ʻOku Fakahōifua ʻa e Kātoanga Kotoa Pē ki he ʻOtuá?

ʻOku finangalo ʻa Sihova ke tau fiefia ʻi he moʻuí pea kātoangaʻi ha ngaahi meʻa ʻi ha taimi. Ka ʻoku fakahōifua kiate ia ʻa e kātoanga mo e ʻaho mālōlō kotoa pē? ʻOku lava fēfē ke tau fakahaaʻi ʻetau ʻofa kia Sihová fekauʻaki mo e meʻá ni?

1. Ko e hā ʻoku ʻikai fakahōifua ai kia Sihova ʻa e ngaahi kātoanga lahi?

Te ke ʻohovale nai ke ʻilo ko e ngaahi kātoanga lahi ʻoku makatuʻunga ʻi he ngaahi fakakaukau ʻoku fepaki mo e meʻa ʻoku akoʻi ʻe he Tohi Tapú pe tupu mei he lotu loí. ʻOku nau fekauʻaki nai mo e fakahaʻele faʻahikehé pea makatuʻunga ʻi he fakakaukau ʻoku ʻi ai ha meʻa ʻe moʻui atu hili ʻa e maté. Ko e ngaahi kātoanga ʻe niʻihi ʻoku makatuʻunga ʻi he ngaahi fananga pe ʻi he tui ki ha monū. (ʻAisea 65:11) ʻOku fakatokanga ʻa Sihova ki heʻene kau lotú: “Fakamavaheʻi kimoutolu . . . pea tuku ʻa e ala ki he meʻa taʻemaʻá.”​—2 Kolinitō 6:17.a

2. ʻOku anga-fēfē ʻa e ongoʻi ʻa Sihová fekauʻaki mo e ngaahi kātoanga ʻoku ʻave ai ʻa e lāngilangi taʻetotonu ki ha tangata?

ʻOku fakatokanga mai ʻa Sihova ke ʻoua te tau falala ki ha tangata. (Lau ʻa e Selemaia 17:5.) Ko e ngaahi ʻaho mālōlō ʻe niʻihi ʻoku fakalāngilangiʻi ai ʻa e kau pulé pe kau sōtiá. Ko e niʻihi ʻoku nau kātoangaʻi ʻa e ngaahi ʻaho tauʻatāina fakafonua pe ngaahi fakaʻilonga hangē ko e fuká. (1 Sione 5:21) Ko e niʻihi ʻoku nau pouaki ʻa e ngaahi kautaha fakapolitikale pe fakasōsiale. Ko e hā ʻa e ongoʻi ʻa Sihová kapau ʻoku tau ʻoatu ʻa e lāngilangi taʻetotonu ki ha tokotaha pe ko ha kautaha, tautefito ki ha taha ʻokú ne pouaki ʻa e ngaahi fakakaukau ʻoku fepaki mo ʻEne taumuʻá?

3. Ko e hā ʻa e ngaahi tōʻonga ʻokú ne ʻai ʻa e kātoangá ke taʻefakahōifuá?

ʻOku fakahalaki ʻe he Tohi Tapú ʻa e “inu tōtuʻa, ngaahi paati uatau, ngaahi paati inu kona efu.” (1 Pita 4:3) ʻI he ngaahi kātoanga ʻe niʻihi ʻoku fai ʻe he kakaí ʻa e ngaahi meʻa taʻetaau pea tōʻonga taʻemapuleʻi-kita. Ke hanganaki kaumeʻa mo Sihová, ʻoku fiemaʻu ke tau fakamamaʻo mei he ngaahi ʻulungaanga taʻetāú.

KELI LOLOTO ANGE

4. Talitekeʻi ʻa e ngaahi kātoanga ʻoku taʻefakahōifua kia Sihová

Lau ʻa e ʻEfesō 5:10, pea lāulea leva ki he ngaahi fehuʻi ko ení:

• Ko e hā ʻoku fiemaʻu ke ke fakapapauʻí ʻi he fili pe te ke kātoangaʻi ha ʻaho mālōlō?

• Ko e hā ʻa e ngaahi ʻaho mālōlō ʻoku manakoa ʻi ho feituʻú?

• ʻOkú ke fakakaukau ʻoku fakahōifua kia Sihova ʻa e ngaahi ʻaho mālōlō ko iá?

Ko e fakatātaá, kuó ke fifili nai ki he fakakaukau ʻa e ʻOtuá ki hono kātoangaʻi ʻo e faiʻahó? ʻOku ʻikai ʻaupito lave ʻa e Tohi Tapú ki ha kātoanga faiʻaho ʻo e kau lotu ʻa Sihová. Ka ʻoku lave ia ki he ongo kātoanga faiʻaho ʻe ua ʻo e kakai naʻe ʻikai tauhi kiate Iá. Lau ʻa e Sēnesi 40:20-22 mo e Mātiu 14:6-10. Lāulea leva ki he ongo fehuʻi ko ení:

• Ko e hā naʻe faitatau ʻi he ongo kātoanga faiʻahó?

• Makatuʻunga ʻi he fakamatala Fakatohitapu ko ení, ko e hā ʻa e ongoʻi ʻa Sihova ki he faiʻahó?

Ka, te ke fifili nai, ‘ʻOku mahuʻinga moʻoni kia Sihova pe te u kau ʻi ha faiʻaho pe ngaahi kātoanga taʻefakatohitapu kehe?’ Lau ʻa e ʻEkisoto 32:1-8. Huluʻi ʻa e VITIOÓ, pea lāulea leva ki he ongo fehuʻi hokó.

VITIŌ: ʻAho Mālōlō mo e Kātoanga ʻOku Taʻefakahōifua ki he ʻOtuá (5:07)

• Ko e hā ʻoku fiemaʻu ai ke tau fakapapauʻi ʻa e meʻa ʻoku fakahōifua kia Sihová?

• ʻE lava fēfē ke tau fai iá?

Ko e founga eni te tau ʻilo ai ʻa e kātoanga ʻoku taʻefakahōifua ki he ʻOtuá

• ʻOku makatuʻunga ʻi he ngaahi akonaki taʻefakatohitapu? Ke ʻiló, fekumi ki hono ngaahi tupuʻangá.

• ʻOku ʻoatu ʻa e fakalāngilangi taʻetotonu ki ha tangata, kautaha pe fakaʻilonga fakafonua? ʻOku tau fakalāngilangiʻi pē ʻa Sihova pea falala kiate ia ke ne solova ʻa e ngaahi palopalema ʻo e māmaní.

• Ko hono ouaú mo e tōʻongá ʻoku fepaki mo e ngaahi tuʻunga ʻo e Tohi Tapú? ʻOku fiemaʻu ke tau hanganaki maʻa fakaeʻulungaanga.

5. Tokoniʻi ʻa e niʻihi kehé ke fakaʻapaʻapaʻi hoʻo tuí

VITIŌ: Fakamatalaʻi Hoʻo Tuí ʻi ha Founga Pōtoʻi (2:01)

Lau ʻa e Mātiu 7:12, pea lāulea leva ki he ongo fehuʻi ko ení:

• Makatuʻunga ʻi he veesi ko ení, ko hai ʻoku totonu ke ne fili pe ʻe kātoangaʻi ha ʻaho mālōlō ʻe hoʻo fāmili taʻetuí?

• Ko e hā te ke faí ke fakapapauʻi ki ho fāmilí hoʻo ʻofá mo e fakamahuʻingaʻi kinautolú neongo ʻoku ʻikai ke ke kau mo kinautolu he kātoangá?

6. ʻOku finangalo ʻa Sihova ke tau fiefia

ʻOku finangalo ʻa Sihova ke tau maʻu ha taimi fiefia mo hotau fāmilí mo e ngaahi kaumeʻá. Lau ʻa e Tangata Malanga 8:15, pea lāulea leva ki he fehuʻi ko ení:

• ʻOku anga-fēfē hono fakahaaʻi ʻe he veesi ko ení ʻoku finangalo ʻa Sihova ke tau fiefiá?

ʻOku finangalo ʻa Sihova ki hono kakaí ke nau fiefia pea feohi fakataha fiefia. Huluʻi ʻa e VITIOÓ ke sio ki he mātuʻaki hā mahino eni ʻi heʻetau ngaahi fakataha-lahi fakavahaʻapuleʻangá.

VITIŌ: Anga-Talitali Kakai ʻi he Fakataha-Lahi Fakavahaʻapuleʻanga (5:40)

Lau ʻa e Kalētia 6:10, pea lāulea leva ki he ngaahi fehuʻi ko ení:

• ʻOku fiemaʻu ke tau kātoangaʻi ʻa e ngaahi ʻaho mālōlō manakoa ke fai ai “ha ngāue ʻoku leleí” ki he niʻihi kehé?

• Ko e hā te ne ʻai koe ke fiefia angé, ko e taimi ʻoku kounaʻi ai koe ke ke fai ha foaki ʻi ha ʻaho mālōlō, pe ko e taimi ʻokú ke loto-lelei ai ke fai ha foaki?

• Ko e Kau Fakamoʻoni tokolahi ʻoku nau fokotuʻutuʻu ha taimi makehe ki heʻenau fānaú pea faʻa fakaʻohovaleʻi kinautolu ʻaki ha ngaahi meʻaʻofa. Kapau ʻoku ʻi ai haʻo fānau, ko e hā ha ngaahi meʻa makehe ʻoku lava ke ke fai maʻa kinautolú?

FAKANOUNOU

ʻOku finangalo ʻa Sihova ke tau fiefia fakataha mo e fāmilí mo e ngaahi kaumeʻá. Ka ʻokú ne toe finangalo ke tau fakaʻehiʻehi mei he ngaahi kātoanga ʻoku ʻikai fakahōifua kiate iá.

Fakamanatu

• Ko e hā ʻa e ngaahi fehuʻi te tau ʻeke ke ʻiloʻi pe ʻoku taʻefakahōifua ha kātoanga kia Sihova?

• ʻE lava fēfē ke tau tokoniʻi hotau fāmilí mo e ngaahi kaumeʻá ke mahinoʻi ʻetau fili fekauʻaki mo e ngaahi ʻaho mālōloó?

• ʻOkú ke ʻiloʻi fēfē ʻoku finangalo ʻa Sihova ke tau fiefiá?

AKO LAHI ANGE

Sio ki he ngaahi ʻaho mālōlō ʻoku ʻikai ke kātoangaʻi ʻe he kau Kalisitiané.

“Ko e Hā ʻOku ʻIkai ke Kātoangaʻi Ai ʻe he Kau Fakamoʻoni ʻa Sihová ʻa e Ngaahi ʻAho Mālōlō Pau?” (Kupu ʻi he uepisaití)

Sio ki he ʻuhinga ʻe fā ʻoku tau tui ai ko e kātoanga faiʻahó ʻoku taʻefakahōifua ki he ʻOtuá.

“Ko e Hā ʻOku ʻIkai Kātoangaʻi Ai ʻe he Kau Fakamoʻoni ʻa Sihová ʻa e Faiʻahó?” (Kupu ʻi he uepisaití)

Sio ki he founga ʻe lava ke fakahōifuaʻi ai ʻe he fānaú ʻa Sihova lolotonga ʻa e ngaahi ʻaho mālōloó.

ʻOkú Ke Mahuʻinga kia Sihova (11:35)

Kuo fili ʻa e kau Kalisitiane ʻe miliona ke ʻoua ʻe kātoangaʻi ʻa e Kilisimasí. Ko e hā ʻenau ongoʻi fekauʻaki mo ʻenau filí?

“Naʻa Nau Maʻu ha Meʻa Lelei Ange” (Toʻo mei he Ko e Taua Leʻo)