ʻOku Tokanga Mai ʻa e ʻOtuá?

ʻI HE pongipongi ʻo Nōvema 1, 1755, naʻe luluʻi ai ʻa e kolo ko Lisbon, ʻi Potukalí, ʻe ha mofuike. Naʻe hoko atu ai ha peau kula mo ha vela, ʻo fakaʻauha ai ʻa e konga lahi ʻo e koló pea mate ai ʻa e laui afe.

Hili e mofuike ʻi Haiti he 2010, naʻe fakahaaʻi ai ʻe ha ʻētita ʻi he nusipepa Kānata ko e National Post: “Ko e ngaahi meʻa fakamamahi lalahi kotoa pē ʻoku ʻahiʻahiʻi ai e tui ʻa e tangatá ki ha mālohi māʻolunga ange. Kae hangē pē ko ia ʻi he tuʻunga ʻo Lisbon, ko e ngaahi mofuike ʻi onopooni hangē ko ia ʻi Haití ʻoku ʻahiʻahiʻi ai e tui ʻa e tangatá ʻo lahi ange ia ʻi he ngaahi ʻahiʻahi kehé.” Naʻe fakaʻosiʻaki ʻo pehē ʻi he kupú: “ʻOku pau pē nai kuo liʻaki ʻe he ʻOtuá ʻa Haiti.”

ʻI hono tuʻunga ko e “Mafimafi,” ʻoku maʻu ʻe he ʻOtua ko Sihová ʻa e mālohi taʻefakangatangata, ʻo kau ai ʻa e malava ke fakangata ʻa e faingataʻaʻiá. (Saame 91:​1, PM) ʻIkai ngata aí, ʻoku lava ke tau fakapapauʻi ʻokú ne tokanga mai. Ko e hā hono ʻuhingá?

Ko e Hā ʻOku Tau ʻIloʻi Fekauʻaki mo e ʻOtuá?

ʻOku ongoʻi manavaʻofa ʻa e ʻOtuá ki he faʻahinga ʻo e tangatá ʻoku faingataʻaʻiá. ʻI he taimi naʻe tukupōpula ai ʻa e kau ʻIsilelí ʻi ʻIsipite pea ngaohikovia ʻe he faʻahinga naʻa nau puke kinautolú, naʻe tala ʻe he ʻOtuá kia Mōsese: “Kuo u matuʻaki mamata ki he ngaohikoviʻi ʻo hoku kakai ʻoku ʻi Isipite, pea kuo ongo mai ʻenau tautapa koeʻuhi ko honau kau ofisa; he ʻoku ou ʻiloʻi ʻenau ngaahi mamahi.” (ʻEkisoto 3:7) Ko e hā ʻoku fakahaaʻi ʻi he meʻá ni? ʻOku ʻikai ke taʻetokanga mai ʻa e ʻOtuá ki he faingataʻaʻia ʻa e tangatá. ʻI hono kehé, ʻi ha ngaahi senituli ki mui ai, naʻe tohi ʻa e palōfita ko ʻAiseá ʻo fekauʻaki mo e kau ʻIsilelí: “ʻI he mamahi kotoa naʻe hoko kiate kinautolu naʻe hoko ha mamahi ki Heʻene ʻAfio.”—ʻAisea 63:9.

“Ko ʻene ngaahi founga kotoa ʻoku fakakonisitutone.” (Teutalōnome 32:4) ʻOku faitotonu mo taʻefilifilimānako ʻa e ʻOtuá ʻi he meʻa kotoa pē ʻokú ne faí. “Oku ne maluʻi ae hala o ene kakai maonioni,” ka te ne toe “totongi mamahi ki he faʻahinga ʻoku nau fai ha fakamamahi” ki he kau māʻoniʻoní. (Palōveepi 2:​8, PM; 2 Tesalonaika 1:6, 7) ʻI he taʻefilifilimānakó, “ʻoku ʻikai te ne kau mo e kau pulé pe leleiʻia ʻi he koloaʻiá ʻo laka ia ʻi he masivá, he naʻá ne fakatupu ʻa e tokotaha kotoa pē.” (Siope 34:​19, Today’s English Version) ʻOku toe ʻafioʻi ʻe he ʻOtuá ʻa e founga lelei taha ke fakaleleiʻi ʻaki e faingataʻaʻia ʻa e faʻahinga ʻo e tangatá. ʻI hono kehé, ko e ngaahi fakaleleiʻanga ʻa e tangatá ʻoku lava ke fakahoa ia ki hono haʻiʻaki ha meʻa haʻi lavea ha lavea ʻi ha meʻafana. Lolotonga ʻe fakapuliki nai ʻe he meʻa haʻi laveá ʻa e palopalemá, ʻoku ʻikai te ne fai ha meʻa ki he ʻīsiu tefitó pea naʻa mo hono fakangata e faingataʻaʻia ʻa e tokotaha maʻukoviá.

Ko e ʻOtuá ʻoku ‘mohu meesi mo anga-ʻofa . . . pea fonu ʻi he ʻaloʻofa.’ (ʻEkisoto 34:6, NW) Ko e foʻi lea ‘mēsí,’ hangē ko ia ʻoku ngāueʻaki he Tohi Tapú, ʻoku fakahaaʻi ai e kaungāongoʻi loto-māfana mo e fakaʻofaʻia ʻa ē ʻoku ueʻi ai ha taha ke ne tokoni ki ha taha. Ko e tupuʻanga ʻo e foʻi lea faka-Hepelū ne liliu ko e ‘anga-ʻofá’ ʻoku fakamatalaʻi ia “ko ha fakafeangai loto-moʻoni ʻoku fai ʻe ha taha ʻoku ʻi ai haʻane meʻa ke foaki ki he taha ko ē ʻoku ʻi ai ʻene fiemaʻú.” Fakatatau ki he Theological Dictionary of the Old Testament, ko e foʻi lea ne liliu ko e ‘ʻaloʻofá’ ʻoku kau ai e “kau maʻa ha taha ʻoku tofanga ʻi ha tuʻutāmaki pe mamahi.” Ko Sihova ko e ʻOtuá ʻoku ʻikai ngata pē heʻene ongoʻi mamahi he taimi ʻoku faingataʻaʻia ai ha tangatá ka ʻoku ueʻi ia heʻene mēsí, anga-ʻofá, mo e ʻaloʻofá ke ne fai ha tokoni. Ko ia ai, ʻoku lava ke tau tuipau te ne fakangata e faingataʻaʻiá.

Ko e kupu ki muʻá ne fakahaaʻi ai e meʻa tefito ʻe tolu ʻoku tokoni ki he lahi ʻo e faingataʻaʻia ʻa e tangatá he ʻaho ní, ʻa ia ʻoku hala ha meʻa ʻe taha ai ʻe lava ke tukuakiʻi ki he ʻOtuá. Tau lāulea he taimí ni ki he meʻa ʻoku tuʻu mei mui he meʻa tefito ko iá.

Fili Fakafoʻituitui

Naʻe muʻaki puleʻi ʻa ʻĀtama ʻe he ʻOtuá. Kae kehe, ʻi hono tuku ange ke ne fai ha filí, naʻá ne fili ke siʻaki ʻa e tuʻunga-pule fakaʻotuá pea ʻahiʻahiʻi e ngaahi nunuʻa ʻo e tauʻatāina mei he ʻOtuá. Naʻá ne taʻetokanga ki he fakatokanga ʻa Sihova ʻoku hiki he Sēnesi 2:17: “Kuo pau te ke mate.” Ko e taʻemalava ʻa ʻĀtama ke fakamoʻulaloa ki he pule haohaoa ʻa e ʻOtuá naʻe iku ia ki he angahala mo e taʻehaohaoa ki he faʻahinga kotoa ʻo e tangatá. “Ko e fou mai ʻi he tangata pē taha ʻa e hū ʻa e angahalá ki he māmaní” ko e fakamatala ia ʻa e Tohi Tapú, “pea ko ia kuo mafola ai ʻa e maté ki he tangata kotoa pē koeʻuhi kuo nau angahala kotoa pē.” (Loma 5:12) Ka ʻe toʻo ʻe he ʻOtuá ʻa e ngaahi nunuʻa ʻo e angahalá.

Ngaahi Meʻa Naʻe Hokonoa

Hangē ko ia naʻe fakahaaʻi ʻi ʻolungá, ko e ʻuluaki tangatá, ʻa ʻĀtama, naʻá ne siʻaki ʻa e tataki fakaʻotuá—ʻa e tataki tofu pē ko ia naʻe fiemaʻu ke hokohoko atu ai e malu ʻa e faʻahinga ʻo e tangatá—naʻa mo e malu mei he ngaahi fakatamaki fakanatulá. Ko ʻene filí ʻe lava ke fakahoa ia ki ha tokotaha mahaki ʻokú ne siʻaki ʻa hono tokangaʻi ʻe ha toketā pōtoʻi mo taukei. Kapau ʻoku ʻikai lāuʻilo ʻa e tokotaha mahakí ki he ngaahi fakatuʻutāmaki mo e palopalema fakaemoʻuilelei ʻoku ʻiloʻi ʻe he toketaá, te ne faingataʻaʻia nai ʻi heʻene tukunoaʻi loto-fefeká pea ko e meʻá ni ʻe iku nai ai ʻo uesia ʻa e niʻihi kehé. ʻI he tuʻunga meimei tatau, ko e kovi hono fakalele ʻe he tangatá ʻa e māmaní—kau ai hono fai e ngaahi langa ʻoku ʻikai malú mo e taʻeʻilo fekauʻaki mo e mālohi ʻo natula ʻi he māmaní​—ʻa ia ʻoku faʻa ʻai ke kovi ange ai ʻa e ngaahi fakatamaki fakanatulá. Kae kehe, heʻikai fakaʻatā ʻe he ʻOtuá ke hokohoko atu taʻengata ʻa e tuʻunga ko ení.

“Ko e Pule ʻo e Māmani ko Ení”

Ko e hā kuo fakaʻatā ai ʻe he ʻOtuá ʻa Sētane ke ne puleʻi ʻa e māmaní ʻo fuʻu fuoloa hili ʻene angatuʻú? Fakatatau ki he maʻuʻanga fakamatala ʻe taha, “ko ha faʻahinga founga-pule foʻou pē, ʻi he kamatá ʻoku ʻi ai ha vahaʻa taimi nounou ʻa ia ʻoku lava ai ke nau tukuakiʻi e ngaahi palopalemá ki he founga-pule ki muʻá.” Kapau naʻe liua tōmuʻa ʻe Sihova ʻa e “pule ʻo e māmani ko ení,” naʻe mei lava ke tukuakiʻi ʻe Sētane ʻene ngaahi tuʻunga taʻefeʻungá ki he Pule ki muʻá, ʻa e ʻOtuá. (Sione 12:31) Kae kehe, ko hono fakaʻatā ʻa e taimi ke matolo atu ke fakahāhā kakato ai ʻe Sētane hono mafai ki he māmaní kuo fakamoʻoniʻi ai ʻene taʻelavameʻa ʻi he tuʻunga ko ha pulé. Neongo ia, ʻoku kei tuʻu pē ʻa e fehuʻí, ʻE lava fēfē ke tau fakapapauʻi ʻe ngata ʻa e faingataʻaʻiá?

[Fakatātā ʻi he peesi 6]

ʻE ngāueʻaki ʻe ha toketā ha meʻa haʻi lavea pē ke faitoʻoʻaki ha lavea ʻi ha meʻafana ʻoku fetotoʻi?