Sionatane—“Kuo Ne Ngaue mo e ʻOtua”

KO E foha ʻo e ʻuluaki tuʻi ʻo ʻIsilelí ʻokú ne ʻaʻahi ki ha tokotaha hola ʻoku toi. “ʻOua te ke manavahe,” ko ʻene tala ange ia ki he tokotaha holá, “he ʻikai maʻu koe ʻe he nima ʻo Saula ko ʻeku tamai; pea te ke Tuʻi Isileli koe, kau palemia au.”—1 Samiuela 23:17.

Ko e tokotaha ʻaʻahí ko Sionatane; ko e tokotaha holá ko Tēvita. Ka ne ʻikai ʻa e mate vave ʻa Sionatane ʻi he hili iá, naʻe mei malava ke ne hoko ko e nima toʻomataʻu ʻo Tēvita.

Ko e kaumeʻa ʻa Sionatane mo Tēvitá naʻe kehe ange. Ko hono moʻoní ko Sionatané ko ha tangata naʻe kehe ange. Naʻe fakakaukau pehē foki ʻa hono toʻumeʻá, he naʻa nau pehē fekauʻaki mo ia: “Kuo ne ngaue mo e ʻOtua.” (1 Samiuela 14:45) Ko e hā ne nau leaʻaki ai ení? Ko e hā e ngaahi ʻulungāanga ne maʻu ʻe Sionatané? Pea ko e hā e kaunga kiate koe ʻa e talanoa ki heʻene moʻuí?

“Faingataʻaʻia” ʻa e Kau ʻIsilelí

ʻI he taimi ʻoku fakafeʻiloaki mai ai ʻe he Tohi Tapú ʻa Sionatané, ko e kau ʻIsilelí ʻoku nau “faingataʻaʻia.” Ne hanga ʻe he kau Filisitiá ʻo faʻao e koloa ʻa honau fonuá pea taʻofi ʻenau feinga ke maluʻi kinautolú.​—1 Samiuela 13:​5, 6, 17-​19.

Kae kehe, naʻe fakahaaʻi ʻe Sihova, heʻikai te ne liʻaki ʻa hono kakaí, pea naʻe falala ʻa Sionatane ki ai. Naʻe fekauʻaki ia mo ʻene tamaí, ʻa Saula, naʻe folofola ai ʻa e ʻOtuá: “Te ne fakahaofi hoku kakai mei he nima ʻo e kau Filisitia.” Naʻe falala ʻa Sionatane ki he fakamatala ko iá. Ko ia tonu naʻá ne ʻosi taki ʻa e kau tau ʻIsileli tokosiʻi ʻe toko 1,000 ʻo nau ikunaʻi ʻa e kau Filisitiá. Kuó ne loto eni ke fakangata fakaʻaufuli ʻa e fakamanamana ʻa e kau Filisitiá.—1 Samiuela 9:16; 12:22; 13:​2, 3, 22.

Ko ha ʻOhofi Loto-Toʻa

Naʻe tāketiʻi ʻe Sionatane ha nofoʻanga fakakautau Filisitia ofi ki he hūʻanga ʻi Mikimasí. (1 Samiuela 13:​22 [1Sa 13:​23, PM]) Ke aʻu ki aí, naʻe pau ke ne kaka, ʻo ngāueʻaki “hono nima, mo hono vaʻe.” Naʻe ʻikai taʻofi ia ʻe he meʻa ko iá. Naʻe fakapapauʻi ʻe Sionatane ke ne ʻoho mo ʻene tokotaha toʻo mahafú pē toko taha pea naʻá ne tala ange kiate ia: “E behe nai, e gaue a Jihova maa taua: he oku ikai faigataa kia Jihova ke fakamoui i he toko lahi, be i he toko jii.”—1 Samiuela 14:​6, 13, PM.

Naʻe kumi ʻa e ongo ʻIsilelí ki ha fakaʻilonga meia Sihova. Te na fakahā kinaua ki he kau tangata ʻi he nofoʻangá. Kapau ʻe pehē mai ʻe he kau Filisitiá: “Mo tatali pe kaeʻoua ke mau aʻu atu,” heʻikai ʻalu hake kia kinautolu ʻa Sionatane mo ʻene tokotaha toʻo mahafú. Ka ʻo ka pehē mai ʻe he ngaahi filí: “Hake mai,” ʻoku ʻuhinga iá ʻe ʻoange ʻe Sihova kia Sionatane mo ʻene tangata toʻo mahafú ʻa e ikuna. Kapau naʻe fakapapauʻi ʻe Sionatane ʻa e poupou ʻa e ʻOtuá, naʻá ne taumuʻa ke ʻalu ki he nofoʻangá ke faitau.—1 Samiuela 14:​8-10.

Ko e hā ʻe lava ke fai ʻe he ongo tangata ʻe toko ua ki he kau sōtia kotoa ʻi he nofoʻangá? Sai, ʻikai naʻe tokoniʻi ʻe Sihova ʻa Fakamaau ʻĒhuti ʻi he taimi naʻá ne taki ai ʻa e kau ʻIsilelí ʻi he tau mo Mōapé? ʻIkai naʻe kau ʻa e ʻOtuá mo Samikā, ʻo fakamafeia ia ke ne taaʻi ʻa e kau Filisitia ʻe toko 600 ʻaki ha tao fakateka pulu? Pea ʻikai naʻe fakaivia ʻe Sihova ʻa Samisoni ʻi heʻene ngaahi touʻanga tokotaha pē mo e kau Filisitiá? Naʻe falala ʻa Sionatane ʻe tokoniʻi mo ia foki ʻe he ʻOtuá.​—Fakamaau 3:​12-​31; 15:​6-8, 15; 16:​29, 30.

ʻI heʻenau sio ki he ongo ʻIsilelí, naʻe kaila atu ʻa e kau Filisitiá: “Hake mai, ka mau fakaʻilo ha meʻa kiate kimoua.” Naʻe ʻalu hake ai ʻa Sionatane mo ʻene tangata toʻo mahafú. ʻI he loto-toʻa, naʻá na ʻohofi ʻo tāmateʻi ʻa e toko 20 nai ʻo e kau sōtia ʻa e filí, ʻo ilifia lahi ai ʻa e nofoʻangá. Mahalo pē naʻe fakakaukau ʻa e kau Filisitiá naʻe muimui mai ʻa e kau tau ʻIsileli tokolahi ʻi he ʻuluaki toko uá. Hili iá, “naʻe hoko ha tete ʻi he . . . kakai kotoa” ʻo e nofoʻangá, ko e lau ia ʻa e talanoá, “pea naʻe mofuike ʻa e fonua; ko ia naʻe ai ha tete” ko e haʻu mei he ʻOtuá. Koeʻuhi ko e mofuike naʻe tuku mai ʻe he ʻOtuá, naʻe mafola ʻa e maveuveu ʻi he lotolotonga ʻo e kau Filisitiá, ko ia naʻa “nau fetaʻaki heleta fakaekinautolu.” ʻI he sio ki he meʻá ni ʻa e ngaahi kongakau ʻIsilelí, naʻa nau loto-toʻa. ʻI he kau fakataha mo e kau ʻIsileli ne nau toitoí mo e faʻahinga ne kau mo e kau Filisitiá, naʻa “nau ta holo ʻa e kau Filisitia ʻi he ʻaho ko é mei Mikimasi ki Esialoni.”—1 Samiuela 14:​11-23, 31.

Huhuʻi ʻe he Kakaí

Naʻe tuku taʻefakapotopoto ʻe Tuʻi Saula ha malaʻia ki ha taha pē ʻo ʻene kau sōtiá ʻa ia naʻe kai ki muʻa ke ikuna ʻa e taú. ʻI ha faʻahinga ʻuhinga, naʻe ʻikai ʻiloʻi ʻe Sionatane ʻa e meʻá ni. Naʻe kai ʻa Sionatane ia. Naʻá ne unu hono tokotokó ki ha mohenga hone ʻo ne kai ha hone. ʻOku ngalingali, naʻe ʻoange ai kiate ia ʻa e mālohi foʻou ke ne fakaʻosiʻaki ʻa e taú.​—1 Samiuela 14:​24-​27.

ʻI heʻene ʻiloʻi ne kai ʻa Sionatané, naʻe tuʻutuʻuni ai ʻe Saula kuo pau ke ne mate. Ne ʻikai holomui ʻa Sionatane mei he maté. “Ta te u mate” ko ʻene leá ia. “Pea fakatau folofola ʻa e kakai kia Saula, ʻo mate koā ʻa Sionatane, ʻa ia kuo ne fai ʻa e fakamoʻui lahi ni maʻa Isileli? Mole ke mamaʻo. Tangi moʻui ʻa e ʻEiki, ʻe ʻikai to kelekele hano tuʻoni louʻulu; he kuo ne ngaue mo e ʻOtua he ʻaho ni. Ko ia naʻe huhuʻi ʻe he kakai ʻa Sionatane, pea naʻe ʻikai te ne mate.”—1 Samiuela 14:​38-45.

Ko ha sevāniti ʻi he ʻahó ni ʻa e ʻOtuá ʻoku ʻikai te ne kau ʻi ha ngaahi tau moʻoni, ka ʻe ʻi ai nai ʻa e ngaahi taimi ʻi hoʻo moʻuí te ke fiemaʻu foki mo koe ha tui mo e loto-toʻa. ʻE faingataʻa nai ke fai ʻa e meʻa ʻoku totonú ʻi he taimi ʻoku faihala ai ʻa e tokotaha kotoa ʻoku takatakai ʻiate koé. Kae kehe, ʻe fakaivimālohiʻi mo tāpuakiʻi ʻe Sihova ʻa hoʻo holi ke pouaki ʻa ʻene ngaahi tuʻunga māʻoniʻoní. Te ke fiemaʻu nai ʻa e loto-toʻa ke fakahoko ai ha monū ʻo e ngāue ʻi he kautaha ʻa Sihová, hangē ko hono fakalahi ʻa hoʻo ngāue fakafaifekaú, tali ha monū foʻou, pe hiki ʻo ngāue ʻi he feituʻu ʻoku lahi ange ai ʻa e fiemaʻu ʻo e kau fanongonongo ʻo e Puleʻangá. Te ke fifili nai pe ʻokú ke taau ki he ngāué. Kae kehe, ʻoku pau moʻoni ko hoʻo fai ia ʻe koe ha meʻa lelei kapau ʻokú ke fakafaingamālieʻi koe koeʻuhi ke lava ʻo ngāueʻaki koe ʻe Sihova ʻi ha founga ʻokú ne vakai ʻoku feʻungamālié. Manatuʻi ʻa Sionatane! “Kuo ne ngaue mo e ʻOtua.”

Sionatane mo Tēvita

ʻI he taʻu nai ʻe 20 ki mui ai, naʻe manukiʻi ai ʻe he hau Filisitia ko Kolaiaté ʻa e kau tau ʻIsilelí, ka naʻe tāmateʻi ia ʻe Tēvita. Neongo ʻoku ngalingali naʻe lahi hake ʻaki ʻe Sionatane ʻa e taʻu ʻe 30 ʻia Tēvita, ko e toko uá ni ne lahi e meʻa naʻá na faitatau aí.a Ko e loto-toʻa naʻe fakahāhā ʻe Sionatane ʻi Mikimasí naʻe hā mahino naʻe toe ʻia Tēvita ia. Mahulu hake he meʻa kotoa, naʻe maʻu ʻe Tēvita ʻa e tui tatau ki he mālohi fakaefakahaofi ʻo Sihová, ʻo ne malava ai ke ne fehangahangai taʻemanavahē mo Kolaiate ʻi he taimi naʻe momou ai ʻa e kau ʻIsileli kehé kotoa mei he polé. Ko ia naʻe hoko ai ʻo “pikitai ʻa e loto ʻo Sionatane ki he loto ʻo Tevita, pea ʻofa ʻa Sionatane kiate ia ʻo hange ko ʻene moʻui aʻana.”—1 Samiuela 17:1–18:4.

Neongo ko e toʻa ʻa Tēvitá naʻe ʻai ʻai ʻa Tuʻi Saula ke ne sio ko ha fakafeʻauhi ia, naʻe ʻikai ha kiʻi meʻi ongoʻi meheka ʻe taha ʻa Sionatane. Ko ia mo Tēvitá naʻá na hoko ʻo kaungāmeʻa ofi ʻaupito, pea ʻoku ngalingali ʻi heʻena talanoa fakapulipulí, ne ʻiloʻi ai ʻe Sionatane ʻa hono pani ʻo Tēvita ke hoko ko e tuʻi hono hoko ʻo ʻIsilelí. Naʻe fakaʻapaʻapaʻi ʻe Sionatane ʻa e fili ʻa e ʻOtuá.

ʻI he lea ʻa Tuʻi Saula ki hono fohá mo ʻene kau sevānití ʻo kau ki hano tāmateʻi ʻo Tēvitá, naʻe fakatokanga ʻa Sionatane kia Tēvita. Naʻe fakatuipauʻi ʻe Sionatane kia Saula ʻoku ʻikai ha meʻa ke ne manavahē ai ʻia Tēvita. He ko ē, naʻe ʻikai ha faihala ʻe taha ʻa Tēvita ki he tuʻí! ʻIkai ne tuku ʻe Tēvita ʻene moʻuí ki ha tuʻunga fakatuʻutāmaki ʻi heʻene fetaulaki mo Kolaiaté? Ko e kōlenga lahi ʻa Sionatane maʻa hono kaumeʻa ne fakamaauhalaʻí naʻe fakanonga hifo ai ʻa Saula. Kae kehe, ne vave e toe foki ʻa e tuʻí ki he faʻufaʻu fakapoó peá ne fai ai ʻa e ngaahi feinga lahi ange ke tāmateʻi ʻa Tēvita, ʻo pau ai ke ne hola.—1 Samiuela 19:​1-​18.

Naʻe poupou ʻa Sionatane kia Tēvita. Naʻe fetaulaki ʻa e ongo kaungāmeʻá ke na palani ʻa e meʻa ke faí. ʻI he mateaki ki hono kaumeʻá pea kei feinga ai pē ke mateaki ki heʻene tamaí, naʻe pehē ʻe Sionatane kia Tēvita: “Mole ke mamaʻo: ʻe ʻikai te ke mate.” Kae kehe, naʻe tala ange ʻe Tēvita kia Sionatane: “Ko e laka pe taha ʻoku ʻi hoku vahaʻa mo e mate.”—1 Samiuela 20:​1-3.

Naʻe palani leva ʻa Sionatane mo Tēvita ke siviʻi ʻa e ngaahi taumuʻa ʻa Saulá. Kapau ʻe fakatokangaʻi ʻa e ʻikai ʻi ai ʻa Tēvita ʻi he tēpile ʻa e tuʻí, ʻe tala ʻe Sionatane ki heʻene tamaí naʻe poaki ʻa Tēvita ke fakaʻatā ia ke ne kau ki ha feilaulau fakafāmili. Kapau ʻe tali ʻita ki ai ʻa Saula, ko ha fakaʻilonga ia ʻo ʻene fehiʻa kia Tēvita. Naʻe tāpuakiʻi ia ʻe Sionatane pea fakahuʻunga ange ʻa hono tuʻunga tuʻi ʻi he kahaʻú, ʻi heʻene pehē: “ʻOfa ke kau ʻa e ʻEiki mo koe, ʻo hange ko ʻene kau mo ʻeku tamai.” Naʻe fuakava ʻa e toko uá ni te na femateakiʻaki ʻo na fakapapauʻi ʻa e founga ʻe fakahaaʻi ai ʻe Sionatane kia Tēvita ʻa e ola ʻo e sivi naʻe faí.—1 Samiuela 20:​5-24.

ʻI he vakai ʻa Saula naʻe ʻikai ʻi ai ʻa Tēvitá, naʻe fakamatala ʻa Sionatane ne kole ange ʻa Tēvita kiate ia: “Kapau kuo u taʻimalie hoʻo ʻofa, tuku ke u moulu atu, ʻo ʻaʻahi ki hoku ngaahi tokoua.” Naʻe ʻikai ilifia ʻa Sionatane ke fakahaaʻi naʻá ne fakaʻatā ʻe ia ʻa Tēvita. Naʻe houhau ʻa e tuʻí! Naʻá ne ngāhiʻi ʻa Sionatane mo ne tafulu ʻo pehē ko Tēvitá ko ha fakamanamana ia ki hono fetongi ia ʻe hono fohá ʻi he tuʻunga ko e tuʻí. Naʻe tuʻutuʻuni ʻe Saula kia Sionatane ke ne ʻomai ʻa Tēvita kiate ia he ko e tokotaha ia kuo pau ke ne mate. Naʻe tali fefeka ange ʻa Sionatane: “Ko ʻene mate ko e ha? ko e ha kuo ne fai?” ʻI ha ʻita tōlili, naʻe veloʻi ʻaki ʻe Saula ʻa ʻene taó ʻa hono fohá. Naʻe kalofi ʻe Sionatane ʻo ʻikai hoko kiate ia ha meʻa ka naʻá ne loto-mamahi lahi koeʻuhi ko Tēvita.—1 Samiuela 20:​25-34.

He mateaki moʻoni ne fakahāhā ʻe Sionatané! ʻI he vakai ʻataʻatā ʻa e tangatá, naʻe siʻi e meʻa ʻe lava ke ne maʻú kae lahi e meʻa ʻe mole meiate ia ʻi heʻene kaumeʻa mo Tēvitá. Neongo ia, kuo fakanofo ʻe Sihova ʻa Tēvita ke ne fetongi ʻa Saula ʻi he tuʻunga ko e tuʻí, pea ko e meʻa kuo fakataumuʻa ʻe he ʻOtuá ko e lelei pē ia maʻa Sionatane pea mo e niʻihi kehé.

Ko ha Māvae Loʻimataʻia

Naʻe fetaulaki fakapulipuli ʻa Sionatane mo Tēvita ʻo tala ange kiate ia ʻa e ongoongó. Naʻe hā mahino heʻikai ʻaupito ke toe tuʻu ʻa Tēvita ʻi he lotoʻā ʻo Saulá. Naʻe fetāngihi mo fefāʻofuaʻaki ʻa e ongo tangatá. Pea naʻe ʻalu leva ʻa Tēvita ʻo toi.​—1 Samiuela 20:​35-​42.

Ne toe sio fakaʻosi pē ʻa Sionatane ki he tokotaha holá, ʻi he taimi naʻe toi ai ʻa Tēvita meia Saula ‘ʻi he Toafa ʻo Sifí ʻi he potu vaó.’ ʻI he taimi ko iá naʻe fakalotolahiʻi ai ʻe Sionatane ʻa Tēvita ʻaki ʻa e ngaahi leá ni: “ʻOua te ke manavahe, he ʻikai maʻu koe ʻe he nima ʻo Saula ko ʻeku tamai; pea te ke Tuʻi Isileli koe, kau palemia au; pea naʻa mo ʻeku tamai ko Saula ʻoku ne ʻilo ia.” (1 Samiuela 23:​15-18) Taimi nounou mei ai, naʻe mate ʻa Sionatane mo Saula ʻi ha tau mo e kau Filisitiá.​—1 Samiuela 31:​1-4.

Ko e faʻahinga kotoa ʻoku ʻofa ʻi he ʻOtuá ʻoku lelei ke nau fakakaukauloto ki he ʻalunga naʻe tuli ki ai ʻa Sionatané. ʻOkú ke fehangahangai mo ha fepaki ʻi he mateakí? Manatuʻi leva naʻe fakaʻaiʻai ʻe Saula ʻa Sionatane ke ne kumi ki he ngaahi meʻa pē ʻaʻana. Kae kehe, naʻe fakalāngilangiʻi ʻe Sionatane ʻa Sihova ʻaki ʻa e fakamoʻulaloa mo e ʻapasia loto-moʻoni pea naʻá ne fiefia he ko e tokotaha kuo fili ʻe he ʻOtuá ʻe hoko ko e tuʻi hono hoko ia ʻo ʻIsilelí. ʻIo, naʻe poupouʻi ʻe Sionatane ʻa Tēvita pea naʻá ne mateaki kia Sihova.

Naʻe maʻu ʻe Sionatane ʻa e ngaahi ʻulungāanga fakamānako. Faʻifaʻitaki ki ai! Pea ʻe malava leva ai ke lea ʻa e kakaí fekauʻaki mo koe ʻo hangē ko ia naʻa nau fai kia Sionatané: “Kuo ne ngaue mo e ʻOtua.”​—1 Samiuela 14:45.

[Fakamatala ʻi lalo]

[Fakatātā ʻi he peesi 19]

Naʻe ʻikai meheka ʻa Sionatane kia Tēvita