Ngaahi Fehuʻi mei he Kau Lautohí

Naʻe ngaohikoviʻi nai ʻe Tēvita, ko e tangata naʻe loto tatau mo e finangalo ʻo e ʻOtuá, ʻa ʻene kau pōpulá, ʻo hangē ko ia ko e fakamulituku ʻe he niʻihi mei he 2 Samiuela 12:31 mo e 1 Kalonikali 20:3?

ʻIkai. Naʻe tuʻutuʻuni pē ʻe Tēvita ia ki he kau pōpula ʻĀmoní ke nau ngāue pōpula. Ko e ngaahi ngāue ʻa Tēvitá naʻe fai ʻa e maʻuhala ai koeʻuhi ko e founga ʻo e liliu ʻe he ʻū liliu Tohi Tapu ʻe niʻihi ʻa e ongo veesi ko ení.

ʻI hono fakamatalaʻi ʻo e tautea naʻe hilifaki ki he kau ʻĀmoní, ko e ngaahi liliu Tohi Tapu ko iá naʻa nau fakahaaʻi ai ʻa Tēvita naʻá ne anga-fakapāpeliane mo anga-fakamamahi. Ko e fakatātaá, ko e 2 Samiuela 12:​31, fakatatau ki he liliu Paaki Motuʻa, ʻoku pehē ai: “Naa ne omi kitua ae kakai nae i ai, o ne tuku akinautolu ki he lalo kili, bea ki lalo i he gaahi mea toho vagavaga nae gaohi aki ae aione, bea ki lalo i he gaahi toki ukamea, bea naa ne bule ke nau alu i he lotolotoga oe tuuaga maka-umea: bea nae behe be a ene fai ki he gaahi kolo kotoabe oe fānau a Amoni.” Ko e fakamatala ʻi he 1 Kalonikali 20:3 ʻoku liliu ia ʻi he tuʻunga meimei tatau.

Kae kehe, hangē ko ia naʻe fakahaaʻi ʻe he mataotao Tohi Tapu ko Samuel Rolles Driver, ko e anga-fakamamahí “ʻoku kehe ia mei he meʻa kotoa ʻoku tau ʻiloʻi fekauʻaki mo e ʻulungāanga pea mo e ongoʻi fakafoʻituitui ʻa Tēvitá.” Ko ia ai, ko ha fakamatala ʻi he Anchor Bible ʻoku pehē ai: “ʻOku fokotuʻu ʻe Tēvita ha ngaahi kulupu ngāue ʻo e kau pōpulá ke nau ngāueʻi ʻa e feituʻu naʻe ikunaʻí ki ha ʻaonga fakaʻekonōmika, ʻo hā mahino ko ha tōʻonga anga-maheni ʻeni ia ʻa e ngaahi tuʻi ikuná.” ʻI he fakakaukau tatau, ʻoku fakamatala ʻa Adam Clarke: “Ko ia ai, ko e ʻuhingá leva, naʻá Ne ʻai ʻa e kakaí ko e kau pōpula, pea naʻá ne fakangāueʻi kinautolu ʻi he ngāue kilisí, ʻi he ngaohi mataʻi palau ukameá, pe keli koloá, . . . pea ʻi he taʻanga papá pea mo e ngaohi pilikí. Ko hono kilisi, tuʻutuʻu, fahifahi mo taʻanga ʻa e faʻahinga ʻo e tangatá, ʻoku ʻikai haʻane ʻuhinga pehē ʻi he konga tohi ko ení, ʻo hangē pē ko e ʻikai ke feʻungamālie mo e tōʻongafai ʻa Tēvita ki he kau ʻĀmoní.”

ʻI hono tapua atu ʻa e mahino totonu ange ko ení, ʻoku fakamahino ai ʻe he ngaahi liliu fakaeonopooni kehekehe ʻoku ʻikai totonu ke tukuakiʻi ʻa Tēvita ki ha tōʻongafai taʻeʻofa.a Fakatokangaʻi ange ʻa hono fakalea ʻo e New English Translation (2003): “Naʻá ne ʻave ʻa e kakai naʻe ʻi aí ʻo ʻai ke nau fai ʻa e ngāue faingataʻa ʻaki ʻa e ngaahi kili, ngaahi piki ukamea, mo e ngaahi toki ukamea, ʻo ʻai kinautolu ke nau ngāue ʻi he taʻoʻanga pilikí. Ko ʻene fokotuʻutuʻu ngāue ʻeni ki he ʻū kolo ʻĀmoní kotoa.” (2 Samiuela 12:31) “Naʻá ne ʻave ʻa e kau nofo ʻi he koló ʻo ne ʻai kinautolu ke nau ngāue ʻo ngāueʻaki ʻa e ngaahi kili, ngaahi piki ukamea mo e ngaahi toki. Naʻe fai ʻeni ʻe Tēvita ki he ʻū kolo kotoa ʻo e kau ʻĀmoní.” (1 Kalonikali 20:3) Ko e fakalea ʻo e New World Translation ʻoku toe fehoanakimālie ia mo e mahino fakamuimui taha ʻa e kau mataotaó: “Ko e kakai naʻe ʻi aí, naʻá ne ʻomai koeʻuhi ke ne fakahū kinautolu ki he ngāue kilisi maká mo e ngāueʻaki ʻo e ngaahi meʻangāue ukamea māsilá mo e ngaahi ngāue toki ukameá, pea naʻá ne ʻai kinautolu ke nau ngāue ʻi he ngaohiʻanga pilikí.” (2 Samiuela 12:31) “Ko e kakai naʻe ʻi aí naʻá ne ʻomai, pea naʻá ne hanganaki fakangāueʻi kinautolu ʻi he ngāue kilisi maká mo e ngāueʻaki ʻo e ngaahi ngāue meʻangāue ukamea māsilá mo e ngaahi ngāue tokí; pea ko e founga ia naʻe hokohoko fai ʻe Tēvita ki he ngaahi kolo kotoa ʻo e ngaahi foha ʻo ʻĀmoní.”—1 Kalonikali 20:3.

Naʻe ʻikai ke fakamoʻulaloaʻi ʻe Tēvita ʻa e kau ʻĀmoni ne ikunaʻí ki ha fakamamahi fakapāpeliane mo ha tāmate tavale fakalilifu. Naʻe ʻikai te ne faʻifaʻitaki ki he ngaahi anga fakafonua ʻo e tau anga-fakamamahi mo anga-fakamanu ʻo hono taimí.

[Fakamatala ʻi lalo]