Tali ki he Ifi ʻa e Talupité ʻi he ʻAhó Ni

ʻOKU tau tui kotoa ko Sihova ʻokú ne tataki mo poupouʻi fakalaumālie ʻene kakaí ʻi he “ngaahi ʻaho fakaʻosí.” (2 Tīm. 3:1) ʻOku hā mahino, ko e meʻa pē ia ʻa e toko taha taki taha ke ne tali. ʻE lava ke tau fakahoa hotau tuʻungá ki he tuʻunga naʻe ʻi ai ʻa e kau ʻIsilelí he toafá. Naʻe pau ke nau tali ki he ifi ʻa e talupité.

Naʻe fekauʻi ʻe Sihova ʻa Mōsese ke ne ngaohi ha talupite siliva ʻe ua naʻe tuki “ke uiʻaki ʻa e fuʻu fakatahá pea ki hono veteki ʻa e ngaahi ʻapitangá.” (Nōm. 10:2) Naʻe pau ke ifi ʻe he kau taulaʻeikí ʻa e ongo talupité ʻi he ngaahi founga kehekehe ke fakahaaʻi ai ʻa e meʻa naʻe fiemaʻu ke fai ʻe he kakaí. (Nōm. 10:3-8) ʻI he ʻahó ni, ko e kakai ʻa e ʻOtuá ʻoku nau maʻu ʻa e tataki ʻi he ngaahi founga kehekehe. Fakakaukau ki he founga ʻe tolu ko ení ʻoku fakamanatu mai ai ʻa e ifi ʻo e talupité ʻi he kuonga muʻá. Ko e kakai ʻa e ʻOtuá he ʻaho ní ʻoku fakaafeʻi kinautolu ki he ngaahi fakataha lalahi, ko e kau ʻovasia kuo fakanofó ʻoku nau maʻu ʻa e ako, pea ko e ngaahi fokotuʻutuʻu fakateokalati ki he kotoa ʻo e ngaahi fakatahaʻangá ʻoku fakaleleiʻi pe fakatonutonu.

ʻI he fiemaʻu ʻe Sihova “ʻa e fuʻu fakatahá kotoa” ke fakatahataha ki he hūʻanga ʻo e tafaʻaki fakahahake ʻo e tāpanekalé, naʻe ifi fakatouʻosi ʻe he kau taulaʻeikí ʻa e ongo talupité. (Nōm. 10:3) Ko e kotoa ʻo e ngaahi matakali, ʻa ia naʻa nau ʻapitanga takatakai ʻi he tāpanekalé ʻi he vāhenga ʻe faá, naʻa nau fanongo ki heni. Ko e faʻahinga naʻa nau ʻapitanga ofi ki he hūʻangá ʻoku ngalingali naʻe vave ʻenau aʻu ki aí. Ko e niʻihi naʻa nau nofo mamaʻo pea fiemaʻu nai ʻa e taimi lahi ange mo e feinga lahi ke aʻu ki ai. Pe ko e hā pē ʻa e tuʻungá, naʻe loto ʻa Sihova ke nau fakatahataha kotoa pea maʻu ʻaonga mei ai.

ʻI he ʻahó ni, ʻoku ʻikai ke tau fakatahataha ki ha tāpanekale, ka ʻoku fakaafeʻi kitautolu ki ha fakatahataha ʻa e kakai ʻa e ʻOtuá. ʻOku kau ki heni ʻa e ngaahi fakataha-lahi fakavahe mo e ngaahi fakataha makehe, ʻa ia ʻoku tau maʻu ai ʻa e fakamatala mo e tataki mātuʻaki mahuʻinga. ʻI māmani lahi, ko e kakai ʻa Sihová ʻoku nau maʻu ʻa e polokalama tatau. Ko ia, ko e faʻahinga ʻoku nau tali ʻa e fakaafe ke maʻu iá ʻoku nau fiefia ke fakatahataha fakataha ko ha kulupu. Ko e niʻihi kuo pau ke nau fononga mamaʻo mai. Kae kehe, ko e faʻahinga ʻoku nau tali ʻa e fakaafé ʻoku nau tui ʻoku tuha moʻoni ia mo e feingá.

Kae fēfē ʻa e faʻahinga ʻi he ngaahi kulupu tuʻu mavahe ʻoku mamaʻo ʻaupito mei he ngaahi fakatahataha lalahí? ʻOku tau fakamālō ki he tekinolosia ʻi onopōní, ko e tokolahi ʻo e faʻahinga ko ení ʻoku malava ke nau maʻu ʻaonga mei he ngaahi polokalama tatau pea aʻu ʻo nau ongoʻi ʻoku nau hoko ko ha konga ʻo e fakatahataha lalahi ko ení. Ko e fakatātaá, lolotonga ʻa e ʻaʻahi ha fakafofonga mei he ʻuluʻi ʻapitangá, ko e vaʻa ʻi Peniní naʻa nau fakahoko hangatonu ha polokalama ki Arlit, Naisa, ko ha kolo keliʻanga malala ʻi he Toafa Sahalá. Ko e fanga tokoua, fanga tuofāfine mo e faʻahinga mahuʻingaʻia ʻe toko 21 naʻa nau maʻu iá. Neongo naʻa nau ʻi ha feituʻu mamaʻo, naʻa nau ongoʻi fāʻūtaha mo e fuʻu fakatahataha ʻo e toko 44,131 ko iá. Naʻe tohi ʻe ha tokoua: “ʻOku mau fakamālō atu ʻaki homau lotó kotoa ki hono fakahoko hangatonu mai ʻo e fakatahá. ʻOku fakahaaʻi mai ai ʻa e lahi hoʻomou ʻofa ʻiate kimautolú.”

ʻI hono ifi ʻe ha taulaʻeiki ʻIsileli ʻa e talupite pē ʻe taha, “ko e ngaahi ʻeikí pē, ʻa e ngaahi ʻulu ʻo e laui afe,” naʻe pau ke nau hā ʻi he tēniti feʻiloakiʻangá. (Nōm. 10:4) Naʻe lava ke nau maʻu ai ʻa e fakamatala mo e ako meia Mōsese. ʻE tokoniʻi ai kinautolu ke fai honau ngaahi fatongia ʻi honau ngaahi matakalí. Kapau ko ha taha koe ʻi he ngaahi ʻeiki ko iá, ʻikai te ke fai ʻa e kotoa te ke malavá ke ʻi ai pea maʻu ʻaonga mei ai?

ʻI he ʻahó ni, ko e kau mātuʻa ʻi he fakatahaʻangá ʻoku ʻikai ko e “ngaahi ʻeikí”; pe hoko ʻo fiepule ki he tākanga ʻa e ʻOtuá ʻoku nau tokangaʻí. (1 Pita 5:1-3) Ka ko hono moʻoní ʻoku nau fai honau lelei tahá ke tauhi ʻa e tākangá. Ko ia, ʻoku nau tali loto-lelei hono fakaafeʻi kinautolu ki ha toe ako, hangē ko e Ako Fakafaifekau ʻo e Puleʻangá. ʻI he ngaahi ako ko iá, ʻoku ako ai ʻa e kau mātuʻá ki he founga ke fakahoko lelei ange ai honau fatongia ʻi he fakatahaʻangá. Ko hono olá ʻoku tupulaki fakalaumālie ange ai ʻa e tokotaha kotoa. Neongo kapau ʻoku teʻeki ke ke maʻu ha taha ʻo e ngaahi ako ko iá, ʻoku ngalingali ʻokú ke maʻu ʻaonga mei he faʻahinga naʻa nau ʻosi maʻu iá.

Ko e kau taulaʻeiki ʻIsilelí naʻa nau faʻa ifi fetōʻaki ʻa e talupité. Naʻe fanongonongo heni naʻe loto ʻa Sihova ki he ʻapitangá kotoa ke nau hiki. (Nōm. 10:5, 6) Ko e hiki ʻa e ʻapitangá naʻe hoko ia ko ha fakahāhā fakaofo ʻo e fokotuʻutuʻu maau, ka naʻe toe fiemaʻu ki ai ʻa e ngāue lahi ki he tokotaha kotoa. ʻI he taimi ʻe niʻihi naʻe fakatoupīkoi ʻa e niʻihi ke hiki. Ko e hā hono ʻuhingá?

Mahalo naʻe ongoʻi ʻe he niʻihi ko e ui ke hikí naʻe fuʻu hokohoko pea taʻeʻamanekina. “ʻI he taimi ʻe niʻihi, naʻe nofo ʻa e ʻaó mei he efiafí pē ʻo aʻu ki he pongipongí.” ʻI he taimi ʻe niʻihi “naʻe ʻaho ʻe ua, māhina ʻe taha, pe lōloa ange” ʻa e hiki mei he feituʻu ki he feituʻu. (Nōm. 9:21, 22) Pea naʻe tuʻo fiha ʻa e hiki ʻa e ʻapitangá? ʻOku lave ʻa e Nōmipa vahe 33 ki he ngaahi feituʻu ʻe 40 naʻe ʻapitanga ai ʻa e kau ʻIsilelí.

ʻI he taimi ʻe niʻihi, naʻe maʻu ʻe he niʻihi ha feituʻu naʻe malumalu. Naʻe lava ke hoko eni ko ha feituʻu lelei ʻi ha “toafa lahi mo fakamanavahē.” (Teu. 1:19) Ko ia, ʻe lava ke hoko ko ha fakatauele ke fakakaukau ko e hikí ʻe toe kovi ange ai ʻa e ngaahi meʻá.

ʻI he kamata ke mavahe atu ʻa e ngaahi matakalí, ʻe faingataʻa nai ki he niʻihi ke nau tatali. Naʻe fanongo ʻa e tokotaha kotoa ki he ifi fetōʻaki ʻa e talupité, ka heʻikai lava ke nau mavahe kotoa ʻi he taimi tatau. Ko e ifi fetōʻaki ko ia ʻa e talupité ko ha fakaʻilonga ia ki he ngaahi matakali naʻe ʻapitanga ʻi he hahaké, ʻa ia ko Siuta, ʻĪsaka mo Sepulone, ʻoku totonu ke nau mavahe. (Nōm. 2:3-7; 10:5, 6) Hili ʻenau mavahé, naʻe toe ifi fetōʻaki ʻe he kau taulaʻeikí ʻa e talupité ko hono tuʻo uá ia ko ha fakaʻilonga ki he vāhenga matakali ʻe tolu naʻa nau ʻapitanga ʻi he tongá. Naʻe hokohoko atu hono fai eni ʻe he kau taulaʻeikí kae ʻoua ke mavahe kotoa atu ʻa e ʻapitangá.

Mahalo pē kuó ke hokosia ʻa e ngaahi ongoʻi veiveiua fekauʻaki mo e fakatonutonu fakaekautaha ʻe niʻihi. Te ke ongoʻi lōmekina nai ʻi he taimi ʻoku lahi ai ʻa e ngaahi liliu taʻeʻamanekiná. Pe mahalo ʻokú ke ongoʻi fiemālie pē ʻi he ngaahi fokotuʻutuʻu pau pea fakaʻamu naʻe ʻikai ke toe fakatonutonu. Pe ko e hā pē ʻa e ʻuhingá, ʻokú ke ongoʻi nai kuo ʻahiʻahiʻi hoʻo kātakí, pea fiemaʻu ʻa e taimi ke feʻunuʻaki ai. Neongo ia, kapau ʻoku tau feinga mālohi ke fakafeangai ʻi he founga totonú, ʻoku ngalingali te tau vakai ʻoku tāpuakiʻi kitautolu ʻe he ʻOtuá.

ʻI he taimi ʻo Mōsesé, naʻe tataki ʻe Sihova ʻa e kau tangata, kau fefine mo e fānau ʻe laui miliona ʻi he toafá. Ka ne taʻeʻoua ʻene tokangá mo e tatakí heʻikai ke nau hao. ʻI he ʻahó ni, ʻoku tau hao fakalaumālié ko e tataki ʻa Sihová. Ko hono moʻoní, ʻoku tau tupulekina! Ko ia ai, ʻofa ke tau fakapapauʻi kotoa ke tali ki he ifi ʻa e talupité ʻo hangē ko e kau ʻIsileli faitōnungá!