Ko e Hā ʻEne ʻUhinga Kiate Koe ʻa e ʻOfa Mateaki ʻa Sihová?

 1. Ko e hā ʻa e fakalototoʻa ʻoku ʻomai ʻe Sihova kiate kitautolú?

ʻOKU leleiʻia ʻa Sihova ʻi he ʻofa mateakí. (Hōs. 6:6) ʻOkú ne fakalototoʻaʻi māfana ʻene kau sevānití ke nau fai ʻa e meʻa tatau. Fakafou ʻi he palōfita ko Maiká, ʻoku ekinaki mai ai ʻa e ʻOtuá ke tau “ʻofa ʻi he ʻofa mateakí.” (Mai. 6:8, fkm. ʻi lalo) Ko hono moʻoní, ki muʻa ke tau fai iá, ʻoku fiemaʻu ke tau ʻiloʻi pe ko e hā ʻa e ʻofa mateaki.

 2. Ko e hā ʻa e ngaahi tafaʻaki ʻe niʻihi ʻo e ʻofa mateakí?

² Ko e hā ʻa e ʻofa mateaki? Ko e kupuʻi lea “ʻofa mateaki” ʻoku hā tuʻo 230 nai ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní. Ko e hā ia? Fakatatau ki he “Lea mo hono ʻUhinga ʻo e Ngaahi Foʻi Lea ʻi he Tohi Tapú,” ʻoku ʻuhinga iá “ki he ʻofa ʻoku ueʻi ʻe he tukupā, anga-tonu, mateaki, mo e mātuʻaki pīkitai. ʻOku faʻa ngāueʻaki ia fekauʻaki mo e ʻofa ʻa e ʻOtuá ki he faʻahinga ʻo e tangatá, ka ko e toe ʻofa foki ia ʻoku fakahāhā ʻi he vahaʻa ʻo e faʻahinga ʻo e tangatá.” Ko Sihova ko e faʻifaʻitakiʻanga māʻolunga taha ia ʻo e ʻofa mateakí. ʻI he kupu ko ení, te tau lāulea ai ki he founga hono fakahāhā ʻe Sihova ʻa e ʻofa mateakí ki he faʻahinga ʻo e tangatá. ʻI he kupu hono hokó, te tau lāulea ai ki he founga ʻe lava ke tau faʻifaʻitaki ai kia Sihova ʻi hotau tuʻunga ko ʻene kau sevāniti ʻi hono fefakahāhāʻaki ʻa e ʻofa mateakí.

 3. Naʻe anga-fēfē hono fakahaaʻi ʻe Sihova ʻa ia tonu kia Mōsesé?

³ ʻIkai fuoloa mei he ʻEkisoto ʻa ʻIsileli mei ʻIsipité, naʻe fakahaaʻi ʻe Sihova ʻa ia tonu kia Mōsese ʻaki hono tala ange hono huafá mo hono ʻulungāngá. Naʻá ne pehē: “Ko Sihova, ʻa Sihova, ko ha ʻOtua mohu meesi mo manavaʻofa, tuai ki he houhau pea fonu ʻi he ʻofa mateaki mo e moʻoni, ʻokú ne fakahaaʻi ʻa e ʻofa mateaki ki he laui afe, ʻo fakamolemoleʻi ʻa e faihalá mo e laka halá pea mo e angahalá.” (ʻEki. 34:6, 7) ʻI he fakamatala fakalotomāfana ko eni fekauʻaki mo Hono ngaahi ʻulungāngá, naʻe fakahaaʻi ai ʻe Sihova kia Mōsese ha tafaʻaki makehe ʻo ʻEne ʻofa mateakí. Ko e hā ia?

4-5. (a) Naʻe anga-fēfē hono fakamatalaʻi ʻe Sihova ʻa ia tonú? (e) Ko e hā ʻa e fehuʻi ʻe ua te tau lāulea ki aí?

⁴ Naʻe fakamatalaʻi ʻe Sihova ʻa ia tonu ʻo ʻikai ko ʻene maʻu pē ʻa e ʻofa mateakí ka ʻokú ne “fonu ʻi he ʻofa mateaki.” Ko e kupuʻi lea ko iá ʻoku toe lave tuʻo ono ki ai ʻi he Tohi Tapú. (Nōm. 14:18; Nehe. 9:17; Saame 86:15; 103:8; Sioeli 2:13; Siona 4:2) ʻI he ngaahi tuʻunga kotoa ko iá, ʻoku ngāueʻaki pē ʻa e kupuʻi lea ko iá kia Sihova, ʻo ʻikai ki he faʻahinga ʻo e tangatá. ʻIkai ʻoku makehe hono mātuʻaki fakamamafaʻi ʻe Sihova tonu ʻa hono ʻulungaanga ko e ʻofa mateakí? ʻOku ʻikai ha veiveiua, ko e ʻofa mateakí ʻoku mahuʻinga kiate ia.b Tāneʻineʻi ke ueʻi ʻa Tuʻi Tēvita ke ne talaki: “ʻE Sihova, ʻoku aʻu hake hoʻo ʻofa mateakí ki he langí . . . Hono ʻikai mahuʻinga hoʻo ʻofa mateakí, ʻe ʻOtua! ʻI he malumalu ʻo ho kapakaú, ʻoku hūfanga ki ai ʻa e ngaahi foha ʻo e tangatá.” (Saame 36:5, 7) Hangē ko Tēvitá, ʻoku tau houngaʻia lahi ʻi he ʻofa mateaki ʻa e ʻOtuá?

⁵ Ke fakalahi ʻetau mahinoʻi ʻa e ʻofa mateakí, tau lāulea angé ki ha fehuʻi ʻe ua: Ko hai ʻoku fakahāhā ki ai ʻe Sihova ʻa e ʻofa mateakí? Pea ʻoku lava fēfē ke tau maʻu ʻaonga mei he ngaahi ʻofa mateaki ʻa Sihová?

 6. Ko hai ʻoku fakahāhā ki ai ʻe Sihova ʻa e ʻofa mateakí?

⁶ Ko hai ʻoku fakahāhā ki ai ʻe Sihova ʻa e ʻofa mateakí? Ko e ʻofa mateakí ʻoku fakahāhā pē ki he kakaí. Ka ʻoku ʻikai ke fakahāhā ʻe Sihova ʻa e ʻofa mateakí ki ha faʻahinga taha pē. ʻOkú ne fakahāhā ia ki he faʻahinga ʻoku nau maʻu ha vahaʻangatae makehe mo ia. Ko hotau ʻOtuá ʻokú ne mateaki ki hono ngaahi kaumeʻá. ʻOku ʻi ai ʻene taumuʻa fakaofo kiate kinautolu, pea heʻikai ke ne foʻi ʻiate kinautolu.

 7. Kuo anga-fēfē hono fakahāhā ʻe Sihova ʻa e ʻofá ki he faʻahinga fakalūkufua ʻo e tangatá?

⁷ Kuo fakahāhā ʻe Sihova ʻa e ʻofá ki he faʻahinga fakalūkufua ʻo e tangatá. Naʻe tala ange ʻe Sīsū ki ha tangata ko Nikotīmasi: “Naʻe ʻofa lahi ʻaupito ʻa e ʻOtuá ki he [faʻahinga ʻo e tangatá] ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”​—Sione 3:1, 16; Māt. 5:44, 45.

8-9. (a) Ko e hā ʻoku fakahāhā ai ʻe Sihova ʻa e ʻofa mateakí ki heʻene kau sevānití? (e) Ko e hā ʻa e meʻa hono hoko te tau lāulea ki aí?

⁸ Hangē ko ia naʻe lave ki ai ki muʻá, ʻoku fakahāhā ʻe Sihova ʻene ʻofa mateakí ki he faʻahinga pē kuo nau maʻu ha vahaʻangatae fakahōifua mo ia​—ʻa ʻene kau sevānití. ʻOku hā mahino eni mei he fakamatala ʻa Tuʻi Tēvita mo e palōfita ko Tanielá. Ko e fakatātaá, naʻe pehē ʻe Tēvita: “Hokohoko atu hoʻo fakahāhā ʻa hoʻo ʻofa mateakí ki he faʻahinga ʻoku nau ʻiloʻi koé.” “Ko e ʻofa mateaki ʻa Sihová ʻe ʻi he kotoa ʻo ʻitānití ki he faʻahinga ʻoku manavahē kiate iá.” Pea naʻe fakahaaʻi ʻe Taniela: “ʻE Sihova ko e ʻOtua moʻoní [ʻa ia ʻokú ne] fakahaaʻi ʻa e ʻofa mateaki ki he faʻahinga ʻoku ʻofa kiate iá mo tauhi ʻene ngaahi fekaú.” (Saame 36:10; 103:17; Tan. 9:4) Fakatatau ki he ngaahi fakamatala fakamānavaʻi ko ení, ʻoku fakahāhā ʻe Sihova ʻa e ʻofa mateakí ki heʻene kau sevānití koeʻuhi ʻoku nau ʻiloʻi ia, manavahē kiate ia, ʻofa kiate ia pea tauhi ʻene ngaahi fekaú. ʻOku tuku tauhi ʻe Sihova ʻene ʻofa mateakí ki heʻene kakaí, ʻa ʻene kau lotu moʻoní.

⁹ ʻI he ki muʻa ke tau tauhi kia Sihová, naʻa tau maʻu ʻa e ʻofa ʻoku fakahāhā ʻe he ʻOtuá ki he faʻahinga fakalūkufua ʻo e tangatá. (Saame 104:14) Kae kehe, ʻi he tuʻunga ko ʻene kau lotu, ʻoku tau toe maʻu ʻaonga mei heʻene ʻofa mateakí. Ko hono moʻoní, ʻoku fakapapauʻi mai ʻe Sihova ki heʻene kau sevānití: “Ko ʻeku ʻofa mateakí ʻe ʻikai ke hiki ia meiate koe.” (‘Ai. 54:10) Ko e moʻoni, hangē ko ia naʻe hokosia tonu ʻe Tēvitá, “Ko Sihová te ne tōʻongafai ki heʻene tokotaha mateakí ʻi ha founga makehe.” (Saame 4:3) ʻOku totonu ke fēfē ʻetau fakafeangai ki he tokanga makehe mai ʻa Sihova kiate kitautolú? Naʻe pehē ʻe he tokotaha-tohi-sāmé: “ʻIlonga ʻa ia ʻoku potó te ne siofi ʻa e ngaahi meʻá ni pea fakakaukau fakalelei ki he ngaahi ʻofa mateaki ʻa Sihová.” (Saame 107:43) ʻI heʻetau fakakaukau ki he faleʻi fakamānavaʻi ko iá, tau lāulea angé ki ha founga ʻe tolu ʻoku maʻu ʻaonga ai ʻa e kau sevāniti ʻa Sihová mei heʻene ngaahi ʻofa mateakí.

10. ʻOku anga-fēfē hono tokoniʻi kitautolu ʻe he ʻofa mateaki ʻa e ʻOtuá ʻoku tolongá? (Saame 31:7)

¹⁰ Ko e ʻofa mateaki ʻa e ʻOtuá ʻoku tolonga. Ko e tafaʻaki mahuʻinga ko eni ʻo e ʻofa mateakí ʻoku lave tuʻo 26 ki ai ʻi he Saame 136. ʻI he veesi ʻuluakí, ʻoku tau lau ai: “Fakamālō kia Sihova, he ʻoku lelei ia; ko ʻene ʻofa mateakí ʻoku tolonga ʻo taʻengata.” (Saame 136:1) ʻI he veesi 2 ki he 26, ʻoku toutou lave ai ki heʻene “ʻofa mateakí ʻoku tolonga ʻo taʻengata.” ʻI heʻetau lau ʻa e toenga ʻo e ngaahi veesi ʻo e saame ko ení, ʻoku tau ofoofo ʻi he ngaahi founga lahi ʻoku fakahāhā taʻemamotu mai ai ʻe Sihova ʻene ʻofa mateakí. Ko e toutou lave ki heʻene “ʻofa mateakí ʻoku tolonga ʻo taʻengata” ʻoku fakapapauʻi mai ai ko e ʻofa ʻa e ʻOtuá ki heʻene kakaí ʻoku ʻikai ke liliu. He fakalototoʻa ē ke ʻiloʻi ʻoku ʻikai ke foʻi vave ʻa Sihova ʻi heʻene kau sevānití! ʻI hono kehé, ʻokú ne mātuʻaki pīkitai ki he faʻahinga ʻoku tauhi kiate iá, tautefito ʻi he taimi faingataʻá. Founga ʻoku tau maʻu ʻaonga aí: ʻI hono ʻiloʻi ʻoku pīkitai mai ʻa Sihova kiate kitautolú ʻoku ʻomai ai ʻa e fiefia mo e mālohi ʻoku fiemaʻu ke tau fekuki ai mo e faingataʻá pea hanganaki ʻaʻeva ʻi he hala ki he moʻuí.​—Lau ʻa e Saame 31:7.

11. Fakatatau ki he Saame 86:5, ko e hā ʻokú ne ueʻi ʻa Sihova ke fakamolemolé?

¹¹ Ko e ʻofa mateaki ʻa e ʻOtuá ʻokú ne ueʻi ia ke fakamolemole. ʻI he vakai ʻa Sihova ki ha tokotaha faiangahala ʻoku fakatomala pea talitekeʻi hono ʻalunga angahalaʻiá, ʻoku ueʻi Ia ʻe he ʻofa mateakí ke fakamolemole. Naʻe leaʻaki ʻe he tokotaha-tohi-saame ko Tēvitá fekauʻaki mo Sihova: “Kuo ʻikai te ne fai kiate kitautolu ʻo fakatatau ki heʻetau ngaahi angahalá, pe totongi kiate kitautolu ʻa e meʻa ʻoku tuha mo ʻetau ngaahi faihalá.” (Saame 103:8-11) Naʻe ʻiloʻi ʻe Tēvita mei heʻene hokosia fakamamahí tonu ʻa e mafatukituki hono fuesia ha konisēnisi halaia. Ka naʻá ne toe ʻiloʻi ko Sihová ʻoku “mateuteu ke fakamolemole.” Ko e hā ʻokú ne ueʻi ʻa Sihova ke fakamolemolé? Ko e talí ʻoku hiki ʻi he Saame 86:5. (Lau.) ʻIo, hangē ko e lea ʻi he lotu ʻa Tēvitá, ʻoku fakamolemole ʻa Sihová koeʻuhi ʻokú ne fonu ʻi he ʻofa mateaki ki he faʻahinga kotoa ʻoku ui kiate iá.

12-13. Kapau ʻoku lōmekina kitautolu ʻe he halaia koeʻuhi ko e ngaahi fehālaaki ʻi he kuohilí, ko e hā te ne tokoniʻi kitautolú?

¹² ʻI heʻetau faiangahalá, ʻoku feʻungamālie mo lelei ke tau ongoʻi halaia. ʻOku lava ke ueʻi ai kitautolu ke fakatomala pea fou ʻi ha ngaahi sitepu ke fakatonutonu ʻetau ngaahi fehālaakí. Neongo ia, ko e kau sevāniti ʻe niʻihi ʻa e ʻOtuá, kuo lōmekina kinautolu ʻe he ongoʻi halaiá koeʻuhi ko ʻenau ngaahi fehālaaki ʻi he kuohilí. ʻOku fakatuipauʻi kinautolu ʻe honau loto kuo fakahalaiaʻí heʻikai ʻaupito ke fakamolemoleʻi kinautolu ʻe Sihova​—neongo pe ko e hā ʻa e lahi ʻenau fakatomalá. Kapau ʻokú ke fekuki mo e ngaahi ongoʻi peheé, ʻe tokoniʻi koe ʻe he ako fekauʻaki mo e loto-lelei ʻa e ʻOtuá ke fakaaʻu atu ʻa e ʻofa mateakí ki heʻene kau sevānití.

¹³ Founga ʻoku tau maʻu ʻaonga aí: Neongo ʻetau taʻehaohaoá, ʻe lava ke tau tauhi fiefia kia Sihova mo ha konisēnisi maʻa. ʻOku malava eni koeʻuhí “ko e taʻataʻa ʻo Sīsū ko hono ʻAló ʻokú ne fakamaʻa kitautolu mei he angahalá kotoa.” (1 Sio. 1:7) ʻI haʻo loto-siʻi koeʻuhi ko e niʻihi hoʻo taʻehaohaoá, manatuʻi ko Sihová ʻoku loto-lelei, ʻio, ʻokú ne vēkeveke ke fakamolemoleʻi ha tokotaha faiangahala fakatomala. Fakatokangaʻi hono fakafekauʻaki ʻe Tēvita ʻa e ʻofa mateakí mo e fakamolemolé. Naʻá ne tohi: “ʻI he hangē ko e māʻolunga ange ʻa e langí ʻi he māmaní, ʻoku pehē ʻa e lahi ʻo ʻene ʻofa mateaki ki he faʻahinga ʻoku manavahē kiate iá. Hangē ko e mamaʻo ʻa e hopoʻanga laʻaá mei he tōʻanga laʻaá, ʻoku pehē ʻa e mamaʻo ʻo ʻene ʻave meiate kitautolu ʻa ʻetau laka halá.” (Saame 103:11, 12) Ko e moʻoni, ʻoku loto-lelei ʻa Sihova ke “fakamolemole ʻo lahi ʻaupito.”​—ʻAi. 55:7.

14. Naʻe anga-fēfē hono fakamatalaʻi ʻe Tēvita ʻa e founga ʻoku maluʻi ai kitautolu ʻe he ʻofa mateaki ʻa e ʻOtuá?

¹⁴ Ko e ʻofa mateaki ʻa e ʻOtuá ʻoku tokonaki mai ai ʻa e maluʻi fakalaumālie. ʻI ha lotu kia Sihova, naʻe pehē ʻe Tēvita: “Ko ha toitoiʻanga koe kiate au; te ke maluʻi au mei he faingataʻá. Te ke takatakaiʻi au ʻaki ʻa e kaikaila fiefia ʻo e fakahaofí. . . . Ko e tokotaha ʻoku falala kia Sihová ʻoku takatakaiʻi ia ʻe Heʻene ʻofa mateakí.” (Saame 32:7, 10) Hangē pē ko hono maluʻi ʻe ha ngaahi ʻā ʻokú ne takatakaiʻi ha kolo ʻi he kuonga muʻá ʻa hono kakaí, ʻoku pehē pē mo e ngaahi ʻofa mateaki ʻa Sihová ʻokú ne takatakaiʻi kitautolu, ʻo tokonaki mai ʻa e maluʻi fakalaumālie mei he ngaahi fakatuʻutāmaki te ne ʻahiʻahiʻi ʻetau anga-tonú. ʻIkai ngata aí, ko e ʻofa mateaki ʻa Sihová ʻokú ne ueʻi ia ke ne tohoakiʻi kitautolu kiate ia.​—Sel. 31:3.

15. Ko e hā ʻa e fekauʻaki ʻi he ʻofa mateaki ʻa Sihová mo ha hūfangaʻanga mo ha maluʻanga?

¹⁵ Naʻe toe ngāueʻaki ʻe Tēvita ha lea fakaefakatātā ke fakamatalaʻiʻaki ʻa e maluʻi ʻoku maʻu ʻe he kakai ʻa e ʻOtuá. Naʻá ne tohi: “Ko e ʻOtuá ʻa hoku hūfangaʻanga malú, ʻa e ʻOtua ʻa ia ʻokú ne fakahāhā ʻa e ʻofa mateaki kiate aú.” Naʻe toe lea ʻa Tēvita fekauʻaki mo Sihova: “Ko ia ʻokú ne fakahaaʻi mai ʻa e ʻofa mateakí pea ko hoku maluʻangá ia, ko hoku hūfangaʻanga malu mo hoku faifakahaofi, ko ʻeku pā pea ko e Tokotaha ʻa ia ʻoku ou fakaū ki aí.” (Saame 59:17; 144:2) Ko e hā naʻe fakafekauʻaki ai ʻe Tēvita ʻa e ʻofa mateaki ʻa Sihová ki ha hūfangaʻanga mo ha maluʻangá? Neongo pe ko fē ʻa e feituʻu ʻoku tau nofo aí, kapau ʻoku tau hoko ko e kau sevāniti ʻa Sihova, te Ne tokonaki mai ʻa e meʻa kotoa ʻoku tau fiemaʻú ke maluʻiʻaki hotau vahaʻangatae mahuʻinga mo iá. Ko e fakapapau tatau ʻoku maʻu ʻi he Saame 91. Naʻe fakahaaʻi ʻe he tokotaha-tohi-saame ko iá: “Te u pehē kia Sihova: ‘Ko koe ʻa hoku hūfangaʻangá mo hoku maluʻangá.’” (Saame 91:1-3, 9, 14) Naʻe ngāueʻaki ʻe Mōsese ʻa e lea fakaefakatātā tatau fekauʻaki mo ha hūfangaʻanga. (Saame 90:1, fkm. ʻi lalo) ʻIkai ngata aí, ʻi he ofi ke ngata ʻa e moʻui ʻa Mōsesé, naʻá ne fakahanga ʻa e tokangá ki ha fakaikiiki fakalotomāfana. Naʻá ne tohi: “Ko e ʻOtuá ko ha hūfanga ia talu mei muʻa, ko hono nima taʻengatá ʻoku ʻi lalo ʻiate koe.” (Teu. 33:27) Ko e hā ʻoku tala mai ʻe he kupuʻi lea “ko hono nima taʻengatá ʻoku ʻi lalo ʻiate koe” fekauʻaki mo Sihová?

16. Ko e hā ʻa e founga ʻe ua ʻoku faitāpuekina ai kitautolú? (Saame 136:23)

¹⁶ ʻI he hoko ʻa Sihova ko hotau Hūfangaʻangá, ʻoku tau ongoʻi malu. Neongo ia, ʻoku ʻi ai ʻa e ngaahi ʻaho ʻe niʻihi ʻoku tau ongoʻi loto-siʻi pea fāinga ke tuʻu hake. ʻI he taimi peheé, ko e hā ʻe fai ʻe Sihova maʻatautolú? (Lau ʻa e Saame 136:23.) Ko hono nimá ʻe ʻi lalo ʻiate kitautolu, ʻo ne fua fakaalaala hake kitautolu, pea te ne tokoni ke tau toe tuʻu hake. (Saame 28:9; 94:18) Founga ʻoku tau maʻu ʻaonga aí: ʻI hono ʻiloʻi ʻe lava ke tau falala maʻu pē ki he poupou ʻa e ʻOtuá ʻoku tokoniʻi ai kitautolu ke manatuʻi ʻoku faitāpuekina kitautolu ʻi ha founga ʻe ua. ʻUluakí, ʻoku tau maʻu ha hūfangaʻanga malu neongo pē ko fē ʻa e feituʻu ʻoku tau nofo aí. Uá, ko ʻetau Tamai fakahēvani ʻofá ʻoku tokanga lahi mai kiate kitautolu.

17. Ko e hā ʻa e tuipau ʻoku lava ke tau maʻu koeʻuhi ko e ʻofa mateaki ʻa e ʻOtuá? (Saame 33:18-22)

¹⁷ Hangē ko ia kuo tau lāulea ki aí, ʻi he fehangahangai mo ha ʻahiʻahi, ʻe lava ke tau fakapapauʻi ʻe tokoniʻi kitautolu ʻe Sihova ʻaki hono ʻomai ʻa e poupou ʻoku fiemaʻu ke tau tauhi maʻu ai ʻetau anga-tonú. (2 Kol. 4:7-9) Naʻe pehē ʻe he palōfita ko Selemaiá: “Koeʻuhi ko e ʻofa mateaki ʻa Sihová kuo ʻikai ke tau ʻauha ai, he ko ʻene faimēsí ʻe ʻikai ʻaupito ke toe ʻosi.” (Tangi. 3:22) ʻOku lava ke tau tuipau ko e ʻofa mateaki ʻa Sihová ʻe nofo ia ʻiate kitautolu koeʻuhí, hangē ko e fakapapauʻi mai ʻe he tokotaha-tohi-sāmé, “ko e fofonga ʻo Sihová ʻokú ne siofi ʻa e faʻahinga ʻoku manavahē kiate iá, ʻa e faʻahinga ʻoku nau tatali ki heʻene ʻofa mateakí.”​—Lau ʻa e Saame 33:18-22.

18-19. (a) Ko e hā ʻoku fiemaʻu ke tau manatuʻí? (e) Ko e hā te tau lāulea ki ai ʻi he kupu hono hokó?

¹⁸ Ko e hā ʻoku fiemaʻu ke tau manatuʻí? ʻI he ki muʻa ke tau tauhi kia Sihová, naʻa tau maʻu ʻa e ʻofa ʻoku fakahāhā ʻe he ʻOtuá ki he faʻahinga fakalūkufua ʻo e tangatá. Kae kehe, ʻi heʻetau hoko ko ʻene kau lotú, ʻoku tau toe maʻu ʻaonga mei heʻene ʻofa mateakí. ʻI hono ueʻi ʻa Sihova ʻe he ʻofa ko iá, ʻokú ne fakaaʻu mai hono nima maluʻí kiate kitautolu. Te ne pīkitai maʻu pē kiate kitautolu pea te ne fakahoko ʻene taumuʻa fekauʻaki mo kitautolú. Ko hono finangaló ke tau lavameʻa! (Saame 46:1, 2, 7) Ko ia ai, neongo pe ko e hā ha ʻahiʻahi te tau fehangahangai nai mo ia, ʻe ʻomai ʻe Sihova ʻa e mālohi ʻoku fiemaʻu ke tau tauhi maʻu ai ʻetau anga-tonú.

¹⁹ Kuo tau vakai ki he anga hono fakahāhā ʻe Sihova ʻa e ʻofa mateakí ki heʻene kau sevānití. Ko ia ʻokú ne ʻamanekina mai ke tau fefakahāhāʻaki ʻa e ʻofa mateakí. ʻE lava fēfē ke tau fai ia? ʻI he kupu hono hokó te tau lāulea ai ki he kaveinga mahuʻinga ko ení.