Faʻifaʻitaki ki Heʻenau Tuí

Naʻá Ne Tuʻu Maʻá e Lotu Maʻá

NAʻE hanga atu ʻa ʻIlaisiā ki he fuʻu kakaí ʻi heʻenau fāinga hake ʻi he tahake ʻo Moʻunga Kāmelí. Naʻa mo e maʻefu hake ʻa e pongipongí, naʻe tekeutua mai ʻa e masiva mo e faingataʻaʻia ʻa e kakaí ni. Ko e taʻu ʻe tolu mo e konga ʻa e lōloa ʻo e laʻalaʻaá kuo hā mai hono nunuʻá ʻiate kinautolu.

Naʻe lue fakamafutofuta holo ʻi honau lotolotongá ʻa e kau palōfita ʻe toko 450 ʻa Pēali, kuo nau hīkisia tōtuʻa mo fehiʻa lahi fakaʻulia ʻia ʻIlaisiā ko e palōfita ʻa Sihová. Kuo fakapoongi ʻe Kuini Sisipeli ʻa e kau sevāniti tokolahi ʻa Sihova, ka ko e tangatá ni naʻá ne kei tuʻumaʻu pē ʻi hono fakafepakiʻi ʻa e lotu Pēalí. ʻĀua, ka ko e hā hono lōloá? Mahalo pē naʻe fakaʻuhinga ʻa e kau taulaʻeiki ko iá ʻo pehē heʻikai ʻaupito lava ha tangata ʻe toko taha ke ne ikunaʻi kinautolu hono kotoa. (1 Tuʻi 18:3, 19, 20) Naʻe fononga mai foki mo Tuʻi ʻĒhapi, ʻokú ne ʻafio ʻi heʻene saliote fakatuʻí. Naʻe ʻikai foki te ne saiʻia mo ia ʻia ʻIlaisiā.

Naʻe toka mei muʻa ʻi he palōfita ne tuʻu toko taha ko iá ha ʻaho taʻehanotatau ʻi heʻene moʻuí. ʻI he mamata ʻa ʻIlaisiaá, naʻe teu ai ke hoko ʻa e taha ʻo e ngaahi fepaki fakaetulama lahi taha ʻi he vahaʻa ʻo e leleí mo e koví ʻe faifai ange pea mamata ai ʻa e māmaní. Naʻe fēfē ʻene ongoʻí ʻi he maʻefu hake ʻa e ʻaho ko iá? Naʻe ʻikai te ne teitei manavahē, ʻi hono tuʻunga “koe tagata ia nae aga tatau mo kitautolu.” (Semisi 5:17, PM) ʻOku lava ke tau fakapapauʻi ʻa e meʻa ʻe taha ko ení: ʻI hono takatakaiʻi ʻe he kakai taʻetui, ko honau tuʻi tafoki mei he moʻoní, mo e kau taulaʻeiki anga-fakapō ko iá, naʻe ongoʻi lahi ʻe ʻIlaisiā ʻene toko tahá.—1 Tuʻi 18:22.

Kae kehe, ko e hā naʻe aʻu ai ʻa ʻIsileli ki he tuʻunga fakamamahi ko ení? Pea ko e hā e kaunga ʻo e fakamatalá ni kiate koe he ʻaho ní? ʻOku ekinaki mai ʻa e Tohi Tapú ke tau sio fakamamaʻu ki he kau sevāniti anga-līʻoa ʻa e ʻOtuá pea “faʻifaʻitaki ki heʻenau tui.” (Hepelu 13:7) Fakakaukau angé he taimí ni ki he faʻifaʻitakiʻanga ʻa ʻIlaisiaá.

Fetakai Lōloa ʻOku Aʻu ki Hono Tumutumú

ʻI he konga lahi ʻo ʻene moʻuí ne mamata ʻa ʻIlaisiā ʻo ʻikai lava ke fai ha meʻa ki hono tekeʻi ki he tafaʻakí ʻo tāmoloki ʻa e meʻa lelei taha ʻi hono fonua tupuʻangá mo hono kakaí, ʻa ia ko e lotu kia Sihová. Vakai ange, naʻe fāinga ʻa ʻIsileli ʻi ha taimi lōloa, ʻi he faitau he vahaʻa ʻo e lotu maʻá mo e lotu loí, ʻi he vahaʻa ʻo e lotu kia Sihova ko e ʻOtuá mo e tauhi ʻaitoli ʻa e ngaahi puleʻanga takatakaí. ʻI he ʻaho ʻo ʻIlaisiaá, ko e fāinga ko iá naʻe tautefito ai ʻene maliu ki he kovi ange.

Naʻe mali ʻa Tuʻi ʻĒhapi mo Sisipeli, ko e ʻofefine ʻo e tuʻi Saitoní. Naʻe fakapapauʻi ʻe Sisipeli ke fakamafola ʻa e lotu Pēalí ʻi he fonua ʻo ʻIsilelí pea fakangata ʻosi ʻa e lotu kia Sihová. Naʻe tō vave ʻa ʻĒhapi ki heʻene tākiekiná. Naʻá ne langa ha temipale mo ha ʻōlita kia Pēali pea takimuʻa ʻi he punou hifo ki he ʻotua pangani ko ení. Naʻá ne fakahouhauʻi lahi ʻa Sihova.—1 Tuʻi 16:30-33.a

Ko e hā naʻá ne ʻai ʻa e lotu Pēalí ke mātuʻaki fakalieliá? Naʻá ne fakataueleʻi ʻa ʻIsileli, ʻo tohoakiʻi mamaʻo ʻa e tokolahi mei he ʻOtua moʻoní. Ko ha toe lotu anga-kākā foki ia mo anga-fakamanu. Naʻe kau ki ai ʻa e paʻumutu ʻa e tangata mo e fefine ʻi he temipalé, ngaahi kātoanga fakaefehokotaki fakasino tavale pea naʻa mo hono feilaulauʻaki ʻa e fānaú. Naʻe tali ki ai ʻa Sihova ʻaki ʻene fekauʻi ʻa ʻIlaisiā ke ʻalu kia ʻĒhapi ʻo fakahaaʻi ʻe hoko ha laʻalaʻā ʻa ia ʻe toki ʻosi pē ʻi hano fanongonongo ʻe he palōfita ʻa e ʻOtuá. (1 Tuʻi 17:1) Naʻe mahili mei ai ha ngaahi taʻu pea toe ʻalu ʻa ʻIlaisiā kia ʻĒhapi ʻo tala ange ke ne fakatahatahaʻi mai ʻa e kakaí mo e kau palōfita ʻa Pēalí ki Moʻunga Kāmeli.

Ko ia ko e hā ʻa e ʻuhinga ʻo e fāinga ko ení kia kitautolu he ʻaho ní? ʻE pehē nai ʻe he niʻihi ʻoku ʻikai ʻaonga he taimí ni ha talanoa fekauʻaki mo e lotu Pēalí, koeʻuhi ʻoku ʻikai ke tau sio takatakai ʻia kitautolu ki ha ngaahi temipale mo ha ngaahi ʻōlita kia Pēali. Ka ko e fakamatalá ni ʻoku ʻikai ko ha hisitōlia motuʻa pē ia. (Loma 15:4) Ko e foʻi lea “Pēali” ʻoku ʻuhingá ko e “tokotaha ʻoku ʻaʻana” pe “pule.” Naʻe folofola ʻa Sihova ki hono kakaí ʻoku totonu ke nau fili Ia ko honau “pēali,” pe husepāniti ʻoku ʻaʻana. (Aisea 54:5) ʻIkai te ke loto-tatau ʻoku kei tauhi ʻe he kakaí ki ha kau pule kehekehe kae ʻikai ko e ʻOtua Māfimafi-Aoniú? Ko e moʻoni, pe ʻoku ngāueʻaki ʻe he kakaí ʻenau moʻuí ʻi he tuli ki he paʻangá, ngāué, fakafiefiá, fiefia fakaefehokotaki fakasinó, pe ko e taha ʻo e ngaahi ʻotua taʻefaʻalaua ʻoku lotu ki ai kae ʻikai ko Sihová, ʻoku nau fili maʻanautolu ha pule. (Mātiu 6:24; Loma 6:16) ʻI ha tuʻunga leva, ko e ngaahi tafaʻaki mālohi taha ʻoku faʻuʻaki ʻa e lotu Pēalí ʻoku lakalakaimonū ia he ʻahó ni. Ko e feʻauhi ko ia he kuonga muʻá ʻi he vahaʻa ʻo Sihova mo Pēalí ʻoku lava ke ne tokoniʻi kitautolu ke tau fai ha fili fakapotopoto pe ko hai te tau tauhí.

“Lotolotoua”—Anga-Fēfē?

ʻI hono tumuʻaki havilivilí, ʻoku fai ai ʻa e vakai mei Moʻunga Kāmeli ki he kotoa ʻo ʻIsilelí—mei he teleʻa ʻo Kīsoní ʻi lalo ki he Tahi Lahi (Tahi Metiteleniané) ofi maí ki he ngaahi moʻunga ʻo Lepanoní ʻi he tafatafaʻaki langi mamaʻo fakatokelaú.b Ka ʻi he hopo hake ʻa e laʻaá ʻi he ʻaho mahuʻinga ko ení, naʻe ʻi he tuʻunga fakalilifu ʻa e fonuá. Naʻe hā mai kuo teitei mate ʻa e fonua ko ia ne mahu ki muʻa ʻa ia naʻe foaki ʻe Sihova ki he fānau ʻa ʻĒpalahamé. Ko ha fonua ia he taimi ko ení naʻe pakukā ʻi he laʻā lahi fakaʻulia, ne maumauʻi ʻi he fakavalevale ʻa e kakai tonu ʻa e ʻOtuá! ʻI he fakatahataha mai ʻa e kakai ko iá, naʻe fakaofiofi atu ʻa ʻIlaisiā kia kinautolu ʻo ne pehē: “E fefe a hono fuoloa o hoo mou lotolotoua? Kabau koe Otua a Jihova, mou muimui kiate ia: bea kabau ko Beali, muimui kiate ia.”—1 Tuʻi 18:21, PM.

Ko e hā ʻa e ʻuhinga ʻa ʻIlaisiā ki he foʻi lea “lotolotoua”? Sai, ko e kakai ko iá naʻe ʻikai te nau ʻiloʻi naʻe pau ke nau fili ʻi he lotu kia Sihová pea mo e lotu kia Pēalí. Naʻa nau pehē ʻe lava ke nau fakatou maʻu ia—ʻe lava ke nau fakahōhōʻiaʻi ʻa Pēali ʻaki ʻenau ngaahi ouau kovi tōtuʻá pea kei kole pē ke maʻu ʻa e hōifua ʻa Sihova ko e ʻOtuá. Mahalo pē naʻa nau fakaʻuhinga ʻe tāpuakiʻi ʻe Pēali ʻenau ngaahi ngoué mo e fanga manú, lolotonga ia ʻe hanga ʻe “Jihova oe gaahi kau tau” ʻo maluʻi kinautolu ʻi he taú. (1 Samiuela 17:45, PM) Naʻe ngalo ʻia kinautolu ha foʻi moʻoni tefito—ko e moʻoni ʻa ia ʻoku kei ʻikai pē lava ke fakatokangaʻi ʻe he tokolahi he ʻahó ni—ʻoku ʻikai tali ʻe Sihova ke fio ʻa e lotu kiate iá mo ha toe lotu ki ha ʻotua kehe. ʻOkú ne kounaʻi pea ʻokú ne taau ke ʻoange kiate ia ʻa e līʻoa maʻataʻatā. Ko ha lotu pē kiate ia ʻa ia ʻoku fio mo ha toe faʻahinga lotu ʻoku taʻefakahōifua kiate ia, naʻa mo fakalielia!—Ekisoto 20:5.

Ko ia ko e kau ʻIsileli ko iá naʻa nau “lotolotoua” ʻo hangē ha tangata ʻoku feinga ke muimui ʻi ha hala ʻe ua ʻi he taimi pē taha. ʻOku fai ʻe he kakai tokolahi ʻa e fehālaaki meimei tatau he ʻahó ni, ʻi hono fakaʻatā ʻa e “ngaahi pēali” kehé ke hū māmālie ki heʻenau moʻuí, ʻo tekeʻi ki tafaʻaki ʻa e lotu ki he ʻOtuá! Ko e kōlenga mahino ʻa ʻIlaisiā ke tuku ʻa e lotolotouá ʻoku lava ke ne tokoniʻi kitautolu ke toe sivisiviʻi ʻetau ngaahi meʻa tonu ʻoku fakamuʻomuʻá pea mo ʻetau lotú.

Ko ha Sivi Mahuʻinga

Naʻe hoko atu ʻa ʻIlaisiā ʻo fokotuʻu ke fai ha sivi. Ko e siví naʻe faingofua. Naʻe fiemaʻu ki he kau taulaʻeiki Pēalí ke nau fokotuʻu ha ʻōlita pea hilifaki ki ai ha feilaulau; pea naʻe pau leva ke nau lotu ki honau ʻotuá ke ne tutu ʻa e afí. ʻE fai ʻe ʻIlaisiā ʻa e meʻa tatau. Naʻá ne pehē: “Ko e ʻotua ʻoku tali ʻaki ʻa e afi ko e ʻOtua pe ia.” Naʻe ʻiloʻi lelei ʻe ʻIlaisiā ʻa e ʻOtua moʻoní. Naʻe fuʻu mālohi ʻa ʻene tuí ʻo ʻikai ai te ne toumoua ʻi heʻene tuku ke kamata ʻa e kau palōfita ko ia ʻa Pēalí. Naʻá ne ʻoange ʻa e faingamālie kotoa pē ki hono kau feʻauhí, ʻo ne tuku ke nau fili ʻenau pulu tangata ke feilaulauʻakí pea nau ʻuluaki kole kia Pēali.c—1 Tuʻi 18:24, 25.

ʻOku ʻikai ke tau moʻui ʻi ha kuonga ʻo e ngaahi mana. Kae kehe, kuo ʻikai ke liliu ʻa Sihova. ʻE lava ke tau falala pau kiate ia ʻo hangē pē ko ʻIlaisiaá. Hangē ko ení, ʻi he ʻikai loto-tatau ʻa e niʻihi kehé mo e meʻa ʻoku akoʻi ʻe he Tohi Tapú, ʻoku ʻikai fiemaʻu ke tau manavasiʻi ʻi hono tuku ke nau hoko atu ʻo fakahaaʻi ʻa e meʻa ʻoku nau tui ki aí. ʻI he hangē ko ʻIlaisiaá, ʻe lava ke tau hanga ki he ʻOtua moʻoní ke ne fakaleleiʻi ʻa e meʻá. ʻOku tau fai ia ʻaki ʻa e falala, ʻo ʻikai kia kitautolu, ka ki heʻene Folofola fakamānavaʻí, ʻa ia ʻoku faʻufaʻu “ki he fakatonutonu” ʻo e ngaahi meʻá.—2 Timote 3:16.

Naʻe hoko atu ʻa e kau palōfita Pēalí ʻo fokotuʻu ʻenau feilaulaú pea ui ki honau ʻotuá. “ʻE Peali, tali mai” ko ʻenau toutou kalangá ia. Naʻa nau hokohoko fai pehē mei he ngaahi miniti ki he ngaahi houa. “Ka naʻe ʻikai ha leʻo, pea naʻe ʻikai ha taha ʻe tali mai,” ko e lau ia ʻa e Tohi Tapú. ʻI he hoʻataá naʻe kamata ke manukiʻi kinautolu ʻe ʻIlaisiā, ʻo ne lea fakaʻaluma atu ʻoku pau pē ʻoku fuʻu femoʻuekina ʻa Pēali ke fai mai ha tali kia kinautolu, ʻokú ne afe atu ke fakafiemālie, pe kuó ne mohe pea ʻoku fiemaʻu ke fafangu ia ʻe ha taha. “Mou kalanga leʻo lahi,” ko e ekinaki ia ʻa ʻIlaisiā ki he kau lotu loi ko iá. ʻOku hā mahino, naʻá ne vakai ki he lotu Pēali ko ení ko ha lotu loi taʻeʻuhinga, pea naʻá ne fiemaʻu ʻa e kakai ʻa e ʻOtuá ke nau sio ʻo ʻiloʻi ʻa ʻene loí.—1 Tuʻi 18:26, 27.

ʻI he tali ki aí, naʻe hoko ʻa e kau taulaʻeiki Pēalí ʻo toe hohaʻatuʻu ange, pea nau “kalanga leʻo lahi, pea nau fefoafoaʻi ʻaki ʻa e heleta mo e tao, he ko honau anga ia, kaeʻoua ke fetafei ʻa e toto ʻi honau sino.” Ka naʻe ʻikai hano ʻaonga! “Naʻe ʻikai ha leʻo, pea naʻe ʻikai ha taha ʻe tali, pea naʻe ʻikai ha taha ʻe tokanga mai.” (1 Tuʻi 18:28, 29) Ko e moʻoni, naʻe ʻikai ha Pēali. Ko ha foʻi faʻufaʻu ia naʻe fai ʻe Sētane ke tohoakiʻi mamaʻo ʻaki ʻa e kakaí meia Sihova. Pehē foki ʻi he taimí ni, ko hono fili ha pule kehe pē meia Sihová ʻe iku ia ki he siva ʻa e ʻamanakí, naʻa mo e mā.—Sāme 25:3; 115:4-8.

Ko e Talí

ʻI he hoʻatā efiafí, naʻe hoko ai ki he taimi ʻo ʻIlaisiaá. Naʻá ne fakaleleiʻi ha ʻōlita kia Sihova ʻa ia naʻe holoki, ʻo ʻikai ha veiveiua ko e holoki ʻe he ngaahi fili ʻo e lotu maʻá. Naʻá ne ngāueʻaki ʻa e ngaahi fuʻu maka ʻe 12, ʻi he fakamanatu nai ki he tokolahi ʻi he puleʻanga matakali ʻe 10 ʻo ʻIsilelí ko e Lao naʻe ʻoange ki he matakali kotoa ʻe 12 naʻe kei pau pē ke nau talangofua ki ai. Naʻá ne fokotuʻu leva ki ai ʻene feilaulaú pea lingi vaiʻi ʻa e meʻa kotoa pē, naʻe maʻu mai nai mei he Tahi Metiteleniane ofi maí. Naʻe aʻu ʻo ne keli ha luo takatakai ʻi he ʻōlitá, ʻo toe fakafonu vai foki mo ia. Hangē pē ko ʻene ʻoange ʻa e faingamālie kotoa pē ki he kau palōfita ʻa Pēalí, naʻá ne fai kia Sihova ʻa e meʻa kotoa pē naʻe fakatupu maumau—naʻe pehē ʻene falala ki hono ʻOtuá.—1 Tuʻi 18:30-35.

ʻI he maau ʻa e meʻa kotoa pē, naʻe fai ʻe ʻIlaisiā ha lotu. ʻI he fakaueʻiloto ʻa ʻene faingofuá, naʻe fakahaaʻi mahino ʻi he lotú ʻa e ngaahi meʻa naʻe fakamuʻomuʻa ʻe ʻIlaisiaá. Ko e meʻa muʻomuʻa tahá, naʻá ne loto ke ʻiloʻi ko Sihova, ʻo ʻikai ko e Pēali ko ení, ʻa e ‘ʻOtua ʻi Isilelí.’ Ko hono uá, naʻá ne loto ke ʻiloʻi ʻe he tokotaha kotoa ko hono ngafá tonu ko ʻene hoko ko e sevāniti ʻa Sihova; ko e lāngilangi mo e fakahīkihiki kotoa ʻoku totonu ke ʻalu ki he ʻOtuá. Fakaʻosí, naʻá ne fakahaaʻi naʻá ne kei tokanga pē fekauʻaki mo hono kakaí, he naʻá ne vēkeveke ke sio ki hono hanga ʻe Sihova ʻo “fakafoki mai honau loto.” (1 Tuʻi 18:36, 37) Neongo ʻa e meʻa fakamamahi kotoa pē kuo nau fakatupunga ʻi heʻenau taʻetuí, naʻe kei ʻofa pē ʻa ʻIlaisiā ʻia kinautolu. ʻI heʻetau ngaahi lotu ki he ʻOtuá, ʻe lava ke tau fakahāhā ʻa e tokanga meimei tatau ki he huafa ʻo e ʻOtuá, pea pehē ki he anga-fakatōkilaló mo e manavaʻofa ki he niʻihi kehe ʻoku nau fiemaʻu tokoní?

Ki muʻa he lotu ʻa ʻIlaisiaá, naʻe fifili nai ʻa e fuʻu kakai ʻi aí pe ʻe hoko ʻa Sihova ko ha foʻi loi fakasiva ʻamanaki hangē ko Pēalí. Kae kehe, ʻi he hili ʻa e lotú, naʻe ʻikai ha toe taimi ke fifili ai. ʻOku pehē ʻe he fakamatalá: “Naʻe toki to ʻa e afi ʻa Sihova, ʻo ne keina ʻa e feilaulau mo e fefie mo e maka mo e efu, pea ko e vai naʻe ʻi he luo naʻa ne emo hake.” (1 Tuʻi 18:38) Ko ha tali anga-kehe moʻoni ia! Pea naʻe anga-fēfē ʻa e tali ʻa e kakaí?

“Ko Sihova pe ʻa e ʻOtua! ko Sihova pe ʻa e ʻOtua!” ko ʻenau kalangá kotoa ia. (1 Tuʻi 18:39) Kuo iku ʻo nau sio ki he moʻoní. Kae kehe, naʻe teʻeki ai pē ke nau fakahāhā ha tui. Ko e moʻoni, ke fakahaaʻi ko Sihova ʻa e ʻOtua moʻoní hili e sio ki he ʻalu hifo ʻa e afi mei langi ʻi he tali ʻo ha lotú ʻoku ʻikai ko ha fakahāhā fēfē ia ʻo e tuí. Ko ia naʻe fiemaʻu ai ʻe ʻIlaisiā ʻa e meʻa lahi ange meia kinautolu. Naʻá ne kole ange ke nau fai ʻa e meʻa naʻe ʻosi totonu ke nau fai ʻi he ngaahi taʻu lahi ki muʻa angé—ko e talangofua ki he Lao ʻa Sihová. Naʻe pehē ʻe he Lao ʻa e ʻOtuá ko e kau palōfita loí mo e kau tauhi ʻaitolí ʻoku totonu ke fakapoongi kinautolu. (Teutalonome 13:5-9) Ko e kau taulaʻeiki Pēali ko ení ko e ngaahi fili taʻetoeveiveiua kinautolu ʻo e ʻOtua ko Sihová ʻa ia naʻa nau ngāue ʻosi fakakaukauʻi ʻo fakafepakiʻi ʻa ʻene ngaahi taumuʻá. Naʻa nau tuha mo ha meesi? Sai, ko e hā ʻa e meesi naʻe faifai ange pea fai ki he fānau tonuhia kotoa ko ia naʻe tutu moʻui ko e ngaahi feilaulau kia Pēalí? (Palovepi 21:13; Selemaia 19:5) ʻIkai, ko e kau tangata ko iá naʻe ʻikai te nau kei tuha mo e mēsí. Ko ia naʻe tuʻutuʻuni ai ʻa ʻIlaisiā ke fakapoongi kinautolu, pea ko e meʻa moʻoni ia naʻe faí.—1 Tuʻi 18:40.

ʻOku fakaangaʻi ʻe he kau fakaanga ʻe niʻihi ʻi he ʻaho ní ʻa e fakamulituku ki he sivi ko eni ʻi Moʻunga Kāmelí. ʻOku hohaʻa nai ʻa e niʻihi telia naʻa ngāueʻaki ia ʻe he kau mamahiʻi lotú ke fakatonuhiaʻi ʻaki ʻa e ngaahi tōʻonga fakamālohi ʻo e taʻemakātakiʻi fakalotú. Pea ko e meʻa fakamamahí, ʻoku lahi moʻoni ʻa e kau loto-māfana tōtuʻa fakalotu he ʻaho ní. Kae kehe, ko ʻIlaisiaá naʻe ʻikai ko ha tokotaha loto-māfana tōtuʻa ia. Naʻá ne ngāue maʻa Sihova ʻi hono fakahoko ha tautea totonu. ʻIkai ko ia pē, ʻoku ʻiloʻi ʻe he kau Kalisitiane moʻoní heʻikai lava ke nau muimui ʻi he ʻalunga ʻo ʻIlaisiaá ʻi hono tāmateʻi ʻa e fulikivanú. Hili e haʻu ʻa e Mīsaiá, ko e tuʻunga ki he kau ākonga kotoa ʻa Sīsuú ʻoku maʻu ia ʻi he ngaahi lea ʻa Kalaisi kia Pitá: “Fakafoki hoʻo heletā ki hono tuʻunga: he ʻilonga kinautolu ʻoku ala ki he heletā te nau mate heletā.” (Mātiu 26:52) ʻE ngāueʻaki ʻe Sihova ʻa hono ʻAló ke ne fakahoko ʻa e fakamaau totonu fakaʻotua ʻi he kahaʻú.

Ko e fatongia ʻo ha Kalisitiane moʻoni ke ne moʻuiʻaki ʻa e tuí. (Sione 3:16) Ko e founga ʻe taha ke fai pehē aí ko e faʻifaʻitaki ki he kau tangata faitōnunga ʻo hangē ko ʻIlaisiaá. Naʻá ne lotu maʻataʻatā kia Sihova pea uki ʻa e niʻihi kehé ke nau fai ʻa e meʻa tatau. Naʻá ne fakaeʻa loto-toʻa ʻa e loi ha lotu ʻoku ngāueʻaki ʻe Sētane ke ne tohoakiʻi mamaʻo ʻa e kakaí meia Sihova. Pea naʻá ne falala kia Sihova te ne fakaleleiʻi ʻa e ngaahi meʻá ka naʻe ʻikai te ne falala ki heʻene ngaahi malava mo e loto pē ʻoʻoná. Ko e moʻoni, naʻe tuʻu ʻa ʻIlaisiā maʻá e lotu maʻá. ʻOfa ke tau faʻifaʻitaki kotoa ki heʻene tuí!

[Fakamatala ʻi lalo]

[Fakamatala ʻi he peesi 20]

Ko hono fili ha pule kehe pē meia Sihová ʻe iku ia ki he siva ʻa e ʻamanakí

[Fakatātā ʻi he peesi 21]

“Ko Sihova pe ʻa e ʻOtua!”