Ngaahi Fehuʻi mei he Kau Lautohí

Naʻe fokotuʻu fēfē ʻa e ongo ʻakau haʻamo ʻo e puha ʻo e fuakavá, koeʻuhi ʻoku fakahaaʻi ʻe he 1 Tuʻi 8:8 naʻe fai ʻa e sio ki ai mei he Potu Tapú?

ʻI he taimi naʻe foaki ai ʻe Sihova kia Mōsese ʻa e sīpinga ʻo e tāpanekalé ʻi he toafá, ko ha tafaʻaki mahuʻinga ai ʻa e puha ʻo e fuakavá. Ko e puha tapafā lōloa, ʻufiʻufi koula ko ení naʻe tuku ai ʻa e ongo maka lafalafa ʻo e Laó pea mo e ngaahi meʻa kehe. Naʻe tauhi ia ʻi he loki taupotu taha ki lotó, ʻa e Potu Toputapú. ʻI he ʻufiʻufi ʻo e Puhá naʻe ʻi ai ʻa e ongo selupimi koula ʻe ua ʻoku mafola atu hona ongo kapakaú. ʻI he tafaʻaki taki taha ʻo e Puhá, naʻe ʻi ai ʻa e ngaahi foʻi kavei fuopotopoto koeʻuhi ke lava ʻo fataʻaki ha ongo ʻakau ʻe ua, naʻe ngaohi mei he ʻakau ko e sitimi ʻa ia naʻe ʻufiʻufi koula. ʻOku ʻuhinga lelei leva ai, ʻa hono fakahū ʻa e ongo ʻakaú ʻi he ngaahi foʻi kavei fuopotopotó pea tokoto fakalōloa ʻi he Puhá. Ko ia, ʻi he tuʻuʻanga ʻo e Puhá ʻi he Potu Toputapu ʻo e tāpanekalé, ʻa ia naʻe hanga ki he hahaké, naʻe hanga fakatokelau-tonga ai ʻa e ongo ʻakaú. Naʻe peheni pē ki mui ai ʻi he taimi naʻe ʻi he temipale ai naʻe langa ʻe Solomoné ʻa e Puhá.​—Ekisoto 25:​10-22; 37:​4-9; 40:​17-21.a

Naʻe vaheʻi ʻe ha puipui ʻa e Potu Toputapú mei he Potu Tapú (ko e loki ki tuʻá). Ko e kau taulaʻeiki ʻi he Potu Tapú naʻe ʻikai lava ke nau sio ki loto ki he Potu Toputapú pea vakai ai ki he Puhá, ʻa ia naʻe fakahaaʻi ai ʻe he ʻOtuá ʻa ia tonú. (Hepelu 9:​1-7) Ko ia, ʻe hā ngali fakapuputuʻu ʻa e 1 Tuʻi 8:8: “Naʻa nau toloaki mai ʻa e ongo ʻakau haʻamo, ko ia naʻe ala sio ki he mui ʻakau haʻamo mei he potu Tapu, ʻi he mata folofolaʻanga, ka naʻe ʻikai ha kituʻa.” Ko e fakamatala tatau pē ʻoku fai ʻi he 2 Kalonikali 5:9. Naʻe anga-fēfē leva ʻa e hā ʻa e ongo ʻakaú ki ha taha pē ʻi he Potu Tapu ʻo e temipalé?

Kuo fakaʻuta atu ʻa e niʻihi naʻe tau ʻa e ongo ʻakaú ki he puipuí, ʻo ʻasi pupula mai ai. Ka ʻe ʻikai ke pehē ia kapau naʻe hanga fakatokelau-tonga ʻa e ongo ʻakaú, fakataha mo e huʻufataha ʻa e puipuí mo e ongo ʻakaú. (Nomipa 3:38) ʻOku ʻi ai ha fakamatala ia ʻoku ʻuhinga lelei ange. Naʻe ʻasi mai nai ʻa e ongo ʻakaú kapau naʻe ʻi ai ha kiʻi ava siʻisiʻi ʻi he vahaʻa ʻo e puipuí pea mo e holisi ʻo e temipalé pe ʻi he taimi naʻe pau ai ke hū ʻa e taulaʻeiki lahí ki he Potu Toputapú. Naʻe tāpuni ʻe he puipuí ha vakai tonu atu ki he Puhá, ka ʻi he hope ʻa e ongo ʻakaú ki he ongo tafaʻakí taki taha naʻe ʻasi mai nai ia ʻi he avá. Lolotonga ʻoku ʻuhinga lelei ʻa e foʻi fakamatala ko ení, ʻoku ʻikai lava ke tau fakamatematē ʻo fekauʻaki mo ia.

ʻOku hā mahino, ʻoku lahi ʻa e ngaahi fakaikiiki te tau toki ako nai ki ai. Naʻe lave ʻa e ʻapositolo ko Paulá ki ha ngaahi tafaʻaki siʻi pē ʻi heʻene tohi ki he kau Hepeluú. Peá ne toki pehē: “Ko e ngaahi meʻa ko ia ʻoku ʻikai ke lava ke lea fakafoʻimeʻa ki ai ʻi he taimi ni.” (Hepelu 9:5) Ko e toetuʻu ka hoko mai ko eni ʻo e faʻahinga loto-tōnungá ʻoku totonu ke ne fakaava mai ha ngaahi faingamālie fakaueʻiloto ke ako ai mei he kau tangata hangē ko Mōsese, ʻĒlone, Pesalili pea mo e niʻihi naʻa nau maheni fakafoʻituitui pea mo e sīpinga mo e ngāue ʻo e tāpanekalé.​—Ekisoto 36:1.

[Fakamatala ʻi lalo]