ʻOku Liliuʻi ʻe he Moʻoní ʻa e Moʻuí

ʻOKU fakalotomamahi ka ʻoku moʻoni ko e moʻui ia ʻa e fuʻu kakai tokolahi he ʻaho ní ʻoku faingataʻa, naʻa mo ʻene fakatuʻutāmaki. ʻOku malava ke maʻu ʻa e fiefiá ʻe he kakai peheé? Ko e niʻihi ko e kau faihia pea ʻoku nau faifakamālohi ki honau ngaahi kaungāʻapí. ʻE lava ke nau teitei hoko ko e kau mēmipa faitotonu ʻo e sōsaietí? Ko e tali ki he ongo fehuʻí ni fakatouʻosi ko e ʻio. ʻOku lava ke liliu ʻa e kakaí. ʻE lava ke fakafoʻou ʻa e ngaahi moʻuí. Naʻe fakahaaʻi ʻe he ʻaposetolo ko Paulá ʻa e foungá ʻi heʻene tohi: “Tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.”​—Loma 12:2.

Ko e lave ki he “finangalo ʻo e ʻOtua . . . ʻoku haohaoa” ʻe ʻomi nai ai ki heʻetau fakakaukaú ʻa e meʻa naʻe leaʻaki ʻe Sīsū ki heʻene kau ākongá laka hake he taʻu ʻe 20 ki muʻa ʻi hono tohi ʻe Paula ʻa e ngaahi lea ʻi ʻolungá. Naʻe pehē ʻe Sīsū: “ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:32) ʻE he “moʻoni,” naʻe ʻuhinga ʻa Sīsuú ki he fakahinohino kuo fakamānavaʻi fakaʻotua​—tautefito ki he fakahinohino ʻo fekauʻaki mo e finangalo ʻo e ʻOtuá​—ʻa ia kuo fakatolonga mai maʻa kitautolu ʻi he Tohitapú. (Sione 17:17) ʻOku fakatauʻatāinaʻi moʻoni ʻa e kakaí ʻe he moʻoni ʻo e Tohitapú? ʻOku liliuʻi moʻoni ʻa e ngaahi moʻuí ʻi he moʻui ʻo fehoanaki mo e finangalo ʻo e ʻOtuá? Ko e moʻoni ʻoku pehē. Vakai angé ki ha ngaahi fakatātā.

Ko ha Taumuʻa ʻi he Moʻuí

ʻIkai fuʻu fuoloa atu, ko Moisés, ʻi Gibraltar, ko ha tangata mātuʻaki taʻefiefia moʻoni. ʻOkú ne pehē: “Ko ha tokotaha konā au peá u mohe ʻi he halá. Naʻá ku ongoʻi mātuʻaki faingatāmaki. Naʻá ku kole ki he ʻOtuá ʻi he pō kotoa ke meesi mai kiate au pea ʻoua naʻa ʻai au ke u kātekina ha toe ʻaho ʻe taha. Naʻá ku tangi ʻi heʻeku ʻeke ki he ʻOtuá pe ko e hā hono ʻuhinga ne ʻomai ai au ki he māmani ko ʻení kapau ʻoku ʻikai haku ʻaonga, ʻikai ha ngāue, hala ha fāmili, pea ʻikai ha taha ke tokoni mai kiate au. Ko e hā haʻaku totonu ke kei hokohoko atu ʻi he moʻuí?” Naʻe ʻi ai leva ʻa e meʻa naʻe hoko.

ʻOku hoko atu ʻa Moisés: “Naʻá ku ʻiloʻi kuo fanongo mai ʻa e ʻOtuá ki heʻeku lotú ʻi heʻeku fetaulaki mo Roberto, ko e taha ʻo e Kau Fakamoʻoni ʻa Sihová. Naʻe ʻomai ʻe Roberto kiate au ha Tohitapu mo ha tatau ʻo e tokoni ki he ako Tohitapú ʻo e Ko e Hā ʻOku Fiemaʻu ʻe he ʻOtuá Meiate Kitautolú?a Naʻá ma ako fakataha ʻa e Tohitapú ʻi he ʻaho kotoa pē ʻi he sea ʻa ia naʻá ku mohe ai ʻi he poʻulí. Hili mei ai ha māhina, naʻe ʻave au ʻe Roberto ki ha fakataha ʻi he Fale Fakatahaʻanga fakakolo ʻo e Kau Fakamoʻoni ʻa Sihová. ʻIkai fuoloa, kuo liliuʻi fakaʻaufuli ʻa ʻeku fakakaukaú ʻe he moʻoni ʻo e Tohitapú. Naʻe ʻikai leva ke u toe mohe ʻi tuʻa; pe te u toe inu mo ifi. Kuo liliu ʻa ʻeku moʻuí, pea ʻoku ou fiefia. ʻOku ou ʻamanaki pē ʻe vavé ni haʻaku papitaiso pea tauhi ʻa Sihova ʻi he tuʻunga ko e taha ʻo ʻene Kau Fakamoʻoní.”

He liliu lahi ē! ʻOku faʻa hoko ko e ʻuhinga ia ʻo e ʻikai ha ʻamanaki ʻa e kakaí, ko e ʻikai ha ʻiló. ʻOku ʻikai te nau ʻilo fekauʻaki mo e ʻOtuá pe ko ʻene ngaahi taumuʻa fakaofó. ʻI he tuʻunga ʻo Moisés, ʻi he taimi naʻá ne maʻu ai ʻa e ʻilo ko iá, naʻe ʻoange ai kiate ia ʻa e mālohi mo e loto-toʻa ke liliuʻiʻaki ʻene tōʻonga moʻuí. Ko e lotu ko ia ʻa e tokotaha-tohi-sāmé ki he ʻOtuá naʻe tali mai ia ʻi he tuʻunga ʻo Moisés: “Ko hoʻo māma mo hoʻo moʻoni, ʻe fekau mai muʻa; ke taki au ʻe kinaua: ʻo ʻave au ki ho moʻunga tapu na, ki he ngaahi tapanekale ʻo e ʻAfiona.”​—Sāme 43:3.

ʻI Pēlisi, naʻe ʻi ai ha meʻa naʻe hokosia taʻealafakatataua ʻe Daniel. Naʻe ʻikai ke mohe ʻa Daniel ʻi he ngaahi halá​—naʻá ne maʻu ha ngāue māʻolunga. Ka ʻi he taʻu ʻe 20 naʻá ne faitau ai mo hono maʻunimā ʻe he faitoʻo kona tapú mo e ʻolokaholó peá ne tākiekina ha moʻui ʻulungaanga taʻetaau. Neongo naʻe ʻohake ia ko ha Katolika, naʻe ʻikai lava ke sio ʻa Daniel ia ki hano ʻuhinga ʻo e moʻuí, pea naʻá ne veiveiua fekauʻaki mo e ʻi ai ha ʻOtuá. Naʻá ne ʻalu holo ʻo kumi tokoni ʻi he ngaahi siasi kehekehe ka naʻá ne ʻilo ai ko e tokolahi ʻo hono ngaahi kaungāmeʻa maʻu lotú pea naʻa mo e niʻihi ʻo hono ngaahi kaungāmeʻa ko e kau faifekaú naʻa nau ngāuehalaʻaki ʻa e faitoʻo kona tapú pe ʻolokaholó. ʻI he taimi tatau, ne te u ke veteʻi ia ʻe hono malí.

ʻI hono tuʻunga faingatāmakí naʻe ʻalu ʻa Daniel ʻo nofo ʻi ha senitā fakaleleiʻanga moʻui. Neongo ia, naʻá ne ʻiloʻi ko e hili pē ʻa hono fakaʻataá, ʻe vave pē ʻene toe foki ki he faitoʻo kona tapú kapau naʻe ʻikai te ne maʻu ha tokoni. Ka ko e faʻahinga tokoni fēfē? ʻI Mē 1996, ko e ʻaho ia ʻe ua ʻene mavahe mei he senitā fakaleleiʻanga moʻuí, naʻe fakaofiofi atu ai ʻa Daniel ki he taha ʻo e Kau Fakamoʻoni ʻa Sihová ʻo ne fakaʻohovaleʻi ia ʻaki ʻene kole, “Kātaki muʻa ʻo ako Tohitapu mo au.” Naʻe fokotuʻutuʻu leva ʻa e tokotaha Fakamoʻoní ke ako Tohitapu tuʻo ua he uike mo Daniel, pea naʻe vave leva ʻa e kamata ke fakatatau ʻe Daniel ʻene moʻuí ki he finangalo ʻo e ʻOtuá, ʻo ne fakafetongiʻaki hono ngaahi kaungāmeʻa motuʻá ʻa e ngaahi kaungāmeʻa Kalisitiane, ʻa ia naʻe ʻikai te nau ngāuehalaʻaki ʻa e faitoʻo kona tapú pe ʻolokaholó pea naʻa nau liʻaki fakaʻaufuli ʻa e ʻulungaanga taʻetāú. Ko ia, naʻe ʻilo ai ʻe Daniel ʻoku moʻoni ʻa e meʻa ʻoku leaʻaki ʻe he Tohitapú: “Ko ia ʻoku fafale ki he kau poto, te ne hoko ko e poto: ka ko ia ʻoku kaumeʻa mo e sesele ʻe hoko ko e lusa.” (Palovepi 13:20) Naʻá ne pehē leva: “Ko e fuofua taimi ʻeni ʻi heʻeku moʻuí kuó u ʻiloʻi ai ʻa e ʻuhinga ʻo e maʻu ʻo ha konisēnisi maʻá.” Naʻe liliu foki mo e moʻui ʻa Daniel.

ʻI Pueto Liko, naʻe hokosia ai ʻe ha tangata ʻe taha ha liliu ʻoku taau ke fakatokangaʻi. Naʻá ne ʻi he pilīsoné pea naʻe fai ʻa e fakakaukau ʻokú ne fakatuʻutāmaki ʻaupito, koeʻuhi kuó ne tāmateʻi ha kakai. ʻE lava ʻe he moʻoni ʻo e Tohitapú ʻo liliuʻi ia? ʻIo. Naʻe malava ʻo ʻoange kiate ia ʻe he taha ʻo e Kau Fakamoʻoni ʻa Sihová ha ngaahi tatau ʻo e makasini Taua Leʻo mo e Awake!, pea naʻe vave ʻene kole ki ha meʻa lahi ange. Naʻe kamata ha ako Tohitapu mo ia, pea ʻi he kamata ke laveʻi ʻa hono lotó ʻe he moʻoni ʻo e Tohitapú, naʻe hā mahino ki he tokotaha kotoa ʻa e ngaahi liliu naʻá ne faí. Ko e taha ʻo e ʻuluaki fakamoʻoni ʻo ʻene liliú ko ʻene kosi nonou hono ʻulu loloá mo tele ʻa hono fuʻu kavá.

ʻOku pehē ʻe he Tohitapú ʻoku fakamolemoleʻi ʻe he ʻOtuá ʻa e kau angahala ʻa ē ʻoku nau fakatomala moʻoni pea liliu ʻenau tōʻonga moʻuí. Naʻe tohi ʻe Paula: “ʻOku ʻikai te mou ʻilo ʻapē, ka ʻilonga ha niʻihi ʻoku ngaue taʻetotonu, ʻe ʻikai hanau tofiʻa ʻi he Puleʻanga ʻo e ʻOtua? . . . Pea naʻe pehe ʻa homou niʻihi: ka naʻa mou fufulu kimoutolu.” (1 Kolinito 6:​9, 11) ʻOku taʻetoeveiveiua, naʻe fakafiemālieʻi ʻe he ngaahi lea ko ʻení ʻa e tangatá ni, ʻo hangē pē ko e ngaahi lea ʻi he Ngāue 24:15: “ʻE faifai pea hoko ha toetuʻu ʻa e angatonu mo e angahala fakatouʻosi.” Naʻá ne pehē: “ʻOku ou loto ke u ʻi ai ʻi he taimi ʻe hoko ai ʻa e toetuʻu ki he kau maté, koeʻuhi ke lava ʻou kole fakamolemole ai ki he faʻahinga ko ia naʻá ku toʻo ʻenau moʻuí.”

Ko ha Fāmili Foʻou

Naʻe fakafeʻiloaki ʻi he ʻaho ʻe taha ʻa Luis ko ha tokotaha ʻevangeliō taimi-kakato ʻa e Kau Fakamoʻoni ʻa Sihová ʻi ʻĀsenitina, ki ha kiʻi talavou naʻe fakamamahi ʻa hono hisitōliá. ʻI hono liʻaki ia ʻi hono fanauʻí ʻe heʻene ongo mātuʻá, naʻe tauhi hake ia ʻi he ngaahi feituʻu kehekehe. ʻI he taimi nai naʻá ne taʻu 20 aí, naʻá ne ʻilo ai ʻa e feituʻu naʻe ʻi ai ʻa ʻene faʻeé peá ne fili ke nofo ofi kiate ia. Naʻá ne ngāue mālohi, ʻo tānaki ʻa e paʻanga lahi, peá ne fononga leva ki he kolo naʻe ʻi ai ʻa ʻene faʻeé. Naʻá ne fakaʻatā ange ia ke na nofo ʻo aʻu ki he ʻosi ʻa ʻene paʻangá, peá ne kole ange leva ke ne mavahe. ʻI hono talitekeʻi ko ʻení naʻe ʻai ai ia ke ne fakakaukau taonakita.

Kae kehe, naʻe lava ke vahevahe ʻe Luis ʻa e moʻoni ʻo e Tohitapú ki he kiʻi talavou ko ʻení. Naʻe kau ʻi he moʻoni ko iá ʻa e fakapapau: “Neongo ʻe liʻaki au ʻe heʻeku tamai mo ʻeku faʻe, ʻe fakahoko au ʻe Sihova kiate ia pe.” (Sāme 27:10) Naʻe ʻilo ʻe he kiʻi talavoú naʻe ʻi ai ʻa ʻene Tamai fakahēvani ʻa ia ʻe ʻikai te ne teitei liʻaki ia. ʻOkú ne fiefia ʻi he taimí ni ke hoko ko ha konga ʻo ha fāmili foʻou, ko e fāmili ʻo Sihová.

Naʻe tala ange ʻe he tangata ʻe taha ʻi he fonua tatau ki he taha ʻo e Kau Fakamoʻoni ʻa Sihová, naʻá ne saiʻia ʻi he makasini Taua Leʻo. Ko e hā hono ʻuhingá? Koeʻuhi he naʻá ne fakahaofi ʻa ʻene nofo malí. ʻOku haá, ʻi he ʻaho ʻe taha naʻe mavahe atu ai ʻa e tangatá ni mei he ngāué, naʻá ne sio ai ʻi he kapa vevé ki ha makasini Taua Leʻo fakataha mo e ʻuluʻitohi ko e “Vete Mali” ʻi he ngaahi mataʻitohi lalahi. Koeʻuhi he naʻe ʻi he tuʻunga faingataʻa ʻa ʻene nofo malí pea ko ia mo hono uaifí kuó na kamata ngāue ki ha māvae fakalao, naʻá ne toʻo ʻa e makasiní ʻo kamata ke ne lau ia. Naʻá ne ʻave ia ki ʻapi ʻo lau ia mo hono uaifí. Naʻe feinga ʻa e ongo meʻá ke ngāueʻaki ʻa e faleʻi makatuʻunga ʻi he Tohitapú naʻe ʻi he makasiní. (Efeso 5:​21–6:4) Naʻe vave leva ʻa e lelei ʻo hona vaá. Naʻá na taʻofi ʻa e ngaahi ngāue fakalao ki he māvaé pea ʻokú na ako he taimí ni ʻa e Tohitapú ʻi he tuʻunga ko ha ongo meʻa mali fāʻūtaha.

ʻI ʻUlukuei, naʻe ʻikai ke fiefia ʻa e tangata ai ʻe taha ko Luis. Ko e maʻunimā ʻe he faitoʻo kona tapú, fakahaʻele faʻahikehé, lotu ʻaitolí, ngāuehalaʻaki ʻa e ʻolokaholó​—ko e niʻihi ʻeni ʻo e ngaahi meʻa naʻá ne ʻai ke puputuʻu ʻa ʻene moʻuí. Faifai atu pē, ne siva fakaʻaufuli ʻa e ʻamanaki ʻa Luis, peá ne hoko ai ko ha taha fakaʻikaiʻi ʻOtua. Naʻe ʻoange kiate ia ʻe hano kaumeʻa ʻa e tohi ko e Life​—How Did It Get Here? By Evolution or by Creation?b Naʻe iku ʻeni ki heʻene fetuʻutaki taimi nounou mo e Kau Fakamoʻoni ʻa Sihová, ka naʻe vave pē ʻa e toe foki ʻa Luis ki he ʻolokaholó mo e faitoʻo kona tapú. ʻI he taimi ʻe taha, ʻi ha mōmeniti ʻo ʻene loto-mamahi lahí, naʻá ne tangutu hifo ai ʻi ha luo, fonu he vevé, ʻo ne lotu, ʻo fai ʻene lotú ki he “tamai ʻa Sīsū Kalaisí,” koeʻuhi he naʻe ʻikai te ne ʻilo fekauʻaki mo e huafa ʻo e ʻOtuá.

Naʻá ne kole ki he ʻOtuá ke fakahā ange kiate ia pe ʻoku ʻi ai ha ʻuhinga ʻo ʻene ʻi he māmaní. “ʻI he ʻaho pē hono hokó,” ko e fakamatala ia ʻa Luis, “naʻe ʻomai ai kiate au ʻe hoku mahení ha tohi naʻe ʻikai te ne toe ngāueʻaki. Ko hono ʻuluʻitohí? Ko e Revelation​—Its Grand Climax At Hand!”c Naʻe tokoniʻi ia ʻe he tohí ke tali ʻa ʻene fehuʻí. Naʻe toe lotu ʻa Luis ki ha tokoni ki hono ʻilo ʻa e lotu ʻa ia te ne fakahaaʻi kiate ia ʻa e founga ke tauhi ai ʻa e ʻOtuá. He toki fakaʻohovale ē! Naʻe lea ʻa e fafangu he matapaá, pea naʻe tuʻu mai mei tuʻa ʻa e ongo Fakamoʻoni ʻa Sihova ʻe toko ua. Naʻe kamata ako Tohitapu ai pē ʻi he taimi ko iá ʻa Luis mo kinaua. Naʻá ne fai ha fakalakalaka vave ʻaupito pea ʻokú ne ongoʻi he taimí ni kuó ne maʻu ʻa e tāpuaki ʻi heʻene hoko ko ha Fakamoʻoni ʻosi papitaiso. ʻOkú ne moʻui ʻulungaanga taau pea tokoniʻi ʻa e niʻihi kehé foki ke maʻu ha taumuʻa ki heʻenau moʻuí. Kuo hoko moʻoni kiate ia ʻa e ngaahi lea ʻi he Sāme 65:2: “Ko e tali lotu ʻa e ʻAfiona, ko ia ʻe alu atu ai kiate koe ʻa e kakano kotoa.”

ʻI he ʻOtu Motu Filipainí, naʻe hoko ai ʻa Allan ko ha tokotaha ako poupouʻi ʻa e ngāue fakahangatonu. Naʻá ne kau ki ha kautaha ʻa ia ko ʻene taumuʻá “ke tuku hifo ʻa e puleʻangá koeʻuhi ke fiefia ʻa e ngaahi toʻutangata kahaʻú ʻi he tuʻunga ʻo e tatau ki he tokotaha kotoa.” Ka ʻi he ʻaho ʻe taha, naʻá ne fetuʻutaki mo e Kau Fakamoʻoni ʻa Sihová peá ne ʻilo ai mei he Tohitapú ʻa e taumuʻa ʻa e ʻOtuá ki he faʻahinga ʻo e tangatá. Naʻe kau ʻi he taumuʻa ko iá ʻa e talaʻofa fakamānavaʻi: “ʻOku toe siʻi pea mole ʻa ia ʻoku faikovi; . . . Ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” (Sāme 37:​10, 11) Naʻe pehē ʻe Allan: “Naʻe vave ʻeku ʻiloʻi ko e meʻa ko ia naʻe faitau ki ai ʻemau kautahá ne ʻosi talaʻofa fuoloa mai pē ia ʻi he Tohitapú. Ko e ngaahi meʻa kotoa pē naʻa mau mātuʻaki holi faivelenga ki aí ʻe ʻomai ia ʻi he malumalu ʻo e Puleʻanga ʻo e ʻOtuá.” ʻOku poupouʻi ʻe Allan he taimí ni ʻa e Puleʻanga ʻo e ʻOtuá pea tokoniʻi ʻa e niʻihi kehé ke maʻu ʻa e tui ki he moʻoni ʻo e Tohitapú.

ʻIo, ʻoku liliuʻi ʻa e ngaahi moʻuí ʻi he taimi ʻoku tokanga ai ʻa e kakaí ki he moʻoni ʻo e Folofola ʻa e ʻOtuá, ko e Tohitapú. Ko e moʻoni, ʻoku hoko mai ʻa e taimi ʻa ia ko e faʻahinga kotoa ʻo e tangatá ʻe haó te nau ʻai ke fehoanakimālie ʻenau moʻuí mo e finangalo ʻo e ʻOtuá. He liliu lahi ē ʻe hokó! ʻE toki fakahoko leva ʻa e kikité: “ʻE ʻikai te nau fai ha maumau, pea ʻe ʻikai te nau fai ha fakaʻauha ʻi he kotoa ʻo hoku moʻunga tapu: he ʻe fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.”​—Aisea 11:9.

[Fakamatala ʻi lalo]