Ko ha Akonaki Fakatohitapu ʻa e Tolu-Tahaʻi-ʻOtuá?

▪ Neongo ʻoku ʻi ai hono ngaahi ʻuhinga kehekehe lahi, ko e tokāteline Tolu-Tahaʻi-ʻOtuá ʻoku fakamatalaʻi ia ʻi he founga ko ení ʻo pehē: “Ko ha toko tolu fakaʻotua (ko e Tamai, ko e ʻAlo, ko e Laumālie Māʻoniʻoni), ko e tokotaha taki taha ʻoku pehē ʻoku taʻengata, ko e tokotaha taki taha ʻoku pehē ʻoku māfimafi-aoniu, ʻoku ʻikai ha taha ʻe lahi ange pe siʻi ange, ko e tokotaha taki taha ʻoku pehē ko e ʻOtua, pea ʻi he hili iá ʻi hono fakatahaʻi kinautolú ko e ʻOtua pē ʻe taha.” Ko ha akonaki Fakatohitapu eni?

ʻOku faʻa ʻohake ʻa e Mātiu 28:19 ke fakamoʻoniʻi ʻaki ʻa e tokāteline ko ení. Ko e fakalea ʻo e Paaki Foʻoú ʻoku fakahaaʻi ai ʻa e lea ʻa Sīsū: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni.” Ko e moʻoni, ko e Tamaí, ko e ʻAló, pea mo e laumālie māʻoniʻoní ʻoku lave kotoa kiate kinautolu ʻi he veesi ko ení. Kae kehe, ʻoku ʻikai ha meʻa ʻe leaʻaki ai ʻo fekauʻaki mo haʻanau taha. Naʻe fekauʻi ʻe Sīsū ʻa hono kau muimui Siú ke akoʻi mo papitaiso ʻa e kakaí ʻi he huafa ʻo e Tamaí, ko e ʻAló pea mo e laumālie māʻoniʻoní. ʻI he tuʻunga ko ha puleʻangá, ko e hā naʻe tui ki ai ʻa e kau Siú?

ʻI he taimi naʻe maʻu ai ʻe he puleʻanga ʻIsilelí ʻa e fuakava Laó, ʻa ia ʻoku faʻuʻaki ha konga ʻo e Tohi Tapú, naʻe fekauʻi ai kinautolu: “ʻOua naʻa ai hao ʻOtua kehe, ʻo ua ʻaki au.” (Teutalōnome 5:7) Ko e toko fiha naʻe lea hení? ʻI he ʻikai ha toe fakapuputuʻú, ʻoku pehē ʻi he Teutalōnome 6:4: “Fanongo mai, ʻa Isileli, Ko Sihova ko hotau ʻOtua ko e tahaʻi Sihova ia”—ʻikai ko e toko tolu ʻi he taha. Naʻe toki ʻosi atu pē hono fakatauʻatāinaʻi ʻo ʻIsileli mei ʻIsipite, ʻa ia ko ʻOsilisi, ʻĪsisi, mo Hōlusi (ʻoku hā ʻi he toʻohemá)—ko e taha eni ʻo ha ngaahi toluʻi ʻotua—naʻe fai ki ai ʻa e lotú. Ko ia ai, naʻe fekauʻi ʻa ʻIsileli ke nau lotu ki he ʻOtua pē ʻe taha. Naʻe mahuʻinga fēfē ki he kakaí ke nau mahinoʻi ʻa e fekau ko ení? Fakatatau kia Dr.  J.  H.  Hertz, ko ha lāpai: “Ko e fakamatala mahino ko eni ʻo e lotu ki he ʻotua pē ʻe tahá naʻe hoko ia ko ha fakafetau ki he kotoa ʻo e tui ʻotua tokolahí . . . Ko e Semá ʻoku ʻikai fakakau ai ʻa e tolu-tahaʻi-ʻotua ʻo e tui faka-Kalisitiané koeʻuhí ʻoku fepaki ia mo e tui ʻOtua pē tahá.”a

Koeʻuhí ko Sīsū ko ha Siu ia ʻi hono fanauʻí, naʻe fakahinohinoʻi ia ke ne muimui ʻi he fekau tatau pē ko ení. Hili ʻene papitaisó, ʻi hono ʻahiʻahiʻi ʻe he Tēvoló, naʻá ne pehē: “ʻAlu mamaʻo, Sētane! He kuo tohi: ‘Ko Sihova ko ho ʻOtuá kuo pau ke ke lotu ki aí, pea ko ia toko taha pē kuo pau ke ke fai ki ai ʻa e ngāue toputapú.’” (Mātiu 4:10; Teutalōnome 6:13) ʻE lava ke tau ako ʻa e meʻa ʻe ua mei he meʻa ko eni naʻe hokó. ʻUluakí, naʻe feinga ʻa Sētane ke fakataueleʻi ʻa Sīsū ke lotu ki ha tokotaha kehe meia Sihova, ko ha feinga naʻe mei ngalivale kapau naʻe hoko ʻa Sīsū ko ha konga ʻo e ʻOtua tatau pē. Uá, naʻe fakahaaʻi mahino ʻe Sīsū ʻoku ʻi ai ʻa e ʻOtua pē ʻe taha kuo pau ke fai ki ai ʻa e lotú ʻi heʻene pehē “ko ia toko taha pē,” ʻo ʻikai ko e “kimautolu,” ʻa ia naʻá ne mei leaʻaki kapau naʻá ne hoko ko e konga ʻo ha Tolu-Tahaʻi-ʻOtua.

ʻI hono maʻu ʻe he kakaí ʻa e ʻilo totonu ki he ʻOtuá pea loto ke tauhi kiate iá, ʻoku nau papitaiso “ʻi he huafa ʻo e Tamaí mo e ʻAló mo e laumālie māʻoniʻoní.” (Mātiu 28:19) ʻOku nau mahinoʻi mo tali ʻa e mafai ʻo Sihová pea mo e ngafa ʻo Sīsū Kalaisi ʻi hono fakahoko ʻa e taumuʻa ʻa Sihová. (Saame 83:18; Mātiu 28:18) ʻOku nau toe mahinoʻi foki ʻa e ngafa mo e ngāue ʻa e laumālie māʻoniʻoni ʻo e ʻOtuá, ʻa ia ko hono ivi ngāué ia.—Sēnesi 1:2; Kalētia 5:22, 23; 2 Pita 1:21.

Ko e tokāteline Tolu-Tahaʻi-ʻOtuá kuó ne ʻai ke puputuʻu ʻa e kakaí ʻi he laui senituli. ʻI he tafaʻaki ʻe tahá, naʻe fakamaama ʻe Sīsū ʻa hono kau muimuí pea fakahanga kinautolu ki he “ʻOtua moʻoni pē taha,” ko Sihová.—Sione 17:3.

[Fakamatala ʻi lalo]

[Picture Credit Line ʻi he peesi 31]

Musée du Louvre, Paris