Hokohoko Atu ke Fefakahāhāʻaki ʻa e ʻOfa Mateakí

1-2. Ko e hā ʻa e ngaahi ʻuhinga lelei ʻoku tau maʻu ke fefakahāhāʻaki ai ʻa e ʻofa mateakí?

ʻOKU tau maʻu ʻa e ngaahi ʻuhinga lelei ke fefakahāhāʻaki ai ʻa e ʻofa mateakí. Ko e hā ʻa e niʻihi ʻo kinautolu? Fakatokangaʻi ʻa e anga hono tali ʻa e fehuʻi ko iá ʻe ha ngaahi palōveepi fakamānavaʻi: “ʻOua naʻa tuku ke mavahe meiate koe ʻa e ʻofa mateakí mo e faitōnungá. . . . Te ke maʻu leva ai ʻa e leleiʻia mo e vavanga fakaefakakaukau lelei ʻi he ʻao ʻo e ʻOtuá pea mo e tangatá.” “Ko ha tangata ʻofa mateaki ʻokú ne maʻu ʻaonga mei ai.” “ʻIlonga ʻa ia ʻoku tuli ki he māʻoniʻoní mo e ʻofa mateakí te ne maʻu ʻa e moʻui.”​—Pal. 3:3, 4; 11:17, fkm. ʻi lalo; 21:21.

² ʻOku lave ʻa e ngaahi palōveepi ko ení ki he ʻuhinga ʻe tolu ʻoku totonu ai ke tau fakahāhā ʻa e ʻofa mateakí. ʻUluakí, ko hono fakahāhā ʻa e ʻofa mateakí ʻokú ne ʻai ke tau mahuʻinga ʻi he ʻao ʻo e ʻOtuá. Uá, ʻi hono fakahāhā ʻa e ʻofa mateakí, ʻoku tau maʻu ʻaonga mei ai. Ko e fakatātaá, ʻoku tau faʻu ʻa e kaumeʻa tuʻuloa mo e niʻihi kehé. Tolú, ko e tuli ki he ʻofa mateakí ʻoku taki atu ki he ngaahi tāpuaki ʻi he kahaʻú, ʻo kau ai ʻa e moʻui taʻengatá. Ko e moʻoni, ʻoku tau maʻu ʻa e ngaahi ʻuhinga lelei ke talangofua ai ki he fakamanatu ʻa Sihová: “Mou fefakafeangaiʻaki ʻi he ʻofa mateaki mo e meesi.”​—Sāk. 7:9.

 3. Ko e hā ʻa e ngaahi fehuʻi te tau lāulea ki ai ʻi he kupu ko ení?

³ ʻI he kupu ko ení, te tau lāulea ai ki he tali ʻo e fehuʻi ʻe fā. Ko hai ʻoku totonu ke tau fakahāhā ki ai ʻa e ʻofa mateakí? Ko e hā ʻe lava ke tau ako mei he tohi ʻa Luté fekauʻaki mo e ʻofa mateakí? ʻE lava fēfē ke tau fakahāhā ʻa e ʻofa mateakí he ʻahó ni? Ko e hā ʻa e ʻaonga ʻe maʻu ʻe he faʻahinga ʻoku nau fakahāhā ʻa e ʻofa mateakí?

 4. ʻE lava fēfē ke tau faʻifaʻitaki kia Sihova ʻi hono fakahāhā ʻa e ʻofa mateakí? (Maʻake 10:29, 30)

⁴ Hangē ko ia naʻa tau ako ki ai ʻi he kupu ki muʻá, ʻoku tuku tauhi ʻe Sihova ʻene ʻofa mateakí​—ʻa ʻene ngaahi ongoʻi ʻofa ʻoku tolonga mo pīkitaí​—ki he faʻahinga ʻoku ʻofa mo tauhi kiate iá. (Tan. 9:4) ʻOku tau loto ke hoko “ko e kau faʻifaʻitaki ki he ʻOtuá, ʻi he tuʻunga ko ʻene fānau ʻofeina.” (ʻEf. 5:1) Ko ia ai, ʻoku tau holi ke fakatupulekina ʻa e ngaahi ongoʻi māfana​—ko ha mātuʻaki pīkitai tuʻuloa​—ki hotau fanga tokoua mo e fanga tuofāfine fakalaumālié.​—Lau ʻa e Maʻake 10:29, 30.

5-6. Ko e foʻi lea “mateaki” ʻe ʻuhinga nai ia ki ha faʻahinga vahaʻangatae fēfē?

⁵ Te ke loto-tatau moʻoni ko e lelei ange ʻetau mahinoʻi ʻa e ʻuhinga ʻo e ʻofa mateakí, ko e lelei ange ia ʻa e malava ke tau fakahāhā ia ki hotau kaungālotú. Ke fakalahi ʻetau mahinoʻi ʻa e ʻofa mateakí, tau sio angé ki he anga hono fakahoa ia ki he mateakí, ʻa ia ko e foʻi lea ʻoku ngāue angamaheniʻaki. Fakakaukau ki ha fakatātā.

⁶ ʻI he ʻahó ni ʻoku tau fakamatalaʻi nai ha tokotaha kuo ngāue ki ha kautaha tatau ʻi he laui taʻu ko ha tokotaha ngāue mateaki. Neongo ia, ʻi hono taʻu kotoa ʻi he kautahá, kuo teʻeki ai nai ke ne fetaulaki mo ha taha ʻo e kau talēkitá. Heʻikai nai ke ne loto-tatau maʻu pē mo e ngaahi tuʻutuʻuni ngāué. ʻOku ʻikai ke ne ʻofa ʻi he kautahá, ka ʻokú ne fiefia ke maʻu ha ngāue mo ha vahe. Te ne hokohoko atu ke ngāue ʻo aʻu ki haʻane penisoni, tuku kehe kapau ʻe tuʻuaki ange ha ngāue lelei ange ʻi ha feituʻu kehe.

7-8. (a) Ko e hā ʻokú ne ueʻi ha tokotaha ke fakahāhā ʻa e ʻofa mateakí? (e) Ko e hā te tau lāulea ai ki he ngaahi konga mei he tohi ʻa Luté?

⁷ Ko e faikehekehe ʻi he mateakí naʻe lave ki ai ʻa e palakalafi 6 mo e ʻofa mateakí ko e fakaueʻiloto ʻa ha taha. ʻI he Tohi Tapú, ko e hā ʻa e fakaueʻiloto ʻoku hā mahino mei he ngaahi ʻofa mateaki ʻoku fakahāhā ʻe he kakai ʻa e ʻOtuá? Ko e faʻahinga naʻa nau fakahāhā ʻa e ʻofa mateakí naʻa nau fai ia, ʻo ʻikai koeʻuhí naʻe pau ke nau fai pehē, ka koeʻuhí naʻe ueʻi kinautolu ʻe honau lotó. Fakakaukau ki he faʻifaʻitakiʻanga ʻa Tēvitá. Naʻe ueʻi ia ʻe hono lotó ke fakahāhā ʻa e ʻofa mateaki ki hono kaumeʻa ʻofeina ko Sionatané neongo naʻe loto ʻa e tamai ʻa Sionatané ke tāmateʻi ʻa Tēvita. Hili ʻa e ngaahi taʻu mei he mate ʻa Sionatané, naʻe kei fakahāhā pē ʻe Tēvita ʻa e ʻofa mateakí ki he foha ʻo Sionatane ko Mefipōsetí.​—1 Sām. 20:9, 14, 15; 2 Sām. 4:4; 8:15; 9:1, 6, 7.

⁸ ʻE lava ke tau ako ʻa e meʻa lahi fekauʻaki mo e ʻofa mateakí ʻi he lāulea ki he ngaahi konga mei he tohi ʻa Luté. Ko e hā ʻa e ngaahi lēsoni fekauʻaki mo e ʻofa mateakí ʻe lava ke tau ako mei he faʻahinga ʻoku hā ʻi he tohi ko iá? ʻE lava fēfē ke tau ngāueʻaki ʻa e ngaahi lēsoni ko ení ʻi heʻetau fakatahaʻangá?b

 9. Ko e hā naʻe fakamulituku ai ʻa Nāomi kuo fakafepakiʻi ia ʻe Sihová?

⁹ ʻI he tohi ʻa Luté, ʻoku tau lau ai ʻa e talanoa kia Nāomi, Lute ko e uaifi ʻo ʻene tamá, pea mo ha tangata manavahē-ʻOtua ko Pōasi, ʻa ia ko ha kāinga ʻo e husepāniti ʻo Nāomí. Koeʻuhi ko ha honge ʻi ʻIsileli, ko Nāomi mo hono husepānití mo hona ongo fohá naʻa nau hiki ki Mōape. Lolotonga ʻenau ʻi aí, naʻe mate ai ʻa e husepāniti ʻo Nāomí. Naʻe mali ai ʻene ongo tamaikí, ka ko e meʻa fakamamahí, naʻá na toe mate foki. (Lute 1:3-5; 2:1) Ko e ngaahi tā ko iá naʻá ne ʻai ʻa Nāomi ke fakautuutu ai pē ʻa e siva ʻene ʻamanakí. Naʻe mātuʻaki lōmekina ia ʻe he mamahí ʻo ne fakamulituku ai kuo fakafepakiʻi ia ʻe Sihova. Fakatokangaʻi ʻa e anga ʻene fakahaaʻi ʻene ongoʻi fekauʻaki mo e ʻOtuá: “Kuo tafoki ʻa Sihova meiate au.” “Kuo ʻai ʻe he Māfimafi-Aoniú ʻa ʻeku moʻuí ke kona-ʻīʻī.” Naʻá ne toe pehē: “Ko Sihova naʻá ne fakafepakiʻi aú pea ko e Māfimafi-Aoniú naʻá ne fakatupunga ʻeku mamahí.”​—Lute 1:13, 20, 21.

10. Naʻe anga-fēfē fakafeangai ʻa Sihova ki he ngaahi lea taʻefakakaukauʻi ʻa Nāomí?

¹⁰ Naʻe anga-fēfē fakafeangai ʻa Sihova ki he ngaahi lea taʻefakakaukauʻi ʻa Nāomí? Naʻe ʻikai ke ne tafoki mei heʻene sevāniti puputuʻú. ʻI hono kehé, naʻá ne fakahāhā ʻa e kaungāongoʻi kiate ia. ʻOku mahinoʻi ʻe Sihova ko e “ngaohikoviá ʻoku lava ke ne ʻai ʻa e tokotaha potó ke sesele.” (Tml. 7:7) Neongo ia, naʻe fiemaʻu ʻe Nāomi ʻa e tokoni ke lava ʻo ne vakai naʻe ʻi hono tafaʻakí ʻa Sihova. Ko e hā ʻa e tokoni naʻe tokonaki ʻe he ʻOtuá? (1 Sām. 2:8) Naʻá ne ueʻi ʻa Lute ke kakapa atu pea fakahāhā ʻa e ʻofa mateakí kia Nāomi. ʻI he loto-lelei mo e anga-fakaalaala, naʻe tokoniʻi ʻe Lute ʻene faʻē-ʻi-he-fonó ke toe maʻu ʻene mafamafatatau fakaeongo mo fakalaumālié. Ko e hā ʻoku tau ako mei he faʻifaʻitakiʻanga ʻa Luté?

11. Ko e hā ʻoku kakapa atu ai ʻa e fanga tokoua mo e fanga tuofāfine loto-ʻofá ki he faʻahinga loto-mamahí?

¹¹ Ko e ʻofa mateakí ʻokú ne ueʻi kitautolu ke kakapa atu ki he faʻahinga ʻoku loto-mamahí. Hangē pē ko e pīkitai ʻa Lute kia Nāomí, ko e fanga tokoua mo e fanga tuofāfine loto-ʻofa ʻi he ʻaho ní ʻoku nau loto-lelei ke pīkitai ki he faʻahinga ʻi he fakatahaʻangá ʻoku nau loto-mamahi lahi mo loto-mafasiá. ʻOku nau ʻofa ʻi honau fanga tokouá, pea ʻoku nau vēkeveke ke fai ha meʻa pē ʻoku nau malava ke tokoniʻi kinautolu. (Pal. 12:25, fkm. ʻi lalo.; 24:10) ʻOku fehoanakimālie eni mo e ekinaki ʻa e ʻapositolo ko Paulá: “Lea fakanonga ki he faʻahinga ʻoku loto-mafasiá, poupou ki he kau vaivaí, mou kātaki ʻi he feangainga mo e tokotaha kotoa.”​—1 Tes. 5:14.

12. Ko e hā ʻa e founga lelei taha ke tokoniʻi ai ha tokoua pe tuofefine loto-siʻi?

¹² Ko e founga lelei taha ʻoku faʻa lava ke ke tokoni ai ki ha tokoua pe tuofefine loto-siʻi ko e fanongo tokanga kiate ia pea fakapapauʻi ange kiate ia hoʻo ʻofá. Ko hoʻo tokanga anga-lelei ki ha taha ʻo e fanga sipi mahuʻinga ʻa Sihová ʻoku ʻikai ke taʻefakatokangaʻi ia ʻe hotau ʻOtuá. (Saame 41:1) ʻOku pehē ʻi he Palōveepi 19:17: “Ko e tokotaha ʻokú ne fakahāhā ʻa e leleiʻia ʻi he māʻulaló ʻokú ne ʻoatu ha nō kia Sihova, pea te Ne totongi fakafoki kiate ia ʻa e meʻa ʻokú ne faí.”

13. Naʻe anga-fēfē ʻa e kehe ʻa Lute meia ʻOpá, pea ko e hā naʻe hoko ai ʻa e fili ʻa Luté ko ha fakahāhā ʻo e ʻofa mateakí? (Sio ki he tā ʻi he takafí.)

¹³ ʻOku tau maʻu ʻa e vavanga lahi ange ki he ʻofa mateakí ʻi he lāulea ki he meʻa naʻe hoko kia Nāomi hili ʻa e mate hono husepānití mo ʻene ongo tamá. ʻI hono ʻiloʻi ʻe Nāomi naʻe “fakahanga ʻa e tokanga ʻa Sihová ki hono kakaí ʻaki ʻene ʻoange kiate kinautolu ʻa e meʻakai,” naʻá ne fili ke foki ki hono fonuá. (Lute 1:6) Naʻá ne kamata fononga atu mo e ongo uaifi ʻene ongo tamá. Kae kehe, ʻi heʻenau fononga atú, naʻe tuʻo tolu ʻa e kōlenga ʻa Nāomi ki he ongo fefiné ke na foki ki Mōape. Ko e hā ʻa e meʻa naʻe hokó? ʻOku tau lau: “Naʻe ʻuma ʻa ʻOpa ki heʻene faʻē-ʻi-he-fonó peá ne mavahe. Ka naʻe pīkitai ʻa Lute ʻiate ia.” (Lute 1:7-14) ʻI he fili ʻa ʻOpa ke fokí, naʻá ne muimui pē ki he fakahinohino ʻa Nāomí, ʻo fai ʻa e meʻa naʻe ʻamanekina meiate iá. Kae kehe, ko Lute naʻá ne fai ʻa e meʻa lahi ange. Naʻá ne ʻatā foki ke mavahe, ka koeʻuhi ko e ʻofa mateakí naʻá ne fili ai ke nofo ʻo tokoni ki hono kāinga naʻe fiemaʻu tokoní. (Lute 1:16, 17) Naʻe fili ʻa Lute ke pīkitai kia Nāomi, ʻo ʻikai koeʻuhí naʻe pau ke ne fai pehē, ka koeʻuhí naʻá ne loto ki ai. Ko e fili ʻa Luté ko ha fakahāhā ia ʻo e ʻofa mateaki moʻoní. Ko e hā ʻa e lēsoni mei he talanoa ko ení?

14. (a) ʻI he ʻahó ni, ko e hā ʻa e fili ʻoku fai ʻe he fanga tokoua mo e fanga tuofāfine anga-ʻofá? (e) Fakatatau ki he Hepelū 13:16, ko e hā ʻa e ngaahi feilaulau ʻoku fakahōifua ki he ʻOtuá?

¹⁴ Ko e ʻofa mateakí ʻoku fakalaka atu ia ʻi hono fai pē ʻa e meʻa ʻoku ʻamanekiná. ʻI he ʻahó ni, hangē pē ko e kuohilí, ko e tokolahi hotau fanga tokouá mo e fanga tuofāfiné kuo nau fili ke fakahāhā ʻa e ʻofa mateakí ki he kaungātuí, ʻo aʻu ki he faʻahinga ʻoku ʻikai ke nau ʻiloʻí. Ko e fakatātaá, ʻi heʻenau ʻilo naʻe hoko ha fakatamaki fakanatula, ʻoku nau loto leva ke ʻilo pe ʻe anga-fēfē haʻanau fai ha tokoni. ʻI he faingataʻaʻia ha taha ʻi he fakatahaʻangá, ʻoku ʻikai ke nau toumoua ke kakapa atu ki he tokotaha ko iá ʻo fai ha tokoni ʻaonga. Hangē ko e kau Masitōnia ʻi he ʻuluaki senitulí, ʻoku nau fai ʻa e meʻa lahi ange ʻi he meʻa naʻe ʻamanekina meia kinautolú. ʻOku nau fai ʻa e ngaahi feilaulau fakafoʻituitui, ʻo foaki atu “ʻo mahulu atu ia ʻi he meʻa naʻa nau maʻú,” koeʻuhi ke tokoni ki honau fanga tokoua masivesivá. (2 Kol. 8:3) He fiefia ē ko Sihova ʻi ha laumālie anga-ʻofa pehē!​—Lau ʻa e Hepelū 13:16.

15-16. Naʻe anga-fēfē hono fakahāhā ʻe Lute ʻene kīvoí?

¹⁵ ʻE lava ke tau ako ha ngaahi lēsoni lelei mei hono sivisiviʻi ʻa e anga hono tokoniʻi ʻe Lute ʻa Nāomí. Tau lāulea angé ki ha niʻihi.

¹⁶ Hoko ʻo kīvoi. ʻI hono tala ange ʻe Lute ki heʻene faʻē-ʻi-he-fono ko Nāomí te ne ʻalu mo ia ki Siutá, naʻá ne ʻuluaki talitekeʻi ia. Ka naʻe ʻikai ke foʻi ʻa Lute. Ko e hā ʻa e olá? “ʻI he vakai ʻa Nāomi ki he vilitaki ange ʻa Lute ke na oó, naʻe tuku ai ʻene feinga ke fakalotoʻi iá.”​—Lute 1:15-18.

17. Ko e hā te ne tokoniʻi kitautolu ke ʻoua ʻe foʻingofuá?

¹⁷ Ngāueʻaki: ʻOku fiemaʻu ʻa e kātaki ke tokoniʻi ai ʻa e faʻahinga ʻoku loto-mafasiá, ka ʻoku ʻikai totonu ke tau foʻi ʻiate kinautolu. Ko ha tuofefine ʻoku fiemaʻu tokoni te ne ʻuluaki talitekeʻi nai ʻetau tokoní.c Neongo ia, ko e ʻofa mateakí te ne ueʻi kitautolu ke fai hotau lelei tahá ke pīkitai kiate ia. (Kal. 6:2) ʻOku tau ʻamanaki ʻe faai atu pē ʻo ne tali ʻetau fietokoní pea tuku kitautolu ke tau tokoniʻi hake ia mei he siva ʻene ʻamanakí.

18. Ko e hā ʻa e meʻa kuo pau pē naʻe fakalotomamahi kia Luté?

¹⁸ ʻOua naʻa tau mamahingofua. ʻI he aʻu ʻa Nāomi mo Lute ki Pētelihemá, naʻe fetaulaki ʻa Nāomi mo hono ngaahi kaungāʻapi ki muʻá. Naʻá ne tala ange: “Naʻá ku ʻalu fonu atu, ka kuo fakafoki ngeʻesi mai au ʻe Sihova.” (Lute 1:21) Sioloto atu ki he anga ʻo e ongoʻi ʻa Lute ʻi heʻene fanongo ki he lea ko ia ʻa Nāomí! Naʻe fai ʻe Lute ʻa e meʻa lahi ke tokoniʻi ʻa Nāomi. Naʻe tangi ʻa Lute mo ia, fakafiemālieʻi ia, peá na feʻao ʻi he ngaahi ʻaho lahi. Neongo ʻa e ngaahi meʻá ni kotoa, naʻe pehē ʻe Nāomi: “Kuo fakafoki ngeʻesi mai au ʻe Sihova.” Ko e ngaahi lea ko ia ʻa Nāomí, naʻe ʻikai ke ne fakamālōʻia ʻa e poupou ʻa Luté, ʻa ia naʻá ne tuʻu pē ʻi hono tafaʻakí. Kuo pau pē naʻe fakalotomamahi ʻa e meʻa ko iá kia Lute! Neongo ia, naʻá ne pīkitai kia Nāomi.

19. Ko e hā te ne tokoniʻi kitautolu ke pīkitai ki ha tokotaha ʻoku loto-mamahi?

¹⁹ Ngāueʻaki: ʻI he ʻahó ni, ko ha tuofefine ʻoku faingataʻaʻia te ne ʻuluaki lea mai nai kiate kitautolu ʻi ha founga fakalotomamahi​—neongo ʻetau ngaahi feinga kotoa ke tokoniʻi iá. Ka ʻoku tau feinga ke ʻoua te tau mamahingofua. ʻOku tau pīkitai ki hotau tuofefine ʻoku fiemaʻu tokoní, pea ʻoku tau kōlenga kia Sihova ke tokoniʻi kitautolu ke tau ʻiloʻi ha founga ke fakafiemālieʻi ai ia.​—Pal. 17:17.

20. Ko e hā naʻá ne ʻoange kia Lute ʻa e mālohi ke ʻoua ʻe foʻí?

²⁰ Fai ha fakalototoʻa ʻi he taimi totonu. Naʻe fakahāhā ʻe Lute ʻa e ʻofa mateakí kia Nāomi, ka ʻi he taimi ko ení naʻe fiemaʻu ʻe Lute ʻa e fakalototoʻa. Pea naʻe ueʻi ʻe Sihova ʻa Pōasi ke ne fakalototoʻaʻi ia. Naʻe tala ange ʻe Pōasi kia Lute: “Ofa ke fakapaleʻi koe ʻe Sihova ʻi he meʻa kuó ke faí, pea ʻofa ke ʻi ai ha totongi haohaoa kiate koe meia Sihova ko e ʻOtua ʻo ʻIsilelí, ʻa ia ko hono lalo kapakaú ē kuó ke kumi hūfanga ki aí.” Ko e ngaahi lea fakalotomāfana ko iá naʻe maongo loloto kia Lute. ʻI he tali ki aí, naʻe pehē ange ʻe Lute kia Pōasi: “Kuó ke fakafiemālieʻi au pea kuó ke lea fakalotolahi mai ki hoʻo kaunangá.” (Lute 2:12, 13) Ko e ngaahi lea taimi totonu ʻa Pōasí naʻá ne ʻoange kia Lute ʻa e mālohi naʻe fiemaʻu ke ʻoua ʻe foʻi.

21. Hangē ko ia ʻoku fakamatalaʻi ʻi he ʻAisea 32:1, 2, ko e hā ʻe tokonaki mai ʻe he kau mātuʻa tokangá?

²¹ Ngāueʻaki: Ko e faʻahinga ʻoku nau fakahāhā ʻa e ʻofa mateakí ki he niʻihi kehé ʻoku nau faʻa fiemaʻu ʻa e fakalototoʻa. Hangē pē ko hono fakapapauʻi ange ʻe Pōasi kia Lute ʻoku ʻikai ke taʻefakatokangaʻi ʻene anga-leleí, ko e kau mātuʻa fakatokanga meʻa he ʻaho ní ʻoku nau fakamālōʻia ʻi he houngaʻia ʻa e tokoni ʻoku fai ʻe he fanga tokoua mo e fanga tuofāfine anga-ʻofá. Ko e ngaahi fakaongoongolelei taimi totonu mo loto-māfana ko iá ʻe ʻoange ai ki he fanga tokouá ʻa e mālohi ʻoku nau fiemaʻú ke ʻoua ʻe foʻi.​—Lau ʻa e ʻAisea 32:1, 2.

22-23. Naʻe anga-fēfē liliu ʻa e fakakaukau ʻa Nāomí, pea ko e hā hono ʻuhingá? (Saame 136:23, 26)

²² Hili atu ha ngaahi taimi, naʻe tokonaki nima-homo ʻe Pōasi ha meʻakai maʻa Lute mo Nāomi. (Lute 2:14-18) Naʻe anga-fēfē fakafeangai ʻa Nāomi ki he nima-homo ʻa Pōasí? Naʻá ne pehē: “ʻOfa ke faitāpuekina ia ʻe Sihova, ʻa ia kuo ʻikai tuku ʻene ʻofa mateaki ki he kau moʻuí mo e kau maté.” (Lute 2:20a) He liliu lahi ē ko e fakakaukau ʻa Nāomí! Ki muʻá, naʻá ne tangi ʻi he mamahi: “Ko Sihova naʻá ne fakafepakiʻi aú,” ka ko eni kuó ne kalanga fiefia: “[Ko] Sihova . . . kuo ʻikai tuku ʻene ʻofa mateaki.” Ko e hā naʻe tokoni nai ki he liliu ʻa e fakakaukau ʻa Nāomí?

²³ Naʻe faai atu pē ʻo kamata ke sio ʻa Nāomi ki he toʻukupu ʻo Sihová ʻi heʻene moʻuí. Naʻe ngāueʻaki ʻe Sihova ʻa Lute ke ne tokonaki ʻa e poupou naʻe fiemaʻu ki he fononga ki Siutá. (Lute 1:16) Naʻe toe sio foki ʻa Nāomi ki he toʻukupu ʻo Sihová ʻi he anga-ʻofa ko ia ʻa Pōasi ʻo fai ha tokonaki nima-homo maʻá e ongo fefiné, ko ha taha ia ʻi hona “kau totongi huhuʻí.”d (Lute 2:19, 20e) Kuo pau pē naʻá ne fakakaukau, ‘Ko ʻeku toki mahinoʻi eni, naʻe ʻikai ʻaupito liʻaki au ʻe Sihova. Kuó ne kau maʻu pē mo au!’ (Lau ʻa e Saame 136:23, 26.) He houngaʻia ē kuo pau naʻe maʻu ʻe Nāomi ʻi he ʻikai foʻi ʻa Lute mo Pōasi ʻiate iá! ʻOku lava ke tau sioloto atu ki he fiefia ʻa e toko tolu ko iá ʻi he ikuʻanga lelei naʻe hokó.

24. Ko e hā ʻoku tau loto ai ke hanganaki fakahāhā ʻa e ʻofa mateakí ki hotau kaungātuí?

²⁴ Ko e hā kuo tau ako mei he tohi ʻa Luté fekauʻaki mo e ʻofa mateakí? ʻOku ueʻi kitautolu ʻe he ʻofa mateakí ke ʻoua te tau foʻingofua ʻi he fanga tokoua mo e fanga tuofāfine ʻoku loto-mamahí. ʻOkú ne toe ueʻi kitautolu ke fai ha feilaulau ke tokoniʻi kinautolu. Ko e kau mātuʻá ʻoku fiemaʻu ke nau fai ha fakalototoʻa taimi totonu mo loto-māfana ki he faʻahinga ʻoku nau fakaaʻu atu ʻa e ʻofa mateakí ki he niʻihi kehé. ʻI heʻetau vakai ki hono toe maʻu ʻe he faʻahinga ʻoku fiemaʻu tokoní ʻenau mālohi fakalaumālié, ʻoku tau ongoʻi fiefia moʻoni. (Ngā. 20:35) Ka ko e hā ʻa e ʻuhinga muʻomuʻa taha ki heʻetau fakahāhā ʻa e ʻofa mateakí? Koeʻuhí ʻoku tau loto ke faʻifaʻitaki pea fakahōifuaʻi ʻa Sihova, ʻa ia ʻoku “fonu ʻi he ʻofa mateaki.”​—ʻEki. 34:6; Saame 33:22.