ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Ua Tuʻí

KO E tohi Fakatohitapu ʻa Ua Tuʻí ko e hoko atu ia ʻi he meʻa naʻe ngata ai ʻa e tohi ʻa ʻUluaki Tuʻí. Ko ha fakamatala ia ʻo e ngaahi tuʻi ʻe 29​—ʻa ia ko e 12 mei he puleʻanga fakatokelau ʻo ʻIsilelí pea toko 17 mei he puleʻanga fakatonga ʻo Siutá. ʻOku toe fakamatala ʻa e Ua Tuʻí ki he ngaahi ngāue ʻa e kau palōfita ko ʻIlaisiā, ʻIlaisa pea mo ʻAisea. Neongo ʻoku ʻikai ke fuʻu fakahokohoko totonu, ʻoku aʻu mai ʻa e lēkōtí ia ki he taimi ʻo e fakaʻauha ʻo Samēlia mo Selusalemá. Ko hono fakakātoá, ʻoku kāpui ʻe he Ua Tuʻí ʻa e vahaʻa taimi ko e taʻu ʻe 340​—mei he 920 K.M. ki he 580 K.M. ʻi he taimi naʻe kakato ai hono hiki ʻe he palōfita ko Selemaiá ʻa e tohí ni.

ʻOku mahuʻinga fēfē ʻa e Ua Tuʻí kiate kitautolú? Ko e hā ʻokú ne akoʻi mai kiate kitautolu ʻo fekauʻaki mo Sihova pea mo ʻene ngaahi ngāué? Ko e hā ʻa e ngaahi lēsoni ʻe lava ke tau ako mei he ngaahi ngāue ʻa e ngaahi tuʻí, kau palōfitá pea mo e niʻihi kehe ʻoku lave ki ai ʻi he tohí? Tau vakai angé ki he meʻa ʻe lava ke tau ako mei he Ua Tuʻí.

FETONGI ʻE ʻILAISA ʻA ʻILAISIĀ

(2 Tuʻi 1:1–​8:​29)

Ko tuʻi ʻAhasaia ʻo ʻIsilelí ʻokú ne faingataʻaʻia ʻi haʻane tō ʻi hono ʻapí pea ʻokú ne puke. ʻOkú ne ʻeke ki he palōfita ko ʻIlaisiā peá ne maʻu ha fakatokanga te ne mate. ʻOku mate ʻa ʻAhasaia, pea ʻoku hoko hake ki he taloní ʻa hono tokoua ko Siholamé. Lolotonga iá, ʻoku tuʻi ʻa Sihosafate ʻi Siuta. ʻOku ʻohake ʻa ʻIlaisiā ʻi ha ʻahiohio, pea ko hono tokoní, ʻa ʻIlaisa, ʻokú ne fetongi ia ko ha palōfitá. Lolotonga ʻa e taʻu nai ʻe 60 ʻo ʻene ngāue fakafaifekau hono hokó, ʻoku fakahoko ʻe ʻIlaisa ʻa e ngaahi mana lahi.​—Sio ki he puha “Ngaahi Mana ʻa ʻIlaisá.”

ʻI ha fakafepaki ha tuʻi Mōape ki ʻIsilelí, ko Siholame, Sihosafate pea mo e tuʻi ʻo ʻĪtomí ʻoku nau ō atu ke fetaulaki mo ia ʻi he taú. ʻOku ʻoange kiate kinautolu ʻa e ikuna koeʻuhi ko e faitōnunga ʻa Sihosafaté. Ki mui ai, ʻoku palaniʻi ʻe he tuʻi ʻo Sīliá ha ʻohofi fakaʻohovale ki ʻIsileli. Kae kehe, ʻoku fakafehālaakiʻi ʻe ʻIlaisa ʻa e palaní. ʻOku ʻita ʻa e tuʻi Sīliá pea ʻokú ne fekauʻi atu “ha tau hoosi, mo ha tau saliote, mo ha fuʻu kongakau” ke puke ʻa ʻIlaisa. (2 Tuʻi 6:​14) ʻOku fakahoko ʻe ʻIlaisa ha ongo mana ʻo ne fakafoki melino ai ʻa e kau Sīliá. ʻI he faai mai ʻa e taimí, ʻoku ʻākoloʻi ʻe he Tuʻi Sīlia  ko Peni-hetatí ʻa Samēlia. ʻOku iku eni ki ha honge lahi, ka ʻoku tomuʻa tala ʻe ʻIlaisa ʻe ngata ʻa e hongé.

ʻI ha taimi ki mui ai, ʻoku ʻalu ʻa ʻIlaisa ki Tāmasikusi. Ko Tuʻi Peni-hetati, ʻa ia ʻoku puke he taimi ní, ʻokú ne fekauʻi atu ʻa Hesaeli ke ʻeke pe te ne toe ake mei he puké. ʻOku tomuʻa tala ʻe ʻIlaisa ʻe mate ʻa e tuʻí pea ʻe pule leva ʻa Hesaeli ʻo fetongi ia. ʻI he ʻaho pē hono hokó, ʻoku fakafulutāmakiaʻi ai ʻe Hesaeli ʻa e tuʻí ʻaki ha “sipi matolu” viviku ʻo ne maʻu ai ʻa e tuʻunga-tuʻí. (2 Tuʻi 8:​15) ʻI Siuta, ʻoku hoko ai ʻa e foha ʻo Sihosafate ko Siholamé ʻo tuʻi, pea ʻoku fetongi ia ʻe hono foha ko ʻAhasaiá.​—Sio ki he puha “Ngaahi Tuʻi ʻo Siuta mo ʻIsilelí.”

Tali ki he Ngaahi Fehuʻi Fakatohitapú:

2:9​—Ko e hā naʻe kole ai ʻe ʻIlaisa ki ha ‘ʻinasi lōua mei he laumālie ʻo ʻIlaisiaá’? Ke fakahoko ʻa e fatongia ʻi he tuʻunga ko ha palōfita ki ʻIsilelí, ʻe fiemaʻu kia ʻIlaisa ʻa e laumālie tatau naʻe fakahāhā ʻe ʻIlaisiaá, ʻa e loto-toʻá mo e taʻeilifiá. ʻI hono ʻiloʻi ení, naʻe kole ai ʻe ʻIlaisa ki ha konga ʻe ua mei he laumālie ʻo ʻIlaisiaá. Naʻe fili ʻe ʻIlaisiā ʻa ʻIlaisa ko hono fetongi pea kuó ne hoko ko hono fakafeʻao ʻi he taʻu ʻe ono, ko ia naʻe vakai ʻa ʻIlaisa kia ʻIlaisiā ʻo hangē ia ko haʻane tamai fakalaumālié; naʻe hangē ʻa ʻIlaisa ko ha ʻuluaki foha fanauʻi fakalaumālie ia ʻo ʻIlaisiaá. (1 Tuʻi 19:​19-​21; 2 Tuʻi 2:​12) Ko ia ai, ʻi he hangē tofu pē ko hono maʻu ʻe ha ʻuluaki-fānaú ha konga ʻe ua ʻo e tofiʻa ʻo ʻene tamaí, naʻe kole pea maʻu ai ʻe ʻIlaisa ʻa e konga ʻe ua ʻo e tofiʻa fakalaumālie meia ʻIlaisiaá.

2:​11​—Ko e hā ʻa e “langi” naʻe “ʻohake ʻa Ilaisia” ki ai “ʻe he ʻahiohio”? Naʻe ʻikai ko e ngaahi konga mamaʻo ʻeni ia ʻo e ʻuniveesi fakamatelié pe ko e feituʻu fakalaumālie ʻoku nofo ai ʻa e ʻOtuá mo hono ngaahi foha fakaeʻāngeló. (Teutalonome 4:​19; Sāme 11:4; Mātiu 6:9; 18:10) Ko e “langi” naʻe ʻohake ki ai ʻa ʻIlaisiaá ʻa e ngaahi langi fakaeʻatimosifiá. (Sāme 78:26; Mātiu 6:​26) ʻI he fononga vave ʻi he ʻatimosifia ʻo e foʻi māmaní, ʻoku hā mahino naʻe ʻave ʻe he saliote afí ʻa ʻIlaisiā ki ha feituʻu ʻe taha ʻo e foʻi māmaní, ʻa ia naʻá ne hokohoko moʻui atu ai ʻi ha taimi. Ko hono moʻoní, ʻi ha ngaahi taʻu ki mui ai, naʻe fai ai ʻe ʻIlaisiā ha tohi kia Siholame, ʻa e tuʻi ʻo Siutá.​—2 Kalonikali 21:​1, 12-​15.

5:​15, 16​—Ko e hā naʻe ʻikai tali ai ʻe ʻIlaisa ʻa e meʻaʻofa ʻa Neamaní? Naʻe ʻikai tali ʻe ʻIlaisa ʻa e meʻaʻofá koeʻuhi naʻá ne ʻiloʻi ko e mana ʻo hono fakamoʻui ʻo Neamaní naʻe fakahoko ia ʻaki ʻa e mālohi ʻo Sihová, ʻo ʻikai ko hoʻoná. ʻE ʻikai ʻaupito haʻane teitei fakakaukau ke maʻu haʻane tupu mei heʻene ngāue kuo vaheʻi fakaʻotua angé. Ko e kau lotu-moʻoni he ʻaho ní ʻoku ʻikai ke nau kakapa atu ke maʻu ha tupu fakafoʻituitui mei he ngāue ʻa Sihová. ʻOku nau tukulotoʻi ʻa e ekinaki ʻa Sīsuú: “Kuo mou maʻu taʻetotongi pea mou ʻatu taʻetotongi.”​—Mātiu 10:8.

5:​18, 19​—Naʻe kole nai ʻa Neamani ki ha fakamolemole ʻi he pau ko ia ke ne kau atu ʻi ha ouau fakalotú? ʻOku hā mahino naʻe motuʻa pea vaivai ʻa e tuʻi Sīliá pea naʻe pau ke ne falala atu kia Neamani ki ha tokoni. ʻI he taimi naʻe punou hifo ai ʻa e tuʻí ʻi he lotu kia Līmoní, naʻe fai pehē foki mo Neamani. Kae kehe, naʻe punou hifo ʻa Neamani, koeʻuhí pē ko e taumuʻa ke tokoniʻi ʻa e sino ʻo e tuʻí ka naʻe ʻikai koeʻuhí ke ne fakahoko ai ha lotu. Naʻe kole ʻe Neamani kia Sihova ke fakamolemoleʻi ia ʻi hono fakahoko ʻa e fatongia fakapuleʻanga ko ení. ʻI he tui kia Neamaní, naʻe tala ange ʻe ʻIlaisa kiate ia: “ʻAlu, ʻo fiemalie pe.”

Ngaahi Lēsoni kia Kitautolu:

1:​13, 14. ʻI he ako mei hono vakaiʻi mo e ngāue ʻi he anga-fakatōkilaló ʻe lava ke ne fakahaofi ha ngaahi moʻui.

2:​2, 4, 6. Neongo naʻe hoko ʻa ʻIlaisa ko e fakafeʻao ia ʻo ʻIlaisiā ʻi he taʻu nai ʻe ono, naʻá ne fakamatematē ke ʻoua ʻe liʻaki ia. He faʻifaʻitakiʻanga lelei ē ʻo e mateakí mo e tuʻunga fakakaumeʻá!​—Palovepi 18:24.

2:​23, 24. Ko e ʻuhinga tefito ki he manukiʻi ko ʻeni ʻo ʻIlaisá ʻoku hā ngali koeʻuhí he naʻe tui ʻe ha tangata ʻulu tula ʻa e pulupulu fakaʻofisiale ʻo ʻIlaisiaá. Naʻe ʻiloʻi ʻe he fānaú ʻa ʻIlaisa ko e fakafofonga ia ʻo Sihová pea naʻe ʻikai pē ke nau loto kinautolu ke ne ʻi honau lotolotongá. Naʻa nau tala ange kiate ia ke ne “Alu hake,” ʻa ia ko hono ʻuhingá, ke ne ʻalu hake ai pē ki Pēteli pe ʻalu hake ki he feituʻu naʻe ʻi ai ʻa ʻIlaisiaá. ʻOku hā mahino naʻe tapua atu ʻe he fānaú ʻa e fakakaukau fakafili ʻo ʻenau ngaahi mātuʻá. He meʻa mahuʻinga moʻoni ki he ngaahi mātuʻá ke akoʻi ʻenau fānaú ke fakaʻapaʻapa ki he kau fakafofonga ʻo e ʻOtuá!

3:​14, 18, 24. ʻOku hoko ʻo moʻoni maʻu pē ʻa e folofola ʻa Sihová.

3:​22. Ko e tapua ko ia ʻa e maama hengihengí naʻá ne fakatupunga ʻa e fakakaukau hala ʻo pehē naʻe toto ʻa e vaí, mahalo koeʻuhí he naʻe ʻi he kelekele he ngaahi fakatafenga naʻe toki keli foʻoú ʻa e ʻumea kula. ʻE fili nai ʻe Sihova ke ngāueʻaki ha meʻa fakanatula ke fakahoko ʻene ngaahi taumuʻá.

4:​8-​11 (PM). ʻI hono ʻiloʻi ʻa ʻIlaisa ko ha “tagata maonioni eni oe Otua,” naʻe fakaaʻu atu ʻe ha fefine ʻi Sūnemi ha anga-talitali kakai kiate ia. ʻIkai ʻoku totonu ke tau fai ʻa e meʻa tatau ki he kau lotu faitōnunga ʻa Sihová?

5:3. Naʻe tui ʻa e kiʻi taʻahine ʻIsilelí ki he malava ʻa e ʻOtuá ke fakahoko ha ngaahi maná. Naʻá ne toe maʻu foki ʻa e loto-toʻa ke lea ʻo fekauʻaki mo ʻene tuí. ʻOku mou feinga kau talavou ke fakafefekaʻi hoʻomou tui ki he ngaahi talaʻofa ʻa e ʻOtuá pea langaʻi ha loto-toʻa ke vahevahe atu ʻa e moʻoní ki hoʻomou kau faiakó pea mo e kaungāakó?

5:​9-​19. ʻIkai ʻoku fakahāhā ʻe he faʻifaʻitakiʻanga ʻa Neamaní ʻe lava ʻe ha tokotaha pōlepole ʻo ako ke anga-fakatōkilalo?​—1 Pita 5:5.

5:​20-​27. He nunuʻa kovi ē ʻe utu ʻi he feinga ke moʻuiʻaki ʻa e loí! Ko e fakakaukau fakalelei ki he loto-mamahi mo e tuʻutāmaki fakafoʻituitui ʻe lava ke ʻomi ʻi he moʻui ʻi ha moʻui lōuá te ne tokoniʻi ai kitautolu ke fakaʻehiʻehi mei he faʻahinga ʻalunga peheé.

FAKAHEEʻI ʻA ʻISILELI MO SIUTA

(2 Tuʻi 9:1–​25:30)

ʻOku pani ʻa Sehu ko e tuʻi ki ʻIsileli. ʻOku ʻikai ke ne toe tatali ʻi hono fakahoko ʻa e feingangāue ke taaʻi ʻa e fale ʻo ʻĒhapí. ʻOku ‘fakaʻauha ʻe Sehu ʻa e lotu kia Pēalí mei ʻIsileli’ ʻi ha founga pōtoʻi. (2 Tuʻi 10:​28, NW) ʻI he ʻiloʻi kuo tāmateʻi ʻa hono fohá ʻe Sehú, ko e faʻē ʻa ʻAhasaiá, ʻa ʻAtalaia, ‘ʻokú ne tuʻu hake ke fakaʻauha ʻa e kotoa ʻo e fānau ʻi he puleʻanga ʻo Siutá’ pea mo puketuʻu ʻa e taloní. (2 Tuʻi 11:​1, NW) Ko e kiʻi foha kei pēpē pē ʻo ʻAhasaiá, ʻa Sōasi, ʻoku fakahaofi pea ʻi he hili ʻa e toitoi ʻi ha taʻu ʻe ono ʻoku fakanofo tuʻi ia ki Siuta. ʻI hono fakahinohinoʻi ʻe he taulaʻeiki ko Sihoiatá, ʻoku hokohoko atu ʻa Sōasi ke fai ʻa e meʻa ʻoku totonu ʻi he vakai ʻa Sihová.

Hili ʻa Sehú, ko e kotoa ʻo e ngaahi tuʻi ʻoku nau puleʻi ʻa ʻIsilelí ʻoku nau fai ʻa e meʻa ʻoku kovi ʻi he vakai ʻa Sihová. ʻOku mate ʻa ʻIlaisa ʻi ha mate fakaenatula ʻi he taimi ʻo e mokopuna tangata ʻo Sehú. Ko e tuʻi Siuta hono fā ʻoku hoko ʻia Sōasí ko ʻĀhasi, pea ʻoku ʻikai ‘te ne fai ʻa e meʻa naʻe hoa mo e finangalo ʻo Sihová.’ (2 Tuʻi 16:​1, 2) Kae kehe, ko hono foha ko Hesekaiá, ʻokú ne fakamoʻoniʻi ko ha tuʻi ia ʻoku ‘pikitai kia Sihova.’ (2 Tuʻi 17:20; 18:6) ʻI he 740 K.M., ʻi he taimi ʻoku tuʻi ai ʻa Hesekaia ki Siuta pea tuʻi ʻa Hōsea ki ʻIsilelí, ko e tuʻi ʻAsīlia ko Salimanesá ʻokú ne ‘taki pōpula ʻa Samēlia pea taki atu ʻa ʻIsileli ʻo fakaheeʻi ki ʻAsīlia.’ (2 Tuʻi 17:​6, NW) Ko ia ai, ʻoku ʻomi ʻa e kau mulí ki he feituʻu ʻo ʻIsilelí, pea ʻoku fanauʻi ai ʻa e lotu faka-Samēliá.

ʻI he ngaahi tuʻi ʻe toko fitu ʻoku nau hoko atu ʻia Hesekaia ʻi Siutá, ko Siosaia pē ʻokú ne fakahoko ʻa e ngāue ke toʻo fakaʻaufuli mei he fonuá ʻa e lotu loí. ʻOku iku mai pē ʻi he 607 K.M., ʻo maʻu ai ʻe he kau Pāpiloné ʻa Selusalema pea ‘ʻoku [fakaheeʻi] ʻa Siuta mei hono kelekelé.’​—2 Tuʻi 25:21.

Tali ki he Ngaahi Fehuʻi Fakatohitapú:

13:​20, 21​—ʻOku poupouʻi ʻe he mana ko ʻení ʻa hono fakalāngilangiʻi ʻo e ngaahi meʻa-tauhi-fakamanatu fakalotú? ʻIkai, ʻoku ʻikai ke ne poupouʻi ʻe ia. ʻOku ʻikai fakahaaʻi ia ʻe he Tohi Tapú naʻe ʻi ai hano fakalāngilangiʻi ʻe taha ʻa e ngaahi hui ʻo ʻIlaisá. Ko e mālohi ia ʻo e ʻOtuá naʻá ne ʻai ʻo malava ʻa e mana ko ʻení, ʻo hangē ko ia naʻe hoko ʻi he kotoa ʻo e ngaahi mana naʻe fakahoko ʻe ʻIlaisa ʻi he taimi naʻá ne kei moʻui aí.

15:​1-6​—Ko e hā naʻe taaʻi ai ʻe Sihova ʻa ʻAsalaia (ʻŪsaia, 15:​6, NW, fakamatala ʻi laló) ʻaki ʻa e kiliá? “Ka ʻi heʻene mālohi [ʻa ʻŪsaia] naʻe mahiki hono loto, . . . pea ne hia kia Sihova ko hono ʻOtua, he naʻa ne hu ki he Temipale ʻo e ʻEiki ke tutu inisenisi ʻi he olita tutuʻanga-inisenisi.” ʻI he taimi naʻe “tuʻu ke taʻofi ʻa Kingi Usaia” ʻe he kau taulaʻeikí pea nau tala ange kiate ia ke “meʻa atu mei he Potu Tapu,” naʻá ne hoko ʻo ʻita ki he kau taulaʻeikí pea naʻe taaʻi ia ʻaki ʻa e kiliá.​—2 Kalonikali 26:​16-​20.

18:​19-​21, 25​—Naʻe fai nai ʻe Hesekaia ha talite mo ʻIsipite? ʻIkai. Ko e tukuakiʻi naʻe fai ʻe Lapisaké naʻe loi ia, ʻa ia naʻá ne taukaveʻi ne ne maʻu ʻa e “[mafai] ʻa Sihova.” Ko Tuʻi Hesekaia faitōnungá naʻá ne falala tāfataha pē kia Sihova.

Ngaahi Lēsoni kia Kitautolu:

9:​7, 26. Ko hono fakamāuʻi mamafa ʻo e fale ʻo ʻĒhapí ʻoku fakahaaʻi ai ko e lotu loí pea mo hono lilingi e toto ʻo e taʻehalaiá ʻoku fakalielia ia kia Sihova.

9:​20. Ko e ongoongo ʻo Sehu ʻi he tuʻunga ko ha tokotaha fakaʻuli saliote vavé naʻe ʻoatu ai ʻa e fakamoʻoni ʻo ʻene faivelenga ʻi hono fakahoko ʻo e ngāue naʻe vaheʻi kiate iá. ʻOku ʻiloa koe ko ha tokotaha fanongonongo faivelenga ʻo e puleʻangá?​—2 Timote 4:2.

9:​36, 37; 10:17; 13:​18, 19, 25; 14:25; 19:​20, 32-​36; 20:​16, 17; 24:13. ʻE lava ke tau falala-pau ko e ‘lea ʻoku ʻalu atu mei he ngutu ʻo Sihová ʻoku pau maʻu pē ʻene lavameʻá.’​—Aisea 55:​10, 11, NW.

10:15. Hangē pē ko hono tali ʻaufuatō ʻe Sionatapi ʻa e fakaafe ʻa Sehu ke heka hake ki he salioté fakataha pea mo iá, ʻoku poupou loto-lelei ʻa e “fuʻu kakai lahi” kia Sīsū Kalaisi, ʻa e Sehu ʻi onopōní pea mo hono kau muimui paní.​—Fakahā 7:9.

10:​30, 31. Neongo ko e lēkooti ʻo Sehú naʻe ʻikai ke taʻehanomele, naʻe fakahāhā ʻe Sihova ʻa e houngaʻia ʻi he meʻa kotoa naʻá ne faí. Ko e moʻoni, ‘talaʻehai ʻoku fai taʻetotonu ʻa e ʻOtuá ke ne fakangaloʻi ʻetau ngāué.’​—Hepelu 6:​10.

13:​14-​19. Koeʻuhi naʻe ʻikai feinga mālohi ʻa e mokopuna tangata ʻo Sehú ʻa Sōasi ka naʻá ne taaʻi ʻa e kelekelé ʻaki ha ngaahi foʻi ngahau ʻo tuʻo tolu pē, naʻá ne maʻu ha lavameʻa fakangatangata ʻi hono ikunaʻi ʻo e kau Sīliá. ʻOku ʻamanekina ʻe Sihova ʻa kitautolu ke tau fakahoko ʻaufuatō mo faivelenga ʻa ʻene ngāue kuo vaheʻi maí.

20:​2-6. Ko Sihová ko e “tali lotu.”​—Sāme 65:2.

24:​3, 4 (PM). Tupu ʻi he halaia ʻi he toto ʻa Manasé, “nae ikai finagalo a Jihova ke fakamolemole” ʻa Siuta. ʻOku tokaʻi ʻe he ʻOtuá ʻa e toto ʻo e taʻehalaiá. ʻE lava ke tau falala-pau ʻe sāuni ʻe Sihova ʻa e toto ʻo e taʻehalaiá ʻaki hono fakaʻauha ʻa e faʻahinga ko ia ʻoku nau halaia ʻi hono lilingi iá.​—Sāme 37:​9-​11; 145:20.

Mahuʻinga kia Kitautolu

ʻOku fakahāhaaʻi ʻe he tohi ʻa Ua Tuʻí ʻa Sihova ko e Tokotaha-Fakahoko ia ʻo e ngaahi talaʻofá. Ko hono fakaheeʻi ʻa e kakai ʻo e ongo puleʻangá, ʻuluakí ʻa ʻIsileli pea toki hoko ki Siutá, ʻoku ʻomi mālohi ai ki heʻetau tokangá ʻa e founga naʻe hoko moʻoni ai ʻa e fakamaau fakaekikite ʻoku hiki ʻi he Teutalonome 28:15–​29:28. ʻOku fakamatalaʻi ʻe he Ua Tuʻí ʻa ʻIlaisa ko ha palōfita faivelenga lahi ki he huafa ʻo Sihová pea ki he lotu moʻoní. ʻOku fakamatalaʻi ʻa Hesekaia mo Siosaia ko ha ongo tuʻi ʻa ia naʻá na ʻapasia ki he Lao ʻa e ʻOtuá.

ʻI heʻetau fakakaukau fakalelei ki he fakakaukau mo e ngaahi ngāue ʻa e ngaahi tuʻi, kau palōfita pea mo e niʻihi kehe ʻoku lave ki ai ʻi he Ua Tuʻí, ʻikai ʻoku tau ako ai ha ngaahi lēsoni mahuʻinga ʻi he meʻa ke feinga mālohi ki aí pea mo e meʻa ke fakamamaʻo mei aí? (Loma 15:4; 1 Kolinito 10:11) ʻIo, “ko e folofola ʻa e ʻOtua, ko e koto moʻui mo e koto malohi.”​—Hepelu 4:​12.

[Puha/Fakatātā ʻi he peesi 10]

NGAAHI MANA ʻA ʻILAISÁ

 1. Ko e ngaahi vai ʻo Sioataní ʻoku ʻai ʻo mavaeua.​—2 Tuʻi 2:​14

 2. Ko e maʻuʻanga vai kovi ʻo Sielikoó ʻoku ʻai ʻo sai.​—2 Tuʻi 2:​19-​22

 3. ʻOku ʻohofi ʻe ha ongo pea ha fānau anga-kovi.​—2 Tuʻi 2:​23, 24

 4. ʻOku tokonaki ki he kau taú ʻa e vai.​—2 Tuʻi 3:​16-​26

 5. ʻOku maʻu ʻe ha uitou ha lolo ngaohi-kai.​—2 Tuʻi 4:​1-7

 6. ʻOku tuʻituʻia ha fefine Sūnemi paʻa.​—2 Tuʻi 4:​8-​17

 7. ʻOku fokotuʻu hake ha kiʻi tama mei he maté.​—2 Tuʻi 4:​18-​37

 8. ʻOku hoko ha sitiu kona ʻo fakatupu moʻui lelei.​—2 Tuʻi 4:38-​41

 9. ʻOku fafanga ha kau tangata ʻe teau ʻaki ha ngaahi foʻi mā ʻe 20.​—2 Tuʻi 4:42-​44

10. ʻOku fakamoʻui ʻa e kilia ʻo Neamaní.​—2 Tuʻi 5:​1-​14

11. ʻOku maʻu ʻe Kēhesi ʻa e kilia ʻo Neamaní.​—2 Tuʻi 5:​24-​27

12. Ko ha mataʻi toki ʻoku ʻai ʻo tētē.​—2 Tuʻi 6:​5-7

13. ʻOku sio ha sevāniti ki ha ngaahi saliote fakaeʻāngelo.​—2 Tuʻi 6:​15-​17

14. ʻOku taaʻi ʻa e kau tau Sīliá ʻaki ʻa e kuí.​—2 Tuʻi 6:​18

15. ʻOku toe fakafoki ʻa e sio ʻa e kau tau Sīliá.​—2 Tuʻi 6:​19-​23

16. ʻOku hoko ʻo moʻui ha tangata naʻe mate.​—2 Tuʻi 13:​20, 21

[Saati/Fakatātā ʻi he peesi 12]

NGAAHI TUʻI ʻO SIUTA MO ʻISILELÍ

Saula/Tēvita/Solomone: 1117/1077/1037 K.M.a

PULEʻANGA ʻO SIUTÁ ʻAHO (K.M.) PULEʻANGA ʻO ʻISILELÍ

Lehopoame ․․․․․․ 997 ․․․․․․ Selopoame

ʻApaia/ʻAsa ․․․․ 980/978 ․․․․

․․ 976/975/952 ․․ Nātapi/Paasa/ʻEla

․․ 951/951/951 ․․ Similai/ʻOmilai/Tipinai

․․․․․․ 940 ․․․․․․ ʻĒhapi

Sihosafate ․․․․․․ 937 ․․․․․․

․․․․ 920/917 ․․․․ ʻAhasaia/Siholame

Siholame ․․․․․․ 913 ․․․․․․

ʻAhasaia ․․․․․․ 906 ․․․․․․

(ʻAtalaia) ․․․․․․ 905 ․․․․․․ Sehu

Sōasi ․․․․․․ 898 ․․․․․․

․․․․ 876/859 ․․․․ Sihoaasi/Sōasi

ʻAmasaia ․․․․․․ 858 ․․․․․․

․․․․․․ 844 ․․․․․․ Selopoame  II

ʻAsalaia (ʻŪsaia) ․․․․․․ 829 ․․․․․․

․․ 803/791/791 ․․ Sākalaia/Salumi/Menahemi

․․․․ 780/778 ․․․․ Pekaia/Peka

Siotame/ʻĀhasi ․․․․ 777/762 ․․․․

․․․․․․ 758 ․․․․․․ Hōsea

Hesekaia ․․․․․․ 746 ․․․․․․

․․․․․․ 740 ․․․․․․ Ikunaʻi ʻo Samēliá

Manase/ʻĀmoni/Siosaia ․․ 716/661/659 ․․

Sihoaasi/Sihoiakimi ․․․․ 628/628 ․․․․

Sihoiakini/Setekaia ․․․․ 618/617 ․․․․

Fakaʻauha ʻo Selusalemá ․․․․․․ 607 ․․․․․․

[Fakamatala ʻi lalo]

[Fakatātā ʻi he peesi 8, 9]

Naʻe anga-fakatōkilalo ʻa Neamani ʻiate ia pea naʻe fakamoʻui ia ʻe he mālohi ʻo Sihová

[Fakatātā ʻi he peesi 8, 9]

Ko e hā naʻe hoko kia ʻIlaisiā ʻi hono “ʻohake . . .ʻe he ʻahiohio ki he langi”?