha ngaahi tuʻunga pehē. ʻI he ʻikai tukunoaʻi ʻa e meʻá, ʻoku faʻa hoko ai ha hau—naʻa mo ha pule lelei—ʻo fakahoko ʻa e fakamaau ki he kau angatuʻú, ʻo fakahaaʻi ai ʻoku nau halaia ʻi he talisone. ʻE hanga leva ʻe he pulé ʻo tuku ʻa e mafaí ki ha taha ke ne ikunaʻi ʻa e ngaahi kongakau angatuʻú pea fakafoki mai ʻa e melinó. ʻI he founga meimei tatau, naʻe fakahaaʻi ʻe Sihova naʻá ne puleʻi kakato ʻa e tuʻungá ʻi heʻene fai vave ʻa e ngāue ʻo fakahaaʻi ʻa e fakamaau ki he kau angatuʻú. Naʻá ne fakahaaʻi ʻoku taʻetaau ʻa ʻĀtama mo ʻIvi mo e meʻaʻofa ko e moʻui taʻengatá, peá Ne kapusi kinaua mei he ngoue ko ʻĪtení.​—Senesi 3:​16-​19, 22-​24.

⁹ ʻI hono fakahaaʻi ʻa ʻene fakamaau kia Sētané, naʻe fakaeʻa ai ʻe Sihova ha fakahāhā foʻou ʻo hono tuʻunga-haú, ko ha founga ʻa ia te ne fakafoki mai ai ʻa e melinó mo e māú ki he feituʻu kotoa ʻokú ne pule aí. Naʻe folofola ʻa e ʻOtuá kia Sētane: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15) Ko ia naʻe fakaeʻa ʻe Sihova ko ʻene taumuʻá ia ke fakamafaiʻi ha “hako” ke ne laiki ʻa Sētane mo ʻene ngaahi kongakaú pea ke fakamoʻoniʻi ʻa e totonu ʻo Hono tuʻunga-haú.​—Sāme 2:​7-9; 110:​1, 2.

10. (a) Ko hai naʻe hoko ko e “hako”? (e) Ko e hā ne leaʻaki ʻe Paula fekauʻaki mo hono fakahoko ʻo e ʻuluaki kikité?

¹⁰ Ko e “hako” ko iá ko Sīsū Kalaisi, fakataha mo ha kulupu makehe ʻo e ngaahi kaungāpule. ʻOku faʻuʻaki fakataha kinautolu ʻa e Puleʻanga faka-Mīsaia ʻo e ʻOtuá. (Taniela 7:​13, 14, 27; Mātiu 19:28; Luke 12:32; 22:​28-​30) Kae kehe, ko e meʻá ni kotoa, naʻe ʻikai ke fakaeʻa vave leva. Ko hono moʻoní, ko e fakahoko ʻo e ʻuluaki kikité naʻe kei hoko pē ko ha “mea fakalilolilo, aia nae tuku fufu be talu ae kamataaga o mamani.” (Loma 16:​25, PM) ʻI he laui senituli, naʻe fakaʻamua ai ʻe he kau tangata ʻo e tuí ʻa e taimi ʻa ia ʻe fakaeʻa ai ʻa e “mea fakalilolilo” mo fakahoko ʻa e ʻuluaki kikité ki hono fakatonuhiaʻi ʻa e tuʻunga-hau ʻo Sihová.​—Loma 8:​19-​21.

Fakaeʻa Fakalakalaka ʻo e “Mea Fakalilolilo”

11. Ko e hā naʻe ʻai ʻe Sihova ke ʻiloʻi ʻe ʻĒpalahamé?

¹¹ ʻI he faai atu ʻa e taimí, naʻe ʻai fakalakalaka ʻe Sihova ke ʻiloʻi ʻa e ngaahi tafaʻaki ʻo e “mea lilo oe buleaga oe Otua.” (Maake 4:​11, PM) Naʻe kau ʻi he faʻahinga naʻe fakahaaʻi ki ai ʻe Sihová ʻa e tangata ko ʻĒpalahamé, ʻa ia naʻe ui ko e “Takanga ʻo e ʻOtua.” (Semisi 2:23) Naʻe palōmesi ʻa Sihova kia ʻĒpalahame te Ne ‘ngaohi ia ko e puleʻanga lahi.’ Ki mui ai, naʻe toe ʻai ʻe he ʻOtuá ke ʻiloʻi ʻe ʻĒpalahame: “ʻE tupu meiate koe ha ngaahi tuʻi,” pea “ko ho hako ʻe monuʻia ai ʻa e ngaahi puleʻanga ʻo mamani.”—Senesi 12:​2, 3; 17:6; 22:​17, 18.

12. Naʻe anga-fēfē ʻa e fakaeʻa ʻo e hako ʻo Sētané ʻi he hili ʻa e Lōmakí?

¹² ʻI he aʻu mai ki he taimi ʻo ʻĒpalahamé, ne ʻosi ʻi ai ʻa e ngaahi feinga fakaetangata ki he tuʻunga-pulé mo hono fakaehaua ʻa e niʻihi kehé. Ko e fakatātaá, ʻi he fekauʻaki mo Nimiloté, ʻa e mokopuna ua ʻo Noá, ʻoku pehē ʻe he Tohi Tapú: “Naʻá ne kamata ʻi heʻene hoko ko ha tokotaha mālohi ʻi he māmaní. Naʻá ne hoko ko ha fuʻu toʻa tulimanu ʻo fakafepaki kia Sihova.” (Senesi 10:​8, 9, NW) ʻOku hā mahino, ko Nimilote mo e kau pule kehe naʻá ne fakanofó naʻe puleʻi kinautolu ʻe Sētane. Ko kinautolu mo honau kau poupoú naʻa nau hoko ko e konga ʻo e hako ʻo Sētané.​—1 Sione 5:​19.

13. Ko e hā ne tomuʻa tala ʻe Sihova fakafou ʻia Sēkopé?

¹³ Neongo ʻa e ngaahi feinga ʻa Sētane ke fakatupu ha kau pule fakaetangatá, ko e taumuʻa ʻa Sihová ʻoku laka ki muʻa. Naʻe fakaeʻa ʻe Sihova fakafou ʻi he mokopuna ʻo ʻĒpalahame ko Sēkopé: “Ko e sepita meia Siuta ʻe ʻikai ʻave, mo e tokotoko mei hono vahaʻa vaʻe, kaeʻoua ke haʻu ʻa Sailo, pea ʻe fai kiate ia ʻe he [ngaahi] kakai ʻenau tukulolo.” (Senesi 49:10) Ko e foʻi lea “Sailo” ʻoku ʻuhingá “Ko Ia ʻOku ʻAʻaná,” pe “Ko Ia ʻOku ʻOʻoná.” Ko ia ai, ko e ngaahi lea fakaekikite ko ení naʻe fakahaaʻi ai ʻe haʻu ha tokotaha ʻokú ne maʻu ʻa e totonu fakalao ke ne maʻu ʻa e “sepita,” pe tuʻunga-haú, pea ko e “tokotoko,” pe tuʻunga-pule ki he “kakai,” pe faʻahinga kotoa ʻo e tangatá. Ko hai ʻa e Tokotaha ko ení?

“Kaeʻoua ke Haʻu ʻa Sailo”

14. Ko e hā ʻa e fuakava naʻe fai ʻe Sihova mo Tēvitá?

¹⁴ ʻI he hako ʻo Siutá, ko e ʻuluaki tokotaha ke fili ʻe Sihova ke ne tuʻi ki hono kakaí ko e tauhi-sipi ko Tēvitá, foha ʻo Sesé.a (1 Samiuela 16:​1-​13) Neongo ʻa ʻene ngaahi angahalá mo e fehālaakí, naʻe maʻu ʻe Tēvita ʻa e hōifua meia Sihova koeʻuhi ko ʻene mateaki ki he tuʻunga-hau ʻo Sihová. ʻI hono fakamaama lahi ange ʻa e kikite ʻi ʻĪtení, naʻe fai ʻe Sihova ha fuakava mo Tēvita, ʻo pehē: “Te u fokotuʻu ke hoko mo koe ʻa ho hako, ʻa ia ʻe ʻalu mei he manava, pea te u fakapapau hono puleʻanga.” ʻE kau ki ai ʻa e meʻa lahi ange ʻi he foha mo e fetongi ʻo Tēvitá, ʻa Solomone, he naʻe pehē ʻi he fuakavá: “Te u fakapapau ʻa e taloni ʻo hono puleʻanga ʻo taʻengata.” Ko e fuakava ko ia ʻia Tēvitá naʻe fakamahinoʻi ai ko e “hako” ʻo e Puleʻangá ʻa ia naʻe talaʻofá ʻe haʻu ʻi hono taimí fou ʻi he laine fakafāmili ʻo Tēvitá.—2 Samiuela 7:​12, 13.

15. Ko e hā ʻoku lava ke vakai ai ki he puleʻanga Siutá ko ha sīpinga ia ʻo e Puleʻanga ʻo e ʻOtuá?

¹⁵ Naʻe kamata ʻia Tēvita ʻa e haʻa tuʻi, ʻa ia naʻe pani ʻaki ʻa e lolo tapu ʻa e taulaʻeiki lahí. Ko e ngaahi tuʻí ni naʻe lava ai ke ui ko e faʻahinga pani, pe ngaahi mīsaia. (1 Samiuela 16:13; 2 Samiuela 2:4; 5:3; 1 Tuʻi 1:​39) Naʻe pehē ʻoku nau ʻafio ʻi he taloni ʻo Sihová ʻo pule ko e ngaahi tuʻi maʻa Sihova ʻi Selusalema. (2 Kalonikali 9:8) ʻI he ʻuhinga ko iá, naʻe fakafofongaʻi ʻe he puleʻanga Siutá ʻa e Puleʻanga ʻo e ʻOtuá, ko ha fakahāhā ʻo e tuʻunga-hau ʻo Sihová.

16. Ko e hā ʻa e ngaahi ola ʻo e pule ʻa e haʻa tuʻi Siutá?

¹⁶ ʻI he taimi naʻe fakamoʻulaloa ai ʻa e tuʻí mo e kakaí ki he tuʻunga-hau ʻo Sihová, naʻa nau maʻu ʻene maluʻí mo ʻene tāpuakí. Ko e pule ʻa Solomoné naʻe hoko ia tautefito ʻi ha taimi ʻo e melino mo e lakalakaimonū taʻealafakatataua, ʻo ʻomai ai ha fakaʻali fakaekikite ʻo e pule ʻa e Puleʻanga ʻo e ʻOtuá ʻi he taimi ʻe toʻo fakaʻaufuli ai ʻa e tākiekina ʻa Sētané pea fakatonuhiaʻi ʻa e tuʻunga-hau ʻo Sihová. (1 Tuʻi 4:​20, 25) Ko e meʻa fakamamahí, he ko e tokolahi taha ʻo e ngaahi tuʻi ʻi he laine ʻo Tēvitá naʻe ʻikai te nau fai ʻo fakatatau ki he ngaahi fiemaʻu ʻa Sihová, pea naʻe tō ai ʻa e kakaí ki he tauhi ʻaitolí mo e ʻulungāanga taʻetāú. Fakaʻosí, naʻe fakaʻatā ʻe Sihova ʻa e puleʻangá ke fakaʻauha ʻe he kau Pāpiloné ʻi he 607 K.M. Ko Sētane ne hā ʻokú ne lavameʻa ʻaupito ʻi he feinga ke fakaongoongokoviʻi ʻa e tuʻunga-hau ʻo Sihová.

17. Ko e hā ʻokú ne fakahā naʻe kei pule kakato pē ʻa Sihova neongo ʻa e liua ʻo e puleʻanga ʻia Tēvitá?

¹⁷ Ko e liua ʻo e puleʻanga ʻia Tēvitá—pea mo e liua ki muʻa ange ʻo e puleʻanga fakatokelau ʻo ʻIsilelí—naʻe ʻomai ai ʻa e fakamoʻoni, ʻo ʻikai ko ha taʻefeʻunga pe taʻelavameʻa ʻa e tuʻunga-hau ʻo Sihová, ka ko e ngaahi nunuʻa fakamamahi ʻo e tākiekina ʻa Sētané mo e tauʻatāina ʻa e tangatá mei he ʻOtuá. (Palovepi 16:25; Selemaia 10:23) Ke fakahaaʻi naʻá ne kei ngāueʻi pē ʻa hono tuʻunga-haú, naʻe talaki ʻe Sihova fakafou ʻi he palōfita ko ʻIsikelí: “ʻE ʻave ʻa e tatā, ʻe hiki ʻa e kalauni: . . . Te u ngaohi ia ko e koto mafuli—mafuli—Mafuli: naʻa mo e pehe na ʻe ʻikai tuʻu, kaeʻoua ke haʻu ʻa e Toko Taha ʻoku oʻona totonu [fakalaó]; pea te u foaki ia ki ai.” (Isikeli 21:​26, 27) Ko e ngaahi lea ko iá ʻoku fakahaaʻi ai ko e “hako” naʻe talaʻofá, ʻa e Tokotaha naʻe “oʻona totonu [fakalaó],” naʻe teʻeki ai ke haʻu.

18. Ko e hā ʻa e fanongonongo naʻe fai ʻe he ʻāngelo ko Kepalelí kia Melé?

¹⁸ Tau ngaʻunu atu angé ki mui mai fakafuofua ki he taʻu 2 K.M. Naʻe fekauʻi atu ai ʻa e ʻāngelo ko Kepalelí kia Mele, ko ha taʻahine tāupoʻou ʻi Nasaleti, ko ha kolo lahi ʻo Kāleli ʻi he fakatokelau ʻo Pālesitainé. Naʻá ne fanongonongo: “Ko ʻeni, te ke tuʻituʻia, pea te ke ʻaloʻi ha tama, pea te ke fakahingoa ia ko Sisu. Pea ʻe hoko ko e lahi ʻa e toko taha ko ia; pea ʻe lau ia ko e ʻAlo ʻo e ʻEiki Taupotu; pea ʻe foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule ʻe ʻikai ngata.”—Luke 1:​31-33.

19. Ko e hā ʻa e ngaahi meʻa fakalotofiefia kuo ofí ni ke hokó?

¹⁹ Fakaʻosí, ko e taimi ki hono fakaeʻa ʻo e “mea fakalilolilo” naʻe ofi. Ko e Tokotaha tefitó ʻa e “hako” naʻe talaʻofá ʻe vavé ni ke ne hā. (Kaletia 4:4; 1 Timote 3:​16) ʻE fakavolu hono muiʻivaʻé ʻe Sētane. Ka ko e “hako” ko iá ʻi he tafaʻaki ʻe tahá, te ne laiki ʻa e ʻulu ʻo Sētané, ʻo fakaʻauha ʻosi ia mo ʻene faʻahí kotoa. Te ne toe fakamoʻoniʻi fakafou ʻi he Puleʻanga ʻo e ʻOtuá, ko e maumau kotoa naʻe fai ʻe Sētané ʻe fakafoki pea ʻe fakatonuhiaʻi ʻa e tuʻunga-hau ʻo Sihová. (Hepelu 2:​14; 1 Sione 3:8) ʻE fakahoko fēfē eni ʻe Sīsū? Ko e hā ʻa e faʻifaʻitakiʻanga naʻá ne tuku mai ke tau faʻifaʻitaki ki aí? Te tau maʻu ʻa e talí ʻi he kupu hoko maí.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻokú ne ʻai ʻa Sihova ko e Hau totonu ia ʻo e ʻunivēsí?

• Ko e hā naʻe fakataumuʻa ai ʻe Sihova ke ne fokotuʻu ʻa e Puleʻangá?

• Naʻe anga-fēfē hono ʻai fakalakalaka ʻe Sihova ke ʻiloa ʻa e “mea fakalilolilo”?

• Ko e hā ʻokú ne fakahaaʻi naʻe pule kakato ʻa Sihova neongo ʻa e liua ʻo e puleʻanga ʻia Tēvitá?

[Fakatātā ʻi he peesi 23]

Ko e hā naʻe fakahaaʻi ʻe Sihova ki he kahaʻú fakafou ʻia ʻĒpalahamé?

[Fakatātā ʻi he peesi 25]

Ko e hā ʻoku ʻikai hoko ai ʻa e liua ʻo e puleʻanga ʻia Tēvitá ko ha fakamoʻoni ia ʻo ha taʻelavameʻa ʻi he tuʻunga-hau ʻo Sihová?