Faʻifaʻitaki ki he Manavaʻofa ʻa Sihová

 1. Naʻe anga-fēfē hono fakahaaʻi ʻe Sihova ʻa ia tonu kia Mōsesé? Ko e hā ʻoku mahuʻinga ai ení?

ʻI HE taimi ʻe taha, naʻe fakahaaʻi ai ʻe he ʻOtuá ʻa ia tonu kia Mōsese ʻaki ʻene talaki ʻa Hono huafá mo e niʻihi ʻo Hono ngaahi ʻulungāngá. Naʻe mei lava ke fakamamafaʻi ʻe Sihova ʻa hono mālohí pe potó, ka ʻi hono kehé, naʻá ne ʻuluaki fakahaaʻi ʻa ʻene mēsí mo e manavaʻofá. (Lau ʻa e ʻEkisoto 34:5-7.) Naʻe fiemaʻu ʻe Mōsese ke ne ʻiloʻi pe ʻe tokoniʻi ia ʻe Sihova. Ko ia naʻe fakamamafaʻi ʻe Sihova ʻa e ngaahi ʻulungaanga ʻoku fakahaaʻi ai ʻokú ne loto moʻoni ke tokoniʻi ʻa ʻene kau sevānití. (ʻEki. 33:13) ʻOku fēfē hoʻo ongoʻí ʻi hoʻo ʻiloʻi ʻoku tokanga lahi mai ʻa Sihova kiate kitautolú? ʻE fakahangataha ʻa e kupu ko ení ki he manavaʻofá, ʻa ia ko e ongoʻi fakaʻofaʻia ʻi he faingataʻaʻia ʻa e niʻihi kehé pea holi ke tokoniʻi kinautolu.

2, 3. (a) Ko e hā ʻokú ne fakahaaʻi ʻoku fakanatula pē ke ongoʻi manavaʻofa ʻa e tangatá? (e) Ko e hā ʻoku totonu ai ke ke mahuʻingaʻia ʻi he meʻa ʻoku leaʻaki ʻe he Tohi Tapú fekauʻaki mo e manavaʻofá?

² ʻOku manavaʻofa ʻa Sihova, pea naʻe ngaohi ʻa e tangatá ʻi hono ʻīmisí. Ko ia ʻoku fakanatula pē ki he tangatá ke tokanga ki he niʻihi kehé. Naʻa mo e faʻahinga ʻoku ʻikai te nau ʻiloʻi ʻa Sihová ʻoku nau faʻa fakahāhā ʻa e manavaʻofa. (Sēn. 1:27) ʻI he Tohi Tapú, ʻoku tau maʻu ai ʻa e ngaahi fakamatala fekauʻaki mo e kakai naʻa nau fakahāhā ʻa e manavaʻofá. Ko e fakatātaá, ʻi he fiemaʻu ʻe Solomone ke ne ʻiloʻi pe ko hai ʻi he ongo fefiné ʻa e faʻē ʻa e pēpeé, naʻá ne siviʻi kinaua ʻaki ʻene tuʻutuʻuni ke tuʻu-ua ʻa e pēpeé . Naʻe ongoʻi manavaʻofa moʻoni ʻa e faʻeé ki heʻene pēpeé, ko ia naʻá ne kōlenga ai ki he tuʻí ke tuku ke maʻu ia ʻe he fefine ʻe tahá. (1 Tuʻi 3:23-27) Ko ha faʻifaʻitakiʻanga ʻe taha ʻi he manavaʻofá ko e ʻofefine ʻo Feló. ʻI heʻene maʻu ʻa e pēpē ko Mōsesé, naʻá ne ʻiloʻi ko ha Hepelū ia pea naʻe pau ke tāmateʻi. Ka “naʻá ne ongoʻi manavaʻofa kiate ia,” pea naʻá ne fili ke tauhi ia ko ʻene tamasiʻi.​—ʻEki. 2:5, 6.

³ Ko e hā ʻoku totonu ai ke tau ako lahi ange fekauʻaki mo e manavaʻofá? Koeʻuhí ʻoku fiemaʻu ʻe Sihova ke tau faʻifaʻitaki kiate ia. (ʻEf. 5:1) Neongo naʻe fakatupu kitautolú ke tau manavaʻofa, ʻoku tau taʻehaohaoa pea ʻoku tau hehema ke siokita. ʻI he taimi ʻe niʻihi ʻe ʻikai nai faingofua kiate kitautolu ke fakapapauʻi pe te tau tokoni ki he kakai kehé pe tokangataha pē kiate kitautolu. Ko e hā ʻe lava ke ne tokoniʻi kitautolu ke tau mahuʻingaʻia lahi ange ʻi he niʻihi kehé? ʻUluakí, tau sivisiviʻi angé ʻa e anga hono fakahāhā ʻe Sihova mo e niʻihi kehé ʻa e manavaʻofá. Uá, tau sio angé ki he founga ʻe lava ke tau faʻifaʻitaki ai ki he manavaʻofa ʻa e ʻOtuá mo e ʻuhinga ʻoku lelei ai ke tau fai peheé.

 4. (a) Ko e hā naʻe fekauʻi atu ai ʻe Sihova ha ongo ʻāngelo ki Sōtomá? (e) Ko e hā ʻe lava ke tau ako mei he hokosia ʻa e fāmili ʻo Loté?

⁴ ʻOku ʻi he Tohi Tapú ʻa e ngaahi fakatātā lahi fekauʻaki mo e manavaʻofa ʻa Sihová. Ko e fakatātaá, fakakaukau ki he meʻa naʻá ne fai maʻa Loté. Ko Loté ko ha tangata māʻoniʻoni ʻa ia naʻe “fakalotomafasiaʻi lahi” ʻe he kakai ʻulungaanga taʻetaau ʻi Sōtoma mo Komolá. Ko e kakai ko iá naʻe ʻikai te nau fakaʻapaʻapa ki he ʻOtuá, pea naʻe fakapapauʻi ʻe Sihova naʻa nau tuha mo e mate. (2 Pita 2:7, 8) Naʻe fekauʻi atu ʻe Sihova ha ongo ʻāngelo kia Lote ke tala ange kiate ia ʻe fakaʻauha ʻa Sōtoma mo Komola pea naʻe fiemaʻu ke ne hola. ʻOku pehē ʻe he Tohi Tapú: “ʻI heʻene [Lote] kei fakatuotuaí, pea koeʻuhi ko e manavaʻofa ʻa Sihova kiate iá, naʻe puke ʻe he ongo [ʻāngeló] ʻa hono nimá mo e nima ʻo hono uaifí pea mo e nima ʻo hono ongo ʻofefiné, pea naʻá na ʻomi kinautolu ʻo na tuku kinautolu ʻi tuʻa ʻi he koló.” (Sēn. 19:16) Hangē pē ko hono mahinoʻi ʻe Sihova ʻa e tuʻunga ʻo Loté, ʻoku lava ke tau fakapapauʻi ʻokú ne mahinoʻi ha ngaahi faingataʻa pē ʻoku tau hokosia.​—ʻAi. 63:7-9; Sēm. 5:11, fakamatala ʻi lalo; 2 Pita 2:9.

 5. ʻOku anga-fēfē hono akoʻi kitautolu ʻe he Folofola ʻa e ʻOtuá ke tau fakahāhā ʻa e manavaʻofá?

⁵ Kuo toe akoʻi foki ʻe Sihova ʻa hono kakaí ke nau fakahāhā ʻa e manavaʻofá. Fakakaukau fekauʻaki mo e taha ʻo e ngaahi lao naʻá ne ʻoange ki ʻIsilelí. Kapau naʻe moʻuaʻaki ʻe ha taha ha paʻanga ki ha tokotaha tali nō, naʻe lava ke ʻave ʻe he tokotaha tali noó ʻa e kofu ʻo e tokotahá ko ha meʻa maluʻi ke fakapapauʻi te ne totongi fakafoki ʻa e paʻangá. (Lau ʻa e ʻEkisoto 22:26, 27.) Ka ko e tokotaha tali noó naʻe pau ke ne fakafoki ʻa e kofú ki he tokotahá ʻi he tō ʻa e laʻaá koeʻuhi ke lava ʻo ne māfana ai pē ʻi he poʻulí. Ko ha taha naʻe ʻikai ke manavaʻofa naʻe ʻikai nai te ne loto ke fakafoki ʻa e kofú, ka naʻe akoʻi ʻe Sihova ʻa hono kakaí ke nau manavaʻofa. Ko e hā ʻoku akoʻi mai kiate kitautolu ʻe he tefitoʻi moʻoni ʻoku tuʻu mei mui ʻi he laó ni? ʻOua ʻaupito ʻe tukunoaʻi ʻa e ngaahi fiemaʻu ʻa ha kaungā Kalisitiane. ʻI he taimi ʻoku malava ai ke tau tokoni ki ha tokoua pe tuofefine ʻoku faingataʻaʻia, ʻoku tau loto ke fai pehē.​—Kol. 3:12; Sēm. 2:15, 16; lau ʻa e 1 Sione 3:17.

 6. Ko e hā ʻoku lava ke tau ako mei he manavaʻofa ʻa Sihova ki he kau ʻIsileli angahalaʻiá?

⁶ Naʻe ongoʻi manavaʻofa ʻa Sihova ki he kau ʻIsilelí naʻa mo e taimi naʻa nau faiangahala ai kiate iá. ʻOku tau lau: “Naʻe hanganaki fakatokanga ʻa Sihova ko e ʻOtua ʻo ʻenau fanga kuí kiate kinautolu ʻo fakafou ʻi heʻene kau talafekaú, ʻo toutou fakatokanga, koeʻuhí naʻá ne ongoʻi manavaʻofa ki hono kakaí pea ki hono ʻafioʻangá.” (2 Kal. 36:15) ʻI ha founga meimei tatau, ʻoku totonu ke tau ongoʻi manavaʻofa ki he faʻahinga ʻoku teʻeki ai ke nau ʻiloʻi ʻa Sihova ka te nau fakatomala nai ʻamui pea hoko ko hono ngaahi kaumeʻá. ʻOku ʻikai finangalo ʻa Sihova ke ʻauha ha taha ʻi he fakamaau ka hoko maí. (2 Pita 3:9) Ko ia lolotonga ʻoku kei ʻi ai ʻa e taimí, ʻoku tau loto ke vahevahe atu ʻa ʻene pōpoaki fakaefakatokangá ki he tokotaha kotoa te tau malavá pea tokoniʻi ʻa e tokolahi taha ʻe ala lavá ke nau maʻu ʻaonga mei he manavaʻofa ʻa e ʻOtuá.

7, 8. Ko e hā naʻe tui ai ha fāmili naʻe fakahāhā kiate kinautolu ʻe Sihova ʻa e manavaʻofá?

⁷ ʻI he ʻahó ni, kuo hokosia ai ʻe he tokolahi ʻo e kau sevāniti ʻa Sihová ʻa ʻene manavaʻofá. Ko e fakatātaá, ʻi Posinia lolotonga ʻa e 1990 tupú, naʻe tau mo fetāmateʻaki ai ʻa e ngaahi kulupu fakamatakali kehekehe. ʻI ha fāmili ʻe taha naʻe nofo ai, naʻe ʻi ai ha kiʻi tamasiʻi taʻu 12 te tau ui ko Milan. Ko Milan, mo hono tokouá, mo ʻene ongo mātuʻá, mo ha Kau Fakamoʻoni kehe naʻa nau fononga ʻi ha pasi mei Posinia ki Sēpia. Naʻa nau ō ki ha fakataha-lahi, ʻa ia naʻe palani ʻa e ongo mātuʻa ʻa Milan ke na papitaiso ai. ʻI he kauʻāfonuá, naʻe fakatokangaʻi ai ʻe he kau sōtiá ko e fāmilí naʻa nau kau ki ha kulupu fakamatakali kehe pea nau fekauʻi kinautolu ke nau hifo mei he pasí. Naʻa nau fakaʻatā leva ʻa e toenga ʻo e fanga tokoua ʻi he pasí ke hoko atu ʻenau fonongá. Naʻe ʻikai ke tuku ange ʻe he kau sōtiá ʻi he ʻaho ʻe ua ke ʻalu ʻa e fāmilí. Faifai atu pē, naʻe tā ʻa e ʻōfisa pulé ki he ʻōfisa māʻolungá ʻo ʻeke ange pe ko e hā ʻa e meʻa te ne fai kiate kinautolú. Naʻe tuʻu ʻa e fāmilí ʻi ai tonu pea lava ke nau fanongo atu ki he tali ʻa e ʻōfisa māʻolungá, “ʻAve kinautolu ki tuʻa ʻo fanaʻi!”

⁸ ʻI he lolotonga e talanoa ʻa e kau sōtiá, naʻe fakaofiofi mai ha ongo sola ki he fāmilí. Naʻá na fafana ange ko e ongo Fakamoʻoni foki mo kinaua pea naʻe tala ange kiate kinaua ʻe he fanga tokoua naʻe ʻi he pasí ʻa e meʻa naʻe hokó. Naʻe tala ange ʻe he ongo Fakamoʻoní kia Milan mo hono tokouá ke na heka ʻi heʻena kaá ke nau kolosi ʻi he kauʻāfonuá he naʻe ʻikai ke sivi ʻe he kau sōtiá ia ʻa e pepa ʻa e fānaú. Pea naʻe tala ange ʻe he ongo tokouá ki he ongo mātuʻá ke na lue takai hake ʻi he fuʻu pou ʻi he kauʻāfonuá ʻo fakafetaulaki kiate kinautolu ʻi he tafaʻaki ʻe tahá. Naʻe ilifia ʻaupito ʻa Milan ʻo ʻikai te ne ʻiloʻi pe te ne kata pe tangi. Naʻe ʻeke ʻe heʻene ongo mātuʻá, “ʻOkú mo pehē te nau tuku ange mola pē kimaua ke ma mavahe?” Ka ʻi heʻena lué, naʻe hā ngali hangē ia naʻe ʻikai ke sio ange ʻa e kau sōtiá kiate kinauá. Ko Milan mo hono tokouá naʻá na fetaulaki mo ʻena ongo mātuʻá ʻi he tafaʻaki ʻe taha ʻo e kauʻāfonuá, pea naʻa nau ʻalu leva ki he fakataha-lahí. Naʻa nau tuipau naʻe tali ʻe Sihova ʻenau ngaahi lotú! ʻOku tau ʻiloʻi mei he Tohi Tapú ʻoku ʻikai ke maluʻi fakahangatonu maʻu pē ʻe Sihova ʻa ʻene kau sevānití ʻi ha founga pehē. (Ngā. 7:58-60) Ka ʻi he meʻa ko eni ne hokó, naʻe pehē ai ʻe Milan: “Kiate aú, ʻoku hā ngali naʻe fakakuihi ʻe he kau ʻāngeló ʻa e kau sōtiá pea naʻe fakahaofi kimautolu ʻe Sihova.”​—Saame 97:10.

 9. Naʻe anga-fēfē ʻa e ongoʻi ʻa Sīsū fekauʻaki mo e fuʻu kakai naʻa nau muimui ʻiate iá? (Sio ki he ʻuluaki fakatātā ʻi he kupú ni.)

⁹ Ko Sīsū ʻa e faʻifaʻitakiʻanga lelei ʻaupito ʻi he manavaʻofá. Naʻá ne ongoʻi fakaʻofaʻia ʻi he kakaí koeʻuhi naʻá ne sio “ne ngaohikovia kinautolu mo liʻekina ʻo hangē ha fanga sipi taʻeʻiai hanau tauhí.” Ko ia, ko e hā ʻa e meʻa naʻá ne faí? “Naʻá ne kamata akoʻi kiate kinautolu ʻa e ngaahi meʻa lahi.” (Māt. 9:36; lau ʻa e Maʻake 6:34.) ʻI hono kehé, naʻe ʻikai ke manavaʻofa ʻa e kau Fālesí pea naʻe ʻikai ke nau loto ke tokoniʻi ʻa e kakaí. (Māt. 12:9-14; 23:4; Sione 7:49) ʻI he hangē ko Sīsuú, ʻokú ke maʻu ha holi lahi ke tokoniʻi ʻa e kakaí pea akoʻi kinautolu fekauʻaki mo Sihova?

10, 11. ʻOku taau maʻu pē ke tau fakahāhā ʻa e manavaʻofá? Fakamatalaʻi.

¹⁰ ʻOku ʻikai ʻuhinga eni iá ʻoku taau maʻu pē ke tau fakahāhā ʻa e manavaʻofá. Ko e fakatātaá, naʻe fakakaukau nai ʻa Tuʻi Saula naʻá ne fakahāhā ʻa e manavaʻofá ʻi he ʻikai te ne tāmateʻi ʻa ʻĒkaki, ʻa ia ko e tuʻi ʻo ʻAmalekí pea ko ha fili ʻo e kakai ʻa e ʻOtuá. Naʻe ʻikai foki ke tāmateʻi ʻe Saula ʻa e fanga manu kotoa ʻa e kau ʻAmalekí. Ka naʻe tala ʻe Sihova kia Saula ke ne tāmateʻi ʻa e kau ʻAmalekí kotoa mo ʻenau fanga manú kotoa. Koeʻuhi ko e talangataʻa ʻa Saulá, naʻe siʻaki ai ia ʻe Sihova ʻi hono tuʻunga ko e tuʻí. (1 Sām. 15:3, 9, 15, fakamatala ʻi lalo) Ko Sihova ʻa e Fakamaau māʻoniʻoní. ʻOku lava ke ne ʻiloʻi ʻa e loto ʻo e kakaí, pea ʻokú ne ʻiloʻi ʻa e taimi ʻoku totonu ke fakahāhā ai ʻa e manavaʻofá. (Tangi. 2:17; ʻIsi. 5:11) Kuo vavé ni ke ne ʻomai ʻa e fakamaau ki he faʻahinga kotoa ʻoku fakafisi ke talangofua kiate iá. (2 Tes. 1:6-10) ʻE ʻikai ko e taimi ia ke fakahāhā ai ʻe Sihova ʻa e manavaʻofa ki he kau fulikivanú. Kae kehe, ʻi hono fakaʻauha kinautolú, te ne fakahāhā ai ʻa e manavaʻofa ki he kau māʻoniʻoní, ʻa ia te ne fakahaofí.

¹¹ Ko e moʻoni, ʻoku ʻikai ko haʻatau ngāue ia ke fakamāuʻi pe ʻoku totonu ke moʻui pe mate ʻa e kakaí. ʻI hono kehé, ʻoku fiemaʻu ke tau fai he taimí ni ʻa e meʻa kotoa te tau malavá ke tokoniʻi ʻa e kakaí. Ko e hā ʻa e ngaahi founga ʻaonga ʻe lava ke tau fakahāhā ai ʻa e manavaʻofa ki he niʻihi kehé? Ko ha ngaahi fokotuʻu eni.

12. ʻE lava fēfē ke ke fakahāhā ʻa e manavaʻofa ʻi he anga hoʻo fakafeangai ki he niʻihi kehé?

¹² Tokoni ʻi he moʻui fakaʻahó. ʻOku fiemaʻu mai ʻe Sihova ke fakahāhā ʻe he kau Kalisitiané ʻa e manavaʻofa ki honau kaungāʻapí mo honau fanga tokouá. (Sione 13:34, 35; 1 Pita 3:8) Ko e ʻuhinga ʻe taha ʻo e manavaʻofá ko e “faingataʻaʻia fakataha.” Ko ha tokotaha ʻokú ne fakahāhā ʻa e manavaʻofá ʻokú ne feinga ke tokoniʻi ʻa e faʻahinga ʻoku faingataʻaʻiá. Ko ia ʻoku totonu ke tau kumi ki ha ngaahi faingamālie ke tokoniʻi ʻa e niʻihi kehé, ʻaki hono fai nai haʻanau ngāue pe ko ha fekau ʻoku fiemaʻu.​—Māt. 7:12.

13. Ko e hā ʻoku fai ʻe he kakai ʻa e ʻOtuá ʻi he hili ʻa e ngaahi fakatamaki fakanatulá?

¹³ Kau ʻi he ngāue tokoní. ʻI heʻetau sio ki he faingataʻaʻia ʻa e kakaí koeʻuhi ko ha fakatamaki, ʻoku tau loto ke fakahāhā kiate kinautolu ʻa e manavaʻofá. ʻOku ʻiloa ʻa e kakai ʻa Sihová ʻi heʻenau tokoni ki he niʻihi kehé ʻi he ngaahi taimi peheé. (1 Pita 2:17) Ko e fakatātaá, naʻe nofo ha tuofefine Siapani ʻi ha feituʻu naʻe haveki ʻe ha mofuike mo ha peau kula ʻi he 2011. Naʻá ne pehē naʻá ne “mātuʻaki loto-toʻa mo fiemālie” ʻi heʻene sio ki he kau ngāue pole naʻa nau haʻu mei he ngaahi feituʻu kehekehe ʻo Siapaní pea mei he ngaahi fonua kehé ke fakaleleiʻi ʻa e ngaahi ʻapí mo e ngaahi Fale Fakatahaʻangá. Naʻá ne toe pehē: “Kuo tokoniʻi au ʻe he hokosia ko ení ke u ʻiloʻi ʻoku tokanga mai ʻa Sihova. Pea ko e kaungā Fakamoʻoní ʻoku nau fetokangaʻaki. Ko e fanga tokoua mo e fanga tuofāfine tokolahi ʻi he māmaní kotoa ʻoku nau lotu mai maʻamautolu.”

14. ʻE lava fēfē ke ke tokoniʻi ʻa e kau puké mo e taʻumotuʻá?

¹⁴ Tokoniʻi ʻa e faʻahinga ʻoku puké mo e taʻumotuʻá. ʻI heʻetau sio ki he faingataʻaʻia ʻa e kakaí ʻi he puké mo e taʻumotuʻá, ʻoku tau ongoʻi manavaʻofa. ʻOku tau fakaʻamu ke sio ʻoku ngata ʻa e ngaahi palopalema ko ení, ko ia ʻoku tau lotu ai ke hoko mai ʻa e Puleʻanga ʻo e ʻOtuá. Lolotonga ení, ʻoku tau fai ʻa e meʻa kotoa ʻoku tau malavá ke tokoniʻi ʻa e kau puké mo e taʻumotuʻá. Naʻe tohi ʻe ha faʻutohi ʻo pehē ʻi he ʻaho ʻe taha naʻe fakaʻuliki ai ʻe heʻene faʻē taʻumotuʻá, ʻa ia naʻe puke ʻi he mahaki loto-ngalongaló, ʻa hono valá. Lolotonga ʻene feinga ke ʻai ke maʻá, naʻe tatangi ʻa e fafangu ʻi hono matapaá. Naʻe ʻi ai ha ongo Fakamoʻoni naʻá na ʻaʻahi maʻu pē kiate ia. Naʻe ʻeke ange ʻe he ongo tuofāfiné pe ʻe lava ke na tokoni. Naʻe pehē ʻe he fefiné: “Naʻe fakamā ka naʻá ku ʻio ange.” Naʻe tokoni kiate ia ʻa e ongo tuofāfiné ke ʻai ke maʻa hono valá. Peá na ngaohi hano ipu tī peá na nofo ʻo talanoa mo ia. Naʻe houngaʻia lahi ai ʻa e tamasiʻi ʻa e fefiné peá ne pehē ko e Kau Fakamoʻoní “ʻoku nau fai ki he meʻa ʻoku nau malangaʻí.” ʻOku ueʻi koe ʻe hoʻo manavaʻofa ki he kau puké mo e taʻumotuʻá ke ke fai ʻa e meʻa kotoa ʻokú ke malavá ke tokoniʻi kinautolu?​—Fil. 2:3, 4.

15. ʻOku anga-fēfē hono tokoniʻi ʻe heʻetau ngāue fakamalangá ʻa e niʻihi kehé?

¹⁵ Tokoniʻi ʻa e kakaí ke nau ʻiloʻi ʻa Sihova. Ko e founga lelei taha ʻe lava ke tau tokoniʻi ai ʻa e kakaí ko hono akoʻi kinautolu fekauʻaki mo e ʻOtuá mo hono Puleʻangá. Ko e founga ʻe taha ko hono tokoniʻi kinautolu ke nau sio ki he ʻuhinga ʻoku lelei ai ke nau talangofua ki he ngaahi tuʻunga ʻa Sihová. (ʻAi. 48:17, 18) Ko e ngāue fakamalangá ko ha founga fisifisimuʻa ia ke fakalāngilangiʻi ai ʻa Sihova pea fakahāhā ʻa e manavaʻofa ki he niʻihi kehé. ʻE lava ke ke fai ʻa e meʻa lahi ange ʻi he ngāue fakamalangá?​—1 Tīm. 2:3, 4.

16. ʻOku anga-fēfē ʻetau maʻu ʻaonga ʻi he taimi ʻoku tau manavaʻofa aí?

¹⁶ ʻOku pehē ʻe he kau mataotao ʻi he moʻui lelei fakaʻatamaí ko hono fakahāhā ʻa e manavaʻofá ʻe lava ke fakaleleiʻi ai ʻetau moʻui leleí mo hotau vahaʻangatae mo e niʻihi kehé. ʻI hoʻo tokoniʻi ʻa e faʻahinga ʻoku faingataʻaʻiá, te ke ongoʻi fiefia ange ai, maʻu ʻa e ʻamanaki lahi ange, siʻi ai ʻa e taʻelatá, pea siʻi ʻa e ongoʻi ʻikai leleí. Ko hono fakahāhā ʻa e manavaʻofá ʻoku lelei kiate koe. (ʻEf. 4:31, 32) ʻI hono ueʻi kitautolu ʻe he ʻofá ke tau tokoniʻi ʻa e niʻihi kehé, ʻoku tau maʻu ai ha konisēnisi lelei he ʻoku tau ʻiloʻi ʻoku tau fai ʻa e meʻa ʻoku fiemaʻu mai ʻe Sihova ke tau faí. ʻE tokoniʻi kitautolu ʻe he manavaʻofá ke tau hoko ko e mātuʻa tauhi fānau, ngaahi hoa mali, mo e ngaahi kaumeʻa lelei ange. ʻIkai ko ia pē, ko e kakai ʻoku nau fakahāhā ʻa e manavaʻofa ki he niʻihi kehé ʻoku faʻa tokoniʻi kinautolu ʻi he taimi ʻoku nau fiemaʻu aí.​—Lau ʻa e Mātiu 5:7; Luke 6:38.

17. Ko e hā ʻokú ke loto ai ke manavaʻofá?

¹⁷ Neongo ko hono fakahāhā ʻa e manavaʻofá ʻoku lelei kiate kitautolu, ko e ʻuhinga tefito ʻoku tau fakahāhā ai ʻa e manavaʻofá he ʻoku tau loto ke faʻifaʻitaki kia Sihova pea ʻoatu ʻa e lāngilangí kiate ia. Ko ia ʻa e Matavai ʻo e ʻofá mo e manavaʻofá. (Pal. 14:31) ʻOkú ne fokotuʻu mai ʻa e faʻifaʻitakiʻanga haohaoá kiate kitautolu. Ko ia tau fai ʻa e meʻa kotoa te tau malavá ke faʻifaʻitaki ki he ʻOtuá ʻaki hono fakahāhā ʻa e manavaʻofá. Te tau ʻunuʻunu leva ʻo ofi ange ai ki hotau fanga tokouá mo e fanga tuofāfiné pea maʻu ʻa e ngaahi vahaʻangatae lelei ange mo e kakai takatakai ʻiate kitautolú.​—Kal. 6:10; 1 Sio. 4:16.