ʻOfa ke ʻOatu ʻa e Fakahīkihikí kia Sihova ʻe he Laumālie Ngāue Pole ʻOkú Ke Maʻú!

1, 2. (a) Ko e hā naʻe leaʻaki ʻe ʻElifasi mo Pilitati ki he anga ʻo e vakai mai ʻa e ʻOtuá ki heʻetau ngāué? (e) Ko e hā naʻe folofolaʻaki ʻe Sihova fekauʻaki mo e kaveingá?

ʻI HE laui taʻu he kuohilí, naʻe ʻalu ai ʻa e kau tangata ʻe toko tolu ʻo lea ki ha sevāniti faitōnunga ʻa e ʻOtuá ko Siope. Ko e taha ʻi he kau tangata ko ení, ko ʻElifasi mei Tīmaní, naʻá ne ʻeke kia Siope ha ngaahi fehuʻi mahuʻinga: “Naʻa mo e tangata malohi te ne lava koā ke ʻaonga kia Ela? Seuke, ʻe ʻaonga ʻa e tangata ʻatamai kiate ia pe. ʻE maʻu ha meʻa ʻe Satai koeʻuhi ko hoʻo faitotonu? Pe fakalahi ʻene koloa ʻi hoʻo fakahaohaoa ho ngaahi ʻalunga?” (Siope 22:1-3) ʻOku hā mahino, naʻe tuipau ʻa ʻElifasi ko e tali ki aí ko e ʻikai. Naʻe toe pehē ʻe he taha ʻo e kau tangata ko ení, ʻa Pilitati mei Suaʻá ʻoku taʻemalava ke lau ʻe he ʻOtuá ʻoku māʻoniʻoni ha tangata.—Lau ʻa e Siope 25:4.

² Naʻe feinga ʻa ʻElifasi mo Pilitati ke ʻai ʻa Siope ke ne ongoʻi naʻe taʻeʻaonga ʻene ngaahi feinga ke tauhi kia Sihová. Naʻe loto ʻa e ongo tangata ko iá ke tui ʻa Siope ʻoku ʻikai ke tau mahuʻinga ange ki he ʻOtuá ʻi ha kiʻi mū, ʻuanga, pe ko ha kelemutu. (Siope 4:19; 25:6) Naʻá na lea peheé koeʻuhí naʻá na anga-fakatōkilalo? (Siope 22:29) Ko e moʻoni ʻoku māʻolunga ʻaupito ʻa Sihova pea ʻoku tau fuʻu siʻisiʻi ʻaupito ʻi hono fakahoa atu kiate iá. Kapau te tau ʻi ha tumuʻaki ʻo ha moʻunga pe sio hifo mei ha matapā sioʻata ʻo ha vakapuna, te tau mahinoʻi ai ʻetau fuʻu valevalé mo e ʻikai hatau mahuʻingá. Ka ko e anga ia ʻo e ongoʻi ʻa Sihova fekauʻaki mo ʻetau ngaahi feinga ke tauhi kiate iá pea ngāue mālohi maʻá e Puleʻangá? ʻIkai! Naʻe tala ange ʻe Sihova kia ʻElifasi, Pilitati mo e tangata hono tolú, ʻa Sofaʻā, naʻa nau loi. Naʻe folofola leva ʻa e ʻOtuá ʻo pehē naʻá ne fiefia ʻia Siope pea ui ia “ko ʻeku tamaioʻeiki.” (Siope 42:7, 8) Ko ia ʻe lava ke tau fakapapauʻi ko e faʻahinga taʻehaohaoa ʻo e tangatá ʻe lava ke nau “ʻaonga kia Ela.”

 3. Ko e hā naʻe leaʻaki ʻe ʻIlaiū fekauʻaki mo ʻetau ngaahi feinga ke tauhi kia Sihová? Ko e hā ʻene ʻuhingá?

³ Naʻe fanongo ʻa e kiʻi talavou ko ʻIlaiuú ki he fetalanoaʻaki ʻa Siope mo e kau tangata ʻe toko tolú. ʻI he ʻosi ʻenau talanoá, naʻe ʻeke ange ʻe ʻIlaiū kia Siope fekauʻaki mo Sihova: “Kapau kuo ke faitotonu, kuo ke ʻatu kiate Ia ha meʻa? Pe kuo ne maʻu ha meʻa mei ho nima?” (Siope 35:7) Naʻe toe feinga ʻa ʻIlaiū ke pehē ko ʻetau ngaahi feinga ke tauhi ki he ʻOtuá ʻoku taʻeʻaonga? ʻIkai. Naʻe ʻikai ke fakatonutonu ʻe Sihova ʻa ʻIlaiū, ʻo hangē ko e kau tangata kehé. Naʻe ʻomai ʻe ʻIlaiū ha fakakaukau kehe. Naʻá ne pehē ʻoku ʻikai ke fiemaʻu ʻe Sihova ke tau lotu ange kiate ia. Ko Sihová ʻoku haohaoa. ʻOku ʻikai ha meʻa ʻe lava ke tau fai ʻe ʻai ai ia ke ne koloaʻia ange pe mālohi ange. Ko e moʻoni, ko ha ʻulungaanga lelei pe ko ha malava ʻoku tau maʻu ko e haʻu ia mei he ʻOtuá, pea ʻokú ne fakatokangaʻi ʻa e founga ʻoku tau ngāueʻaki ai iá.

 4. ʻOku anga-fēfē ʻa e ongoʻi ʻa Sihová ʻi he taimi ʻoku tau anga-ʻofa ai ki he niʻihi kehé?

⁴ ʻI heʻetau fakahāhā ʻa e ʻofa mateaki ki he faʻahinga ʻoku nau lotu kia Sihová, ʻokú ne vakai ki he ngaahi ngāue ko iá ʻoku hangē ia naʻe fai ange kiate iá tonu. ʻOku tau lau ʻi he Palōveepi 19:17: “Ko e tali ʻa e no ʻa Sihova ʻa ʻete fai ʻofa ki he masiva: Pea te ne totongi kiate ia ʻa e meʻa ʻoku ne fai.” ʻOku fakatokangaʻi moʻoni ʻe Sihova ʻa e taimi taki taha ʻoku tau fakahāhā ai ʻa e mēsí ki he niʻihi kehé. Pea neongo ko ia ʻa e Tokotaha-Fakatupu ʻo e ʻunivēsí, ʻoku aʻu ʻo fili ʻe Sihova ke vakai mai ki he ngaahi ngāue ko ení ko ha nō fakafoʻituitui ia kiate ia, ʻa ia te ne totongi fakafoki mai ʻaki ʻa e ngaahi meʻaʻofa fakafiefia. Naʻe fakapapauʻi eni ʻe he ʻAlo ʻo e ʻOtuá, ʻa Sīsū.—Lau ʻa e Luke 14:13, 14.

 5. Ko e hā ʻa e ngaahi fehuʻi te tau lāulea ki ai ʻi he taimi ní?

⁵ ʻI he kuonga muʻá, naʻe fakaafeʻi ʻe Sihova ʻa e palōfita ko ʻAiseá ke ne fakafofongaʻi ia pea tauhi ange kiate ia ʻi ha founga makehe. (ʻAi. 6:8-10) Naʻe tali loto-lelei ʻe ʻAisea ʻa e fakaafé peá ne pehē: “Ko au eni; fekau au.” ʻI he ʻahó ni foki, ʻoku ʻoange ʻe Sihova ki he faʻahinga faitōnunga ʻo e tangatá ʻa e faingamālie ke nau kau ki heʻene ngāué. ʻOku fakahaaʻi ʻe he kau sevāniti ʻa Sihova ʻe laui afe ʻoku nau maʻu ʻa e fakakaukau tatau mo ʻAisea. ʻOku nau loto-lelei ke tali ha vāhenga-ngāue ke tauhi kia Sihova ʻi he ngaahi founga mo e ngaahi feituʻu kehekehe pea fekuki mo e ngaahi tuʻunga mo e ngaahi pole faingataʻa. Ka ʻe pehē nai ʻe ha taha fekauʻaki mo ia tonu: ‘ʻOku ou houngaʻia ʻi he faingamālie ke pole ʻi he ngāue ʻa Sihová, ka ʻoku mahuʻinga moʻoni ʻa e meʻa ʻoku ou fai fakafoʻituituí? Pe te u kau ki ai pe ʻikai, ʻikai ʻe fakapapauʻi ʻe Sihova ʻe fakahoko ʻene ngāué? Kuo faifai ange peá ke ongoʻi pehē?’ Tau lāulea angé ki he founga ʻe tokoniʻi ai kitautolu ʻe he ngaahi meʻa ʻe niʻihi ʻi he moʻui ʻa e sevāniti ʻe toko ua ʻa Sihova ʻi he kuohilí, ko Tēpola mo Pēlaki ke tali ʻa e ngaahi fehuʻi ko ení.

 6. Ko e hā naʻe hā ngali faingofua ai ke ikunaʻi ʻe he kau tau ʻa Siapiní ʻa e kau ʻIsilelí?

⁶ Ko Pēlakí ko ha pāteʻitau ʻIsileli, pea ko Tēpolá ko ha palōfita fefine. ʻI he taʻu ʻe 20, naʻe ‘fakamamahiʻi’ ʻa e kau ʻIsilelí ʻe he tuʻi Kēnani ko Siapini. Ko e kau tau ʻa Siapiní naʻa nau fuʻu anga-kakaha mo fakamamahi ʻo ilifia ai ʻa e kau ʻIsileli naʻa nau nofo ʻi he ngaahi koló ke nau mavahe mei honau ngaahi ʻapí. Naʻe maʻu ʻe he kau tau ʻa Siapiní ʻa e ngaahi saliote tau mataʻi-hele ukamea ʻe 900, ka naʻe ʻikai ke maʻu ʻe he kau ʻIsilelí ha meʻatau lelei ki he taú pe teunga tau ke maluʻiʻaki kinautolu.—Fkm. 4:1-3, 13; 5:6-8.a (Sio ki he fakamatala ʻi lalo.)

7, 8. (a) Ko e hā ʻa e ʻuluaki fakahinohino ʻa Sihova kia Pēlakí? (e) Naʻe anga-fēfē hono ikunaʻi ʻe ʻIsileli ʻa e kau tau ʻa Siapiní? (Sio ki he ʻuluaki fakatātā ʻi he kupú ni.)

⁷ ʻI hono fakahoa atu ki he kau tau ʻa Siapiní, naʻe hā ngali vaivai mo faingofua ke ikunaʻi ʻa e kau ʻIsilelí. Ka naʻe fekau ʻe Sihova kia Pēlaki fakafou ʻi he palōfita fefine ko Tēpolá: “ʻAlu ʻo fakatē tau ʻi he moʻunga ko Tepoa, pea ʻalu mo koe ha toko taha mano mei haʻa Nafitalai mo haʻa Sepulone? Pea te u fakatē mai kiate koe ki he luokivai ʻo Kisoni ʻa Sisela ko e ʻeikitau ʻa Siapini, mo ʻene ngaahi saliote mo ʻene hosite; pea te u tuku ia ki ho nima.”—Fkm. 4:4-7.

⁸ Naʻe ʻoatu ʻa e kole ki ha kau ngāue pole, pea naʻe fakatahataha ʻa e kau tangata ʻe toko 10,000 ʻi he Moʻunga Tēpoá. Naʻe ʻalu leva ʻa Pēlaki mo ʻene kau tangatá ke faitau mo e kau tau ʻa e filí ʻi ha feituʻu naʻe ui ko Tanaka. (Lau ʻa e Fakamaau 4:14-16.) Naʻe tokoniʻi ʻe Sihova ʻa e kau ʻIsilelí? ʻIo. Naʻe hoko fakafokifā ha ʻuha lōvai pea naʻe pelepela ʻa e malaʻe tau pakukaá. Naʻe faingamālie heni ʻa e kau ʻIsilelí. Naʻe tuli ʻe Pēlaki ʻa e kau tau ʻa Sīselá ʻi he maile ʻe 15 (kilomita ʻe 24), ʻo aʻu atu ki ha feituʻu naʻe ui ko Haloseti. ʻI he lele atu ʻa Sīselá, naʻe pikisia ʻene saliote taú ʻi he pelepelá. Naʻá ne hifo mei ai ʻo lele ki Sananimi, ofi nai ki Kētesi. Naʻe toitoi ai ʻa Sīsela ʻi he tēniti ʻo ha fefine ko Siaili. Naʻe ongosia ʻaupito ʻa Sīsela ʻo ne tō ʻo māʻumohe. Lolotonga ʻene mohé, naʻe loto-toʻa ʻa Siaili ʻo ne tāmateʻi ia. (Fkm. 4:17-21) Naʻe ʻai ʻe Sihova ke ikunaʻi ʻe he kau ʻIsilelí honau ngaahi filí!b (Sio ki he fakamatala ʻi lalo.)

 9. Ko e hā ʻoku tau ako mei he Fakamaau 5:20, 21 fekauʻaki mo hono tauʻi ʻa Sīselá?

⁹ Te tau ako ʻa e meʻa lahi ange fekauʻaki mo e ngaahi meʻa naʻe fakamatalaʻi ʻi he Fakamaau vahe 4 ʻaki hono lau ʻa e vahe hono hokó. ʻOku tala mai kiate kitautolu ʻi he Fakamaau 5:20, 21: “Naʻe fai tau mei langi na, ko e ngaahi fetuʻu mei hoʻonautolu founga naʻa nau fai tau mo Sisela. Nae auhia akinautolu ke mole i he vaitafe ko Kisone.” ʻOku ʻuhinga ení naʻe tokoniʻi ʻe he kau ʻāngeló ʻa e kau ʻIsilelí lolotonga ʻa e taú, pe ʻoku ʻuhinga iá naʻe ʻi ai ha ʻuha maka? ʻOku ʻikai fakamatala ʻa e Tohi Tapú ia ki ai. Ka ʻoku hā ngali ʻuhinga lelei ke fakakaukau atu naʻe fakahaofi ʻe Sihova hono kakaí ʻaki hono ʻai ke tō hifo ʻa e ʻuha lahi ʻi he feituʻu mo e taimi tofu pē ko iá, koeʻuhí ke ʻoua ʻe faingofua ʻa e ngaʻunu holo ʻa e saliote tau ʻe 900. ʻI he Fakamaau 4:14, 15, ʻoku tau lau ai naʻe ʻoange tuʻo tolu ʻa e lāngilangí kia Sihova koeʻuhí ko e ikuna ʻa ʻIsilelí. ʻOku ʻikai ha taha ʻo e kau ngāue pole ʻIsileli ʻe toko 10,000 ʻe lava ke ne maʻu ʻa e lāngilangi ʻo e ikuna ko iá.

10, 11. Ko hai ʻa Mēlosi? Ko e hā naʻe talatukiʻi ai iá?

¹⁰ Tau sivisiviʻi he taimí ni ʻa e meʻa ʻoku mahuʻinga ʻaupito. Hili ʻa e ikuna ʻa ʻIsilelí, naʻe hiva fakahīkihiki ʻa Tēpola mo Pēlaki kia Sihova. Naʻá na hiva: “Folofola mai ʻa e angelo ʻa e ʻEiki, ‘Mou tukitalaʻi ʻa Melosi, mou tukiʻaungafaʻi ʻa e kau nofo ai; ko e ʻikai te nau haʻu ki he tokoni ʻo Sihova, ki he tokoni ʻo Sihova kuo ō mo e kau toʻa.’”—Fkm. 5:23.

¹¹ Ko hai moʻoni ʻa Mēlosi? ʻOku ʻikai ke tau ʻilo pau. Ka ko hono talatukiʻi ʻo Mēlosí naʻe mātuʻaki ola lelei ia koeʻuhí kuo puli ʻa e mingimingiʻi meʻa kotoa pē fekauʻaki mo iá. ʻOku pau pē ko Mēlosí ko ha kolo ia ʻa ia ko hono kakaí naʻe ʻikai ke nau pole ke kau mo Pēlaki ʻi he taú. Koeʻuhí naʻe pole ʻa e toko 10,000 ke faitau mo e kau Kēnaní, kuo pau pē naʻe fanongo ʻa e kakai ʻo Mēlosí ki he ʻoatu ʻa e kole ki ha kau pole ki he taú. Pe mahalo ko Mēlosi ʻa e kolo naʻe lele ki ai ʻa Sīsela ʻi heʻene feinga ke hola meia Pēlakí. Mahalo pē naʻe maʻu ʻe he kakai Mēlosí ha faingamālie ke nau puke ʻa Sīsela ka naʻe ʻikai ke nau fai ia. Fakaʻuta atu ki heʻenau sio ki he hola atu ʻa e pāteʻitau anga-kakaha ko ení ʻi honau ngaahi halá! Naʻe mei lava ke nau fai ha ngāue lelei ke poupouʻi ʻa e taumuʻa ʻa Sihová. Kapau naʻa nau fai ia, te ne fakapaleʻi kinautolu. Ka ʻi heʻenau maʻu ʻa e faingamālie ke fai ha meʻa maʻa Sihová, naʻe ʻikai te nau fai ia. ʻOku hā ngali naʻe kehe ʻaupito ʻa e kakai ʻo Mēlosí meia Siaili, ʻa ia naʻá ne ngāue loto-toʻa.—Fkm. 5:24-27.

12. Ko e hā naʻe kehekehe ai ʻa e fakakaukau ʻa e kakai ʻoku hā ʻi he Fakamaau 5:9, 10? ʻOku totonu ke fēfē hono tākiekina kitautolu ʻe he meʻá ni?

¹² ʻI he Fakamaau 5:9, 10, ʻoku tau sio mei ai ko e fakakaukau ʻa e kau ngāue pole ʻe toko 10,000 naʻe kehe ʻaupito ia mei he fakakaukau ʻa e faʻahinga naʻe ʻikai te nau polé. Naʻe fakahīkihikiʻi ʻe Tēpola mo Pēlaki ʻa e “kau Isileli ʻoku angi, ʻakinautolu naʻe to mo mate maʻa e kakai.” Naʻa nau kehe ʻaupito mei he “haʻa heka asi hina,” ʻa ia naʻa nau ongoʻi naʻa nau fuʻu mahuʻinga ki he ngāue polé. ʻOku fakamatalaʻi ʻa e kakai ko e faʻahinga ʻoku nau “nofo he ngaahi fata” pe kāpeti lelei pea “haʻele he ngaahi hala,” ʻo fiefia ʻi ha moʻui fiemālie. ʻI hono kehé, naʻe loto-lelei ʻa e kau ngāue polé ke nau ō mo Pēlaki ʻo faitau ʻi he ngaahi tafungofunga makaʻia ʻo Tēpoá mo e teleʻa ano ʻo Kīsoní. Ko e faʻahinga naʻa nau fiemaʻu ha moʻui faingofuá naʻe tala ange kia kinautolu: “Lau ki ai” pe fakakaukau angé! Naʻe fiemaʻu ke nau tokanga pea fakakaukau ki he faingamālie naʻa nau tukunoaʻi ʻi he ʻikai ke nau pole ki he ngāue ʻa Sihová. ʻI he ʻahó ni, ʻoku fiemaʻu foki ke tau sivisiviʻi ʻetau fakakaukaú tonu fekauʻaki mo e ngāue ʻa e ʻOtuá.

13. Naʻe anga-fēfē ʻa e kehekehe ʻa e fakakaukau ʻa e matakali ʻo Lūpeni, Tani mo ʻĀselí mei he fakakaukau ʻa Sepulone mo Nafitalaí?

¹³ Naʻe maʻu ʻe he kau ngāue pole ʻe toko 10,000 ʻa e faingamālie ke nau siotonu ki he anga ʻo e ngāue ʻa Sihova ko e Pule Fakalevelevá. Naʻe malava ke nau talanoa ki he niʻihi kehé ʻo fekauʻaki mo ia ʻi heʻenau lea fekauʻaki mo e “ngaahi fai totonu ʻa e ʻEiki.” (Fkm. 5:11) ʻI hono kehé, naʻe tokanga ange ʻa e matakali ʻo Lūpeni, Tani mo ʻĀselí ki heʻenau ngaahi koloá, ʻo hangē ko ʻenau ngaahi tākangá, ngaahi vaká mo e ngaahi taulangá ʻi heʻenau fai ʻa e ngāue ʻa Sihová. (Fkm. 5:15-17) Neongo ia, naʻe ʻikai ke pehē ʻa e ngaahi matakali kotoa pē. Ko e matakali ʻo Sepulone mo Nafitalaí naʻa nau tuku atu “ki he mate ʻenau moʻui” ke poupouʻi ʻa Tēpola mo Pēlaki. (Fkm. 5:18) ʻE lava ke tau ako ha lēsoni mahuʻinga mei he kehekehe ko eni ʻa e ngaahi fakakaukau ʻo fekauʻaki mo e ngāue polé.

14. ʻOku anga-fēfē ʻetau fakahaaʻi ʻoku tau poupouʻi ʻi he ʻahó ni ʻa e tuʻunga-hau ʻo Sihová?

¹⁴ ʻI he ʻahó ni, ʻoku ʻikai ke tau poupouʻi ʻa e pule ʻa Sihová ʻaki haʻatau kau ʻi ha tau. ʻI hono kehé, ʻoku tau fakahaaʻi ʻetau poupoú ʻaki ʻetau malanga loto-toʻa mo faivelenga. Laka hake ʻi ha toe taimi ki muʻa, ʻoku fiemaʻu ʻa e kau pole ki he ngāue ʻa Sihová. ʻOku kehekehe ʻa e ngāue taimi-kakato ʻoku pole ki ai ʻa e laui miliona ʻo e fanga tokouá, fanga tuofāfiné mo e toʻutupú. Ko e fakatātaá, ko e tokolahi ʻoku nau ngāue tāimuʻa, ngāue ʻi he Pētelí, langa ʻo e ngaahi Fale Fakatahaʻanga pea pole ʻi he ngaahi ʻasemipilií mo e ngaahi fakataha-lahí. ʻOku ngāue mālohi ʻa e kau mātuʻa ʻe niʻihi ʻi he ngaahi Kōmiti Fetuʻutaki Fakafalemahakí mo hono fokotuʻutuʻu ʻo e ngaahi fakataha-lahí. ʻE lava ke tau fakapapauʻi ʻoku houngaʻia ʻa Sihova ʻi heʻetau loto-lelei ke ngāue ange kiate ia ʻi ha founga pē ʻoku fiemaʻú pea ʻe ʻikai te ne fakangaloʻi ʻetau ngaahi feingá.—Hep. 6:10.

15. ʻE lava fēfē ke tau fakapapauʻi ʻoku ʻikai ke mole ʻetau faivelenga ʻi he ngāue ʻa Sihová?

¹⁵ ʻOku fiemaʻu ke tau sivisiviʻi ʻetau fakakaukaú tonu ʻo fekauʻaki mo e ngāue polé. ʻE lava ke tau ʻeke hifo kia kitautolu: ‘ʻOku ou tuku ke fai ʻe he niʻihi kehé ʻa e lahi taha ʻo e ngāué? ʻOku ou tokanga ange au ke maʻu ʻa e ngaahi meʻa fakamatelié ʻi he tauhi kia Sihová? Pe ʻoku ou faʻifaʻitaki ki he tui mo e loto-toʻa ʻa Pēlaki, Tēpola, Siaili mo e kau ngāue pole ʻe toko 10,000 ʻaki hono ngāueʻaki ha koloa pē ʻoku ou maʻu ke tauhi ai kia Sihova? ʻOku ou fakakaukau ke hiki ki ha fonua kehe koeʻuhi ke maʻu ai ha paʻanga lahi ange mo ha moʻui ʻoku lelei angé? Kapau ko ia, ʻoku ou lotu kia Sihova ʻo fekauʻaki mo e founga ʻe uesia ai ʻe he hiki ko ení hoku fāmilí mo e fakatahaʻangá?’c (Sio ki he fakamatala ʻi lalo.)

16. Neongo ʻoku maʻu ʻe Sihova ʻa e meʻa kotoa pē, ko e hā ʻe lava ke tau ʻoatu kiate iá?

¹⁶ ʻOku fakalāngilangiʻi lahi ʻaupito kitautolu ʻe Sihova ʻaki ʻene tuku ke tau poupouʻi ʻene pulé. Talu mei he taimi ʻo ʻĀtama mo ʻIví mo e fiemaʻu ʻe he Tēvoló ke ne faʻahi mo e faʻahinga ʻo e tangatá ʻi hono fakafepakiʻi ʻa Sihová. Ka ʻi heʻetau poupouʻi ʻa e pule ʻa Sihová, ʻoku tau fakahaaʻi mahino ai kia Sētane ʻa e tafaʻaki ʻoku tau kau ki aí. ʻOku ueʻi kitautolu ʻe heʻetau tuí mo e mateakí ke tau pole ki he ngāue ʻa Sihová, pea ʻoku ʻai ʻe he meʻá ni ke ne fiefia ʻaupito. (Pal. 23:15, 16) ʻOku ngāueʻaki ʻe he ʻOtuá ʻetau poupou mo e talangofua mateakí ke ne fai ha tali ki he luma ʻa Sētané. (Pal. 27:11) Ko ʻetau talangofuá ʻa e meʻa ʻe lava ke tau ʻoatu kia Sihova ʻa ia ʻoku mahuʻinga kiate iá pea ʻoku ʻai ai ia ke ne fiefia lahi.

17. Ko e hā ʻoku akoʻi mai kia kitautolu ʻe he Fakamaau 5:31 fekauʻaki mo e meʻa ʻe hoko ʻi he kahaʻú?

¹⁷ ʻOku vavé ni ke tali ʻe he tokotaha kotoa ʻi he māmaní ʻa e pule ʻa Sihová ʻi ha toe pule kehe. He fakatuʻotuʻa atu ē ko kitautolu ki he taimi ko iá! ʻOku tau ongoʻi ʻo hangē ko Tēpola mo Pēlakí, ʻi heʻena hiva: “Ke pehe ʻa e ʻauha ʻo ho fili fuape, ʻe Sihova! Ka ko haʻa ʻofa ki he ʻAfiona ke nau hange ko e laʻa ʻene hopo mo hono haʻahaʻa.” (Fkm. 5:31) ʻE hoko ia ʻi he taimi ʻe fakangata ai ʻe Sihova ʻa e māmani fulikivanu ʻo Sētané. ʻI he taimi ʻe kamata ai ʻa e tau ʻo ʻĀmaketoné, ʻe ʻikai ke fiemaʻu ʻe Sihova ha kau ngāue pole fakaetangata ke nau fakaʻauha ʻa e filí. Ka, te tau “fakate pe ʻo tuʻu” pea “mamata ki he fakamoʻui ʻa Sihova.” (2 Kal. 20:17) ʻI he taimi ní, ʻoku tau maʻu ʻa e faingamālie fakaofo ke poupouʻi ʻa e pule ʻa Sihová ʻaki ʻa e loto-toʻa mo e faivelenga.

18. ʻE lava fēfē ke maʻu ʻaonga ʻa e niʻihi kehé mei hoʻo ngāue polé?

¹⁸ Naʻe kamata ʻe Tēpola mo Pēlaki ʻena hiva ʻo e ikuná ʻaki hono fakahīkihikiʻi ʻa Sihova, kae ʻikai ko e faʻahinga ʻo e tangatá. Naʻá na hiva: “Koeʻuhi ko e ngāue pole ʻa e kakaí, mou fakahīkihikiʻi ʻa Sihova!” (Fkm. 5:1, 2, NW) ʻI ha founga meimei tatau, ʻi heʻetau tauhi kia Sihova ʻi ha founga pē ʻoku fiemaʻú, ʻoku toe fakalototoʻaʻi nai ai ʻa e niʻihi kehé ke nau “fakahīkihikiʻi ʻa Sihova!”