ʻOkú Ke Tuli ki he ʻUlungaanga Leleí?

“Ka ai ha ʻulungaanga lelei, pea ka ai ha meʻa ʻoku fakamaloʻia, ko e ngaahi meʻa ia ke mou tokanga ki ai.”​—FILIPAI 4:8.

 1. Ko e hā ʻa e ʻulungaanga koví, pea ko e hā kuo ʻikai ai te ne ʻuliʻi ʻa e lotu ʻa Sihová?

KO E ʻulungaanga koví ko e tōlalo pe faihala fakaeʻulungaanga. ʻOku hūhū ia ʻi he maama ʻoku tau moʻui aí. (Efeso 2:​1-3) Kae kehe, ʻe ʻikai ke fakaʻatā ʻe he ʻOtua ko Sihová ke ʻuliʻi ʻa ʻene lotu maʻá. Ko e ngaahi tohi faka-Kalisitiané, ngaahi fakatahá, ngaahi ʻasemipilií, mo e ngaahi fakataha-lahí ʻoku nau ʻomai ʻa e ngaahi fakatokanga taimi tonu ʻo fakafepakiʻi ʻa e ʻulungaanga taʻemāʻoniʻoní. ʻOku tau maʻu ʻa e tokoni faka-Tohitapu lelei ke “pikitai ki he lelei” ʻi he ʻafio mai ʻa e ʻOtuá. (Loma 12:9) Ko ia ai, ʻi he tuʻunga ko ha kautahá, ʻoku feinga ʻa e Kau Fakamoʻoni ʻa Sihová ke maʻa, ʻulungaanga lelei. Ka ʻoku fēfē ʻa kitautolu ʻi he tuʻunga fakatāutahá? Ko hono moʻoní, ʻokú ke tuli ki he ʻulungaanga leleí?

 2. Ko e hā ʻa e ʻulungaanga leleí, pea ko e hā ʻoku fiemaʻu ai ʻa e feinga ke ʻulungaanga lelei maʻu ai peé?

² Ko e ʻulungaanga leleí ko e tuʻunga lelei ʻaupito, anga-lelei fakaeʻulungaanga, ngāue mo e fakakaukau totonu. ʻOku ʻikai ko ha ʻulungaanga ʻoku taʻengaue ka ko ha ʻulungaanga longomoʻui, mo pau. ʻOku ʻikai ke ngata pē ʻa e kau ki he ʻulungaanga leleí ʻa e fakaʻehiʻehi mei he angahalá; ʻoku ʻuhingá ke tuli ki he meʻa ʻoku leleí. (1 Timote 6:11) Naʻe enginaki ʻa e ʻaposetolo ko Pitá ki hono kaungā Kalisitiané: “Ke lava ʻi hoʻomou maʻu tui na ʻa e ʻulungaanga lelei.” Anga-fēfē? ʻAki ʻa hono “fai ʻe kimoutolu foki [ki he ngaahi talaʻofa mahuʻinga ʻa e ʻOtuá] homou tukuingata.” (2 Pita 1:5, fakaʻītali ʻamautolu.) Koeʻuhi ko hotau natula angahalaʻiá, ʻoku fiemaʻu ʻa e feinga moʻoni ia ke kei ʻulungaanga lelei maʻu ai pē. Neongo ia, naʻe fai pehē ʻa e faʻahinga tāutaha ia naʻe manavahē-ʻOtua ʻi he kuohilí, naʻa mo e ʻi he fehangahangai ko ia mo e ngaahi faingataʻaʻiaʻanga kāfakafá.

Naʻá Ne Tuli ki he ʻUlungaanga Leleí

 3. Ko e hā ʻa e ngaahi tōʻonga fulikivanu naʻe halaia ai ʻa Tuʻi ʻĀhasí?

³ ʻOku ʻi he ngaahi Konga Tohitapú ʻa e ngaahi fakamatala lahi fekauʻaki mo e faʻahinga naʻa nau tuli ki he ʻulungaanga leleí. Hangē ko ʻení, fakakaukau ange ki he tokotaha ʻulungaanga lelei ko Hesekaiá. Ko ʻene tamaí, ko Tuʻi ʻĀhasi ʻo Siutá, ʻoku hā mahino naʻá ne lotu kia Moloke. “Naʻe uofulu taʻu ʻa Ahasi ʻi heʻene kamata pule; pea naʻe hongofulu ma ono taʻu ʻene hau ʻi Selusalema: pea naʻe ʻikai te ne fai ʻa e meʻa naʻe hoa mo e finangalo ʻo Sihova ko hono ʻOtua, ʻo hange ko ʻene kui ko Tevita. Ka naʻa ne fou ʻi he ʻalunga ʻo e ngaahi Tuʻi Isileli, kaeʻumaʻa naʻa ne tuku hono foha ke ʻasi ʻi he afi, hange ko e fai fakalielia ʻa e hiteni, naʻe kapusi ʻe Sihova mei he ʻao ʻo haʻa Isileli. Naʻa ne fai feilaulau foki mo tutu inisenisi ʻi he ngaahi ʻesi mo e ngaahi sia, pea mo e lolo ʻakau mata kehekehe.” (2 Tuʻi 16:​2-4) ʻOku taukaveʻi ʻe he niʻihi ko e “ʻasi ʻi he afi” naʻá ne fakaʻilongaʻi ʻa e faʻahinga ʻo e fakamaʻa fakaeouaú kae ʻikai ko e feilaulau ʻaki e tangatá. Kae kehe, ko e tohi ko e Molech​—A God of Human Sacrifice in the Old Testament, naʻe fai ʻe John Day, ʻoku pehē ai: “ʻOku ʻi ai ʻa e fakamoʻoni ʻi he ngaahi maʻuʻanga fakamatala motuʻa faka-Kalisi mo faka-Loma pea fekauʻaki mo Carthage, pea pehē ki he fakamoʻoni fakaeʻāsioloki, ki he ʻi ai ʻa e feilaulauʻaki e tangatá . . . ʻi he māmani ʻo Kēnaní, pea ko ia ai ʻoku ʻikai ke ʻi ai ha ʻuhinga ke tālaʻa ai ki he ngaahi lave ʻa e Fuakava Motuʻá [ki he feilaulauʻaki e tangatá].” ʻIkai ko ia pē, ʻoku lave tefito ʻa e 2 Kalonikali 28:3 kia ʻĀhasi naʻá ne “tuku ʻene fanau ke ʻasi ʻi he afi.” (Fakafehoanaki mo Teutalonome 12:31; Sāme 106:​37, 38.) He ngaahi tōʻonga fulikivanu ē!

 4. Naʻe fēfē ʻa e tōʻonga ʻa Hesekaiá ʻi ha ʻātakai naʻe fonu ʻulungaanga kovi?

⁴ Naʻe anga-fēfē ʻa e fai lelei ʻa Hesekaia ia ʻi he ʻātakai fonu ʻulungaanga kovi ko ʻení? ʻOku mahuʻinga ʻa e Sāme hono 119, he ʻoku tui ʻa e niʻihi ko Hesekaia naʻá ne faʻu iá, ʻo ne fai ʻeni he lolotonga ʻene kei pilinisí. (Sāme 119:​46, 99, 100) Ko ia ʻoku fakahaaʻi nai ʻe he ngaahi leá ni ʻa e ngaahi tuʻunga naʻá ne ʻi aí: “Ko houʻeiki foki naʻa nau nofo, ʻo lauʻi au: Ka ka fakalaulauloto ʻe ho sevaniti ki hoʻo ngaahi fekau. ʻOku vaivai maha hoku laumalie he mafasia.” (Sāme 119:​23, 28) ʻI he takatakai kiate ia ʻa e kau lotu loí, naʻe hoko nai ai ʻa Hesekaia ko e lumaʻanga ʻa e kau mēmipa ʻo e lotoʻā fakatuʻí, ʻo lahi fau ʻo faingataʻa ai ke mohe. Ka, naʻá ne tuli ki he ʻulungaanga leleí, pea ʻi he faai mai ʻa e taimí ʻo ne hoko ko e tuʻí, pea “fai ʻe ia ʻa e meʻa naʻe hoa mo e finangalo ʻo Sihova . . . Naʻa ne falala kia Sihova ko e ʻOtua ʻo Isileli.”​—2 Tuʻi 18:​1-5.

Naʻa Nau Nofo ʻUlungaanga Lelei

 5. Ko e hā ʻa e ngaahi ʻahiʻahi naʻe fehangahangai mo Taniela mo hono ngaahi kaungāmeʻa ʻe toko tolú?

⁵ Naʻe faʻifaʻitakiʻanga lelei foki ʻi he ʻulungaanga leleí ʻa Taniela mo hono ngaahi kaungāmeʻa Hepelū ʻe toko tolú, naʻe fakahingoa ko ʻAnanaia, Misaeli, mo ʻAsalaia. Naʻe ʻave fakamālohi kinautolu mei honau fonuá ʻo fakaheeʻi ki Pāpilone. Naʻe ʻoange ki he kau talavou ko ʻeni ʻe toko faá ʻa e ngaahi hingoa faka-Pāpilone​—Pelitisasa, Setaleki, Mēsake, mo ʻApetenikō. Naʻe foaki kiate kinautolu ʻa e “ʻinasi ʻo e tuʻi,” ʻo kau ai ʻa e ngaahi meʻakai naʻe tapui ʻe he Lao ʻa e ʻOtuá. ʻIkai ngata aí, naʻe tuʻutuʻuni kiate kinautolu ke nau fai ha ako taʻu-tolu ʻo kau ki he “poto mo e lea ʻa e kau Kalitia.” Naʻe kau heni ʻa e meʻa lahi ange ia ʻi he ako pē ki ha toe lea ʻe taha, he ʻoku hangehangē ko e foʻi lea “Kalitia” hení ʻokú ne fakahaaʻi ʻa e kalasi ako māʻolunga. Ko ia, naʻe fakaeʻa atu ai ʻa e kau talavou Hepeluú ni ki he ngaahi akonaki fakahē faka-Pāpiloné.​—Taniela 1:​1-7.

 6. Ko e hā ʻoku malava ai ke tau pehē naʻe tuli ʻa Taniela ki he ʻulungaanga leleí?

⁶ Neongo ʻa e ngaahi tenge lahi fakaʻulia ke nau fai ha liliú, naʻe fili ʻa Taniela ia mo hono ngaahi kaungāmeʻa ʻe toko tolú ki he ʻulungaanga leleí kae ʻikai ko e ʻulungaanga koví. ʻOku pehē ʻi he Taniela 1:21: “Naʻe aʻu ʻa Taniela ki he ʻuluaki taʻu ʻo Kingi Kolesi.” ʻIo, “naʻe aʻu” ʻa Taniela ʻi hono tuʻunga ko ha sevāniti ʻulungaanga lelei ʻa Sihová ʻo laka hake ʻi he taʻu ʻe 80​—lolotonga ʻa e ʻalu hake mo e tō hifo ʻa e ngaahi tuʻi mālohi ʻe niʻihi. Naʻá ne nofo anga-tonu ki he ʻOtuá neongo ʻa e alēlea fakafufū mo e ngaahi faʻufaʻu ʻa e kau ʻōfisa fakapuleʻanga fulikivanú pea mo e ʻulungaanga kovi fakaefehokotaki fakasino naʻe hūhū ʻi he lotu faka-Pāpiloné. Naʻe hanganaki tuli pē ʻa Taniela ki he ʻulungaanga leleí.

 7. Ko e hā ʻoku lava ke ako mei he ʻalunga naʻe muimui ai ʻa Taniela mo hono ngaahi kaungāmeʻa ʻe toko tolú?

⁷ ʻOku lava ke tau ako ha meʻa lahi mei he manavahē-ʻOtua ʻa Taniela mo hono ngaahi kaungāmeʻá. Naʻa nau tuli ki he ʻulungaanga leleí pea nau fakafisi ke fakatatau ki he anga-fakafonua faka-Pāpiloné. Neongo ʻa hono ʻoange ʻo e ngaahi hingoa faka-Pāpiloné, naʻe ʻikai ʻaupito mole honau ʻiloʻiʻanga ko ia ko e kau sevāniti ʻa Sihová. He ʻi he hili ʻa e meimei taʻu ʻe 70, naʻe tō folofola ai ʻa e tuʻi Pāpiloné kia Taniela ʻo ngāueʻaki hono hingoa faka-Hepeluú! (Taniela 5:13) ʻI he kotoa ʻo ʻene moʻui fuoloá, naʻe fakafisi ʻa Taniela ke ʻulutukua ʻo aʻu ai pē ki he fanga kiʻi meʻa iikí. ʻI heʻene kei talavoú, naʻá ne ‘tuʻutuʻuni ʻi hono lotó ʻe ʻikai te ne tuku ke ʻuliʻiʻaki ia ʻa e ʻinasi ʻo e tuʻí.’ (Taniela 1:8) Ko e tuʻu taʻeʻulutukua ko ʻeni naʻe fai ʻe Taniela mo hono ngaahi kaungāmeʻa ʻe toko tolú ʻoku ʻikai ha toe veiveiua naʻe ʻai ai kinautolu ʻo nau mālohi ke hao atu ʻi he ngaahi ʻahiʻahi mātuʻaki fakatuʻutāmaki naʻa nau fehangahangai mo ia ki muí.​—Taniela, vahe 3 mo e 6.

Tuli ki he ʻUlungaanga Leleí he ʻAhó Ni

 8. ʻOku malava fēfē ke talitekeʻi ʻe he kau talavou Kalisitiané ʻa e fakatatau ki he māmani ʻo Sētané?

⁸ Hangē pē ko Taniela mo hono ngaahi kaungāmeʻa ʻe toko tolú, ko e kakai ʻa e ʻOtuá ʻi he ʻaho ní ʻoku nau talitekeʻi ʻa e fakatatau ko ia ki he māmani fulikivanu ʻa Sētané. (1 Sione 5:19) Kapau ko ha talavou Kalisitiane koe, mahalo pē ʻokú ke hokosia ha tenge mālohi mei he toʻumeʻá ke faʻifaʻitaki ange ki heʻenau ngaahi saiʻia tōtuʻa ʻi he valá, teuteú, mo e mūsiká. ʻI he ʻikai ke muimui ʻi he ākenga pe sitaila kotoa pē nai ʻoku haʻú, tuʻu ke maʻu, pea ʻoua te ke tuku koe ke ‘fakaangatatau ki he maama ko ení.’ (Loma 12:2) “Ke jiaki ae aga taefaka-Otua moe gaahi holi fakamama, ka tau moui aga fakabotoboto, mo maonioni, mo aga faka-Otua.” (Taitusi 2:​11, 12, PM) Ko e meʻa mahuʻingá ko hono tali ʻo ʻikai ʻe hoʻo ngaahi toʻumeʻá ka ʻe Sihová.​—Palovepi 12:2.

 9. Ko e hā ʻa e ngaahi tenge ʻoku fehangahangai nai mo e kau Kalisitiané ʻi he māmani pisinisí, pea ʻoku totonu ke fēfē ai ʻenau tōʻongá?

⁹ ʻOku toe fehangahangai foki ʻa e kakai lalahi Kalisitiané mo e ngaahi tenge pea kuo pau ke nau ʻulungaanga lelei mo kinautolu. ʻOku fakataueleʻi nai ʻa e kau tangata Kalisitiane pisinisí ke nau ngāueʻaki ʻa e ngaahi founga ʻoku fehuʻiá pe ko hono liʻaki ʻa e ngaahi tuʻutuʻuni ia ʻa e puleʻangá mo e ngaahi lao ki he tukuhaú. Kae kehe, tatau ai pē pe ʻoku fēfē ʻa e tōʻonga ia ʻa e kau feʻauʻauhi pisinisí pe kaungā-ngāué, ‘ko hotau lotó ke tāu ʻetau moʻuí ʻi he meʻa kotoa.’ (Hepelu 13:18) ʻOku fiemaʻu Fakatohitapu kitautolu ke tau faitotonu mo anga-totonu ki he faʻahinga ʻoku tau ngāue ki aí, faʻahinga ʻoku ngāue kiate kitautolú, kau kasitomá, mo e ngaahi puleʻanga fakamāmaní. (Teutalonome 25:​13-16; Mātiu 5:37; Loma 13:1; 1 Timote 5:18; Taitusi 2:​9, 10) ʻAi ke tau maau foki ʻi heʻetau ngaahi meʻa fakapisinisí. ʻI hono tauhi ʻa e ngaahi lēkooti totonu mo fai ʻa e ngaahi aleapaú ʻi he tohi, ʻoku malava ke faʻa taʻofi ai ʻa e ngaahi taʻefemahinoʻakí.

Hanganaki Tokanga!

10. Ko e hā ʻoku fiemaʻu ai ke hanganaki “tokaga” ʻi he taimi ʻoku tau fai ai ha fili fekauʻaki mo e mūsiká?

¹⁰ ʻOku fakaeʻa mai ʻe he Sāme 119:​9 (PM) ʻa e toe tafaʻaki ʻe taha ʻo e nofo ʻulungaanga lelei ʻi he ʻafio mai ʻa e ʻOtuá. Naʻe hiva ʻa e tokotaha-tohi-sāmé: “E fakamaa e he tagata talavou hono hala i he ha? i he ene tokaga ki ai o hage ko hoo folofola.” Ko e taha ʻo e ngaahi meʻatau ola lelei taha ʻa Sētané ko e mūsiká, ʻa ia ʻoku ʻi ai hono mālohi ke ne langaʻi ʻa e ngaahi ongoʻí. Ko e meʻa fakamamahí, kuo ʻikai ke hanganaki “tokaga” ʻa e kau Kalisitiane ʻe niʻihi ʻi he taimi ʻoku hoko mai ai ki he mūsiká, pea ʻoku nau ʻiloʻi ai kuo tohoaki kinautolu ʻo fuʻu tōtuʻa ki he ngaahi faʻahinga ʻo e meʻa ko iá, ʻo hangē ko e rap mo e heavy metal. ʻE fakakikihi nai ʻa e niʻihi ʻo pehē ko e faʻahinga mūsika ia ko iá ʻoku ʻikai uesia ai kinautolu ia pea ʻoku ʻikai te nau tokanga kinautolu ia ki hono ngaahi leá. ʻOku pehē ʻe he niʻihi kehe ia ʻoku nau mālieʻia pē kinautolu ʻi heʻene haʻuhaʻulú pe ko e ongo leʻo-lahi ʻa e ngaahi kītaá. Neongo ia, ki he kau Kalisitiané, ʻoku ʻikai ko e meʻa mahuʻingá ʻa e ongo mālie ʻo ha meʻa. ʻOku nau tokangá pe ko e meʻa ia ʻoku “hōifua ai ʻa e ʻEiki.” (Efeso 5:​10, fakaʻītali ʻamautolu.) ʻOku meimei moʻoni maʻu pē, ʻoku hanga ʻe he mūsika heavy metal mo e rap ʻo poupouʻi ʻa e ngaahi ʻulungaanga kovi hangē ko e anga-fakalielia, feʻauaki, pea naʻa mo e lotu faka-Sētané​—ʻa e ngaahi meʻa ʻoku ʻikai hano feituʻu ʻi he lotolotonga ʻo e kakai ʻa e ʻOtuá.a (Efeso 5:3) Taʻu siʻi pe taʻumotuʻa, ʻe lelei ki he tokotaha taki taha ʻo kitautolu ke fakakaukau ki he fehuʻi ko ʻení, ʻI heʻeku fili fekauʻaki mo e mūsiká, ʻoku ou tuli ai ki he ʻulungaanga leleí pe ko e ʻulungaanga koví?

11. ʻE malava fēfē ke hanganaki tokanga ha Kalisitiane ʻi he fekauʻaki mo e ngaahi polokalama televīsoné, ngaahi vitioó, mo e ngaahi faivá?

¹¹ ʻOku lahi ʻa e ngaahi polokalama televīsone, ngaahi vitiō, mo e ngaahi faiva ʻoku nau poupouʻi ʻa e ʻulungaanga koví. Fakatatau ki he tokotaha toketā mataotao tuʻu-ki-muʻa ki he ʻatamaí, ‘ko e fakakaukau ko e moʻuí ke fiefia peé, fehokotaki fakasinó, fakamālohí, mānumanú, mo e siokitá’ kuo nau puleʻi ʻa e lahi taha ʻo e ngaahi faiva ʻoku faʻu ʻi he ʻaho ní. Ko ia ai, ʻoku kau ʻi he hanganaki tokangá ʻa hono filifili ʻa e meʻa ʻoku tau fili ke mamata aí. Naʻe lotu ʻa e tokotaha-tohi-sāmé: “Leʻei hoku mata ke ʻoua te na sio ki he muna.” (Sāme 119:37) Naʻe ngāueʻaki ʻa e tefitoʻi moʻoni ko ʻení ʻe ha tokotaha Kalisitiane kei talavou ko hono hingoá ko Siosifa. ʻI he kamata ke hā maeʻeeʻa mai ʻi ha foʻi filimi ʻa e fehokotaki fakasinó mo e fakamālohí, naʻá ne mavahe mei he fale faivá. Naʻá ne ongoʻi mā ke fai ʻa e meʻá ni? “ʻIkai ʻaupito,” ko e lea ia ʻa Siosifá. “Naʻá ku ʻuluaki fakakaukau kia Sihova pea mo hono fakahōifuaʻi iá.”

Ko e Tuʻunga ʻo e Akó mo e Fakalaulaulotó

12. Ko e hā ʻoku fiemaʻu ai ʻa e ako fakafoʻituituí mo e fakalaulaulotó koeʻuhi ke tuli ki he ʻulungaanga leleí?

¹² ʻOku ʻikai feʻunga ke fakaʻehiʻehi pē mei he ngaahi meʻa ʻoku koví. Ko e tuli ki he ʻulungaanga leleí ʻoku toe kau ki ai ʻa e ako mo fakalaulauloto ki he ngaahi meʻa lelei ʻoku lēkooti ʻi he Folofola ʻa e ʻOtuá koeʻuhi ke ngāueʻaki ʻa ʻene ngaahi tefitoʻi moʻoni māʻoniʻoní ʻi he moʻuí. “ʻOi ʻeku ʻofa ki hoʻo lao na!” ko e kalanga ia ʻa e tokotaha-tohi-sāmé. “ʻOku ou fakalaulauloto ki ai he ʻaho kotoa.” (Sāme 119:97) ʻOku hoko ʻa e ako fakafoʻituitui ʻo e Tohitapú mo e ngaahi tohi faka-Kalisitiané ko ha konga ia ʻo hoʻo taimi-tēpile fakauiké? ʻOku moʻoni, ʻoku lava ke hoko ko ha pole ʻa hono ʻai ha taimi ki hono ako fakamākukanga ʻo e Folofola ʻa e ʻOtuá mo fakalaulauloto faʻa lotu ki aí. Ka ʻoku faʻa malava ke vaheʻi mai ha taimi mei he ngaahi ngāue kehé. (Efeso 5:​15, 16) Mahalo ko e ngaahi houa hengihengí ʻe lelei kiate koe ki he lotu, ako, mo e fakalaulaulotó.​—Fakafehoanaki mo Sāme 119:147.

13, 14. (a) Ko e hā ʻoku taʻealafakatataua ai ʻa e fakalaulaulotó? (e) Ko e fakalaulauloto ki he ngaahi konga Tohitapu fē ʻoku malava ai ke ne tokoniʻi kitautolu ke tau fakaliliʻa ʻi he fehokotaki fakasino taʻetāú?

¹³ ʻOku taʻealafakatataua ʻa e fakalaulaulotó, he ʻokú ne tokoniʻi kitautolu ke tau puke maʻu ʻa e meʻa ʻoku tau akó. Ko e meʻa ʻoku mahuʻinga angé, ʻoku lava ke tokoni ki hono pouaki ʻa e ngaahi vakai fakaʻotuá. Ke fakatātaaʻi: Ko e taha ia e meʻa ke ʻilo ʻoku tapui ʻe he ʻOtuá ʻa e feʻauakí ka ko e meʻa kehe ia ʻa e ‘fehiʻa ki he koví pea pikitai ki he leleí.’ (Loma 12:9) ʻOku lava ke tau ongoʻi moʻoni ʻa e anga ʻo e ongoʻi ʻa Sihova ʻo fekauʻaki mo e fehokotaki fakasino taʻetāú ʻaki ʻa e fakalaulauloto ki he ngaahi konga Tohitapu tefitó, hangē ko e Kolose 3:​5, ʻa ia ʻoku enginaki mai ai: “Ko ia mou ʻai ke mate leva homou ngaahi kupu ʻoku ʻi mamani, ko e feʻauaki, angaʻuli, havala, holi pango; kaeʻumaʻā ʻa e manumanu, ʻa ia ko e tauhi aitoli tofu pe ia.” ʻEke hifo kiate koe: ‘Ko e hā ʻa e faʻahinga holi pango kuo pau ke u ʻai ke maté? Ko e hā ʻoku totonu ke u fakaʻehiʻehi mei ai ʻa ia ʻokú ne langaʻi hake nai ʻa e holi taʻemaʻá? ʻOku ʻi ai ha ngaahi liliu ʻoku fiemaʻu ke u fai ʻi he founga ʻo ʻeku fakafeangai ki he fefiné pe tangatá?’​—Fakafehoanaki mo 1 Timote 5:​1, 2.

¹⁴ ʻOku naʻinaʻi mai ʻa Paula ki he kau Kalisitiané ke nau fakaʻehiʻehi mei he feʻauakí pea ngāueʻaki ʻa e mapuleʻi-kitá koeʻuhi ke “ʻoua naʻa ai hamou toko taha te ne halalotoʻapi ki hono kainga, ʻo fai kākā.” (1 Tesalonaika 4:​3-7) ʻEke hifo kiate koe: ‘Ko e hā ʻoku fai kākā ai ʻa e fai feʻauakí? Ko e hā ʻa e maumau te u fai kiate au tonu pe ki he tokotaha kehé kapau te u faiangahala ʻi he meʻá ni? ʻE uesia fakalaumālie, fakaeongo, mo fakaesino fēfē ai au? Fēfē ʻa e faʻahinga tāutaha ʻi he fakatahaʻangá ʻa ia kuo nau maumauʻi ʻa e lao ʻa e ʻOtuá pea kuo nau taʻefakatomalá? Ko e hā kuo hoko kiate kinautolú?’ Ko hono ʻai ki he lotó ʻa e meʻa ʻoku leaʻaki ʻe he ngaahi Konga Tohitapú ʻo fekauʻaki mo e ʻulungaanga peheé ʻoku malava ke fakalahi ai ʻetau fehiʻa ki he meʻa ʻoku kovi ʻi he vakai mai ʻa e ʻOtuá. (Ekisoto 20:14; 1 Kolinito 5:​11-13; 6:​9, 10; Kaletia 5:​19-21; Fakahā 21:8) ʻOku pehē ʻe Paula ko e tokotaha feʻauakí “ʻoku ʻikai ko e tangata ʻoku ne taʻetokaʻi, ka ko e ʻOtua.” (1 Tesalonaika 4:8) Ko hai ia ha Kalisitiane moʻoni te ne taʻetokaʻi ʻa ʻene Tamai fakahēvaní?

ʻUlungaanga Leleí mo e Feohí

15. Ko e hā ʻa e tuʻunga ʻoku kaunga ki ai ʻa e feohí ki heʻetau tuli ko ia ki he ʻulungaanga leleí?

¹⁵ Ko e tokoni ʻe taha ke kei nofo ʻulungaanga lelei aí ko e feohi lelei. Naʻe hiva ʻa e tokotaha-tohi-sāmé: “Ko e kaumeʻa au ʻo e kakai kotoa ʻoku ʻapasia atu [Sihova], mo e faʻahinga ʻoku tauhi ʻa e ngaahi enginaki aʻau.” (Sāme 119:63) ʻOku fiemaʻu kiate kitautolu ʻa e feohi lelei ʻoku tokonaki mai ʻe he ngaahi fakataha faka-Kalisitiané. (Hepelu 10:​24, 25) Kapau ʻoku tau fakamavaheʻi kitautolu, te tau hoko nai ʻo siokita ʻi heʻetau fakakaukaú, pea malava faingofua ai ke ikuʻi kitautolu ʻe he ʻulungaanga koví. (Palovepi 18:1) Kae kehe, ʻoku malava ʻe he feohi faka-Kalisitiane māfaná ʻo fakaivimālohi ʻetau fakapapau ke nofo ʻulungaanga lelei ai pē. Ko hono moʻoní, kuo pau ke tau toe maluʻi kitautolu mei he ngaahi feohi ʻoku koví. ʻOku malava ke tau loto-māfana ki hotau ngaahi kaungāʻapí, ngaahi kaungāngāué, mo e ngaahi kaungāakó. Ka ʻo kapau ʻoku tau laka fakapotopoto moʻoni, te tau fakaʻehiʻehi ai mei he hoko ʻo fuʻu ofi ki he faʻahinga ʻoku ʻikai te nau tuli ki he ʻulungaanga lelei faka-Kalisitiané.​—Fakafehoanaki mo Kolose 4:5.

16. ʻOku anga-fēfē ʻa e malava ke tokoni kiate kitautolu ʻa hono ngāueʻaki ʻa e 1 Kolinito 15:33 ke tuli ki he ʻulungaanga leleí ʻi he ʻahó ni?

¹⁶ Naʻe tohi ʻe Paula: “ʻOku maumauʻi ʻa e ngaahi ʻulungaanga lelei ʻe he faʻa talanoa kovi [“feohi koví,” NW].” ʻI hono fai ʻa e fakamatalá ni, naʻá ne fakatokanga ai ki he kau tuí ʻe lava ke mole ʻenau tuí ʻi he feohi ko ia mo e kau Kalisitiane lau pē, ʻa ia naʻa nau liʻaki ʻa e akonaki ʻa e Tohitapú ʻo fekauʻaki mo e toetuʻú. Ko e tefitoʻi moʻoni ʻi mui ʻi he fakatokanga ʻa Paulá ʻoku ngāueʻaki ia ki heʻetau ngaahi feohi fakatouʻosi ʻi tuʻa mo loto ʻi he fakatahaʻangá. (1 Kolinito 15:​12, 33) Ko hono moʻoní, ʻoku ʻikai te tau loto ke fakamamaʻo mei hotau ngaahi tokoua mo e ngaahi tuofāfine fakalaumālié koeʻuhi ko e ʻikai te nau hoko ʻo loto-tatau ki he niʻihi ʻo e ngaahi fakakaukau fakafoʻituitui ʻoku tau maʻú. (Mātiu 7:​4, 5; Loma 14:​1-12) Ka neongo ia, ʻoku fiemaʻu ʻa e tokangá kapau ʻoku ʻi ai ha niʻihi ʻi he fakatahaʻangá ʻoku kau ki ha ʻulungaanga ʻoku fehuʻia pe fakahāhā ha laumālie loto-kona pe anga-lāunga. (2 Timote 2:​20-22) ʻOku fakapotopoto ke nofo ofi ki he faʻahinga ʻa ia ʻoku lava ke tau fiefia ʻi he “fetokoniʻaki.” (Loma 1:​11, 12) ʻE tokoni ʻeni kiate kitautolu ke tau tuli ki ha ʻalunga ʻulungaanga lelei pea kei nofo ai pē ʻi he “hala ki he moʻui.”​—Sāme 16:11.

Hanganaki Tuli ki he ʻUlungaanga Leleí

17. Fakatatau ki he Nomipa vahe 25, ko e hā ʻa e mala naʻe tō ki he kau ʻIsilelí, pea ko e hā ʻa e lēsoni ʻoku tokonaki mai ʻe he meʻá ni maʻatautolú?

¹⁷ Ki muʻa siʻi pē pea maʻu ʻe he kau ʻIsilelí ʻa e Fonua ʻo e Talaʻofá, naʻe fili ʻa e laui afe ia ʻo kinautolu ke tuli ki he ʻulungaanga koví​—pea tofanga ai ʻi he mala. (Nomipa, vahe 25) ʻI he ʻahó ni, ʻoku tuʻu ʻa e kakai ʻa Sihová ʻi he hūʻanga ki he maama foʻou māʻoniʻoní. Ko e hū ki aí ʻe hoko ia ko e monū kuo tapuekinaʻi ʻo e faʻahinga ʻoku hokohoko atu ʻenau siʻaki ʻa e ngaahi ʻulungaanga kovi ʻo e maama ko ʻení. ʻI he tuʻunga ko e faʻahinga taʻehaohaoa ʻo e tangatá, ʻoku tau maʻu nai ʻa e ngaahi hehema fehālaaki, ka ʻoku malava ke tokoniʻi kitautolu ʻe he ʻOtuá ke tau muimui ki he ngaahi tataki māʻoniʻoni ʻa hono laumālie māʻoniʻoní. (Kaletia 5:16; 1 Tesalonaika 4:​3, 4) Ko ia ai, ʻai ke tau tokanga ki he enginaki ʻa Siosiua ki ʻIsilelí: “ʻApasia kia Sihova, pea tauhi lototo mo moʻoni kiate ia.” (Siosiua 24:14) Ko e manavahē anga-ʻapasia ki hano taʻefakahōifuaʻi ʻa Sihová ʻe tokoni ia kiate kitautolu ke tau tuli ki ha ʻalunga ʻulungaanga lelei.

18. ʻI he fekauʻaki mo e ʻulungaanga koví mo e ʻulungaanga leleí, ko e hā ʻoku totonu ke fakapapauʻi ʻe he kau Kalisitiané kotoa?

¹⁸ Kapau ko e holi ia ho lotó ke fakahōifuaʻi ʻa e ʻOtuá, ʻai ke fakapapauʻi ke tokanga ki he enginaki ʻa Paulá: “ʻIlonga ʻa e ngaahi meʻa ʻoku moʻoni, ʻilonga ʻa e ngaahi meʻa ʻoku tāu, ʻilonga ʻa e ngaahi meʻa ʻoku totonu, ʻilonga ʻa e ngaahi meʻa ʻoku maʻa, ʻilonga ʻa e ngaahi meʻa ʻoku fakaʻofoʻofa, ʻilonga ʻa e ngaahi meʻa ʻoku ongoongolelei, ʻio, ka ai ha ʻulungaanga lelei, pea ka ai ha meʻa ʻoku fakamaloʻia, ko e ngaahi meʻa ia ke mou tokanga ki ai.” Kapau te ke fai ʻeni, ko e hā ʻa e ola ʻe maʻu aí? Naʻe pehē ʻe Paula: “Ko e ngaahi meʻa ko ia ke mou fai; pea ʻe toki ʻiate kimoutolu ʻa e ʻOtua ʻoku aʻana ʻa e nonga.” (Filipai 4:​8, 9) ʻIo, ʻaki ʻa e tokoni ʻa Sihová ʻe malava ai ke ke siʻaki ʻa e ʻulungaanga koví pea tuli ki he ʻulungaanga leleí.

[Fakamatala ʻi lalo]

Ngaahi Poini ke Fakamanatu

◻ Ko e hā ʻoku fiemaʻú koeʻuhi ke tuli ki he ʻulungaanga leleí?

◻ ʻI he malumalu ʻo e ngaahi tuʻunga fē naʻe ʻulungaanga lelei ai pē ʻa Hesekaia, Taniela, mo e kau Hepelū ʻe toko tolú?

◻ ʻE lava fēfē ke tau hangē ko Tanielá ʻo talitekeʻi ʻa e ngaahi filioʻi ʻa Sētané?

◻ Ko e hā kuo pau ai ki he kau Kalisitiané ke nau hanganaki tokanga ʻi he fekauʻaki mo e fakafiefiá?

◻ Ko e hā ʻa e tuʻunga ʻoku kaunga ki ai ʻa e akó, fakalaulaulotó, mo e feohí ki he tuli ko ia ki he ʻulungaanga leleí?

[Fakatātā ʻi he peesi 15]

Naʻe tuli ʻa Hesekaia heʻene kei siʻí ki he ʻulungaanga leleí neongo naʻe takatakai kiate ia ʻa e kau lotu ʻa Moloké

[Fakatātā ʻi he peesi 17]

Kuo pau ke hanganaki tokanga ʻa e kau Kalisitiané ʻi he taimi ʻoku hoko mai ai ki he fakafiefiá