ʻAʻeva Anga-Fakatōkilalo mo Anga-Fakanānā mo Ho ʻOtuá

 1. Ko e hā naʻe leaʻaki ʻe Tēvita fekauʻaki mo e anga-fakatōkilalo ʻa Sihová?

ʻE LAVA moʻoni ke tau pehē ʻoku anga-fakatōkilalo ʻa Sihova? ʻIo, ʻe lava. Naʻe pehē ʻe Tēvita: “ʻOkú ke ʻomai kiate au hoʻo pā ʻo e fakamoʻuí, pea ko hoʻo anga-fakatōkilaló ʻokú ne ʻai au ke u hoko ko e lahi.” (2 Sām. 22:36; Saame 18:35) Mahalo naʻe fakakaukau ʻa Tēvita ki he ʻaho naʻe ʻalu ai ʻa e palōfita ko Sāmiuelá ki he fale ʻo e tamai ʻa Tēvitá ke pani ʻa e tuʻi hoko ʻo ʻIsilelí. Ko Tēvita ʻa e siʻisiʻi taha ʻi he tamaiki tangata ʻe toko valu; neongo ia, ko ia naʻe fili ʻe Sihova ke ne fetongi ʻa Tuʻi Saulá.​—1 Sām. 16:1, 10-13.

 2. Ko e hā te tau lāulea ki ai ʻi he kupu ko ení?

² Naʻe loto-tatau ʻa Tēvita mo e fakakaukau naʻe fakahaaʻi ʻe he tokotaha-tohi-sāmé ʻa ia naʻá ne pehē fekauʻaki mo Sihova: “ʻOkú ne punou hifo ke vakai ki he langí mo e māmaní, ʻo ne hiki hake ʻa e māʻulaló mei he efú. ʻOkú ne fokotuʻu hake ʻa e masivá . . . ke ne nofo fakataha mo e kau houʻeikí.” (Saame 113:6-8) ʻI he kupu ko ení, te tau ʻuluaki lāulea ai ki he ngaahi lēsoni mahuʻinga ʻe niʻihi fekauʻaki mo e anga-fakatōkilaló ʻaki hono sivisiviʻi ʻa e ngaahi taimi naʻe fakahaaʻi ai ʻe Sihova ʻa e ʻulungaanga ko ení. Te tau sivisiviʻi leva ʻa e meʻa ʻe lava ke tau ako meia Tuʻi Saula, palōfita ko Tanielá mo Sīsū fekauʻaki mo e ʻulungaanga ko e anga-fakanānaá.

 3. ʻOku anga-fēfē fakafeangai mai ʻa Sihova kiate kitautolú, pea ko e hā ʻoku fakamoʻoniʻi hení?

³ ʻOku fakamoʻoniʻi ʻe Sihova ʻene anga-fakatōkilaló ʻi he anga ʻo ʻene fakafeangai ki heʻene kau lotu taʻehaohaoá. ʻOku ʻikai ngata pē ʻene tali ʻetau lotú ka ʻokú ne toe vakai mai kiate kitautolu ko hono ngaahi kaumeʻa. (Saame 25:14) Naʻe ʻai ʻe Sihova ke tau malava ʻo kaumeʻa mo ia ʻaki hono tokonaki mai hono ʻAló ko ha feilaulau maʻa ʻetau ngaahi angahalá. He meesi mo manavaʻofa ē kuó ne fakahāhā mai kiate kitautolú!

 4. Ko e hā kuo ʻomai ʻe Sihová pea ko e hā hono ʻuhingá?

⁴ Fakakaukau ki ha fakahāhā ʻe taha ʻo e anga-fakatōkilalo ʻa Sihová. ʻI he tuʻunga ko e Tokotaha-Fakatupú, naʻe mei lava ke ngaohi kitautolu ʻe Sihova ke tau hangē ha lōpotí. Ka naʻe ʻikai ke ne fai pehē. Naʻá ne ngaohi kitautolu ʻi hono ʻīmisí pea ʻomai mo e tauʻatāina ke filí. ʻOkú ne finangalo mai kiate kitautolu faʻahinga ʻo e tangata māʻulaló ke tauhi kiate ia mei hotau lotó koeʻuhi ʻoku tau ʻofa kiate ia pea ʻoku tau ʻiloʻi ʻa e ngaahi ʻaonga ʻo e talangofua kiate iá. (Teu. 10:12; ʻAi. 48:17, 18) He houngaʻia ē ko kitautolu ʻi he fakahāhā ko eni ʻo e anga-fakatōkilalo ʻa Sihová!

 5. ʻOku anga-fēfē hono akoʻi kitautolu ʻe Sihova ke tau anga-fakatōkilaló? (Sio ki he tā ʻi he takafí.)

⁵ ʻOku akoʻi kitautolu ʻe Sihova ke tau anga-fakatōkilalo fakafou ʻi he anga ʻene fakafeangai mai kiate kitautolú. Ko Sihova ʻa e Tokotaha poto taha ʻi he ʻunivēsí. Neongo ia, ʻokú ne loto-lelei ke tali ʻa e ngaahi fokotuʻu mei he niʻihi kehé. Ko e fakatātaá, naʻe fakaʻatā ʻe Sihova hono ʻAló ke tokoni kiate ia ʻi hono fakatupu ʻa e ngaahi meʻa kotoa pē. (Pal. 8:27-30; Kol. 1:15, 16) Pea neongo ko Sihova ʻa e māfimafi-aoniú, ʻokú ne vaheʻi ʻa e mafaí ki he niʻihi kehé. Ko e fakatātaá, naʻá ne fakanofo ʻa Sīsū ke hoko ko e Tuʻi ʻo e Puleʻangá, pea te Ne ʻoange ha mafai ki he faʻahinga ʻo e tangatá ʻe toko 144,000 ʻa ia te nau kaungāpule mo Sīsū. (Luke 12:32) Ko e moʻoni, naʻe akoʻi ʻe Sihova ʻa Sīsū ke hoko ko e Tuʻi mo e Taulaʻeiki Lahi. (Hep. 5:8, 9) ʻOkú ne toe akoʻi mo e ngaahi kaungāpule ʻo Sīsuú, ka ʻoku ʻikai ke ne ʻoange ʻa e vāhenga-ngāue ko ení peá ne toe feinga ke puleʻi ʻa e mingimingiʻi meʻa kotoa ʻoku nau faí. ʻI hono kehé, ʻokú ne falala te nau fai hono finangaló.​—Fkh. 5:10.

6-7. Ko e hā ʻe lava ke tau ako mei heʻetau Tamai fakahēvaní fekauʻaki mo hono vaheʻi ʻa e mafaí ki he niʻihi kehé?

⁶ Kapau ko ʻetau Tamai fakahēvaní ē, ʻa ia ʻoku ʻikai ke ne fiemaʻu ha tokoni mei ha tahá, ʻokú ne vaheʻi ʻa e mafaí ki he niʻihi kehé, huanoa hake ai ʻa e totonu kiate kitautolu ke tau fai ʻa e meʻa tatau! Ko e fakatātaá, ko ha ʻuluʻi fāmili koe pe ko ha mātuʻa ʻi he fakatahaʻangá? Muimui ʻi he faʻifaʻitakiʻanga ʻa Sihová ʻi hono vaheʻi ʻa e ngaahi fatongiá ki he niʻihi kehé pea talitekeʻi leva ʻa e hehema ke puleʻi ʻa e mingimingiʻi meʻa kotoa ʻoku nau faí. ʻI hoʻo faʻifaʻitaki kia Sihová, heʻikai ngata pē hoʻo fakahoko ʻa e ngāué ka ʻokú ke toe akoʻi ʻa e niʻihi kehé pea fakaivimālohiʻi ʻenau tuipaú. (ʻAi. 41:10) Ko e hā ha toe meʻa ʻe lava ke ako ʻe he faʻahinga ʻoku nau maʻu ha mafaí meia Sihova?

⁷ ʻOku fakahaaʻi ʻi he Tohi Tapú ʻoku mahuʻingaʻia ʻa Sihova ʻi he ngaahi fakakaukau ʻa hono ngaahi foha fakaeʻāngeló. (1 Tuʻi 22:19-22) Ngaahi mātuʻa, ʻe lava fēfē ke ke faʻifaʻitaki ki he faʻifaʻitakiʻanga ʻa Sihová? ʻEke ki hoʻo fānaú ʻo ka feʻungamālie pe ko e hā ʻenau fakakaukau ki he founga ke fakahoko ai ha ngāue. Pea muimui ki heʻenau ngaahi fokotuʻú ʻo ka malava.

 8. Naʻe anga-fēfē fakafeangai anga-kātaki ʻa Sihova kia ʻĒpalahame mo Selá?

⁸ Ko e anga-fakatōkilalo ʻa Sihová ʻoku toe fakahaaʻi ia ʻi heʻene anga-kātakí. Ko e fakatātaá, ʻoku anga-kātaki ʻa Sihova ʻi he taimi ʻoku fehuʻia anga-fakaʻapaʻapa ai ʻe he faʻahinga ʻoku tauhi kiate iá ʻene ngaahi filí. Naʻá ne fanongo ki hono fakahaaʻi ʻe ʻĒpalahame ʻene ngaahi hohaʻa fekauʻaki mo e fili ke fakaʻauha ʻa Sōtoma mo Komolá. (Sēn. 18:22-33) Pea manatuʻi ʻa e anga ʻo e fakafeangai ʻa Sihova ki he uaifi ʻo ʻĒpalahamé, ʻa Sela. Naʻe ʻikai ke ne loto-mamahi pe ʻita ʻi he taimi naʻe kata ai ʻa Sela ʻi heʻene talaʻofa ange te ne feitama ʻi heʻene taʻumotuʻá. (Sēn. 18:10-14) ʻI hono kehé, naʻá ne fakafeangai anga-fakaʻapaʻapa kia Sela.

 9. Ko e hā ʻe lava ke ako ʻe he ngaahi mātuʻá mo e kau mātuʻá mei he faʻifaʻitakiʻanga ʻa Sihová?

⁹ Ngaahi mātuʻa mo e kau mātuʻa, ko e hā ʻe lava ke mou ako mei he faʻifaʻitakiʻanga ʻa Sihová? Fakakaukau ki he anga hoʻo tali ʻi he taimi ʻoku fehuʻia ai ʻe he faʻahinga ʻoku ʻi he malumalu ho mafaí hoʻo ngaahi filí. ʻOkú ke fakatonutonuʻi kinautolu he taimi pē ko iá? Pe ʻokú ke feinga ke mahinoʻi ʻa e anga ʻenau vakaí? Ko e ngaahi fāmilí mo e fakatahaʻangá ʻoku nau maʻu ʻaonga moʻoni ʻi he taimi ʻoku faʻifaʻitaki ai ʻa e faʻahinga ʻoku nau maʻu ha mafaí kia Sihová. Kuo tau lāulea mai eni ki he meʻa ʻe lava ke tau ako fekauʻaki mo e anga-fakatōkilaló mei he faʻifaʻitakiʻanga ʻa Sihová. ʻI he taimi ní, tau vakai angé ki he meʻa ʻe lava ke tau ako fekauʻaki mo e anga-fakanānaá mei he ngaahi faʻifaʻitakiʻanga ʻoku hiki ʻi he Folofola ʻa e ʻOtuá.

10. ʻOku anga-fēfē hono ngāueʻaki ʻe Sihova ʻa e faʻifaʻitakiʻanga ʻa e niʻihi kehé ke akoʻi kitautolú?

¹⁰ ʻI he tuʻunga ko hotau “Faiako Maʻongoʻongá,” ʻoku ʻomai ʻe Sihova ʻa e ngaahi faʻifaʻitakiʻanga ʻi heʻene Folofolá ke akoʻi ai kitautolu. (ʻAi. 30:20, 21) ʻOku tau ako ʻi heʻetau fakalaulauloto ki he ngaahi talanoa Fakatohitapu fekauʻaki mo e faʻahinga naʻa nau fakahāhā ʻa e ngaahi ʻulungaanga fakaʻotuá, ʻo kau ai ʻa e anga-fakanānā. ʻOku tau toe ako foki ʻi heʻetau sivisiviʻi ʻa e meʻa naʻe hoko ki he faʻahinga naʻe ʻikai ke nau fakahāhā ʻa e ngaahi ʻulungaanga lelei ko iá.​—Saame 37:37; 1 Kol. 10:11.

11. Ko e hā ʻe lava ke tau ako mei he faʻifaʻitakiʻanga kovi ʻa Saulá?

¹¹ Fakakaukau atu ki he meʻa naʻe hoko kia Tuʻi Saulá. ʻI he kamatá, naʻá ne hoko ko ha kiʻi talavou anga-fakanānā. Naʻá ne lāuʻilo ki hono ngātangá pea aʻu ʻo ne toumoua ke tali ha fatongia lahi ange. (1 Sām. 9:21; 10:20-22) Ka, ʻi he faai atu ʻa e taimí naʻe hoko ʻa Saula ʻo ʻafungi. Naʻe hā meiate ia ʻa e tōʻonga kovi ko ení ʻi he hili pē ʻene hoko ko e tuʻí. ʻI he taimi ʻe taha, naʻe ʻikai ke ne hanganaki kātaki ʻi heʻene tatali ki he palōfita ko Sāmiuelá. ʻI he ʻikai anga-fakanānā ʻo falala kia Sihova te ne fai ha meʻá, naʻe ʻohake ʻe Saula ʻa e feilaulau tutú neongo naʻe ʻikai ke fakamafaiʻi ia ke ne fai pehē. Ko hono olá, naʻe mole ʻa e hōifua ʻa Sihová meia Saula pea faai atu pē ʻo toʻo mo e tuʻunga-tuʻí. (1 Sām. 13:8-14) ʻOku tau fakapotopoto kapau ʻoku tau ako mei he faʻifaʻitakiʻanga fakaefakatokanga ko ení pea fakaʻehiʻehi mei he ʻafungí.

12. Naʻe anga-fēfē hono fakahāhā ʻe Taniela ʻa e anga-fakanānaá?

¹² ʻI hono kehe mei he faʻifaʻitakiʻanga kovi ʻa Saulá, fakakaukau ki he faʻifaʻitakiʻanga lelei ʻa e palōfita ko Tanielá. ʻI he kotoa ʻo e moʻui ʻa Tanielá, naʻá ne nofoʻaki hoko ko ha sevāniti anga-fakatōkilalo mo anga-fakanānā ʻa e ʻOtuá ʻa ia naʻá ne hanga maʻu pē kia Sihova ki ha tataki. Ko e fakatātaá, ʻi hono ngāueʻaki ʻe Sihova ʻa Taniela ke ne fakaʻuhingaʻi ʻa e misi ʻa Nepukanesá, naʻe ʻikai ke ne ʻomi pē ʻa e lāngilangí kiate ia. ʻI hono kehé, naʻá ne anga-fakanānā ʻo ʻave ʻa e kotoa ʻo e lāngilangí mo e fakahīkihikí kia Sihova. (Tan. 2:26-28) Ko e hā ʻa e lēsoní? Kapau ʻoku mālie ʻetau malangá ki he fanga tokouá pe kapau ʻoku ʻi ai haʻatau lavameʻa ʻi he ngāue fakafaifekaú, tau manatuʻi ke ʻave ʻa e kotoa ʻo e lāngilangí kia Sihova. ʻOku totonu ke tau anga-fakanānā ʻo lāuʻilo heʻikai ke tau lava ʻo fai ʻa e ngaahi meʻa ko ení ʻo taʻekau ai ʻa e tokoni ʻa Sihová. (Fil. 4:13) ʻI heʻetau maʻu ʻa e fakakaukau ko ení, ʻoku tau toe faʻifaʻitaki ai ki he faʻifaʻitakiʻanga lelei ʻa Sīsuú. Anga-fēfē?

13. Ko e hā ʻoku tau ako fekauʻaki mo e anga-fakanānaá mei he lea ʻa Sīsū ʻi he Sione 5:19, 30?

¹³ Neongo ko Sīsū ʻa e ʻAlo haohaoa ʻo e ʻOtuá, naʻá ne falala kia Sihova. (Lau ʻa e Sione 5:19, 30.) Naʻe ʻikai ʻaupito ke ne feinga ke faʻao ʻa e mafaí mei heʻene Tamai fakahēvaní. ʻOku tala mai ʻi he Filipai 2:6 ko Sīsū “naʻe ʻikai ʻi ai haʻane fakakaukau ke ne puketuʻu ʻa e tuʻunga ko iá, ʻa ia, ke ne hoko ai ʻo tatau mo e ʻOtuá.” ʻI he tuʻunga ko ha ʻAlo fakamoʻulaloa, naʻe mahinoʻi ʻe Sīsū hono ngātangá pea fakaʻapaʻapaʻi ʻa e mafai ʻene Tamaí.

14. ʻI hono kole kia Sīsū ke ne fai ha meʻa naʻe fakalaka atu ʻi hono mafaí, naʻe anga-fēfē ʻene talí?

¹⁴ Fakakaukau atu ki he anga ʻo e tali ʻa Sīsū ʻi he fakaofiofi atu kiate ia ʻa e ākonga ko Sēmisi mo Sioné fakataha mo ʻena faʻeé ʻo kole ange ha monū naʻe fakalaka atu ia ʻi he mafai ʻo Sīsuú. ʻI he ʻikai toumouá, naʻe tala ange ʻe Sīsū ko ʻene Tamai fakahēvaní pē ʻokú ne fili pe ko hai ʻe nofo ʻi he toʻomataʻu mo e toʻohema ʻo Sīsuú ʻi he Puleʻangá. (Māt. 20:20-23) Naʻe fakahaaʻi ʻe Sīsū naʻá ne fakaʻapaʻapaʻi hono ngātangá. Naʻá ne anga-fakanānā. Naʻe ʻikai ʻaupito te ne fai ha meʻa ʻo fakalaka atu ia ʻi he meʻa naʻe fekauʻi ia ʻe Sihova ke ne faí. (Sione 12:49) ʻE lava fēfē ke tau faʻifaʻitaki ki he faʻifaʻitakiʻanga lelei ʻa Sīsuú?

15-16. ʻE lava fēfē ke tau ngāueʻaki ʻa e faleʻi ʻa e Tohi Tapú ʻi he 1 Kolinitō 4:6?

¹⁵ ʻOku tau faʻifaʻitaki ki he faʻifaʻitakiʻanga ʻa Sīsū ʻi he anga-fakanānaá ʻaki hono ngāueʻaki ʻa e faleʻi ʻa e Tohi Tapú ʻi he 1 Kolinitō 4:6. ʻOku pehē ai: “Mou fai pē ki he ngaahi meʻa kuo tohí.” Ko ia ʻi he taimi ʻoku fai mai ai ha kole faleʻí, ʻoku ʻikai ʻaupito ke tau loto ke tuʻukāivi pē ʻi heʻetau fakakaukaú pe leaʻaki pē ʻa e meʻa ʻoku fuofua haʻu ki heʻetau fakakaukaú. ʻI hono kehé, ʻoku totonu ke tau taki ʻa e tokangá ki he faleʻi ʻa e Tohi Tapú mo ʻetau ʻū tohi makatuʻunga ʻi he Tohi Tapú. ʻI he foungá ni, ʻoku tau ʻiloʻi ai hotau ngātangá. ʻI he anga-fakanānā, ʻoku tau ʻave ai ʻa e lāngilangí ki he “ngaahi tuʻutuʻuni māʻoniʻoní” ʻa e Māfimafi-Aoniú.​—Fkh. 15:3, 4.

¹⁶ ʻOku ʻi ai mo e ngaahi ʻuhinga lelei kehe ki hono fakahāhā ʻo e anga-fakanānaá ʻo tānaki atu ki hono fakalāngilangiʻi ʻo Sihová. Te tau vakai he taimí ni ki he founga ʻe lava ke ʻomai ai ʻe he anga-fakatōkilaló mo e anga-fakanānaá ʻa e fiefia pea tokoniʻi kitautolu ke fetaulaki lelei mo e niʻihi kehé.

17. Ko e hā ʻoku fiefia ai ʻa e kakai anga-fakatōkilalo mo anga-fakanānaá?

¹⁷ ʻI he taimi ʻoku tau anga-fakatōkilalo mo anga-fakanānā aí, ʻoku ngalingali te tau fiefia. Ko e hā hono ʻuhingá? ʻI heʻetau ʻiloʻi hotau ngātangá, te tau houngaʻia mo fiefia ʻi ha tokoni pē ʻoku tau maʻu mei he niʻihi kehé. Ko e fakatātaá, fakakaukau ki he taimi naʻe fakamoʻui ai ʻe Sīsū ʻa e kau kilia ʻe toko hongofulú. Ko e toko taha pē ʻiate kinautolu naʻe foki ʻo fakamālō kia Sīsū ʻi hono fakamoʻui ia mei he mahaki fakalilifú​—ko ha meʻa heʻikai ʻaupito lava ʻe he tangatá ʻo fai. Ko e tangata anga-fakatōkilalo mo anga-fakanānā ko ení naʻá ne houngaʻia ʻi he tokoni naʻá ne maʻú, pea naʻá ne fakalāngilangiʻi ai ʻa e ʻOtuá.​—Luke 17:11-19.

18. ʻOku anga-fēfē hono tokoniʻi kitautolu ʻe he anga-fakatōkilaló mo e anga-fakanānaá ke fetaulaki lelei mo e niʻihi kehé? (Loma 12:10)

¹⁸ Ko e kakai anga-fakatōkilalo mo anga-fakanānaá ʻoku nau hehema ke fetaulaki lelei mo e niʻihi kehé pea ʻoku ngalingali te nau maʻu ha ngaahi kaumeʻa vāofi. Ko e hā hono ʻuhingá? ʻOku nau loto-lelei ke fakahaaʻi ʻoku maʻu ʻe he kakai kehé ʻa e ngaahi ʻulungaanga lelei pea falala pau kiate kinautolu. Ko e faʻahinga anga-fakatōkilalo mo anga-fakanānaá ʻoku nau fiefia ʻi he lavameʻa ʻa e niʻihi kehé ʻi ha vāhenga-ngāue pē ʻoku nau maʻu pea vave ke fakaongoongoleleiʻi mo fakalāngilangiʻi kinautolu.​—Lau ʻa e Loma 12:10.

19. Ko e hā ʻa e ngaahi ʻuhinga ʻoku totonu ke tau fakaʻehiʻehi ai mei he hīkisiá?

¹⁹ ʻI he fehangahangai mo iá, ko e kakai pōlepolé ʻoku faingataʻa ke nau fakaongoongoleleiʻi ʻa e niʻihi kehé, ʻoku nau fakakaukau ko kinautolu ke fakahīkihikiʻí. ʻOku nau hehema ke fakahoa kinautolu ki he niʻihi kehé pea pouaki ha laumālie feʻauʻauhi. ʻI he ʻikai akoʻi ʻa e niʻihi kehé mo ʻoange kiate kinautolu ʻa e mafaí, ʻoku nau faʻa pehē, “Kapau ʻokú ke loto ke fai ha meʻa ke tonu, fai pē ia ʻe koe.” Ko ha tokotaha pōlepole ʻokú ne faʻa sio tuʻunga mo meheka. (Kal. 5:26) Ko e kakai peheé ʻoku tātaitaha ke nau maʻu ha kaungāmeʻa tuʻuloa. Kapau ʻoku tau ʻiloʻi ʻoku tau hīkisia, ʻoku totonu ke tau lotu tōtōivi ki he tokoni ʻa Sihová ke ‘fakafoʻou hotau ʻatamaí’ koeʻuhi ke ʻoua ʻe hoko ʻa e tōʻonga kovi ko ení ʻo faiaka loloto ʻiate kitautolu.​—Loma 12:2.

20. Ko e hā ʻoku totonu ai ke tau anga-fakatōkilalo mo anga-fakanānaá?

²⁰ He houngaʻia ē ko kitautolu ʻi he faʻifaʻitakiʻanga ʻa Sihová! ʻOku tau vakai ki heʻene anga-fakatōkilaló ʻi he anga ʻene fakafeangai ki heʻene kau sevānití, pea ʻoku tau loto ke faʻifaʻitaki kiate ia. Tānaki atu ki aí, ʻoku tau loto ke faʻifaʻitaki ki he ngaahi faʻifaʻitakiʻanga lelei ʻi he Tohi Tapú ʻo e kakai anga-fakanānā naʻa nau maʻu ʻa e monū ke ʻaʻeva mo e ʻOtuá. ʻOfa ke tau ʻave maʻu pē kia Sihova ʻa e fakahīkihiki mo e lāngilangi ʻokú ne tuha mo iá. (Fkh. 4:11) Pea te tau taau foki ai ke ʻaʻeva mo ʻetau Tamai fakahēvaní, ʻa ia ʻokú ne ʻofa ʻi he kakai anga-fakatōkilalo mo anga-fakanānaá.