Ko Ho Kahaʻú, Ko Hoʻo Filí!

ʻOKU ʻI AI HAʻO FILI MOʻONI PE ʻE FĒFĒ HO KAHAʻÚ? ʻOku tui ʻa e kakai ʻe niʻihi ko e tufakangá pe toka tuʻutuʻuní, ʻikai ko e fili fakafoʻituituí, ʻokú ne puleʻi ʻenau moʻuí. ʻI he ʻikai ke nau aʻusia ha ngaahi taumuʻa pau, ʻoku nau pehē pē ko ha meʻa ʻoku taʻealakalofi. “Naʻe ʻosi toka tuʻutuʻuni pē ia ke pehē!”

ʻOku hoko ʻa e niʻihi ʻo mamahi ʻi heʻenau sio ʻoku ʻikai ke toe felave ha meʻa ʻi he māmani fakamafasia mo taʻefaitotonu ko eni ʻoku tau moʻui aí. Kuo nau feinga nai ke ʻai ʻenau moʻuí ke lelei ange​—ko e meʻa pē ʻoku nau sio ki aí ko e tau, faihia, fakatamaki fakanatula, mo e mahamahaki ʻokú ne uesia ʻenau ngaahi palaní ʻi he taimi ki he taimi. ʻOku nau ʻeke hifo: ‘Ko e hā ke toe hohaʻa aí?’

Ko e moʻoni ko e ngaahi tuʻunga ʻi he moʻuí ʻoku ʻi ai ʻene mātuʻaki kaunga ki hoʻo palaní. (Tangata Malanga 9:11) Kae kehe, ʻi he fekauʻaki mo ho kahaʻu taʻengatá, ʻoku ʻi ai moʻoni ha fili ke ke fai. Ko hono moʻoní, ʻoku fakahaaʻi ʻe he Tohi Tapú ko ho kahaʻú ʻoku fakatuʻunga ʻi hoʻo filí. Fakakaukau ki he meʻa ʻokú ne leaʻakí.

Ko Mōsese, ʻa e taki ʻo e puleʻanga ʻo ʻIsileli ʻo e kuonga muʻá, naʻá ne tala ki he kakaí ʻi heʻenau teu hū atu ki he Fonua ʻo e Talaʻofá: “Kuó u fokotuʻu ʻa e moʻui mo e mate ʻi ho ʻaó, ko e tāpuaki mo e mala; pea kuo pau ke ke fili ʻa e moʻuí koeʻuhi ka ke moʻui, ʻa koe mo ho hakó, ʻaki hoʻo ʻofa kia Sihova ko ho ʻOtuá, ʻaki hoʻo fanongo ki hono leʻó, pea ʻaki hoʻo pīkitai kiate ia.”​—Teutalōnome 30:15, 19, 20.

“Kuó u fokotuʻu ʻa e moʻui mo e mate ʻi ho ʻaó, ko e tāpuaki mo e mala; pea kuo pau ke ke fili ʻa e moʻuí koeʻuhi ka ke moʻui.”​—Teutalōnome 30:19

ʻIo! Naʻe fakahaofi ʻe he ʻOtuá ʻa e kau ʻIsilelí mei he nofo pōpula ʻi ʻIsipité pea fokotuʻu ʻi honau ʻaó ʻa e ʻamanaki ko ha moʻui tauʻatāina mo fiefia ʻi he Fonua ʻo e Talaʻofá. Ka heʻikai ke hokonoa kotoa mai ia kiate kinautolu. Ke maʻu ʻa e ngaahi tāpuaki ko iá, naʻe pau ke nau “fili ʻa e moʻuí.” Anga-fēfē? ‘ʻAki ʻa e ʻofa ki he ʻOtuá, ʻaki ʻa e fanongo ki hono leʻó, pea ʻaki ʻa e pīkitai kiate ia.’

ʻI he ʻahó ni, ʻoku ʻi ai ha fili meimei tatau ʻi ho ʻaó, pea ko hoʻo filí ʻe fakapapauʻi ai pe ʻe fēfē ho kahaʻú. ʻI he fili ke ʻofa ki he ʻOtuá, ke fanongo ki hono leʻó, pea ke pīkitai kiate iá, te ke fili moʻoni ai ʻa e moʻuí​—ʻa e moʻui taʻengata ʻi ha māmani palataisi. Ka ko e hā ʻoku kau ʻi he ngaahi sitepu taki taha ko iá?

Ko e ʻofá ko e ʻulungaanga tefito ia ʻo e ʻOtuá. “Ko e ʻOtuá ko e ʻofa,” ko e tohi ia ʻa e ʻapositolo ko Sioné ʻi hono fakamānavaʻí. (1 Sione 4:8) ʻI he ʻuhingá ni, ʻi hono ʻeke pe ko e hā ʻa e fekau lahi taha ʻi he kotoa ʻo e ʻū fekaú, naʻe pehē ʻe Sīsū: “Kuo pau ke ke ʻofa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa.” (Mātiu 22:37) Ko ha vahaʻangatae moʻoni mo Sihova ko e ʻOtuá kuo pau ke makatuʻunga ia, ʻikai ʻi he manavahē pe talangofua noaʻia pē, ka ʻi he ʻofá. Ko ia, ko e hā ʻoku totonu ai ke tau fili ke tau ʻofa kiate iá?

Ko e ʻofa ʻa Sihova ki he faʻahinga ʻo e tangatá ʻoku hangē ia ko e ʻofa ʻa ha ongo mātuʻa ʻofa ki heʻena fānaú. Neongo ʻa e taʻehaohaoá, ko e ngaahi mātuʻa ʻofá ʻoku nau fakahinohinoʻi, fakalototoʻaʻi, tokoniʻi, mo akonekina ʻenau fānaú koeʻuhi ʻoku nau loto ke nau hoko ʻo fiefia mo lavameʻa. Ko e hā leva ʻoku fiemaʻu ʻe he ngaahi mātuʻá mei aí? ʻOku nau fiemaʻu ʻenau fānaú ke nau ʻofa ʻiate kinautolu mo tukulotoʻi ʻa e meʻa kuo nau ʻoatu kiate kinautolu ki ha lelei pē maʻanautolu. ʻIkai ʻoku ʻuhinga lelei ʻa hono ʻamanekina mai ʻe heʻetau Tamai fakahēvani haohaoá ke tau fakahāhā ʻa e houngaʻia loto-ʻofa ʻi he kotoa ʻo e meʻa kuó ne fai maʻatautolú?

ʻI he muʻaki lea naʻe hiki ai ʻa e Tohi Tapú, ko e foʻi lea “fanongo” ʻoku faʻa kau ki ai ʻa e ongoʻi ʻo e “talangofua.” ʻIkai ko e meʻa ia ʻoku tau ʻuhinga ki ai ʻi heʻetau pehē ki ha kiʻi tama, “Fanongo ki hoʻo ongo mātuʻá”? Ko ia, ke fanongo ki he leʻo ʻo e ʻOtuá ʻoku ʻuhinga ia ke ako pea talangofua ki he meʻa ʻokú ne folofolaʻakí. Koeʻuhi ʻoku ʻikai lava ke tau fanongo moʻoni ki he leʻo ʻo e ʻOtuá, ʻoku tau fanongo kiate ia ʻaki ʻetau lau pea ngāueʻaki ʻa e meʻa ʻoku ʻi heʻene Folofolá, ko e Tohi Tapú.​—1 Sione 5:3.

Ke fakahaaʻi ʻa e mahuʻinga ʻo e fanogo ki he leʻo ʻo e ʻOtuá, naʻe pehē ʻe Sīsū ʻi he taimi ʻe taha: “Kuo pau ke moʻui ʻa e tangatá, ʻo ʻikai ʻi he maá pē, ka ʻi he folofola kotoa pē ʻoku haʻu mei he fofonga ʻo Sihová.” (Mātiu 4:4) Hangē pē ko e mahuʻinga ʻo e meʻakaí kiate kitautolú, ko hono maʻu ʻa e ʻilo ki he ʻOtuá, ko hono moʻoní, ʻoku toe pehē mo ia. Ko e hā hono ʻuhingá? Naʻe fakamatalaʻi ʻe he tuʻi poto ko Solomoné: “Ko e potó ko ha maluʻanga ʻo hangē pē ko e paʻangá ko ha maluʻanga, ka ko e ʻaonga eni ʻo e ʻiló: Ko e potó ʻokú ne fakahaofi ʻa e moʻui ʻa e tokotaha ʻokú ne maʻu iá.” (Tangata Malanga 7:12) Ko e ʻilo mo e poto mei he ʻOtuá ʻoku lava ke na maluʻi kitautolu he ʻahó ni pea tokoniʻi kitautolu ke tau fai ʻa e fili fakapotopoto ʻe iku atu ki he moʻui taʻengata ʻi he kahaʻú.

Manatuʻi ʻa e lea fakatātā ʻa Sīsū naʻa tau lave ki ai ʻi he kupu ki muʻá, ʻa ia naʻá ne pehē ai: “ʻOku fāsiʻi ʻa e matapā pea ʻefiʻefi ʻa e hala ʻoku taki atu ki he moʻuí, pea ko e tokosiʻi pē ʻoku nau ʻiloʻi iá.” (Mātiu 7:13, 14) Ko e fononga ʻi ha hala pehē, te tau maʻu ʻaonga moʻoni ʻi hono maʻu mo nofo ofi ki ha tataki mataotao ʻo kapau ʻoku tau loto ke tau aʻu ki he feituʻu ʻoku tau ʻalu ki aí​—ko e moʻui taʻengatá. Ko ia, ʻoku ʻi ai ʻa e ʻuhinga lelei ke tau nofo ofi ai ki he ʻOtuá. (Saame 16:8) ʻE anga-fēfē ʻetau fai iá?

ʻI he ʻaho kotoa pē, ʻoku lahi ʻa e meʻa kuo pau ke tau faí pea ʻoku toe lahi ange mo e meʻa ʻoku tau loto ke faí. ʻOku lava ʻe he ngaahi meʻa peheé ke ne fakafemoʻuekinaʻi pe fakahohaʻasi kitautolu ʻo siʻi ai pe ʻikai ha taimi ke fakaukau ki he meʻa ʻoku fiemaʻu ʻe he ʻOtuá ke tau faí. Ko e ʻuhinga ia ʻoku fakamanatu mai ai ʻe he Tohi Tapú: “Mou mātuʻaki tokanga maʻu pē ki he anga hoʻomou laká ke ʻoua ʻe hoko ko e faʻahinga taʻefakapotopoto kae hoko ko e faʻahinga ʻoku fakapotopoto, ʻo ngāue lelei taha ʻaki ho taimí, koeʻuhí ʻoku fulikivanu ʻa e ngaahi ʻahó.” (ʻEfesō 5:15, 16) ʻOku tau nofo ofi ki he ʻOtuá ʻi heʻetau ʻai hotau vahaʻangatae mo iá ko e meʻa mahuʻinga taha ia ʻi heʻetau moʻuí.​—Mātiu 6:33.

Neongo heʻikai lava ke ke liliu ho kuohilí, ʻe lava ke ke fili ke ʻai ha kahaʻu lelei maʻau mo e faʻahinga ʻokú ke ʻofa aí. ʻOku fakahaaʻi mai ʻe he Tohi Tapú ko ʻetau Tamai fakahēvaní, ʻa Sihova ko e ʻOtuá, ʻokú ne ʻofa lahi ʻiate kitautolu pea ʻokú ne ʻai ke tau ʻiloʻi ʻa e meʻa ʻokú ne fiemaʻu ke tau faí. Fakatokangaʻi ʻa e lea ʻa e palōfita ko Maiká:

“Kuó ne fakahā kiate koe, ʻe tangata, ʻa e meʻa ʻoku leleí. Pea ko e hā ʻa e meʻa ʻoku fiemaʻu ʻe Sihova meiate koé? ʻOku ʻikai mo ha toe meʻa ka ko hono fakahoko ʻa e fakamaau totonú, mo koloaʻaki ʻa e mateakí, pea ke ʻaʻeva anga-fakanānā mo ho ʻOtuá!”​—Maika 6:8.

Te ke tali ʻa e fakaafe ʻa Sihova ke ʻaʻeva mo ia pea maʻu ʻa e ngaahi tāpuaki taʻengata kuó ne tuku tauhi mai maʻá e faʻahinga te nau fai iá? ʻOku ʻaʻau ʻa e filí!