ʻOku ʻOmai ʻe he Tauʻatāina ʻOku Foaki Mai ʻe he ʻOtuá ʻa e Fiefia
“Koe fiefia a Jihova ko ho mou malohi.”—NEHEMAIA 8:10, PM.
1. Ko e hā ʻa e fiefiá, pea ko e hā ʻoku malava ai ke aʻusia ia ʻe he faʻahinga ʻoku fakatapui ki he ʻOtuá?
ʻOKU fakafonu ʻe Sihova ʻa e ngaahi loto ʻo hono kakaí ʻaki ʻa e fiefia. Ko e tuʻunga ko ʻeni ʻo e fiefia pe mavava lahí ni ʻoku tupu mei hono maʻu pe ʻamanekina ke maʻu ʻa e lelei. ʻOku malava ke maʻu ʻe he faʻahinga ʻo e tangata kuo ʻosi fakatapui ki he ʻOtuá ʻa e ongo pehē he ko e fiefiá ko e fua ia ʻo hono laumālie māʻoniʻoní, pe ivi ngāué. (Kalētia 5:22, 23) Ko ia, naʻa mo hono kāpui kitautolu ʻe he ngaahi ʻahiʻahi fakatupu faingataʻaʻiá, ʻe lava ke tau fiefia ʻi he hoko ko e kau sevāniti ʻa Sihová, ʻa ia ʻoku tataki kinautolu ʻe hono laumālié.
2. Ko e hā naʻe fiefia ai ʻa e kau Siú ʻi ha tuʻunga makehe ʻi he ngaahi ʻaho ʻo ʻĒselá?
2 ʻI ha tuʻunga makehe ʻi he senituli hono nima K.M., naʻe ngāueʻaki ʻe he kau Siú ʻa ʻenau tauʻatāina kuo foaki ʻe he ʻOtuá ke nau fai ʻi he fiefia ʻa e Kātoanga ʻo e Falelouʻakaú ʻi Selusalema. ʻI he hili ʻa hono lau ʻe ʻĒsela mo e kau Līvai kehé ʻa e Lao ʻa e ʻOtuá kiate kinautolu, naʻe “tutuku ʻa e kakai kotoa ke kai, pea ke inu, . . . pea ke tufa ʻumu, pea ke fakafiefia lahi, koeʻuhi naʻe ʻuhinga kiate kinautolu ʻa e ngaahi meʻa naʻe fakamatala mai.”—Nehemaia 8:5-12.
Ko e Fiefia ʻa Sihová ko Hotau Mālohi
3. ʻI he ngaahi tuʻunga fē ʻoku malava ai ke hoko ʻa e “fiefia a Jihova” ko hotau mālohi?
3 Lolotonga ʻa e kātoanga ko iá, naʻe hoko ʻo ʻilo ʻe he kau Siú ʻa e moʻoni ʻo e lea ko ení: “Koe fiefia a Jihova ko ho mou malohi.” (Nehemaia 8:10, PM) Ko hotau mālohi foki ʻa e fiefia ko ʻení ʻo kapau ʻoku tau tuʻu maʻu ʻi he tauʻatāina kuo foaki mai ʻe he ʻOtuá ʻi he tuʻunga ko e Kau Fakamoʻoni ʻa Sihova kuo ʻosi fakatapui mo papitaiso. Ko e tokosiʻi pē ʻiate kitautolu kuo pani ʻaki ʻa e laumālie māʻoniʻoní pea mo hono ohi ki he fāmili ʻo e ʻOtuá ke hoko ko e kaungāʻea fakahēvani fakataha mo Kalaisi. (Loma 8:15-23) Ko e tokolahi taha ʻo kitautolu ʻi he ʻaho ní ʻoku tau maʻu ʻa e ʻamanaki ki he moʻui ʻi he māmani ko ha palataisi. (Luke 23:43) Ko ha toki fiefia lahi ē ʻoku totonu ke tau maʻu!
4. Ko e hā ʻoku malava ai ki he kau Kalisitiané ke nau kātekina ʻa e ngaahi faingataʻaʻiá mo e fakatangá?
4 Neongo ʻoku tau maʻu ʻa e ʻamanaki maʻongoʻonga, ʻoku ʻikai ke faingofua ke kātakiʻi ʻa e ngaahi faingataʻaʻiá mo e fakatangá. Kaekehe, ʻoku malava ke tau fai pehē, he ʻoku foaki mai kiate kitautolu ʻe he ʻOtuá ʻa hono laumālie māʻoniʻoní. ʻI heʻetau maʻu iá ʻoku tau maʻu ai ʻa e fiefiá mo e tui pau ʻoku ʻikai ha toe meʻa ʻoku lava ke ne kaihaʻasi meiate kitautolu ʻa ʻetau ʻamanakí pe ko e ʻofa ʻa e ʻOtuá. ʻIkai ngata ai, ka ʻoku tau ʻilo pau ʻe hoko ʻa Sihova ko hotau mālohi ʻi heʻetau kei ʻofa kiate ia ʻaki ʻa e kotoa ʻo hotau lotó, moʻuí, iví mo e ʻatamaí.—Luke 10:27.
5. Ko fē te tau ʻilo ai ʻa e ngaahi ʻuhinga ke fiefia?
5 ʻOku maʻu ʻe he kakai ʻa Sihová ʻa e ngaahi tāpuaki lahi ʻaupito pea ʻoku lahi ʻa e ngaahi ʻuhinga ke fiefia ai. ʻOku lave ʻa e tohi ʻa Paula ki he kau Kalētiá ki he ngaahi ʻuhinga ʻe niʻihi ʻoku lava ai ke tau fiefia. ʻOku fakahā ʻi he ngaahi konga kehe ʻo e Tohitapú ʻa e ngaahi ʻuhinga kehe. Te tau ongoʻi mātuʻaki fiefia ʻi heʻetau fakakaukau atu ki he ngaahi tāpuaki fiefia peheé.
Koloaʻaki ʻa e Tauʻatāina Kuo Foaki Mai ʻe he ʻOtuá
6. Ko e hā naʻe naʻinaʻi ai ʻa Paula ki he kau Kalisitiane ʻi Kalētiá ke nau tuʻu maʻú?
6 ʻI he tuʻunga ko e kau Kalisitiané, ʻoku tau maʻu ʻa e monūʻia fakafiefia ko e hōifua mai ʻa e ʻOtuá. Koeʻuhi naʻe fakatauʻatāinaʻi ʻe Kalaisi ʻa hono kau muimuí mei he moʻulaloa ki he Lao ʻa Mōsesé, naʻe naʻinaʻi ki he kau Kalētiá ke nau tuʻu maʻu pea ʻoua ʻe fakapōpulaʻi ʻi he “ʻioke fakapopula” ko iá. Fēfē kitautolu? Kapau te tau feinga ke fakahaaʻi ʻoku tau māʻoniʻoni ʻo makatuʻunga ʻi heʻetau tauhi ʻa e Laó, ʻe motuhi kitautolu meia Kalaisi. Kaekehe, ʻi he tokoni ʻa e laumālie ʻo e ʻOtuá, ʻoku tau nofoʻaki tali ai ki he māʻoniʻoni kuo ʻamanaki ki ai ʻa ia ko e tupu ia ʻi hono maʻu ʻa e tui kuo ngāueʻi koeʻuhi ko e ʻofá, kae ʻikai ko e tupu mei he kamu fakaesinó pe ko e ngaahi ngāue kehe ʻo e Laó.—Kalētia 5:1-6.
7. ʻOku totonu ke fēfē ʻa e anga ʻo ʻetau fakakaukau ki he ngāue toputapu kia Sihová?
7 Ko ha tāpuaki ia ke ngāueʻaki ʻetau tauʻatāina kuo foaki mai ʻe he ʻOtuá ke “tauhi ʻa Sihova ʻaki ʻa e fiefia.” (Sāme 100:2) Ko hono moʻoní, ko e monūʻia taʻe ala mafakafuofua hono mahuʻingá ke fai ʻa e ngāue toputapu ki he “ʻOtua ko Sihova, ko e Māfimafiʻia,” ko e “Tuʻi ʻo e kuonga taʻengata”! (Fakahā 15:3, NW) Kapau ʻe lōmekina koe ʻe he ngaahi ongoʻi ʻoku siʻi ho ʻaongá pe mahuʻingá, ʻe tokoni nai ke ke ʻiloʻi kuo tohoaki koe ʻe Sihova kiate ia ʻo fakafou ʻia Sīsū Kalaisi pea kuó ne ʻoatu kiate koe ʻa e faingamālie ke kau ʻi he “ngāue toputapu ʻo e ongoongolelei ʻo e ʻOtua.” (Loma 15:16, NW; Sione 6:44; 14:6) Ko ha toki ngaahi ʻuhinga lahi ē ke fiefia pea mo houngaʻia ki he ʻOtuá!
8. ʻI he fekauʻaki mo Pāpilone ko e Lahí, ko e hā ʻa e ʻuhinga ke fiefia ʻoku maʻu ʻe he kakai ʻa e ʻOtuá?
8 Ko e toe ʻuhinga ke tau fiefia ai ko e tauʻatāina kuo foaki mai kiate kitautolu ʻe he ʻOtuá mei Pāpilone ko e Lahi, ko e ʻemipaea ʻo e lotu loí ʻi māmani lahi. (Fakahā 18:2, 4, 5) Neongo ko e fefine feʻauaki ko ení ʻokú ne “nofo [fakaefakatātā] ki he ngaahi vai lahi,” ʻo ʻuhinga “ko e ngaahi faʻahinga ia, mo e ngaahi fuʻu kakai, mo e ngaahi puleʻanga, mo e ngaahi lea,” ʻoku ʻikai te ne nofo, pe tākiekina mo puleʻi, ʻa e kau sevāniti ʻa Sihová. (Fakahā 17:1, 15) ʻOku tau fiefia ʻi hono maʻu ʻa e maama maʻongoʻonga ʻa e ʻOtuá, lolotonga ia ʻoku ʻi he fakapoʻuli fakalaumālie ʻa e kau poupou ʻo Pāpilone ko e Lahí. (1 Pita 2:9) ʻIo, ʻe faingataʻa nai ke maʻu ʻa e mahino ki he niʻihi ʻo e “ngaahi loloto ʻo e ʻOtua.” (1 Kolinitō 2:10) Ka ʻoku tokoniʻi kitautolu ʻe he ngaahi lotu ʻo kole ke maʻu ʻa e potó pea mo e tokoni ʻa e laumālie māʻoniʻoní ke mahino kiate kitautolu ʻa e moʻoni faka-Tohitapu ʻa ia ʻokú ne fakatauʻatāinaʻi fakalaumālie ʻa e faʻahinga ʻoku nau maʻu iá.—Sione 8:31, 32; Sēmisi 1:5-8.
9. Ko e hā ʻa e meʻa kuo pau ke tau fai kae malava ke hokohoko atu ʻa ʻetau tauʻatāina mei he fehalaaki fakalotú?
9 ʻOku tau maʻu ʻa e tāpuaki ko e hokohoko atu ʻa hono maʻu ʻa e tauʻatāina mei he fehalaaki fakalotú, ka kuo pau ke tau talitekeʻi ʻa e tafoki mei he moʻoní kae lava ke tau tauhi maʻu ʻa e tauʻatāina ko iá. Naʻe lelei ʻa e lele ʻi he fakapuepue faka-Kalisitiané ʻa e kau Kalētiá, ka naʻe ʻi ai ha niʻihi naʻe taʻofi kinautolu mei he talangofua ki he moʻoní. Naʻe ʻikai mei he ʻOtuá ʻa e faʻahinga fakalotoʻi anga-fulikivanu peheé pea naʻe totonu ke talitekeʻi ia. Hange tofu pē ko hono fakatupu ʻe ha kiʻi meʻi lēvani ʻa e takaongá kotoa, ʻoku lava ke fakameleʻi ʻa e fakatahaʻangá fakakātoa ʻe he kau faiako loí pe hehema ki he tafoki mei he moʻoní. Ko e loto ʻo Paula ki he kau poupou ʻo e kamú naʻa nau feinga ke maumauʻi ʻa e tui ʻa e kau Kalētiá ke ʻoua ʻe ngata pē ʻi honau kamú kae maumauʻi honau ʻōkani fakafanaú. Ko e lea mamafa moʻoni eni ē! Ka ʻoku totonu ke pehē ʻa ʻetau loto-maʻu ʻi hono talitekeʻi ʻa e tafoki mei he moʻoní kae lava ke tau tauhi maʻu ʻetau tauʻatāina kuo foaki mai ʻe he ʻOtuá ke ʻatā mei he fehalaaki fakalotú.—Kalētia 5:7-12.
Nofo Fetamaioʻeikiʻaki ʻi he ʻOfa
10. Ko e hā hotau fatongia ʻi he hoko ko e konga ʻo e fetokouaʻaki faka-Kalisitiané?
10 Ko e tauʻatāina kuo foaki mai ʻe he ʻOtuá kuó ne ʻomai kitautolu ki he feohiʻanga ko e fetokouaʻaki anga-ʻofa, ka kuo pau ke tau fakahoko hotau ngafá ʻo fakahā ʻa e ʻofá. Naʻe totonu ki he kau Kalētiá ke ʻoua ʻe ngāueʻaki ʻenau tauʻatāiná ko “ha ava ki he kakano” pe ko ha kalofanga ia ke nau siokita mo taʻeanga-ʻofa ai. Naʻe totonu ke nau nofo fetamaioʻeikiʻaki ʻi hono ueʻi kinautolu ʻe he ʻofá. (Livitikō 19:18; Sione 13:35) Kuo pau kiate kitautolu foki ke fakaʻehiʻehi mei he lauʻikovi mo e fetaūfehiʻaʻaki ʻa ia ʻe lava ke iku ai ke tau fetāmateʻaki ʻiate kitautolu. Ko hono moʻoní, heʻikai ke hoko ʻa e meʻá ni ʻo kapau te tau fakahā ʻa e ʻofa fetokouaʻakí.—Kalētia 5:13-15.
11. ʻOku malava fēfē ke tau hoko ko e tāpuaki ki he kakaí, pea ko e hā ʻa e founga te nau tāpuakiʻi nai ai kitautolú?
11 ʻI heʻetau ngāueʻaki ʻa e tauʻatāina kuo foaki mai kiate kitautolu ʻe he ʻOtuá ʻo fehoanaki mo e tataki ʻa e laumālie ʻo e ʻOtuá, te tau fakahā ai ʻa e ʻofá pea hoko ia ko ha tāpuaki ki he niʻihi kehe. ʻOku totonu ke tau hoko ʻo angaʻaki ʻa hono fakaʻatā kitautolu ke puleʻi mo tataki kitautolu ʻe he laumālie māʻoniʻoní. ʻI he hoko ʻa e meʻá ni heʻikai leva te tau hehema ke taʻeʻofa ʻo fakafiemālieʻi hotau kakano angahalaʻiá ʻa ia “ʻoku holituʻu . . . ʻo fakafepaki ki he laumalie.” Kapau ʻoku tataki kitautolu ʻe he laumālie ʻo e ʻOtuá, te tau fai ʻa e meʻa ʻoku anga-ʻofá kae ʻikai koeʻuhi ko e ngaahi lao ʻoku nau kounaʻi ke tau muimui ki ai pea ʻoku nau fakahoko ha tautea ki he kau faihalá. Hangē ko ení, ko e ʻofá, kae ʻikai ko ha lao pē, te ne taʻofi kitautolu mei hono lauʻikovi loi ʻa e niʻihi kehé. (Livitikō 19:16) ʻE ueʻi kitautolu ʻe he ʻofá ke lea mo fai ʻa e ngaahi meʻa anga-ʻofá. ʻE tāpuakiʻi pe fakaongoongoleleiʻi kitautolu ʻe he kakaí ʻi heʻetau fakahāhā ʻa e fua ʻo e laumālié ko e ʻofá. (Palōvepi 10:6) ʻIkai ko ia pē, ka ʻe hoko ko ha tāpuaki kiate kinautolu ʻi heʻenau feohi mo kitautolú.—Kalētia 5:16-18.
Ngaahi Fua Kehekehe
12. Ko e hā ʻa e niʻihi ʻo e ngaahi tāpuaki ʻoku hoko tupu mei he fakaʻehiʻehi mei he “ngaahi ngaue” angahalaʻia “ʻa kakano”?
12 ʻOku lahi ʻa e ngaahi tāpuaki ʻoku kaunga ki heʻetau tauʻatāina kuo foaki mai ʻe he ʻOtuá ʻoku hoko tupu mei heʻetau fakaʻehiʻehi mei he “ngaahi ngaue” angahalaʻia “ʻa kakano.” ʻI he tuʻunga fakalūkufuá, ko kitautolu ko e kakai ʻa e ʻOtuá, ʻoku tau hao mei he loto-mamahi lahi koeʻuhi he ʻoku ʻikai te tau fai ʻa e feʻauaki, angaʻuli mo e ʻulungaanga pauʻu. ʻI heʻetau fakaʻehiʻehi mei he tauhi ʻaitolí ʻoku tau maʻu ai ʻa e fiefia ko e ola ia ʻo hono fakahōifuaʻi ʻa Sihová ʻi he fekauʻaki mo e meʻá ni. (1 Sione 5:21) ʻOku ʻikai ke puleʻi kitautolu ʻe he kau tēmeniō he ʻoku ʻikai te tau fai ʻa e fakahaʻele faʻahikehé. ʻOku ʻikai ke fakameleʻi ʻa ʻetau fetokouaʻaki faka-Kalisitiané ʻe he fetāufehiʻaʻakí, fetuʻusí, meheká, feʻiteʻitaní, fakafelaulauhí, fakavahavahaʻá, fakafaʻafaʻahí, mo e femehekaʻakí. Pea ʻoku ʻikai ke mole meiate kitautolu ʻetau fiefiá he ʻoku ʻikai te tau hoko ʻo konā pea faʻa kai ʻo fuʻu lahi. Naʻe fai fakatokanga ʻa Paula ʻo pehē ko kinautolu ʻoku nau fai ʻa e ngaahi ngāue ʻa e kakanó heʻikai te nau hokosi ʻa e Puleʻanga ʻo e ʻOtuá. Kaekehe, ʻe lava ke tau piki maʻu ki he ʻamanaki fiefia ʻo e Puleʻangá koeʻuhi he ʻoku tau tokanga ki heʻene ngaahi leá.—Kalētia 5:19-21.
13. Ko e hā ʻa e fua ʻoku fakatupu ʻe he laumālie māʻoniʻoni ʻo Sihová?
13 ʻOku ʻomai ʻe he tauʻatāina kuo foaki mai ʻe he ʻOtuá ʻa e fiefia koeʻuhi ʻoku fakahāhā ai ʻe he kau Kalisitiané ʻa e fua ʻo e laumālie ʻo Sihová. ʻOku faingofua ʻa hono fakatokangaʻi mei he ngaahi lea ʻa Paula ki he kau Kalētiá ko e ngaahi ngāue ʻo e kakano angahalaʻiá ʻoku hangē ko e ngaahi vao talatalá ʻi hono fakafehoanaki mo e fua fakaʻofoʻofa ʻo e laumālié ko e ʻofá, ko e fiefia, ko e melino, ko e kātaki fuoloa, ko e anga-ʻofa, ko e anga-lelei, ko e tui, ko e anga-malū mo e mapuleʻi-kita ʻa ia kuo tō ki he ngaahi loto anga-fakaʻotuá. ʻI heʻetau fakapapau ke ʻoua te tau moʻuiʻaki ʻa e ngaahi holi ʻo e kakano angahalaʻiá, ʻoku tau loto ke tataki kitautolu ʻe he laumālie ʻo e ʻOtuá pea ke moʻuiʻaki ia. ʻOku ʻai kitautolu ʻe he laumālié ke tau anga-fakatōkilalo mo fakatupu-melino, kae ʻikai te tau “fieongoongo, ʻo fepolepolei mo femehekaʻaki.” Tā neʻineʻi ke hoko ko e meʻa fakafiefia ia ke feohi mo e faʻahinga ʻoku nau fakahāhā ʻa e fua ʻo e laumālié!—Kalētia 5:22-26.
Ngaahi ʻUhinga Kehe ke Fiefia Ai
14. Ko e hā ʻa e mahafu tau ʻoku fiemaʻu kiate kitautolu ʻi heʻetau faitau mo e ngaahi kongakau laumālie anga-fulikivanú?
14 ʻOku toe kau ki heʻetau tauʻatāina fakalaumālie kuo foaki mai ʻe he ʻOtuá ʻa e tāpuaki ko hono maluʻi kitautolu meia Sētane mo e kau tēmeniō. Kuo pau ke tau ʻai ʻa e “mahafu tau kotoa oe Otua” kae lava ke tau lavameʻa ʻi heʻetau fangatua mo e ngaahi kongakau laumālie anga-fulikivanú. ʻOku fiemaʻu kiate kitautolu ke tau nonoʻo ʻaki ʻa e moʻoní pea ʻai ʻi he fatafatá ʻa e sifa ko e māʻoniʻoní. Kuo pau ke tau topuvaʻe ʻaki ʻa e teuteu ʻo e ongoongolelei ʻo e melinó. ʻOku toe fiemaʻu foki ʻa e pā lahi ko e tuí, ʻa ia te tau lava ke tāmateʻi ʻaki ʻa e ngaahi ngahau vela kotoa pē ʻa e tokotaha anga-fulikivanú. Kuo pau ke tau ʻai ʻa e tatā ko e fakamoʻui pea toʻo ʻa e “heleta oe laumalie,” ko e Folofola ʻa e ʻOtuá. Tau toe “lotu tāumau i he laumalie.” (ʻEfesō 6:11-18, PM) Kapau te tau ʻai ʻa e mahafu tau fakalaumālié pea mo talitekeʻi ʻa e ngaahi meʻa fakatēmenioó, ʻoku malava ai ke tau taʻemanavahē mo fiefia.—Fehoanaki mo Ngāue 19:18-20.
15. Ko e hā ʻa e tāpuaki fakafiefia ʻoku lava ke tau maʻu ʻi heʻetau ʻai hotau ʻulungaangá ke fehoanaki mo e Folofola ʻa e ʻOtuá?
15 ʻOku tau maʻu ʻa e fiefiá koeʻuhi ko hotau ʻulungaangá ʻokú ne fehoanaki mo e Folofola ʻa e ʻOtuá, pea ʻoku tau ʻatā mei he ongoʻi halaia ʻa ia ʻokú ne fakahohaʻasi ʻa e kau faihala tokolahi. ʻOku tau ‘nofoʻaki ngaue ai ke tauhi maʻu hotau konisēnisí ke taʻe melengatamaki ki he ʻOtuá mo e tangatá.’ (Ngāue 24:16) Ko ia ai, ʻoku ʻikai te tau manavahē ki he sauni fakaeʻotuá ʻa ia ʻe hoko ki he kau angahala fai fakakaukauʻi pē mo taʻefakatomalá. (Mātiu 12:22-32; Hepelū 10:26-31) ʻI heʻetau ngāueʻaki ʻa e akonaki ʻia Palōvepi 3:21-26, ʻoku tau hoko ʻo ʻiloʻi ʻa hono fakahoko ʻo e ngaahi leá ni: “Tauhi ʻa tokoni mo fakakaukau; ko e moʻui leva ia ki ho laumalie, mo e teunga ki ho kia. Te ke toki ʻalu nonga pe ʻi ho hala, pea ʻe ʻikai tukia ho vaʻe. ʻOka ke ka tokoto, ʻe ʻikai te ke manavahe: Io, te ke tokoto, pea holo hoʻo mohe. ʻOua te ke manavahe ki ha hoko fokifa ha fakailifia, pe ʻi he to mai ha haʻahaaʻi matangi ʻa ha kau angahala: He ko Sihova leva ho falalaʻanga, pea te ne tauhi ho vaʻe ke ʻoua naʻa moʻua.”
16. ʻOku fēfē ʻa e hoko ʻa e lotú ko ha toe ʻuhinga ia ke tau fiefia ai, pea ko e hā ʻa e kaunga ʻa e laumālie ʻo Sihová ʻi he meʻá ni?
16 Ko e toe ʻuhinga ke tau fiefia ai ko e tauʻatāina kuo foaki mai ʻe he ʻOtuá ke tau fakaofiofi kia Sihova ʻi he lotu ʻo tau ʻilo pau ai ʻe fanongoa kitautolu. ʻIo, ʻoku tali ʻa ʻetau ngaahi lotú koeʻuhi ʻoku tau maʻu ʻa e “manavahe kia Jihova” ʻo ʻapasia kiate ia. (Palōvepi 1:7, PM) ʻIkai ngata ai, ʻoku tokoniʻi ai kitautolu ke tauhi kitautolu ʻi he ʻofa ʻa e ʻOtuá ʻaki hono fai ʻa e “lotu ʻi he laumalie maʻoniʻoni.” (Siutasi 20, 21) ʻOku tau fai eni ʻaki ʻetau fakahā ʻa e tuʻunga ʻo e lotó ʻoku fakahōifua kia Sihová pea ʻi heʻetau lotu ʻi he tākiekina ʻa e laumālié ke maʻu ʻa e ngaahi meʻa ʻoku fehoanaki mo hono finangaló mo ʻene Folofolá, ʻa ia ʻokú ne fakahā kiate kitautolu ʻa e founga ke lotu ai pea mo e meʻa ke kole ʻi he lotú. (1 Sione 5:13-15) Kapau ʻoku tau ʻi he tuʻunga faingataʻa ʻaupito pea ʻoku ʻikai te tau ʻiloʻi ʻa e meʻa ke tau lotu ʻo kau ki ai, ‘ko e laumalie ʻoku ne tokoniʻi ʻetau vaivai, ʻoku ne hufekina ʻe ia ʻa kitautolu ʻaki ʻa e ngaahi toʻe ʻoku ʻikai faʻa lea ʻaki.’ ʻOku tali ʻe he ʻOtuá ʻa e faʻahinga lotu peheé. (Loma 8:26, 27) Tau lotu ʻo kole ke maʻu ʻa e laumālie māʻoniʻoní pea fakaʻatā ia ke ne fakatupu ʻiate kitautolu ʻa e ngaahi fua ʻoku fakatautefito ʻa hono fiemaʻú kae lava ke fekuki ai mo ha faʻahinga ʻahiʻahi. (Luke 11:13) ʻE toe fakautuutu foki ʻa ʻetau fiefiá ʻo kapau te tau lotu mo ako tōtōivi ʻa e Folofola fakamānavaʻi ʻe he laumālie ʻo e ʻOtuá pea mo e ngaahi tohi faka-Kalisitiane kuo teuteu ʻi he malumalu ʻo e tākiekina ʻa e laumālié.
Tāpuakiʻi ʻAki ʻa e Tokoni ʻOku ʻi Ai Maʻu Pē
17. ʻOku fēfē hono fakahā ʻe he ngaahi meʻa naʻe hokosia ʻe Mōsesé pea mo e ngaahi lea ʻa Tēvitá ko Sihová ʻoku ʻi Heʻene kakaí?
17 ʻI heʻetau ngāuetotonuʻaki ʻa e tauʻatāina kuo foaki mai ʻe he ʻOtuá, ʻoku tau maʻu ʻa e fiefia ʻi hono ʻiloʻi ʻoku ʻiate kitautolu ʻa Sihová. ʻI hono fakatupunga ʻe he ngaahi tuʻunga faingataʻá ke mavahe ʻa Mōsese mei ʻIsipité, ʻi heʻene maʻu ʻa e tuí “naʻa ne kitaki heʻene sio ki he Tuʻi taʻehamai.” (Hepelū 11:27) Naʻe ʻikai ke ʻaʻeva tokotaha pē ʻa Mōsese; naʻá ne ʻilo naʻe ʻiate ia ʻa Sihova. ʻI he ʻuhinga meimei tatau pē, naʻe hiva ʻa e ngaahi foha ʻo Kolá ʻo pehē: “Ko e hufanga ʻa e ʻOtua kiate kitautolu, mo ha malohi, ko e tokoni ʻi he mamahi matuʻaki ofi. Ko ia ai ʻe ʻikai te tau manavahe neongo ʻe liliu ʻa mamani, pea hiki ʻa e ngaahi moʻunga ki loto tahi; Neongo e uʻulu mo hou hono ngaahi peau na, mo tetetete ʻa e ngaahi moʻunga ʻi heʻene fakapupula.” (Sāme 46:1-3) Kapau ʻokú ke maʻu ʻa e faʻahinga tui pehē ki he ʻOtuá, heʻikai ʻaupito te ne liʻaki koe. Naʻe pehē ʻe Tēvita: “Neongo ʻe liʻaki au ʻe heʻeku tamai mo ʻeku faʻe, ʻe fakahoko au ʻe Sihova kiate ia pe.” (Same 27:10) Ko ha toki fiefia lahi ē ʻoku tau maʻu ʻi hono ʻiloʻi ʻoku lahi pehē ʻa e tokanga mai ʻa e ʻOtuá ki heʻene kau sevānití!—1 Pita 5:6, 7.
18. Ko e hā ʻoku maʻu ai ʻe he faʻahinga ʻoku maʻu ʻa e fiefia ʻa Sihová ʻa e tauʻatāina kuo foaki mai ʻe he ʻOtuá mei he taulōfuʻu ʻa e lotomoʻuá?
18 ʻI hono maʻu ʻa e fiefia ʻa Sihová, ʻoku tau maʻu ai ʻa e tauʻatāina kuo foaki mai ʻe he ʻOtuá mei he taulōfuʻu ʻa e loto-moʻuá. Naʻe pehē ʻe Paula: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:6, 7) Ko e nonga pe melino ʻa e ʻOtuá ko e nonga taʻealafakatatauʻi ʻo aʻu ki he taimi ʻoku hoko ai ʻa e ngaahi tuʻunga fakatupu faingataʻaʻia lahi ʻaupitó. ʻOku nonga hotau lotó ʻi hono maʻu iá—ko ha meʻa ʻoku ʻaonga kiate kitautolu ʻi he founga fakalaumālie, fakaeongo mo e fakaesino. (Palōvepi 14:30) ʻOkú ne toe tokoniʻi kitautolu ke tauhi maʻu ʻa e fakakaukau mafamafatatau, he ʻoku tau ʻilo ʻoku ʻikai ha meʻa ʻoku fakangofua ʻe he ʻOtuá ʻe lava ke ne uesia tuʻuloa kitautolu. (Mātiu 10:28) ʻOku tau maʻu ʻa e melino ko ení ʻa ia ʻoku tupu mei he vahaʻangatae vāofi mo e ʻOtuá fou ʻia Kalaisi koeʻuhi he kuo tau fakatapui kia Sihova pea ʻoku tau anganofo ki he tākiekina ʻa hono laumālié, ʻa ia ʻokú ne fakatupu ʻa e ngaahi fua ʻo hangē ko e fiefiá mo e melinó.
19. Ko hono tuku hotau lotó ki he hā ʻe tokoniʻi ai kitautolu ke tau fiefia?
19 Ko hono tuku hotau lotó ʻi he tauʻatāina kuo foaki mai ʻe he ʻOtuá pea mo e ʻamanaki ʻo e Puleʻangá ʻe tokoniʻi ai kitautolu ke tau fiefia. Ko e fakatātā, ʻi he taimi ʻe niʻihi ʻe siʻisiʻi ʻa e meʻa ʻe lava ke fai ke fakaleleiʻi ʻa e moʻui fakaesino ʻoku koví, ka ʻe lava ke tau lotu ʻo kole ʻa e potó mo e mālohi ke fekuki mo ia pea tau maʻu nai ʻa e fiemālie ʻi he fakakaukau atu ʻo kau ki he moʻui lelei fakalaumālie ʻoku tau lolotonga maʻú pea mo e ngaahi fakamoʻui fakaesino ʻe hoko ʻi he malumalu ʻo e pule ʻa e Puleʻangá. (Sāme 41:1-3; ʻAisea 33:24) Neongo kuo pau ke tau kātakiʻi nai ʻa e tuʻunga masiva he taimi ní, heʻikai ke nounou ʻa e ngaahi meʻa ʻoku ʻikai ala tuku ki he moʻuí ʻi he Palataisi ʻi māmani ʻa ia ʻoku fuʻu ofí ni maí. (Sāme 72:14, 16; ʻAisea 65:21-23) ʻIo, ʻe tokoniʻi kitautolu he taimí ni ʻe heʻetau Tamai fakahēvaní pea ʻi he kahaʻú te ne fakakakato ai ʻetau fiefiá.—Sāme 145:14-21.
Koloaʻaki ʻa Hoʻo Tauʻatāina Kuo Foaki Mai ʻe he ʻOtuá
20. Fakatatau ki he Sāme 100:1-5, ʻoku totonu ke fēfē ʻa ʻetau hū ki he ʻao ʻo Sihová?
20 ʻI he tuʻunga ko e kakai ʻa Sihová, ʻoku totonu ke tau koloaʻaki ʻa e tauʻatāina kuo foaki mai ʻe he ʻOtuá ʻa ia kuó ne ʻomai kiate kitautolu ʻa e fiefiá mo e ngaahi tāpuaki lahi. Tā neʻineʻi ke naʻinaʻi mai ʻe Sāme 100:1-5 ke tau hū ki he ʻao ʻo e ʻOtuá “mo e kaikaila.” ʻOku tau kau kia Sihova pea ʻokú ne tokanga mai kiate kitautolu ʻi hono tuʻunga ko e Tauhisipi anga-ʻofa. ʻIo, ko kitautolú “ko e kakai aʻana, ko e sipi ʻoku ne fafanga.” Ko hono tuʻunga ko e Tokotaha-Fakatupú pea mo hono ngaahi ʻulungaanga maʻongoʻongá ʻoku nau ueʻi kitautolu ke tau hū ki he ngaahi lotoʻā ʻo hono fale tapú mo e fakamālō mo e fakafetaʻi. ʻOku ueʻi kitautolu ke “fakamālō ki hono huafa,” ke fakaongoongoleleiʻi ʻa e ʻOtua ko Sihová. ʻIkai ko ia pē, ʻe lava ke tau falala maʻu pē ki heʻene ʻaloʻofá, pe tokanga fakaʻatuʻi kiate kitautolú. ʻOku angatonu ʻa Sihova “ki he toʻutangata mo e toʻutangata,” ʻo maʻumaʻuluta ʻi heʻene fakahā ʻa e anga-ʻofá kiate kinautolu ʻoku nau fai hono finangaló.
21. Ko e hā ʻa e fakalototoʻa naʻe ʻomai ʻi he ʻuluaki ʻīsiu ʻo e makasini ko ení, pea ko e hā ʻa e meʻa ʻoku totonu ke tau fai ʻi he fekauʻaki mo e tauʻatāina kuo foaki mai ʻe he ʻOtuá?
21 ʻI he tuʻunga ko e faʻahinga ʻo e tangata taʻehaohaoá, heʻikai malava ke tau hao he taimí ni mei he ngaahi ʻahiʻahi kotoa pē. Kaekehe, ʻe lava ke tau hoko ko e Kau Fakamoʻoni ʻa Sihova ʻoku loto-toʻa mo fiefia ʻi he tokoni fakaʻotuá. ʻI he fekauʻaki mo e meʻá ni ʻoku taau ke tokangaʻi ʻa e ngaahi lea ko ʻeni naʻe ʻasi ʻi he ʻuluaki ʻīsiu ʻo e makasini ko ení (Siulai 1879): “Mou loto-toʻa . . . hoku tokoua pe tuofefine Kalisitiane, ʻa ia ʻokú ne feinga ʻi he ongosia ke fou ʻi he hala fāsiʻí. ʻOua te ke tokanga ki he ʻalunga faingataʻá; kuo fakatoputapu ia ʻe he vaʻe monūʻia ʻo e ʻEikí. Mou lau ʻa e vao talatala kotoa ko e matalaʻiʻakau; ko e maka māsila kotoa pē ko e maka lau-maile, ʻa ia ʻokú ne fakavaveʻi koe ki he taumuʻa. . . . Fokotuʻu ho matá ki he palé.” ʻOku fokotuʻu ʻe he laui miliona ʻoku nau lolotonga tauhi ʻa Sihová ʻa honau matá ki he palé pea ʻoku lahi ʻa e ngaahi ʻuhinga ke nau loto-toʻa mo fiefia ai. Tuʻu maʻu fakataha mo kinautolu ʻi he tauʻatāina kuo foaki mai ʻe he ʻOtuá. ʻOua ʻe tukunoaʻi hono taumuʻá, pea ʻofa ke hoko maʻu ai pē ʻa e fiefia ʻa Sihová ko ho mālohi.
ʻE Fēfē Haʻo Tali?
◻ ʻE lava fēfē ke hoko ʻa e “fiefia a Jihova” ko hotau mālohi?
◻ ʻI he lave ki he ngaahi meʻa fakalotú, ko e hā ʻa e ngaahi tāpuaki kuo ʻomai ki he kakai ʻa Sihová ʻe he tauʻatāina kuo foaki mai ʻe he ʻOtuá?
◻ Ko e hā ke nofo fetamaioʻeikiʻaki ai ʻi he ʻofá?
◻ Ko e hā ʻa e ngaahi tāpuaki ʻe niʻihi ʻoku fekauʻaki mo e tauʻatāina kuo foaki mai ʻe he ʻOtuá?
◻ ʻOku malava fēfē ke nofo maʻu ʻo fiefia ʻa e kakai ʻa e ʻOtuá?
[Fakatātā ʻi he peesi 25]
“Mou lau ʻa e vao talatala kotoa ko e matalaʻiʻakau; ko e maka māsila kotoa pē ko e maka lau-maile, ʻa ia ʻokú ne fakavaveʻi koe ki he taumuʻa”