“Mou Fakahīkihikiʻi ʻa Iā!”​—Ko e Hā Hono ʻUhingá?

1-3. (a) ʻOku ngalingali naʻe hiki ʻanefē ʻa e Saame 147? (e) Ko e hā ʻe lava ke tau ʻilo mei hono ako ʻa e Saame 147?

ʻOKU tau faʻa fakahīkihikiʻi ha taha ʻi he taimi ʻoku maongo ai kiate kitautolu ha meʻa naʻá ne leaʻaki pe fai. Huanoa ange ai hono ueʻi kitautolu ke tau fakahīkihikiʻi ʻa Sihova ko e ʻOtuá! ʻOku tau fakahīkihikiʻi ia ʻi hono fuʻu mālohí, ʻa ia ʻoku tau sio ki ai ʻi heʻene fakatupu fakaofó, pea ʻoku tau fakahīkihikiʻi ia ʻi heʻene ʻofa lahi kiate kitautolú, ʻa ia ʻoku tau ʻiloʻi ʻi he feilaulau huhuʻi ʻa hono ʻAló tonu.

² ʻI heʻetau lau ʻa e Saame 147, ʻoku hā mahino mei ai ʻa hono maʻu ʻe he tokotaha-tohí ha holi lahi ke fakahīkihikiʻi ʻa Sihova. Naʻá ne toe fakalototoʻaʻi foki ʻa e niʻihi kehé ke nau fakahīkihikiʻi ʻa e ʻOtuá fakataha mo ia.​—Lau ʻa e Saame 147:1, 7, 12.

³ ʻOku ʻikai ke tau ʻiloʻi pe ko hai naʻá ne hiki ʻa e Saame 147. Ka ʻoku ngalingali naʻe moʻui ʻa e tokotaha-tohí lolotonga ʻa e taimi naʻe foki ai ʻa e kau ʻIsilelí ki Selusalema hili hono fakatauʻatāinaʻi kinautolu ʻe Sihova mei Pāpiloné. (Saame 147:2) Naʻe fakahīkihikiʻi ʻe he tokotaha-tohi-sāmé ʻa Sihova koeʻuhí he naʻe toe lava ke lotu ʻa Hono kakaí ʻi honau fonuá tonu. Naʻe ʻomai leva ʻe he tokotaha-tohi-sāmé ha toe ʻuhinga lahi ange ke fakahīkihikiʻi ʻa Sihova. Ko e hā ʻa e ngaahi ʻuhinga ko iá? Pea ko e hā ʻa e ngaahi ʻuhinga ʻokú ke maʻu ke kaila ai “Haleluia!,” pe “Mou fakahīkihikiʻi ʻa Iā!”?​—Saame 147:1, fakamatala ʻi lalo.

 4. ʻI hono fakatauʻatāinaʻi ʻe Tuʻi Kōlesi ʻa e kau ʻIsilelí, ʻoku pau naʻa nau ongoʻi fēfē, pea ko e hā hono ʻuhingá?

⁴ Sioloto atu ki he ongoʻi ʻoku pau naʻe maʻu ʻe he kau ʻIsilelí ʻi he taimi naʻe fakaheeʻi ai kinautolu ʻi Pāpiloné. Ko e faʻahinga naʻa nau ʻave kinautolu ki aí naʻa nau fakakataʻaki kinautolu pea nau pehē: “Hivaʻi mai kiate kimautolu ʻa e taha ʻo e ngaahi hiva ʻo Saioné.” Ka naʻe ʻikai ke ongoʻi ʻe he kau Siú ʻoku nau fie hiva. Ko Selusalema, ʻa e ʻuhinga lahi taha ʻo ʻenau fiefiá, kuo fakaʻauha. (Saame 137:1-3, 6) Naʻe mamahi ʻa honau lotó, pea naʻa nau fiemaʻu ha fakafiemālie. Kae hangē tofu pē ko e meʻa naʻe tomuʻa tala ʻe he folofola ʻa e ʻOtuá, naʻe tokoniʻi ʻe Sihova ʻa hono kakaí. Anga-fēfē? Naʻe ikunaʻi ʻe Tuʻi Kōlesi ʻo Pēsiá ʻa Pāpilone pea naʻá ne pehē ʻo fekauʻaki mo Sihova: “Kuó ne fekau au ke u langa moʻona ha fale ʻi Selusalema.” Naʻe toe tala ʻe Kōlesi ki he kau ʻIsilelí: “ʻIlonga ʻa kimoutolu ʻoku ʻi he lotolotonga ʻo hono kakaí kotoa, ʻofa ke ʻiate ia ʻa Sihova ko hono ʻOtuá, pea tuku ke ne ʻalu hake.” (2 Kal. 36:23) He pau moʻoni ē naʻe fakafiemālieʻi ʻe he meʻá ni ʻa e kau ʻIsilelí ʻi Pāpilone!

 5. Ko e hā naʻe leaʻaki ʻe he tokotaha-tohi-sāmé fekauʻaki mo e mālohi ʻo Sihova ke ne fakamoʻui kitautolú?

⁵ Naʻe fakafiemālieʻi ʻe Sihova ʻo ʻikai ngata pē ʻi he puleʻanga ʻo ʻIsilelí kae toe pehē foki ki he tokotaha ʻIsileli taki taha. ʻOku fai ʻe Sihova ʻa e meʻa tatau maʻatautolu he ʻahó ni. Naʻe tohi ʻe he tokotaha-tohi-sāmé ʻo pehē ko e ʻOtuá “ʻokú ne fakamoʻui ʻa e faʻahinga ʻoku loto-laveá; ʻokú ne haʻihaʻi ʻa honau laveá.” (Saame 147:3) ʻI he taimi ʻoku tau puke ai pe loto-mafasiá, ʻoku lava ke tau fakapapauʻi ʻoku tokanga mai ʻa Sihova kiate kitautolu. ʻOku vēkeveke ʻa Sihova ke ne fakafiemālieʻi kitautolu pea faitoʻo ʻa hotau ngaahi lavea fakaeongó. (Saame 34:18; ʻAi. 57:15) ʻOkú ne foaki mai kiate kitautolu ʻa e poto mo e mālohi koeʻuhi ke tau lava ai ʻo fekuki mo ha ngaahi palopalema pē nai ʻoku tau maʻu.​—Sēm. 1:5.

 6. ʻOku lava fēfē ke tau maʻu ʻaonga mei he lea ʻa e tokotaha-tohi-sāmé ʻi he Saame 147:4? (Sio ki he ʻuluaki fakatātā ʻi he kupú ni.)

⁶ Ko hono hokó naʻe hanga hake ʻa e tokotaha-tohi-sāmé ki he langí peá ne pehē ko Sihová ʻokú ne “lau ʻa e lahi ʻo e ngaahi fetuʻú” peá ne “ui kinautolu kotoa ʻaki honau hingoa.” (Saame 147:4) Naʻe lava ke sio ʻa e tokotaha-tohi-sāmé ki he ngaahi fetuʻú, ka naʻe ʻikai haʻane ʻilo pe ʻoku fiha tofu pē ʻa e ngaahi fetuʻú. ʻI he ʻahó ni, ʻoku ʻiloʻi ʻe he kau saienisí ʻoku ʻi ai ʻa e ngaahi fetuʻu ʻe laui piliona ʻi hotau kanivá. Pea ʻoku ʻi ai nai ʻa e ngaahi kaniva ʻe laui tiliona ʻi he ʻunivēsí! ʻOku ʻikai lava ke lau ʻe he tangatá ʻa e kotoa ʻo e ngaahi fetuʻú, ka ʻoku malava ia ʻe he Tokotaha-Fakatupú. Ko hono moʻoní, ʻokú ne ʻiloʻi lelei ʻa e foʻi fetuʻu taki taha ʻo ne fakahingoa taki taha kinautolu. (1 Kol. 15:41) Ko e ʻOtua ko ia ʻokú ne ʻiloʻi ʻa e feituʻu ʻoku ʻi ai ʻa e foʻi fetuʻu taki taha ʻokú ne ʻiloʻi foki mo koe. ʻOkú ne ʻiloʻi maʻu pē ʻa e feituʻu tofu pē ʻokú ke ʻi aí, anga hoʻo ongoʻí, pea mo e meʻa ʻokú ke fiemaʻú!

7, 8. (a) Ko e hā ʻoku mahinoʻi ʻe Sihova fekauʻaki mo kitautolú? (e) ʻOmai ha fakatātā ʻoku fakahaaʻi ai ʻa e manavaʻofa ʻa Sihová.

⁷ ʻOku mahinoʻi ʻe Sihova ʻa e meʻa ʻokú ke fou aí, pea ʻokú ne maʻu ʻa e mālohi ke tokoniʻi koe ʻi hoʻo ngaahi palopalemá. (Lau ʻa e Saame 147:5.) ʻOkú ke ongoʻi nai ʻoku fuʻu faingataʻa ho tuʻungá pea heʻikai lava ke ke fekuki mo ia. ʻOku mahinoʻi ʻe he ʻOtuá hotau ngataʻangá, ʻokú ne “manatu ko e efu pē kitautolu.” (Saame 103:14) ʻOku tau taʻehaohaoa, ko ia ʻoku tau toutou fai ʻa e ngaahi fehālaaki tatau, pea ʻoku tau ongoʻi loto-siʻi nai ai. He fakaʻiseʻisa ē ko kitautolu ʻi ha ngaahi meʻa pau kuo tau leaʻaki, ngaahi holi fehālaaki kuo tau ongoʻi, pe ngaahi ongoʻi meheka naʻa tau maʻu! Ko Sihová ʻoku ʻikai ke ʻi ai hano vaivaiʻanga ʻe taha, ka ʻokú ne mahinoʻi kakato ʻa e anga ʻo ʻetau ongoʻí.​—ʻAi. 40:28.

⁸ Kuó ke ongoʻi fakafoʻituitui ʻa hono tokoniʻi koe ʻe he e nima mālohi ʻo Sihová ke ke fakaakeake mei he ngaahi ʻahiʻahí? (ʻAi. 41:10, 13) Naʻe hoko eni ki ha tāimuʻa ko Kyoko. Hili ʻene hiki ki ha vāhenga-ngāue foʻou, naʻá ne loto-siʻi ʻaupito. Ka naʻe anga-fēfē hono ʻiloʻi ʻe Kyoko naʻe mahinoʻi ʻe Sihova ʻene ngaahi palopalemá? ʻI heʻene fakatahaʻanga foʻoú, naʻe ʻi ai ʻa e kakai tokolahi naʻe lava ke nau mahinoʻi ʻa ʻene ngaahi ongoʻí. Naʻá ne ongoʻi ai naʻe pehē mai ʻe Sihova: “ʻOku ou ʻofa ʻiate koe, ʻo ʻikai koeʻuhí pē ko ha tāimuʻa koe, ka koeʻuhí ko hoku ʻofefine koe pea naʻá ke fakatapui kiate au. ʻOku ou loto ke ke fiefia ʻi hoʻo moʻuí ʻi he tuʻunga ko e taha ʻo ʻeku Kau Fakamoʻoní!” Kuo anga-fēfē hono fakahaaʻi atu ʻe Sihova “ko ʻene mahinó ʻoku taʻehanongataʻanga”?

9, 10. Ko e hā ʻa e founga mahuʻinga taha ʻe tokoniʻi ai kitautolu ʻe Sihová? ʻOmai ha fakatātā.

⁹ ʻOku tau fiemaʻu kotoa ʻa e ngaahi meʻa hangē ko e meʻakai, vala, mo e maluʻanga. Mahalo pē ʻokú ke hohaʻa nai naʻa ʻikai maʻu ha meʻakai feʻunga ke ke kai. Ka naʻe ngaohi ʻe Sihova ʻa e māmaní ke ne ʻomai ʻa e meʻakai feʻunga ki he tokotaha kotoa, ʻo aʻu “ki he fanga kiʻi lēveni ʻoku nau tangi hake ki aí.” (Lau ʻa e Saame 147:8, 9.) Kapau ʻoku fafanga ʻe Sihova ʻa e fanga lēvení, ʻoku lava ke tau fakapapauʻi te ne tokonaki ki heʻetau ngaahi fiemaʻu fakamatelié.—Saame 37:25.

¹⁰ Ko e meʻa ʻoku mahuʻinga tahá, ʻoku tokonaki mai ʻe Sihova ʻa e meʻa ʻoku tau fiemaʻu ke tauhi ai ke mālohi ʻa ʻetau tuí, pea ʻokú ne ʻomai kiate kitautolu ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.” (Fil. 4:6, 7) Ko ha tokoua ko Mutsuo mo hono uaifí naʻá na mamata ki he anga hono tokoniʻi kinaua ʻe Sihová. ʻI hono taaʻi ʻe ha peau-kula ʻa Siapani ʻi he 2011, ko e mālō pē ʻena hao mei he maté ʻi heʻena kaka ki he ʻato ʻo hona falé. ʻI he ʻaho ko iá, naʻe mole ai meiate kinaua ʻa e meimei meʻa kotoa pē naʻá na maʻú. Naʻá na nofo ʻi he poʻulí ʻi ha loki fakapoʻuli mo momoko ʻi he fungavaka ua ʻo hona falé. ʻI he pongipongí, naʻá na kumi ki ha meʻa ʻe fakalototoʻa kiate kinaua. Ko e meʻa pē naʻe lava ke na maʻú ko e 2006 Yearbook of Jehovah’s Witnesses. ʻI he huke ʻe Mutsuo ʻa e pēsí, naʻá ne sio ai ki he kaveinga “Ko e Peau-Kula Fakatupu Mate Taha Kuo Faifai Ange pea Lēkōtí.” Ko e konga ko iá naʻe fekauʻaki ia mo ha mofuike ʻi Sumatalā ʻi he 2004 ʻa ia naʻá ne fakatupunga ʻa e peau-kula fakatupu ʻauha taha kuo faifai ange pea lēkōtí. Naʻe tangi ʻa Mutsuo mo hono uaifí ʻi heʻena lau ʻa e ngaahi hokosia ʻa hona fanga tokouá mo e fanga tuofāfiné. Naʻá na ongoʻi ai naʻe ʻoange ʻe Sihova kiate kinaua ʻa e fakalototoʻa tofu pē naʻá na fiemaʻú. Naʻe toe tokangaʻi kinaua ʻe Sihova ʻi ha ngaahi founga kehe. Ko hona fanga tokoua ʻi he ngaahi feituʻu kehe ʻo Siapaní naʻa nau tokonaki ʻa e meʻakai mo e vala kiate kinaua. Ka ko e meʻa naʻá ne fakaivimālohiʻi lahi taha kinauá ko e ngaahi ʻaʻahi ki he fakatahaʻangá naʻe fai ʻe he fanga tokoua naʻe fekauʻi mai ʻe he kautaha ʻa e ʻOtuá. ʻOku pehē ʻe Mutsuo: “Naʻá ku ongoʻi naʻe ʻi ai tonu ʻa Sihova ʻi homa tafaʻakí taki taha ʻo ne tokangaʻi kimaua. Ko ha fakafiemālie moʻoni ē!” ʻOku ʻuluaki tokonaki mai ʻe he ʻOtuá ʻa e meʻa ʻoku tau fiemaʻu ke tauhi ai ke mālohi ʻetau tuí, peá ne toki tokangaʻi leva ʻa ʻetau ngaahi fiemaʻu fakamatelié.

11. Ko e hā ʻoku fiemaʻu ke tau fai ke tau maʻu ʻaonga ai mei he tokoni ʻa e ʻOtuá?

¹¹ Ko Sihová ʻokú ne ‘hiki hake ʻa e anga-vaivaí.’ ʻOkú ne ʻofa ʻiate kitautolu pea ʻokú ne mateuteu maʻu pē ke tokoniʻi kitautolu. (Saame 147:6a) ʻE lava fēfē ke tau maʻu ʻaonga mei heʻene tokoní? ʻOku fiemaʻu ke tau maʻu ha vahaʻangatae mālohi mo ia. Ke maʻu iá, ʻoku fiemaʻu ke tau anga-vaivai. (Sēf. 2:3) Ko e faʻahinga ʻoku anga-vaivaí ʻoku nau falala kia Sihova te ne fakatonutonu ha fakamaau taʻetotonu pē pea fakangata ʻenau faingataʻaʻiá. ʻOku hōifua ʻa Sihova ʻiate kinautolu.

12, 13. (a) Ke tau maʻu ʻaonga mei he tokoni ʻa e ʻOtuá, ko e hā ʻoku totonu ke tau fakaʻehiʻehi mei aí? (e) Ko hai ʻoku leleiʻia ai ʻa Sihová?

¹² ʻI he tafaʻaki ʻe tahá, ko e ʻOtuá “ʻokú ne haʻaki ʻa e kau fulikivanú ki he kelekelé.” (Saame 147:6e) ʻOku ʻikai ke tau loto ke hoko eni kiate kitautolu! ʻOku tau loto ke fakahaaʻi mai ʻe he ʻOtuá kiate kitautolu ʻa ʻene ʻofa mateakí. Ko ia kuo pau ke tau fehiʻa ʻi he meʻa ʻokú ne fehiʻa aí. (Saame 97:10) Ko e fakatātaá, kuo pau ke tau fehiʻa ʻi he fehokotaki fakasino taʻetāú. ʻOku ʻuhinga ení kuo pau ke tau fakaʻehiʻehi mei ha meʻa pē ʻe lava ke ne tataki kitautolu ki ai, ʻo kau ai ʻa e sio he ʻata fakalieliá. (Saame 119:37; Māt. 5:28) Ko ha faitau faingataʻa nai eni, ka ʻoku tuha ia mo e feingá he te tau maʻu ai ʻa e tāpuaki ʻa Sihová.

¹³ Heʻikai lava ke tau fakahoko ʻa e faitau ko ení ʻiate kitautolu pē. Kuo pau ke tau falala kia Sihova. Te ne hōifua mai kiate kitautolu kapau te tau falala ki he ngaahi meʻa ʻoku hanga ki ai ʻa e faʻahinga ʻo e tangatá ki ha tokoní? ʻIkai, ko Sihová “ʻoku ʻikai te ne leleiʻia ʻi he mālohi ʻo e hōsí.” ʻOku totonu ke tau falala pē ki hotau mālohí tonu pe ki he kakai kehé? Ko Sihová ʻoku ʻikai ke “maongo kiate ia ʻa e ongo vaʻe mālohi ʻo ha tangata.” (Saame 147:10) ʻI hono kehé, ʻoku fiemaʻu ke hokohoko atu ʻetau lotu kia Sihová ki ha tokoni pea kōlenga kiate ia ke ne fakahaofi kitautolu mei hotau ngaahi vaivaiʻangá. ʻOku ʻikai ʻaupito ke fiu ʻa Sihova ʻi he fanongo mai ki he ngaahi lotu peheé. “ʻOku leleiʻia ʻa Sihova ʻi he faʻahinga ʻoku manavahē kiate iá, ʻi he faʻahinga ʻoku nau tatali ki heʻene ʻofa mateakí.” (Saame 147:11) Koeʻuhí ko ʻene mateaki mo ʻofa ʻiate kitautolú, ʻoku tau ʻiloʻi ai te ne hanganaki tokoniʻi kitautolu ke ikuʻi ʻetau ngaahi holi fehālaakí.

14. Ko e hā naʻe fakapapauʻi ʻe he tokotaha-tohi-sāmé?

¹⁴ ʻOku fakapapauʻi mai ʻe Sihova te ne tokoniʻi kitautolu ʻi he taimi ʻoku tau hokosia ai ha ngaahi palopalema. ʻI he taimi naʻe foki ai ki Selusalema ʻa e kau ʻIsilelí, naʻe fakakaukau ai ʻa e tokotaha-tohi-sāmé ʻo fekauʻaki mo e anga hono tokoniʻi kinautolu ʻe Sihová. Naʻe hiva ʻa e tokotaha-tohi-sāmé: “ʻOkú ne ʻai ʻa e ngaahi meʻa fakamaʻu ʻo e ngaahi matapā ʻo ho koló ke mālohi; ʻokú ne tāpuakiʻi ho ngaahi foha ʻoku ʻiate koé. ʻOkú ne ʻomi ʻa e melino ki ho feituʻú.” (Saame 147:13, 14) Ko hono moʻoní, ko hono ʻai ʻe Sihova ke mālohi ʻa e ngaahi matapā ʻo e koló naʻá ne ʻai ai ʻa e tokotaha-tohi-sāmé ke ongoʻi malu. Naʻe fakapapauʻi ʻe he meʻa ko iá kiate ia ʻe maluʻi ʻe Sihova hono kakaí.

15-17. (a) ʻOku anga-fēfē nai ʻetau ongoʻi ʻi he taimi ʻe niʻihi ʻo fekauʻaki mo hotau ngaahi ʻahiʻahí, ka ʻoku anga-fēfē hono ngāueʻaki ʻe Sihova ʻene Folofolá ke ne tokoniʻi kitautolú? (e) ʻOmai ha fakatātā ʻoku fakahaaʻi ai ʻa e anga ʻo e “lele vave ʻaupito” ʻa e folofola ʻa e ʻOtuá ke tokoniʻi kitautolú.

¹⁵ Te ke ongoʻi loto-moʻua nai koeʻuhí ko hoʻo ngaahi palopalemá, ka ʻoku lava ke ʻoatu ʻe Sihova kiate koe ʻa e poto ke ke fekuki mo ia. Naʻe pehē ʻe he tokotaha-tohi-sāmé naʻe hanga ʻe he ʻOtuá ʻo “tuku atu ʻene fekaú ki he māmaní; ʻoku lele vave ʻaupito ʻa ʻene folofolá.” Naʻe lave leva ʻa e tokotaha-tohi-sāmé ki he sinoú, hahau ʻaisí, mo e ʻuha-ʻaisí peá ne ʻeke: “Ko hai ʻe lava ke ne matuʻuaki ʻa e momokó?” Pea naʻá ne pehē ko Sihová “ʻokú ne tuku atu ʻene folofolá, pea ʻoku nau vaia ai.” (Saame 147:15-18) Ko hotau ʻOtuá, ʻa ia ʻokú ne ʻiloʻi ʻa e meʻa kotoa pē, pea ʻoku lava ke ne fai ha meʻa pē, ʻokú ne puleʻi ʻa e ʻuha-ʻaisí mo e sinoú, ʻoku lava ke ne tokoniʻi moʻoni koe ke ke ikuʻi ha faʻahinga palopalema pē.

¹⁶ ʻI he ʻahó ni, ʻoku tataki kitautolu ʻe Sihova ʻaki ʻene Folofolá ʻa e Tohi Tapú. Naʻe pehē ʻe he tokotaha-tohi-sāmé ko e folofola ʻa Sihová “ʻoku lele vave ʻaupito” ke tokoniʻi kitautolu. ʻOku tataki kitautolu ʻe he ʻOtuá ʻi he founga totonu pea ʻi he taimi totonu. Fakakaukau ki he founga ʻokú ke maʻu ʻaonga ai mei he Tohi Tapú, ʻū tohi “ʻa e tamaioʻeiki anga-tonu mo potó,” JW Broadcasting, jw.org, kau mātuʻá pea mo ho fanga tokouá mo e fanga tuofāfiné. (Māt. 24:45) Kuó ke sio tonu ʻi hoʻo moʻuí ʻi he fakavave ʻa Sihova ke ne tataki koé?

¹⁷ Naʻe hokosia ʻe ha tuofefine ko Simone ʻa e anga hono tokoniʻi ia ʻe he Folofola ʻa e ʻOtuá. Naʻá ne ongoʻi naʻe ʻikai hano ʻaonga pea naʻá ne fakakaukau naʻe ʻikai ke toe hōifua mai ʻa Sihova kiate ia. Kae kehe, ʻi he taimi naʻá ne loto-siʻi aí, naʻá ne hanganaki lotu kia Sihova, ʻo kōlenga kiate ia ki ha tokoni. Naʻe hokohoko atu foki ʻene ako ʻa e Tohi Tapú. Naʻe pehē ʻe Simone: “Kuo teʻeki ai ʻaupito ke u ʻi ha tuʻunga ke u taʻeongoʻi ai ʻa e mālohi ʻo Sihová mo ʻene tatakí.” Naʻe tokoni eni kiate ia ke ne toe maʻu ʻa e fakakaukau pau.

18. Ko e hā ʻokú ke ongoʻi ai ʻoku ofi atu ʻa Sihova kiate koé, pea ko e hā ʻa e ngaahi ʻuhinga ke ke hanga ai ʻo “Fakahīkihikiʻi ʻa Iā!”?

¹⁸ Naʻe ʻiloʻi ʻe he tokotaha-tohi-sāmé naʻe fili ʻe Sihova ʻa e puleʻanga ʻo ʻIsileli ʻo e kuonga muʻá ke hoko ko hono kakai mei he kotoa ʻo e ngaahi puleʻanga ʻi he māmaní. Ko e puleʻanga pē ia ʻe taha naʻa nau maʻu ʻa e ‘folofola’ ʻa e ʻOtuá mo “ʻene ngaahi tuʻutuʻuní.” (Lau ʻa e Saame 147:19, 20.) ʻI he ʻahó ni, kuo tau maʻu ʻa e monū lahi ʻi hono ui ʻaki kitautolu ʻa e huafa ʻo e ʻOtuá. ʻOku tau houngaʻia he ʻoku tau ʻiloʻi ia, ʻoku tau maʻu ʻene Folofolá ke tataki kitautolu pea ʻoku lava ai ke tau maʻu ha vahaʻangatae vāofi mo ia. ʻI he hangē ko e tokotaha-tohi ʻo e Saame 147, ʻoku lahi ʻa e ngaahi ʻuhinga ʻokú ke maʻu ke “Fakahīkihikiʻi ʻa Iā!” Pea fakalototoʻaʻi ʻa e niʻihi kehé ke nau fai ʻa e meʻa tatau.