Ko Sihova Hotau Tokoní

“Ko hoku tokoni ʻoku meia Sihova, ʻa ia ne ne ngaohi ʻa e langi mo mamani.”​—SĀME 121:2.

1, 2. (a) Ko e hā ʻoku malava ai ke pehē ʻoku tau fiemaʻu kotoa ʻa e tokoni ʻi he taimi lahi? (e) Ko e faʻahinga Tokotaha-Tokoni fēfē ʻa Sihova?

KO HAI ʻiate kitautolu ʻoku ʻikai ʻaupito te ne fiemaʻu ʻe ia ha tokoni? Ko hono moʻoní, ʻoku tau fiemaʻu kotoa ʻa e tokoni ʻi he taimi lahi—ke fekuki ai mo ha palopalema mamafa, ke kātakiʻi ha mole fakamamahi, ke ʻūkuma ʻi he malumalu ʻo ha ʻahiʻahi faingataʻa. ʻI he taimi ʻoku fiemaʻu ai ʻa e tokoní, ʻoku faʻa hanga ʻa e kakaí ki ha kaumeʻa tokanga. Ko hono fakahā ha mafasiaʻanga ki ha kaumeʻa peheé ʻoku ʻai nai ai ke faingofua ange ʻa hono fuá. Ka ʻoku ʻi ai ha ngataʻanga ki he meʻa ʻoku malava ke fai ʻe ha kaungā faʻahinga ʻo e tangatá ke tokoni aí. Tuku kehe ia, ʻe ʻikai nai ke malava maʻu pē ʻo ʻi ha tuʻunga ai ʻa e niʻihi kehé ke tokoni atu ʻi he taimi ʻokú ke fiemaʻu ai ʻa e tokoní.

² Kae kehe, ʻoku ʻi ai ha Tokoni ia ʻokú ne maʻu ʻa e mālohi mo e ngaahi tokonaki taʻefakangatangata. ʻIkai ngata aí, ʻokú ne fakapapauʻi mai kiate kitautolu heʻikai ʻaupito te ne liʻaki kitautolu. Ko ia ʻa e Tokotaha naʻe fakahaaʻi ʻe he tokotaha-tohi-sāmé ʻaki ʻa e falala kakato ʻo ne talaki: “Ko hoku tokoni ʻoku meia Sihova, ʻa ia ne ne ngaohi ʻa e langi mo mamani.” (Sāme 121:2) Ko e hā naʻe tuipau ai ʻa e tokotaha-tohi-sāmé ni ʻe tokoniʻi ia ʻe Sihová? Ke tali ʻa e fehuʻi ko iá, tau sivisiviʻi angé ʻa e Sāme 121. ʻI hono fai iá ʻe fakamafeia ai kitautolu ke tau sio ki he ʻuhinga te tau malava foki ai mo kitautolu ke hanga loto-falala kia Sihova ko hotau Tokoní.

Ko ha Matavai Taʻematukutuku ʻo e Tokoní

 3. Ko e ʻotu moʻunga fē naʻe tangaki hake nai ki ai ʻe he tokotaha-tohi-sāmé hono matá, pea ko e hā hono ʻuhingá?

³ Naʻe kamataʻaki ʻe he tokotaha-tohi-sāmé ʻene fakahaaʻi koeʻuhi ko e tuʻunga fakaefakatupu ʻa Sihová ʻoku tau maʻu ai ha makatuʻunga ki he falalá: “Te u tangaki hoku mata ki he ngaahi moʻunga: ʻe haʻu mei fe hoku tokoni? Ko hoku tokoni ʻoku meia Sihova, ʻa ia ne ne ngaohi ʻa e langi mo mamani.” (Sāme 121:​1, 2) Naʻe ʻikai ke tangaki hake ʻe he tokotaha-tohi-sāmé ia hono matá ki ha faʻahinga moʻunga pē. ʻI he taimi naʻe hiki ai ʻa e ngaahi leá ni, naʻe tuʻu ʻa e temipale ʻo Sihová ʻi Selusalema. Ko e kolo ko iá, naʻe tuʻu ʻi he ʻotu moʻunga māʻolunga ʻo Siutá, ʻa e nofoʻanga fakaefakatātā ʻo Sihová. (Sāme 135:21) Naʻe tangaki hake nai ʻe he tokotaha-tohi-sāmé hono matá ki he ʻotu moʻunga ʻo Selusalemá ʻa ia naʻe langa ai ʻa e temipale ʻo Sihová, ʻo hanga loto-falala kia Sihova ki ha tokoni. Ko e hā naʻe mātuʻaki fakapapauʻi ai ʻe he tokotaha-tohi-sāmé ʻe malava ʻa Sihova ke tokoniʻi iá? Koeʻuhi ko Ia “ne ne ngaohi ʻa e langi mo mamani.” Ko hono moʻoní, naʻe pehē ʻe he tokotaha-tohi-sāmé, ‘ʻOku halaʻatā moʻoni ha meʻa ʻe lava ke ne taʻofi ʻa e Tokotaha-Fakatupu mālohi fakaʻaufulí mei hono tokoniʻi aú!’—Aisea 40:26.

 4. Naʻe anga-fēfē hono fakahaaʻi ʻe he tokotaha-tohi-sāmé ko Sihová ʻokú ne tokanga maʻu pē ki he ngaahi fiemaʻu ʻa hono kakaí, pea ko e hā ko ha foʻi fakakaukau fakafiemālie ai iá?

⁴ Naʻe hoko atu ʻa e fakamatala ʻa e tokotaha-tohi-sāmé ʻo pehē ko Sihová ʻokú ne tokanga maʻu pē ki he ngaahi fiemaʻu ʻa ʻene kau sevānití: “Seuke, ʻe ʻikai te ne tuku ho vaʻe ke ngaūe: ko ia ʻoku tauhi koe, ʻe ʻikai te ne mohe. Vakai ko e Tauhi ʻo Isileli ʻoku ʻikai ke tule, pe tokoto ke mohe.” (Sāme 121:​3, 4) ʻOku ʻikai malava ki he ʻOtuá ke ne fakaʻatā ʻa e faʻahinga ʻoku falala kiate iá “ke ngaūe” pe ke hokosia ha tō ʻa ia ʻe ʻikai malava ke nau toe ake mei ai. (Palovepi 24:16) Ko e hā hono ʻuhingá? Koeʻuhi ko Sihová ʻoku hangē ia ha tauhi-sipi mātuʻaki ʻāʻā ʻi hono leʻohi ʻene fanga sipí. ʻIkai ko ha foʻi fakakaukau fakafiemālie ia? ʻE ʻikai ke kiʻi kui hifo hono fofongá ʻi ha mōmeniti ki he ngaahi fiemaʻu ʻa hono kakaí. ʻOkú ne leʻohi kinautolu ʻi he ʻaho mo e pō.

 5. Ko e hā ʻoku pehē ai ko Sihová ʻoku ʻi he “toʻomataʻu”?

⁵ ʻI he falala ko Sihova ʻa e Tokotaha-Maluʻi mateaki ʻo hono kakaí, naʻe tohi ʻe he tokotaha-tohi-sāmé: “Ko Sihova pe ho tauhi oʻou: ko Sihova e mei ho toʻomataʻu ko ho fakamalumalu. ʻE ʻikai taaʻi koe ʻe he laʻa, ʻaho, pe ko e mahina ʻi he po.” (Sāme 121:​5, 6) Ki ha taha fononga lalo ʻi he Hahake Lotolotó, ko ha feituʻu malumalu te ne ʻomai ha maluʻanga ʻoku fiemaʻu mei he vevela ʻa e laʻaá. Ko Sihová ʻoku hangē ia ha fakamalumalu ki heʻene kakaí, ʻo maluʻi kinautolu mei he faingataʻa hangē ha tuʻunga vela fakaʻuliá. Fakatokangaʻi ʻoku pehē ko Sihová ʻoku ʻi he “toʻomataʻu.” ʻI he faitau ʻi he kuonga muʻá, ko e nima mataʻu ʻo e sōtiá naʻe ʻikai maluʻi ia ʻi ha tuʻunga ʻaki ha pā, he naʻe toʻo ia ʻi he nima hemá. ʻOku fai nai ʻe ha kaumeʻa mateaki ha maluʻi ʻaki ʻene tuʻu mo faitau ʻi he toʻomataʻu ʻo e sōtiá. ʻI he hangē ko ha kaumeʻa peheé, ʻoku tuʻu mateaki ʻa Sihova ʻi he tafaʻaki ʻo ʻene kau lotú, ʻo mateuteu maʻu ai pē ke tokoniʻi kinautolu.

6, 7. (a) ʻOku anga-fēfē hono fakapapauʻi mai ʻe he tokotaha-tohi-sāmé kiate kitautolu ʻe ʻikai ʻaupito ke tuku hono tokoniʻi ʻe Sihova ʻa ʻene kakaí? (e) Ko e hā ʻe lava ai ke tau maʻu ʻa e loto-falala ʻa e tokotaha-tohi-sāmé?

⁶ ʻE faifai ange pea tuku hono tokoniʻi ʻe Sihova ʻa ʻene kakaí? ʻOku ʻikai ala fakaʻuta atu ki he foʻi fakakaukau ko iá. Naʻe fakaʻosiʻaki ʻe he tokotaha-tohi-sāmé: “E fakahaofi koe e Jihova mei he kovi kotoabe: te ne fakamoui ho laumalie. E tauhi e Jihova hoo alu kitua mo hoo liu mai mei he aho ni, bea taegata.” (Sāme 121:​7, 8, PM) Fakatokangaʻi ʻoku hiki ʻe he tokotaha-tohí ʻa e fakamamafá mei he lolotongá ki he kahaʻú. Ki muʻá, ʻi he Sāme 121:5 veesi 5, naʻe pehē ai ʻe he tokotaha-tohi-sāmé: “Ko Sihova ho tauhi oʻou.” Ka ʻi he ongo vēsí ni, naʻe tohi ai ʻe he tokotaha-tohi-sāmé: “ʻE tauhi koe ʻe Sihova.” (Fakaʻītali ʻamautolu.) ʻOku fakapapauʻi ai ki he kau lotu moʻoní ko e tokoni ʻa Sihová ʻe aʻu atu ki he kahaʻú. Ko fē pē ha feituʻu ʻoku nau ʻalu ki ai, ko e hā pē ha faingataʻa ʻoku nau fehangahangai, ʻe ʻikai ʻaupito ke taʻeaʻu kiate kinautolu ʻa hono toʻukupu tokoní.—Palovepi 12:21.

⁷ Ko e moʻoni, naʻe falala ʻa e tokotaha-tohi ʻo e Sāme 121 ʻoku leʻohi ʻe he Tokotaha-Fakatupu māfimafi-aoniú ʻa ʻene kau sevānití ʻaki ʻa e anga-fakaalaala ʻa ha tauhi-sipi tokanga pea mo e leʻo ʻa ha kaʻate tokanga. ʻOku tau maʻu ʻa e ʻuhinga kotoa ke maʻu ʻa e falala ʻa e tokotaha-tohi-sāmé, he ʻoku ʻikai ke liliu ʻa Sihova. (Malakai 3:6) ʻOku ʻuhinga ʻení te tau maʻu maʻu pē ʻa e maluʻi fakaesino? ʻIkai, ka ʻi heʻetau hanga kiate ia ko hotau Tokoní, te ne maluʻi kitautolu mei he ngaahi meʻa kotoa ʻoku malava ke ne ʻomai kiate kitautolu ʻa e maumau fakalaumālié. ʻOku fakaenatula pē ke tau ʻeke, ‘ʻOku anga-fēfē hono tokoniʻi kitautolu ʻe Sihová?’ Tau sivisiviʻi angé ʻa e ngaahi founga ʻe fā ʻokú ne fai ai iá. ʻI he kupu ko ʻení, te tau lāulea ai ki he founga naʻá ne tokoniʻi ai ʻene kau sevānití ʻi he ngaahi taimi ʻo e Tohi Tapú. ʻI he kupu hoko maí, te tau lāulea ai ki he founga ʻokú ne tokoniʻi ai ʻene kakaí he ʻaho ní.

Tokoni mei he Kau ʻĀngelo

 8. Ko e hā ʻoku ʻikai fakaʻohovale ai ʻa hono maʻu ʻe he kau ʻāngeló ha mahuʻingaʻia vēkeveke ʻi he lelei maʻá e kau sevāniti fakaemāmani ʻa e ʻOtuá?

⁸ ʻOku ʻi he malumalu ʻo e pule ʻa Sihová ʻa e kau ʻāngelo ʻe laui miliona. (Taniela 7:​9, 10) ʻOku fakahoko faitōnunga ʻe he ngaahi foha laumālie ko ʻení ʻa hono finangaló. (Sāme 103:20) ʻOku nau ʻiloʻi lelei ʻoku ʻofa lahi ʻa Sihova ʻi heʻene kau lotu fakaetangatá pea ʻokú ne fiemaʻu ke tokoniʻi kinautolu. ʻOku ʻikai fakaʻohovale, ʻa hono maʻu ʻe he kau ʻāngeló ha mahuʻingaʻia vēkeveke ʻi he lelei maʻá e kau sevāniti fakaemāmani ʻa e ʻOtuá. (Luke 15:10) Ko ia ai, kuo pau pē ʻoku fiefia ʻa e kau ʻāngeló ʻi hono ngāueʻaki kinautolu ʻe Sihova ke tokoniʻi ʻa e faʻahinga ʻo e tangatá. ʻI he ngaahi founga fē naʻe ngāueʻaki ai ʻe Sihova ʻa e kau ʻāngeló ke tokoniʻi ʻene kau sevāniti fakaetangatá ʻi he kuonga muʻá?

 9. ʻOmai ha fakatātā ʻo e anga hono fakaivia ʻe he ʻOtuá ʻa e kau ʻāngelo ke maluʻi ʻa e faʻahinga faitōnunga ʻo e tangatá.

⁹ Naʻe fakaivia ʻe he ʻOtuá ʻa e kau ʻāngeló ke maluʻi mo fakahaofi ʻa e faʻahinga faitōnunga ʻo e tangatá. Naʻe tokoniʻi ʻe ha ongo ʻāngelo ʻe toko ua ʻa Lote mo hono ongo ʻofefiné ke nau hao mei he fakaʻauha ʻo Sōtoma mo Komolá. (Senesi 19:​1, 15-17) Naʻe tāmateʻi ʻe ha ʻāngelo pē ʻe toko taha ʻa e kau sōtia ʻAsīlia ʻe toko 185,000 ʻa ia naʻa nau fakamanamanaʻi ʻa Selusalemá. (2 Tuʻi 19:35) ʻI he taimi naʻe lī ai ʻa Taniela ki he ʻana ʻo e fanga laioné, naʻe hanga ʻe Sihova ʻo ‘fekau hifo ʻene angeló peá ne tapuni ʻa e ngutu ʻo e fanga laioné.’ (Taniela 6:​21-23) Naʻe tukuange ʻe ha ʻāngelo ʻa e ʻapositolo ko Pitá mei he pilīsoné. (Ngāue 12:​6-11) ʻOku lave ʻa e Tohi Tapú ki he toe ngaahi fakatātā lahi ʻo e maluʻi fakaeʻāngeló, ʻo fakapapauʻi mai ai ʻa e meʻa ʻoku leaʻaki ʻe he Sāme 34:7: “ʻOku ʻapitanga ʻa e angelo ʻa Sihova takatakai ki heʻene kau ʻapasia, ke fai honau fakahaofia.”

10. Naʻe anga-fēfē hono ngāueʻaki ʻe Sihova ha ʻāngelo ke fakalototoʻaʻi ʻa e palōfita ko Tanielá?

¹⁰ ʻI he taimi ʻe taha, naʻe ngāueʻaki ai ʻe Sihova ʻa e kau ʻāngeló ke fakalototoʻaʻi mo fakaivimālohiʻi ʻa e faʻahinga faitōnunga ʻo e tangatá. ʻOku maʻu ha fakatātā fakatoʻoaloto ʻi he Taniela vahe 10. ʻI he taimi ko iá, naʻe ofi nai ai ʻa Taniela ki hono taʻu 100. Naʻe loto-siʻi ʻaupito ʻa e palōfitá, ngalingali koeʻuhi ko e tuʻunga lala ʻo Selusalemá pea mo e tautoloi hono toe langa ʻo e temipalé. Naʻá ne toe hoko ʻo hohaʻatuʻu ʻi he hili ʻene mamata ki ha vīsone fakailifia. (Taniela 10:​2, 3, 8) Naʻe fekauʻi vave anga-ʻofa mai ʻe he ʻOtuá ha ʻāngelo ke fakalototoʻaʻi ia. Naʻe laka hake ʻi he tuʻo tahá hono fakamanatu ʻe he ʻāngeló kia Taniela naʻá ne “ʻofeina lahi” ʻi he vakai mai ʻa e ʻOtuá. Ko e hā hono olá? Naʻe tala ange ʻe he palōfita taʻumotuʻá ki he ʻāngeló: “Kuo ke ʻomi ha ivi kiate au.”—Taniela 10:​11, 19.

11. Ko e hā ʻa e fakatātā ʻe taha ʻo e anga hono ngāueʻaki ʻo e kau ʻāngeló ke tataki ʻa e ngāue ko hono malangaʻi ʻa e ongoongo leleí?

¹¹ Naʻe toe ngāueʻaki ʻe Sihova ʻa e kau ʻāngelo ke tataki ʻa e ngāue ko hono malangaʻi ʻa e ongoongo leleí. Naʻe tataki ʻe ha ʻāngelo ʻa Filipe ke malanga fekauʻaki mo Kalaisi ki ha ʻiunoke ʻItiopea, ʻa ia naʻe hoko leva ai ʻo ne papitaiso. (Ngāue 8:​26, 27, 36, 38) ʻI ha taimi siʻi ki mui ai, naʻe finangalo ai ʻa e ʻOtuá ke malangaʻi ʻa e ongoongo leleí ki he kau Senitaile taʻekamú. ʻI ha vīsone, naʻe hā ai ha ʻāngelo kia Koliniusi, ko ha Senitaile manavahē-ʻOtua, pea fakahinohino kiate ia ke ne fai ha fekau ke haʻu ʻa e ʻapositolo ko Pitá. ʻI hono maʻu ʻa Pita ʻe he kau talafekau meia Koliniusí, naʻa nau pehē: “Ko Koliniusi . . . naʻe faleʻi ia ʻe ha ʻangelo tapu ke ʻomi koe ki hono fale, ke ne maʻu fakamatala meiate koe.” Naʻe tali ia ʻe Pita, pea nau hoko ai ko e fuofua kau Senitaile taʻekamu naʻe hoko ko ha konga ʻo e fakatahaʻanga Kalisitiané. (Ngāue 10:​22, 44-48) Sioloto atu ki he anga hoʻo ongoʻí ʻi hoʻo ʻiloʻi naʻe tokoniʻi koe ʻe ha ʻāngelo ke ke fetuʻutaki mo ha tokotaha hehema totonu!

Tokoni Fakafou ʻi he Laumālie Māʻoniʻoní

12, 13. (a) Ko e hā naʻe maʻu ai ʻe he kau ʻapositolo ʻa Sīsuú ʻa e ʻuhinga lelei ke tui ʻe malava ʻe he laumālie māʻoniʻoní ke tokoniʻi kinautolú? (e) ʻI he founga fē naʻe fakaivia ai ʻe he laumālie māʻoniʻoní ʻa e kau Kalisitiane ʻo e ʻuluaki senitulí?

¹² Ki muʻa siʻi peá ne pekiá, naʻe fakapapauʻi ʻe Sīsū ki heʻene kau ʻapositoló ʻe ʻikai liʻaki kinautolu taʻeʻiai ha tokoni. ʻE hanga ʻe he Tamaí ʻo ʻoange kiate kinautolu ha “Taukapo [pe tokoni], ko e Laumālie Māʻoniʻoni.” (Sione 14:26) Naʻe maʻu ʻe he kau ʻapositoló ʻa e ʻuhinga lelei ke nau tui ʻe malava ʻe he laumālie māʻoniʻoní ʻo tokoniʻi kinautolu. He ko ē, ko e Tohi Tapu fakamānavaʻí ʻoku fonu ʻi he ngaahi fakatātā ʻo e anga ʻo hono ngāueʻaki ʻe Sihova ʻa e laumālie māʻoniʻoní, ʻa e ivi mālohi taha ʻoku ala maʻú, ke tokoniʻi hono kakaí.

¹³ ʻI he ngaahi taimi lahi, naʻe ngāueʻaki ai ʻa e laumālie māʻoniʻoní ke fakaivia ʻa e faʻahinga ʻo e tangatá ke nau fai ʻa e finangalo ʻo Sihová. Naʻe fakaivia ʻe he laumālie māʻoniʻoní ʻa e kau Fakamāú ke fakahaofi ʻa ʻIsileli. (Fakamaau 3:​9, 10; 6:34) Ko e laumālie tatau pē naʻá ne fakaivia ʻa e kau Kalisitiane ʻo e ʻuluaki senitulí ke hokohoko atu loto-toʻa ʻa e malangá neongo ʻa e ngaahi founga kotoa ʻo e fakafepakí. (Ngāue 1:8; 4:31) Ko ʻenau lavameʻa ʻi hono fakahoko ʻenau ngāue fakafaifekaú naʻe ʻomai ai ʻa e fakamoʻoni mālohi ʻo e ngāue ʻa e laumālie māʻoniʻoní. Ko e hā mo ha toe meʻa ʻe lava ke ne fakamatalaʻi ʻa e malava ʻe he faʻahinga tāutaha “taʻe kolisi . . . pea taʻe maʻu tuʻunga” ke fakamafola ʻa e pōpoaki ʻo e Puleʻangá ʻi he kotoa ʻo e māmaní naʻe ʻiloa he taimi ko iá?—Ngāue 4:13; Kolose 1:23.

14. Kuo anga-fēfē hono ngāueʻaki ʻe Sihova ʻa hono laumālie māʻoniʻoní ke fakamaama ʻene kakaí?

¹⁴ Naʻe toe ngāueʻaki ʻe Sihova ʻa hono laumālie māʻoniʻoní ke fakamaama ʻene kakaí. ʻAki ʻa e tokoni ʻa e laumālie ʻo e ʻOtuá, naʻe malava ai ʻa Siosifa ke fakaʻuhingaʻi ʻa e ongo misi fakaekikite ʻa Feló. (Senesi 41:​16, 38, 39) Fakafou ʻi hono laumālié, naʻe ʻai ai ʻe Sihova ke fakahaaʻi ʻene ngaahi taumuʻá ki he faʻahinga anga-fakatōkilaló kae fufū mei he faʻahinga loto-mahikihikí. (Mātiu 11:25) Ko ia ai, ʻi he fekauʻaki mo e ngaahi meʻa ʻoku tokonaki mai ʻe Sihova “maʻa e kakai ʻoku ʻofa kiate ia,” naʻe pehē ʻe he ʻapositolo ko Paulá: “Ko e ngaahi meʻa ko ia kuo fakaʻilo ʻe he ʻOtua kiate kimautolu ʻi hono Laumalie.” (1 Kolinito 2:​7-10) Ko e tokoni pē ʻa e laumālie māʻoniʻoní ʻe toki malava ai ʻe ha taha ke ne mahinoʻi moʻoni ʻa e finangalo ʻo e ʻOtuá.

Tokoni mei he Folofola ʻa e ʻOtuá

15, 16. Ko e hā naʻe tala kia Siosiua ke ne fai ka ne ngāue fakapotopoto aí?

¹⁵ Ko e Folofola fakamānavaʻi ʻa Sihová ʻoku “ʻaonga foki ki he akonaki,” pea ʻokú ne fakamafeia ʻa e kau sevāniti ʻa e ʻOtuá ke nau “ʻosi sāuni ki he ngāue lelei fulipe.” (2 Timote 3:​16, 17) ʻOku ʻi he Tohi Tapú ʻa e ngaahi fakatātā lahi ʻo e anga hono tokoniʻi ʻo e kakai ʻa e ʻOtuá ʻi he kuonga muʻá ʻe ha ngaahi konga ʻo ʻene Folofolá ʻa ia naʻe ʻosi hikí.

¹⁶ Naʻe tokoni ʻa e Tohi Tapú ke tokonaki ʻa e tataki lelei ki he kau lotu ʻa e ʻOtuá. ʻI he taimi naʻe tuku ai kia Siosiua ʻa e fatongia ko hono taki ʻa ʻIsilelí, naʻe tala ange kiate ia: “ʻE ʻikai mahuʻi mei ho ngutu ʻa e tohi lao ko ia [ʻa ia naʻe ʻosi lēkooti ʻe Mōsesé], ka te ke fakalaulauloto ki ai ʻi he ʻaho mo e po, koeʻuhi ke ke tokanga ke fai ʻo hange ko e meʻa kotoa kuo tohi ai; he te ke toki monuʻia ʻi he meʻa ʻoku ke fou ai, pea te ke fai fakapotopoto ai.” Fakatokangaʻi naʻe ʻikai talaʻofa ʻe he ʻOtuá ia kia Siosiua hano fakahūhū fakaemana ki ai ʻo e potó. Ka, ʻo kapau ʻe lau mo fakalaulauloto ʻa Siosiua ki he “tohi lao,” te ne ngāue fakapotopoto leva ai.—Siosiua 1:8; Sāme 1:​1-3.

17. Naʻe anga-fēfē hono tokoniʻi fakatouʻosi ʻo Taniela mo Tuʻi Siosaia ʻe he ngaahi konga ʻo e Tohi Tapú naʻe ala maʻu kiate kinauá?

¹⁷ Naʻe toe tokoni ʻa e Folofola tohi ʻa e ʻOtuá ke fakahaaʻi hono finangaló mo ʻene taumuʻá. Ko e fakatātaá, naʻe ʻilo ʻe Taniela mei he ngaahi tohi ʻa Selemaiá ʻa e fuoloa ʻe ʻi he tuʻunga lala ai ʻa Selusalemá. (Selemaia 25:11; Taniela 9:2) Toe fakakaukau atu ki he meʻa naʻe hoko ʻi he lolotonga ʻa e pule ʻa Tuʻi Siosaia ʻo Siutá. ʻI he aʻu mai ki he taimi ko iá, naʻe hē ʻa e puleʻangá meia Sihova, pea ʻoku hā mahino naʻe ʻikai malava ʻe he ngaahi tuʻí ke ʻai ha tatau fakafoʻituitui ʻo e Laó pea muimui ki ai. (Teutalonome 17:​18-20) Ka ʻi he lolotonga hono fakaleleiʻi ʻa e temipalé, naʻe ʻilo ai “ʻa e Puka ʻo e Lao,” ʻa ia naʻe hiki nai ʻe Mōsesé. Ngalingali ko e muʻaki konga tohí ʻeni, ʻa ia naʻe ʻosi kakato ʻi he taʻu nai ʻe 800 ki muʻá. ʻI he hili ʻa e fanongo ki hono lau ʻa e ngaahi meʻa ʻi lotó, naʻe ʻiloʻi ai ʻe Siosaia ʻa hono mamaʻo ʻo e mavahe ʻa e puleʻangá mei he finangalo ʻo Sihová, pea naʻe fai ʻe he tuʻí ha tuʻutuʻuni fefeka ke fai ʻa e meʻa naʻe hiki ʻi he tohí. (2 Tuʻi 22:8; 23:​1-7) ʻIkai ʻoku hā mahino ko e kakai ʻa e ʻOtuá ʻi he kuonga muʻá naʻe tokoniʻi ʻe he ngaahi konga ʻo e Tohi Tapu Toputapú ʻa ia naʻe ala maʻu kiate kinautolú?

Tokoni Fakafou ʻi he Kaungātuí

18. Ko e hā ʻoku lava ai ke tau pehē ko Sihova ʻa e matavai ʻo e tokoní ʻi ha taimi pē ʻoku tokoni ai ha taha lotu moʻoni ki he tokotaha ʻe tahá?

¹⁸ Ko e tokoni ʻoku tokonaki mai ʻe Sihová ʻoku faʻa haʻu ia fakafou ʻi he kaungātuí. Ko hono moʻoní, ko e ʻOtuá ʻa e matavai ʻo e tokoní ʻi ha taimi pē ʻoku tokoni ai ha tokotaha lotu moʻoni ki he tokotaha ʻe tahá. Ko e hā ʻoku lava ai ke tau lea peheé? ʻI he ʻuhinga ʻe ua. ʻUluakí, ʻoku kau ki ai ʻa e laumālie māʻoniʻoni ʻo e ʻOtuá. ʻOku fakatupu ʻe he laumālie ko iá ʻa e fua, ʻo kau ai ʻa e ʻofá mo e leleí, ʻi he faʻahinga ko ia ʻoku nau kumi ki heʻene tākiekiná. (Kaletia 5:​22, 23, NW) Ko ia ai, ʻi he taimi ʻoku ueʻi ai ha taha ʻo e kau sevāniti ʻa e ʻOtuá ke tokoni ki he tokotaha ʻe tahá, ko e fakamoʻoni ia ʻoku ngāue ʻa e laumālie ʻo Sihová. Uá, naʻe ngaohi kitautolu ʻi he ʻīmisi ʻo e ʻOtuá. (Senesi 1:26) ʻOku ʻuhinga ʻení ʻoku tau maʻu ʻa e malava ke tapua atu hono ngaahi ʻulungāangá, ʻo kau ai ʻa ʻene anga-leleí mo e manavaʻofá. Ko ia, ʻi ha taimi pē ʻoku fakaaʻu atu ai ʻe ha sevāniti ʻa Sihova ha tokoni ki he tokotaha ʻe tahá, ko e Matavai moʻoni ʻo e tokoni peheé ʻa e tokotaha ko ia ʻa ia ko hono tataú ē ʻoku tapua atú.

19. Fakatatau ki he lēkooti ʻa e Tohi Tapú, naʻe anga-fēfē hono tokonaki ʻe Sihova ʻa e tokoní fakafou ʻi he kaungātuí?

¹⁹ ʻI he ngaahi taimi ʻo e Tohi Tapú, naʻe anga-fēfē hono tokonaki ʻe Sihova ʻa e tokoní fakafou ʻi he kaungātuí? Naʻe faʻa fakatupunga ʻe Sihova ʻa e taha ʻo ʻene kau sevānití ke fai ha akonaki ki he tokotaha ko ē, hangē ko e taimi naʻe fai ai ʻe Selemaia ʻa e akonaki fakahaofi-moʻui kia Palukí. (Selemaia 45:​1-5) ʻI he taimi ki he taimi, naʻe ueʻi ai ʻa e kau lotú ke tokonaki ha tokoni fakamatelie ki he kaungātuí, hangē ko e taimi naʻe fakahāhā ai ʻe he kau Kalisitiane ʻi Masitōnia mo ʻĀkeiá ʻa e loto-vēkeveke ke tokoniʻi honau fanga tokoua masiva ʻi Selusalemá. Naʻe pehē ʻe he ʻapositolo ko Paulá naʻe fakatupu moʻoni ʻe he nima-homo peheé “ʻa e meʻa fakatupu fakafetaʻi ki he ʻOtua.”—2 Kolinito 9:11.

20, 21. ʻI he malumalu ʻo e ngaahi tuʻunga ko e hā naʻe fakaivimālohiʻi ai ʻa e ʻapositolo ko Paulá ʻe he fanga tokoua mei Lomá?

²⁰ Ko e meʻa ʻoku tautefito ʻene fakatoʻoalotó ko e ngaahi fakamatala ki he anga ʻo e feinga ʻa e kau sevāniti ʻa Sihová ke fefakaivimālohiʻaki mo fefakalototoʻaʻaki ʻiate kinautolú. Fakakaukau angé ki ha fakatātā fekauʻaki mo e ʻapositolo ko Paulá. ʻI he lolotonga ʻene fononga ki Loma ko ha pōpulá, naʻe fononga ʻa Paula ʻi he hala lahi Loma naʻe ʻiloa ko e Hala ʻApianá. Ko e konga fakaʻosi ʻo e fonongá naʻe tautefito ʻa ʻene taʻefakafiemālié, he naʻe pau ke fou ai ʻa e kau fonongá ki ha feituʻu ano mo māʻulalo.a Naʻe ʻilo ʻe he fanga tokoua ʻi he fakatahaʻanga ʻi Lomá ʻe haʻu ʻa Paula. Ko e hā te nau faí? Te nau tatali pē ʻi he nonga ʻo honau ngaahi ʻapi ʻi he kolo lahí kae ʻoua kuo aʻu mai ʻa Paula pea toki omi ke fakafeʻiloaki kiate ia?

²¹ Ko e tokotaha-tohi Tohi Tapu ko Luké, ʻa ia naʻe ʻalu fakataha mo Paula ʻi he fonongá, ʻokú ne tala mai kiate kitautolu ʻa e meʻa naʻe hokó: “Kuo maʻu talanoa ʻe he kainga, ʻo e potu ko ia [Loma] kiate kimautolu, ʻo nau fononga mei ai ʻo aʻu ki Apiai Folo mo Faletolu ke fakafetaulaki kiate kimautolu.” ʻE lava ke ke sioloto atu ki he tuʻungá ni? ʻI hono ʻilo ʻe haʻu ʻa Paulá, naʻe fononga ha kulupu fakafofonga ʻo e fanga tokouá mei Loma ke fakafetaulaki kiate ia. Ko e konga ʻo e kulupú naʻa nau tatali ʻi he Māketi ʻo ʻApiaí, ko e mālōlōʻanga ʻiloa ʻi he kilomita ʻe 74 nai ʻi tuʻa mei Loma. Ko e toenga ʻo e fanga tokouá naʻa nau tatali ʻi Faletolu, ko ha mālōlōʻanga ʻoku kilomita ʻe 58 nai ʻi tuʻa mei he kolo lahí. Naʻe anga-fēfē ʻa e tali ʻa Paulá? ʻOku fakamatala ʻa Luke: “ʻI he feʻiloaki ʻa Paula mo kinautolu, naʻa ne fai ʻene fakafetaʻi ki he ʻOtua, mo ne maʻu ai ha toʻa.” (Ngāue 28:15) Sioloto atu angé—ʻi he vakai atu pē ki he fanga tokoua ko ia naʻa nau fakamālohituʻu kinautolu ke fononga mamaʻo maí naʻe hoko ia ko ha matavai ʻo e mālohi mo e fakafiemālie kia Paula! Pea ko hai naʻe fakamālō ki ai ʻa Paula ʻi he poupou ʻaonga ko ʻení? Naʻá ne fakamālō ki he tokotaha naʻe tupu mei aí, ko Sihova ko e ʻOtuá.

22. Ko e hā ʻetau konga tohi fakataʻu ki he 2005, pea ko e hā ʻe lāulea ki ai ʻi he kupu hoko maí?

²² ʻOku hā mahino, ʻoku fakahaaʻi ʻi he lēkooti fakamānavaʻí ʻa e ngaahi feangainga ʻa e ʻOtuá. Ko Iá ko ha Tokoni taʻehanotatau. ʻOku feʻungamālie ai, ʻa hono teu ʻai ʻe he Kau Fakamoʻoni ʻa Sihová ko ʻenau konga tohi fakataʻu ki he 2005 ʻa e ngaahi lea ʻo e Sāme 121:2: “Ko hoku tokoni ʻoku meia Sihova.” Ka ʻoku anga-fēfē hono tokoniʻi kitautolu ʻe Sihova ʻi he ʻaho ní? ʻE lāulea ki he meʻá ni ʻi he kupu hoko maí.

[Fakamatala ʻi lalo]

ʻOkú Ke Manatuʻi?

ʻI he ngaahi founga fē naʻe tokonaki mai ai ʻe Sihova ʻa e tokoní—

• fakafou ʻi he kau ʻāngeló?

• fakafou ʻi hono laumālie māʻoniʻoní?

• ʻi heʻene Folofola fakamānavaʻí?

• fakafou ʻi he kaungātuí?

[Fakamatala ʻi he peesi 15]

Ko e konga tohi fakataʻu ki he 2005: “Ko hoku tokoni ʻoku meia Sihova.”—Sāme 121:2.

[Fakatātā ʻi he peesi 16]

Naʻe fakamālō ʻa Paula ki he ʻOtuá ki he tokoni naʻá ne maʻu mei he fanga tokoua ʻi Lomá