“Te U Laka Takai ʻi Ho ʻŌlitá, ʻe Sihova”

“TE U fanofano ʻa hoku ongo nimá ʻi he tonuhia, pea te u laka takai ʻi ho ʻōlitá, ʻe Sihova.” (Sāme 26:​6, NW) ʻI he ngaahi leá ni naʻe fakahā ai ʻe Tuʻi Tēvita ʻo e kuonga muʻá ʻa ʻene līʻoa kia Sihová. Ko ia ai, ko e hā te ne “laka takai” ai ʻi he ʻōlita ʻo Sihová, pea ʻi he ʻuhinga fē?

Kia Tēvita, ko e senitā ʻo e lotu ʻa Sihová ʻa e tāpanekalé mo hono ʻōlita feilaulau ʻufiʻufi kopá, ʻa ia lolotonga ʻa ʻene pulé naʻe tuʻu ia ʻi Kipione, ki he tokelau ʻo Selusalemá. (1 Tuʻi 3:4) Ko e ʻōlitá naʻe mita pē nai ʻe 2.2 tapafā tatau, ʻo siʻi ʻaupito ia ʻi he ʻōlita fisifisimuʻa ʻe toki fokotuʻu ʻi he lotoʻā ʻo e temipale ʻo Solomoné.a Neongo ia, naʻe maʻu ʻe Tēvita ʻa e fiefia lahi ʻi he tāpanekalé mo hono ʻōlitá, ʻa ia ko e senitā ia ʻo e lotu maʻa ʻi ʻIsilelí.​—Sāme 26:8.

Ko e ngaahi feilaulau tutú, ngaahi feilaulau ʻofá, mo e ngaahi feilaulau halaiá naʻe fai ia ʻi he ʻōlitá, pea ko e ʻAho Fakalelei fakataʻú naʻá ne fakahāhaaʻi ʻa e ngaahi feilaulau naʻe fai maʻá e puleʻangá. Ko e ʻōlitá mo hono ngaahi feilaulaú ʻoku ʻi ai hono ʻuhinga ki he kau Kalisitiane he ʻaho ní. Naʻe fakamatalaʻi ʻe he ʻapositolo ko Paulá ko e ʻōlitá naʻá ne hanga ʻo fakafofongaʻi ʻa e finangalo ʻo e ʻOtuá, ʻa ia fakatatau ki ai naʻá Ne tali ai ha feilaulau feʻungamālie ki hono huhuʻi ʻo e faʻahinga ʻo e tangatá. Naʻe pehē ʻe Paula: “Bea koe finagalo koia oku fakamaonioniʻi ai akitautolu, i he feilaulau aki ae jino o Jisu Kalaisi o liuga taha be.”—Hepelu 10:​5-10, PM.

ʻI he taimi naʻe teu ai ke nau ngāue ʻi he ʻōlitá, naʻe fanofano fakaeouau ʻe he kau taulaʻeikí honau nimá ʻi he vaí ke fakamaʻa kinautolu. ʻOku feʻungamālie leva, ʻa e fanofano ʻe Tuʻi Tēvita ʻa hono ongo nimá “ʻi he tonuhia” ki muʻa ke ne ‘laka takai ʻi he ʻōlitá.’ Naʻá ne ngāue “ʻi he loto haohaoa mo e fai totonu.” (1 Tuʻi 9:4) Kapau naʻe ʻikai te ne fanofano ʻa hono ongo nimá ʻi he foungá ni, ko ʻene lotú​—ʻa ʻene ‘lue takai ʻi he ʻōlitá’—naʻe ʻikai ke mei tali lelei. Ko e moʻoni, ko Tēvitá naʻe ʻikai ko ha Līvai pea naʻe ʻikai te ne maʻu ʻa e monū ʻo hono fai ʻa e ngāue fakataulaʻeiki ʻi he ʻōlitá. Neongo ko ha tuʻi ia, naʻe ʻikai pē ke fakaʻatā ia ki he lotoʻā ʻo e tāpanekalé. Neongo ia, ʻi he tuʻunga ko ha tokotaha ʻIsileli anga-tonú, naʻá ne talangofua ki he Lao ʻa Mōsesé peá ne ʻomai tuʻumaʻu ʻa ʻene ngaahi feilaulau ke foaki atu ʻi he ʻōlitá. Naʻá ne lue takai ʻi he ʻōlitá ʻi he ʻuhinga ko hono fakatefito ʻa ʻene moʻuí ʻi he lotu maʻá.

Te tau lava he ʻahó ni ke muimui ʻi he faʻifaʻitakiʻanga ʻa Tēvitá? ʻIo. Ko kitautolu foki ʻe lava ke tau fanofano hotau nimá ʻi he tonuhia pea laka takai ʻi he ʻōlita ʻo e ʻOtuá kapau ʻoku tau ngāueʻi ʻa e tui ki he feilaulau ʻa Sīsuú pea ‘nima maʻa mo loto ʻataʻatā,’ ʻi he tauhi ʻaufuatō kia Sihová.​—Sāme 24:4.

[Fakamatala ʻi lalo]

[Fakatātā ʻi he peesi 23]

Naʻe fakatātaaʻi ʻe he ʻōlitá ʻa e finangalo ʻo Sihová, ʻa ia ʻokú ne tali ai ha feilaulau totonu ki hono huhuʻi ʻa e faʻahinga ʻo e tangatá