Tokanga Fekauʻaki mo e “Leʻo ʻo e Kehe”

“ʻE ʻikai ʻaupito te nau muimui ki ha kehe, ka te nau hola meiate ia; koeʻuhi ʻoku ʻikai te nau ʻilo ʻa e leʻo ʻo e kehe.”​—SIONE 10:5.

 1, 2. (a) ʻOku anga-fēfē ʻa e tali ʻa Melé ʻi hono ui ia ʻe Sīsū ʻaki hono hingoá, pea ko e hā ʻa e fakamatala ki muʻa ʻa Sīsū ʻoku fakatātaaʻi ʻe he meʻa ko ʻení? (e) Ko e hā ʻokú ne ʻai kitautolu ke tau malava ʻo nofo ofi kia Sīsuú?

ʻOKU siofi ʻe Sīsū kuo toetuʻú ʻa e fefine ʻoku tuʻu ʻo ofi ki hono ngeʻesi fonualotó. ʻOkú ne ʻiloʻi lelei ia. Ko Mele Makitaline ia. ʻI he meimei taʻu ʻe ua ki muʻa hení, naʻá ne fakamoʻui ai ia mei he uluisino ai ʻa e tēmeniō. Talu mei ai mo ʻene ʻalu fakataha holo mo Sīsū mo ʻene kau ʻapositoló, ʻo ne tokangaʻi ʻenau ngaahi fiemaʻu fakaʻahó. (Luke 8:​1-3) Neongo ia, ʻi he ʻaho ko ʻení, ʻoku tangi ai ʻa Mele, ʻi hono lōmekina ia ʻe he mamahi koeʻuhí naʻá ne sio ʻi he pekia ʻa Sīsuú, pea ko ʻeni kuo aʻu ʻo pulia ʻa hono sinó! Ko ia ʻoku ʻeke ange ʻe Sīsū kiate ia: “Fefine, koe hā ʻokú ke tangi aí? Ko hai ʻokú ke kumí?” ʻI he fakakaukau ko e tauhi-ngoué iá, ʻokú ne tali ange: “Kapau ko koe naʻá ke ʻave iá, peá ke tala mai muʻa ʻa e feituʻu naʻá ke tuku ki aí, ka u ʻalu ʻo ʻomai.” ʻOku pehē ange leva ʻe Sīsū: “Mele!” Tuaiekemo, ʻokú ne fakatokangaʻi ʻa e founga anga-maheni ʻo ʻene lea kiate iá. “Faiako”! ko ʻene kalanga fiefiá ia. Pea naʻá ne fāʻofua kiate ia.—Sione 20:​11-18, Ko e Kōsipeli ʻe Fā.

² ʻOku fakahaaʻi mai ʻe he fakamatalá ni ʻi ha founga fakaueʻiloto ʻa e meʻa naʻe fakahā ʻe Sīsū ʻi ha taimi ki muʻa heni. ʻI hono fakahoa ia ki ha tauhi-sipi pea ko hono kau muimuí ki ha fanga sipí, ʻokú ne pehē ʻoku ui ʻe he tauhí ʻene fanga sipi ʻaʻaná ʻi honau hingoá taki taha pea ʻoku nau ʻiloʻi ʻa hono leʻó. (Sione 10:​3, 4, 14, 27, 28) Ko e moʻoni, hangē pē ko hono ʻiloʻi ʻe ha sipi ʻa hono tauhí, naʻe pehē pē ʻa hono ʻiloʻi ʻe Mele ʻa hono Tauhí, ʻa Kalaisi. ʻOku toe moʻoni pehē pē ʻi he kau muimui ʻo Sīsū ʻi he ʻaho ní. (Sione 10:16) Hangē tofu pē ko hono hanga ʻe he telinga ongo ʻo ha sipi ʻo ʻai ia ke ne malava ʻo nofo ofi ki hono tauhí, ʻoku pehē pē ʻa hono ʻai kitautolu ʻe heʻetau ongongofua fakalaumālié ke tau malava ʻo molomolo muivaʻe ʻi hotau Tauhi Leleí, ʻa Sīsū Kalaisi.—Sione 13:15; 1 Sione 2:6; 5:20.

 3. Ko e hā ʻa e niʻihi ʻo e ngaahi fehuʻi ʻoku hanga ʻe he talanoa fakatātā ʻa Sīsū ki he lotoʻā sipí ʻo ʻomai ki he fakakaukaú?

³ Kae kehe, fakatatau ki he talanoa fakatātā tatau pē, ko e malava ʻa ha sipi ke ne ʻiloʻi ʻa e ngaahi leʻo fakaetangatá ʻokú ne ʻai ai ia ke ne malava ʻo ʻiloʻi ʻo ʻikai ngata pē ʻi hono kaumeʻá kae toe pehē foki ki hono filí. ʻOku mātuʻaki mahuʻinga ia koeʻuhi ʻoku tau maʻu ha kau fakafepaki kākā. Ko hai ʻa kinautolu? ʻOku anga-fēfē ʻenau ngāué? ʻE malava fēfē ke tau maluʻi kitautolu? Ke ʻiloʻi iá, tau sio angé ki he toe meʻa ʻe taha ʻoku leaʻaki ʻe Sīsū ʻi heʻene talanoa fakatātā ki he lotoʻā sipí.

‘Ko Ia ʻOku ʻIkai Hū ʻi he Matapaá’

 4. Fakatatau ki he talanoa fakatātā ʻo e tauhi-sipí, ko hai ʻoku muimui ai ʻa e fanga sipí, pea ko hai ʻoku ʻikai te nau muimui aí?

⁴ ʻOku pehē ʻe Sīsū: “Ko ia ʻoku hū ʻi he matapā ko ha tauhi ia ʻo e fanga sipi. ʻOku toʻo ʻe he leʻo matapā ki ha toko taha pehē; pea ʻoku tokanga ʻe he fanga sipi ki hono leʻo; pea ʻoku ne ui ʻene fanga sipi aʻana ʻi honau hingoa taki taha, ʻo ne taki kinautolu ki tuaʻā. Pea ka ʻosi ʻene tuku kituaʻā ʻene meʻa aʻana kotoa pē, ʻoku ne ʻalu muʻomuʻa ia ʻiate kinautolu, pea ʻoku muimui ʻa e fanga sipi kiate ia, koeʻuhi ʻoku nau ʻilo hono leʻo. Ka ʻe ʻikai ʻaupito te nau muimui ki ha kehe, ka te nau hola meiate ia; koeʻuhi ʻoku ʻikai te nau ʻilo ʻa e leʻo ʻo e kehe.” (Sione 10:​2-5) Fakatokangaʻi, ʻoku ngāueʻaki ʻe Sīsū ʻa e foʻi lea ko e “leʻo” ʻo tuʻo tolu. Tuʻo ua ʻokú ne lea ai ʻo kau ki he leʻo ʻo ha tauhi-sipi, ka ko hono tuʻo tolú, ʻokú ne lave ai ki he “leʻo ʻo e kehe.” Ko e kehe fēfē ʻoku lave ki ai ʻa Sīsuú?

 5. Ko e hā ʻoku ʻikai te tau fakaaʻu atu ai ʻa e anga-talitali kakaí ki he faʻahinga kehe naʻe lave ki ai ʻi he Sione vahe 10?

⁵ ʻOku ʻikai ke lāulea heni ʻa Sīsū ia ki he faʻahinga kehe ko ia ʻoku fiemaʻu ke tau fakaaʻu ki ai ʻa e anga-talitali kakaí—ko ha foʻi lea ʻi he muʻaki lea ʻi he Tohi Tapú ʻoku ʻuhinga ki he “ʻofa ki he kehé.” (Hepelu 13:​2, NW) ʻI he talanoa fakatātā ʻa Sīsuú, ko e kehé ʻoku ʻikai ko ha tokotaha ia ʻoku fakaafeʻi. Ko iá “ʻoku ʻikai hū ʻi he matapā ki he lotoʻā sipi, ka ʻoku ne kaka ʻi ha potu kehe.” Ko iá “ko e kaihaʻa mo fakamālohi.” (Sione 10:1) Ko hai ʻa e ʻuluaki tokotaha ʻoku lave ki ai ʻi he Folofola ʻa e ʻOtuá naʻe hoko ko ha kaihaʻa mo ha fakamālohí? Ko Sētane ko e Tēvoló. ʻOku tau maʻu ʻa e fakamoʻoni ki aí ʻi he tohi Sēnesí.

Taimi Naʻe Fuofua Fanongoa Ai ʻa e Leʻo ʻo ha Kehé

6, 7. Ko e hā ʻoku malava ai ke ui totonu ʻa Sētane ko ha kehe pea ko ha kaihaʻá?

⁶ ʻOku fakamatala ʻa e Senesi 3:​1-5 ki he founga naʻe fuofua fanongoa ai ʻi he māmaní ʻa e leʻo ʻo ha kehé. ʻOku fakahā ʻe he fakamatalá naʻe fakaofiofi ʻa Sētane ki he ʻuluaki fefiné, ko ʻIvi, fakafou ʻi ha ngata pea lea kiate ia ʻi ha founga takihalaʻi. Ko e moʻoni, ʻoku ʻikai fakalea moʻoni ʻa Sētane ia ʻi he fakamatalá ni ko “ha kehe.” Ka neongo ia, ko ʻene ngaahi ngāué ʻoku fakahaaʻi ai ʻi he ngaahi founga lahi naʻá ne hangē ko e kehe naʻe fakamatalaʻi ʻi he talanoa fakatātā ʻa Sīsū ʻoku lēkooti ʻi he Sione vahe 10. Fakakaukau angé ki ha ngaahi faitatau ʻe niʻihi.

⁷ ʻOku fakahaaʻi ʻe Sīsū ʻoku fakaofiofi ʻa e kehé ki he faʻahinga ʻokú ne maʻukovia ʻi he lotoʻā sipí ʻi ha founga taʻefakahangatonu. Naʻe pehē pē, naʻe fakaofiofi taʻefakahangatonu ʻa Sētane ki he tokotaha naʻá ne maʻukoviá, ʻi hono ngāueʻaki ʻo ha ngata. Naʻe fakaeʻa ʻe he fakaofiofi olopoto ko ʻení ʻa e tuʻunga totonu ʻo Sētané—ko ha tokotaha hū noaʻia anga-kākā. ʻIkai ngata aí, ko e taumuʻa ʻa e kehe ʻi he lotoʻā sipí ke kaihaʻasi ʻa e fanga sipi ʻa e tokotaha ʻoku ʻaʻana totonú. Ko hono moʻoní, ʻokú ne kovi ange ia ʻi ha tokotaha kaihaʻa, he ʻokú ne toe taumuʻa ke ‘tamate mo maumau.’ (Sione 10:10) ʻI he tuʻunga meimei tatau, naʻe hoko ʻa Sētane ko ha kaihaʻa. ʻI hono kākaaʻi ʻa ʻIví, naʻá ne kaihaʻasi ai mei he ʻOtuá ʻa e tukupā ʻa ʻIví. ʻIkai ko ia pē, naʻe toe ʻomai ʻe Sētane ʻa e maté ki he faʻahinga ʻo e tangatá. Ko ia ai, ko ha tokotaha fakapō ia.

 8. Naʻe anga-fēfē hono mioʻi ʻe Sētane ʻa e ngaahi lea mo e ngaahi taumuʻa ʻa Sihová?

⁸ Naʻe hā mahino ʻa e taʻefaitotonu ʻa Sētané ʻi he founga naʻá ne mioʻi ai ʻa e ngaahi lea mo e ngaahi taumuʻa ʻa Sihová. “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe?” ko ʻene ʻeke ia kia ʻIví. Naʻe fakangalingali ʻa Sētane ʻokú ne ʻohovale, ʻo hangē ia naʻá ne mei pehē: ‘ʻOku lava fēfē ke mātuʻaki taʻefakaʻatuʻi ʻa e ʻOtuá?’ Naʻá ne tānaki atu: “ʻOku meaʻi ʻe he ʻOtua ko e ʻaho te mo kai ai ʻe ʻa ai homo mata.” Fakatokangaʻi ʻene leá: “ʻOku meaʻi ʻe he ʻOtua.” Naʻe hangē ia naʻe pehē ʻe Sētane: ‘ʻOku ou ʻilo ʻa e meʻa ʻoku meaʻi ʻe he ʻOtuá. ʻOku ou ʻilo ʻene ngaahi taumuʻá, pea ʻoku kovi ia.’ (Senesi 2:​16, 17; 3:​1, 5) Ko hono pangó, naʻe ʻikai ke tafoki ʻa ʻIvi mo ʻĀtama mei he leʻo ʻo e kehe ko ʻení. ʻI hono kehé, naʻá na tokanga ki ai pea ʻomai ai ʻa e mamahi kiate kinaua pea mo ʻena fānaú.—Loma 5:​12, 14.

 9. Ko e hā ʻoku totonu ai ke tau ʻamanekina ʻe fanongoa ʻi he ʻahó ni ʻa e leʻo ʻo e kehé?

⁹ ʻOku ngāueʻaki ʻe Sētane ʻa e ngaahi founga meimei tatau ke takihalaʻi ʻaki ʻa e kakai ʻa e ʻOtuá he ʻahó ni. (Fakahā 12:9) Ko iá “ko e tamai ia ʻa e loi,” pea ko e faʻahinga ko ē ʻoku nau hangē ko iá, ʻo feinga ke takihalaʻi ʻa e kau sevāniti ʻa e ʻOtuá, ko ʻene fānau kinautolu. (Sione 8:​44, KF) Tau vakai ange ki he niʻihi ʻo e ngaahi founga ʻa ia ʻoku fanongoa ai ʻa e leʻo ʻo e kehe ko ʻení ʻi he ʻaho ní.

Founga ʻOku Fanongoa Ai ʻa e Leʻo ʻo e Kehé ʻi he ʻAho Ní

10. Ko e hā ʻa e founga ʻe taha ʻa ia ʻoku fanongoa ai ʻa e leʻo ʻo e kehé?

¹⁰ Ngaahi fakaʻuhinga kākā. ʻOku pehē ʻe he ʻapositolo ko Paulá: “ʻOua naʻa tuku ke ʻauhia kimoutolu he ngaahi tokateline kehekehe mo foʻou [pe kehe].” (Hepelu 13:9) Ko e hā ʻa e faʻahinga akonaki ko iá? Koeʻuhi ʻoku malava ke nau ʻai kitautolu ke tau “ʻauhia,” ʻoku hā mahino ʻoku ʻuhinga ʻa Paula ki he ngaahi akonaki ʻoku nau fakavaivaiʻi ʻetau mafamafatatau fakalaumālié. Ko hai ʻoku nau fakaongo atu ʻa e ngaahi akonaki kehe peheé? Naʻe tala ʻe Paula ki ha kulupu ʻo e kau mātuʻa Kalisitiané: “Naʻa mo kimoutolu ʻe tupu mei ai ha kau tangata ʻoku leaʻaki ʻa e ngaahi meʻa ʻoku ʻalu kehe, ke tohoaki ʻaki ʻa e kau ako ke muimui kiate kinautolu.” (Ngāue 20:30) Ko e moʻoni, ʻi he ʻahó ni ʻo hangē pē ko e ʻaho ʻo Paulá, ko e faʻahinga tāutaha ʻe niʻihi naʻa nau kau ki muʻa ki he fakatahaʻanga Kalisitiané ʻoku nau feinga he taimí ni ke takihalaʻi ʻa e fanga sipí ʻaki hono leaʻaki ʻa e “ngaahi meʻa ʻoku ʻalu kehe”—ko e ngaahi moʻoni fakakonga mo e ngaahi loi fakaʻaufuli. Hangē ko ia ko hono fakalea ʻe Pitá, ʻoku nau ngāueʻaki ʻa e “gaahi lea kākā”—ko ha ngaahi lea ʻoku ngali moʻoni ka ko hono moʻoní ʻoku taʻeʻaonga ʻo hangē ko e paʻanga loí.—2 Pita 2:​3, PM.

11. ʻOku anga-fēfē hono fakaeʻa mai ʻe he ngaahi lea ʻoku hā ʻi he 2 Pita 2:​1, 3 ʻa e founga mo e taumuʻa ʻa e kau tafoki mei he moʻoní?

¹¹ ʻOku toe fakaeʻa ʻe Pita ʻa e ngaahi founga ʻa e kau tafoki mei he moʻoní ʻaki hono fakahā te nau “fakahu fakafufū mai ʻa e ngaahi akonaki he, ʻa ia ko e meʻa fakaʻauha.” (2 Pita 2:​1, 3) Hangē ko e tokotaha kaihaʻa ʻi he talanoa fakatātā ʻa Sīsū ki he lotoʻā sipí ʻa ia ʻoku ʻikai ke hū “ʻi he matapā ki he lotoʻā sipi, ka ʻoku ne kaka ʻi ha potu kehe,” ʻoku pehē pē ʻa e fakaofiofi mai ʻa e kau tafoki mei he moʻoní kiate kitautolu ʻi he ngaahi founga fakafufuú. (Kaletia 2:4; Siutasi 4) Ko e hā ʻenau taumuʻá? ʻOku tānaki mai ʻe Pita: “Te nau ngaueʻaki kimoutolu.” Ko hono moʻoní, tatau ai pē pe ko e hā ha meʻa ʻe leaʻaki nai ʻe he kau tafoki mei he moʻoní ke fakatonuhiaʻi ʻaki kinautolu, ko e taumuʻa moʻoni ʻa e kau hū noaʻiá “ke kaihaʻa pe, mo tamateʻi, mo maumau.” (Sione 10:10) Tokanga fekauʻaki mo e kehe peheé!

12. (a) ʻOku anga-fēfē hono fakaeʻa atu kitautolu ʻe heʻetau ngaahi feohí ki he leʻo ʻo e kehé? (e) Ko e hā ʻa e faitatau ʻi he vahaʻa ʻo e ngaahi founga ʻa Sētané pea mo e ngaahi founga ʻa e kehé ʻi he ʻaho ní?

¹² Ngaahi feohi fakatupu maumau. ʻOku fanongoa nai ʻa e leʻo ʻo e kehé fakafou ʻi he faʻahinga ko ia ʻoku tau feohi mo iá. ʻOku tautefito ʻa e fakatuʻutāmaki ʻa e ngaahi feohi fakatupu maumaú ki he kau talavoú. (1 Kolinito 15:33) Manatuʻi, naʻe tāketi ʻa Sētane kia ʻIvi—ko e tokotaha kei siʻi ange mo ʻikai loko taukei ʻi he ʻuluaki ongo meʻa fakaetangatá. Naʻá ne fakatuipauʻi ia ʻi he pehē naʻe fakangatangata tōtuʻa ʻe Sihova ʻene tauʻatāiná, lolotonga iá ko hono moʻoní ko e tafaʻaki ia ʻe tahá naʻe tonú. Naʻe ʻofa ʻa Sihova ʻi heʻene fakatupu fakaetangatá pea tokanga ki he lelei maʻanautolu. (Aisea 48:17) ʻOku meimei tatau pē ʻi he ʻahó ni, ʻoku feinga ʻa e kehé ke fakalotoʻi kimoutolu kau talavoú ʻo pehē ʻoku fakangatangata tōtuʻa ʻe hoʻomou ongo mātuʻa Kalisitiané ʻa hoʻomou tauʻatāiná. ʻOku anga-fēfē nai hono uesia kimoutolu ʻe he faʻahinga kehe peheé? ʻOku tala moʻoni ʻe ha taʻahine Kalisitiane ʻe taha: “Naʻe fakavaivaiʻi ʻi ha taimi ʻa ʻeku tuí ʻi ha tuʻunga pau ʻe hoku kaungā kalasí. Naʻa nau toutou pehē mai ʻoku fakangatangata mo taʻefakaʻatuʻi ʻa e lotu ʻoku ou kau ki aí.” Ka ko hono moʻoní ʻoku ʻofa ʻa hoʻo ongo mātuʻá ʻiate koe. Ko ia ʻi he taimi ʻoku feinga ai ʻa e ngaahi kaungāakó ke fakalotoʻi koe ke ke taʻefalala ki hoʻo ongo mātuʻá, ʻoua naʻa takihalaʻi ʻo hangē ko ʻIví.

13. Ko e hā ʻa e ʻalunga fakapotopoto naʻe muimui ai ʻa Tēvitá pea ko e hā ʻa e founga ʻe taha ʻe malava ke tau faʻifaʻitaki ai kiate iá?

¹³ ʻI he fekauʻaki mo e ngaahi feohi fakatupu maumaú, ʻoku pehē ʻe he tokotaha-tohi-saame ko Tēvitá: “Kuo ʻikai te u nofo mo e kau tangata taʻemoʻoní; pea ko e faʻahinga ʻoku nau fufū honau tuʻunga totonú ʻe ʻikai te u ʻalu ki ai.” (Sāme 26:​4, NW) Kuó ke toe fakatokangaʻi ʻa e faʻahinga fāliunga ʻa e kehé? ʻOku nau fufū ʻa kinautolu tonu—hangē pē ko hono fufū ʻe Sētane ʻa ia tonu ʻaki hono ngāueʻaki ha ngatá. ʻI he ʻahó ni, ʻoku fufū ʻe he kakai ʻulungāanga taʻetaau ʻe niʻihi ʻa kinautolu tonu mo ʻenau ngaahi taumuʻa moʻoní ʻi hono ngāueʻaki ʻa e ʻInitanetí. ʻI he ngaahi loki talanoa aí, ʻoku aʻu nai ʻo fakangalingali mai ai ʻa e kakai lalahi anga-mioʻí ko ha kau talavou ke tauheleʻi koe ki ha tauhele. Toʻutupu, kātaki ʻo mātuʻaki tokanga ʻaupito telia naʻa maumauʻi fakalaumālie kimoutolu.—Sāme 119:101; Palovepi 22:3.

14. ʻOku anga-fēfē hono hanga ʻe he mītiá ʻi he taimi ʻe niʻihi, ʻo pulusi ʻa e leʻo ʻo e kehé?

¹⁴ Ngaahi tukuakiʻi loi. Neongo ʻoku ʻikai filifilimānako ʻa e ngaahi fakamatala ongoongo ʻe niʻihi fekauʻaki mo e Kau Fakamoʻoni ʻa Sihová, ʻi he taimi lahi ʻoku fakaʻatā ʻe he mītiá kinautolu ke ngāueʻaki ki hono fakamafola ʻa e leʻo filifilimānako ʻo e kehé. Hangē ko ʻení, ʻi he fonua ʻe taha naʻe fakamatala loi ai ʻa e ngaahi fakamatala ongoongó ʻo pehē naʻe poupouʻi ʻe he Kau Fakamoʻoní ʻa e pule ʻa Hitilaá he lolotonga ʻa e Tau II ʻa Māmaní. ʻI ha toe fonua ʻe taha, naʻe tukuakiʻi ai ʻe ha fakamatala ʻa e Kau Fakamoʻoní ki hono maumauʻi ʻo e ngaahi fale lotú. ʻI he ngaahi fonua ʻe niʻihi naʻe tukuakiʻi ai ʻe he mītiá ʻa e Kau Fakamoʻoní ki hono fakafisingaʻi ʻa e ngāue fakafaitoʻo ki heʻenau fānaú pea pehē foki ki hono fakamolemoleʻi loto-lelei ʻa e ngaahi angahala mamafa ʻoku fakahoko ʻe he kaungātuí. (Mātiu 10:22) Neongo ia, ko e kakai loto-totonu ko ia ʻoku nau ʻilo fakafoʻituitui kitautolú ʻoku nau ʻiloʻi ʻoku loi ʻa e ngaahi tukuakiʻi peheé.

15. Ko e hā ʻoku taʻefakapotopoto ai ke tui ki he meʻa kotoa pē ʻoku ʻomai ʻi he mītiá?

¹⁵ Ko e hā ʻoku totonu ke tau faí kapau ʻoku tau fetaulaki mo ha ngaahi tukuakiʻi ʻoku fakamafola ʻe he leʻo ʻo e faʻahinga kehe peheé? ʻOku lelei ke tau fai ki he akonaki ʻi he Palovepi 14:15: “Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.” ʻOku taʻefakapotopoto ke tui ki he meʻa kotoa pē ʻoku ʻomai ko e foʻi moʻoni ʻi he mītiá. Neongo ʻoku ʻikai te tau taʻefalala moʻoni ki he maʻuʻanga fakamatala fakamāmani kotoa pē, ʻoku tau ʻiloʻi “ko hono kotoa ʻo mamani ʻoku ʻi he nima ʻo e Fili.”—Fakaʻītali ʻamautolu; 1 Sione 5:19.

“Sivi Pe ʻa e Ngaahi Laumalie”

16. (a) ʻOku anga-fēfē hono fakatātaaʻi ʻe he tōʻonga ʻa e fanga sipi moʻoní ʻa e moʻoni ʻo e ngaahi lea ʻa Sīsū ʻi he Sione 10:4? (e) Ko e hā ʻoku fakalototoʻaʻi mai ʻe he Tohi Tapú ke tau faí?

¹⁶ Ko ia ai, ʻe malava fēfē ke tau fakapapauʻi pe ʻoku tau feangainga mo ha kaumeʻa pe ko ha fili? Sai, ʻoku pehē ʻe Sīsū ʻoku muimui ʻa e fanga sipí ʻi he tauhí “koeʻuhi ʻoku nau ʻilo hono leʻo.” (Sione 10:4) ʻOku ʻikai ko e fōtunga hāmai moʻoni ʻo e tauhí ʻokú ne ueʻi ʻa e fanga sipí ke nau muimui ai ʻiate iá; ko hono leʻó. Ko ha tohi ʻi he ngaahi fonua ʻo e Tohi Tapú ʻoku fakamatala ai ʻo pehē naʻe taukaveʻi ʻe ha tokotaha ʻaʻahi ʻi he taimi ʻe taha ʻo pehē ʻoku ʻiloʻi ʻe he fanga sipí ʻa honau tauhí ʻi hono teungá, kae ʻikai ʻi hono leʻó. Naʻe tali ʻe ha tauhi-sipi ʻo pehē ko e leʻó naʻa nau ʻilo aí. Ke fakamoʻoniʻi ʻení, naʻá ne fakafetongi vala mo e tokotaha ʻaʻahí. ʻI hono tui ʻa e vala ʻo e tauhi-sipí, naʻe ui atu leva ʻe he kehé ʻa e fanga sipí, ka naʻe ʻikai te nau ngaue. Naʻe ʻikai te nau ʻiloʻi hono leʻó. Ka, ʻi hono ui kinautolu ʻe he tauhi-sipí, neongo naʻá ne teunga fakapuli, naʻe haʻu ʻa e fanga sipí ʻi he taimi pē ko iá. Ko ia ai, ʻe hā ngali hangē nai ha tauhi-sipí ha taha, ka ki he fanga sipí, ʻoku ʻikai fakamoʻoniʻi ia ai ko e tauhi moʻoní ia. Ko hono moʻoní, ʻoku siviʻi ʻe he fanga sipí ʻa e leʻo ʻo e tokotaha ʻoku uí, ʻo fakahoa ia mo e leʻo ʻo e tauhí. ʻOku tala mai ʻe he Folofola ʻa e ʻOtuá ke tau fai ʻa e meʻa tatau—“sivi pe ʻa e ngaahi laumalie, pe ʻoku mei he ʻOtua ia.” (1 Sione 4:1; 2 Timote 1:13) Ko e hā te ne tokoniʻi kitautolu ke fai peheé?

17. (a) ʻE anga-fēfē ʻetau hoko ʻo maheni mo e leʻo ʻo Sihová? (e) ʻOku fakaivia kitautolu ʻe he ʻiloʻi ʻo Sihová ke tau fai ʻa e hā?

¹⁷ Ko e meʻa mahino ia, ko e lelei ange ʻo ʻetau ʻiloʻi ʻa e leʻo pe pōpoaki ʻa Sihová, ko e lelei ange ia ʻa e lava ke tau ʻiloʻi ʻa e leʻo ʻo e kehé. ʻOku fakahaaʻi mai ʻe he Tohi Tapú ʻa e founga ke tau fakatupulekina ai ʻa e ʻilo peheé. ʻOkú ne pehē: “ʻE fanongo ʻe ho telinga ki ha lea mei ho tuʻa, Ko eni ʻa e hala, fou ai.” (Aisea 30:21) Ko e “lea” mei hotau tuʻá ʻoku haʻu ia mei he Folofola ʻa e ʻOtuá. ʻI he taimi kotoa pē ʻoku tau lau ai ʻa e Folofola ʻa e ʻOtuá, ʻoku tau fanongo ai, hangē ko e laú, ki he leʻo ʻo hotau Tauhi Lahí, ʻa Sihova. (Sāme 23:1) Ko ia ai, ko e lahi ange ʻo ʻetau ako ʻa e Tohi Tapú, ko ʻetau maheni ange ia mo e leʻo ʻo e ʻOtuá. ʻE fakaivia leva kitautolu ʻe he ʻilo lahi ko iá ke tau ʻiloʻi vave ʻa e leʻo ʻo e kehé.—Kaletia 1:8.

18. (a) Ko e hā ʻoku kau ki hono ʻiloʻi ʻa e leʻo ʻo Sihová? (e) Fakatatau ki he Mātiu 17:​5, ko e hā ʻoku totonu ai ke tau talangofua ki he leʻo ʻo Sīsuú?

¹⁸ Ko e hā ʻoku toe kau ki hono ʻiloʻi ʻa e leʻo ʻo Sihová? Tuku kehe ʻa e fanongó, ʻoku kau ki ai ʻa e talangofuá. Toe fakatokangaʻi ʻa e Aisea 30:21. ʻOku fanongonongo mai ʻe he Folofola ʻa e ʻOtuá: “Ko eni ʻa e hala.” ʻIo, fakafou ʻi ha ako ʻo e Tohi Tapú, ʻoku tau fanongo ai ki he ngaahi fakahinohino ʻa Sihová. Ko hono hokó, ʻokú ne fekau mai: “Fou ai.” ʻOku fiemaʻu mai ʻe Sihova ke tau fai ki he meʻa ʻoku tau fanongo ki aí. Ko ia, ʻi hono ngāueʻaki ʻa e meʻa ʻoku tau akó, ʻoku tau fakahāhā ai kuo ʻikai ke tau fanongoa ʻataʻatā pē ʻa e leʻo ʻo Sihová ka ʻoku tau toe fakaongo ki ai. (Teutalonome 28:1) Ko e talangofua ki he leʻo ʻo Sihová ʻoku toe ʻuhingá ke talangofua ki he leʻo ʻo Sīsuú, he naʻe folofola mai ʻa Sihova tonu ke tau fai pehē. (Mātiu 17:5) Ko e hā ʻoku tala mai ʻe Sīsū ko e Tauhi-Sipi Leleí ke tau faí? ʻOkú ne akoʻi kitautolu ke tau ngaohi ākonga pea ke falala ki he “tamaioeiki agatonu mo boto.” (Mātiu 24:​45, PM; Mt 28:​18-20) Ko e talangofua ki hono leʻó ʻoku mahuʻinga ia ki heʻetau moʻui taʻengatá.—Ngāue 3:23.

‘Te Nau Hola Meiate Ia’

19. ʻOku totonu ke fēfē ʻetau tali ki he leʻo ʻo e kehé?

¹⁹ ʻOku totonu leva ke fēfē ʻetau tali ki he leʻo ʻo e kehé? ʻI he founga ʻo e tali ʻa e fanga sipí. ʻOku pehē ʻe Sīsū: “ʻE ʻikai ʻaupito te nau muimui ki ha kehe, ka te nau hola meiate ia.” (Sione 10:5) ʻOku ua ʻetau talí. ʻUluakí, ‘ʻe ʻikai ʻaupito te tau muimui’ ki ha kehe. ʻIo, te tau talitekeʻi fakaʻaufuli ha kehe. Ko hono moʻoní, ʻi he lea faka-Kalisi Fakatohitapú, ko e lea “ʻikai ʻaupito” ʻokú ne fakamatalaʻi ʻa e founga mālohi taha ke fakahaaʻi ʻaki ʻi he lea ko iá ʻa e talitekeʻí. (Mātiu 24:35; Hepelu 13:5) Ko hono uá, te tau “hola meiate ia,” pe tafoki meiate ia. Ko e founga totonu pē ia ʻe taha ke taliʻaki ki he faʻahinga ʻa ia ko ʻenau ngaahi akonakí ʻoku ʻikai ke fehoanaki mo e leʻo ʻo e Tauhi Leleí.

20. ʻE anga-fēfē ʻetau talí ʻi he taimi ʻoku tau fetaulaki ai mo e (a) kau tafoki kākā mei he moʻoní, (e) ngaahi feohi fakatupu maumaú, (f) ngaahi fakamatala filifilimānako ʻi he mītiá?

²⁰ Ko ia ai, ʻi he fetaulaki mo e faʻahinga ʻoku nau fakahā ʻa e ngaahi fakakaukau tafoki mei he moʻoní, ʻoku tau fiemaʻu ke fai ʻa e meʻa ʻoku tala mai ʻe he Folofola ʻa e ʻOtuá: “Mou vakai ʻa kinautolu ʻoku fakatupu ʻa e ngaahi fakavahavahaʻa mo e ngaahi tūkiaʻanga ʻa ia ʻoku fehalaaki mo e tokateline naʻa mou ako ai; pea mou fakaʻehiʻehi meiate kinautolu.” (Fakaʻītali ʻamautolu; Loma 16:17; Taitusi 3:10) ʻIkai ko ia pē, ko e kau talavou Kalisitiane ʻoku nau fehangahangai mo e ngaahi fakatuʻutāmaki ʻo e ngaahi feohi fakatupu maumaú ʻoku fiemaʻu ke nau ngāueʻaki ʻa e akonaki ʻa Paula naʻe ʻoange ki he talavou ko Tīmoté: “Ko e ngaahi holi fakatalavou ke ke hola mei ai.” Pea ʻi he taimi ʻoku fetaulaki ai mo e ngaahi tukuakiʻi loi ʻi he mītiá, te tau manatuʻi ʻa e toe faleʻi ʻa Paula kia Tīmoté: “Te nau [faʻahinga ʻoku nau fanongo ki he leʻo ʻo e kehé] . . . tuli taubau ki he mea loi. Ka ke leo be akoe i he mea kotoabe.” (Fakaʻītali ʻamautolu; 2 Timote 2:22; 4:​3-5, PM) Tatau ai pē pe ʻoku hā ngali momole fēfē ʻa e leʻo ʻo e kehé, ʻoku tau hola mei he faʻahinga kotoa pē te nau maumauʻi ʻetau tuí.—Sāme 26:5; Palovepi 7:​5, 21; Fakahā 18:​2, 4.

21. Ko e hā ʻa e pale ʻoku fakatatali mai ki he faʻahinga ʻoku nau talitekeʻi ʻa e leʻo ʻo e kehé?

²¹ ʻI hono siʻaki ʻa e leʻo ʻo e kehé, ʻoku tali ʻa e kau Kalisitiane paní ia ki he ngaahi lea ʻa e Tauhi Leleí ʻoku maʻu ʻi he Luke 12:32. ʻOku pehē ai ʻe Sīsū kiate kinautolu: “Naʻi fanga sipi toko siʻi, ʻoua ʻe manavahe; he kuo finangalo ʻe hoʻomou Tamai ke ʻatu kiate kimoutolu ʻa e puleanga.” ʻI he tuʻunga meimei tatau, ʻoku vēkeveke fakatuʻamelie atu ʻa e “fanga sipi kehe” ke fanongo ki he ngaahi lea ʻa Sīsuú: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.” (Sione 10:16; Mātiu 25:34) Ko ha pale fakalotomāfana ē ʻoku fakatatali mai kiate kitautolú kapau ʻoku tau talitekeʻi ʻa e “leʻo ʻo e kehe”!

ʻOkú Ke Manatuʻi?

• ʻOku feʻunga fēfē ʻa Sētane mo e fakamatala ki he kehe ʻoku lave ki ai ʻi he talanoa fakatātā ʻa Sīsū fekauʻaki mo e lotoʻā sipí?

• ʻI he founga fē ʻoku fanongoa ai he ʻahó ni ʻa e leʻo ʻo e kehé?

• ʻE lava fēfē ke tau ʻiloʻi ʻa e leʻo ʻo e kehé?

• ʻOku totonu ke fēfē ʻetau tali ki he leʻo ʻo e kehé?

[Fakatātā ʻi he peesi 15]

Naʻe ʻiloʻi ʻe Mele ʻa Kalaisi

[Fakatātā ʻi he peesi 16]

Ko e kehé ʻoku ʻikai te ne fakaofiofi hangatonu ki he fanga sipí

[Fakatātā ʻi he peesi 18]

ʻOku anga-fēfē ʻetau tali ki he leʻo ʻo e kehé?