ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Ua Kalonikalí

HANGĒ ko ia ʻoku kamataʻaki ʻe he tohi Tohi Tapu ʻa Ua Kalonikalí, ʻoku pule ʻa Solomone ko e tuʻi ki ʻIsileli. ʻOku fakaʻosiʻaki e tohí ʻaki ʻa e ngaahi lea ko eni ʻa e tuʻi Pēsia ko Kōlesí ki he kau Siu naʻe fakaheeʻi ʻi Papilōniá: “[Ko Sihova] kuo ne naʻinaʻi kiate au ke langa ha fale moʻona ʻi Selusalema, ʻa ia ʻoku ʻi Siuta. ʻIlonga kimoutolu ʻi hono kakai kotoa ʻoku ne ʻatā ke ʻalu [ki Selusalemá], pea ʻofa ke kau mo ia ʻa Sihova ko hono ʻOtua.” (2 Kalonikali 36:23) ʻI hono fakakakato ʻe he taulaʻeiki ko ʻĒselá ʻi he 460 K.M., ʻoku kāpui ʻe he tohí ʻa e ngaahi taʻu ʻe 500—mei he 1037 K.M. ki he 537 K.M.

Ko e tuʻutuʻuni ʻa Kōlesí ʻoku ʻai ai ʻo malava ki he kau Siú ke nau foki ki Selusalema ʻo toe fokotuʻu ai ʻa e lotu ʻa Sihová. Kae kehe, ko e ngaahi taʻu lahi ʻo e nofo pōpula ʻi Pāpiloné kuo ʻomi ai ʻa e ngaahi ola kovi. Ko e kau fakaheeʻi naʻe toe fokí naʻe siʻisiʻi ʻenau ʻilo ki honau hisitōlia fakafonuá. ʻOku tokonaki kiate kinautolu ʻe he Ua Kalonikalí ha fakanounou māʻalaʻala ʻo e ngaahi meʻa ʻoku hoko ʻi he malumalu ʻo e ngaahi tuʻi ʻi he laine fakatuʻi ʻo Tēvitá. Ko e foʻi talanoá ʻoku toe fakamānako ia kiate kitautolu koeʻuhí ʻoku fakamamafaʻi ai ʻa e ngaahi tāpuaki ʻa ia ʻoku haʻu mei he talangofua ki he ʻOtua moʻoní mo e ngaahi nunuʻa ʻo e talangataʻa kiate iá.

ʻOKU LANGA ʻE HA TUʻI HA FALE KIA SIHOVA

(2 Kalonikali 1:​1–9:31)

ʻOku foaki ʻe Sihova kia Tuʻi Solomone ʻa e fiemaʻu ʻa hono lotó—ko e potó mo e ʻiló—tānaki atu ki ai mo e koloa pea mo e lāngilangi. ʻOku langa ʻe he Tuʻí ha fale fisifisimuʻa kia Sihova ʻi Selusalema, pea ko e kakaí “ʻoku nau fiefia, pea lelei honau loto.” (2 Kalonikali 7:10) ʻOku hoko ʻa Solomone ʻo ‘hulu ʻi he tuʻi kotoa pe ʻo mamaní ʻi he koloá mo e potó.’—2 Kalonikali 9:22.

Hili ʻene pule ʻi ʻIsileli ʻi he taʻu ʻe 40, ʻoku ‘toka ʻa Solomone mo ʻene ngaahi kuí, pea ʻoku fetongi ia ʻi he pulé ʻe hono foha ko Lehopoamé.’ (2 Kalonikali 9:31) ʻOku ʻikai ke lēkooti ʻe ʻĒsela ia ʻa e mavahe ʻa Solomone mei he lotu moʻoní. Ko e ongo fehālaaki pē naʻe lave ki ai ʻo fekauʻaki mo e tuʻí ko ʻene ʻave taʻefakapotopoto ʻa e fanga hoosi tokolahi mei ʻIsipité pea mo ʻene mali ki he ʻofefine ʻo Feló. ʻOku fakahaaʻi ai ʻe he tokotaha tohi kalonikalí ʻa e fakamatalá mei ha tuʻunga lelei.

Tali ki he Ngaahi Fehuʻi Fakatohitapú:

2:​14​—Ko e hā ʻoku kehe ai ʻa e laine hohoko ʻo e tangata tufunga fakasanisani ʻoku fakamatalaʻi hení mei he laine hohoko ʻoku maʻu ʻi he 1 Tuʻi 7:14? ʻOku lave ʻa e 1 Tuʻí ki he faʻē ʻa e tangata tufunga koulá ko ha “fefine uitou ʻi he matakali ʻo Nafitalai” koeʻuhi naʻe mali ʻa e fefiné mo ha tangata ʻi he matakali ko iá. Kae kehe, ko e fefiné tonu naʻá ne haʻú mei he matakali ʻo Taní. Hili ʻa e mate ʻa hono husepānití, naʻá ne mali mo ha tangata mei Taia, pea ko e tangata tufunga koulá ko ha tama ia mei he foʻi nofo mali ko iá.

2:​18; 8:​10​—ʻOku fakahaaʻi ʻe he ongo veesi ko ení ko e tokolahi ʻo e kau tokoni pule ne nau hoko ko e kau fakalele ngāue mo e kau pule ki he kau ngāué ko e toko 3,600 tānaki 250, kae fakatatau ia ki he 1 Tuʻi 5:16; 9:​23, naʻa nau toko 3,300 tānaki 550. Ko e hā ʻoku kehekehe ai ʻa e ongo fiká? ʻOku hā ngali ko e hoko ʻa e faikehekehé ʻi he anga hono fakakalakalasi ʻa e kau tokoni pulé. Mahalo pē ʻoku fakafaikehekeheʻi ʻe he Ua Kalonikalí ʻa e kau tokoni pule ʻe toko 3,600 ʻikai ko e ʻIsilelí mei he kau tokoni pule ʻIsileli ʻe toko 250, lolotonga ia ʻoku fakafaikehekeheʻi ʻe he ʻUluaki Tuʻí ia ʻa e kau pule ʻe toko 3,300 mei he kau supavaisa lalahi ʻe toko 550 ʻo e tuʻunga māʻolunga angé. ʻI ha faʻahinga tuʻunga pē, ko e fika fakakātoa ʻo e faʻahinga ʻoku nau ngāue ko e kau tokoni pulé ko e toko 3,850.

4:​2-4​—Ko e hā naʻe ngāueʻaki ai ʻa e tatau ʻo e fanga pulú ʻi hono langa ʻo e tuʻuʻanga ʻo e tahi ukameá? ʻI he Tohi Tapú, ko e fanga pulú ko ha fakaʻilonga ia ʻo e mālohi. (Isikeli 1:10; Fakahā 4:​6, 7) Ko hono fili ʻa e tatau ʻo e fanga pulú naʻe feʻungamālie ia koeʻuhí naʻe poupouʻi ʻe he fanga pulu kopa ʻe 12 ʻa e fuʻu “Tahi” lahí, ʻa ia ko hono mamafá ko e toni nai ʻe 30. Ko hono ngaohi ʻo e fanga pulú ki he taumuʻa ko ení naʻe ʻikai te ne maumauʻi ʻe ia ʻi ha faʻahinga founga ʻa e fekau hono uá, ʻa ia naʻe tapui ai ʻa hono ngaohi ʻo e ngaahi meʻa ke fai ki ai ʻa e lotú.—Ekisoto 20:​4, 5.

4:5—Ko e hā ʻa e lahi fakakātoa ʻo e tahi ukameá? ʻI hono fakafonú, ʻoku malava ʻa e tahí ke ne tānaki ʻa e pate (bath measure) ʻe tolu afe, pe ko e lita ʻe 66,000. Kae kehe, ko e lēvolo anga-maheni ʻo e vaí, naʻe fakafuofua ki he vahe tolu ʻe ua hono lahí. ʻOku pehē ʻe he 1 Tuʻi 7:26: “Naʻe feʻunga [ʻa e tahí] mo e pate ʻe ua afe [lita ʻe 44,000].”

5:​4, 5, 10—Ko e hā ʻa e naunau mei he muʻaki tāpanekalé naʻe hoko ko e konga ʻo e temipale ʻa Solomoné? Ko e meʻa pē ʻe taha mei he muʻaki tēniti feʻiloakiʻangá naʻe tauhi ʻi he temipale ʻo Solomoné ko e ʻAʻaké. Hili hono langa ʻo e temipalé, naʻe hiki ʻa e tāpanekalé mei Kipione ki Selusalema pea ʻoku ngalingali ne tauhi ia ʻi ai.—2 Kalonikali 1:​3, 4.

Ngaahi Lēsoni kia Kitautolu:

1:​11, 12. Ko e kole ʻa Solomoné naʻe fakahaaʻi ange ai kia Sihova ko e holi tōtōivi ia ʻa e tuʻí ke maʻu ʻa e potó mo e ʻiló. Ko ʻetau ngaahi lotu ki he ʻOtuá ʻoku fakamoʻoniʻi moʻoni ai ʻa e meʻa ʻoku tau holi tōtōivi ki aí. ʻOku fakapotopoto ke tau sivisiviʻi ʻa ʻetau ngaahi kupuʻi lotú.

6:4. Ko e houngaʻia loto-moʻoni ʻi he ʻaloʻofa mo e lelei ʻa Sihová ʻoku totonu ke ne ueʻi ai kitautolu ke tau fakamālōʻiaʻi ʻa Sihova—ʻa ia ko hono fakalāngilangiʻi ia fakataha mo e ʻofa mo e houngaʻia.

6:​18-​21. Neongo ʻoku ʻikai hao ʻa e ʻOtuá ʻi ha faʻahinga fale pē, naʻe hoko ʻa e temipalé ko ha senitā ia ʻo e lotu ʻa Sihová. ʻI he ʻahó ni, ko e ngaahi Fale Fakatahaʻanga ʻa e Kau Fakamoʻoni ʻa Sihová ko e ngaahi senitā ia ʻo e lotu moʻoní ʻi he koló.

6:​19, 22, 32. Naʻe lava ke fanongo ʻa Sihova ki he ngaahi lotu ʻa e tokotaha kotoa—mei he tuʻí ʻo aʻu ki he faʻahinga māʻulalo taha ʻi he fonuá—naʻa mo ha tokotaha muli naʻe ʻunuʻunu loto-totonu kiate ia.a—Sāme 65:2.

HOKOHOKO ʻO E NGAAHI TUʻÍ ʻI HE LAINE ʻO TĒVITÁ

(2 Kalonikali 10:​1–36:23)

Ko e puleʻanga fāʻūtaha ʻo ʻIsilelí ʻoku vaeua ia ki he konga ʻe ua—ko e puleʻanga matakali ʻe hongofulu fakatokelaú mo e puleʻanga matakali ʻe ua fakatonga ʻo Siuta mo Penisimaní. Ko e kau taulaʻeiki mo e kau Līvai ʻi he kotoa ʻo ʻIsilelí ʻoku nau tuku ʻenau mateakí ki he fuakava Puleʻangá ʻo māʻolunga ange ia ʻi he mamahiʻi-fonuá pea ʻoku nau poupou ki he foha ʻo Solomone ko Lehopoamé. ʻI ha kiʻi taʻu siʻi ʻe 30 hili hono fakakakató, ʻoku kaihaʻasi ʻa e koloá mei he temipalé.

ʻI he ngaahi tuʻi ʻe 19 ʻoku nau hoko atu ʻia Lehopoamé, ko e toko 5 ai ʻoku nau faitōnunga, toko 3 ʻoku nau kamata lelei ka ʻoku nau hoko ʻo taʻefaitōnunga, pea ʻoku tafoki ʻa e tokotaha mei hono ʻalunga halá. Ko e toenga ʻo e kau takí ʻoku nau fai ʻa e meʻa ʻoku kovi ʻi he vakai ʻa Sihová.b ʻOku fakamamafaʻi ʻa e ngaahi ngāue ʻa e ngaahi tuʻi ʻe toko nima ʻa ia ʻoku tuku ʻenau falalá ʻia Sihová. Ko e ngaahi fakamatala kia Hesekaia ʻi heʻene toe ʻai ke longomoʻui ʻa e ngaahi ngāue ʻi he temipalé mo Siosaia ʻi heʻene fokotuʻutuʻu ki ha fuʻu kātoanga Laka-Atu lahí kuo pau pē naʻe fakalototoʻa lahi ia ki he kau Siu ne nau mahuʻingaʻia ʻi hono toe fokotuʻu ʻi Selusalema ʻa e lotu ʻa Sihová.

Tali ki he Ngaahi Fehuʻi Fakatohitapú:

13:5​—Ko e hā ʻa e ʻuhinga ʻo e kupuʻi lea “ha kovinanite masima”? Koeʻuhi ko ʻene natula fakatolongá, naʻe hoko ʻa e māsimá ko ha fakaʻilonga ia ʻo e tuʻumaʻu mo e taʻealaliliu. Ko ia ai, ko “ha kovinanite masima” ʻokú ne fakahaaʻi ai ha felotoi tuʻuloa.

14:​2-5; 15:17 (PM)—Naʻe toʻo ʻe Tuʻi ʻAsa ʻa e kotoa ʻo e “gaahi botu maoluga”? ʻOku ngalingali, naʻe ʻikai te ne fai pehē. ʻOku mahalo naʻe toʻo ʻe ʻAsa ʻa e ngaahi potu māʻolunga pē naʻe felāveʻi mo e lotu ki he ngaahi ʻotua loí ka naʻe ʻikai ko ia naʻe lotu ai ʻa e kakaí kia Sihová. ʻOku ngalingali foki naʻe toe langa ʻa e ngaahi potu māʻolungá ʻi he konga ki mui ʻo e pule ʻa ʻAsá. Ko e ngaahi potu māʻolunga eni naʻe toʻo ʻe hono foha ko Sihosafaté. Ko hono moʻoní, naʻe ʻikai ke puli fakaʻaufuli atu ʻa e ngaahi potu māʻolungá, naʻa mo e lolotonga ʻa e pule ʻa Sihosafaté.—2 Kalonikali 17:​5, 6; 20:​31-33.

15:9; 34:6—Ko e hā ʻa e tuʻunga ʻo e matakali ʻo Simioné ʻi he fekauʻaki mo e vahevahe ʻo e puleʻanga ʻIsilelí? ʻI hono maʻu ko ha tofiʻa ʻa e ngaahi ʻēlia kehekehe ʻi he vahefonua ʻo Siutá, naʻe tuʻu ʻa e matakali ʻo Simioné ʻi he tuʻunga fakasiokālafí ʻi loto he puleʻanga ʻo Siutá mo Penisimaní. (Siosiua 19:1) Kae kehe, ʻi he tuʻunga fakalotú mo fakapolitikalé, naʻe kau ʻa e matakalí mo e puleʻanga fakatokelaú. (1 Tuʻi 11:​30-33; 12:​20-24) Ko ia ai, naʻe lau fakataha ʻa Simione mo e puleʻanga matakali ʻe hongofulú.

16:​13, 14—Naʻe fakamomofi ʻa ʻAsa? ʻIkai, ko e “fuʻu fakamomofi lahi ʻaupito” ʻoku ʻuhinga iá, ʻo ʻikai ki hono fakamomofi ʻo ʻAsa, ka ki hono tutu ʻo e ngaahi sipaisí.

35:3​—Naʻe ʻomi mei fē ʻe Siosaia ʻa e ʻAʻake toputapú ki he temipalé? Pe naʻe toʻo ʻa e ʻAʻaké ia ki muʻa ange ʻe ha taha ʻo e ngaahi tuʻi fulikivanú pe naʻe fokotuʻu ia ʻe Siosaia ke tauhi malu lolotonga ʻa e ngāue monomono lahi ʻo e temipalé, ʻoku ʻikai leaʻaki ia ʻe he Tohi Tapú. Ko e fakamatala fakahisitōlia pē ki he ʻAʻaké ʻi he hili ʻa e ʻaho ʻo Solomoné ko e taimi naʻe ʻomi ai ia ʻe Siosaia ki he temipalé.

Ngaahi Lēsoni kia Kitautolu:

13:​13-​18; 14:​11, 12; 32:​9-23. He lēsoni lelei moʻoni ia ʻe lava ke tau ako fekauʻaki mo e mahuʻinga ʻo e falala kia Sihová!

16:​1-5, 7; 18:​1-3, 28-32; 21:​4-6; 22:​10-12; 28:​16-22. Ko e aleapau mo e kau mulí pe faʻahinga taʻetuí ʻoku ʻi ai hono ngaahi nunuʻa fakamamahi. ʻOku fakapotopoto ke tau fakaʻehiʻehi mei ha fekauʻaki ʻikai fiemaʻu mo e māmaní.—Sione 17:​14, 16; Semisi 4:4.

16:​7-​12; 26:​16-21; 32:​25, 26. Naʻe fakatupunga ʻe he hīkisiá ʻa Tuʻi ʻAsa ke ne tōʻonga kovi lolotonga ʻa e ngaahi taʻu fakaʻosi ʻo ʻene moʻuí. Ko ha laumālie hīkisia naʻe taki atu ai ʻa ʻŪsaia ki heʻene paʻulú. Naʻe ngāue taʻefakapotopoto ʻa Hesekaia pea mahalo naʻá ne loto-pōlepole ʻi heʻene fakahaaʻi ange ki he kau talafekau Pāpiloné ʻa ʻene tauhiʻanga koloá. (Aisea 39:​1-7) “Ko e [loto-pōlepolé] ko e fakamelomelo ʻo e haveʻi,” ko e fakatokanga ia ʻa e Tohi Tapú, “pea ko e angahiki ko e fakamelomelo ʻo e hinga.”—Palovepi 16:18.

16:9. ʻOku tokoniʻi ʻe Sihova ʻa e faʻahinga ʻa ia ko honau lotó ʻoku kakato kiate iá, pea ʻokú ne vēkeveke ke ngāueʻaki hono mālohí maʻa kinautolu.

18:​12, 13, 23, 24, 27. ʻI he hangē ko Maikaiá, ʻoku totonu ke tau loto-toʻa ʻi he lea ʻo fekauʻaki mo Sihova mo ʻene ngaahi taumuʻá.

19:​1-3. ʻOku kumi ʻa Sihova ki he lelei ʻiate kitautolú naʻa mo e taimi ʻoku tau taʻefakahōifuaʻi ai iá.

20:​1-28. ʻOku lava ke tau loto-falala ʻe tuku ʻe Sihova ke tau ʻiloʻi ia ʻi heʻetau hanga anga-fakatōkilalo kiate ia ki ha tatakí.—Palovepi 15:29.

20:17 (PM). Ke “mamata ki he fakamoui ʻa Jihova,” ʻoku fiemaʻu ke tau “tuu mau” ʻi hono poupouʻi longomoʻui ʻa e Puleʻanga ʻo e ʻOtuá. ʻI he ʻikai ke tau solova pē ʻe kitautolu ʻa e ngaahi meʻá, kuo pau ke tau “tuu logo be,” ʻo tuku ʻetau falala taʻetoeveiveiuá ʻia Sihova.

24:​17-​19; 25:14. Ko e tauhi ʻaitolí naʻe fakamoʻoniʻi ko ha tauhele ia kia Sōasi mo hono fohá ʻa ʻAmasaia. ʻOku lava ke fakatauele tatau ʻa e tauhi ʻaitolí he ʻahó ni, tautautefito ʻi heʻene haʻu ki he founga olopoto ʻo e mānumanú pe ko e mamahiʻi-fonuá.—Kolose 3:5; Fakahā 13:4.

32:​6, 7. Ko kitautolu foki kuo pau ke tau loto-toʻa pea mālohi ʻi heʻetau ‘ai a e mahafu tau kotoa o e Otuá’ pea hokohoko atu ʻi he tau fakalaumālié.—Efeso 6:​11-18, PM.

33:​2-9, 12, 13, 15, 16. ʻOku fakahaaʻi ʻe ha tokotaha ʻokú ne fakatomala moʻoní ʻaki ʻa hono siʻaki ha ʻalunga hala pea ʻi hono fokotuʻu ha feinga ʻo fakapapauʻi ke fai ʻa e meʻa ʻoku tonú. Fakatuʻunga ʻi he fakatomala loto-moʻoní, naʻa mo ha tokotaha kuó ne ngāue fulikivanu ʻo hangē ko Tuʻi Manasé ʻe lava ke ne maʻu ʻa e meesi ʻa Sihová.

34:​1-3. Ko ha ngaahi tuʻunga pē ʻoku ʻikai lelei ʻi he kei siʻí ʻoku ʻikai fiemaʻu ke ne taʻofi kitautolu mei he hoko ʻo ʻiloʻi ʻa e ʻOtuá pea mo e tauhi kiate iá. Ko ha tākiekina lelei naʻe maʻu nai ʻe Siosaia lolotonga ʻa hono ngaahi taʻu kei siʻí kuo pau pē naʻe haʻu ia mei heʻene kui fakatomala ko Manasé. Pe ko e hā pē ʻa e ngaahi tākiekina lelei naʻe maʻu nai ʻe Siosaiá naʻe faai atu pē ʻo taki atu ki hono maʻu ʻa e ngaahi ola lelei. ʻOku lava ke pehē pē mo kitautolu.

36:​15-​17. ʻOku manavaʻofa mo kātaki ʻa Sihova. Kae kehe, ko ʻene manavaʻofá mo e kātakí ʻoku ʻikai taʻefakangatangata ia. Kuo pau ki he kakaí ke nau tali lelei ʻa e ngāue malangaʻi ʻo e Puleʻangá kapau ʻoku nau fie hao moʻui ʻi he taimi ʻe ʻomi ai ʻe Sihova ʻa e ngataʻanga ki he fokotuʻutuʻu fulikivanu ko eni ʻo e ngaahi meʻá.

36:​17, 22, 23. Ko e folofola ʻa Sihová ʻoku hoko ʻo moʻoni maʻu ai pē.—1 Tuʻi 9:​7, 8; Selemaia 25:​9-11.

Naʻe Ueʻi Ia ʻe ha Tohi Ke Ne Ngāue

“Pea ʻave ʻe Siosaia ʻa e ngaahi fakalielia kotoa mei he ngaahi fonua naʻe kau ki haʻa Isileli,” ko e lau ia ʻa e 2 Kalonikali 34:​33, “ʻo ne kouna ʻa e kakai kotoa naʻe ʻilo ʻi Isileli ke tauhi ʻa Sihova ko honau ʻOtua.” Ko e hā naʻá ne ueʻi ʻa Siosaia ke ne fai ení? ʻI he taimi naʻe ʻomi ai ʻe Sāfani ko e sekelitalí ʻa e tohi naʻe toki ʻiloʻi ʻo e Lao ʻa Sihová kia Tuʻi Siosaiá, naʻe ʻai ia ʻe he tuʻí ke lau leʻo-lahi. Naʻe maongo ʻaupito kia Siosaia ʻa e meʻa naʻá ne fanongo aí he naʻá ne pouaki faivelenga ai ʻa e lotu moʻoní ʻi he kotoa ʻo ʻene moʻuí.

ʻI hono lau ʻa e Folofola ʻa e ʻOtuá pea fakalaulauloto ki he meʻa ʻoku tau laú ʻoku lava ke ne ueʻi loloto kitautolu. ʻIkai ʻoku fakalototoʻaʻi kitautolu ʻe he fakalaulauloto ki he fakamatala ʻo e ngaahi tuʻi ʻi he laine ʻo Tēvitá, ke tau faʻifaʻitaki ai ki he ngaahi faʻifaʻitakiʻanga ʻo e faʻahinga naʻa nau ʻai ko honau falalaʻangá ʻa Sihová pea fakaʻehiʻehi mei he ʻulungāanga ʻo e faʻahinga naʻe ʻikai te nau fai peheé? ʻOku ueʻi kitautolu ʻe he Ua Kalonikalí ke tau ʻoatu ʻetau līʻoa kakató ki he ʻOtua moʻoní pea hanganaki faitōnunga kiate ia. Ko e pōpoaki ʻi aí ʻoku moʻui pea ko e koto mālohi moʻoni.—Hepelu 4:12.

[Fakamatala ʻi lalo]

[Fakatātā ʻi he peesi 18]

ʻOkú ke ʻiloʻi ʻa e ʻuhinga naʻe hoko ai ʻa e fanga pulú ko ha tatau feʻungamālie ʻi he tuʻuʻanga ʻo e tahi ukameá?

[Fakatātā ʻi he peesi 21]

Neongo naʻá ne maʻu ʻa e tokoni fakangatangata ʻi heʻene kei tamasiʻí, naʻe tupu hake ʻa Siosaia ʻo hoko ʻo faitōnunga kia Sihova