Ko ha Ikunaʻi ʻo e Koví

“KOEʻUMAʻA ke kape ʻa e kuli mate ni ki he ʻafio ʻa e tuʻi? kau laka atu muʻa, ʻo pakiʻi hono ʻulu.” Ko e kole ko ʻení naʻe haʻu meia ʻApisai, ko ha ʻeiki tau ʻIsileli. Ko ʻene tali ʻita ia ʻi he taimi naʻá ne fanongo ai, kuo leakoviʻi fakafehiʻanekina hono ʻeikí, ʻa Tuʻi Tēvita ʻe ha tangata Penisimani naʻe hingoa ko Simi.​—2 Samiuela 16:​5-9.

Naʻe fakavaivai ʻa ʻApisai ki ha filōsofia ʻiloa ʻoku tuʻuaki ʻi he ʻahó ni​—ko e tefitoʻi moʻoni ʻo e faisāuni ʻo tali atu ʻaki ʻa e meʻa tatau. ʻIo, naʻe loto ʻa ʻApisai ke ʻai ʻa Simi ke ne faingataʻaʻia ʻi he ngaahi lea tuku hifo kuó ne fai kia Tēvitá.

Ka neongo ia, ko e hā ʻa e tali ʻa Tēvitá? Naʻe taʻofi ʻe Tēvita ʻa ʻApisai, ʻaki ʻene pehē: “Tuku ai pe [ia].” Neongo ʻene tonuhia mei hono ngaahi tukuakiʻi ʻe Simí, naʻe talitekeʻi anga-fakatōkilalo ʻe Tēvita ʻa e fakatauele ke faisāuní. ʻI hono kehé, naʻá ne tuku ʻa e meʻá ki he toʻukupu ʻo Sihová.​—2 Samiuela 16:​10-13.

ʻI he taimi naʻe toe foki ai ʻa Tēvita ki he taloní ʻi he hili ʻene hola mei ha angatuʻu taʻelavameʻa ʻa hono fohá, naʻe kau ʻi he ʻuluaki ke fakafetaulaki mai kiate iá pea kole ki ha fakamolemolé ʻa Simi. Naʻe toe loto ʻa ʻApisai ke tāmateʻi ia, ka naʻe toe ʻikai ai pē ke fakaʻatā ia ʻe Tēvita.​—2 Samiuela 19:​15-23.

ʻI he fakatātā ko ʻení, naʻe fakamoʻoniʻi ai ʻe Tēvita ʻa ʻene hoko ko ha fakatātā feʻungamālie ia ʻo Sīsū Kalaisi, ʻa ia naʻe tohi ʻa e ʻapositolo ko Pitá ʻo pehē: “ʻI hono leakovia naʻe ʻikai te ne tali ʻaki ha leakovi . . . ka ne tuku ia kiate ia ʻoku fakamāu totonu.”​—1 Pita 2:23.

ʻI he ʻahó ni, ʻoku akonakiʻi ʻa e kau Kalisitiané ke nau ‘angavaivai: ʻo ʻoua te nau totongi ʻa e kovi ʻaki ʻa e kovi.’ (1 Pita 3:​8, 9) ʻI he muimui ki he ʻalunga naʻe fokotuʻu ʻe Tēvita mo Sīsū Kalaisí, te tau lava mo kitautolu “ke ikuna ʻa e kovi ʻaki ʻa e lelei.”​—Loma 12:​17-21.